Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 PENE 10

Faaipoiporaa—E ô na te Atua e here ra ia tatou

Faaipoiporaa—E ô na te Atua e here ra ia tatou

“Te taura e toru fenu ra, eita ïa e motu vave.”—KOHELETA 4:12.

1, 2. (a) No nia i te feia faaipoipo apî, eaha ta tatou e uiui i te tahi taime, e no te aha? (b) Eaha te mau uiraa ta tatou e hi‘opoa i roto i teie pene?

MEA au anei na oe e haere i te mau faaipoiporaa? Mea au na e rave rahi, mea oaoa roa hoi taua mau taime ra. E ite oe e mea faaeta maitai na taata faaipoipo. Hau atu â, mea oaoa roa to raua hoho‘a mata! I taua mahana ra, mea ataata roa raua, e e au ra e mea rahi te tiaturiraa e te parau fafau i roto i to raua oraraa a muri a‘e.

2 E mea tia râ ia fa‘i e i roto e rave rahi tuhaa, ua arepurepu te faaipoiporaa i teie tau. Noa ’tu e te tiaturi ra tatou i te mea maitai roa ’‘e no te feia faaipoipo apî, e uiui paha tatou i te tahi taime: ‘E oaoa anei teie faaipoiporaa? E vai tamau anei te reira?’ Te pahonoraa o teie na uiraa, tei te tiaturiraa ïa e te faaohiparaa te tane e ta ’na vahine i te mau a‘oraa a te Atua no nia i te faaipoiporaa. (A taio i te Maseli 3:5, 6.) E titauhia ia na reira raua no te vai noa i roto i te here o te Atua. E hi‘opoa tatou i teie nei i te pahonoraa a te Bibilia i teie na uiraa e maha: No te aha e faaipoipo ai? Ia faaipoipo oe, o vai ta oe e maiti ei apiti? E nafea ia faaineine ia oe no te faaipoiporaa? E eaha te tauturu i te hoê tane e ta ’na vahine ia oaoa noa i roto i to raua faaipoiporaa?

NO TE AHA E FAAIPOIPO AI?

3. No te aha e haerea paari ore ai ia faaipoipo no te mau tumu faufaa ore?

3 Te tiaturi ra vetahi e mea faufaa roa te faaipoiporaa no te  ite i te oaoa—eita oe e ite i te mauruuru aore ra te oaoa i roto i te oraraa mai te peu e aita to oe e apiti. Mea hape roa te reira! Ua faahiti Iesu, te hoê tane taa noa, i te faaea-taa-noa-raa mai te hoê ô e ua faaitoito i te feia e tia ia ratou ia farii i te reira. (Mataio 19:11, 12) Ua faataa atoa te aposetolo Paulo i te mau maitai ia faaea taa noa. (Korinetia 1, 7:32-38) Aita Iesu e aita atoa Paulo i faariro i te reira ei faatureraa; inaha, ua tapurahia te opaniraa e faaipoipo i rotopu i “te parau,” aore ra haapiiraa, “[a] te mau demoni.” (Timoteo 1, 4:1-3) Mea rahi râ ta te faaea-taa-noa-raa e pûpû na te feia e hinaaro e tavini ia Iehova ma te peapea ore. E ere ïa i te haerea paari ia faaipoipo no te mau tumu faufaa ore, mai te faaheporaa a te mau hoa.

4. E horoa te hoê faaipoiporaa maitai i teihea niu no te rave i te mau tamarii?

4 I te tahi a‘e pae, te vai ra anei te tumu papu e faaipoipo ai? E. E ô atoa te faaipoiporaa na to tatou Atua e here ra ia tatou. (A taio i te Genese 2:18.) No reira, e maitai atoa to te faaipoiporaa e e nehenehe te reira e horoa mai i te oaoa. Ei hi‘oraa, e niu maitai roa te hoê faaipoiporaa manuïa no te oraraa utuafare. E hinaaro te mau tamarii i te hoê oraraa papu e te mau metua no te rave ia ratou, ma te horoa ’tu i te here, te a‘o e te aratairaa. (Salamo 127:3; Ephesia 6:1-4) E ere râ te raveraa i te tamarii i te tumu otahi e faaipoipo ai.

5, 6. (a) Ia au i te Koheleta 4:9-12, eaha te tahi mau maitai mau o te hoê auhoaraa piri? (b) E nafea te hoê faaipoiporaa e au ai i te hoê taura e toru fenu?

5 A feruri na i te irava tumu o teie pene e te mau irava tapiri: “E maitai te taata toopiti i te taata hoê; no te mea e utua maitai ta raua i ta raua ohipa. Ia hi‘a hoi te tahi ra, na te hoa e rave e faatia i nia; te taata hoê râ ia hi‘a ra, atae hoi oia, aita hoi o ’na e taua ei faatia ia ’na i nia! Te taata toopiti hoi ia taoto ra, e mahanahana ïa; eaha e mahanahana ’i te taata hoê oia ana‘e ra? Etaeta rahi to te taata ia rave mai i te hoê ra, e tia ia raua atoa ia rave atu ia ’na; e te  taura e toru fenu ra, eita ïa e motu vave.”—Koheleta 4:9-12.

6 Na mua roa, no nia teie irava i te faufaa o te auhoaraa. Parau mau, o te faaipoiporaa te auhoaraa piri roa ’‘e. Ia au i teie irava, e nehenehe tera taairaa e horoa mai i te tauturu, te tamahanahanaraa e te parururaa. Mea puai roa te hoê faaipoiporaa mai te peu e e apitihia te tahi atu mea i teie taairaa i rotopu e piti taata. E nehenehe te taura e piti fenu e motu, te mana‘o ïa ta teie irava e horoa ra. Area e toru fenu raraahia aore ra firihia, eita ïa e motu oioi. Ia tapitapi na mua roa te tane e ta ’na vahine atoa i te faaoaoa ia Iehova, e au ïa to raua faaipoiporaa i taua taura e toru fenu ra. I te mea e e tuhaa mau Iehova no te faaipoiporaa, mea paari roa iho â ïa te taairaa.

7, 8. (a) Eaha te a‘oraa ta Paulo i papai no te mau Kerisetiano taa noa o te aro ra i te hinaaro e taati? (b) Eaha te mana‘o tano no nia i te faaipoiporaa ta te Bibilia e horoa maira?

7 I roto atoa i te faaipoiporaa ana‘e e nehenehe ai e haamâha ma te au i te mau hinaaro i te pae taatiraa. I roto i teie tupuraa, te hi‘o-mau-hia ra te taatiraa ei tumu o te oaoa. (Maseli 5:18) Ia “paari” mai te hoê taata taa noa mai ta te Bibilia e parau ra—ua mairi te tau e mea puai roa te hinaaro e taati—te aro noa ra paha oia i te hinaaro e taati. Ia ore ia haavîhia tera mau hinaaro, e nehenehe oia e rave i te tahi ohipa viivii aore ra tano ore. Ua faauruhia Paulo no te papai i teie a‘oraa na te feia taa noa: “Ia ore . . . ia tia ia ratou ra, a faaipoipo ratou: e mea maitai te faaipoipo i te amâ.”—Korinetia 1, 7:9, 36; Iakobo 1:15.

8 Noa ’tu eaha te tumu e faaipoipo ai te hoê taata, e mea maitai ia tapea oia i te mana‘o tano. Mai ta Paulo i parau, “e ati” to te feia e faaipoipo “i te tino nei.” (Korinetia 1, 7:28) E faaruru te feia faaipoipo i te mau fifi ta te feia taa noa e ore e faaû. Ia maiti râ oe i te faaipoipo, e nafea oe e faaiti mai ai i te mau fifi e e faarahi ai i te mau maitai? Te hoê ravea, o te maitiraa ïa i te hoê apiti ma te paari.

 O VAI TE HOA FAAIPOIPO MAITAI?

9, 10. (a) Mea nafea to Paulo faahoho‘araa i te fifi atâta e taati piri roa i te feia e ere i te Kerisetiano? (b) Eaha te tupu pinepine ia tâu‘a-ore-hia te a‘oraa a te Atua eiaha e faaipoipo i te hoê taata e ere i te Kerisetiano?

9 Ua faauruhia Paulo no te papai i te hoê faaueraa tumu faufaa roa e mea maitai ia faaohipahia no te maiti i te hoê hoa faaipoipo: “Eiaha outou ia amui-au-ore-hia i te feia faaroo ore ra.” (Korinetia 2, 6:14) Ua niuhia ta ’na faahoho‘araa i nia i te hoê tupuraa mau o te ohipa faaapu. Ia taatihia e piti animara mea taa ê roa to raua rahi aore ra puai, o raua e piti atoa te mauiui. Oia atoa, ia taatihia te hoê Kerisetiano e te hoê e ere i te Kerisetiano, e umeume iho â raua. Ia hinaaro te hoê apiti e vai noa i roto i te here o Iehova e aita te tahi atu apiti e tâu‘a ra i te reira, eita e tu ta raua mau fa matamua i roto i te oraraa, e e tupu te ahoaho rahi. No reira Paulo i a‘o ai i te mau Kerisetiano ia faaipoipo “ia au [noa] i te Fatu.”—Korinetia 1, 7:39.

10 I te tahi mau taime, ua faaoti te tahi mau Kerisetiano taa noa e mea maitai a‘e te amui-au-ore-raa i te moemoe ta ratou e faaruru nei. E faaoti vetahi i te tâu‘a ore i te mau a‘oraa Bibilia e i te faaipoipo i te hoê taata aita e tavini ra ia Iehova. E pinepine, mea mauiui te faahopearaa. Ua faaipoipo ratou i te hoê taata eita ratou e nehenehe e faaite atu i te mau mea faufaa roa ’‘e o te oraraa. Ua rahi a‘e ïa te moemoe i ta ratou i ite hou ratou a faaipoipo ai. Auaa râ, e rave rahi tausani Kerisetiano taa noa teie e tiaturi nei e e pee nei ma te taiva ore i te mau a‘oraa a te Atua i roto i teie tuhaa. (A taio i te Salamo 32:8.) A tiai noa ’tu ai râ i te faaipoipo i te hoê mahana, te faaea taa noa ra ratou e tae noa ’tu i te taime e ite ai ratou i te hoê apiti i rotopu i te feia e haamori ra i te Atua ra o Iehova.

11. Eaha te tauturu ia oe ia maiti i te hoê hoa faaipoipo ma te paari? (A hi‘o atoa i te tumu parau tarenihia “ Eaha ta ’u e imi nei i ǒ te hoê hoa faaipoipo?”)

11 Parau mau, e ere pauroa te tavini a te Atua i te hoa  faaipoipo e tano. Mai te peu e te mana‘o nei oe e faaipoipo, a imi i te hoê taata e tuati to ’na huru, ta ’na mau fa pae varua e to ’na here i te Atua e to oe. Ua nenei te tavini haapao maitai e te paari e rave rahi papai no nia i te reira, e mea maitai ia hi‘opoa oe i tera mau a‘oraa Bibilia e ia pure no te reira, a vaiiho atu ai i te reira ia aratai ia oe i roto i teie faaotiraa faufaa. *A taio i te Salamo 119:105.

12. Eaha te peu no nia i te faaipoiporaa e ravehia ra i e rave rahi fenua, e eaha te hi‘oraa Bibilia e horoa ra i te tahi aratairaa?

12 I e rave rahi fenua, ua matauhia e na te metua e maiti i te apiti no ta ratou tamarii. E farii te rahiraa i roto i taua mau ta‘ere ra e e paari e e aravihi rahi a‘e to te mau metua e mea faufaa roa no te rave i taua maitiraa rahi ra. Ua manuïa pinepine te mau faaipoiporaa faanahohia, mai i te mau tau Bibilia ra. E haapiiraa te hi‘oraa o Aberahama tei tono i ta ’na tavini e tii i te hoê vahine na Isaaka, no te mau metua i roto i tera atoa tupuraa i teie mahana. Aita Aberahama i haapeapea no te moni e te tiaraa. Ua tutava maite râ oia i te imi i te hoê vahine na Isaaka i rotopu i te feia e haamori ra ia Iehova. *Genese 24:3, 67.

E NAFEA IA FAAINEINE IA OE NO TE HOÊ FAAIPOIPORAA O TE MANUÏA?

13-15. (a) E nafea te faaueraa tumu i roto i te Maseli 24:27 e tauturu ai i te hoê tane apî o te mana‘o ra e faaipoipo? (b) Eaha ta te hoê vahine apî e nehenehe e rave no te faaineine ia ’na no te faaipoiporaa?

13 Mai te peu e te mana‘o maite ra oe i te faaipoiporaa, e mea maitai ia ui oe ia oe iho, ‘Ua ineine mau anei au?’  Te pahonoraa, e ere ïa tei te huru noa o to oe huru aau no nia i te here, te taatiraa, te auhoaraa, aore ra te raveraa i te tamarii. Te vai ra râ te tahi mau fa taa maitai e mea tia ia feruri te tane aore ra te vahine o te hinaaro e faaipoipo.

14 E mea tia ia feruri maitai te hoê tane apî o te imi ra i te hoê vahine na ’na i teie faaueraa tumu: “E imi oe i ta oe ra mau ravea i te atea ê, a faaau maite ai ia au ta oe i rapae au; a faatia ’i i to oe fare i muri a‘e.” (Maseli 24:27) Eaha te mana‘o faufaa? I tera ra tau, ia hinaaro te hoê taata e haamau i te hoê utuafare ma te faaipoipo, e titauhia ia ui o ’na ia ’na iho, ‘Ua ineine anei au i te haapao e i te faatamaa i te hoê vahine e te mau tamarii atoa e fanauhia mai i muri a‘e?’ E titauhia ia rave na mua oia i te ohipa, ia haapao i ta ’na i rapae au, aore ra faaapu. Tera atoa te faaueraa tumu i teie tau. E titauhia ia faaineine te hoê tane e hinaaro ra e faaipoipo i te amo i te hopoia. A maraa noa ’i ia ’na i te pae tino, e rave o ’na i te ohipa e tia ’i. Ia au i te Parau a te Atua, te hoê tane o te ore e haapao i te mau hinaaro pae tino, pae aau e pae varua o to ’na utuafare, ua rahi atu ïa to ’na ino i to te taata faaroo ore!—A taio i te Timoteo 1, 5:8.

15 Te farii atoa ra te hoê vahine o te faaoti e faaipoipo i te amo i te tahi mau hopoia teimaha. Te arue ra te Bibilia i te tahi mau aravihi e huru maitai ta te hoê vahine e hinaaro mau no te tauturu i ta ’na tane e no te haapao i to ’na utuafare. (Maseli 31:10-31) Te mau tane e vahine o te ru i te faaipoipo ma te faaineine ore i te amo i te mau hopoia, e feia miimii mau ïa, aita e feruri ra eaha ta ratou e nehenehe e horoa na te taata ta ratou e faaipoipo. Te mea faufaa roa ’tu râ, e titauhia ia ineine te feia e mana‘o ra e faaipoipo i te pae varua.

16, 17. E mea maitai ia feruriruri te feia e faaineine ra no te faaipoiporaa i teihea mau faaueraa tumu Bibilia?

16 Ua taaihia te faaineineraa no te faaipoiporaa i te feruriruriraa  i te mau tuhaa ta te Atua i faataa no te tane e no te vahine. E titauhia ia ite te hoê tane eaha te auraa e riro ei upoo o te hoê utuafare Kerisetiano. E ere teie tiaraa i te hoê parau faatia no te haavî. Eita, e mea tia ia pee o ’na i te huru faaohiparaa a Iesu i te tiaraa upoo. (Ephesia 5:23) Oia atoa, e mea tia ia taa te hoê vahine Kerisetiano i te tuhaa tura a te vahine faaipoipo. E farii anei o ’na i te auraro i “te ture [a] tana . . . tane”? (Roma 7:2) Tei raro a‘e ê na oia i te ture a Iehova e a te Mesia. (Galatia 6:2) E ture ê atu te mana faatere o ta ’na tane i roto i te utuafare. E turu e e auraro anei o ’na i te mana faatere o te hoê tane tia ore? Mai te peu e eita o ’na e au roa i te reira, eiaha ïa o ’na e faaipoipo.

17 Hau atu â, e titauhia ia ineine te apiti taitahi i te haapao i te mau hinaaro taa ê o te tahi. (A taio i te Philipi 2:4.) Ua papai Paulo e: “E aroha . . . te taata atoa i tana iho vahine, mai te aroha ia ’na ihora, e te vahine ra ia auraro oia i tana tane.” Faauruhia e te Atua, ua taa ia Paulo e e hinaaro taa ê te tane e ite e te faatura roa ra ta ’na vahine ia ’na. E e hinaaro taa ê te vahine e ite e te here ra ta ’na tane ia ’na.—Ephesia 5:21-33.

Ia haamatau ratou, mea rahi te rave ma te paari i te hoê apee

18. No te aha e mea maitai ai ia faahotu te feia o te haamatau ra te tahi i te tahi i te hitahita ore?

18 No reira, e ere te haamatauraa i te hoê taime faaanaanataeraa noa. E taime râ ia haapii te hoê tane e te hoê vahine i te haa ma te au e te tahi, ia ite e e maitiraa paari anei te faaipoiporaa. E taime atoa no te faahotu i te hitahita ore! E nehenehe te faahemaraa e tapiri roa i te pae tino e puai roa—inaha, mea natura te hinaaroraa i te hoê taata. Teie râ, e ape te feia o te here mau ra te tahi i te tahi i te mau ohipa atoa o te totoa i tei herehia i te pae varua. (Tesalonia 1, 4:6) No reira, mai te peu e te haamatau ra oe, a faahotu i te hitahita ore; e faufaahia oe i taua huru maitai ra i te roaraa o to oe oraraa, ia faaipoipo noa ’tu oe aore ra eita.

 E NAFEA TO OE FAAIPOIPORAA E VAI TAMAU AI?

19, 20. E nafea te mana‘o o te hoê Kerisetiano i te faaipoiporaa e taa ê ai e to e rave rahi o te ao i teie mahana? A faataa na.

19 Ia vai tamau to raua faaipoiporaa, e mea tia ia tapea te tane e ta ’na vahine i te mana‘o tano no nia i te faaauraa. I roto i te mau papai e te mau hoho‘a teata, e horoa pinepine te hoê faaipoiporaa i te hopea oaoa ta te taata e hinaaro roa ra. I roto râ i te oraraa mau, e ere te faaipoiporaa i te hopea; e haamataraa râ o te hoê mea ta Iehova i opua e ia vai tamau. (Genese 2:24) Tera noa râ, e ere te reira i te mana‘o matauhia i roto i te ao i teie tau. I roto i te tahi mau ta‘ere, e hi‘o te taata i te faaipoiporaa mai e piti taura tei taponahia. Aita paha ratou i ite e te faataa maitai ra tera faahoho‘araa i te mana‘o matauhia no nia i te faaipoiporaa. Eaha ïa? Ia titauhia, e taamu-haavî-hia te hoê taura e tano, te tahi atu râ mea faufaa oia ïa e nehenehe te taura e taamuhia e e tatarahia ma te ohie.

20 Mea rahi i teie mahana o te hi‘o i te faaipoiporaa no te hoê taime poto. E faaipoipo ratou ma te huru ohie no to ratou mana‘o e e tano te reira i to ratou mau hinaaro, e faataa râ ratou i te taime e fifi ai te reira ia hi‘ohia. A haamana‘o râ i te faahoho‘araa ta te Bibilia e faaohipa ra no te taairaa o te faaipoiporaa—te taura. Ua opuahia te mau taura o te mau pahi taie no te vai maoro, eita roa ’tu e mataratara i roto atoa i te vero puai roa ’‘e. Oia atoa, ua opuahia te faaipoiporaa no te vai tamau. A haamana‘o i ta Iesu i parau: “Ta te Atua i taati ra, eiaha te taata e faataa ê atu.” (Mataio 19:6) Ia faaipoipo oe, e titauhia ia hi‘o atoa oe i te faaipoiporaa mai tera. E faariro anei tera huru faaauraa i te faaipoiporaa ei mea teimaha? Eita.

21. E titauhia ia tapea te hoê tane e ta ’na vahine i teihea mana‘o no nia ia raua iho, e eaha ïa te tauturu ia raua?

21 E titauhia ia tapea te hoê tane e ta ’na vahine i te mana‘o tano no nia ia raua iho. Ia tutava raua taitahi i te tiatonu i to raua mau huru maitatai e ta raua mau tutavaraa, e riro  ïa te faaipoiporaa ei tumu o te oaoa e te haumârû. Mea tano ore anei tera huru mana‘o maitai no nia i te hoê apiti tia ore? E ere roa ’tu Iehova i te mea tano ore, e nehenehe hoi tatou e turui i nia ia ’na no te tapea i te hoê mana‘o maitai no nia ia tatou. Ua ui te papai salamo: “Ahiri oe, e Iehova, e tapao na i te mau hara nei, o vai, e Iehova, te taata e mau?” (Salamo 130:3) E titauhia ia tapea te mau tane faaipoipo e te mau vahine faaipoipo i te hoê â mana‘o maitai e te faaore i te hapa a te tahi e te tahi.—A taio i te Kolosa 3:13.

22, 23. Mea nafea to Aberahama raua Sara riroraa ei hi‘oraa maitai no te feia faaipoipo i teie tau?

 22 E nehenehe te faaipoiporaa e riro ei haamaitairaa rahi atu â a vai tamau ai te reira i te roaraa o te mau matahiti. Te faaite maira te Bibilia i te faaipoiporaa o Aberahama raua o Sara i to raua ruhiruhiaraa. Aita roa ’tu to raua oraraa i paruruhia i te ati e te fifi. A feruri na i te auraa mau no Sara, te hoê vahine i roto paha i te 60raa o to ’na matahiti, ia faarue i to ’na nohoraa fana‘o i te oire ruperupe o Ura e ia ora i raro a‘e i te tiahapa no te toea o to ’na oraraa. Ua auraro râ oia i te tiaraa upoo o ta ’na tane. Ei apiti e ei tauturu no Aberahama, ua turu oia ma te faatura i te manuïaraa o ta ’na mau faaotiraa. E e ere to ’na i te auraro na nia nia noa. “I roto [atoa] ia ’na iho,” ua faahiti oia i ta ’na tane ei fatu no ’na. (Genese 18:12; Petero 1, 3:6) No roto mai to ’na faatura ia Aberahama i te aau.

23 Parau mau, e ere i te auraa e ua tu noa to Aberahama raua Sara mana‘o. I te hoê mahana, ua parau Sara i te hoê mea e ua “mauiui roa” Aberahama. Na nia râ i ta Iehova faaueraa, ua faaroo haehaa Aberahama i te reo o ta ’na vahine, a riro atu ai te reira ei haamaitairaa no te utuafare. (Genese 21:9-13) I teie tau e nehenehe te mau tane faaipoipo e te mau vahine faaipoipo, tei faaipoipo atoa tau ahuru matahiti i te maoro, e haapii rahi mai i teie nau hoa faaipoipo paieti.

24. Teihea huru faaipoiporaa e faahanahana i te Atua ra o Iehova, e no te aha?

24 I roto i te amuiraa Kerisetiano, te vai ra e rave rahi tausani faaipoiporaa oaoa—te faatura hohonu ra te vahine i ta ’na tane, te here ra e te faatura ra te tane i ta ’na vahine, e te haa amui ra raua e piti atoa no te rave na mua roa i te hinaaro o Iehova. Ia faaoti oe e faaipoipo, a maiti ïa i to oe apiti ma te paari, a faaineine maitai ia oe no te faaipoiporaa e a haa no te hoê faaipoiporaa î i te here e te hau o te faahanahana i te Atua ra o Iehova. E tauturu mau â ïa to oe faaipoiporaa ia oe ia vai noa i roto i te here o te Atua.

^ par. 11 A hi‘o i te pene 2 o Te ravea e itehia ’i te oaoa i te utuafare, piahia e te mau Ite no Iehova.

^ par. 12 Ua hau atu i te hoê noa vahine ta te tahi mau patereareha haapao maitai. I to Iehova haaraa e te mau patereareha e o Iseraela pae tino, ua faatia oia i te peu e faaipoipo e rave rahi apiti. Aita oia i haamau i te reira, ua taotia râ oia. E haamana‘o râ te mau Kerisetiano e aita Iehova e faatia faahou ra ia faaipoipo to ’na feia haamori e rave rahi apiti.—Mataio 19:9; Timoteo 1, 3:2.

No te ite atu â

“Ei haerea aroha to outou”

Te faahiti ra te Korinetia 1, 14 ravea no te faaite i te aroha i te tahi atu.