Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

“Ia vai maite outou i roto i te here o te Atua”

 TUHAA HAU

To te Bibilia mana‘o i te faataaraa e te faataa-ê-raa

To te Bibilia mana‘o i te faataaraa e te faataa-ê-raa

Te hinaaro ra Iehova ia tapea maite te feia faaipoipo i ta ratou euhe o te faaipoiporaa. I to ’na faaipoiporaa i te tane e te vahine matamua, ua parau Iehova e: “E ati [te taata] i ta ’na vahine, e e riro hoi raua ei hoê.” I muri a‘e, ua faahiti faahou Iesu Mesia i taua parau ra e ua na ô e: “E ta te Atua i taati ra, eiaha te taata e faataa ê atu.” (Genese 2:24; Mataio 19:3-6) No Iehova raua Iesu, e taairaa no te oraraa taatoa ïa te faaipoiporaa o te hope noa ia  pohe hoê o na apiti. (Korinetia 1, 7:39) I te mea e e faanahoraa mo‘a te faaipoiporaa, e ere ïa te faataaraa i te ohipa hauti. Inaha, mea riri na Iehova te mau faataaraa aita e tumu Bibilia.—Malaki 2:15, 16.

Eaha te hoê tumu Bibilia no te faataa? Mea riri na Iehova te faaturi e te mau peu taotoraa tia ore. (Genese 39:9; Samuela 2, 11:26, 27; Salamo 51:4) No te mea hoi e mea au ore roa na ’na te mau peu taotoraa tia ore, te faatia ra oia i te reira ei tumu no te faataa. (Ei faahohonuraa i te auraa o tera mau peu, a hi‘o i te pene 9, paratarafa 7, i reira te faataaraahia te reirâ.) Te horoa ra Iehova na te apiti hapa ore i te maitiraa e faaoti e faaea noa e to ’na hoa faaipoipo tei hapa aore ra e ani i te faataaraa. (Mataio 19:9) No reira, ia faaoti te hoê apiti hapa ore e ani i te faataaraa, eita Iehova e riri i taua faataaraa ra. I taua atoa râ taime ra, eita te amuiraa Kerisetiano e faaitoito i te tahi taata ia ani i te faataaraa. E nehenehe hoi te tahi mau tupuraa e turai i te apiti hapa ore ia faaea noa e to ’na hoa faaipoipo tei hapa, mai te peu iho â râ e te tatarahapa mau ra oia. I te pae hopea, na te feia e tumu Bibilia ta ratou no te faataa e faaoti no ratou iho e e farii i te mau faahopearaa atoa o te reira.—Galatia 6:5.

I roto i te tahi mau tupuraa ino roa, ua faaoti te tahi mau Kerisetiano e faataa ê aore ra e faataa i to ratou apiti tei ore hoi i rave i te mau peu taotoraa tia ore. I roto i tera tupuraa, te parau maitai ra te Bibilia e “e parahi noa” te apiti o te faataa ê “eiaha e faaipoipo” aore ra “e faite” oia. (Korinetia 1, 7:11) Eita ta taua Kerisetiano ra e nehenehe e haamatau i te tahi atu taata no te faaipoipo faahou. (Mataio 5:32) E hi‘o mai tatou i ǒ nei i te tahi noa mau tupuraa ino roa ta vetahi i mana‘o e e tumu ïa no te faataa ê.

Te oreraa e aupuru ma te opua i te utuafare. E nehenehe te hoê utuafare e veve roa, e ere i te mau mea faufaa roa no te ora, no te mea aita te tane e aupuru ra ia ratou e e nehenehe hoi ta ’na. Te na ô ra te Bibilia e: “O te taata . . . aore i hamani maitai . . . i to ’na ihora utuafare, ua faarue ïa oia i te [faaroo], e e rahi atu ïa to ’na ino i to te taata [faaroo] ore ra.” (Timoteo 1, 5:8; Traduction du monde nouveau) Ia patoi tera huru taata i te taui, e nehenehe ta ’na vahine e faaoti e e ere anei mea tia ia ani oia i te faataa ê ia  au i te ture no te paruru ia ’na e i ta ’na mau tamarii. Parau mau, e titauhia ia hi‘opoa maitai te mau matahiapo Kerisetiano i te hoê pariraa e aita te hoê Kerisetiano e aupuru ra i to ’na utuafare. E nehenehe te hoê taata o te ore e aupuru i to ’na utuafare e tiavaruhia.

Te hamani-ino-raa u‘ana i te pae tino. E nehenehe te hoê apiti haavî e hamani ino i to ’na hoa faaipoipo a fifi atu ai to ’na ea e to ’na ora atoa. Mai te peu e e Kerisetiano te apiti haavî, e titauhia ia hi‘opoa te mau matahiapo o te amuiraa e e parau mau anei te mau pariraa. Te iria e te hoê huru haavî u‘ana tamau, e tumu ïa no te tiavaru.—Galatia 5:19-21.

Te fifi-mau-raa te ea pae varua. E tamata tamau paha te hoê apiti i te haafifi i to ’na hoa faaipoipo ia rave i te haamoriraa mau aore ra e faahepo atoa paha ia ’na ia ofati i te mau faaueraa a te Atua i roto i te mau tuhaa atoa. I roto i tera tupuraa, e nehenehe te apiti o te fifi ra e faaoti e e ere anei o te aniraa i te faataa ê ia au i te ture te ravea hoê roa no te “faaroo [i te Atua] e tia ’i eiaha te taata.”—Ohipa 5:29.

I roto i te mau hi‘oraa atoa tei taaihia i te mau tupuraa ino roa mai ta tatou i faahiti mai nei, eiaha te tahi noa ’‘e taata e onoono i te apiti hapa ore ia faataa ê aore ra ia faaea noa e to ’na hoa faaipoipo. E nehenehe te mau hoa feruriraa paari i te pae varua e te mau matahiapo e horoa ’tu i te tauturu e te mau a‘oraa niuhia i nia i te Bibilia, aita râ ratou i ite i te mau mea atoa e tupu ra i rotopu i te hoê tane e ta ’na vahine. O Iehova ana‘e tei ite. Parau mau, aita te hoê Kerisetiano e faatura ra i te Atua aore ra i te faanahoraa o te faaipoiporaa mai te peu e e faarahi o ’na i to ’na mau fifi i te fare no te fa noa e faataa ê i to ’na hoa faaipoipo. Ua ite maitai Iehova i te mau opuaraa ino atoa i muri mai i te hoê faataa-ê-raa, noa ’tu te tamataraa atoa i te huna i te reira. Inaha, “te vai noa nei . . . te mau mea atoa ma te maheu roa i mua i to ’na mata, to tei haava mai ia tatou nei.” (Hebera 4:13) Mai te peu râ e e maoro atu â te hoê tupuraa atâta roa ino, eiaha te tahi noa ’‘e taata e faaino i te hoê Kerisetiano o te faaoti i te pae hopea e faataa ê. I te pae hopea, “e tia [tatou] atoa” “i mua i te haavaraa a te [“Atua,” MN] ra.”—Roma 14:10-12.