Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 39

To Iseraela arii matamua

To Iseraela arii matamua

Ua maiti Iehova i te mau tavana no te aratai i to Iseraela. Ua hinaaro râ te nunaa i te hoê arii. Ua parau to Iseraela ia Samuela: ‘E arii to te mau nunaa atoa e ati a‘e ra ia tatou. Hinaaro atoa matou i te hoê arii.’ No Samuela, mea ino tera aniraa. Ua pure atura oia ia Iehova no nia i te reira. Ua parau Iehova ia ’na: ‘Aita te nunaa e faarue nei ia oe. O vau râ ta ratou e faarue nei. A parau atu e e nehenehe ratou e fana‘o i te hoê arii. Tera râ, e faahepo te arii ia rave ratou e rave rahi ohipa.’ Noa ’tu râ, ua parau te nunaa: ‘Haapao ’tu matou! Te hinaaro nei matou i te hoê arii!’

Ua parau Iehova ia Samuela e e riro te taata ra, o Saula to ’na i‘oa, ei arii matamua no ratou. Ua haere Saula e farerei ia Samuela i Rama. Ua faatahinu atura Samuela ia Saula ei arii ma te manii maa hinu i nia i to ’na upoo.

I muri iho, ua haaputuputu Samuela i to Iseraela no te faaite atu i to ratou arii apî. Aita râ ratou i ite a‘e teihea roa o Saula. Ua ite anei oe no te aha? No te mea ua tapuni oia i muri i te mau afata tauihaa. A ite ai ratou ia Saula, ua rave ratou ia ’na e ua afai ratou ia ’na i ropu i te nunaa. Mea rahi a‘e o Saula i te mau taata atoa e mea haviti roa oia. Ua parau Samuela: ‘Teie te taata ta Iehova i maiti.’ Ua tuô te nunaa: ‘Ia ora te arii!’

Na mua roa, ua faaroo te arii Saula ia Samuela e ua rave oia mai ta Iehova i ani atu. I muri iho râ, ua taui oia. Ei hi‘oraa, aita te arii i faatiahia ia pûpû i te mau tusia. I te hoê taime, ua parau Samuela ia Saula ia tiai ia ’na. Aita râ Samuela i tae oioi. Ua faaoti atura Saula ia pûpû oia i te mau tusia. Eaha to Samuela huru a ite ai i te reira? Ua parau atu oia: ‘Ahiri aita oe i faaroo ore ia Iehova.’ Ua huti anei Saula i te haapiiraa no ta ’na hape?

I muri iho, ua aro Saula i to Amaleka. Ua parau Samuela ia Saula ia haapohe pauroa te taata no Amaleka. Ua faaoti râ Saula i te faaora mai i te arii Agaga. Ua parau Iehova ia Samuela: ‘Ua faarue Saula ia ’u. Aita oia e faaroo ra ia ’u.’ Ua mauiui roa Samuela e ua parau oia ia Saula: ‘Ua  faaea oe i te faaroo ia Iehova. E maiti ïa Iehova i te tahi atu arii.’ A haere ai Samuela, ua haru ihora Saula ia Samuela e ua mahae atura to ’na hiti ahu. Ua parau atura Samuela ia Saula: ‘Mai teie ahu tei mahae, e iriti atoa Iehova i te faatereraa ia oe ra.’ E horoa Iehova i tera faatereraa i te tahi atu taata o te here e o te faaroo ia ’na.

“E maitai rahi tei te haapao i tei te tusia.”—Samuela 1, 15:22