Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A haapii i to tamarii

 HAAPIIRAA 2

Ua hinaaro Rebeka ia oaoa Iehova

Ua hinaaro Rebeka ia oaoa Iehova

E vahine here ia Iehova o Rebeka mai ta ’na ra tane Isaaka. Mea nafea raua i te matauraa? Mea nafea Rebeka i faaite ai e ua hinaaro o ’na ia oaoa Iehova? E hi‘o ana‘e i te huru o Rebeka.

O Aberahama e Sara na metua o Isaaka. I te fenua Kanaana, i ora na ratou e te taata i ore i haamori ia Iehova. Ua hinaaro ïa Aberahama ia faaipoipo ta ’na tamaiti i te hoê vahine e haamori ia Iehova. O Eliezera paha te tavini ta ’na i tono no te imi i te vahine na Isaaka i Harana, te fenua e ora ’i te fetii o Aberahama.

Ua ineine Rebeka i te haere e huti i te pape no te mau kamela

Mea atea roa te vahi i terehia ’i e Eliezera e te tahi atu mau tavini a Aberahama. Ua rave ratou ahuru kamela no te hopoi i te maa e te mau tao‘a horoa noa. E nafea Eliezera e ite ai i te vahine e maiti na Isaaka? A tae ai i Harana, ua haere o ’na e te mau tavini i te tahi apoo pape no to ’na ite e fatata te mau vahine i te tae mai no te huti i te pape. Pure atura oia ia Iehova e na ô a‘era: ‘Ia ani au i te tahi vahine apî ia horoa mai i te pape na ’u e ia farii oia i te na reira na ’u e no te mau kamela, e ite ïa vau e tera te vahine ta oe i maiti.’

I muri iho, haere mai nei te vahine apî ra o Rebeka i te apoo pape. Te faaite ra te Bibilia e mea nehenehe roa o ’na. Ani atura Eliezera maa pape na ’na e ua parau  mai nei te vahine ia ’na: ‘E! E haere au e huti i te pape na oe e na te mau kamela.’ A feruri na ehia taime to Rebeka hororaa e huti i te pape na te mau kamela tei poihâ roa! A hi‘o na i te hoho‘a, te ite ra anei oe ia ’na e ohipa ra?— Ua maere roa Eliezera, ua pahono hoi Iehova i ta ’na pure.

Ua horoa Eliezera e rave rahi tao‘a maitai na Rebeka. Ua titau manihini atura te vahine ia ’na e te tahi atu mau tavini ia haere i te fare o to ’na metua tane. I reira, faataa a‘era Eliezera i te tumu i tonohia ’i o ’na e Aberahama e mea nafea Iehova i pahono ai i ta ’na pure. Ua oaoa e ua farii te utuafare o Rebeka ia faaipoipo o ’na ia Isaaka.

Ua apee Rebeka ia Eliezera i Kanaana e ua faaipoipo atura ia Isaaka

I to oe mana‘o, ua hinaaro atoa anei Rebeka e faaipoipo ia Isaaka?— Ua ite Rebeka e na Iehova i tono mai ia Eliezera. A ani atu ai to ’na utuafare e e hinaaro anei oia e haere i Kanaana e faaipoipo ia Isaaka, ua na ô oia: ‘E, e hinaaro vau e haere.’ Aita ïa i faataere, ua apee atura ia Eliezera. I to ’na taeraa i Kanaana, ua faaipoipo atura ia Isaaka.

Ua rave Rebeka i to Iehova hinaaro e ua haamaitaihia, mea na roto hoi to ’na opu fetii Iesu i fanauhia ’i tau matahiti i muri a‘e! Ia na reira atoa oe, e oaoa Iehova e e haamaitaihia oe.

A TAIO I ROTO I TA OE BIBILIA

  • Genese 12:4, 5; 24:1-58, 67