Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 15

E ‘haamauhia te parau-tia i te fenua nei’ e Iesu

E ‘haamauhia te parau-tia i te fenua nei’ e Iesu

1, 2. I teihea taime to Iesu riri-roa-raa, e no te aha?

UA RIRI roa Iesu—e e tumu maitai iho â i na reira ’i oia. E mana‘o paha outou e mea fifi roa ia feruri e te riri roa ra oia, e taata hoi oia no te haehaa. (Mataio 21:5) Ua vî maite noa râ ia ’na to ’na huru, papu maitai, no te mea e riri parau-tia to ’na. * Na te aha râ i faahae i teie hoa o te hau mai teie? Na te hoê ohipa tia ore roa.

2 Mea hinaaro na Iesu te hiero i Ierusalema. Na te ao atoa, tera te vahi mo‘a hoê roa i pûpûhia no te haamoriraa a to ’na Metua i te ra‘i. Mea na te atea roa te mau ati Iuda no te mau fenua e rave rahi ia haere mai i reira e haamori ai. I haere atoa mai na te tahi mau Etene o te mǎta‘u i te Atua, e tomo ratou i roto i te aua o te hiero i faataahia no ratou. I te omuaraa râ o ta ’na taviniraa, ua tomo Iesu i roto i te hiero e ua ite atu i te hoê ohipa hairiiri. Ua riro taua vahi ra ei vahi hooraa, e ere atura ïa i te fare haamoriraa faahou! Ua î te reira i te feia hoo tao‘a e te feia hoo moni. Teihea hoi te parau-tia ore? No teie mau taata, ua riro noa te hiero o te Atua ei vahi taviriraa taata—e eiâraa atoa ia ratou. Nafea hoi?—Ioane 2:14.

3, 4. Eaha te ohipa imiraa moni nounou rahi e tupu ra i te fare o Iehova, e eaha ta Iesu i rave no te faatitiaifaro i te reira?

3 Ua faaoti te mau aratai haapaoraa e hoê noa huru moni taa maitai e nehenehe e faaohipahia no te aufau i te tute i te hiero. I tia na i te mau ratere ia taui i ta ratou moni e ia noaa mai taua moni ra. No reira, ua faatia te feia hoo moni i ta ratou mau iri  i roto roa mai i te hiero, e i faaaufau na ratou i te moni taime no te mau tauiraa atoa. Mea hoona roa atoa te tapihooraa o te mau animara. I nehenehe na te mau ratere o te hinaaro ra e pûpû i te tusia, e hoo mai i te reira i te feia hoo atoa ra i roto i te oire, i nehenehe noa na râ i te feia toroa i te hiero e patoi i ta ratou mau ô ei mea tano ore. Mea papu râ e e fariihia te mau ô e hoohia mai i te hiero iho ra. I te mea e aita iho â ta te taata e ravea, e faaaufau te feia hoo i te tahi mau taime i te moni rahi roa. * Mea ino a‘e tera i te tapihooraa hairiiri. E eiâraa mau tera!

“E hopoi ê atu i tena na mau mea”

4 Aita ta Iesu i nehenehe e faaoromai i taua parau-tia ore ra. O te fare tera o to ’na iho Metua! Ua hamani oia i te hoê pǎpǎi i te mau taura rii e ua tiahi i te mau puaatoro e te mau mamoe i rapae i te hiero. Haere vitiviti atura oia i te feia hoo moni ra, faatahuri atura i ta ratou mau iri. A feruri na i te mau moni atoa e tere haere ra na nia i te tahua maremora! Faaue atura oia ma te etaeta i te mau taata e hoo ra i te uuairao e: “E hopoi ê atu i tena na mau mea.” (Ioane 2:15, 16) E au ra e aita e taata e tae ia ’na e patoi i teie taata mǎta‘u ore.

“Te huru o te metua ra, o te huru atoa ïa o te tamaiti”

5-7. (a) Mea nafea to Iesu oraraa hou a riro ai ei taata ohiparaa i nia i to ’na mana‘o i te parau-tia, e eaha ta tatou e haapii mai na roto i te faahohonuraa i to ’na hi‘oraa? (b) Mea nafea to Iesu patoiraa i te mau parau-tia ore no nia i te mana arii e te i‘oa o Iehova?

5 Ua ho‘i faahou iho â ïa te feia hoohoo. Fatata e toru matahiti i muri a‘e, ua farerei Iesu i tauâ parau-tia ore ra, i teie taime ua faahiti oia i ta Iehova iho mau parau faahaparaa i te feia i faariro i to ’Na fare “ei ana no te eiâ haru.” (Mataio 21:13; Ieremia 7:11) Oia, i to Iesu iteraa i te ohipa imiraa moni nounou  rahi a te taata e te viivii o te hiero o te Atua, ua riro oia mai to ’na Metua ra. E e ere i te mea maere! Ehia rahiraa mirioni matahiti to Iesu haapiiraahia e to ’na Metua i te ra‘i. Ei faahopearaa, ua î atoa oia i to Iehova haroaroaraa i te parau-tia. Ua riro oia ei hi‘oraa oraora o te parau ra, “Te huru o te metua ra, o te huru atoa ïa o te tamaiti.” No reira, mai te peu e e hinaaro tatou i te hoê hoho‘a maramarama o te huru maitai o te parau-tia a Iehova, aita ’tu ravea maitai a‘e i te feruriraa i te hi‘oraa o Iesu Mesia.—Ioane 14:9, 10.

6 To reira te Tamaiti fanau tahi a Iehova i to Satani pariraa ma te tia ore i te Atua ra o Iehova i te haavare e mârôraa i te tiaraa o ta ’Na faatereraa. Tera te faaino mau! Ua faaroo atoa te Tamaiti i to Satani aaraa i muri a‘e e aita hoê taata e tavini ia Iehova ma te miimii ore, ma te here. Ua haamauiui papu mau teie mau pariraa haavare i te aau tia o te Tamaiti. Ua oaoa roa paha ïa oia i te faarooraa e na ’na e amo i te tuhaa rahi i te faaafaroraa i te haavare! (Korinetia 2, 1:20) E nafea oia ia rave i te reira?

7 Mai ta tatou i haapii i roto i te pene 14, ua horoa Iesu Mesia i te pahonoraa hopea o te faaoti i te pariraa a Satani no nia i te hapa ore o te mau mea ora ta Iehova i poiete. Ua haamau ïa Iesu i te niu no te faatiaraa hopea i te mana arii o Iehova e te faaraaraa i to ’Na i‘oa. Ei Mauhaa rahi a Iehova, e haamau Iesu i te parau-tia a te Atua na te ao taatoa. (Ohipa 5:31) Ua faahoho‘a atoa to ’na oraraa i te fenua nei i te parau-tia a te Atua. Ua parau Iehova no nia ia ’na e: ‘E tuu roa ’tu vau i tau varua i nia iho ia ’na, e na ’na e [faataa ’tu i te parau-tia] i te mau Etene.’ (Mataio 12:18; MN) Mea nafea to Iesu faatupuraa i taua mau parau ra?

E faataa Iesu “i te parau-tia”

8-10. (a) Mea nafea to te mau parau tutuu a te mau aratai haapaoraa ati Iuda faaitoitoraa e vahavaha i te mau taata e ere i te ati Iuda e te mau vahine? (b) Mea nafea to te mau ture parau vaha faateimaharaa i te ture o te Sabati a Iehova?

8 Mea hinaaro na Iesu te Ture a Iehova e ua ora oia ia au i te  reira. Ua taviri râ e ua faaohipa hape te mau aratai haapaoraa no to ’na tau i taua Ture ra. Ua parau atu Iesu ia ratou e: “Auê outou, e te mau papai parau e te mau Pharisea, e haavare outou! . . . te haapae nei [outou] i te mau mea rarahi o te ture ra, i te parau-tia, e te aroha, e te haapao mau ra.” (Mataio 23:23) Aita iho â ïa taua mau orometua haapii i te Ture a te Atua ra e faataa ra “i te parau-tia.” Te haapoiri ra râ ratou i te parau-tia a te Atua. Mea nafea hoi? E rave ana‘e tau hi‘oraa.

9 Ua faaue Iehova i to ’na nunaa e faaatea ê mai i te mau nunaa etene e haaati ra ia ratou. (Mau arii 1, 11:1, 2) Ua faaitoito râ te tahi mau aratai haapaoraa aoaoa ia vahavaha i te taata atoa e ere i te ati Iuda. I roto i te Mishna, te vai atoa ra teie ture: “Eiaha te animara faaamu ia vaiihohia i roto i te mau fare tipaeraa a te mau etene i te mea e te mana‘ohia e e rave ratou i te peu taatiraa e te animara.” Mea tia ore taua huru mana‘o ino haere noa ra i te taata atoa e ere i te ati Iuda e aita roa ’tu i au i te niu o te Ture a Mose. (Levitiko 19:34) E faahaehaa te tahi atu mau ture rii a te taata i te mau vahine. Te na ô ra te ture parau vaha e e tia i te hoê vahine ia haere na muri mai eiaha na pihai iho i ta ’na tane. E faaarahia te hoê tane eiaha e paraparau i te hoê vahine i te vahi taata, tae noa ’tu i ta ’na iho vahine. Mai te mau tîtî, eita te mau vahine e faatiahia ia riro ei ite i te tiripuna. Te vai atoa ra te hoê pure oti noa i reira te mau tane e haamauruuru ai i te Atua e e ere ratou i te vahine.

10 Ua haapo‘i te mau aratai haapaoraa i te Ture a te Atua i raro a‘e i te hoê puea ture rii a te taata. Ei hi‘oraa, e opani noa te ture o te Sabati eiaha e rave i te ohipa i te Sabati, a faataa ’i i taua mahana ra no te haamoriraa, te tamǎrûraa pae varua e te faafaaearaa. Ua faateimaha râ te mau Pharisea i taua ture ra. Ua faaoti ratou iho eaha mau na te “ohipa.” Ua faataa ratou e 39 ohipa taa ê, mai te ootiraa e te a‘ua‘uraa animara. Ua faahiti teie mau tatuhaaraa i te mau uiraa hopea ore. Ia haapohe te hoê taata i te hoê manumanu i te Sabati, te a‘ua‘u ra anei oia? Ia ohi oia i te hoê apu rima huero maa e amu a hahaere ai oia, te ooti ra anei oia? Ia faaora oia i te hoê taata ma‘i, te rave ra  anei oia i te ohipa? Ua haapaohia taua mau uiraa ra ma te mau ture rii etaeta.

11, 12. Mea nafea to Iesu faaiteraa e te patoi ra oia i te mau tutuu a te mau Pharisea e ere no roto i te Bibilia?

11 I roto i taua huru tupuraa ra, e nafea Iesu ia tauturu i te taata ia taa ia ratou eaha te parau-tia? I roto i ta ’na mau haapiiraa e to ’na huru oraraa, ua patoi oia ma te mǎta‘u ore i te mau aratai haapaoraa. E rave ana‘e na mua i te tahi o ta ’na mau haapiiraa. Ua faahapa tanai atu oia i ta ratou puea ture rii rahi roa a te taata, a na ô ai e: ‘Ua faaore outou i te parau a te Atua i ta outou parau i tuuhia mai i haamauhia e outou na.’—Mareko 7:13.

12 Ua haapii Iesu ma te mana e ua hape te mau Pharisea i te pae o te ture o te Sabati—e, oia mau, aita i taa ia ratou te fa mau o taua ture ra. Ua faataa oia e o te Mesia “te Fatu o te sabati” e e tiaraa ïa to ’na e faaora i te taata i te Sabati. (Mataio 12:8) No te haapapu maitai i te mana‘o, ua rave oia i te mau faaoraraa ma‘i semeio ma te huna ore i te Sabati. (Luka 6:7-10) E faaite-atea-raa taua mau faaoraraa ma‘i ra no te faaoraraa ta ’na e rave na te ao atoa i te roaraa o ta ’na Faatereraa tausani matahiti. E riro taua Mireniuma ra ei Sabati rahi roa ’‘e, i reira te huitaata haapao maitai e haamâha ’i, a tahi ra ïa, i te rohirohi o te mau senekele tutavaraa ma te mau faateimaharaa a te hara e te pohe.

13. Eaha te ture i haamauhia ei faahopearaa o te taviniraa a te Mesia i te fenua nei, e nafea te reira i taa ê ai i to mua ’tu ture?

13 Ua faataa atoa Iesu eaha te parau-tia i te haamauraahia te hoê ture apî, “te ture a te Mesia,” i te otiraa ta ’na taviniraa i te fenua nei. (Galatia 6:2) Eiaha mai to mua ’tu, oia te Ture a Mose, ua taai-rahi-hia teie ture apî, eiaha i te hoê anairaa ture papaihia, i te mau faaueraa tumu râ. Te vai ra iho â râ te tahi mau faaueraa taa maitai. Ua parau Iesu no nia i te hoê e e “ture apî” tera. Ua haapii Iesu i ta ’na mau pǐpǐ atoa e aroha te tahi i te tahi mai ia ’na i aroha ia ratou. (Ioane 13:34, 35) Oia, ia riro te aroha ma te haapae ia ’na iho ei tapao faataa-ê-raa i te feia atoa e ora ia au i “te ture a te Mesia.”

 Te hoê hi‘oraa oraora o te parau-tia

14, 15. Mea nafea to Iesu faaiteraa e te farii ra oia i te mau otia o to ’na iho mana, e no te aha te reira e riro ai ei mea haamahanahana?

14 Aita noa Iesu i haapii no nia i te aroha. Ua ora oia ia au i “te ture a te Mesia.” Ua ite-roa-hia te reira i roto i to ’na oraraa. E rave ana‘e e toru ravea i faataa ’i te hi‘oraa o Iesu eaha te parau-tia.

15 A tahi, ua ape maitai Iesu i te rave i te tahi noa ’‘e parau-tia ore. Ua tapao paha outou e e tupu te mau parau-tia ore e rave rahi ia teoteohia te mau taata tia ore e ia faatura ore ratou i te mau otia tano o to ratou mana. Aita Iesu i na reira. I te hoê taime, ua haafatata ’tu te hoê taata ia Iesu e ua parau atu e: “E te orometua, parau na oe i tau tuaana, e tufa oia i ta mâua tao‘a.” Eaha te pahonoraa a Iesu? “E tera ra taata e, na vai au i faariro ei tufa tao‘a, ei auvaha i ǒ outou nei?” (Luka 12:13, 14) E ere anei tera i te mea faahiahia? Ua hau a‘e te maramarama o Iesu, to ’na haroaroaraa, e tae noa ’tu te faito mana ta te Atua i horoa no ’na, i to te taata atoa i te fenua nei; ua patoi râ oia i te faaô atu i roto i teie ohipa, aita hoi oia i haamanahia no te reira. Ua na reira noa iho â Iesu i te riroraa ei taata haehaa, tae noa ’tu i te roaraa o te mau mireniuma o to ’na oraraa hou a riro ai ei taata. (Iuda 9) Te faaite ra te mea e e tiaturi Iesu ma te haehaa e na Iehova e faataa eaha te mea tia, i te hoê huru maitai popou e te au mau to ’na.

16, 17. (a) Mea nafea to Iesu faaohiparaa i te parau-tia i roto i te pororaa i te parau apî maitai o te Basileia o te Atua? (b) Mea nafea to Iesu faaiteraa e mea aroha hamani maitai to ’na mana‘o i te parau-tia?

16 A piti, ua faaohipa oia i te parau-tia na roto i te huru i poro ai oia i te parau apî maitai o te Basileia o te Atua. Aita oia i faatia pae tahi. Ua tamata râ oia ma te haapao maitai i te paraparau i te mau huru taata atoa, te mea tao‘a rahi anei aore ra te mea veve. I te tahi roa ’‘e pae, i faataa ê na te mau Pharisea i te feia veve, te feia haehaa e i tuu na ratou i te ta‘o vahavaha ra ʽam-ha·ʼaʹrets, aore ra “feia o te fenua” i nia ia ratou. Ua patoi Iesu i taua parau-tia ore ra ma te mǎta‘u ore. Ia haapii oia i te parau apî maitai i te taata—aore ra, ia au ana‘e i taua tumu  parau ra, ia tamaa oia e te taata, ia faatamaa oia ia ratou, ia faaora oia ia ratou, aore ra ia faatia faahou mai oia ia ratou—e paturu oia i te parau-tia a te Atua o te hinaaro ia paraparauhia “te taata atoa.” *Timoteo 1, 2:4.

17 A toru, mea aroha hamani maitai roa te mana‘o o Iesu i te parau-tia. Ua haa puai oia i te tauturu i te feia hara. (Mataio 9:11-13) Ua tauturu haere noa oia i te taata aita to ratou e mana no te paruru ia ratou iho. Ei hi‘oraa, aita Iesu i pee i te mau aratai haapaoraa i te faaitoitoraa i te mana‘o ino i te mau Etene atoa. Ua tauturu e ua haapii oia ma te aroha hamani maitai i te tahi o ratou, noa ’tu e ua tono-na-mua-hia oia i te nunaa ati Iuda ra. Ua farii oia e rave i te hoê faaoraraa semeio na te hoê faehau toroa a te nuu Roma, a na ô ai e: “Aitâ vau i ite i teie faaroo i te rahi i Iseraela atoa nei.”—Mataio 8:5-13.

18, 19. (a) Mea nafea to Iesu patururaa i te tura o te mau vahine? (b) E nafea te hi‘oraa o Iesu e tauturu mai ai ia ite i te taairaa i rotopu i te mǎta‘u ore e te parau-tia?

18 Aita atoa Iesu i paturu i te mau mana‘o no taua tau ra no nia i te mau vahine. Ua rave râ oia ma te mǎta‘u ore i te mea tia. I tiaturihia na e hoê â viiviiraa to te mau vahine no Samaria e to te mau Etene. Aita râ Iesu i haamarirau i te poro atu i te hoê vahine no Samaria i te apoo pape no Sikara. Oia mau, i taua vahine ra na mua to Iesu faaite-maitai-raa ia ’na iho mai te Mesia i tǎpǔhia. (Ioane 4:6, 25, 26) I parau na te mau Pharisea e eiaha te Ture a te Atua ia haapiihia ’tu i te mau vahine, ua rave râ Iesu i te taime e te ito rahi no te haapii i te mau vahine. (Luka 10:38-42) E a parauhia ’i e eita e nehenehe e tiaturi i te mau vahine no te horoa i te faaiteraa parau mau, ua haamaitai Iesu i te tahi mau vahine i te fana‘oraa taa ê e riro ei feia matamua tei ite ia ’na i muri a‘e i to ’na tia-faahou-raa. Ua  parau atoa oia ia ratou e haere e faaite i ta ’na mau pǐpǐ tane no nia i teie ohipa faufaa roa ’‘e!—Mataio 28:1-10.

19 Oia, ua faataa Iesu i te mau nunaa eaha te parau-tia. I roto i te mau tupuraa e rave rahi, ua na reira oia ma te faaû rahi i te ati. Te tauturu maira te hi‘oraa o Iesu ia ite tatou e e titauhia te mǎta‘u ore no te paturu i te parau-tia mau. Ma te tano, ua parauhia oia “te Liona o te opu o Iuda.” (Apokalupo 5:5) A haamana‘o e e taipe te liona no te parau-tia mǎta‘u ore. E fatata roa râ Iesu i te hopoi mai i te parau-tia rahi atu â. Na roto i te mau auraa atoa, e haamau oia i “te parau-tia i te fenua nei.”—Isaia 42:4.

E ‘haamau’ te Arii e Mesia i “te parau-tia i te fenua nei”

20, 21. I to tatou nei tau, mea nafea to te Arii e Mesia patururaa i te parau-tia na te ao nei e i roto i te amuiraa Kerisetiano?

20 Mai to ’na riroraa mai ei Arii e Mesia i te matahiti 1914 ra, ua paturu Iesu i te parau-tia i te fenua nei. Nafea? Ua amo oia i ta ’na hopoia e faatupu i ta ’na parau tohu e vai ra i roto i te Mataio 24:14. Ua haapii te mau pǐpǐ a Iesu i te ao nei i te taata no te mau fenua atoa, i te parau mau no nia i te Basileia o Iehova. Mai ia Iesu, ua poro ratou ma te faatia pae tahi ore e te tia, a tutava ’i i te horoa i te taata atoa—te apî e te paari, te tao‘a rahi e te veve, te tane e te vahine—i te ravea e ite ai ia Iehova, te Atua parau-tia.

21 Te paturu atoa ra Iesu i te parau-tia i roto i te amuiraa Kerisetiano o oia hoi te Upoo. Mai tei tohuhia, te horoa ra oia i “te mau ô taata,” te mau matahiapo Kerisetiano haapao maitai o te aratai i te amuiraa. (Ephesia 4:8-12, MN) I roto i te tiaauraa i te nǎnǎ faahiahia a te Atua, e pee taua mau taata ra i te hi‘oraa o Iesu Mesia i te patururaa i te parau-tia. E haamana‘o noa ratou e te hinaaro ra Iesu ia haahia i nia i ta ’na mau mamoe ma te tia—noa ’tu eaha to ratou tiaraa, aore ra to ratou huru i te pae materia.

22. Eaha to Iehova mana‘o i te mau parau-tia ore i parare roa a te ao no teie tau, e ua faataa oia i ta ’na Tamaiti no te rave i te aha?

22 E fatata roa râ Iesu i te haamau i te parau-tia i nia i te fenua  mai tei ore i itehia a‘enei. Ua parare roa te parau-tia ore i roto i teie nei ao pi‘o. Te tamarii atoa e pohe i te poia, e taata ati ïa no te hoê parau-tia ore aita e otoheraa, ia feruri iho â râ tatou i te moni e pûpû-rahi-hia ra no te hamaniraa mauhaa tama‘i e te haamâharaa i te mau hinaaro o te feia miimii o te nounou i te mau peu navenave. To roto te poheraa ma te faufaa ore o te mau mirioni taata i te mau matahiti atoa, i te mau parau-tia ore huru rau o te faatupu paatoa i te riri tia o Iehova. Ua faataa oia i ta ’na Tamaiti no te faatupu i te hoê tama‘i tia i nia i teie faanahoraa ino taatoa o te mau mea no te faahope i te parau-tia ore atoa e a muri noa ’tu.—Apokalupo 16:14, 16; 19:11-15.

23. I muri a‘e i Aramagedo, e nafea te Mesia ia paturu i te parau-tia e a muri noa ’tu?

23 Eita noa râ te parau-tia a Iehova e titau i te haamouraa i te feia iino. Ua faataa atoa oia i ta ’na Tamaiti no te faatere ei “Arii no te hau.” I muri a‘e i te tama‘i o Aramagedo, e haamau te faatereraa a Iesu i te hau na te fenua atoa, e e faatere oia ‘ma te parau-tia.’ (Isaia 9:6, 7) I reira Iesu e oaoa ’i i te faaore i te mau parau-tia ore atoa tei faatupu i te oto e te mauiui rahi i te ao nei. E paturu oia i te parau-tia tia roa a Iehova ma te haapao maitai e a muri noa ’tu. Mea faufaa roa ïa ia imi tatou i te pee i te parau-tia a Iehova i teie nei. E hi‘o ana‘e e nafea tatou e rave ai i te reira.

^ par. 1 Ia faaite oia i te riri tia, ua riro Iesu mai ia Iehova, o te “faau‘ana rahi” i nia i te ino atoa. (Nahuma 1:2) Ei hi‘oraa, i muri a‘e i to Iehova parauraa i to ’na nunaa etaeta e ua faariro ratou i to ’na fare “ei ana eiâ,” ua na ô oia e: ‘Te niniihia ra tau riri, e tau tahoo i nia iho i teie nei vahi.’—Ieremia 7:11, 20.

^ par. 3 Ia au i te Mishna, ua hiti mai te hoê autâ tau matahiti i muri a‘e no nia i te moni rahi o te mau uuairao i hoohia i te hiero. Ua faatopa-oioi-hia te moni i te faito fatata e 99 %! O vai tei fana‘o rahi roa ’‘e i teie tapihooraa hoona roa? Te mana‘o ra te tahi feia tuatapapa e o te utuafare o te Tahu‘a Rahi ra o Ana te fatu o te mau hoohooraa i te hiero e no reira mai te rahiraa o te tao‘a rahi roa a taua utuafare tahu‘a ra.—Ioane 18:13.

^ par. 16 I tiaturi na te mau Pharisea e ua ‘faainohia’ te feia haehaa tei ite ore i te Ture. (Ioane 7:49) I parau na ratou eiaha te hoê ia haapii i taua huru taata ra, ia rave i te tapihooraa, ia tamaa, e ia pure e o ratou. E faaipoipo i ta ’na tamahine i te hoê o ratou, mea ino a‘e ïa i te tuuraa ia ’na i mua i te mau animara taehae. Ia ratou, eita e au i taua feia haehaa ra te tia-faahou-raa.

No te ite atu â

Ta te Basileia i rave i na 100 matahiti faatereraa

Nafea ia faufaahia i te faatereraa o te Basileia? Hi‘o nafea te Arii Mesia e tamâ, e haapii e e faanaho ai i ta ’na mau pǐpǐ.