Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 17

“Auê te rahi hau ê atu o te paari . . . o te Atua e!”

“Auê te rahi hau ê atu o te paari . . . o te Atua e!”

1, 2. Eaha te opuaraa a Iehova no te hitu o te mahana, e mea nafea te paari o te Atua i te tamataraahia i te omuaraa o taua mahana ra?

UA INO roa! Ua topa taue te taata, te ohipa faahiahia roa ’‘e i oti mai i te ono o te mahana poieteraa, mai te teiteiraa e i raro roa ino. Ua parau Iehova e “mea maitai roa” “te mau mea atoa ta ’na i hamani,” tae noa ’tu te taata. (Genese 1:31) I te omuaraa râ o te hitu o te mahana, ua maiti Adamu e o Eva e pee ia Satani i roto i ta ’na orureraa hau. Topa ’tura raua i roto i te hara, te huru tia ore, e te pohe.

2 E au ra e ua faatioihia te opuaraa a Iehova no te hitu o te mahana e aita e ravea faahou. Taua mahana ra, mai na mahana na mua ’tu e ono, e mau tausani ïa matahiti i te maoro. Ua haamo‘a Iehova i te reira, e i te pae hopea, e riro mai te fenua taatoa ei paradaiso o te î i te hoê fetii taata tia roa. (Genese 1:28; 2:3) I muri a‘e râ i te orureraa hau faatupu ati, e nafea ïa taua ohipa ra e tupu ai? Eaha ta te Atua e rave? Tera te hoê tamataraa huru faahiahia i te paari o Iehova—peneia‘e te tamataraa rahi roa ’‘e.

3, 4. (a) No te aha te mea ta Iehova i rave no te orureraa hau i Edene e riro ai ei hi‘oraa umerehia o to ’na paari? (b) Ia turai te haehaa ia tatou ia haamana‘o noa i teihea parau mau a faahohonu ai tatou i to Iehova paari?

3 Ua haa oioi roa Iehova. Ua faahiti oia i te utua a te mau orure hau i Edene, e i tauâ taime ra, ua horoa oia i te hi‘oraa o te tahi mea faahiahia no a muri a‘e: ta ’na opuaraa e faatitiaifaro i te mau fifi no faatupu-noa-hia a‘enei e ratou. (Genese 3:15) E tae roa te opuaraa atea a Iehova i mua roa ino mai Edene mai e na roto atu i te mau tausani matahiti o te tuatapaparaa o te taata. Mea nehenehe roa e te ohie, mea hohonu roa atoa râ, e e nehenehe ta te hoê taata taio Bibilia e rave i te  oraraa taatoa no te haapii e te feruriruri i te reira ma te hoona. Hau atu â, mea papu roa ino e e manuïa te opuaraa a Iehova. E faaorehia te ino atoa, te hara e te pohe. E arataihia te huitaata faaroo i te tia-roa-raa ra. E tupu teie mau mea atoa nei hou te hopea o te hitu o te mahana, ia tupu ia Iehova, noa ’tu te mau mea atoa, ta ’na opuaraa no te fenua e te huitaata i te taime tano mau!

4 E faatupu mau â teie paari i te faatura rahi, eita anei? Ua turaihia te aposetolo Paulo ia papai e: “Auê te rahi hau ê atu o te paari . . . o te Atua e!” (Roma 11:33) A rave ai tatou i te hoê faahohonuraa i te mau tuhaa rau o teie huru maitai o te Atua, ia turai te haehaa ia tatou ia haamana‘o noa i te hoê parau mau faufaa roa—oia hoi, i te faito maitai roa ’‘e, e nehenehe noa ta tatou e fafa rii i te paari rahi o Iehova. (Ioba 26:14) Na mua, e faataa ana‘e i teie huru maitai umerehia.

Eaha te paari o te Atua?

5, 6. Eaha te taairaa i rotopu i te ite e te paari, e mai te aha te rahi o te ite o Iehova?

5 E ere hoê â te paari e te ite. E nehenehe te mau matini roro uira e faaîhia i te puea ite iti rahi, mea fifi râ ia feruri e e parauhia e e paari to taua mau matini ra. Teie râ, ua taaihia te ite e te paari. (Maseli 10:14) Ei hi‘oraa, ia hinaaro outou i te a‘oraa paari no nia i te rapaauraa i te hoê ma‘i ino, e haere anei outou e hi‘o i te hoê taata aita i rahi te ite aore aita roa ’tu no nia i te rapaauraa? Eita paha ïa! Mea faufaa atoa ïa te ite mau no te paari mau.

6 E puea ite otia ore to Iehova. Ei “Arii hau mure ore,” o oia ana‘e tei ora noa na mai te tau e te tau mai â. (Apokalupo 15:3, MN) E i te roaraa o taua tau roa roa ino ra, ua ite maite noa oia i te mau mea atoa. Te na ô ra te Bibilia e: “Aore roa hoi e mea i moe ia ’na; te vai noa nei râ te mau mea atoa ma te maheu roa i mua i to ’na mata, to tei haava mai ia tatou nei.” (Hebera 4:13; Maseli 15:3) Ei Atua Poiete, e taa maitai roa ino ia Iehova te mau mea ta ’na i hamani, e ua hi‘opoa oia i te  ohipa atoa a te taata mai te omuaraa mai. E hi‘opoa oia i te mafatu o te taata atoa, aita e mea aita oia i ite. (Paraleipomeno 1, 28:9) No te mea ua poiete oia ia tatou ma te tiamâraa morare, e oaoa oia ia ite oia e te rave ra tatou i te maitiraa paari i roto i te oraraa. I te mea e o oia “tei faaroo i te pure,” mea rahi roa ta ’na e faaroo i te hoê haereraa! (Salamo 65:2) E aita e faufaa ia parau, e mehara tia roa to Iehova.

7, 8. E nafea Iehova e faaite ai i te maramarama, te haroaroaraa, e te paari?

7 E hau atu to Iehova i te ite noa. Ua ite atoa oia e nafea te mau mea e taai ai te tahi i te tahi e e taa ia ’na te hoho‘a hopea e oti mai i te mau mea rii e rave rahi roa. E faito e e haava oia, a faataa ê ai i te maitai e te ino, te mea faufaa e te mea faufaa ore. Hau atu â, e hi‘o oia i te hohonuraa e e hi‘opoa tia ’tu oia i te mafatu. (Samuela 1, 16:7) E maramarama e e haroaroaraa ïa to Iehova, mau huru maitatai e hau atu i te ite. Mea faufaa ’tu â râ te paari.

8 E titau te paari ia faaohipa i te ite, te haroaroaraa e te maramarama atoa no te hoê fa hinaarohia. Oia mau, te auraa mau o te tahi mau ta‘o tumu o te Bibilia tei hurihia ei “paari,” e “ohiparaa hotu maitai” ïa aore ra “paari o te ohipa.” E ere ïa to Iehova paari i te mea vaimana‘o noa. E ohipa râ e e manuïa. Ma te faaohipa i to ’na ite iti rahi e to ’na maramarama hope, e rave noa Iehova i te mau faaotiraa maitai roa ’‘e, a faatupu atu ai maoti te ohipa maitai roa ’‘e. Tera te paari mau! E faaite Iehova e e parau mau ta Iesu i parau: ‘E faatiahia te paari e ta ’na mau ohipa.’ (Mataio 11:19, MN) Te faaite hua ra te mau ohipa a Iehova na te ao taatoa i to ’na paari.

Mau haapapuraa o te paari o te Atua

9, 10. (a) E faaite Iehova i teihea huru paari, e mea nafea to ’na faaiteraa i te reira? (b) E nafea te tao‘a tahi ora e haapapu ai i te paari o Iehova?

9 Ua maere a‘ena anei outou i te aravihi o te hoê rimaî o te hamani i te mau tauihaa nehenehe o te ohipa maitai? E huru paari maere tera. (Exodo 31:1-3) O Iehova iho te tumu e te fatu  rahi roa ’‘e o taua paari ra. Ua parau te arii Davida no Iehova e: “E haamaitai au ia oe, ua taa ê hoi to ’u hamaniraahia: e mea maerehia ta oe mau ohipa, e Iehova, eita hoi e moe ia ’u.” (Salamo 139:14) Oia mau, ia rahi noa ’tu tatou i te haapii no nia i te tino taata, e rahi noa ’tu tatou i te umere i te paari o Iehova.

10 Ei hi‘oraa: Ua haamata outou ei tao‘a tahi ora—te hoê tao‘a tahi huero no roto mai i to outou mama, i faahotuhia e te hoê tatea no roto mai i to outou papa. Aita i maoro, ua haamata taua tao‘a tahi ra i te vahi e piti. Ia oti outou, fatata 100 000 miria tao‘a tahi ora to outou. Mea nainai roa te reira. Fatata 10 000 tao‘a tahi ora faito au noa e ô i roto i te hoê upoo pine. Teie râ, e ohipa maere roa e te fifi roa te tao‘a tahi. Mea ohipa rahi roa ’tu â i te mau matini aore ra te mau fare hamaniraa tauihaa atoa a te taata. Te parau ra te mau aivanaa e e au te hoê tao‘a tahi ora i te hoê oire patuhia—ma te mau uputa tiaihia, te hoê faanahoraa faurao, te hoê ravea ta‘ita‘iraa parau, te mau pu uira, te mau fare hamaniraa tauihaa, te mau faarueraa pehu e te mau faaapîraa pehu, te mau ravea parururaa, e tae noa ’tu mai te hoê pu faatereraa i roto i te pu. Hau atu â, e nehenehe ta te tao‘a tahi ora e hamani i te hoê hoho‘a tia roa no ’na iho i roto noa tau hora!

11, 12. (a) Na te aha e faataa ê i te mau tao‘a tahi ora o te hoê tamarii e tupu ra i roto i te opu, e e nafea te reira e au ai e te Salamo 139:16? (b) E nafea te roro o te taata e faaite ai e ‘mea taa ê to tatou hamaniraahia’?

11 E ere iho â ïa hoê â ana‘e te mau tao‘a tahi ora atoa. A tamau noa ’i te mau tao‘a tahi ora i te vahi e piti, e rave te reira i te mau ohipa ê roa. E riro te tahi pae ei tao‘a tahi o te uaua uira; te tahi ei tao‘a tahi o te ivi, te uaua i‘o, te toto, aore ra o te mata. Ua tapurahia taua mau faataa-ê-raa atoa ra i roto i te “vairaa buka” o te mau tapao tupuna a te tao‘a tahi ora, te ADN. Ma te faahiahia, ua faauruahia Davida e parau ia Iehova e: “Ua ite to mata ia ’u i to ’u vai-oti-ore-raa ra; e ua oti to ’u mau melo atoa ra i te papaihia i roto i te buka na oe.”—Salamo 139:16.

12 Mea taa ê roa te tahi mau melo o te tino. E rave ana‘e ei  hi‘oraa, i te roro o te taata. Ua parau te tahi pae e o te ohipa taa ê roa ’‘e tera i itehia mai i roto i te ao taatoa. Fatata 100 miria tao‘a tahi o te uaua uira to roto—fatata hoê â rahiraa e te mau fetia i roto i to tatou haapueraa fetia. E mau tausani taairaa to teie mau tao‘a tahi taihoê e te tahi atu mau tao‘a tahi. Te na ô ra te mau aivanaa e e nehenehe te hoê roro taata e farii i te mau parau atoa e vai ra i roto i te mau vairaa buka atoa o te ao nei e eita e nehenehe mau e faito i to ’na ravea. Noa ’tu te mau ahuru matahiti faahohonuraa, te fa‘i ra te mau aivanaa e eita e taa maitai ia ratou e nafea teie melo i ‘taa ê i te hamaniraahia,’ ia ohipa.

13, 14. (a) E nafea te ro e te tahi atu mau animara e faaite ai e “e paari to ratou i te hamaniraahia,” e eaha ta te reira e haapii maira no nia i Tei poiete ia ratou? (b) No te aha tatou e nehenehe ai e parau e ua hamanihia te mau mea mai te puaverevere ma te “paari”?

13 Ua riro râ te taata ei hoê noa hi‘oraa o te paari o Iehova no te poiete. Te na ô ra te Salamo 104:24 e: “Aita te huru rau o ta oe ra ohipa, e Iehova! e mau ravea paari ana‘e â ta oe! Ua î te fenua nei i ta oe ra tao‘a.” E itehia te paari o Iehova i roto i te mau mea atoa i poietehia e e haaati ra ia tatou. Ei hi‘oraa, “e paari to” te ro ‘i to ’na hamaniraahia.’ (Maseli 30:24, MN) Oia mau, mea faanaho-maitai-roa-hia te mau ofaaraa ro. E tiai, e paruru, e e rave te tahi mau ofaaraa ro i te tahi mau manumanu parauhia pucerons ei maa na ratou mai te huru ra e e nǎnǎ animara tera. E rave te tahi atu mau ro i te ohipa faaapu, a haaputu ai e a faatupu ai i te mau “faaapu” rimu. Mea rahi atu â mau animara tei hamanihia no te rave i te mau mea taa ê ma te feruri ore. E rave te hoê ra‘o matauhia i te mau rereraa aravihi eita e noaa i te manureva maitai roa ’‘e a te taata ia pee. E tere te mau manu migrateurs ia au i te mau fetia, ia au i te reni o te puai o te auri ovahine o te fenua, aore ra ia au i te tahi huru tapura fenua no roto iho â ia ratou. Ua rave te mau aivanaa ihiora i te mau matahiti no te faahohonu i te haerea i tapurahia i roto i teie mau animara. Auê ïa te paari o te Atua Tapura e!

 14 Ua haapii rahi mai te mau aivanaa na roto i te paari o Iehova no te poiete. Te vai ra te hoê tuhaa ohipa aravihi, parauhia te chimie biomimétique, o te tamata i te hamani i te hoho‘a o te mau mea e vai ra i roto i te natura. Ei hi‘oraa, ua mataitai a‘ena paha outou ma te maere i te haviti o te hoê puaverevere. I te hoê râ îite, e tao‘a hamanihia faahiahia roa ino tera. Mea etaeta a‘e te hoê tuhaa o te tahi mau puaverevere hi‘oraa paruparu ia faaauhia i te faira, mea paari a‘e i te mau taura o te hoê ahu paruru ofai pupuhi. Mai te aha mau te paari? A feruri na i te hoê puaverevere e faarahihia i te faito o te hoê upe‘a e faaohipahia i nia i te hoê poti tai‘a. E nehenehe ta taua puaverevere ra e tapea i te hoê manureva uta taata e tere ra na te reva! Oia, ua hamani Iehova i taua mau mea atoa ra ma te “paari.”

Na vai i tapura i te mau mea i poietehia i te fenua nei e ei “paari to ratou i te hamaniraahia”?

Te paari i rapaeau i te fenua

15, 16. (a) E nafea te mau ra‘i î i te fetia ia haapapu i te paari o Iehova? (b) E nafea te tiaraa o Iehova ei Raatira rahi roa ’‘e o te mau melahi e rave rahi roa e haapapu ai i te paari o teie Tiaau?

15 Te itehia ra te paari o Iehova i roto i ta ’na mau ohipa na te ao taatoa. Aita te mau ra‘i î i te fetia, ta tatou i tauaparau ma te huru hohonu i roto i te pene 5, i faanaho-haere-noa-hia na te reva teitei. Maoti te paari o te mau “ture o te ra‘i” a Iehova, mea faanahohia te mau ra‘i ma te nehenehe ei haapueraa fetia naho maitai, amuihia te reira ei pûpâ haapueraa fetia o te tapirihia ei pûpâ rahi atu â. (Ioba 38:33) E ere i te mea maere ia faahiti Iehova i te mau mea o te ra‘i mai te hoê “nuu”! (Isaia 40:26) Te vai ra râ te tahi atu nuu o te haapapu ma te oraora ’tu â i te paari o Iehova.

16 Mai ta tatou i tapao i roto i te pene 4, ua mairihia te Atua i te i‘oa toroa ra “Iehova sabaota” no to ’na tiaraa Raatira rahi roa ’‘e o te hoê nuu rahi roa e mau hanere mirioni varua poietehia. E haapapuraa tera o te mana o Iehova. E nafea râ  ïa to ’na paari e ô atoa mai ai? A feruri na: eita Iehova e Iesu e faaea rii noa ’‘e. (Ioane 5:17) E na reira atoa iho â ïa te mau melahi o te tavini i Tei teitei roa ’‘e i te rave noa i te ohipa. E a haamana‘o e to nia ’‘e ratou i te taata, mea maramarama roa e mea mana roa ratou. (Hebera 1:7; 2:7) Ua faaohipa noa râ Iehova i taua mau melahi atoa ra, tei oaoa i te rave i te ohipa e mauruuru ai ratou—oia hoi e “haapao i ta ’na faaueraa” e e “rave i to ’na ra hinaaro”—e mau miria matahiti i te maoro. (Salamo 103:20, 21) Eaha râ ïa te paari o teie Tiaau i te umerehia!

O Iehova ‘ana‘e te paari’

17, 18. No te aha te Bibilia e parau ai e o Iehova ‘ana‘e te paari,’ e no te aha e tia ’i ia tatou ia umere i to ’na paari ma te faatura?

17 Ia au i teie mau haapapuraa, mea maere anei ia faateitei rahi roa te Bibilia i te paari o Iehova? Ei hi‘oraa, te parauhia ra e o Iehova ‘ana‘e te paari.’ (Roma 16:27) To Iehova ana‘e te paari i te auraa hope. O oia te tumu o te paari mau atoa. (Maseli 2:6) No reira Iesu, noa ’tu e o oia te paari roa ’‘e o ta Iehova i poiete, i ore ai i turui i nia i to ’na iho paari, ua parau râ oia mai ta to ’na Metua i faaue ia ’na.—Ioane 12:48-50.

18 A tapao na mea nafea to te aposetolo Paulo faaiteraa i te huru otahi o te paari o Iehova: “Auê te rahi hau ê atu o te paari e te ite o te Atua e! e te imiraa ore o tana faaauraa, e tana mau haerea i te itea ore ia imi e!” (Roma 11:33) Na roto i te haamataraa i te irava e te parau ra “Auê,” ua faaite Paulo i te huru aau hohonu—i ǒ nei, o te umere faatura rahi ïa. Ua taai-piri-hia te ta‘o Heleni ta ’na i maiti e i hurihia ei “rahi hau ê” i te ta‘o ra “abuso.” Te faahiti ra ïa ta ’na mau parau i te hoê mana‘o oraora mau. Ia feruriruri tatou i te paari o Iehova, mai te huru ra e te mataitai ra tatou i te hoê abuso otia ore, e te tohe ore, te hoê ao hohonu roa, rahi roa eita e taa ia tatou te rahi, eaha ’tu ïa ia faataa ’tu aore ra ia papai i to ’na hoho‘a ma te tia roa. (Salamo 92:5) E ere anei tera i te hoê mana‘o o te faahaehaa?

19, 20. (a) No te aha te aeto e riro ai ei taipe tano mau no te paari o te Atua? (b) Mea nafea to Iehova faaiteraa i to ’na aravihi e hi‘o i te tau a muri atu?

 19 O Iehova ‘ana‘e te paari’ na roto i te tahi atu auraa: O oia ana‘e te nehenehe e hi‘o i te tau a muri atu. A haamana‘o na e ua faaohipa Iehova i te aeto ite atea no te faataipe i to ’na paari. E nehenehe te hoê aeto—te aigle royal—e raea e 5 kilo noa, mea rahi a‘e râ to ’na mata i to te hoê taata paari. Mea maitai roa e mea maere roa te mata o te aeto, e nehenehe roa ta ’na e ite i te mau animara nainai roa mai te mau hanere metera i te atea mai, peneia‘e atoa mai te mau kilometera mai! Ua parau Iehova iho i te hoê taime no nia i te aeto e: “E ite to ’na mata i te maa i te atea ê ra.” (Ioba 39:29) Na reira atoa, e nehenehe ta Iehova e hi‘o “i te atea ê ra” o te tau—a muri atu!

20 Mea rahi te haapapuraa i roto i te Bibilia e e parau mau te reira. E mau hanere parau tohu, aore ra tuatapaparaa papai-a‘ena-hia, to roto. Te hopea o te mau tama‘i, te hitiraa mai e te toparaa o te mau hau o te ao atoa, e tae noa ’tu te mau huru aroraa taa maitai a te mau raatira nuu, ua tohu-ana‘e-hia ïa i  roto i te Bibilia—i te tahi mau taime, e mau hanere matahiti na mua ’‘e.—Isaia 44:25–45:4; Daniela 8:2-8, 20-22.

21, 22. (a) No te aha e ore roa ’i e tia ia faaoti e ua ite a‘ena Iehova i te mau maitiraa atoa ta outou e rave i roto i te oraraa? A horoa na i te hi‘oraa. (b) Mea nafea tatou i ite ai e e ere te paari o Iehova i te mea tae ore e te aumauiui ore?

21 O te auraa anei ïa e ua ite a‘ena te Atua i te mau maitiraa ta outou e rave i roto i te oraraa? Te onoono ra te tahi pae o te poro i te haapiiraa o te oraraa faataahia e, oia. E faaino râ taua mana‘o ra i te paari o Iehova, no te mea te na ô ra ïa e eita ta ’na e nehenehe e haavî i to ’na aravihi e hi‘o i te tau a muri atu. Ei hi‘oraa: Mai te peu e mea nehenehe to outou reo himene, aita e faito, aita ’tu anei ta outou e ravea maori râ i te himene-noa-raa i te mau taime atoa? Mea maamaa roa taua mana‘o ra! Oia atoa, te vai ra to Iehova aravihi i te ite atea i to a muri a‘e, eita râ oia e faaohipa ’tu i te mau taime atoa. Ia na reira oia, te ofati ra ïa oia i to tatou tiamâraa e maiti, te hoê ô faahiahia ta Iehova e ore roa ’tu e faaore.—Deuteronomi 30:19, 20.

22 Te mea ino atu â, te na ô ra ïa te mana‘o iho o te oraraa faataahia e mea tae ore te paari o Iehova, mea aroha ore, mea aumauiui ore, aore ra mea aumihi ore. E ere roa ’tu râ tera i te parau mau! Te haapii ra te Bibilia e e “paari o te aau” to Iehova. (Ioba 9:4) E ere ïa e e aau mau to Iehova, e faaohipa pinepine râ te Bibilia i taua ta‘o ra no te huru i roto roa mai, oia atoa hoi te mau mana‘o turai e te mau huru aau, mai te aroha. Na te aroha ïa e aratai i te paari o Iehova, mai i te tahi atu mau huru maitatai to ’na.—Ioane 1, 4:8.

23. E tia i te huru hau ê o te paari o Iehova ia turai ia tatou ia aha?

23 E tia roa iho â ïa ia tiaturihia te paari o Iehova. I te mea e to nia ’‘e roa i to tatou iho paari, te faaitoito maira te Parau a te Atua e: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ’na i to oe atoa ra mau haerea; e na ’na e faaite ia oe i to oe ra mau haerea.” (Maseli 3:5, 6) E faahohonu ana‘e i teie nei i te paari o Iehova e ia haafatata ’tu â tatou i to tatou Atua paari hope.