Eaha to roto?

Mau faaho'iraa ê

Tapura tumu parau

Ite no Iehova

Tahiti

A haapii i to tamarii

 HAAPIIRAA 6

Aita Davida i riaria noa ’‘e

Aita Davida i riaria noa ’‘e

Eaha ta oe e rave ia riaria ana‘e oe?— E haere paha oe ia mama e ia papa ra. Te vai ra râ te hoê o te nehenehe atoa e tauturu atu. O ’na te mea puai roa ’‘e. Ua ite anei oe o vai?— O te Atua ra o Iehova. E hi‘o ana‘e i te huru o te taurearea ra o Davida i roto i te Bibilia. Ua papu ia ’na e e tauturu noa iho â Iehova, aita ïa o ’na i riaria.

Mai to ’na aiûraa mai â, ua haapii na metua o Davida ia ’na ia here ia Iehova. Ua tauturu te reira ia ’na ia ore e riaria noa ’‘e. Ua ite oia e o Iehova to ’na Hoa e e tauturu atu iho â oia. I te tahi mahana, te haapao ra Davida i te nǎnǎ, haere mai nei te hoê liona e haru i te tahi mamoe! Ua ite anei oe ua nafea Davida? Ua auau o ’na i te liona. Aita roa ’‘e ta ’na e tao‘a i roto i te rima, ua taparahi pohe roa râ i te animara! I muri iho, ua na reira atoa i nia i te hoê daba i hinaaro e haru i te mamoe! I to oe mana‘o, o vai tei tauturu ia Davida?— O Iehova.

Ua faaite â Davida i to ’na itoito i te tahi atu taime. Ua tupu te tama‘i i rotopu i te mau Iseraela e te mau Philiseti. O Golia te i‘oa o te tahi faehau o te pǔpǔ enemi, e taata rahi e te roa atoa! I faaooo na o ’na i te mau faehau Iseraela e ia Iehova. Ua ani atura ïa ia haere mai e aro ia ’na, ua riaria roa râ ratou ia Golia. A faaroo ai Davida i te reira, ua na ô atu oia: ‘O vau te aro ia oe! Na Iehova e tauturu ia ’u e e pohe oe!’ I to oe mana‘o, e mea itoito anei Davida?— E, e taata itoito roa. E hinaaro anei oe e ite i tei tupu i muri a‘e?

Ua rave ihora Davida i ta ’na pata e e pae ofai e ua haere e aro i te faehau enemi. A ite ai Golia e e taurearea o Davida, ua faaooo atu oia! Ua parau atu râ te taurearea: ‘Te haere mai nei oe e te ‘o‘e, o vau râ ma te i‘oa ïa o Iehova!’ Rave ihora Davida i te hoê ofai, pata atura i nia ia Golia, mau roa a‘era te ofai i ropu maitai i to ’na rae! Topa atura Golia i raro, pohe a‘era! Ua riaria roa te mau Philiseti i horo  ê ai te taatoaraa o ratou. Mea nafea to te taurearea ra Davida i nehenehe ai e haapohe i tera taata rahi?— Ua tauturu Iehova ia ’na, e mea puai a‘e hoi O ’na i tera taata rahi!

Aita Davida i riaria noa ’‘e no to ’na ite e e tauturu iho â Iehova ia ’na

Eaha te haapii mai i te aamu o Davida?— O Iehova te mea puai roa ’‘e e o ’na to oe Hoa. Ia riaria noa ’tu oe, a haamana‘o, e nehenehe Iehova e tauturu ia oe ia riro ei taata itoito!

A TAIO I ROTO I TA OE BIBILIA

  • Salamo 56:3, 4

  • Samuela 1, 17:20-54