Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A haapii i to tamarii

 HAAPIIRAA 11

Ua papai ratou i to Iesu aamu

Ua papai ratou i to Iesu aamu

Te ite ra anei oe i te mau taata i nia i te hoho‘a?— Te vai ra o Mataio, Mareko, Luka, Ioane, Petero, Iakobo, Iuda e Paulo. I ora na teie mau taata i te tau o Iesu e ua papai ratou i to ’na aamu. E hi‘o ana‘e eaha te parau no nia ia ratou.

Eaha ta oe i ite no nia i teie mau taata?

E toru o ratou tei riro ei aposetolo e tei poro na muri ia Iesu. Ua ite anei oe o vai?— O Mataio, Ioane e Petero. Ua matau maitai na aposetolo Mataio e Ioane ia Iesu e ua papai raua taitahi i te hoê buka no nia i te oraraa o Iesu. Na te aposetolo Ioane atoa i papai i te buka  Apokalupo e e toru rata tei parauhia Ioane 1, Ioane 2 e Ioane 3. E piti atoa rata ta te aposetolo Petero i roto i te Bibilia tei parauhia Petero 1 e Petero 2. I roto i te piti o ta ’na rata, ua papai Petero i tei tupu a parau ai Iehova mai te ra‘i mai ia Iesu: ‘O tau Tamaiti teie. Ua here e ua mauruuru roa vau ia ’na.’

Te vai ra ’tu â te tahi taata papai i nia i te hoho‘a tei faaite atoa i te tahi mau parau no nia ia Iesu i roto i ta ratou mau buka. O Mareko te tahi. Ua ite o ’na i te ohipa atoa i tupu a tapeahia ’i Iesu no te mea e au ra e tei reira oia i tera taime. O Luka te tahi atu. E taote oia e ua riro mai ei Kerisetiano i muri a‘e paha i te poheraa o Iesu.

E piti taeae o Iesu te itehia ra i nia i te hoho‘a tei papai atoa i te tahi buka o te Bibilia. Ua ite anei oe i to raua i‘oa?— O Iakobo e Iuda. Aita raua i tiaturi oioi ia Iesu. I mana‘o na hoi raua e e ua maamaahia o ’na. I muri a‘e râ, ua tiaturi e ua riro ei Kerisetiano.

Te taata papai hopea i nia i te hoho‘a, o Paulo. Hou a riro ai ei Kerisetiano, o Saulo to ’na i‘oa. Mea riri roa na ’na i te mau Kerisetiano e i hamani ino atoa na oia ia ratou. Mea nafea Paulo i hinaaro ai e riro ei Kerisetiano?— I te tahi mahana, tei nia Paulo i te purumu no te haere i Damaseko, faaroo atura o ’na i te hoê reo mai te ra‘i mai. No Iesu tera reo! Ua ani o ’na ia Paulo: ‘No te aha e mea ino roa ’i oe i nia i te feia e tiaturi ia ’u?’ I muri a‘e, ua taui Paulo e ua riro ei Kerisetiano. Na ’na i papai 14 buka o te Bibilia, mai te rata i to Roma e tae atu i te rata i to Hebera.

Te taio ra tatou i te Bibilia i te mau mahana atoa, e ere anei?— Mea na reira hoi tatou e ite roa ’i o vai Iesu. E hinaaro anei oe e haapii atu â no nia ia Iesu?—

A TAIO I ROTO I TA OE BIBILIA

  • Petero 2, 1:16-18

  • Mareko 3:21; 14:51

  • Iuda 1

  • Ohipa 9:1-18