Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 41

Davida e Saula

Davida e Saula

I muri a‘e i to Davida haapoheraa ia Golia, ua faariro Saula ia Davida ei upoo no ta ’na nuu. E rave rahi aroraa ta Davida i upootia mai e ua riro atura oia ei taata tuiroo. A ho‘i ai Davida mai te tama‘i mai, e haere te mau vahine i rapae ma te ori e ma te himene: ‘Ua tairi Saula e tausani taata e o Davida, e ahuru tausani ïa taata!’ Ua pohehae atura Saula ia Davida e ua hinaaro oia e haapohe ia Davida.

Mea aravihi Davida i te hautiraa i te kinura. I te hoê mahana, a hauti ai Davida i te kinura na Saula, ua taora te arii i ta ’na mahae i nia ia Davida. Ua ape ihora Davida i te reira e ua mau te mahae i roto i te patu. I muri iho, ua tamata Saula i te haapohe ia Davida e rave rahi atu â taime. I te pae hopea, ua horo ê Davida no te tapuni ia ’na i roto i te medebara.

Ua rave ihora Saula i te hoê nuu e 3 000 faehau to roto no te a‘ua‘u ia Davida. Ua haere  oia i roto i te hoê ana, i reira Davida e ta ’na mau taata i tapuni ai. Ua parau ta Davida mau taata ma te reo mǎrû: ‘Teie te taime no te haapohe ia Saula.’ Ua nee mǎrû Davida ia Saula ra e ua tâpû oia i te hoê tuhaa o te ahu o te arii. Aita Saula i ite a‘e i tei tupu. I muri iho râ, ua inoino roa Davida no te mea aita oia i faaite i te tura i te arii ta Iehova i maiti. Aita Davida i farii e ia haapohe ta ’na mau taata ia Saula. I haere na Saula i rapae i te ana. Ma te tuô, ua faaite Davida ia Saula e ua nehenehe oia e haapohe ia ’na. Ua taui anei Saula i to ’na huru i nia ia Davida?

Aita. Ua hinaaro noâ oia e haapohe ia Davida. I te hoê po, ua haere mǎrû mai Davida e to ’na fetii Abisai i roto i te puhapa a Saula. Ua taoto Abinera, te taata tiai o Saula. Ua parau atura Abisai: ‘Teie te taime tano! Ia haapohe au ia ’na.’ Ua pahono atura Davida: ‘Na Iehova e faautua ia Saula. E rave noa taua i ta ’na mahae e ta ’na farii pape e e ho‘i taua.’

Ua haere Davida i nia i te mou‘a i pihai iho i te puhapa a Saula. Ua tuô oia: ‘Abinera, no te aha aita oe i paruru ai i te arii? Teihea roa te farii pape e te mahae a Saula?’ Ua ite Saula e o Davida tei paraparau. Ua na ô Saula: ‘Ua nehenehe oe e haapohe ia ’u. Aita râ oe i na reira. Ua ite au e o oe to muri nei arii no Iseraela.’ Ua ho‘i Saula i to ’na aorai. E ere râ pauroa te utuafare o Saula tei riri ia Davida.

“A tutava i te rave i te mea e tia ia outou tataitahi no te parahi hau noa e te taata atoa. Taeae ma, eiaha outou e tahoo atu, a tuu atu râ e na te Atua e faaite atu i to ’na riri.”—Roma 12:18, 19