Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 13

“Te ture a Iehova aita e hapa”

“Te ture a Iehova aita e hapa”

1, 2. No te aha te taata e rave rahi e faatura ore ai i te ture, teie râ, e nehenehe tatou e faatupu i teihea huru aau no te mau ture a te Atua?

‘TE TURE, o te hoê ïa apoo tohe ore, o te horomii i te mau mea atoa.’ To roto teie parau i te hoê buka i neneihia i te matahiti 1712 ra. Te faataa ra te taata papai i te hoê faanahoraa ture i reira te mau haavaraa e taere ai i te tupu a vai ai i te tahi taime ehia matahiti i te maoro i roto i te mau tiripuna, e a haaveve roa ’i i te feia e imi ra i te tia. I te mau fenua e rave rahi, no te huru fifi roa o te mau faanahoraa ture e haavaraa, no te rahi o te parau-tia ore, te faatia-pae-tahi-raa, e te mau tuea-ore-raa, i parare roa ’i te vahavaharaa i te ture.

2 I te tahi roa ’‘e pae, a rave na i teie mau parau i papaihia fatata a 2 700 matahiti a‘enei: “Te rahi roa nei to ’u hinaaro i ta oe ra ture!” (Salamo 119:97) No te aha te hinaaro o te papai salamo e puai ai mai tera? No te mea e ere te ture ta ’na e arue ra na te tahi hau faatere a teie nei ao, na te Atua râ o Iehova. A haapii ai outou i te mau ture a Iehova, e riro noa ’tu paha outou mai te papai salamo ra. Maoti taua haapiiraa ra, e noaa ia outou te haroaroaraa i te tumu maramarama roa ’‘e o te ohipa haavaraa o te ao taatoa.

Te Iriti ture Rahi roa ’‘e

3, 4. Mea nafea to Iehova riroraa ei Iriti ture?

3 “Hoê hoi iriti ture e haava,” o ta te Bibilia ïa e faaite maira. (Iakobo 4:12, MN) Oia mau, o Iehova te Iriti ture mau hoê roa. Tae noa ’tu te tereraa o te mau mea i te ra‘i, mea arataihia ïa e “te ture o te ra‘i.” (Ioba 38:33) Mea aratai-atoa-hia te mau muriadi melahi mo‘a a Iehova e te ture a te Atua, ua faanahohia hoi ratou ia au i te mau tiaraa taa maitai e e tavini ratou i raro a‘e i te faaueraa a Iehova ei tavini na ’na.—Salamo 104:4; Hebera 1:7, 14.

4 Ua horoa atoa Iehova i te mau ture na te taata. E mana‘o  haava to tatou taitahi, te hoê hoho‘a o to Iehova haroaroaraa i te parau-tia. I te mea e ua riro te reira mai te hoê ture i roto mai, e nehenehe te mana‘o haava e tauturu mai ia faataa ê i te maitai e te ino. (Roma 2:14) Ua haamaitaihia to tatou na metua matamua i te hoê mana‘o haava tia roa, no reira raua i hinaaro ai tau ture noa. (Genese 2:15-17) Area te taata tia ore ra, e hinaaro ïa i te mau ture hau no te aratai ia ’na ia rave oia i te hinaaro o te Atua. Ua noaa i te mau patereareha mai ia Noa, Aberahama, e Iakoba te tahi mau ture no ǒ i te Atua ra o Iehova e ua tuu atu i to ratou ra utuafare. (Genese 6:22; 9:3-6; 18:19; 26:4, 5) Ua riro Iehova ei Iriti ture mai tei ore i itehia a‘enei i to ’na horoaraa i te hoê pǎpǎ ture na te nunaa Iseraela na roto atu ia Mose. Maoti teie pǎpǎ ture e taa maitai ai ia tatou to Iehova haroaroaraa i te parau-tia.

Te Ture a Mose—te hoê haapotoraa

5. Ua riro anei te Ture a Mose ei pǎpǎ ture teimaha e te fifi roa, e no te aha outou e na reira ’i i te pahono?

5 E au ra e mea rahi o te mana‘o ra e e pǎpǎ ture teimaha e te fifi roa te Ture a Mose. E atea roa teie mana‘o i te parau mau. E 600 e e tiahapa ture i roto i te pǎpǎ taatoa. E au ra paha e mea rahi, a feruri noa na râ: I te hopea o te senekele 20, ua î na api e hau atu i te 150 000 o te mau buka ture i te mau ture a te mau Hau Amui atoa. I te mau piti matahiti atoa, e amuihia mai fatata e 600 ture hau! No nia noa i te rahiraa, e hemo te Ture a Mose i te haapueraa o te mau ture taata. Teie râ, ua aratai te Ture a te Atua i te mau Iseraela i roto i te mau tuhaa o te oraraa aita nei te mau ture no teie tau i feruri noa ’‘e. E hi‘o ana‘e i te hoê haapotoraa.

6, 7. (a) Na te aha e faataa ê i te Ture a Mose i te tahi atu pǎpǎ ture, e eaha te ture rahi roa ’‘e o taua Ture ra? (b) Ia nafea te mau Iseraela ia faaite e te farii ra ratou i to Iehova mana arii?

6 Ua faateitei te Ture i te mana arii o Iehova. No reira, eita e nehenehe e faaau i te Ture a Mose i te tahi atu pǎpǎ ture. Teie te ture rahi roa ’‘e: “E faaroo mai, e Iseraela e: O Iehova to tatou Atua, hoê Iehova: e teie nei, e hinaaro atu oe i to Atua ia  Iehova ma to aau atoa, e ma to [nephe] atoa, e ma to puai atoa.” Ia nafea te nunaa o te Atua ia faaite i te hinaaro ia ’na? Ia tavini ïa ratou ia ’na, ia auraro i to ’na mana arii.—Deuteronomi 6:4, 5; MN; 11:13.

7 Ua faaite te Iseraela taitahi e ua farii oia i to Iehova mana arii na roto i te auraroraa i te feia i tuuhia i nia ’‘e ia ’na. Ua riro ana‘e te mau metua, te mau raatira, te mau haava, te mau tahu‘a, e i te pae hopea, te arii ei mau tia no te mana o te Atua. No Iehova, te orureraa i to ’na mau tia, te orureraa ïa ia ’na. I te tahi a‘e pae, e faaû tei haamanahia i to Iehova riri mai te peu e e haa ratou i nia i to ’na nunaa ma te tia ore aore ra te teoteo. (Exodo 20:12; 22:28; Deuteronomi 1:16, 17; 17:8-20; 19:16, 17) E hopoia ïa na na pae e piti te patururaa i te mana arii o te Atua.

8. Mea nafea to te Ture patururaa i te mau ture aveia a Iehova no te mo‘araa?

8 Ua paturu te Ture i te mau ture aveia a Iehova no te mo‘araa. E itehia te mau ta‘o ra “moa” e “mo‘araa” e 280 e e tiahapa taime i roto i te Ture a Mose. Ua tauturu te Ture i te nunaa o te Atua ia faataa ê i te mea viivii ore e te mea viivii, a faahiti ai fatata e 70 mea taa ê o te nehenehe e haaviivii i te hoê Iseraela i te pae oroa. No nia taua mau ture ra i te ihomâ pae tino, te haapaoraa i te maa, e tae noa ’tu i te faarueraa ino. Mea maitai roa taua mau ture ra no te ea. * E fa teitei atu â râ to te reira—te tapearaa i te nunaa i roto i te farii maitai a Iehova, ia taa ê ratou i te mau peu hara a te mau nunaa e haaati ra ia ratou e tei topa roa i raro. E rave ana‘e i te hoê hi‘oraa.

9, 10. I roto i te faufaa o te Ture, eaha te mau ture no nia i te taatiraa pae tino e te fanauraa tama, e eaha te mau maitai ta taua mau ture ra i horoa mai?

9 Te na ô ra te tahi mau ture o te faufaa o te Ture e e vai viivii noa te hoê i muri a‘e i te taatiraa pae tino e te fanauraa tama —tae noa ’tu i roto i te feia faaipoipo—no te hoê tau. (Levitiko 12:2-4; 15:16-18) Aita taua mau ture ra e faaino ra i teie mau ô viivii ore no ǒ mai i te Atua ra. (Genese 1:28; 2:18-25) Ua paturu râ taua mau ture ra i te mo‘araa o Iehova, a paruru ai i to ’na feia haamori i te viivii. E tapao ana‘e e i anoi na te mau nunaa piri mai ia Iseraela i te haamoriraa i te mau peu taatiraa e te mau oroa haamaitairaa i te fanauraa. I roto i te haapaoraa a to Kanaana, te vai ra te faaturiraa a te tane e a te vahine. Ua faatupu e ua haaparare te reira i te haerea hairiiri roa ’‘e. Area râ, ua faataa ê roa te Ture i te haamoriraa a Iehova i te mau ohipa taatiraa pae tino. * Te vai atoa ra te tahi atu â mau maitai.

10 Ua riro taua mau ture ra ei haapiiraa i te hoê parau mau faufaa roa. * Inaha, mea nafea hoi te viivii o te hara a Adamu i te tuuraahia mai mai tera ui i tera atu? E ere anei mea na roto i te taatiraa e te fanauraa tama? (Roma 5:12) Oia, ua haamana‘o te Ture a te Atua i to ’na nunaa i te ohipa mau e vai noa maira oia te hara. Oia mau, ua fanauhia tatou paatoa i roto i te hara. (Salamo 51:5) Te hinaaro ra tatou i te faaoreraa hara e te taraehara no te haafatata ’tu i to tatou Atua mo‘a.

11, 12. (a) Ua paruru te Ture i teihea niu faufaa roa i te pae haavaraa? (b) Eaha te tahi mau faaararaa no nia i te huru pi‘o o te haavaraa e vai ra i roto i te Ture?

11 Ua paturu te Ture i te parau-tia tia roa a Iehova. Ua paruru te Ture a Mose i te niu o te aifaitoraa i te pae haavaraa. Te na ô ra hoi te Ture e: “I te pohe roa ra, ia pohe atoa ïa, e mata ra ei mata atoa ïa, e niho ra ei niho atoa ïa, e rima ra ei rima atoa ïa, e avae ra ei avae atoa ïa.” (Deuteronomi 19:21) Ia haavahia te mau hara, ia au ïa te utua i te hara. E itehia teie tuhaa o te  parau-tia a te Atua i roto i te Ture taatoa e tae roa mai i teie tau, mea faufaa roa te reira ia taa ia tatou te tusia taraehara o te Mesia ra o Iesu, mai ta te pene 14 e faaite mai.—Timoteo 1, 2:5, 6.

12 Te vai atoa ra te mau faaararaa no nia i te huru pi‘o o te haavaraa, i roto i te Ture. Ei hi‘oraa, i titauhia na e piti a‘e ite no te haapapu i te hoê pariraa. Mea etaeta roa te utua no te ite haavare. (Deuteronomi 19:15, 18, 19) Mea opani-etaeta-atoa-hia te fariiraa e te pûpûraa i te tao‘a peta. (Exodo 23:8; Deuteronomi 27:25) I roto atoa i ta ratou ohipa tapihooraa, i tia na i te nunaa o te Atua ia paturu i te mau ture aveia teitei a Iehova no te parau-tia. (Levitiko 19:35, 36; Deuteronomi 23:19, 20) E haamaitairaa rahi mau taua pǎpǎ ture maitai roa ra e te tia na Iseraela!

Te tahi mau ture o te haamahitihiti i te aroha hamani maitai e te faatia pae tahi ore i te pae haavaraa

13, 14. Mea nafea to te Ture faaitoitoraa e haa ma te pae tahi ore e te tia i nia i te hoê eiâ e te taata ta ’na i eiâ?

13 Ua riro anei te Ture a Mose ei haapueraa ture rii etaeta e te aroha ore? Aita roa ’tu! Ua faauruahia te arii Davida e papai e: “Te ture a Iehova aita e hapa.” (Salamo 19:7) Mai ta ’na i ite maitai, ua paruru te Ture i te aroha hamani maitai e te faatia pae tahi ore. Mea nafea ïa te reira?

14 I te tahi mau fenua i teie tau, e au ra e te faaite hau atu ra te ture i te aroha e te farii maitai i te feia ohipa ino i te haapeapea-mau-raa no te feia i ati. Ei hi‘oraa, e mau paha te mau eiâ i te fare tapearaa no te tahi maa taime. I taua râ taime ra, te ere noa râ ïa te feia i eiâhia i ta ratou mau tauihaa, e te titauhia ra râ ratou ia aufau i te mau tute no te nohoraa e te maa a taua feia ohipa ino ra. I Iseraela i tahito ra, aita e fare tapearaa mai ta tatou i matau i teie tau. Te vai ra te mau taotiaraa etaeta i te pae o te teiaharaa o te mau utua. (Deuteronomi 25:1-3) I titauhia na te hoê eiâ ia faaho‘i i ta te taata i eiâhia. Hau atu â, i titauhia na ia aufau faahou â te eiâ. Ehia? Tei te huru. E au ra e tei te mau haava te faitoraa i te tahi mau tupuraa, mai te  tatarahapa o te taata hara. Na te reira e faataa mai no te aha te faaho‘iraa i titauhia i te hoê eiâ ia au i te Levitiko 6:1-7 i iti roa ’‘e ai i tei faataahia i roto i te Exodo 22:7.

15. Mea nafea to te Ture haapapuraa i te aroha hamani maitai e te parau-tia atoa i roto i te hi‘oraa o te hoê taata i hape noa i te haapoheraa i te tahi atu?

15 Ua farii te Ture ma te aroha hamani maitai e e ere te mau hara atoa i te mea opuahia. Ei hi‘oraa, ia hape noa ’tu te hoê taata i te haapoheraa i te tahi atu, aita i titauhia ia pohe atoa oia mai te peu e e rave oia i te ohipa tia na roto i te hororaa i te hoê o te mau oire haapuraa e vai ra na Iseraela atoa. Ia oti i te mau haava i faatiahia i te hi‘opoa i ta ’na i rave, e tia ia ’na ia faaea noa i roto i te oire haapuraa e ia pohe atu te tahu‘a rahi. I reira oia e nehenehe ai e faaea i te vahi ta ’na i hinaaro. Ua fana‘o ïa oia i te aroha hamani maitai o te Atua. I taua atoa taime ra, te haamahitihiti ra teie ture i te faufaa rahi o te ora o te taata.—Numera 15:30, 31; 35:12-25.

16. Mea nafea to te Ture parururaa i te mau tiaraa o te taata taitahi?

16 Ua paruru te Ture i te mau tiaraa o te taata taitahi. A hi‘o na mea nafea to te reira parururaa i te mau aitarahu. I opani na te Ture ia tomo i roto i te fare o te hoê aitarahu no te haru i te hoê tauihaa ei piri no te hoê tarahu. I titauhia na râ i te taata horoa tarahu ia faaea i rapaeau e ia vaiiho e na te aitarahu e hopoi mai i te piri ia ’na ra. Aita ïa te fare o te taata i tomohia. Mai te peu e ua rave te taata horoa tarahu i te pereue o te aitarahu ei piri, i tia na ia ’na ia faaho‘i atu hou a po ai, inaha hoi, e hinaaro paha te aitarahu i te reira no te haamahanahana ia ’na ia po.—Deuteronomi 24:10-14.

17, 18. I te pae o te tama‘i, mea nafea te mau Iseraela i taa ê ai i te tahi atu mau nunaa, e no te aha?

17 Mea faature atoa te tama‘i i te tau o te Ture. Ua opuahia ia faatupu te nunaa o te Atua i te tama‘i eiaha no te haamâha noa i te nounou mana aore ra te nounou fenua, no te haa râ ei mau tia no te Atua i roto i te mau “tama‘i na Iehova.” (Numera 21:14) I roto i te mau tupuraa e rave rahi, i tia na ia Iseraela ia faaau na mua e ia tuu to te hoê oire ia ratou iho. Ia patoi  te oire i te titauraa, i reira Iseraela i nehenehe ai e haaati atu—ia au râ i ta te Atua faanahoraa. Eiaha mai te mau faehau e rave rahi i te roaraa o te tuatapaparaa, aita te mau tane o te nuu Iseraela i faatiahia ia mafera i te mau vahine aore ra ia rave i te taparahiraa mai tera noa. I titauhia na ia faatura atoa ratou i te heipuni, eiaha ratou ia tâpû i te mau tumu maa hotu a te enemi. * Aita ta te tahi atu mau nuu e taotiaraa mai tera.—Deuteronomi 20:10-15, 19, 20; 21:10-13.

18 E riaria anei outou ia faaroo e i te tahi mau fenua, te faaineinehia ra te mau tamarii ia riro ei faehau? I Iseraela i tahito ra, aita e tane i raro mai i te 20 matahiti e ravehia i roto i te nuu. (Numera 1:2, 3) E haapae-atoa-hia te hoê tane paari mai te peu e e taiâ rahi to ’na. E haapaehia te hoê tane no faaipoipo noa ’tura no te hoê matahiti taatoa e ia nehenehe oia ia ite atu ia fanau-noa-hia mai te hoê tamarii ai‘a hou a haere atu ai i roto i taua taviniraa atâta ra. Te faataa ra te Ture e e na reira ïa te tane apî e nehenehe ai e ‘faaoaoa’ i ta ’na vahine apî.—Deuteronomi 20:5, 6, 8; 24:5.

19. Eaha te mau faanahoraa a te Ture no te paruru i te mau vahine, te mau tamarii, te mau utuafare, te mau vahine ivi, e te mau otare?

19 Ua paruru atoa te Ture i te mau vahine, te mau tamarii, e te mau utuafare, a haapao atu ai ia ratou. Ua faaue te reira i te mau metua e haapao maitai tamau noa i te mau tamarii e e haapii atu i te mau mea pae varua. (Deuteronomi 6:6, 7) Ua opani te reira i te mau huru taotoraa atoa i te fetii piri, a faautuahia i te pohe. (Levitiko, pene 18) Ua opani atoa te reira i te faaturi o te pinepine i te vavahi i te mau utuafare e te faaore i to ratou panoonoo ore e to ratou tura. Ua haapao atu te Ture i te mau vahine ivi e te mau otare na roto i te opani-etaeta-roa-raa i te hamani ino ia ratou.—Exodo 20:14; 22:22-24.

20, 21. (a) No te aha te Ture a Mose i faatia ’i i te mau Iseraela e faaipoipo i te vahine e rave rahi? (b) No nia i te faataaraa, no te aha te Ture i taa ê ai i te ture aveia ta Iesu i faaho‘i mai i muri a‘e?

 20 Ia au râ i te reira, e uiui paha te vetahi e, ‘No te aha te Ture i faatia ’i e faaipoipo i te vahine e rave rahi?’ (Deuteronomi 21:15-17) E tia ia tatou ia hi‘opoa i taua mau ture ra ia au i te tupuraa i taua tau ra. Eita iho â ïa e taa i te feia e haava i te Ture a Mose na nia i te hi‘oraa e te ta‘ere no teie tau. (Maseli 18:13) Ua faariro te ture aveia a Iehova i haamauhia i Edene i te faaipoiporaa ei taatiraa vai maoro o te hoê tane e te hoê vahine. (Genese 2:18, 20-24) I te tau râ i horoa ’i Iehova i te Ture na Iseraela, e rave rahi atura ïa senekele to te mau peu mai te faaipoiporaa i te vahine e rave rahi i te mau-roa-raa. Ua ite maitai Iehova e e pinepine to ’na “feia etaeta” i te faaroo ore i te mau faaueraa rahi roa ’‘e, mai tei opani i te haamoriraa idolo. (Exodo 32:9) Ma te paari, aita ïa oia i maiti i taua tau ra no te faatitiaifaro i ta ratou mau peu atoa i te pae faaipoiporaa. A haamana‘o râ e e ere na Iehova i haamau i te faaipoiporaa i te vahine e rave rahi. Ua faaohipa râ oia i te Ture a Mose no te faature i te faaipoiporaa i te vahine e rave rahi i roto i to ’na nunaa e te ape eiaha taua peu ra ia rave-hua-hia.

21 Oia atoa, ua faatia te Ture a Mose i te hoê taata ia faataa i ta ’na vahine no te mau tumu iino huru rahi. (Deuteronomi 24:1-4) Ua parau Iesu e ua tuu noa mai te Atua i te nunaa ati Iuda “no te mǎrû ore o to [ratou] aau.” No te hoê tau poto râ taua tuuraa ra. No ta ’na mau pǐpǐ, ua faaho‘i mai Iesu i te ture aveia tumu a Iehova no te faaipoiporaa.—Mataio 19:8.

Ua faaitoito te Ture ia aroha

22. Mea nafea to te Ture a Mose faaitoitoraa ia aroha, e ia vai?

22 E nehenehe anei ta outou e feruri i te hoê faanahoraa ture no teie tau o te faaitoito ia aroha? Ua faaitoito te Ture a Mose ia aroha hau atu i te tahi atu mau mea. Inaha hoi, i roto noa i te buka Deuteronomi, e itehia te ta‘o i taaihia i te “aroha” na roto i to ’na mau huru rau e hau atu i te 20 taime. “E aroha . . . oe i te taata tupu mai to aroha ia oe iho na,” o te piti tera o te  faaueraa rahi roa ’‘e i roto i te Ture atoa. (Levitiko 19:18; Mataio 22:37-40) I tia na i te nunaa o te Atua ia faaite i taua aroha ra eiaha noa te tahi i nia i te tahi, i nia atoa râ i te feia ěê i roto ia ratou, ma te haamana‘o e i riro atoa na ratou ei purutia. I tia na ia ratou ia faaite i te aroha i nia i tei veve e tei ati, a tauturu atu ai i te pae materia e a ara ’i eiaha ia faaohipa ’tu i to ratou hepohepo. Ua faaue-atoa-hia ratou e haa i nia i te mau animara tari tauihaa ma te maitai e te haapao atu.—Exodo 23:6; Levitiko 19:14, 33, 34; Deuteronomi 22:4, 10; 24:17, 18.

23. Ua turaihia tei papai i te Salamo 119 ia aha, e eaha paha ta tatou e faaoti maite e rave?

23 Teihea ’tu â nunaa tei haamaitaihia i te hoê pǎpǎ ture mai teie? E ere i te mea maere ia papai te fatu salamo e: “Te rahi roa nei to ’u hinaaro i ta oe ra ture!” E ere râ to ’na hinaaro i te hoê noa huru aau. I turai na te reira ia ’na ia ohipa, ua tutava hoi oia i te auraro i taua ture ra e te ora ia au i te reira. Ua na ô â oia e: “O to ’u ïa mana‘oraa [ta oe ture] i te mau mahana atoa nei.” (Salamo 119:11, 97) Oia, ua rave tamau oia i te taime no te haapii i te mau ture a Iehova. Aita ïa e feaaraa e a na reira ’i oia, ua puai atu to ’na hinaaro i te reira. I tauâ taime ra, ua rahi atoa mai to ’na here i te Iriti ture, te Atua ra o Iehova. A tamau ai outou i te haapii i te ture a te Atua, ia fatata ’tu â outou atoa ia Iehova, te Iriti ture Rahi e te Atua parau-tia.

^ par. 8 Ei hi‘oraa, ehia senekele na mua ’‘e, te titau a‘ena ra te tahi mau ture ia haapo‘i i te ino a te taata, ia faaatea ê i te taata ma‘i, e ia horoi te taata atoa i tapea i te tino pohe, ia ’na iho.—Levitiko 13:4-8; Numera 19:11-13, 17-19; Deuteronomi 23:13, 14.

^ par. 9 I roto i te mau hiero a to Kanaana, te vai ra te tahi mau piha i faataahia no te taatiraa pae tino, area te Ture a Mose ra, te parau ra ïa e aita i tia i te feia viivii ia tomo i roto i te hiero. No reira, i te mea e e viivii te hoê tei rave i te taatiraa pae tino no te hoê tau, aita e tiaraa to te tahi noa ’‘e taata e rave i te taatiraa ei tuhaa o te haamoriraa i te fare o Iehova.

^ par. 10 O te haapiiraa te fa matamua a te Ture. Oia mau, te tapao ra te hoê buka (Encyclopaedia Judaica) e te auraa o te ta‘o Hebera i hurihia ei “ture,” toh·rahʹ, e “haapiiraa” ïa.

^ par. 17 Ua ui te Ture ma te tano e: “E taata anei te tumu maa hotu o te fenua e haaati ai oe ia ’na?” (Deuteronomi 20:19, MN) Ua faahiti o Philon, te hoê aivanaa ati Iuda no te senekele matamua, i teie ture, a faataa ’i e te mana‘o ra te Atua e mea “tia ore e ia faatupuhia te riri tei faaitehia i nia i te taata, i nia i te mau mea aita roa ’tu e ino.”

No te ite atu â

E paturu te haapaoraa maitai i te here taeae

Teihea haapaoraa e haapii ra i to ’na mau melo ia hoê noa ’tu te mau fifi i te pae poritita, nunaa, e totiare e faaamahamaha ra i te taata?