Eaha to roto?

Mau faaho'iraa ê

Tapura tumu parau

Ite no Iehova

Tahiti

E haafatata ’tu ia Iehova

 PENE 16

A “rave i te parau-tia” a haere ai e te Atua

A “rave i te parau-tia” a haere ai e te Atua

1-3. (a) No te aha tatou i riro ai ei aitarahu na Iehova? (b) Eaha ta to tatou Faaora î i te here e ani maira ia tatou?

A FERURI na e to nia outou i te hoê pahi e tomo ra i te mauraa. I te taime mau e mana‘o ai outou e aita e ravea faahou, e tae mai te hoê faaora o te huti ia outou i te vahi panoonoo ore. E ite mau outou ia topa te hau a faaatea ’i to outou faaora ia outou i te ati e a na ô ai e: “Ua ora oe i teie nei”! Eita anei outou e mana‘o e e aitarahu outou na taua taata ra? I te auraa mau roa, ei ia ’na to outou ora.

2 Na te tahi mau paeau, e faahoho‘a te reira i ta Iehova i rave no tatou. Mea papu roa e e aitarahu tatou na ’na. Inaha hoi, ua horoa oia i te hoo, e nehenehe atura ïa tatou e faaorahia i te haavîraa a te hara e te pohe. E panoonoo ore to tatou i te iteraa e a faaohipa noa ’i tatou i te faaroo i taua tusia faahiahia ra, e faaorehia ta tatou mau hara, e mea papu to tatou a muri a‘e mure ore. (Ioane 1, 1:7; 4:9) Mai ta tatou i ite i roto i te pene 14, ua riro te hoo ei faaiteraa rahi roa ’‘e o te aroha o Iehova e o ta ’na parau-tia. E nafea tatou e tia ’i?

3 Mea tano ia feruri i te mea ta to tatou Faaora î i te here e ani mai ia tatou. Te na ô maira Iehova na roto i te peropheta Mika e: “Ua faaite mai oia ia oe, e te taata na, i te mea maitai; e eaha ta Iehova hinaaro ia oe ra maori râ o te rave i te parau-tia, e ia hinaaro hoi i te aroha, e te haere ma te haehaa i te aro o to Atua?” (Mika 6:8) A tapao na e hoê o te mau mea ta Iehova e ani maira ia tatou, e ‘rave ïa i te parau-tia.’ E nafea tatou e na reira ’i?

Te tapiraa i te ‘parau-tia mau’

4. E nafea tatou e ite ai e te tiaturi ra Iehova e ia ora tatou ia au i ta ’na mau ture aveia tia?

4 Te tiaturi ra Iehova e ia ora tatou ia au i ta ’na mau ture  aveia no te maitai e te ino. I te mea e mea tia ta ’na mau ture aveia, ia au to tatou haerea i te reira, te tapi ra ïa tatou i te parau-tia. “E haapii . . . i te parau maitai; e imi i te mea tia,” o ta te Isaia 1:17 ïa e parau ra. Te a‘o maira te Parau a te Atua e “imi i te parau-tia.” (Zephania 2:3) Te faaitoito atoa maira ia “ahu i te huru taata apî o tei poietehia ia au i te hinaaro o te Atua i roto i te parau-tia.” (Ephesia 4:24, MN) E patoi te haerea tia mau—te parau-tia mau—i te haavîraa u‘ana, te viivii, e te morare ore, no te mea e ofati te reira i te mea mo‘a.—Salamo 11:5; Ephesia 5:3-5.

5, 6. (a) No te aha e ere ai i te mea teimaha no tatou ia faaau atu i nia i te mau ture aveia a Iehova? (b) E nafea te Bibilia ia faaite e e ohipa tamau te tapiraa i te haerea tia?

5 Mea teimaha anei no tatou ia faaau atu i nia i te mau ture aveia tia a Iehova? Eita. Eita te hoê mafatu tae ia Iehova e fiu i ta ’na mau titauraa. No te mea mea here na tatou to tatou Atua e to ’na huru, te hinaaro nei tatou e ora ma te auhia e ana. (Ioane 1, 5:3) A haamana‘o na e ‘te au ra Iehova i te parau-tia.’ (Salamo 11:7) Mai te peu e ua opua mau tatou e pee i te parau-tia a te Atua, e tia ia tatou ia hinaaro i te mea ta Iehova e hinaaro e ia riri i te mea ta ’na e riri.—Salamo 97:10.

6 E ere i te mea ohie no te taata tia ore ia tapi i te haerea tia. E tia ia tatou ia tatara i te huru taata tahito ma ta ’na mau peu hara e ia ahu i te mea apî. Te na ô ra te Bibilia e te “faahouhia” ra te huru taata apî na roto i te ite mau. (Kolosa 3:9, 10) Te faaite ra te parau o te reo tumu i hurihia ei “faahouhia” e e ohipa tamau te ahuraa i te huru taata apî, e ohipa o te titau i te tutavaraa tuutuu ore. Noa ’tu te puai o ta tatou tutavaraa e rave i te mea tia, i te tahi mau taime, e faaturori to tatou huru hara ia tatou i roto i te feruriraa, te parau, aore ra te raveraa.—Roma 7:14-20; Iakobo 3:2.

7. Ia nafea tatou ia hi‘o i te mau faataupupuraa i roto i ta tatou mau tutavaraa e tapi i te haerea tia?

7 Ia nafea tatou ia hi‘o i te mau faataupupuraa i roto i ta tatou mau tutavaraa e tapi i te haerea tia? Eiaha iho â ïa tatou ia  hinaaro e faaiti mai i te huru ino o te hara. Eiaha atoa râ tatou ia faarue noa ’‘e, a mana‘o ai e aita tatou e tano faahou ra ia tavini ia Iehova no ta tatou mau hape. Ua rave to tatou Atua aau maitai i te mau faanahoraa e ia farii-maitai-faahou-hia te feia e tatarahapa ra ma te haavare ore. A hi‘o na i te mau parau mahanahana a te aposetolo Ioane: “Te papai nei au i teie nei mau parau ia outou, ia ore outou ia rave i te hara.” I muri iho râ, ua parau oia ma te ite maite i te mea mau e: “Ia roohia ’tu râ te hoê taata i te hara [no te huru tia ore i noaa ei tufaa], e tia to tatou tei ǒ i te Metua ra, o Iesu Mesia.” (Ioane 1, 2:1) Oia, ua horoa Iehova i te tusia hoo o Iesu e ia nehenehe tatou e tavini ia ’Na ma te fariihia noa ’tu to tatou huru hara. Eita anei te reira e turai ia tatou ia hinaaro e faahope i te faaoaoa ia Iehova?

Te parau apî maitai e te parau-tia a te Atua

8, 9. E nafea te pororaa i te parau apî maitai e haapapu ai e e parau-tia ta Iehova?

8 E nehenehe ta tatou e faaohipa i te parau-tia—oia mau, e pee i te parau-tia a te Atua—na roto i te rave-maite-raa i te pororaa i te parau apî maitai o te Basileia o te Atua ia vetahi ê. Eaha te taairaa e vai ra i roto i ta Iehova parau-tia e te parau apî maitai?

9 Eita Iehova e haamou i teie faanahoraa ino ma te ore e faaoto na mua i te faaararaa. I roto i ta ’na parau tohu no nia i te mea e tupu i te anotau hopea, ua parau Iesu e: “E mata na râ te evanelia i te faaite-haere-hia i te mau fenua atoa nei.” (Mareko 13:10; Mataio 24:3) Te faaite ra te faaohiparaa i na ta‘o ra “mata na” e e tupu â te tahi atu mau mea i muri a‘e i te ohipa pororaa na te ao atoa. I roto i te reira, te vai ra te ati rahi i tohuhia o te riro ïa ei haamouraa no te feia iino e o te haamarari i te e‘a ia tae mai te ao apî parau-tia. (Mataio 24:14, 21, 22) Papu maitai, aita e taata e tia ia pari ia Iehova i te parau-tia ore i nia i te feia iino. Na roto i te faaotoraa i te faaararaa, te horoa ra oia i te ravea e ia taui ratou i to ratou haerea e ia ora ’tu ïa i te haamouraa.—Iona 3:1-10.

Te faaite ra tatou i te parau-tia a te Atua ia faaite tatou i te parau apî maitai ia vetahi ê ma te ore e faatia pae tahi

10, 11. E nafea ta tatou pororaa i te parau apî maitai e faaite ai i ta te Atua parau-tia?

 10 E nafea ta tatou pororaa i te parau apî maitai e faaite ai i ta te Atua parau-tia? Na mua roa, mea tia iho â ia rave tatou i tei maraa ia tatou no te tauturu ia vetahi ê ia ora ratou. E rave faahou ana‘e i te hi‘oraa e te faaorahia ra tatou mai nia mai i te hoê pahi e tomo atura. Ma te parahi maitai i nia i te hoê poti tautea, e tauturu mau paha outou i te feia e vai noa râ i roto i te pape. Oia atoa, e hopoia ta tatou i nia i te feia e tutava noa râ i roto i te “mau pape” o teie ao ino. Parau mau, mea rahi o te patoi ra i ta tatou poroi. A faaoromai noa ’i râ Iehova, e hopoia na tatou te horoaraa i te ravea ‘ia noaa te tatarahapa’ ia ratou e ia au atu ai ia faaorahia.—Petero 2, 3:9.

11 Na roto i te pororaa i te parau apî maitai i te taata atoa ta tatou e farerei, e faaite tatou i te parau-tia na roto i te tahi atu ravea faufaa: Te faaite ra tatou i te faatia pae tahi ore. A haamana‘o e ‘e ore te Atua e haapao i te huru o te taata, o te mǎta‘u râ ia ’na, e o te rave i te parau-tia i te mau fenua atoa ra, o te itehia mai ïa e ana.’ (Ohipa 10:34, 35) Ia hinaaro tatou e pee i ta ’Na parau-tia, eiaha tatou ia hi‘o ino i te taata. Ia faaite râ tatou i te parau apî maitai ia vetahi ê ma te ore e haapao i to ratou nunaa, to ratou tiaraa totiare, aore ra ta ratou rahiraa faufaa. E horoa ïa tatou i te taata atoa e faaroo mai i te ravea e faaroo e e farii ai i te parau apî maitai.—Roma 10:11-13.

E nafea tatou ia haa i nia ia vetahi ê

12, 13. (a) No te aha e ore ai e tia ia tatou ia ru i te faaino ia vetahi ê? (b) Eaha te auraa o te a‘oraa a Iesu e “faaea i te faaino” e e “faaea i te faahapa”? (A hi‘o atoa i te  nota i raro i te api.)

12 E faaohipa atoa tatou i te parau-tia na roto i te haaraa i nia ia vetahi ê mai ta Iehova haaraa i nia ia tatou. Mea ohie roa ia haava ia vetahi ê, a faaino ai i ta ratou mau hape e a feaa ’i i te mau mana‘o i turai ia ratou. O vai râ i roto ia tatou o te hinaaro ia paheru Iehova i te mau mana‘o i turai ia tatou e i ta tatou mau hapa ma te aroha ore? E ere mai tera ta Iehova haaraa i nia ia tatou. Ua tapao te papai salamo e: “Ahiri oe, e Iehova,  e tapao na i te mau hara nei, o vai, e Iehova, te taata e mau?” (Salamo 130:3) Aita anei tatou e mauruuru ra e eita to tatou Atua parau-tia e te aroha hamani maitai e haamana‘o noa i ta tatou mau hape? (Salamo 103:8-10) E nafea ïa tatou ia haa i nia ia vetahi ê?

13 Mai te peu e ua taa ia tatou te huru aroha hamani maitai o ta te Atua parau-tia, eita tatou e ru i te faaino ia vetahi ê no te tahi mau mea e ere i te ohipa na tatou aore ra e ere i te mea faufaa roa. I roto i ta ’na A‘oraa i nia i te mou‘a, ua faaara Iesu e: “[A faaea i te] faaino, ia ore outou ia faainohia mai.” (Mataio 7:1; MN) Ia au i ta Luka faatiaraa, ua na ô â Iesu e: “[A faaea i te] faahapa ’tu, e eita outou e faahapahia mai.” * (Luka 6:37; MN) Ua faaite Iesu e te ite maitai ra oia e mea huru faaino te taata tia ore. E tia i te taata atoa e faaroo ra ia ’na o te matau i te faaino ia vetahi ê ma te teimaha, ia faaea.

14. Eaha te mau tumu e tia ’i ia tatou ia “faaea i te faaino” ia vetahi ê?

14 No te aha e tia ’i ia tatou ia “faaea i te faaino” ia vetahi ê? A tahi, no te mea mea taotiahia to tatou mana. Te haamana‘o maira te pǐpǐ ra o Iakobo e: “Hoê hoi tumu o te ture, e tia ia ’na ia [haava]”—o Iehova. No reira Iakobo i tano ai i te uiraa e: “O vai hoi oe na a faahapa ’i ia vetahi ê?” (Iakobo 4:12; MN; Roma 14:1-4) Hau atu â, e hape ohie noa ta tatou mau haavaraa no to tatou huru hara. Mea rahi te mau huru feruriraa e te mau mana‘o turai—tae noa ’tu te mana‘o oti noa, te teoteo i putapupû, te pohehae, e te faahua parau-tia—o te faahape i te huru e hi‘o ai tatou i te taata-tupu. Te vai ra ’tu â to tatou mau taotiaraa, e e tauturu mai te feruriraa i te reira eiaha ia ru i te imi i to vetahi ê hape. Aita tatou i ite eaha to roto i te mafatu; aita atoa tatou i ite i te mau huru tupuraa atoa o vetahi ê. O vai hoi tatou a faahape ai i te mau mana‘o turai o te mau hoa  faaroo aore ra a faaino ai i ta ratou mau tutavaraa i roto i te taviniraa i te Atua? Mea au roa ’tu â hoi ia pee ia Iehova na roto i te imiraa i te maitai o to tatou mau taeae e tuahine, eiaha râ ia faaea noa i nia i ta ratou mau hape!

15. Eaha te mau parau e te huru i nia ia vetahi ê aita e parahiraa i roto i te feia e haamori ra i te Atua, e no te aha?

15 E te mau melo o to tatou utuafare? Ma te peapea, i roto i te ao i teie tau, te faahitihia ra te tahi o te mau faainoraa teimaha roa ’‘e i roto i tei tia ia riro ei haapuraa hau—te fare. E ere i te mea varavara ia faaroo no nia i te mau tane, te mau vahine, aore ra te mau metua hamani ino, o te “faautua” i te mau melo o to ratou utuafare i te hoê pueraa hamani-ino-raa tamau na roto i te parau vaha e i te pae tino. Aita râ to te mau parau iria, te mau tâhitohitoraa patiatia, e te hamani-ino-raa e parahiraa i roto i te feia e haamori ra i te Atua. (Ephesia 4:29, 31; 5:33; 6:4) Eita te a‘oraa a Iesu e “faaea i te faaino” e e “faaea  i te faahapa” e au noa no rapaeau i te fare. A haamana‘o e e titau te faaohiparaa i te parau-tia ia haa i nia ia vetahi ê mai ta Iehova haaraa i nia ia tatou. E e ere to tatou Atua i te mea teimaha e te ino i nia ia tatou. Ua ‘î râ oia i te aroha’ i nia i te feia e here ia ’na. (Iakobo 5:11) Auê ïa hi‘oraa faahiahia mau no tatou ia pee atu!

Te mau matahiapo e tavini ra “no te tia”

16, 17. (a) Eaha ta Iehova e tiaturi ra i te mau matahiapo? (b) Eaha te tia ia ravehia ia ore te hoê taata hara e faaite i te tatarahapa mau, e no te aha?

16 E hopoia na tatou paatoa te faaohiparaa i te tia, e hopoia taa ê râ ta te mau matahiapo i roto i te amuiraa Kerisetiano i te reira paeau. A tapao na i te faataaraa parau tohu i te mau “[tamaiti hui] arii” e vai ra i roto i te Isaia: “Inaha, e [faatere] mai te hoê arii [no te] parau-tia ra, e te tahi pǔpǔ [tamaiti hui] arii atoa ra [no te tia].” (Isaia 32:1; MN) Oia, te tiaturi ra Iehova ia tavini te mau matahiapo ma te tia. E nafea ratou e na reira ’i?

17 Ua ite maitai teie mau tane aravihi i te pae varua e e titau te tia, aore ra te parau-tia, ia vai viivii ore noa te amuiraa. I te tahi taime, mea titauhia ia haava te mau matahiapo i te tahi mau hara iino. Ia rave ratou i te reira, e haamana‘o ratou e e imi te parau-tia a te Atua i te faatupu i te aroha hamani maitai i te mau taime atoa e nehenehe ai. E tamata ïa ratou i te aratai i te taata hara e ia tatarahapa oia. Eaha râ mai te peu e eita te taata hara e faaite i te tatarahapa mau noa ’tu taua mau tutavaraa ra e tauturu ia ’na? Ma te parau-tia tia roa, te faaue ra te Parau a Iehova ia ravehia te hoê taahiraa etaeta: “E faataa ê atu outou i taua taata parau ino i roto ia outou na.” Ia tiavaruhia ïa oia i rapae i te amuiraa. (Korinetia 1, 5:11-13; Ioane 2, 9-11) E peapea te mau matahiapo ia rave ratou i taua ohipa ra, te farii ra râ ratou e mea titauhia no te paruru i te viivii ore morare e pae varua o te amuiraa. I reira atoa râ, te tiaturi ra ratou e ia tae i te hoê mahana, e ho‘i mai te huru mau o te taata hara e e ho‘i mai oia i te amuiraa.—Luka 15:17, 18.

18. Eaha ta te mau matahiapo e haamana‘o noa ia pûpû ratou i te a‘oraa bibilia ia vetahi ê?

 18 Te taviniraa ia au i te parau-tia, e titau atoa ïa ia horoa i te a‘oraa bibilia ia hinaarohia. Parau mau, eita te mau matahiapo e imi i ta vetahi ê mau hape. Eita atoa ratou e hinaaro e faatitiaifaro i te mau taime atoa. E nehenehe râ te hoê hoa faaroo ‘e hape ma te ore e ite vave atu.’ Ia haamana‘o ratou e e ere te parau-tia a te Atua i te mea ino aore ra te mea huru aau ore, e turaihia te mau matahiapo ia “tamata i te faatitiaifaro i teie taata na roto i te aau mǎrû.” (Galatia 6:1, MN) No reira, eita ratou e tama‘i i te hoê tei hape aore ra e faaohipa i te mau parau teimaha. E faaitoito maoti te a‘oraa i horoahia ma te here i te taata e farii ra i te reira. Ia horoa noa ’tu ratou i te a‘o e tano—a faataa maitai ai i te mau faahopearaa o te hoê haerea paari ore—e haamana‘o noa te mau matahiapo e e mamoe no te nǎnǎ a Iehova te hoa faaroo i hape. * (Luka 15:7) Ia papu maitai e mea na roto i te here i a‘ohia ’i tei hape, mea papu a‘e e e titiaifaro oia.

19. Eaha te mau faaotiraa e titauhia i te mau matahiapo ia rave, e e tia ia ratou ia niu i taua mau faaotiraa ra i nia i te aha?

19 E pinepine te mau matahiapo i te titauhia ia rave i te mau faaotiraa no nia i to ratou mau hoa faaroo. Ei hi‘oraa, i te tahi taime, e tia ia ratou ia hi‘o e e au anei i te tahi atu mau taeae i roto i te amuiraa ia poroihia ratou ei matahiapo aore ra ei tavini tauturu. Ua ite te mau matahiapo i te faufaaraa e riro ei mea faatia pae tahi ore. E vaiiho ratou e na te mau titauraa a te Atua no taua mau faatoroaraa ra e aratai ia ratou i roto i ta ratou mau faaotiraa, ma te ore e tiaturi i te mau huru aau o te taata. E haa ïa ratou “eiaha ei mana‘o oti noa, e ma te faatia pae tahi ore.”—Timoteo 1, 5:21MN.

20, 21. (a) E tutava te mau matahiapo e riro ei aha, e no te aha? (b) Eaha ta te mau matahiapo e nehenehe e rave no te tauturu i “te aau taiâ”?

 20 E faaohipa te mau matahiapo i te parau-tia a te Atua na roto atoa i te tahi atu mau ravea. I muri a‘e i to ’na tohuraa e e tavini ratou “no te tia,” ua na ô â Isaia e: “E riro hoi te hoê taata mai te faarǔrǔraa i te vero ra, e mai te pupuniraa i te mata‘i rahi ra; e mai te pape rii tahe i te vahi pâpâmaro ra; e mai te mǎrǔ o te hoê mato rahi i te fenua paurâ.” (Isaia 32:2) E tutava ïa te mau matahiapo i te riro ei tumu tamahanahanaraa e te tamǎrûraa no to ratou mau hoa haamori.

21 I teie tau, no te mau fifi atoa e tarapape ai te aau, mea rahi o te hinaaro i te faaitoitoraa. E te mau matahiapo, eaha ta outou e nehenehe e rave no te tauturu i “te aau taiâ”? (Tesalonia 1, 5:14) A faaroo atu ia ratou ma te aumauiui. (Iakobo 1:19) E hinaaro paha ratou e paraparau no nia i te “oto” o to ratou  aau e te hoê taata ta ratou e tiaturi. (Maseli 12:25) A haamahanahana ’tu ia ratou e te hinaarohia ra, te haafaufaahia ra e te herehia ra ratou—oia mau, e Iehova e e to ratou mau taeae e tuahine atoa. (Petero 1, 1:22; 5:6, 7) Hau atu â, e nehenehe ta outou e pure e o ratou e no ratou. Ia faaroo ratou i te hoê matahiapo ia pure ma te aau tae no ratou, e nehenehe ratou e tamahanahana-roa-hia. (Iakobo 5:14, 15) Eita e ore e e ite iho â te Atua parau-tia i ta outou mau tutavaraa î i te here e tauturu i tei hepohepo.

E pee te mau matahiapo i ta Iehova parau-tia ia faaitoito ratou i te feia ua tarapape te aau

22. E nafea tatou ia pee i ta Iehova parau-tia, e ma teihea faahopearaa?

22 Oia mau, e haafatata ’tu â tatou ia Iehova na roto i te peeraa i ta ’na parau-tia! Ia paturu tatou i ta ’na mau ture aveia tia, ia faaite tatou i te parau apî maitai o te ora ia vetahi ê, e ia opua tatou e imi i te maitai i roto ia vetahi ê eiaha râ i ta ratou mau hape, te faaite ra tatou i te parau-tia a te Atua. E te mau matahiapo, ia paruru outou i te viivii ore o te amuiraa, ia horoa outou i te a‘oraa bibilia o te patu, ia rave outou i te mau faaotiraa pae tahi ore, e ia faaitoito outou i te feia ua tarapape te aau, te au ra outou i te parau-tia a te Atua. Auê ïa to Iehova aau i te oaoa ia hi‘o mai oia i raro mai te ra‘i mai e ia ite i to ’na nunaa e tutava hope ra i te “rave i te parau-tia” a haere ai e to ratou Atua!

^ par. 13  Te parau nei te tahi mau Bibilia e “eiaha e faaino” e “eiaha e faahapa.” Te na ô ra ïa taua mau huriraa ra e “eiaha e haamata i te faaino” e “eiaha e haamata i te faahapa.” Ua faaohipa râ te feia papai Bibilia i te mau faaueraa na roto i te taunei (no te hoê mea e tupu noa ra). Te tupu noa ra ïa te mau ohipa e faataahia ra, e tia râ ia faaea.

^ par. 18 I roto i te Timoteo 2, 4:2, te parau ra te Bibilia e e tia i te mau matahiapo i te tahi taime ia ‘faaite hua i te hapa, ia a‘o, ia faaitoito.’ O pa·ra·ka·leʹo te ta‘o Heleni i hurihia ei “faaitoito.” E au te hoê ta‘o Heleni tapiri, pa·raʹkle·tos, i te hoê paruru i te pae haavaraa. Noa ’tu ïa e e faaite hua te mau matahiapo i te hapa, e tia ia ratou ia riro ei tauturu no te feia e hinaaro ra i te tauturu pae varua.

No te ite atu â

TE PARE TIAIRAA—HAAPIIRAA

No te aha vetahi e tiavaruhia ’i?

E nafea te hoê taata rave hara tei tatarahapa e fana‘o ai i te a‘o î i te here a te Atua?

TE PARE TIAIRAA—HAAPIIRAA

Matahiapo Kerisetiano, hoa ohipa no to tatou oaoa

E nafea te mau matahiapo e tauturu ai i te mau taeae e tuahine ia oaoa i roto i ta te Atua taviniraa?