Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 11

‘E mea tia to ’na ra mau haerea atoa’

‘E mea tia to ’na ra mau haerea atoa’

1, 2. (a) Eaha te mau ohipa tia ore roa ta Iosepha i farerei? (b) Mea nafea to Iehova faatitiaifaroraa i te mau ohipa tia ore?

E OHIPA tia ore roa tera. Aita te taurearea purotu ra i rave i te hara, ua tuuhia râ oia i roto i te tapearaa, ma te pari-haavare-hia i te tamataraa i te mafera i te hoê vahine. E ere râ a tahi ra oia a farerei ai i te ohipa tia ore. Tau matahiti na mua ’‘e, i te 17raa o to ’na matahiti, ua haavarehia teie taurearea, o Iosepha, e to ’na iho mau taeae tei fatata i te taparahi pohe ia ’na. Hoohia ’tu ai oia ei tîtî i te hoê fenua ê. I reira, ua patoi oia i te mau titauraa a te vahine a to ’na fatu. Opua ’tura te vahine i apehia i te pariraa haavare ra, e mea na reira to ’na taeraa i roto i te tapearaa. Ma te peapea, e au ra e aita roa ’tu e taata o te arai no Iosepha.

Ua haamauiuihia Iosepha ma te tia ore i roto i te “tapearaa”

2 Teie râ, te hi‘o maira te Atua o te ‘hinaaro i te haerea tia e te parau-tia.’ (Salamo 33:5) Ua rave Iehova e faatitiaifaro i te mau ohipa tia ore, a haa ’i i nia i te mau tupuraa e ia tuu-roa-hia ’tu Iosepha. Hau atu i te reira, i te pae hopea, ua faatoroahia Iosepha—te taata tei hurihia i roto i te hoê “tapearaa”—ma te mau hopoia rarahi e te tura taa ê. (Genese 40:15; 41:41-43; Salamo 105:17, 18) Ei faahopearaa, ua faatiahia o Iosepha, e ua faaohipa oia i to ’na tiaraa teitei no te faahaere i te opuaraa a te Atua i mua.—Genese 45:5-8.

3. No te aha e ere ai i te mea maere ia hinaaro tatou paatoa ia haahia i nia ia tatou ma te tia?

3 E putapû to tatou aau i taua huru aamu ra, eita anei? O vai i roto ia tatou tei ore i ite i te ohipa tia ore aore ra tei ore i faaû atu i te reira? Oia mau, e hinaaro tatou paatoa ia haahia i nia ia tatou ma te tia, te pae tahi ore. E ere i te mea maere, no te mea ua horoa mai Iehova i te mau huru maitatai o  te au i to ’na iho, e o te parau-tia hoi te hoê o to ’na mau ateriputi rarahi. (Genese 1:27) Ia ite maite tatou ia Iehova, e tia ia taa ia tatou to ’na mana‘o i te parau-tia. E nehenehe ïa tatou e haafaufaa i ta ’na mau ravea taa ê e e turaihia ia haafatata ’tu â ia ’na.

Eaha te parau-tia?

4. I te hi‘oraa a te taata, e pinepine e nafea te parau-tia e taahia ’i?

4 I te hi‘oraa a te taata, e pinepine te parau-tia i te taahia mai te faaohiparaa ma te pae tahi ore noa i te mau ture rii o te pǎpǎ ture. Te na ô ra te hoê buka (Right and reason—Ethics in Theory and Practice) e “ua taaihia te parau-tia i te ture, te hopoia, te mau tiaraa, e i te mau titauraa, e e faautua te reira ma te pae tahi ore aore ra ma te au.” E hau atu â râ te parau-tia a Iehova i te faaohiparaa matau noa i te mau faatureraa no te mea mea titauhia aore ra e hopoia tera.

5, 6. (a) Eaha te auraa o te mau ta‘o o te reo tumu i hurihia ei “parau-tia”? (b) Eaha te auraa e e parau-tia ta te Atua?

5 E taa maitai a‘e te aano e te hohonu o te parau-tia a Iehova ia hi‘opoahia te mau ta‘o o te reo tumu i faaohipahia i roto i te Bibilia. I roto i te mau Papai Hebera, e toru ta‘o faufaa tei faaohipahia. E nehenehe atoa te ta‘o e huri-pinepine-roa ’‘e-hia ei “parau-tia” e hurihia ei “te mea tia.” (Genese 18:25, MN) E pinepine te tahi atu na ta‘o i te hurihia ei “haerea tia.” I roto i te mau Papai Heleni Kerisetiano, te faataahia ra te ta‘o i hurihia ei “haerea tia” mai te “huru maitai ra e riro ei taata haerea tia aore ra ei taata parau-tia.” Oia mau, aita ïa e taa-ê-raa i rotopu i te haerea tia e te parau-tia.—Amosa 5:24.

6 No reira, ia parau te Bibilia e e parau-tia ta te Atua, te faaite ra ïa te reira e e rave oia i te mea tia e te mea pae tahi ore e e na reira oia ma te ore e tauiui, ma te ore e haapao i te huru o te taata. (Roma 2:11) Oia mau, eita e nehenehe e mana‘o e e ohipa oia ma te huru ê roa i teie. Ua parau te taata haapao  maitai ra o Elihu e: “Eiaha roa te parau ino ra e hurihia ’tu i te Atua! eiaha roa te Puaihope ia parauhia i te rave parau ino ra!” (Ioba 34:10) Oia mau, eita roa ’tu e nehenehe ia Iehova ia “rave parau ino.” No te aha? E piti ïa tumu faufaa.

7, 8. (a) No te aha e ore ai e tia ia Iehova ia haa ma te tia ore? (b) Na te aha e turai ia Iehova ia haa ma te tia?

7 A tahi, mea mo‘a oia. Mai ta tatou i tapao i roto i te pene 3, mea viivii ore roa ino Iehova e te tia roa ino. Eita roa ’tu ïa e tia ia ’na ia haa ma te tia ore. E hi‘o ana‘e eaha to te reira auraa. No te mo‘araa o to tatou Metua i te ra‘i, e tumu puai ta tatou e tiaturi ai e eita roa ’tu oia e hamani ino i ta ’na mau tamarii. Tera ta Iesu i tiaturi na. I te po hopea o to ’na oraraa i te fenua nei, ua pure oia e: “E tau Metua Mo‘a ra e, e tiai oe ia ratou [te mau pǐpǐ] i ta oe i ho mai no ’u i to i‘oa na.” (Ioane 17:11) “Metua Mo‘a”—i roto i te mau Papai, e au taua huru parau ra ia Iehova ana‘e. Mea tano te reira, no te mea aita e metua taata e au ia ’Na i te mo‘a. I tiaturi roa na Iesu e e maitai ta ’na mau pǐpǐ i te rima o te Metua viivii ore roa ino e te mâ e te atea ê roa i te hara atoa.—Mataio 23:9.

8 A piti, to roto roa te here miimii ore i te huru natura iho o te Atua. E turai taua here ra ia ’na ia riro ei mea tia ia haa oia i nia ia vetahi ê. Te parau-tia ore râ e to ’na mau huru rau—mai te riri i te nunaa ê, te hi‘o-ê-raa i te tahi atu, e te faatia-pae-tahi-raa—e pinepine ïa, o te nounou e te miimii, na mea taa ê roa i te here, te tumu. No nia i te Atua î i te here, te haapapu maira te Bibilia e: “Te au ra râ Iehova parau-tia ra i te parau-tia.” (Salamo 11:7) Te na ô ra Iehova no nia ia ’na iho e: “O vau o Iehova tei hinaaro i te parau-tia.” (Isaia 61:8) E ere anei i te mea mahanahana ia ite e mea au na Iehova e rave i te mea tia?—Ieremia 9:24.

 Te aroha hamani maitai e te parau-tia tia roa a Iehova

9-11. (a) Eaha te taairaa e vai ra i rotopu i ta Iehova parau-tia e to ’na aroha hamani maitai? (b) E nafea e ite-maitai-hia ’i ta Iehova parau-tia e to ’na atoa aroha hamani maitai i roto i te huru e haa ’i oia i nia i te taata hara?

9 Mea tia roa, aita hoê hapa to te parau-tia a Iehova, mai te tahi atu mau tuhaa atoa o to ’na huru faaau ore. Ma te faateitei ia Iehova, ua papai Mose e: “Oia te Mato, o tei tia roa ta ’na ohipa ra; [mea tia] to ’na ra mau haerea [atoa]; e Atua parau mau, e te ino ore ra; e parau-tia ta ’na e te titiaifaro!” (Deuteronomi 32:3, 4; MN) Mea hapa ore ta Iehova mau faaohiparaa atoa i ta ’na parau-tia—e ere roa ’tu i te mea faatiatia roa, e ere roa ’tu i te mea etaeta roa.

10 Te vai ra te hoê taairaa piri i rotopu i ta Iehova parau-tia e to ’na aroha hamani maitai. Te na ô ra te Salamo 116:5 e: “O te hamani maitai e te parau-tia ta Iehova: oia ïa, ua î to tatou Atua i te aroha.” Oia, e parau-tia e e aroha hamani maitai atoa to Iehova. E au na huru maitatai te tahi i te tahi. E ere ta ’na faaohiparaa i te aroha hamani maitai i te tamǎrûraa i ta ’na parau-tia, mai te huru ra e aita ana‘e, e etaeta roa ta ’na parau-tia. Area râ, e pinepine oia i te faaohipa i na huru maitatai ra i te hoê â taime, i roto atoa i te hoê â ohipa. E rave ana‘e i te hoê hi‘oraa.

11 Mea hara te taata atoa no ta ratou tufaa e no reira e au ia ratou te utua o te hara—te pohe. (Roma 5:12) Eita râ Iehova e oaoa ia pohe te feia hara. “E Atua” oia “e faaore mai â i te hara, e te aroha noa, e te faaherehere mai.” (Nehemia 9:17) Teie râ, no te mea mea mo‘a oia, eita e tia ia ’na ia tapo i te mata i mua i te parau-tia ore. E nafea ïa oia e faaite ai i te aroha hamani maitai i te taata i roohia i te hara ei tufaa? E itehia te pahonoraa i roto i te hoê o te mau parau mau faahiahia roa ’‘e o te Parau a te Atua: te faanahoraa a Iehova no te hoê hoo no te faaora i te huitaata. I roto i te pene 14, e haapii hau atu â tatou no nia i teie faanahoraa î i te here. Ua  riro te reira ei mea tia roa e te î roa atoa i te aroha hamani maitai. Na roto i te reira, e nehenehe ta Iehova e faaite i te aroha hamani maitai î i te here i nia i te feia hara o te tatarahapa, a haapao noa ’i i ta ’na mau ture aveia parau-tia tia roa.—Roma 3:21-26.

Mea mahanahana ta Iehova parau-tia

12, 13. (a) No te aha ta Iehova parau-tia e faatae ai ia tatou ia ’na? (b) Eaha te faaotiraa a Davida no nia i ta Iehova parau-tia, e e nafea te reira ia haamahanahana ia tatou?

12 E ere ta Iehova parau-tia i te hoê huru maitai toetoe ta tatou e au ore, e huru maitai au mau râ o te faatae ia tatou ia ’na. Te faataa maitai ra te Bibilia i te huru aumauiui o ta Iehova parau-tia, aore ra haerea tia. E hi‘o ana‘e i te tahi o te mau ravea mahanahana e faaohipa ’i Iehova i ta ’na parau-tia.

13 E turai ta Iehova parau-tia tia roa ia ’na ia faaite i te parau mau e te taiva ore i ta ’na mau tavini. Ua taa i te papai salamo ra o Davida iho teie tuhaa o ta Iehova parau-tia. Ia au i ta ’na iho i ite e ia au i ta ’na i haapii i te mau raveraa a te Atua, eaha te faaotiraa a Davida? Ua parau oia e: “E mea au hoi na Iehova te parau-tia, e ore hoi oia e faarue i tana feia mo‘a ra. E vai â ratou e a muri noa ’tu.” (Salamo 37:28) Auê ïa haapapuraa mahanahana e! Eita roa ’tu to tatou Atua e faarue noa ’‘e i te feia e ore e taiva ia ’na. E nehenehe ïa tatou e tiaturi e e vai fatata noa mai oia e e haapao noa mai oia ma te here. E haapapu ta ’na parau-tia i te reira!—Maseli 2:7, 8.

14. E nafea te haapeapearaa o Iehova no te feia e ati ra e ite-maitai-hia ’i i roto i te Ture ta ’na i horoa na Iseraela?

14 Mea haapao roa na te Atua parau-tia te mau hinaaro o te feia ati. E ite-maitai-hia to Iehova haapeapearaa no te feia e ati ra i roto i te Ture ta ’na i horoa na Iseraela. Ei hi‘oraa, e faanahoraa taa ê to roto i te Ture no te haapapu e e aupuruhia te mau otare e te mau vahine ivi. (Deuteronomi  24:17-21) Ma te ite mai te aha te fifi o te oraraa no taua mau utuafare ra, ua riro Iehova iho ei Metua haava e te paruru, o tei “faatia i te otare, e te vahine ivi.” * (Deuteronomi 10:18; Salamo 68:5) Ua faaara Iehova i te mau Iseraela e ia hamani ino ratou i te mau vahine e te mau tamarii paruru ore, eita e ore e e faaroo oia ia tiaoro ratou. Ua na ô oia e: “E rahi roa tau riri.” (Exodo 22:22-24) Noa ’tu e e ere te riri i te hoê huru rahi o Iehova, e tupu to ’na hae ma te tia ia ravehia te mau ohipa tia ore ma te opua mau, mai te peu iho â râ e o te haehaa e te tauturu ore te atihia.—Salamo 103:6.

15, 16. Eaha te hoê haapapuraa faahiahia mau o te huru pae tahi ore o Iehova?

15 Te haapapu maira Iehova e ‘eita oia e haapao i te huru o te taata, eita atoa e rave i te [peta].’ (Deuteronomi 10:17; MN) Taa ê atu i te taata e rave rahi e mana to ratou, eita Iehova e hema i te faufaa materia aore ra i te huru rapaeau. Aita roa ’tu to ’na e mana‘o oti noa aore ra e huru pae tahi. E rave ana‘e i te hoê haapapuraa faahiahia mau o te huru pae tahi ore o Iehova. Aita i taotiahia te ravea e riro ei feia haamori mau ma te ora mure ore i mua, i te tahi noa feia faahiahia roa. Area râ, “o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) Ua tuuhia teie tiaturiraa faahiahia i mua i te taata atoa aita e hi‘oraa eaha to ratou tiaraa totiare, to ratou iri, aore ra te fenua ta ratou e faaea ra. E ere anei tera i te parau-tia mau maitai roa ino?

16 Te vai ra te tahi atu tuhaa o te parau-tia tia roa a Iehova e au ia tatou ia hi‘opoa e ia faatura: te huru e haa ’i oia i nia i te feia e ofati i ta ’na mau ture aveia tia.

 Aita e haapaeraa i te utua

17. A faataa na no te aha te mau parau-tia ore a teie nei ao e ore ai e faaore i te parau-tia a Iehova.

17 E maere paha te tahi pae e: ‘I te mea e eita Iehova e tapo i te mata i mua i te parau-tia ore, e nafea tatou ia faataa i te mauiui tia ore e te mau peu pi‘o e rahi roa ra i teie tau?’ Eita roa ’tu teie mau parau-tia ore e faaore i te parau-tia a Iehova. E faahopearaa te rahiraa parau-tia ore a teie nei ao ino no te hara i noaa i te taata ei tufaa no ǒ mai ia Adamu ra. I roto i te hoê ao i reira to te taata tia ore maitiraa i to ratou iho mau haerea hara, ua rahi roa te parau-tia ore—eita râ e maoro faahou â.—Deuteronomi 32:5.

18, 19. Na te aha e faaite e eita Iehova e vaiiho noa i te feia e ofati i ta ’na mau ture tia ma te opua mau, e a muri noa ’tu?

18 E faaite Iehova i te aroha hamani maitai rahi i nia i te feia e haafatata ’tu ia ’na ma te haavare ore, eita râ oia e vaiiho noa i te hoê tupuraa o te faaino i to ’na i‘oa mo‘a e a muri noa ’tu. (Salamo 74:10, 22, 23) Eita te Atua parau-tia e vare; eita oia e paruru i te feia opua hara i te haavaraa ino e au i to ratou haerea. O Iehova, “e Atua aroha noa, e te hamani maitai rahi, e te faaoromai rahi, e te maitai rahi, e te parau mau; . . . [teie râ, eita roa ’tu oia e haapae i te utua].” (Exodo 34:6, 7; MN) Ia au i teie mau parau, ua mana‘o Iehova i te tahi taime e mea titauhia ia faautua i te feia tei ofati i ta ’na mau ture tia ma te opua mau.

19 E rave ana‘e, ei hi‘oraa, i to te Atua haaraa i nia ia Iseraela i tahito ra. Tae noa ’tu i to ratou faaearaa i te Fenua Tǎpǔhia, ua topa pinepine te mau Iseraela i roto i te faaroo ore. Noa ’tu e ua ‘riri’ Iehova i to ratou mau e‘a pi‘o, aita oia i faarue oioi ia ratou. (Salamo 78:38-41) Area râ, ma te aroha hamani maitai, ua horoa ’tu oia i te mau ravea e ia taui ratou i to ratou haerea. Ua taparuparu atu oia e: “Aore roa o ’u e mauruururaa i te pohe o te taata ino ra; ia fariu mairâ te taata i ta ’na parau ino ia ora: e fariu mai outou, e fariu mai outou, i ta outou mau parau ino ra; eaha hoi outou i hinaaro ai i te pohe,  e te utuafare o Iseraela e?” (Ezekiela 33:11) Ma te faariro i te ora ei mea faufaa roa, ua tono pinepine Iehova i ta ’na mau peropheta e ia fariu mai te mau Iseraela i to ratou mau e‘a iino. Ua patoi râ te rahiraa o te taata aau etaeta i te faaroo e te tatarahapa. I te pae hopea, no to ’na i‘oa mo‘a e te mau mea atoa ta te reira e faahoho‘a, ua tuu atu Iehova ia ratou i te rima o to ratou mau enemi.—Nehemia 9:26-30.

20. (a) Te haapii maira to Iehova haaraa i nia ia Iseraela i te aha no nia ia ’na? (b) No te aha te liona e tano ai no te faataipe i ta Iehova parau-tia?

20 Na roto i to Iehova haaraa i nia ia Iseraela, te haapii rahi nei tatou no nia ia ’na. Te haapii ra tatou e te tapao ra to ’na mata o te ite i te mau mea atoa, i te parau-tia ore e e peapea roa oia i te mea ta ’na e ite ra. (Maseli 15:3) Mea mahanahana atoa ia ite e e imi oia i te ravea no te faaite i te aroha hamani maitai mai te peu e te vai ra te tumu e na reira ’i. Hau atu â, te haapii ra tatou e e ere ta ’na parau-tia i te mea rave ru noa. No to Iehova faaoromai, te faaoti hape ra te taata e rave rahi e eita roa ’tu oia e faautua i te feia iino. E ere roa ’tu râ te reira i te parau mau, te faaite atoa maira hoi to te Atua haaraa i nia ia Iseraela e e otia to to ’na faaoromai. Mea aueue ore Iehova no te parau-tia. Taa ê atu i te taata o te otohe pinepine no te ore e faaohipa i te parau-tia, eita roa ’tu oia e mǎta‘u i te paruru i te mea tia. Ma te tano, ua taaihia te liona  ei taipe o te parau-tia mǎta‘u ore i te vairaa e te terono o te Atua. * (Ezekiela 1:10; Apokalupo 4:7) E nehenehe ïa e papu ia tatou e e faatupu oia i ta ’na parau fafau e faaore roa i te parau-tia ore i te fenua nei. Oia, e nehenehe e haapotohia ta ’na huru haavaraa mai teie: aueue ore ia titauhia, aroha hamani maitai i te mau taime atoa e nehenehe ai.—Petero 2, 3:9.

Haafatataraa ’tu i te Atua parau-tia

21. Ia feruriruri tatou i te huru e faaohipa ’i Iehova i te parau-tia, eaha to tatou mana‘o ia ’na e tia ’i, e no te aha?

21 Ia feruriruri tatou i te huru e faaohipa ’i Iehova i te parau-tia, eiaha tatou ia mana‘o e e haava toetoe e te etaeta oia o te haapao noa i te faautuaraa i te feia rave hara. Ia mana‘o râ tatou e e Metua î i te here oia e te aueue ore râ o te haa noa i nia i ta ’na mau tamarii ma te huru maitai roa ’‘e. Ei Metua parau-tia, e faafaito noa Iehova i te aueue ore no te mea tia e te aumauiui î i te here i ta ’na mau tamarii i te fenua nei o te hinaaro i ta ’na tauturu e ia faaore oia i ta ratou hara.—Salamo 103:10, 13.

22. Ma te arataihia e ta ’na parau-tia, ua rave Iehova e ia fana‘o tatou i teihea tiaturiraa, e no te aha oia e haa ’i i nia ia tatou mai teie?

22 E nehenehe mau tatou e mauruuru e e hau atu te parau-tia a Iehova i te faautua-noa-raa i te feia rave hara! Ma te arataihia e ta ’na parau-tia, ua rave Iehova e ia fana‘o tatou i te hoê tiaturiraa oaoa mau—te ora tia roa e te hope ore i roto i te hoê ao i reira ‘e vai mau ai te parau-tia.’ (Petero 2, 3:13) E haa to tatou Atua i nia ia tatou mai teie no te mea e turai ta ’na parau-tia ia ’na ia imi i te ravea no te faaora eiaha râ no te faautua. Oia mau, e tae tatou ia Iehova ia taa maitai a‘e ia tatou te rahi o ta ’na parau-tia! I roto i te mau pene i muri nei, e hi‘opoa maitai a‘e tatou e nafea Iehova e faaite ai i teie huru maitai popou mau.

^ par. 14 Noa ’tu e te faahiti ra te ta‘o Hebera i hurihia ei “otare” i te hoê tamarii tamaroa, aita roa ’tu te reira e na ô ra e aita e haapeapeahia ra no te mau tamahine. Ua haapapai Iehova i te hoê aamu no nia i te hoê haavaraa tei haapapu i te tufaa a te mau tamahine otare a Zelophehada, i roto i te Ture. Ua riro taua haavaraa ra ei hi‘oraa, e ua paturu atoa ïa i te mau tiaraa o te mau tamahine otare.—Numera 27:1-8.

^ par. 20 Ma te faahiahia, te faaau ra Iehova ia ’na iho i te hoê liona ia faatupu oia i te haavaraa i nia ia Iseraela faaroo ore ra.—Ieremia 25:38; Hosea 5:14.

No te ite atu â

No te aha te Atua e vaiiho ai ia hamani ino te feia tiaraa teitei i te taata haihai?

Te faaite ra te Bibilia i ta te Atua e faataa ra no nia i te faaheporaa e i ta ’na e rave no te faaore i te reira.