Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 19

‘Te paari o te Atua i te parau aro mo‘a ra’

‘Te paari o te Atua i te parau aro mo‘a ra’

1, 2. Eaha ‘te parau aro mo‘a’ e tia ia tatou ia anaanatae atu, e no te aha?

TE MAU parau aro! No te mea mea maere, mea faahiahia, e mea taa ê te reira, e pinepine te taata i te fifi i te tapea i te reira. Te na ô ra râ te Bibilia e: “Hanahana te Atua ia tapo‘i i te parau.” (Maseli 25:2) Oia, ei Arii Rahi e ei Atua Poiete, e tiaraa to Iehova e tapea i te tahi mau parau aro e ia tae roa i te taime e tano ai ia heheu atu na te taata.

2 Teie râ, te vai ra te hoê parau aro faahiahia e te maere ta Iehova i heheu i roto i ta ’na Parau. Ua parauhia te reira ‘te parau aro [mo‘a] o to te Atua hinaaro.’ (Ephesia 1:9; MN) E nehenehe te haapiiraa i te reira e rave hau atu i te haamâha-noa-raa i to outou anoenoe. E nehenehe te iteraa i teie parau aro e aratai ia outou i te faaoraraa ra e, maoti te reira e haroaroa rii ai outou i te paari faito ore o Iehova.

Te parau aro mo‘a i te heheu-riirii-raahia

3, 4. Mea nafea to te parau tohu i papaihia i roto i te Genese 3:15 horoaraa i te tiaturiraa, e eaha te ‘parau aro mo‘a’ ta te reira e puohu?

3 I to Adamu e o Eva hararaa, e au ra paha e ua faaorehia te opuaraa a Iehova e faaî i te hoê paradaiso fenua i te taata tia roa. Ua haapao oioi râ te Atua i te fifi. Ua na ô oia e: “E tuu hoi au i te au ore e riri ai ra ia orua o te vahine, e to [huero], e to ’na ra [huero]; na ’na e haaparuparu i to afii, e na oe e haaparuparu i to ’na poro avae.”—Genese 3:15MN.

4 Mea maere e te aro teie mau parau. O vai taua vahine ra? O vai te ophi? O vai te “huero” o te haaparuparu i te afii o te ophi? I nehenehe noa na ta Adamu e o Eva e hamani i te mana‘o. Teie râ, ua horoa te mau parau a te Atua i te tiaturiraa no te huaai haapao maitai atoa o taua na taata taiva ra. E  upootia mai te parau-tia. E faatupuhia te opuaraa a Iehova. E nafea râ ïa? E parau aro ïa te reira! Te parau ra te Bibilia i te reira ‘te paari o te Atua i te parau aro [mo‘a] ra, o tei hunahia ra.’—Korinetia 1, 2:7MN.

5. A horoa na i te hi‘oraa no nia i te tumu i heheu riirii ai Iehova i ta ’na parau aro.

5 Ei ‘Faaite i te parau moe,’ e heheu Iehova i te pae hopea i te mau parau rii tano maitai no nia i te tupuraa o teie parau aro. (Daniela 2:28) E rave riirii râ oia i te reira. Ei hi‘oraa, e feruri ana‘e i te ravea e pahono ai te hoê metua tane î i te here ia ui mai ta ’na tamaiti iti e, “Papa, nohea mai au?” E faaite noa te hoê metua tane paari i te parau e taa i taua tamaiti iti ra. Ia paari rii mai te tamaiti ra, e haapii hau atu â te metua tane ia ’na. Na reira atoa, e faataa Iehova afea to ’na nunaa e ineine ai i te farii i te mau heheuraa i to ’na hinaaro e ta ’na opuaraa.—Maseli 4:18; Daniela 12:4.

6. (a) Eaha te fa o te hoê faufaa, aore ra parau faaau? (b) No te aha e riro ai ei mea faahiahia e ua faaau Iehova i te mau faufaa e te taata?

6 Mea nafea to Iehova raveraa i taua mau heheuraa ra? Ua faaohipa oia i te hoê anairaa faufaa, aore ra parau faaau, no te heheu i te rahiraa. Peneia‘e ua ô a‘ena outou i te hoê taime i roto i te hoê huru parau faaau—peneia‘e no te hoo mai i te hoê fare aore ra no te tarahu aore ra no te horoa tarahu i te moni. Ua riro taua parau faaau ra ei haapapuraa au i te ture e e faaturahia te mau parau i fariihia. No te aha râ hoi Iehova i hinaaro ai e haamau i te mau faufaa taa maitai, aore ra parau faaau, e te taata? Papu maitai, e navai noa ta ’na parau ei haapapuraa i ta ’na mau parau tǎpǔ. E parau mau te reira, teie râ, i te tahi mau taime, ua paturu te Atua ma te maitai i ta ’na parau i te mau parau faaau e au i te ture. E horoa mai teie mau haapapuraa fati ore i te niu paari atu â e tiaturi ai tatou, te taata tia ore, i te mau parau tǎpǔ a Iehova.—Hebera 6:16-18.

 Te faufaa e o Aberahama

7, 8. (a) Eaha te faufaa ta Iehova i faaau e o Aberahama, e nafea te reira i te haamaramaramaraa i te parau aro mo‘a? (b) Mea nafea to Iehova taotia-riirii-raa i te hui tupuna e aratai atu i te Huero i tǎpǔhia ra?

7 Hau atu i te piti tausani matahiti i muri a‘e i to te taata tiavaruraahia i rapae i te Paradaiso, ua parau Iehova i ta ’na tavini haapao maitai ra o Aberahama e: “E faarahi au i to huaai; mai te fetia o te ra‘i ra . . . e e maitai te mau fenua atoa o te ao nei i to oe na huaai; o oe i faaroo mai i tau reo nei.” (Genese 22:17, 18) Ua hau atu te reira i te hoê parau fafau; ua faahiti Iehova i te reira mai te hoê faufaa e au i te ture e ua paturu atu i ta ’na parau tǎpǔ fati ore. (Genese 17:1, 2; Hebera 6:13-15) Auê te faahiahia e ua faaau mau te Fatu e Arii e haamaitai i te huitaata!

“E faarahi au i to huaai; mai te fetia o te ra‘i ra”

8 Ua faaite te faufaa a Aberahama e e haere mai te Huero i tǎpǔhia ei taata, no te mea e riro oia ei huaai o Aberahama. O vai râ ïa tera? I muri a‘e, ua faaite Iehova e, i roto i te mau tamaiti a Aberahama, o Isaaka te hoê tupuna o te Huero. I roto i na tamaiti a Isaaka, o Iakoba tei maitihia. (Genese 21:12; 28:13, 14) I muri a‘e, ua faahiti Iakoba i teie parau tohu no te hoê o ta ’na na tamaiti 12: “E ore roa Iuda e ere i te sepeta, e to ’na huaai i te haava, e tae noa mai te Silo [“O oia te fatu”] ra; e amui mai ia ’na ra to te mau fenua ê.” (Genese 49:10) I reira te iteraahia e e riro te Huero ei arii, o te hoê ïa huaai o Iuda!

Te faufaa e o Iseraela

9, 10. (a) Eaha te faufaa ta Iehova i faaau e te nunaa o Iseraela, e mea nafea te faufaa i te riroraa ei paruru? (b) Mea nafea to te Ture haapapuraa e mea hinaaro na te huitaata te hoê hoo?

9 I te matahiti 1513 H.T.T. ra, ua rave Iehova i te hoê faanahoraa o te haamarari i te e‘a no te tahi atu â mau heheuraa no nia i te parau aro mo‘a. Ua faaau oia i te hoê faufaa e te mau huaai o Aberahama, te nunaa o Iseraela. Noa ’tu e aita te reira e ohipa faahou ra, ua riro taua Ture a Mose ra ei tuhaa faufaa roa o te opuaraa a Iehova e hopoi mai i te Huero i  tǎpǔhia. E nafea hoi? E rave ana‘e e toru ravea. A tahi, ua riro te Ture mai te hoê patu parururaa. (Ephesia 2:14) Ua ohipa ta ’na mau ture tia mai te hoê patu i rotopu i te ati Iuda e te Etene. Ua tauturu ïa te Ture i te paruru i te hui tupuna o te Huero i tǎpǔhia. Auaa taua paruru ra, te vai noa râ te nunaa i te taeraa mai te taime faataahia e te Atua i fanauhia ’i te Mesia i roto i te opu o Iuda.

10 A piti, ua haapapu maitai te Ture e mea hinaaro na te huitaata te hoê hoo. Ei Ture tia roa, ua faaite te reira i te ravea ore a te taata hara i te pee maite atu. Ua tuuhia mai ïa “no te [faaite i te] hara, e ia tae mai te [huero] no ’na taua parau i parauhia maira.” (Galatia 3:19; MN) Na roto i te mau tusia animara, ua horoa te Ture i te taraehara taime poto. I te mea râ e, mai ta Paulo i papai, “eita roa . . . e tia i te toto puaatoro e te puaaniho ia faaore i te hara,” ua riro noa teie mau tusia ei ata no te tusia taraehara a te Mesia. (Hebera 10:1-4) No reira, no te mau ati Iuda haapao maitai, ua riro te faufaa ei “orometua e aratai . . . i te Mesia ra.”—Galatia 3:24.

11. Eaha te tiaturiraa hanahana ta te faufaa o te Ture i pûpû na Iseraela, no te aha râ taua nunaa ra i ere ai i te reira?

11 A toru, ua pûpû taua faufaa ra i te hoê tiaturiraa hanahana na te nunaa Iseraela. Ua parau Iehova ia ratou e ia ore ratou e ofati i te faufaa, e riro ratou ei ‘basileia tahu‘a e ei nunaa mo‘a.’ (Exodo 19:5, 6) I te pae hopea, ua horoa mai iho â te Iseraela pae tino i te mau melo matamua o te hoê basileia tahu‘a i te ra‘i. Ei nunaa râ, ua orure Iseraela i te faufaa o te Ture, ua patoi i te Huero e Mesia, e ua ere i taua tiaturiraa ra. Na vai ïa e faatia i te basileia tahu‘a? E e nafea taua nunaa haamaitaihia ra e taaihia ’i i te Huero i tǎpǔhia? E heheuhia taua mau tuhaa ra o te parau aro mo‘a i te taime i faataahia e te Atua.

Te faufaa o te Basileia a Davida

12. Eaha te faufaa ta Iehova i faaau e o Davida, e mea nafea to te reira haamaramaramaraa i te parau aro mo‘a a te Atua?

12 I te senekele 11 H.T.T., ua haamaramarama hau atu â  Iehova i te parau aro mo‘a i to ’na faaauraa i te tahi atu faufaa. Ua tǎpǔ oia i te arii haapao maitai ra o Davida e: ‘E faatia vau i to oe ra huaai i muri a‘e ia oe ra, na ’u e haamau i to ’na ra hau. Na ’u e haamau i to ’na terono i to ’na ra basileia e a muri noa ’tu.’ (Samuela 2, 7:12, 13; Salamo 89:3) I teie nei, ua taotiahia te hui tupuna o te Huero i tǎpǔhia i nia i te fare o Davida. E nehenehe anei râ te hoê taata au noa e faatere “e a muri noa ’tu”? (Salamo 89:20, 29, 34-36) E e nehenehe anei taua arii taata ra e faaora i te huitaata i te hara e te pohe?

13, 14. (a) Ia au i te Salamo 110, eaha te parau ta Iehova i tǎpǔ i ta ’na Arii faatavaihia? (b) Eaha te mau heheuraa hau no nia i te Huero e tae maira i horoahia na roto i te mau peropheta a Iehova?

13 Ma te faauruahia, ua papai Davida e: “Ua parau atura Iehova i tau Fatu, E parahi oe i tau rima atau nei; e ia faarirohia e au to mau enemi ei taahiraa avae no oe. Ua tǎpǔ Iehova, e ore e tatarahapa: E tahu‘a oe e a muri noa ’tu, ia au i te parau ia Melekisedeka.” (Salamo 110:1, 4) E au roa ’tu te mau parau a Davida i te Huero i tǎpǔhia, aore ra te Mesia. (Ohipa 2:35, 36) E faatere mai teie Arii, eiaha mai Ierusalema mai, mai nia mai râ i te ra‘i i te “rima atau” o Iehova. E noaa ia ’na te mana eiaha noa i nia i te fenua o Iseraela, i nia râ i te fenua taatoa. (Salamo 2:6-8) Te faaitehia ra ïa te tahi parau hau i ǒ nei. A tapao na e ua faahiti Iehova i te parau tǎpǔ hanahana e e riro te Mesia ei “tahu‘a . . . ia au i te parau ia Melekisedeka.” Mai ia Melekisedeka, tei tavini ei arii e tahu‘a i te tau o Aberahama, e faatoroahia te Huero e tae maira e te Atua iho no te tavini ei Arii e ei Tahu‘a!—Genese 14:17-20.

14 I te roaraa o te mau matahiti, ua faaohipa Iehova i ta ’na mau peropheta no te horoa i te mau heheuraa hau no nia i ta ’na parau aro mo‘a. Ua faaite Isaia, ei hi‘oraa, e e pohe te Huero i te pohe tusia. (Isaia 53:3-12) Ua tohu Mika i te vahi e fanauhia ’i te Mesia. (Mika 5:2) Ua faaite atea atoa Daniela i te taime mau e tae mai ai e e pohe ai te Huero.—Daniela 9:24-27.

 Heheuhia te parau aro mo‘a!

15, 16. (a) Mea nafea to te Tamaiti a Iehova ‘fanauraahia e te vahine’? (b) Eaha tei roaa ia Iesu i to ’na mau metua taata ra, e afea to ’na taeraa mai ei Huero i tǎpǔhia?

15 E nafea teie mau parau tohu e tupu ai, ua vai noa ïa ei parau aro e ia tae mau mai te Huero. Te na ô ra te Galatia 4:4 e: “Ia tae roa a‘enei râ i te tau mau ra, ua tono maira te Atua i ta ’na Tamaiti na te vahine i fanau.” I te matahiti 2 H.T.T., ua parau te hoê melahi i te hoê paretenia ati Iuda o Maria te i‘oa e: “Inaha, e tô oe, e fanau ta oe tamaiti, e na oe e mairi i te i‘oa ia Iesu. E rahi oia, e e parauhia i te Tamaiti na te Teitei: e na te Fatu ra na te Atua e horoa mai i te terono o to ’na ra metua o Davida no ’na . . . E pou mai te [varua mo‘a] i nia iho ia oe, e na te mana o te Teitei e tamaru i nia iho ia oe, e parauhia ’i hoi tena na tamaiti mo‘a, o te Tamaiti na te Atua.”—Luka 1:31, 32, 35MN.

16 I muri a‘e, ua tuu Iehova i te ora o ta ’na Tamaiti mai nia i te ra‘i e i roto atu i te opu o Maria, ia fanauhia ïa oia e te hoê vahine. E vahine tia ore o Maria. Aita râ Iesu i raea i to ’na huru tia ore, e “Tamaiti na te Atua” hoi oia. I tauâ taime ra, ua horoa to ’na mau metua taata, ei huaai o Davida, i te mau tiaraa natura e te au i te ture o te hoê taata ai‘a o Davida, no ’Na. (Ohipa 13:22, 23) I to Iesu bapetizoraa i te matahiti 29 T.T., ua faatavai Iehova ia ’na i te varua mo‘a e ua parau e: “Tau Tamaiti here teie.” (Mataio 3:16, 17) I te pae hopea, ua tae mai te Huero! (Galatia 3:16) Ua tae te taime no te heheu hau atu â no nia i te parau aro mo‘a.—Timoteo 2, 1:10.

17. Mea nafea te haamaramaramaraahia te auraa o te Genese 3:15?

17 I roto i ta ’na taviniraa, ua faataa Iesu e o Satani te ophi o te Genese 3:15 e o te feia e pee ia Satani te huero o te ophi. (Mataio 23:33; Ioane 8:44) I muri a‘e, ua heheuhia e nafea ratou paatoa e haamouhia ’i e a muri noa ’tu. (Apokalupo 20:1-3, 10, 15) E ua faaitehia te vahine mai te “Ierusalema no nia,” te faanahonahoraa o te mau varua poietehia a Iehova i  nia i te ra‘i e au i te vahine. *Galatia 4:26; Apokalupo 12:1-6.

Te faufaa apî

18. Ua opuahia “te faufaa apî” no te aha?

18 Peneia‘e ua tupu te heheuraa putapû roa ’‘e i te ahiahi hou te poheraa o Iesu i to ’na paraparauraa i ta ’na mau pǐpǐ haapao maitai no nia i “te faufaa apî.” (Luka 22:20) Mai to mua ’tu, oia te Ture a Mose, ua opuahia teie faufaa apî e ia noaa mai te hoê “basileia tahu‘a.” (Exodo 19:6; Petero 1, 2:9) E haamau râ teie faufaa, eiaha i te hoê nunaa pae tino, i te hoê râ nunaa pae varua, ‘te Iseraela o te Atua,’ o te mau pǐpǐ faatavaihia haapao maitai a te Mesia ana‘e to roto. (Galatia 6:16) E haamaitai atoa teie feia apiti i roto i te faufaa apî, i te huitaata e o Iesu!

19. (a) No te aha te faufaa apî e manuïa ’i i te horoa mai i te hoê “basileia tahu‘a”? (b) No te aha te mau Kerisetiano faatavaihia e parauhia ’i e “mea poiete-apî-hia,” e ehia rahiraa e tavini e te Mesia i nia i te ra‘i?

19 No te aha râ te faufaa apî e manuïa ’i i te horoa mai i te hoê “basileia tahu‘a” no te haamaitai i te huitaata? No te mea eita te reira e faahapa i te mau pǐpǐ a te Mesia ei feia hara, e faatia râ i te faaoreraa i ta ratou mau hara na roto i ta ’na tusia. (Ieremia 31:31-34) Ua noaa ana‘e ia ratou te tiaraa taata parau-tia i mua ia Iehova, e faariro oia ia ratou ei tamarii na ’na i roto i to ’na utuafare i te ra‘i e e faatavai ia ratou i te varua mo‘a. (Roma 8:15-17; Korinetia 2, 1:21) I reira ratou e ite ai i “te fanau-faahou-raa no te hoê tiaturiraa ora” “tei vaiihohia i nia i te ra‘i.” (Petero 1, 1:3, 4; MN) I te mea e mea apî roa taua tiaraa teitei ra no te taata, e parauhia te mau Kerisetiano faatavaihia e fanauhia i te varua e “mea poiete-apî-hia.” (Korinetia 2,  5:17, MN) Te faaite ra te Bibilia e 144 000 taata te apiti i te pae hopea i roto i te faatereraa mai nia mai i te ra‘i i te huitaata i hoo-faahou-hia mai.—Apokalupo 5:9, 10; 14:1-4.

20. (a) Eaha te heheuraa no nia i te parau aro mo‘a i ravehia i te matahiti 36 T.T.? (b) O vai te fana‘o i te mau haamaitairaa i tǎpǔhia ia Aberahama?

20 E riro teie feia faatavaihia e o Iesu atoa ei “[huero] no Aberahama.” * (Galatia 3:29; MN) E mau ati Iuda pae tino te feia matamua i maitihia. I te matahiti 36 T.T. râ, ua heheuhia te tahi atu tuhaa o te parau aro mo‘a: e fana‘o atoa te mau Etene, te mau taata e ere i te ati Iuda, i te tiaturiraa e haere i te ra‘i. (Roma 9:6-8; 11:25, 26; Ephesia 3:5, 6) O te mau Kerisetiano faatavaihia noa anei te fana‘o i te mau haamaitairaa tǎpǔhia ia Aberahama? Eita, e faufaahia te ao taatoa i te tusia a Iesu. (Ioane 1, 2:2) I muri a‘e, ua faaite Iehova e e “feia rahi roa” te ora ’tu i te hopea o te faanahoraa o te mau mea a Satani. (Apokalupo 7:9, 14) Mea rahi atu â o te faatia-faahou-hia ma te tiaturiraa e ora e a muri noa ’tu i roto i te Paradaiso!—Luka 23:43; Ioane 5:28, 29; Apokalupo 20:11-15; 21:3, 4.

Te paari o te Atua e te parau aro mo‘a

21, 22. E nafea te parau aro mo‘a a Iehova e faaite ai i to ’na paari?

21 Ua riro te parau aro mo‘a ei faaiteraa maere o “te paari huru rau o te Atua.” (Ephesia 3:8-10) Auê ïa paari ta Iehova i faaite i to ’na faahitiraa i teie parau aro mo‘a, e i to ’na heheu-riirii-raa i te reira i muri a‘e e! Ma te paari, ua haapao maitai oia i te mau taotiaraa o te taata, a vaiiho ai e ia faaite ratou i te huru mau o to ratou aau.—Salamo 103:14.

22 Ua faaite atoa Iehova i te paari faito ore i to ’na maitiraa  ia Iesu ei Arii. Mea tia a‘e te Tamaiti a Iehova ia tiaturihia i te tahi atu mea ora atoa i roto i te ao taatoa. I to ’na oraraa ei taata tino toto e te i‘o, ua faaû Iesu e rave rahi huru ati. Mea taa maitai roa ia ’na te mau fifi o te taata. (Hebera 5:7-9) E te mau faatere apiti a Iesu? I te roaraa o te mau senekele, ua faatavaihia te mau tane e te mau vahine tei maitihia i roto i te mau nunaa, mau reo e mau ta‘ere atoa. Aita iho â ïa e fifi aita teie mau taata i faaû e i faaruru. (Ephesia 4:22-24) Mea au mau ia ora ma te faaterehia e teie mau arii e tahu‘a î i te aroha hamani maitai!

23. Eaha te fana‘oraa taa ê a te mau Kerisetiano no nia i te parau aro mo‘a a Iehova?

23 Ua papai te aposetolo Paulo e: ‘Te parau aro [mo‘a] itea ore i te mau anotau i mutaa ihora, ua faaitehia mai ïa i teie nei i te feia mo‘a no ’na ra.’ (Kolosa 1:26; MN) Oia, ua taa i te feia mo‘a faatavaihia o Iehova te mau mea e rave rahi no nia i te parau aro mo‘a, e ua horoa atoa ratou i taua ite ra i te mau mirioni taata. E fana‘oraa taa ê mau ta tatou paatoa! “Ua faaite mai” Iehova “ia tatou i te parau aro [mo‘a] ra o to ’na ra hinaaro.” (Ephesia 1:9; MN) E faaite ana‘e i teie parau aro faahiahia ia vetahi ê, a tauturu ai ia ratou ia haroaroa atoa i te paari faito ore o te Atua ra o Iehova!

^ par. 17 Ua heheu-atoa-hia ‘te parau moe [mo‘a] o te paieti’ na roto ia Iesu. (Timoteo 1, 3:16; MN) E tia anei i te tahi taata ia tapea ma te tia roa i te taiva ore ia Iehova, mea maoro ïa te reira i te riroraa ei parau huna, ei parau aro. Ua faaite Iesu i te pahonoraa. Ua tapea oia i te taiva ore i roto i te mau tamataraa atoa ta Satani i tuu i nia ia ’na.—Mataio 4:1-11; 27:26-50.

^ par. 20 Ua faaau atoa Iesu i “te hoê faufaa . . . no te hoê basileia” e tauâ pǔpǔ taata ra. (Luka 22:29, 30, MN) Oia mau, ua faaau Iesu i te parau e teie “nǎnǎ iti” e ia faatere ratou e oia i nia i te ra‘i ei tuhaa piti o te huero o Aberahama.—Luka 12:32.