Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 2

Ua poiete te Atua i te tane e te vahine matamua

Ua poiete te Atua i te tane e te vahine matamua

I te tahi tuhaa o te fenua, ua faaineine Iehova i te hoê ô, o Edene ïa te i‘oa. Ua î roa teie ô i te mau tiare, te mau tumu raau e te mau animara. I muri iho, ua poiete te Atua i te taata matamua, o Adamu ïa. Ua faaohipa Oia i te repo fenua e ua puhipuhi Oia i te aho i roto i te apoo ihu o Adamu. Ua ite anei oe eaha tei tupu? Ua riro Adamu ei taata ora! Ua parau Iehova ia ’na ia haapao maitai i te ô e ia horoa i te i‘oa i te mau animara atoa.

Ua horoa Iehova i te tahi faaueraa faufaa roa ia Adamu. Ua na ô râ Iehova: ‘E nehenehe oe e amu i te hotu o te mau tumu raau atoa. Eiaha râ i te hotu o te hoê tumu raau taa ê. Ia amu oe i te reira, e pohe ïa oe.’

I muri a‘e, ua parau Iehova: ‘E hamani au i te hoê tauturu no Adamu.’ Ua faataoto Iehova ia Adamu e i muri iho ua rave oia hoê o to Adamu mau ivi aoao no te poiete i te hoê vahine na Adamu. O Eva to ’na i‘oa. Ua riro Adamu raua Eva ei utuafare matamua. Eaha to Adamu huru a ite ai i ta ’na  vahine? Ua oaoa roa Adamu e ua na ô oia: ‘A hi‘o na i ta Iehova i poiete maoti hoê o to ’u ivi aoao! Oaoa roa vau! Hoê â oia ia ’u.’

Ua parau Iehova ia Adamu raua Eva ia tamariihia raua e ia faaî i te fenua. Ua hinaaro te Atua ia ohipa amui raua ma te oaoa no te faariro i te fenua atoa ei paradaiso aore ra ei ô nehenehe mau, mai te ô i Edene. Aita râ te reira i tupu. No te aha? E haapii atu â tâua no nia i te reira i to muri mai haapiiraa.

“O tei poiete i te taata i te omuaraa, ua hamani ïa i te tane e te vahine.”—Mataio 19:4