Eaha to roto?

Mau faaho'iraa ê

Tapura tumu parau

Ite no Iehova

Tahiti

A haapii i to tamarii

 HAAPIIRAA 7

Ua riaria e ua mana‘o ê na anei oe e o oe ana‘e?

Ua riaria e ua mana‘o ê na anei oe e o oe ana‘e?

A hi‘o na i te tamaiti i nia i te hoho‘a. E au e o ’na ana‘e e te riaria ra oia, e ere anei? Mai tera atoa anei oe i te tahi taime?— Tera iho â te huru o te taata i te tahi mau mahana. Te faaite ra te Bibilia i tei tupu no te tahi mau hoa o Iehova tei riaria e tei mana‘o e o ratou ana‘e. O Elia te tahi. E hi‘o ana‘e eaha te parau no nia ia ’na.

Ua hinaaro Iezebela e haapohe ia Elia

Mea maoro a‘enei, hou Iesu a fanauhia ’i, i ora na Elia i Iseraela. Aita te arii Iseraela o Ahaba i haamori i te Atua mau ra o Iehova. O Baala râ to ’na atua e to ta ’na vahine ra Iezebela. Ua haamori ïa te rahiraa i Iseraela i tera atua hape. E arii vahine ino roa o Iezebela! I hinaaro na hoi o ’na e haapohe i te feia atoa e haamori ia Iehova mai ia Elia! Ua ite anei oe ua nafea Elia?—

 Ua horo ê o ’na e ua haere i te vahi atea i roto i te medebara e ua tapuni i roto i te hoê ana! I to oe mana‘o, no te aha oia i na reira ’i?— Ua riaria Elia. Ua tano anei o ’na i te riaria? Aita, ua ite ê na hoi oia i te puai o Iehova. Ua pahonohia ta ’na pure a faatopa mai ai Iehova i te auahi mai te ra‘i mai. Ua ite ïa Elia e i tauturu na e e tauturu â Iehova ia ’na!

Mea nafea Iehova i tauturu ai ia Elia?

Tei roto Elia i te ana a parau atu ai Iehova: ‘Te aha na oe i reira?’ Ua pahono Elia: ‘O vau ana‘e te taata i toe mai e haamori ra ia oe. O vau ana‘e e te riaria nei au, e haapohehia hoi au.’ Ua mana‘o Elia e ua pohe te taatoaraa o te feia e haamori ra ia Iehova. Ua na ô atu râ Iehova: ‘E ere te reira i te parau mau. E 7 000 taata te haamori noa ra ia ’u. A faaitoito. E ohipa â ta ’u na oe!’ I to oe mana‘o, ua oaoa anei Elia i te faaroo i ta Iehova i parau iho nei?—

Eaha te haapii mai i te huru o Elia?— Eiaha roa e riaria e e mana‘o e o oe ana‘e. E hoa to oe o te here ra ia Iehova e ia oe. Hau atu â, mea puai roa Iehova e e tauturu oia ia oe! Te oaoa ra anei oe i te ite e e tauturu noa Iehova ia oe?—

A TAIO I ROTO I TA OE BIBILIA