Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 42

Mea itoito e mea taiva ore o Ionatana

Mea itoito e mea taiva ore o Ionatana

E faehau itoito mau o Ionatana, te tamaiti paari a‘e a te arii Saula. Ua parau Davida e mea vitiviti a‘e Ionatana i te aeto e e mea puai a‘e oia i te liona. I te hoê mahana, ua ite Ionatana vetahi mau faehau Philiseti i te hoê peho. Ua parau oia i ta ’na hopoi mauhaa tama‘i: ‘E aro tâua ia ratou i te taime noa e haapapu mai ai Iehova ia na reira. E parau ana‘e to Philiseti ia haere tâua i nia i te peho, e ite ïa tâua teie te taime no te aro ia ratou.’ Ua tuô atura to Philiseti: ‘A haere mai e a aro!’ Ua haere atura na tane e piti i te peho e ua aro raua i na faehau e 20.

Inaha o Ionatana te tamaiti paari a‘e a Saula, o oia ïa te tia ia parahi i nia i te terono. Ua ite râ Ionatana e ua maiti Iehova ia Davida no te riro ei arii apî no Iseraela. Aita Ionatana i pohehae a‘e. Ua riro Ionatana raua Davida ei hoa piri. Ua euhe raua ia paruru e ia turu te tahi i te tahi. Ua  horoa Ionatana ia Davida i to ’na iho ahu, oia atoa i ta ’na ‘o‘e, fana e tatua ei haapapuraa no to raua auhoaraa.

I te taime Davida i horo ê ai ia Saula, ua haere Ionatana e farerei ia ’na e ua parau atu: ‘A faaitoito. O oe ta Iehova i maiti no te riro ei arii. Ua ite atoa to ’u metua tane i te reira.’ Te hinaaro ra anei oe e fana‘o i te hoê hoa maitai mai ia Ionatana?

E rave rahi taime, ua ineine Ionatana i te pohe no te tauturu i to ’na hoa. Ua ite oia e ua hinaaro te arii Saula e haapohe ia Davida. Ua parau atura oia i to ’na metua tane: ‘E hara oe mai te peu e e haapohe oe ia Davida. Aita oia i hape a‘e.’ Ua riri roa Saula ia Ionatana. Tau matahiti i muri a‘e, ua pohe Saula raua Ionatana i roto i te hoê tama‘i.

I muri a‘e i to Ionatana poheraa, ua imi Davida i ta Ionatana tamaiti, o Mephiboseta to ’na i‘oa. A ite ai Davida ia ’na, ua parau oia ia Mephiboseta: ‘Ua riro to oe metua tane ei hoa maitai no ’u. E haapao ïa vau ia oe i te roaraa o to oe oraraa. E noho oe i to ’u aorai e e tamaa oe i ta ’u airaa maa.’ Aita roa ’tu Davida i haamo‘e i to ’na hoa Ionatana.

“Ia here outou te tahi i te tahi mai ia ’u e here nei ia outou. Ia horoa te hoê taata i to ’na ora no to ’na mau hoa, tera te here rahi a‘e.”—Ioane 15:12, 13