Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 5

E nafea ia faataa ê noa mai i teie nei ao?

E nafea ia faataa ê noa mai i teie nei ao?

“E ere outou i to teie nei ao.”—IOANE 15:19.

1. Eaha ta Iesu i haapapu i to ’na po hopea i nia i te fenua ei taata?

I TO ’NA po hopea i nia i te fenua ei taata, ua haapeapea roa Iesu no te maitai no a muri a‘e o ta ’na mau pǐpǐ. Ua pure atoa oia no te reira, ma te parau i to ’na Metua e: “Aore au i pure ia oe e ia hopoi ê atu oe ia ratou i teie nei ao, ia tiai mai râ oe ia [r]atou eiaha ei ino. E ere ratou i to teie nei ao, mai ia ’u nei hoi e ere i to teie nei ao.” (Ioane 17:15, 16) I roto i teie aniraa haavare ore, ua faaite Iesu i to ’na here hohonu no ta ’na mau pǐpǐ e i te faufaaraa atoa o ta ’na i parau na mua ’tu i taua po ra i vetahi o ratou: “E ere outou i to teie nei ao.” (Ioane 15:19) Te taa ra ia tatou e mea faufaa roa no Iesu ia faataa ê noa mai ta ’na mau pǐpǐ i teie nei ao!

2. Eaha “teie nei ao” ta Iesu i faahiti?

2 “Teie nei ao” ta Iesu i faahiti, o te huitaata atoa ïa tei atea ê i te Atua, e faaterehia ra e Satani, e e faatîtîhia ra e te varua teoteo e te miimii no ǒ mai ia ’na ra. (Ioane 14:30; Ephesia 2:2; Ioane 1, 5:19) Oia mau, “te hinaaro i teie nei ao, e taua au ore ïa i te Atua.” (Iakobo 4:4) E nafea râ e tia ’i i te feia atoa e hinaaro ra e vai noa i roto i te here o te Atua ia parahi i roto i teie nei ao ma te faataa ê mai râ ia ’na? E hi‘opoa tatou e pae ravea: ia taiva ore noa tatou i te Basileia o te Atua faaterehia e te Mesia e ia amui ore noa i te mau ohipa poritita a teie nei ao, ia patoi tatou i te varua o teie nei ao, ia faaieie ore to tatou faaahuraa e faaneheneheraa rouru, ia au noa to tatou huru oraraa e ia ahu tatou i ta tatou haana tama‘i pae varua.

 IA TAIVA ORE E IA AMUI ORE NOA TATOU

3. (a) Eaha to Iesu mana‘o i te mau ohipa poritita o to ’na ra tau? (b) No te aha e nehenehe ai e parau e te haa ra te mau pǐpǐ faatavaihia a Iesu ei tia? (A hi‘o atoa i te nota i raro i te api.)

3 Aita Iesu i apiti i te mau ohipa poritita o to ’na ra tau, ua haapao maite râ oia i ta ’na pororaa i te Basileia o te Atua, te faatereraa i te ra‘i no a muri a‘e o ’na te Arii. (Daniela 7:13, 14; Luka 4:43; 17:20, 21) No reira i tia ’i ia Iesu ia parau i mua i te tavana Roma o Ponotio Pilato e: “E ere i to teie nei ao to ’u basileia.” (Ioane 18:36) Te pee ra ta ’na mau pǐpǐ haapao maitai i to ’na hi‘oraa ma te horoa i to ratou taiva ore i te Mesia e i to ’na Basileia e ma te faaite i taua Basileia ra i to te ao. (Mataio 24:14) “E teie nei, e vea [aore ra tia] matou na te Mesia,” ta te aposetolo Paulo ïa i papai. “Ei ono matou i te Mesia, i te a‘oraa ’tu i te taata e, E faafaite outou i te Atua.” *Korinetia 2, 5:20.

4. Mea nafea te mau Kerisetiano mau atoa i te faaiteraa i to ratou taiva ore i te Basileia o te Atua? (A hi‘o i te tumu parau tarenihia “ Kerisetiano matamua amui ore.”)

4 No te mea e auvaha te mau tia no te hoê faatereraa aore ra fenua ê, eita ïa ratou e faaô i roto i te mau ohipa a te mau fenua i reira ratou e haa ’i; e amui ore noa ratou. E paturu râ te mau tia i te faatereraa o te fenua ta ratou e auvaha ’tu. Oia atoa no te mau pǐpǐ faatavaihia a te Mesia, “tei te ra‘i hoi to [r]atou ai‘a.” (Philipi 3:20, Traduction du monde nouveau) Oia mau, maoti ta ratou pororaa itoito rahi i te Basileia, ua tauturu ratou e mirioni “mamoe ê atu” a te Mesia ia “faafaite . . . i te Atua.” (Ioane 10:16; Mataio 25:31-40) Te haa ra teie mau mamoe ê atu ei vea na te Mesia, ei auraa parau, no te turu i te mau taeae faatavaihia o Iesu. Ei hoê nǎnǎ tahoê  e turu ra i te Basileia Mesia, te tapea maite ra na pǔpǔ e piti i te tiaraa amui ore i te mau ohipa poritita a teie nei ao.—A taio i te Isaia 2:2-4.

5. E nafea te amuiraa Kerisetiano e taa ê ai ia Iseraela i tahito ra, e e nafea teie taa-ê-raa e faaitehia ’i?

5 E ere no te taiva ore i te Mesia ana‘e e amui ore ai te mau  Kerisetiano mau. Taa ê roa ia Iseraela i tahito ra, ta te Atua i haaparahi i te hoê noa fenua, e melo tatou no te hoê fetii taeae nunaa rau. (Mataio 28:19; Petero 1, 2:9) No reira, mai te peu e e turu tatou i te mau pǔpǔ poritita i ǒ tatou nei, e fifi roa ïa to tatou tiamâraa e parau i te poroi o te Basileia e to tatou auhoêraa Kerisetiano. (Korinetia 1, 1:10) Hau atu â, i te tau tama‘i, e aro ïa tatou i to tatou mau hoa Kerisetiano, tei titauhia hoi ia here atu tatou. (Ioane 13:34, 35; Ioane 1, 3:10-12) Ua tano roa ïa Iesu i te parauraa i ta ’na mau pǐpǐ ia faaea i te tama‘i. E ua parau atoa o ’na ia ratou ia here i to ratou mau enemi.—Mataio 5:44; 26:52; a hi‘o i te tumu parau tarenihia “ Te amui ore noa ra anei au?

6. Eaha te faahopearaa o ta oe pûpûraa ia oe i te Atua i nia i to oe taairaa e o Kaisara?

6 Ei Kerisetiano mau, ua pûpû tatou i to tatou ora i te Atua, eiaha i te tahi taata, faanahonahoraa taata, aore ra nunaa. Te na ô ra te Korinetia 1, 6:19, 20 e: “E ere . . . outou i to outou iho. Ua tauihia hoi outou i te taui.” No reira, a tuu ai ratou i “ta Kaisara . . . ia Kaisara” na roto i te faatura, te tute, e te auraro taotiahia, te tuu ra te mau pǐpǐ a Iesu i “ta te Atua . . . i te Atua.” (Mareko 12:17; Roma 13:1-7) E ô atoa mai ta ratou haamoriraa, to ratou here ma te nephe atoa, e to ratou faarooraa taiva ore. Ia titauhia, ua ineine ratou i te haapae i to ratou ora no te Atua.—Luka 4:8; 10:27; a taio i te Ohipa 5:29; Roma 14:8.

IA PATOI TATOU I ‘TE VARUA O TEIE NEI AO’

7, 8. Eaha ‘te varua o teie nei ao,’ e e nafea taua varua ra e ‘ohipa ’i’ i roto i te taata faaroo ore?

7 Te tahi atu ravea e faataa ê noa mai ai te mau Kerisetiano i teie nei ao, o te patoiraa ïa i to ’na varua ino. “Te [v]arua i noaa ia tatou nei, e ere ïa i to teie nei ao, o te [v]arua râ no ǒ mai i te Atua ra,” ta Paulo ïa i papai. (Korinetia 1, 2:12) Teie ta ’na i parau i to Ephesia: “To outou . . . haerea i mutaa ihora, ta to teie nei ao [ï]a, ta te arii mana o te reva  nei, te varua e ohipa puai i teie nei i roto i te feia faaroo ore ra.”—Ephesia 2:2, 3.

8 E puai turai itea ore te “reva,” aore ra varua, o teie nei ao o te faaitoito ra i te faaroo ore i te Atua e “te hinaaro . . . o te tino” e “te hinaaro . . . o te mata.” (Ioane 1, 2:16; Timoteo 1, 6:9, 10) To roto te “mana” o teie varua i ta ’na faaaraararaa i te tino hara, to ’na huru râmâ, to ’na huru tamau, e mai te mata‘i, tei te mau vahi atoa te reira. Hau atu â, e “ohipa” te reira i roto i te taata faaroo ore ma te atuatu riirii i roto ia ratou i te mau huru paieti ore, mai te miimii, te ahaaha, e te nounou toroa, e te hinaaro e haamau i ta ’na iho ture aveia morare e e orure hau. * Ei haapotoraa, e faarahi riirii te varua o teie nei ao i te mau huru o te Diabolo i roto i te aau o te taata.—Ioane 8:44; Ohipa 13:10; Ioane 1, 3:8, 10.

9. E nafea te varua o teie nei ao e ô ai i roto i to tatou feruriraa e aau?

9 E nehenehe anei te varua o teie nei ao e a‘a i roto i to oe feruriraa e aau? E, mai te peu noa râ e eita oe e vai ara. (A taio i te Maseli 4:23.) E haamata pinepine to ’na mana ma te haavarevare, na roto paha i te mau hoa e au ra e e feia maitatai, aita râ e here ra ia Iehova. (Maseli 13:20; Korinetia 1, 15:33) E nehenehe atoa oe e farii i taua varua ino ra na roto i te mau papai tano ore, te mau afata poroi Internet apotata aore ra faufau, te mau faaanaanataeraa tia ore, e te mau ohipa tuaro tata‘u roa—oia mau, na roto i te taata aore ra te mea atoa o te tuu mai i te huru feruriraa o Satani aore ra o ta ’na ao.

10. E nafea tatou e nehenehe ai e patoi i te varua o teie nei ao?

10 E nafea tatou e nehenehe ai e patoi i te varua atâta o teie nei ao e e vai maite i roto i te here o te Atua? Ma te faaohipa hope noa ïa i te mau faanahoraa pae varua a Iehova e ma te pure tamau no te ani i te varua mo‘a. Mea rahi a‘e Iehova i te Diabolo aore ra i te ao ino ta Satani e faatere ra.  (Ioane 1, 4:4) Mea faufaa mau â ïa ia haafatata noa tatou ia Iehova i roto i te pure!

IA FAAIEIE ORE TO TATOU FAAAHURAA E FAANEHENEHERAA ROURU

11. Eaha te faahopearaa o te varua o teie nei ao i nia i te mau ture aveia o te faaahuraa?

11 Te hoê faaiteraa rapaeau o te varua e turai ra i te hoê taata, o to ’na ïa faaahuraa, faaneheneheraa rouru, e vai-mâ-raa.  I te fenua e rave rahi, ua topa roa te mau ture aveia o te faaahuraa i parau ai te hoê tane tatara parau afata teata e ua fatata aita e ahu faahou e toe mai no te mau taiata. O te mau potii atoa aitâ i taurearea ’tura tei hema i teie peu—“te faaiteite-rahi-raa i te tino, te ereraa i te faaieie ore,” ia au i te hoê vea. Te tahi atu peu, o te oomoraa ïa i te ahu haapaoraa ore o te faaite i te hoê huru feruriraa orure hau e te tura ore e te faatura ore ia ’na iho.

12, 13. E mea maitai ia pee to tatou faaahuraa e faaneheneheraa rouru i teihea mau faaueraa tumu?

12 Ei tavini a Iehova, e hinaaro iho â tatou e faanehenehe maitai ia tatou, oia hoi e oomo i te ahu maitai, mâ, au e e tano no te tupuraa. I te mau taime atoa, e titauhia ia faaite to tatou faaneheneheraa i “te faaieie ore, e te haapao maitai,” e te ohipa maitai e au i te taata atoa—te tane aore ra te vahine—“i mau i te paieti.” Inaha, “ia vai maite [ta]tou i roto i te here o te Atua” ta tatou haapeapearaa matamua, eiaha râ ia huti i te ara-maite-raa i nia ia tatou iho. (Timoteo 1, 2:9, 10; Iuda 21, MN) Oia, e hinaaro tatou e to tatou faaunauna nehenehe roa ’‘e, o “te taata moe [ïa] o te aau,” “te mea tao‘a rahi [hoi] i mua i te aro o te Atua.”—Petero 1, 3:3, 4.

13 E haamana‘o atoa tatou e e nehenehe to tatou huru faaahuraa e faaneheneheraa rouru e ohipa i nia i te huru hi‘oraa a vetahi ê i te haamoriraa mau. Te horoa ra te ta‘o Heleni tei hurihia ei “faaieie ore,” i roto i te hoê auraa morare, i te mana‘o o te paieti, te mǎta‘u faatura, e te haapaoraa i to vetahi ê huru aau aore ra mana‘o. No reira ta tatou fa, e haapao ïa i te mana‘o haava o vetahi ê na mua ’‘e i to tatou mau tiaraa mana‘o-noa-hia. Hau roa ’tu â, e hinaaro tatou e faahanahana ia Iehova e i to ’na nunaa e e faaite ia tatou iho ei tavini na te Atua, ma te rave i “te mau mea atoa . . . ma te haamaitai i te Atua.”—Korinetia 1, 4:9; 10:31; Korinetia 2, 6:3, 4; 7:1.

Te faahanahana ra anei to ’u faaneheneheraa ia Iehova?

14. No nia i to tatou faaneheneheraa e vai-mâ-raa, eaha te mau uiraa e mea maitai ia ui tatou ia tatou iho?

 14 E mea faufaa roa ’tu â to tatou faaahuraa, faaneheneheraa rouru, e vai-mâ-raa ia apiti tatou i te taviniraa aore ra ia haere tatou i te hoê putuputuraa Kerisetiano. A ui ia oe iho: ‘Te huti ra anei to ’u faaneheneheraa e to ’u iho vai-mâ-raa i te ara-maite-raa tano ore i nia ia ’u? Te huru ê ra anei vetahi ê? Te hi‘o ra anei au i to ’u mau tiaraa i roto i teie mau tuhaa ei mea faufaa a‘e i te faaîraa i te mau titauraa no te mau haamaitairaa taa ê i roto i te amuiraa?’—Philipi 4:5; Petero 1, 5:6.

15. No te aha te Parau a te Atua e ore ai e faataa i te hoê tapura faatureraa no nia i te faaahuraa, te faaneheneheraa rouru, e te vai-mâ-raa?

15 Aita iho â te Bibilia e faataa ra na te mau Kerisetiano i te hoê tapura faatureraa no nia i te faaahuraa, te faaneheneheraa rouru, e te vai-mâ-raa. Aita Iehova e hinaaro ra e faaere ia tatou i to tatou tiamâraa e maiti aore ra e faaohipa i to tatou puai feruriraa. Aita, te hinaaro ra oia ia riro tatou ei taata feruriraa paari o te haaferuri i nia i te mau faaueraa tumu Bibilia e o tei “haamataro, na roto i te faaohiparaa, i to ratou puai haroaroaraa i te faataa ê i te maitai e te ino.” (Hebera 5:14, MN) Hau roa ’tu â, te hinaaro ra oia ia arataihia tatou e te here—te here i te Atua e i te taata-tupu. (A taio i te Mareko  12:30, 31.) I roto i tera mau otia, ua rau te ravea i roto i te faaahuraa e te faaneheneheraa rouru. E nehenehe te reira e itehia i rotopu i to Iehova nunaa oaoa ua rau te û o to ratou faaahuraa, noa ’tu eaha te vahi o te fenua e putuputu ai ratou.

IA AU NOA TO TATOU HURU ORARAA

16. E nafea te varua o teie nei ao e patoi ai i te haapiiraa a Iesu, e eaha te mau uiraa e mea maitai ia ui tatou ia tatou iho?

16 E mea haavarevare te varua o teie nei ao e te turai ra i te mau mirioni taata ia imi i te oaoa i roto i te moni e te mau mea materia. Ua parau râ Iesu e: “Rahi noa iho hoi ta te taata nei tao‘a, e ere hoi tei taua tao‘a na ’na ra to ’na ora.” (Luka 12:15) Aita Iesu i farii i te peu haapaeraa hua, ua haapii râ oia e te feia “tei faaroo â e ua haapao i te parau a te Atua” e te feia o te tapea maite i te hoê huru oraraa au noa  o te tiatonu i te hoê noa tapao, oia hoi te mau mea pae varua, o ratou ïa te ite i te oaoa mau. (Luka 11:28; Mataio 6:22) A ui ia oe iho: ‘Te tiaturi mau ra anei au i ta Iesu i haapii, aore ra te hema ra anei au i te “metua no te haavare”? (Ioane 8:44) Eaha ta ta ’u mau parau, ta ’u mau tapao, ta ’u mau fa matamua e ta to ’u huru oraraa e faaite ra?’—Luka 6:45; 21:34-36; Ioane 2, 6.

17. A faahiti i te tahi mau maitai e fana‘ohia ra e te feia e tapea maite ra i te hoê huru oraraa au noa.

17 “E faatiahia . . . te paari e ta ’na ra mau tamarii [aore ra ohipa],” ta Iesu ïa i parau. (Mataio 11:19) E hi‘opoa mai tatou i te tahi mau maitai e fana‘ohia ra e te feia e tapea maite ra i te hoê huru oraraa au noa. Te ite ra ratou i te tamǎrûraa i roto i te taviniraa i te Basileia. (Mataio 11:29, 30) Te ape ra ratou i te tapitapi hua, a ore atu ai ratou e mauiui i te pae feruriraa e te aau. (A taio i te Timoteo 1, 6:9, 10.) No te mea te mauruuru ra ratou i te mau mea faufaa roa o te oraraa, ua rahi atu â to ratou taime no to ratou utuafare e hoa Kerisetiano. E nehenehe ratou e taoto maitai a‘e. (Koheleta 5:12) Te ite ra ratou i te oaoa rahi i te horoa ’tu na roto i te mau ravea atoa. (Ohipa 20:35) E te ‘rahi ra to ratou tiaturiraa’ e te fana‘o ra ratou i te hau e te oaoa o roto mai. (Roma 15:13; Mataio 6:31, 32) Mea faufaa mau â teie mau haamaitairaa!

IA AHU TATOU I “TE HAANA TAMA‘I ATOA”

18. E nafea te Bibilia e faataa ’i i to tatou enemi, ta ’na mau raveraa, e te huru o ta tatou aroraa?

18 Te paruru-atoa-hia ra te feia e vai maite ra i roto i te here o te Atua i te pae varua ia Satani, o te hinaaro ra e faaere i te mau Kerisetiano, eiaha noa i te oaoa, i te ora mure ore atoa râ. (Petero 1, 5:8) “E ere . . . i te taata ana‘e ra ta tatou e to nei,” ta Paulo ïa i parau, “o te feia hau atoa râ, e te mana, e te mau tavana o teie nei ao pouri, e te mau varua iino i te reva nei.” (Ephesia 6:12) Ia au i te ta‘o “to,” e ere ta tatou i te aroraa na te atea ’tu—na te hoê vahi paruruhia ’tu  i raro i te fenua ei auraa parau—e taputôraa râ. Hau atu â, te faaite ra te mau ta‘o “feia hau,” “mana” e “tavana” e mea faanaho-maitai-hia e mea opuahia te mau aroraa no ǒ mai i te ao varua.

19. A faataa i te haana tama‘i pae varua a te Kerisetiano.

19 Noa ’tu râ te mau paruparu e otia o te taata, e nehenehe tatou e upootia. E nafea? Ma te rave ïa i “te haana tama‘i atoa a te Atua.” (Ephesia 6:13) Teie te faataaraa a te Ephesia 6:14-18 i taua haana tama‘i ra: “Ia mau, ma te tatuahia to outou tauupu i te parau mau, e ma te tapo‘i ouma ra o te parau-tia i te ahuraa; e ma te faatamaahia to outou avae i te faaineineraa o te evanelia ra o te hau; a rave hoi i te paruru ra o te faaroo, ei nia roa iho ïa, o te mea ïa e pohe ai te mau ihe auahi atoa a taua varua ino ra: a rave atoa hoi i te faaupoo [aore ra tiaturiraa] i te ora; e te ‘o‘e a te [v]arua ra o te parau a te Atua: ma te pure tuutuu ore i te mau pure atoa ra, e te ani a te [v]arua ra.”

20. E nafea to tatou huru tupuraa e taa ê ai i to te hoê faehau i roto i te auraa mau?

20 I te mea e e faanahoraa na te Atua, e paruru iho â ïa taua haana tama‘i pae varua ra ia tatou, ia rave iho â râ tatou i te reira i te mau taime atoa. Taa ê roa i te mau faehau i roto i te auraa mau, o te nehenehe e faaea maoro i te aro, to roto te mau Kerisetiano i te hoê aroraa tuutuu ore no te ora e te pohe o te faaea ua haamou ana‘e te Atua i te ao a Satani e ua huri ana‘e oia i te mau varua ino atoa i roto i te abuso. (Apokalupo 12:17; 20:1-3) No reira, eiaha e faarue mai te peu e te aro ra oe i te mau paruparu aore ra hinaaro iino, no te mea e titauhia ia “moto” tatou paatoa ia tatou iho no te tapea i to tatou haapao maitai ia Iehova. (Korinetia 1, 9:27) Inaha, aita ana‘e tatou e aro ra, e fifi ïa to tatou!

21. Eaha ana‘e te ravea e upootia ’i tatou i roto i ta tatou tama‘i pae varua?

21 Hau atu â, eita tatou e upootia i roto i teie aroraa maoti to tatou iho puai. No reira Paulo e haamana‘o mai ai i te  faufaaraa ia pure ia Iehova “i te mau pure atoa ra, e te ani a te varua ra.” I te hoê â taime, e mea maitai ia faaroo tatou ia Iehova ma te haapii i ta ’na Parau e ma te amui i te mau taetaeae “aito” i te mau taime atoa, no te mea e ere o tatou ana‘e to roto i teie aroraa! (Philemona 2; Hebera 10:24, 25) E upootia te feia haapao maitai i roto i teie mau tuhaa atoa e e tia atoa ia ratou ia paruru ma te puai i to ratou faaroo ia mârôhia te reira.

IA VAI INEINE OE I TE PARURU I TO OE FAAROO

22, 23. (a) No te aha e titauhia ’i ia vai ineine noa tatou i te mau taime atoa i te paruru i to tatou faaroo, e eaha te mau uiraa e mea maitai ia ui tatou ia tatou iho? (b) Eaha te tumu parau e hi‘opoahia i to muri iho pene?

22 “No te mea . . . e ere outou i to teie nei ao,” ta Iesu ïa i parau, “e riri . . . teie nei ao ia outou.” (Ioane 15:19) No reira, ia vai ineine noa te mau Kerisetiano i te paruru i to ratou faaroo e i te na reira ma te faatura e te mǎrû e tia ’i. (A taio i te Petero 1, 3:15.) A ui ia oe iho: ‘Te taa ra anei ia ’u no te aha te mau Ite no Iehova e rave ai i te tahi taime i te hoê tiaraa taa ê roa i te mana‘o o te rahiraa o te taata? Ia rave au i taua tiaraa fifi ra, ua papu roa anei ia ’u e ua tano ta te Bibilia e ta te tavini haapao maitai e parau ra? (Mataio 24:45; Ioane 17:17) E ia titauhia ia rave au i te mea maitai i te aro o Iehova, ua ineine anei au i te riro ei mea taa ê e te oaoa atoa ra anei au i te na reira?’—Salamo 34:2; Mataio 10:32, 33.

23 E pinepine râ to tatou hinaaro e faataa ê noa mai i teie nei ao i te tamatahia na roto i te mau ravea huna ’tu â. Mai tei faahitihia i te omuaraa, ei hi‘oraa, te tamata ra te Diabolo i te huti i te mau tavini a Iehova i roto i teie nei ao na roto i te faaanaanataeraa a teie nei ao. E nafea tatou e nehenehe ai e maiti i te faaanaanataeraa maitai o te faaitoito ia tatou e o te horoa mai i te hoê mana‘o haava viivii ore? E hi‘opoahia teie tumu parau i te pene i muri iho.

^ par. 3 Mai te Penetekose 33 mai â, ua haa te Mesia ei Arii i nia i ta ’na amuiraa o te mau pǐpǐ faatavaihia i nia i te fenua. (Kolosa 1:13) I 1914, ua fana‘o te Mesia i te mana faatere ei arii i nia i “te basileia ra o teie nei ao.” No reira, te haa atoa ra te mau Kerisetiano faatavaihia i teie nei ei tia no te Basileia Mesia.—Apokalupo 11:15.

^ par. 8 A hi‘o i te Haaferuriraa i nia i te mau Papai, api 175-179, piahia e te mau Ite no Iehova.

No te ite atu â

Turu ma te taiva ore i ta te Atua ana‘e faatereraa

Te anavai o te hamani-ino-raa i parari mai i nia i te mau Ite no Iehova no te oreraa e faaô i roto i te poritita, ua horomiihia ïa e “te fenua,” oia hoi te tahi mau taata eita e mana‘ohia e na reira ratou.