Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 14

Ua horoa Iehova i te “hoo no te taata e rave rahi”

Ua horoa Iehova i te “hoo no te taata e rave rahi”

1, 2. E nafea te Bibilia ia faataa i te huru o te huitaata, e eaha te ravea hoê roa no te reira?

“TE UURU tahi nei te mau mea atoa i hamanihia nei ma te mauiui.” (Roma 8:22) Mea na roto i taua mau parau ra to te aposetolo Paulo faataaraa i to tatou huru peapea. Ia au i te hi‘oraa a te taata, e au ra e aita e ravea e matara ’i te fifi o te mauiui, te hara e o te pohe. Aita râ to Iehova e taotiaraa mai to te taata. (Numera 23:19) Ua horoa mai te Atua parau-tia i te hoê ravea no to tatou ahoaho. O tei parauhia ïa te hoo.

2 Te hoo, o te ô rahi roa ’‘e ïa a Iehova na te huitaata. Maoti te reira e faaorahia ’i tatou i te hara e te pohe. (Ephesia 1:7) O te niu tera o te tiaturiraa o te ora mure ore, i te ra‘i anei aore ra i nia i te fenua paradaiso. (Luka 23:43; Ioane 3:16; Petero 1, 1:4) Eaha mau na te hoo? E nafea te reira ia haapii mai ia tatou no nia i te parau-tia rahi roa a Iehova?

Mea nafea te hinaaroraahia te hoê hoo

3. (a) No te aha i titauhia ’i te hoo? (b) No te aha i ore ai i nehenehe noa i te Atua e taui i te utua pohe i nia i te huaai o Adamu?

3 Ua titauhia te hoo no ta Adamu hara. Na roto i te faaroo-ore-raa i te Atua, ua tuu mai Adamu i te ma‘i, te peapea, te mauiui e te pohe ei tufaa no to ’na huaai. (Genese 2:17; Roma 8:20) Aita ta te Atua i nehenehe e pee i te huru aau e e taui noa i te utua pohe. Ahiri oia i na reira, ua tâu‘a ore ïa oia i ta ’na iho ture: “E utua te pohe no te hara.” (Roma 6:23) E ahiri Iehova i haafaufaa ore i ta ’na iho mau ture aveia no te parau-tia, ua rahi roa mai ïa te huehue e te parau-tia ore na te ao taatoa!

4, 5. (a) Mea nafea to Satani faainoraa i te Atua, e no te aha Iehova i titauhia ’i ia pahono i teie mau aaraa? (b) Eaha te pariraa a Satani no nia i te mau tavini haapao maitai a Iehova?

 4 Mai ta tatou i ite i roto i te pene 12, ua faahiti te orureraa hau i Edene i te mau tumu parau rahi atu â. Ua faaino maitai o Satani i te i‘oa o te Atua. Oia mau, ua pari oia e e haavare o Iehova e e faatere haavî o te faaere i ta ’na i poiete i to ratou tiamâraa. (Genese 3:1-5) Na roto i te faataupupuraa i te opuaraa a te Atua e faaî i te fenua i te taata tia, ua pari atoa Satani i te Atua i te manuïa ore. (Genese 1:28; Isaia 55:10, 11) Ahiri Iehova i vaiiho i teie mau aaraa ma te ore e pahono atu, eita paha ïa te rahiraa o te mau mea maramarama ta ’na i poiete e tiaturi faahou i ta ’na faatereraa.

5 Ua faaino atoa Satani i te mau tavini haapao maitai a Iehova, a pari ai e e tavini ratou ia ’Na ma te miimii noa e, ia haavîhia ratou, e taiva paatoa ratou i te Atua. (Ioba 1:9-11) Mea faufaa roa ’tu â teie mau tumu parau i te huru peapea o te taata. Ua mana‘o Iehova ma te tano e mea titauhia ia pahono atu oia i ta Satani mau pariraa haavare. E nafea râ te Atua ia faaafaro i teie mau tumu parau e ia faaora atoa i te huitaata?

Te hoo—te hoê aifaitoraa

6. Eaha te tahi mau parau i faaohipahia i roto i te Bibilia no te faataa i te ravea a te Atua no te faaora i te huitaata?

6 Ua riro te ravea a Iehova ei mea aroha hamani maitai roa ino e te tia roa ino—te hoê ravea aita ta te hoê taata i nehenehe e opua. Teie râ, mea nehenehe roa e te ohie. E parauhia te reira ma te huru rau e e hoo, e faiteraa, e taraehara, e tatararaa hara, e e faaoreraa hara. (Salamo 49:8; Daniela 9:24; Galatia 3:13; Kolosa 1:20; Hebera 2:17) Te parau râ o te faataa maitai roa ’‘e paha i te tumu parau, o ta Iesu iho ïa i faaohipa. Ua parau oia e: “Aita atoa hoi te Tamaiti a te taata nei i haere mai ia tavinihia to ’na, ei tavini râ, e ia horoa i to ’na ora ei hoo [Heleni, lyʹtron] no te taata e rave rahi.”—Mataio 20:28.

7, 8. (a) Eaha te auraa o te ta‘o “hoo” i roto i te mau Papai? (b) E nafea te hoê hoo e au atoa ’i i te aifaitoraa?

 7 Eaha te hoê hoo? No roto mai te ta‘o Heleni i faaohipahia i ǒ nei i te hoê ihoparau “e tuu” to ’na auraa. E faaohipahia teie parau no te faataa i te moni e aufauhia e ia tuuhia te mau tîtî tama‘i. E nehenehe ïa te hoê hoo e faataahia mai te hoê mea e aufauhia no te hoo faahou mai i te tahi mea. I roto i te mau Papai Hebera, no roto mai te ta‘o “hoo” (koʹpher) i te hoê ihoparau “e tapo‘i” to ’na auraa. Ei hi‘oraa, ua parau te Atua ia Noa e e tia ia “po‘i” (te hoê huru o tauâ ta‘o ra) te araka i te tapau. (Genese 6:14, MN) E tauturu te reira ia taa ia tatou e e hoo i te hara, e tapo‘i atoa ïa i te mau hara.—Salamo 65:3.

8 Ma te faahiahia, te na ô ra te hoê titionare (Theological Dictionary of the New Testament) e i roto i teie ta‘o (koʹpher), “te vai ra iho â te mana‘o o te aifaitoraa,” aore ra o te hoê tuearaa. Inaha, i tuea maitai na te tapo‘i o te afata o te faufaa i te afata iho. Oia atoa, no te hoo, aore ra tapo‘i, i te hara, e tia ia aufauhia te hoê mea o te au maite, o te tapo‘i maite, i te ino i faatupuhia e te hara. No reira te Ture ta te Atua i horoa na Iseraela i parau ai e: “I te pohe roa ra, ia pohe atoa ïa, e mata ra ei mata atoa ïa, e niho ra ei niho atoa ïa, e rima ra ei rima atoa ïa, e avae ra ei avae atoa ïa.”—Deuteronomi 19:21.

9. No te aha te tahi feia haapao maitai i pûpû ai i te tusia animara, e ua nafea Iehova i taua mau tusia ra?

9 Ua pûpû te mau taata haapao maitai mai te tau o Abela e haere mai ai, i te mau tusia animara na te Atua. I te na reiraraa, ua faaite ratou i to ratou ite-maite-raa i te hara e te hinaaro i te taraehara, e e faaroo to ratou i te faaoraraa i tǎpǔhia e te Atua na roto i ta ’na “huero.” (Genese 3:15, MN; 4:1-4; Levitiko 17:11; Hebera 11:4) Ua farii maitai Iehova i taua mau tusia ra e ua horoa i te hoê tiaraa maitai i taua feia  haamori ra. Ua riro râ te mau pûpûraa animara ei taipe noa ’‘e. Aita te mau animara i nehenehe mau e tapo‘i i te hara a te taata, tei raro a‘e hoi ratou i te taata. (Salamo 8:4-8) No reira te Bibilia e parau ai e: “Eita roa hoi e tia i te toto puaatoro e te puaaniho ia faaore i te hara.” (Hebera 10:1-4) E hoho‘a noa taua mau tusia ra no te tusia hoo mau e tae mai a muri a‘e.

“Ei hoo aifaito”

10. (a) E tia i te taata hoo ia aifaito ia vai, e no te aha? (b) No te aha i hinaarohia ’i hoê noa tusia taata?

10 ‘E hope te taata i te pohe ia Adamu,’ o ta te aposetolo Paulo ïa i parau. (Korinetia 1, 15:22) E titau ïa te hoo e ia pohe te hoê o te aifaito roa ia Adamu—te hoê taata tia roa. (Roma 5:14) Aita ’tu e huru mea ora ê atu o te nehenehe e faatia i te faito o te parau-tia. O te hoê noa taata tia roa, te hoê aita to raro a‘e i te utua pohe a Adamu, te nehenehe e pûpû i te hoê “hoo [aifaito]”—te hoê o te aifaito roa ia Adamu. (Timoteo 1, 2:6; MN) Eita ïa e titauhia ia pûpûhia ehia rahiraa mirioni taata ei tusia aifaito i te tamarii taitahi o Adamu. Ua faataa te aposetolo Paulo e: “No te taata hoê ra [o Adamu] i ô mai ai te ino [aore ra, te hara] i te ao nei, e no te ino hoi te pohe.” (Roma 5:12) E ‘mai te pohe hoi i noaa i te taata hoê ra, e na roto i te taata hoê atoa’ i faanaho ai te Atua i te taraehara no te taata. (Korinetia 1, 15:21) E nafea ïa?

“Ei hoo aifaito i te taata atoa”

11. (a) E nafea te taata hoo ia “faaoromai i taua pohe ra” no te taata atoa? (b) No te aha o Adamu e o Eva i ore ai i nehenehe e fana‘o i te hoo? (A hi‘o i te  nota i raro i te api.)

11 Ua rave Iehova e ia pûpû te hoê taata tia roa i to ’na ora ei tusia ma te aau tae. Ia au i te Roma 6:23, “e utua te pohe no te hara.” Na roto i te pûpûraa i to ’na ora ei tusia, e “faaoromai” te taata hoo “i taua pohe ra” no te taata atoa. Te auraa ra, e aufau oia i te utua no ta Adamu hara. (Hebera 2:9; Korinetia 2, 5:21; Petero 1, 2:24) E mau faahopearaa rarahi to te reira i te pae o te ture. Na roto i te faaoreraa i te utua hara  i nia i te huaai faaroo o Adamu, e faaore te hoo i te mana haamou o te hara i to ’na roa iho tumu. *Roma 5:16.

12. A faahoho‘a na e nafea te taata e rave rahi e fana‘o ai i te aufauraa i te hoê tarahu.

12 Ei hi‘oraa: A feruri na e te faaea ra outou i te hoê oire i reira te rahiraa o te taata e rave ai i te ohipa i roto i te hoê fare hamaniraa tauihaa rahi. Mea aufau-maitai-hia outou e to outou feia tapiri no ta outou ohipa e mea fana‘o to outou oraraa. Mai tera ïa e ia tae roa i te taime e opani ai te fare hamaniraa tauihaa. Eaha te tumu? Ua pi‘o te haerea o te taata faatere i te fare hamaniraa tauihaa, e ua topatari te tapihooraa ia ’na. No to outou ere-taue-raa i te ohipa, aita ’tura ta outou e ta to outou feia tapiri e nehenehe faahou e aufau i ta outou mau tarahu. E fifihia te mau hoa faaipoipo, te mau tamarii, e te feia horoa tarahu no te haerea pi‘o o taua taata hoê ra. Te vai ra anei te hoê ravea? Oia! E opua te hoê taata hamani maitai tao‘a rahi e arai mai. Mea au na ’na te ohipa a taua taiete ra. Mea aroha atoa na ’na te feia rave ohipa e rave rahi e to ratou mau utuafare. Ua faanaho atura oia e aufau i te tarahu a te taiete e e iriti faahou i te fare hamaniraa tauihaa. Topa ’tura te hau o te feia rave ohipa e rave rahi e o to ratou mau utuafare e o te feia horoa tarahu no te faaoreraahia taua tarahu hoê ra. Oia atoa, ehia rahiraa mirioni taata o te fana‘o i te faaoreraa i te tarahu a Adamu.

Na vai e horoa i te hoo?

13, 14. (a) Mea nafea to Iehova horoaraa i te hoo no te huitaata? (b) Ua aufauhia te hoo ia vai ra, e no te aha e titauhia ’i taua aufauraa ra?

13 O Iehova ana‘e tei nehenehe e horoa i “te Arenio . . . o tei hopoi ê atu i te hara o te ao.” (Ioane 1:29) Aita râ te Atua i  tono noa mai i te tahi melahi e faaora i te huitaata. Ua tono maoti oia i Tei nehenehe e horoa i te pahonoraa hopea i te pariraa a Satani i te mau tavini a Iehova. Oia, ua rave Iehova i te tusia rahi roa ’‘e i te tonoraa mai i ta ’na Tamaiti fanau tahi, “tei here-taa-ê-hia e ana.” (Maseli 8:30, MN) Ma te aau tae, ua “haapae atura” te Tamaiti a te Atua “i to ’na iho” huru i te ra‘i. (Philipi 2:7) Na roto i te hoê semeio, ua tuu Iehova i te ora e te ihotaata o ta ’na Tamaiti fanau tahi i te ra‘i i roto i te opu o te hoê paretenia ati Iuda o Maria te i‘oa. (Luka 1:27, 35) Ei taata, e mairihia to ’na i‘oa o Iesu. I te auraa pae ture râ, e nehenehe oia e parauhia te Adamu piti, e aifaito roa hoi oia ia Adamu. (Korinetia 1, 15:45, 47) I nehenehe atura ïa Iesu e pûpû ia ’na iho ei tusia hoo no te huitaata hara.

14 E aufauhia taua hoo ra ia vai ra? Te parau papu ra te Salamo 49:7 e e hopoihia te hoo “i te Atua” ra. E ere anei râ hoi na Iehova i horoa na mua i te hoo? Oia, eita râ te reira e faariro i te hoo ei tapihooraa auraa ore e te faatia ture noa—mai te raveraa mai i te moni i roto i te hoê pute ahu e te tuuraa ’tu i roto i te tahi atu. E tia ia taahia e e ere te hoo i te hoê tapihooraa materia, e ohipa pae ture râ. Na roto i te horoaraa i te hoo, noa ’tu e mea na roto i te haapaeraa rahi, ua haapapu Iehova i to ’na peeraa ma te aueue ore i ta ’na iho parau-tia tia roa.—Genese 22:7, 8, 11-13; Hebera 11:17; Iakobo 1:17.

15. No te aha i titauhia ’i ia mauiui e ia pohe Iesu?

15 I te tau uaaraa tiare 33 T.T., ua farii maite Iesu Mesia i te hoê tamataraa tei aratai atu i te aufauraa i te hoo. Ua vaiiho oia e ia tapeahia oia na nia i te mau pariraa haavare, ia haavahia oia ei taata hara, e ia patǐtǐhia i nia i te hoê pou haapoheraa. Mea titau-mau-hia anei ia mauiui Iesu mai teie i te rahi? Oia, no te mea te tia ra ia faaafarohia te tumu parau o te hapa ore o te mau tavini a te Atua. Ma te faahiahia, aita te Atua i vaiiho ia taparahi pohe o Heroda i te tamarii ra o  Iesu. (Mataio 2:13-18) I to Iesu râ paariraa mai, ua nehenehe ia ’na e patoi i te mau aroraa puai roa ino a Satani ma te taa maitai ia ’na te mau tumu parau. * Ma te “[haapao] maitai roa ra, e te rave ore i te ino, e te viivii ore, e te taa ê hoi i te feia rave hara” noa ’tu te hamani-ino-raa riaria, ua haapapu Iesu ma te hape ore e te faahiahia e e mau tavini iho â ta Iehova o te vai taiva ore noa i roto i te tamataraa. (Hebera 7:26; MN) No reira iho â ïa oia i parau puai ai ma te upootia i te taime hou oia a pohe ai e: “Ua oti!”—Ioane 19:30.

Faaotiraa i ta ’na ohipa taraehara

16, 17. (a) Mea nafea to Iesu faaotiraa i ta ’na ohipa taraehara? (b) No te aha i titauhia ’i ia tia ’tu Iesu “i mua i te aro o te Atua no tatou”?

16 Mea titauhia râ ia faaoti Iesu i ta ’na ohipa taraehara. I te toru o te mahana i muri a‘e i te poheraa o Iesu, ua faatia mai Iehova ia ’na mai te pohe mai. (Ohipa 3:15; 10:40) Na roto i teie ohipa iti rahi, aita noa Iehova i haamaitai i ta ’na Tamaiti no ta ’na taviniraa haapao maitai, ua horoa atoa ’tu râ i te ravea ia faaoti oia i ta ’na ohipa taraehara ei Tahu‘a Rahi a te Atua. (Roma 1:4; Korinetia 1, 15:3-8) Te faataa ra te aposetolo Paulo e: “O te Mesia râ i tae maira ei tahu‘a rahi . . . e ere hoi ma te toto puaaniho, e te toto kafa, ma to ’na iho râ toto, i te tomoraa hoê i roto i te vahi mo‘a roa ra, e ma te ora mure ore te noaaraa no tatou. Aita a‘enei hoi te Mesia i tomo i roto i na vahi mo‘a i hamanihia e te rima ra, i te hoho‘a no te vahi mo‘a mau ra, tei te ra‘i mau râ oia ia faaite oia ia ’na iho i mua i te aro o te Atua no tatou, i teie nei â.”—Hebera 9:11, 12, 24.

 17 Aita ta te Mesia i nehenehe e hopoi i to ’na toto mau i nia i te ra‘i. (Korinetia 1, 15:50) Area râ, ua hopoi oia i ta taua toto ra e faataipe ra: te faufaa e au i te ture o to ’na ora taata tia roa i pûpûhia ei tusia. Tia ’tura oia i mua i te aro o te Atua ma te faaite maite atu i te faufaa o taua ora ra ei hoo no te huitaata hara. Ua farii anei Iehova i taua tusia ra? Oia, e ua ite-maitai-hia te reira i te Penetekose 33 T.T., i te niniiraahia te varua mo‘a i nia i na pǐpǐ 120 i Ierusalema. (Ohipa 2:1-4) Noa ’tu te re‘are‘a rahi o taua tupuraa ra, te haamata noa ra te hoo i te horoa mai i te mau haamaitairaa faahiahia.

Mau maitai o te hoo

18, 19. (a) Eaha na pǔpǔ taata e piti o te faufaahia i te faiteraa maoti te toto o te Mesia? (b) No to te “feia rahi roa,” eaha te tahi mau maitai o te hoo no teie nei e no a muri a‘e?

18 I roto i ta ’na rata i to Kolosa, te faataa ra Paulo e mea tia i te Atua ia faite na roto i te Mesia i te mau mea ê atoa e Oia iho na roto i te faahauraa maoti te toto ta Iesu i manii i nia i te pou haamauiuiraa. Te faataa atoa ra Paulo e e au teie faiteraa i na pǔpǔ taata taa ê e piti, oia hoi, “to te ra‘i” e “to te fenua nei.” (Kolosa 1:19, 20; Ephesia 1:10) Taua pǔpǔ matamua ra, o na 144 000 Kerisetiano ïa o te tiaturi e tavini ei tahu‘a i te ra‘i e e faatere mai i te fenua nei ei arii e te Mesia ra o Iesu. (Apokalupo 5:9, 10; 7:4; 14:1-3) Na roto ia ratou, e faaohipa-mǎrû-hia te mau maitai o te hoo i nia i te huitaata faaroo i te hoê roaraa hoê tausani matahiti.—Korinetia 1, 15:24-26; Apokalupo 20:6; 21:3, 4.

19 “To te fenua nei,” o te feia ïa e fana‘o atu i te oraraa tia roa i roto i te Paradaiso i nia i te fenua. Te faataa ra te Apokalupo 7:9-17 ia ratou mai te “feia rahi roa” e ora ’tu i te “ati rahi” e fatata maira. Aita râ ratou i titauhia ia tiai roa i te reira tau no te fana‘o i te mau maitai o te hoo. Ua “horoi” a‘ena ratou “i to ratou ahu, e ua teatea, i te toto o te Arenio ra.” No te mea ua faaohipa ratou i te faaroo i te hoo, te fana‘o a‘ena  ra ratou i teie nei i te mau maitai pae varua o taua faanahoraa î i te here ra. Ua faataata-parau-tia-hia ratou ei mau hoa o te Atua! (Iakobo 2:23) Ei faahopearaa o te tusia a Iesu, e nehenehe ta ratou “e faafatata noa ’tu . . . i te terono o te aroha mau ra.” (Hebera 4:14-16) Ia hape ratou, e faaore-mau-hia ta ratou hara. (Ephesia 1:7) Noa ’tu to ratou huru tia ore, te fana‘o ra ratou i te mana‘o haava mâ. (Hebera 9:9; 10:22; Petero 1, 3:21) E ere ïa te faiteraa e te Atua i te hoê tupuraa e tiaturi-noa-hia râ, o te hoê râ mea mau e vai a‘ena ra! (Korinetia 2, 5:19, 20) I roto i te Mireniuma, ‘e faaora-mǎrû-hia ratou i te tapea ra o te pohe’ e i te pae hopea, e noaa ia ratou “te tiamâ maitai o te tamarii a te Atua ra.”—Roma 8:21.

20. E nafea te feruriruriraa i te hoo e ohipa ’i i nia ia tatou?

20 ‘Ia haamaitaihia te Atua na roto ia Iesu Mesia’ no te hoo! (Roma 7:25) Mea ohie te reira ia faataahia te mana‘o tumu, mea navai râ i te hohonu e ia î tatou i te umere faatura. (Roma 11:33) E ia feruriruri tatou ma te mauruuru i te reira, e putapû to tatou aau i te hoo, e e haafatata ’tu â tatou i te Atua parau-tia. Mai te papai salamo, e tumu puai ta tatou e arue ai ia Iehova mai tei ‘hinaaro i te parau-tia e te au.’—Salamo 33:5.

^ par. 11  Aita ta Adamu e o Eva i nehenehe e fana‘o i te hoo. Ua faahiti te Ture a Mose i teie faaueraa tumu no nia i te hoê taparahi taata hinaaro tae: “Eiaha hoi outou e rave i te taraehara ia ora te taparahi taata ra, tei au ia ’na te pohe.” (Numera 35:31) Papu maitai, i au na ia Adamu e ia Eva te pohe no te mea ua faaroo ore raua i te Atua ma te hinaaro tae e te ite maite. Ua faarue ïa raua i to raua tiaturiraa o te ora mure ore.

^ par. 15 No te faafaito i te hara a Adamu, mea titauhia ia pohe Iesu, eiaha ei tamarii tia roa, ei taata tia roa râ. A haamana‘o na, mea opuahia te hara a Adamu, ua ravehia ma te ite maite i te huru ino o taua ohipa ra e to ’na mau faahopearaa. No reira, no te riro ei “Adamu hopea” e te tapo‘i i taua hara ra, mea titauhia ia rave Iesu i te maitiraa paari e tapea i to ’na hapa ore i mua ia Iehova ma te ite maite. (Korinetia 1, 15:45, 47) Ua riro ïa te oraraa haapao maitai taatoa o Iesu—tae noa ’tu to ’na poheraa ei tusia—ei “ohipa faatiaraa hoê.”—Roma 5:18, 19MN.