Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 30

Ua faatapuni Rahaba i na taata hi‘o e piti

Ua faatapuni Rahaba i na taata hi‘o e piti

I haere na taata hi‘o no Iseraela i te oire o Ieriko, ua noho raua i te fare o te hoê vahine, o Rahaba to ’na i‘oa. Ua ite i te arii o Ieriko i te reira e ua tono oia i te mau faehau i te fare o Rahaba. Ua faatapuni Rahaba i na taata hi‘o e piti i nia iho i to ’na fare e ua parau oia i te mau faehau e ua haere raua i te tahi atu vahi. Ua parau oia i na taata hi‘o e piti: ‘E tauturu vau ia orua no te mea ua ite au e tei ia outou ra Iehova e e haru iho â outou i te fenua. A haapapu mai na e e faaora outou i to ’u utuafare.’

Ua parau na taata hi‘o ia Rahaba: ‘Te haapapu nei maua e eita hoê a‘e taata o te vai i roto i to oe fare e haapohehia.’ Ua na ô raua: ‘A taamu i te hoê taura uteute i te haamaramarama o te fare e e ora mai to oe utuafare.’

Ua vaiiho Rahaba i na taata hi‘o ia faaohipa i te taura i te haamaramarama no te haere ê. Ua haere raua na te mau mou‘a e ua tapuni raua i ô e toru mahana i te maoro hou a hoi ai ia Iosua ra. I muri iho, ua haere to Iseraela na roto i te anavai Ioridana e ua faaineine ratou ia ratou no te haru i te fenua. O Ieriko te oire matamua ta ratou i haru. Ua parau Iehova  ia ratou ia haaati i te oire hoê taime i te mahana taitahi e e ono mahana i te maoro. I te hituraa o te mahana, ua haaati ratou i te oire e hitu taime. Faata‘i atura te mau tahu‘a i ta ratou pu e tuô atura te mau faehau ma te puai. Ua parari atura te mau patu o te oire! Tei nia i te patu hoi to Rahaba fare. Aita râ te reira i parari. Ua faaorahia Rahaba e to ’na utuafare no te mea ua tiaturi oia ia Iehova.

“Aita atoa anei o Rahaba . . . i faarirohia ei vahine parau-tia na roto i te ohipa, no te mea ua farii maitai oia i na vea e ua faareva ia raua na te tahi atu e‘a?”—Iakobo 2:25