Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A haapii i to tamarii

 HAAPIIRAA 5

Ua rave noa Samuela i te mea tia

Ua rave noa Samuela i te mea tia

Mai to ’na tamariiraa, ua ora e ua ohipa Samuela i te sekene, te vahi e haere ai te nunaa e haamori ia Iehova. Ua ite anei oe mea nafea Samuela i te taeraa i reira? Na mua, e hi‘o ana‘e eaha te parau no nia i te mama o Samuela, Hana.

Mea maoro to Hana hinaaroraa i te hoê aiû, eita râ ta ’na e nehenehe e fanau. Ua pure ïa o ’na ia Iehova e ua taparu ia tauturu atu. Ua parau oia ia ’Na e ia noaa ta ’na te hoê tamaiti, e horoahia ïa no te ora e no te ohipa i te sekene. Ua pahono Iehova i ta ’na pure e noaa mai nei ta ’na tamaiti, o Samuela to ’na i‘oa. Mai ta ’na i parau, a tia ’i to te tama e toru aore ra maha matahiti, ua aratai Hana ia ’na i te sekene no te tavini ia Iehova.

Ei Tahu‘a rahi i te sekene, o Eli te tia rahi o te nunaa i mua i te Atua. E piti ta ’na tamaroa paari e rave ra i te ohipa i reira. Te haamana‘o ra oe e e vahi te sekene e haere ai te taata e haamori ia Iehova? Te auraa, e mau ohipa maitatai ïa te itehia i reira. Ua ite râ Samuela i te mau peu iino roa ta te mau tamaiti a Eli i rave. Ua na reira atoa anei o ’na?— Aita, ua rave noa Samuela i te mea tia mai ta to ’na na metua i haapii atu.

I to oe mana‘o, eaha te tia ia Eli ia rave no ta ’na na tamaiti?— E mea tia ia faautua e ia ore faahou e faatia ia raua ia ohipa i roto i to te Atua fare. Aita râ Eli i na reira. Ua riri atura Iehova ia ’na e i ta ’na na tamaiti, faaoti a‘era ïa i te faautua ’tu.

Ua faaite Samuela i ta Iehova poroi ia Eli

I te tahi po, te taoto noa ra Samuela i faaroo ai oia i te hoê reo i te na ô: ‘Samuela!’ Horo atura o ’na ia Eli, pahono mai nei oia: ‘Aore au i pii ia oe.’ Ua tupu te reira e piti â taime. I muri a‘e i te toru o te piiraa, ua parau Eli ia Samuela e ia faaroo faahou oia i te reo, ia na ô atu oia: ‘A parau mai e Iehova e, te faaroo atu nei au.’ Ua na reira iho â Samuela. Ua faaue atura Iehova: ‘A parau na ia Eli e e faautua vau i to ’na utuafare no te mau peu  iino ta ratou i rave.’ I to oe mana‘o, mea ohie anei no Samuela ia faaite i tera poroi ia Eli?— Eita. Noa ’tu e ua riaria Samuela, ua faaite atu oia i ta Iehova mau parau e ua tupu iho â mai ta ’na i faahiti. Ua haapohehia na tamaiti e pohe a‘era atoa Eli i muri a‘e.

E hi‘oraa maitai Samuela no tatou. Noa ’tu te ohipa ino a vetahi ê, ua rave noa o ’na i te mea tia. E oe? E riro anei oe mai ia Samuela? E tamau anei oe i te rave i te mea tia? Ia na reira oe, e ere noa to oe na metua te oaoa, o Iehova atoa râ!

A TAIO I ROTO I TA OE BIBILIA

  • Samuela 1, 2:22-26; 3:1-21