Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 12

“E parau-tia ore anei ta te Atua?”

“E parau-tia ore anei ta te Atua?”

1. E nafea paha tatou e huru ê ai i te tahi mau tupuraa tia ore?

UA FAAEREHIA te hoê vahine ivi paari i te moni ta ’na i haaputu. Ua faaruehia te hoê aiû ravea ore e te hoê metua vahine mafatu ore. Ua tapeahia te hoê taata no te hoê hara e ere na ’na i rave. E nafea outou i mua i teie mau huru tupuraa? Papu mau e e huru ê outou i teie mau hi‘oraa taitahi, e mea tano iho â. Mea taa roa ia tatou te taata nei te mea tia e te mea tia ore. Ia ravehia te hoê ohipa tia ore, e riri tatou. E hinaaro tatou ia tahoohia te taata ati e ia faautuahia te taata hara. Ia ore te reira ia tupu, e ui paha tatou e: ‘Te ite ra anei te Atua eaha teie e tupu nei? No te aha oia e ore ai e ohipa mai?’

2. Ua nafea o Habakuka i mua i te parau-tia ore, e no te aha Iehova i ore ai i haamamû ia ’na no te reira?

2 I te roaraa o te tuatapaparaa, ua ui te tahi mau tavini haapao maitai a Iehova i te mau uiraa mai tera. Ei hi‘oraa, ua pure te peropheta Habakuka i te Atua e: “Eaha oe e faaite mai ai i taua parau-tia ore riaria ra? Eaha oe e faatia ’i ia taea roa te mau vahi atoa i te haavîraa u‘ana, te haapao ore i te ture, te ohipa ino, e te huru taehae?” (Habakuka 1:3, Contemporary English Version) Aita Iehova i haamamû ia Habakuka no ta ’na uiraa ino ore, no te mea na ’Na i tuu i te mana‘o iho o te parau-tia i roto i te taata. Oia, ua haamaitai Iehova ia tatou i te tahi maa tuhaa o to ’na haroaroaraa hohonu i te parau-tia.

Mea riri na Iehova te parau-tia ore

3. No te aha e nehenehe ai e parau e mea ite maite a‘e Iehova i te parau-tia ore ia tatou?

3 E ere Iehova i te mea ite ore i te parau-tia ore. Te ite ra oia eaha te tupu ra. No nia i te tau o Noa, te faaite maira te Bibilia  e: “Ite a‘era Iehova, e ino rahi to te taata o te ao nei, e ua ino ana‘e te mau mana‘o atoa, e te mau opuaraa atoa o te aau i te mau mahana atoa ra.” (Genese 6:5) A feruri na i te auraa o taua parau ra. Mea pinepine, ua niuhia to tatou mana‘o i te parau-tia ore i nia i te tahi mau fifi ta tatou i faaroo aore ra i farerei tatou iho. Area o Iehova ra, te ite maite ra ïa oia i te parau-tia ore i nia i te fenua taatoa. Te ite ra oia i te parau-tia ore atoa! Hau atu i te reira, te haroaroa ra oia i te mau hinaaro o te aau—te mana‘o ino e vai ra i muri mai i te mau ohipa tia ore.—Ieremia 17:10.

4, 5. (a) E nafea te Bibilia ia faaite e te haapao maira Iehova te feia i hamani-ino-hia ma te tia ore? (b) Mea nafea to Iehova iho mauiuiraa i te parau-tia ore?

4 Eita noa râ Iehova e tapao i te parau-tia ore. E tapitapi atoa oia i tei haamauiuihia i te reira. I to to ’na nunaa hamani-ino-roa-raahia e te mau nunaa enemi, ua peapea roa Iehova “i to ratou autâ, i te feia i haafao mai ia ratou.” (Mau tavana 2:18) Ua tapao paha outou e e rahi noa ’tu te tahi mau taata i te ite atu i te parau-tia ore, e iti noa ’tu ratou i te faatupu i te aumauiui no te feia e roohia ra i te reira. E ere Iehova mai tera! Ua ite oia i te taatoaraa o te parau-tia ore fatata e 6 000 matahiti i teie nei, aita râ to ’na riri i te reira i taui. Area râ, te haapapu maira te Bibilia e mea riri na ’na te mau mea mai “te arero haavare,” “te rima i manii ai te toto hara ore,” e “te ite haavare, e parau i te parau haavare.”—Maseli 6:16-19.

5 A hi‘o atoa na i te avau puai a Iehova i te mau aratai tia ore i Iseraela. Ua faaurua oia i ta ’na peropheta e ui ia ratou e: “E ere anei te ohipa na outou te iteraa i te parau-tia?” I muri a‘e i to ’na faataaraa i ta ratou faaohipa-hua-raa i te mana ma te oraora mau, ua tohu Iehova i te hopea o teie mau taata haerea pi‘o: “Ei reira ratou e pii atu ai ia Iehova, e ore râ oia e faaroo mai ia ratou; e purou oia i to ’na mata ia ratou ia tae i taua mahana ra, no te mea ua ino ta ratou  parau.” (Mika 3:1-4; MN) Mea faufau mau ïa na Iehova te parau-tia ore! Inaha hoi, o oia iho tei roo-na-mua-hia i te reira! Ua tau tausani matahiti i teie nei to Satani tâhitoraa ia ’na ma te tia ore. (Maseli 27:11) Hau atu â, ua mauiui Iehova i te parau-tia ore riaria roa ’‘e i to ta ’na Tamaiti, tei “ore roa i rave i te hara,” haapoheraahia ei taata hara. (Petero 1, 2:22; Isaia 53:9) Papu maitai, e ere Iehova i te mea ite ore aore ra i te mea tâu‘a ore i te ati o te feia e roohia ra i te parau-tia ore.

6. E nafea paha tatou ia faaû tatou i te parau-tia ore, e no te aha?

6 Teie râ, e hitahita-roa-hia iho â tatou ia ite tatou i te parau-tia ore aore ra ia haahia i nia ia tatou iho ma te tia ore. Ua hamanihia tatou ia au i to te Atua huru, e e taa ê roa te parau-tia ore i te mau mea atoa e au ia Iehova. (Genese 1:27) No te aha ïa te Atua e faatia ’i i te parau-tia ore?

Te tumu parau o te mana arii o te Atua

7. A faataa na mea nafea te aaraahia te mana arii o Iehova.

7 Ua taaihia te pahonoraa i taua uiraa ra i te tumu parau o te mana arii. Mai ta tatou i ite, e tiaraa to te Atua Poiete e faatere i te fenua e te feia atoa e parahi ra i nia iho. (Salamo 24:1; Apokalupo 4:11) I te omuaraa râ o te tuatapaparaa o te taata, ua aahia te mana arii o Iehova. Mea nafea te reira i te tupuraa? Ua faaue Iehova i te taata matamua ra o Adamu eiaha e amu i to te hoê raau i roto i te ô tei riro na ei nohoraa paradaiso no ’na. E ia faaroo ore noa ’tu oia? “E pohe ïa oe,” o ta te Atua ïa i parau atu ia ’na. (Genese 2:17) E ere te faaueraa a te Atua i te mea fifi na Adamu aore ra na ta ’na vahine o Eva. Teie râ, ua haapapu o Satani i te mana‘o o Eva e te taotia ra te Atua ia raua ma te tano ore. Eaha ïa mai te peu e e amu iho â oia i to te raau? Ua parau tanai atu Satani ia Eva e: “E ore roa orua e pohe: ua ite hoi te Atua e, ua amu ana‘e orua i to reira, e araara ïa to orua mata, e e riro orua  mai te Atua ra te huru, i te ite i te maitai e te ino.”—Genese 3:1-5.

8. (a) Eaha te mau mana‘o ta Satani e faahiti ra na roto i ta ’na i parau atu ia Eva? (b) Eaha ta Satani i aa no nia i te mana arii o te Atua?

8 Na roto i taua parau ra, aita noa Satani e na ô ra e te tapea ra Iehova i te tahi parau faufaa eiaha Eva ia ite, oia atoa râ e te haavare ra Oia ia ’na. Ua haapao maitai Satani eiaha e mârô i te mea e o te Atua te Arii rahi roa ’‘e. Ua aa mau râ oia e e au mau anei ia ’na taua tiaraa ra. Te auraa ra, te mârô ra oia e aita Iehova e faaohipa ra i to ’Na mana arii ma te tia e ia maitai roa ino to ’Na feia auraro.

9. (a) No Adamu e o Eva, eaha te faahopearaa o te faaroo-ore-raa, e eaha te mau uiraa faufaa roa ta te reira i faahiti? (b) No te aha Iehova i ore ai i haamou noa ’tu i te mau orure hau?

9 Ei faahopearaa, ua faaroo ore Adamu raua Eva ia Iehova na roto i te amuraa i to te raau i opanihia. No to raua faaroo ore i au ai ia raua te utua pohe, mai ta te Atua iho â i faaoti. Ua faahiti te haavare a Satani i te tahi mau uiraa faufaa roa. E tiaraa mau anei to Iehova e faatere i te taata, aore ra mea au a‘e anei ia faatere te taata ia ’na iho? Te faaohipa ra anei Iehova i to ’na mana arii ma te huru maitai roa ’‘e? I nehenehe noa na ta Iehova e faaohipa i to ’na puai hope no te haamou i te mau orure hau i reira iho. Te au ra râ te mau tumu parau i faahitihia i te ariiraa o te Atua, eiaha i to ’na mana. Eita ïa te faaoreraa ia Adamu, ia Eva, e ia Satani e haapapu e mea tia te faatereraa a te Atua. Ahiri ratou i haamouhia, ua mârô-hau-hia ’tu â ïa to ’na ariiraa. Te ravea hoê roa e itehia ’i e e manuïa anei te taata i te faatereraa ia ratou iho, ma te atea ê i te Atua, te vaiihoraa ïa ia mairi te tau.

10. Eaha ta te tuatapaparaa i faaite no nia i te faatereraa taata?

10 Eaha ta te tau i mairi i faaite? I te roaraa o te mau mireniuma, ua tamatamata te taata i te mau huru faatereraa e rave rau, tae noa ’tu i te faatereraa mana hoê otia ore, te hau manahune, te socialisme, e te communisme. Ua haapotohia te taatoaraa o te reira i roto i te parau huna ore o te Bibilia ra:  ‘Ua faatere te taata i te taata e ia ino atu.’ (Koheleta 8:9, MN) Ma te tano roa, ua parau te peropheta Ieremia e: “Ua ite hoi au, e Iehova, e ere tei te taata iho to ’na haerea; e ere hoi tei taua taata e haere ra i te haapao i to ’na taahiraa.”—Ieremia 10:23.

11. No te aha Iehova i vaiiho ai i te taata ia topa i roto i te mauiui?

11 Ua ite Iehova mai te omuaraa iho â e e faatupu ta te taata faatereraa ia ’na iho i te mauiui rahi. Mea tia ore anei to ’na vaiihoraa e ia tupu noa ’tu te ino? Eita roa ’tu! Ei hi‘oraa: A feruri na e e tamarii ta tatou o te hinaaro i te hoê tâpûraa ia ora te hoê ma‘i pohe. Te taa ra ia outou e e faatupu te tâpûraa i ta outou tamarii i te tahi faito mauiui, e e peapea roa outou i te reira. Ua ite atoa râ outou e maoti te reira e nehenehe ai ta ta outou tamarii e fana‘o i te ea maitai a‘e a muri a‘e i roto i te oraraa. Oia atoa, ua ite te Atua—e ua tohu atoa—e e hopoi mai to ’na faatiaraa i te faatereraa taata i te tahi faito mauiui. (Genese 3:16-19) Ua ite atoa râ oia e e noaa te faaoraraa faufaa e te vai maoro mai te peu noa e e vaiiho oia ia ite te taata i te hotu ino o te orureraa hau. E na reira te tumu parau e faaafarohia ’i ma te taraire, e a muri noa ’tu.

Te tumu parau o te hapa ore o te taata

12. Mai tei itehia i roto i te hi‘oraa o Ioba, eaha ta Satani pariraa i te taata?

12 Te vai ra te tahi atu tuhaa o teie tumu parau. Na roto i te aaraa i te tiaraa o te faatereraa a te Atua, aita noa Satani i faaino ia Iehova no nia i to ’Na mana arii; ua faaino atoa râ oia i te mau tavini a te Atua no nia i to ratou hapa ore. A tapao na, ei hi‘oraa, eaha ta Satani i parau ia Iehova no nia i te taata parau-tia ra o Ioba: “E ere anei tei auahia oia e oe, e to ’na atoa ra fare, e ta ’na atoa ra mau tao‘a atoa e ati noa ’‘e? ua haamaitaihia e oe ta ’na ohipa i rave, e ua rahi ta ’na tao‘a i  te fenua nei. Nanao noa ’tura râ i to rima a rave atu ai i ta ’na e ia pau roa; e e faaino oia ia oe i mua i to aro i reira.”—Ioba 1:10, 11.

13. Eaha to roto i ta Satani mau pariraa no nia ia Ioba, e e nafea te reira e au ai i te taata atoa?

13 Te faahua ra Satani e te faaohipa ra Iehova i to ’Na mana paruru ei petaraa i to Ioba here. I te tahi a‘e pae, te na ô atoa ra te reira e mea haavarevare te hapa ore o Ioba, e te haamori ra oia i te Atua no te mau mea noa e noaa mai ia ’na ei faaho‘iraa. Te mârô ra Satani e mai te peu e e faaerehia Ioba i te haamaitairaa a te Atua, e faaino taua taata ra i Tei poiete ia ’na. Ua ite Satani e aita to Ioba e faito i te “parau-tia e te paieti, e te mǎta‘uraa i te Atua, e te faarueraa i te ino.” * No reira, mai te peu e e fati ia Satani te hapa ore o Ioba, eaha ’tu â ïa te toea o te huitaata? Te mârô mau ra ïa Satani i te taiva ore o te feia atoa e hinaaro e tavini i te Atua. Oia mau, ma te faaaano i te tumu parau, ua parau Satani ia Iehova e: “E riro hoi ta te taata atoa ra [eiaha ta Ioba ana‘e] ei hoo i to ’na ora.”—Ioba 1:8; 2:4.

14. Eaha ta te tuatapaparaa i faaite no nia i te pariraa a Satani i te taata?

14 Ua faaite te tuatapaparaa e mea rahi, mai ia Ioba, tei ore i taiva ia Iehova noa ’tu te mau tamataraa—eiaha mai ta Satani i parau. Ua faaoaoa ratou i te mafatu o Iehova na roto i to ratou haerea haapao maitai, e ua horoa te reira i te pahonoraa na Iehova i ta Satani tâhitohitoraa teoteo e e faaea te taata i te tavini i te Atua ia faaû ratou i te ati. (Hebera 11:4-38) Oia, ua patoi te feia aau tia i te fariu ê i te Atua. Noa ’tu e ua peapea ratou no te mau huru tupuraa ahoaho roa ino, ua turui hau atu â ratou i nia ia Iehova ia horoa mai oia i te puai no te faaoromai.—Korinetia 2, 4:7-10.

15. Eaha te uiraa e hiti mai no nia i te mau haavaraa a te Atua no mutaa iho e no a muri a‘e?

 15 Aita râ ta Iehova faaohiparaa i te parau-tia i taai-noa-hia i te mau tumu parau o te mana arii e o te hapa ore o te taata. Te horoa maira te Bibilia i te aamu o te mau haavaraa a Iehova no nia i te tahi mau taata e te tahi mau nunaa taatoa. Te vai atoa ra te mau parau tohu no nia i te mau haavaraa ta ’na e faatupu a muri a‘e. No te aha e papu ai ia tatou e ua riro Iehova e e riro oia ei mea tia i roto i ta ’na mau haavaraa?

No te aha te parau-tia a te Atua e rahi a‘e ai

Eita roa ’tu Iehova ‘e haamou i te feia parau-tia e te paieti ore atoa’

16, 17. Eaha te tahi mau tupuraa o te faaite e mea taotiahia te hi‘oraa a te taata no nia i te parau-tia mau?

16 No nia ia Iehova, e tano mau ia parauhia e: “[E parau-tia] to ’na ra mau haerea [atoa].” (Deuteronomi 32:4; MN) Aita hoê i roto ia tatou o te nehenehe e parau i tera parau no nia ia tatou iho, e pinepine hoi ta tatou hi‘oraa taotiahia i te haapouri i to tatou haroaroaraa i te mea tia. Ei hi‘oraa, e rave ana‘e ia Aberahama. Ua taparuparu oia ia Iehova no nia i te haamouraa o Sodoma—noa ’tu te ino i parare roa i reira. Ua ui oia ia Iehova e: “E haamou atoa anei oe i te feia parau-tia, e te paieti ore?” (Genese 18:23-33) Papu maitai e eita. I te taime noa i tae maitai ai te taata parau-tia ra o Lota e ta ’na na tamahine i te oire o Zoara “i haamairi mai ai Iehova iho i te gopherita e te auahi” i nia ia Sodoma. (Genese 19:22-24) Area o Iona ra, ua “rahi atura to ’na riri” i to te Atua faaiteraa i te aroha i nia i te feia no Nineve. I te mea e ua tohu a‘ena Iona i to ratou haamouraa, e mauruuru ïa oia ia haamouhia iho â ratou—noa ’tu e ua tatarahapa ratou ma te aau tae.—Iona 3:10–4:1.

17 Ua haamahanahana Iehova ia Aberahama e e ere noa ta ’Na faaohiparaa i te parau-tia i te haamouraa i te feia iino, te faaoraraa atoa râ i te feia parau-tia. I te tahi a‘e pae, i tia na ia Iona ia haapii e e aroha hamani maitai to Iehova. Ia taui  te feia iino i to ratou haerea, e ineine oia i “te faaore mai i te hara.” (Salamo 86:5) Eiaha mai te taata aita i papu te tiaraa, eita Iehova e faatupu i te haavaraa ino no te faaite i to ’na mana, eita atoa oia e tapea i te aumauiui no to ’na noa mǎta‘u e e mana‘ohia e mea paruparu oia. To ’na haerea, te faaiteraa ïa i te aroha hamani maitai i te mau taime atoa e nehenehe ai.—Isaia 55:7; Ezekiela 18:23.

18. A faaite na ia au i te Bibilia e eita Iehova e haa na nia i te huru aau noa.

18 Eita râ to Iehova mata e po i te huru aau noa. I to to ’na nunaa topa-roa-raa i roto i te haamoriraa idolo, ua parau Iehova ma te etaeta e: “E haava vau ia oe i ta oe ra parau, e tahoo atu vau i ta oe ra mau parau faufau ia oe ra. E ore tau mata e faaherehere ia oe, e ore hoi au e aroha; e tahoo atu vau i ta oe ra parau ia oe.” (Ezekiela 7:3, 4) No reira, ia haapaari te taata i roto i to ratou haerea, e haava Iehova ia au i te reira. Ua niuhia râ ta ’na haavaraa i nia i te mea papu roa. Inaha, i to ’na faarooraa i te hoê “auê rahi” no nia ia Sodoma e ia Gomora, ua parau Iehova e: “E haere na vau i raro, e hi‘o, ia ite au i te rave mauraa ratou, mai tei tae roa mai te reo ia ’u nei ra.” (Genese 18:20, 21) E nehenehe mau tatou e mauruuru i te mea e e ere Iehova mai te taata e rave rahi o te haava oioi hou a faaroo ai i te mau parau atoa! Oia mau, ua riro Iehova mai ta te Bibilia e faataa ra ia ’na, ei “Atua parau mau, e te ino ore ra; e parau-tia ta ’na e te titiaifaro!”—Deuteronomi 32:4.

A tiaturi i ta Iehova parau-tia

19. E nafea tatou mai te peu e te peapea ra tatou no nia i ta Iehova faaohiparaa i te parau-tia?

19 Eita te Bibilia e pahono i te mau uiraa atoa no nia i te mau ohipa a Iehova i mutaa ihora; aita atoa e haamataratara roa ra i te huru e haava ’i oia i te taata taitahi e te mau pǔpǔ a muri a‘e. Ia peapea tatou no te tahi mau aamu aore ra parau tohu bibilia aita taua mau haamataratararaa ra, e  nehenehe tatou e faaite i te hoê â taiva-ore-raa e te peropheta Mika tei papai e: “E tiai au i te Atua o to ’u nei ora.”—Mika 7:7.

20, 21. No te aha tatou e nehenehe ai e tiaturi e e rave noa iho â Iehova i te mea tia?

20 E nehenehe tatou e tiaturi e i roto i te mau tupuraa atoa, e rave Iehova i te mea tia. Noa ’tu e e au ra e te tâu‘a ore ra te taata i te mau parau-tia ore, te fafau ra Iehova e: “Ei ia ’u te riri, na ’u ïa e tahoo atu.” (Roma 12:19) Mai te peu e e haerea tiai to tatou, e pee tatou i te tiaturiraa papu a te aposetolo Paulo: “E parau-tia ore anei ta te Atua? Eiaha roa ïa.”—Roma 9:14.

21 I teie nei taime, te ora nei tatou i te tau “ati rahi faaruru atâ.” (Timoteo 2, 3:1, MN) Ua faatupu te parau-tia ore e “te mau hamani ino” i te mau peu tano ore taehae e rave rahi. (Koheleta 4:1) Aita râ Iehova i taui. Mea riri noâ na ’na te parau-tia ore, e e haapeapea roa oia no te feia i roohia i te reira. Ia ore roa ’tu tatou e taiva ia Iehova e to ’na mana arii, e horoa mai oia i te puai no te faaoromai e ia tae i te taime faataahia e faatitiaifaro ai oia i te mau parau-tia ore atoa i raro a‘e i te faatereraa a to ’na Basileia.—Petero 1, 5:6, 7.

^ par. 13 Ua parau Iehova no nia ia Ioba e: “Aita hoi o ’na e faito i nia i te fenua nei.” (Ioba 1:8) Papu ïa e ua ora Ioba i muri a‘e i te poheraa o Iosepha e hou Mose a faatoroahia ’i ei aratai no Iseraela. No reira, i taua taime ra, mea tano te parauraahia e aita e taata mai ia Ioba i te hapa ore.

No te ite atu â

Te mau faautuaraa a te Atua—Mea ino anei?

No te ite, a hi‘opoa e piti faautuaraa a te Atua i roto i te Bibilia—te diluvi i te tau o Noa e te haamouraa o te ati Kanaana.

E tiaturi anei oe i te Atua?

A hi‘o na e nafea oe e faufaahia ’i ia faariro i te Atua ei Hoa piri roa no oe.