Eaha to roto?

Mau faaho'iraa ê

Tapura tumu parau

Ite no Iehova

Tahiti

A haapii i to tamarii

 HAAPIIRAA 3

Ua tiaturi Rahaba ia Iehova

Ua tiaturi Rahaba ia Iehova

A feruri na e tei Ieriko tatou, te hoê oire i te fenua Kanaana. Aita to reira mau taata e tiaturi ra ia Iehova. O Rahaba te i‘oa o te tahi vahine no ǒ.

I to ’na apîraa, ua faaroo Rahaba i te mau aamu no nia i tei tupu a vahi ai Mose i te miti Uteute e a aratai ai oia i to Iseraela i rapaeau ia Aiphiti. Ua ite atoa o ’na mea nafea Iehova i tauturu atu ai ia upootia i nia i to ratou mau enemi. I teie nei, ua faaroo oia e te puhapa ra to Iseraela i te hoê vahi fatata ’tu ia Ieriko!

Ua faatapuni Rahaba i na mânu no te mea ua tiaturi o ’na ia Iehova

I te tahi po, e piti taata no Iseraela tei haere e hi‘o ia Ieriko ma te huna. E mânu ïa tera na taata. A tae atu ai raua i to Rahaba fare, ua titau manihini atu o ’na ia tomo atu e ia faaea i reira. I te maororaa po, ua faaitehia i te arii o Ieriko e e taata tei haere mai e hi‘o ma te huna i te oire e tei roto hoi i te fare o Rahaba. Ua faaue atura te arii ia haru ia raua. Faatapuni a‘era Rahaba i na mânu e piti i nia i te tapo‘i o to ’na fare e ua parau i te mau taata o te arii: ‘Ua haere mai nei tera nau taata i ǒ nei, ua faarue ê na râ i te oire. Ia tapapa atu outou i teie nei, e haru ïa outou ia raua!’ Ua ite anei oe no te aha Rahaba i faatapuni ai i na mânu?— No te mea ua tiaturi o ’na ia Iehova e ua ite oia e e horoahia te fenua Kanaana i te mau Iseraela.

Hou na mânu e faarue ai i to Rahaba fare, ua parau atu raua e e ora mai o ’na e to ’na utuafare ia haamouhia Ieriko. Eaha ta raua i faaue ia ’na ia rave?— Ua na ô raua: ‘A rave i teie taura uteute e a faatautau i te reira i te haamaramarama. Ia na reira oe, e ora mai te taata atoa i roto i to fare.’ Ua rave Rahaba mai tei parauhia ’tu. Ua ite anei oe i tei tupu?—

Ua faaora Iehova ia Rahaba e to ’na utuafare

Tau mahana i muri a‘e, ua haaati te mau Iseraela i te oire ma te mamû e ono mahana, hoê taime i te mahana. I te hitu râ o te mahana, e hitu ïa taime i te haaatiraa i te oire e i muri iho, ua tuô ratou. Parari a‘era te mau patu o te oire ia Iehova, te tia noa ra râ te fare i faatautauhia te taura uteute i te haamaramarama!  Te ite ra anei oe i nia i te hoho‘a?— Ua ora mai Rahaba e to ’na utuafare!

Eaha ta oe e haapii mai i te hi‘oraa o Rahaba?— Ua tiaturi Rahaba ia Iehova no te mea ua faaroo oia e rave rahi ohipa faahiahia ta ’Na i faatupu. E nehenehe atoa oe e ite atu â i te mau mea faahiahia no nia ia Iehova. E tiaturi atoa anei oe ia ’Na mai ia Rahaba?— Ua papu ia matou e e!

A TAIO I ROTO I TA OE BIBILIA