Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 22

Te ohipa ra anei “te paari no nia maira” i roto i to outou oraraa?

Te ohipa ra anei “te paari no nia maira” i roto i to outou oraraa?

1-3. (a) Mea nafea to Solomona faaiteraa i te paari taa ê mau i to ’na faatitiaifaroraa i te mârôraa o vai te metua vahine o te hoê aiû? (b) Eaha ta Iehova e fafau e horoa mai no tatou, e eaha te mau uiraa e hiti mai?

E HAAVARAA fifi tera—e piti vahine tera e mârô ra no nia i te hoê pêpe. Hoê â fare to na vahine, e ua fanau te tahi e te tahi i te hoê tamaiti, tau mahana noa te atearaa te tahi i te tahi. Ua pohe hoê o na aiû, e i teie nei, te parau ra te vahine taitahi e o o ’na te mama o te pêpe e ora ra. * Aita ’tu e ite i te mea i tupu. Peneia‘e ua faaroohia te tupuraa i roto i te hoê tiripuna iti a‘e, aita râ i faatitiaifarohia. I te pae hopea, ua hopoihia te mârôraa i mua ia Solomona, te arii o Iseraela. E noaa anei ia ’na i te heheu i te parau mau?

2 I muri a‘e i to ’na faarooraa ’tu maa taime iti a mârô ai na vahine, titau atura Solomona i te hoê ‘o‘e. E, ma te haavarevare i te aueue ore, faaue atura ia tâpûhia te aiû na ropu e ia horoahia hoê tuhaa na te vahine taitahi. I taua iho taime ra, taparuparu atura te metua vahine mau i te arii e horoa i te aiû—to ’na tamarii here—na te tahi atu vahine. Te onoono ra râ te tahi atu vahine ia tâpûhia te tamarii na ropu. Ua ite atura ïa Solomona i te parau mau. Ua ite oia i te aumauiui î i te here o te hoê mama no te tamarii o to ’na opu, e ua faaohipa oia i taua ite ra no te faatitiaifaro i taua mârôraa ra. A feruri na i te toparaa te hau o te mama i to Solomona horoaraa i te pêpe ia ’na ra e na ôraa e: “Oia te metua vahine mau.”—Mau arii 1, 3:16-27.

3 E paari taa ê mau, e ere anei? I to te taata faarooraa mea nafea  to Solomona faatitiaifaroraa i te peapea, ua î ratou i te mǎta‘u faatura, no te mea “ua ite a‘era e tei roto ia ’na te paari no ô mai i te Atua ra.” Oia, e ô a te Atua te paari o Solomona. Ua horoa Iehova i “te aau haapao e te ite i te parau” no ’na. (Mau arii 1, 3:12, 28) E o tatou? E nehenehe anei e noaa atoa ia tatou te paari o te Atua? E, ua papai hoi Solomona ma te faauruahia e: “O Iehova hoi tei horoa mai i te paari.” (Maseli 2:6) Te fafau ra Iehova e horoa i te paari—te aravihi i te faaohipa maitai i te ite, te maramarama, e te haroaroaraa—no te feia e imi ra i te reira ma te haavare ore. E nafea e noaa ’i ia tatou te paari no nia mai? E e nafea tatou e faaohipa ’i i te reira i roto i to tatou oraraa?

“E titau i te paari”—e nafea?

4-7. Eaha na titauraa e maha e noaa ’i te paari?

4 E tia anei ei maramarama rahi to tatou aore ra ia haere tatou i te haapiiraa teitei e noaa ’i ia tatou te paari o te Atua? Eita. Ua ineine Iehova i te horoa mai i to ’na paari no tatou noa ’tu eaha to tatou ta‘ere e to tatou faito ite. (Korinetia 1, 1:26-29) E tia râ ia tatou ia mata, te faaitoito maira hoi te Bibilia e “titau i te paari.” (Maseli 4:7) E nafea tatou ia na reira?

5 A tahi, e tia ia tatou ia mǎta‘u i te Atua. “O te matamua o te paari ra [“te taahiraa matamua e tae atu ai i te paari ra,” The New English Bible], o te mǎta‘u ïa ia Iehova,” o ta te Maseli 9:10 ïa e parau ra. Ua riro te mǎta‘u i te Atua ei niu o te paari mau. No te aha? A haamana‘o na e, te paari, o te aravihi ïa i te faaohipa i te ite ma te manuïa. E mǎta‘u i te Atua, e ere ïa e tapuni i mua ia ’na no te mehameha, e pi‘o râ i raro i mua ia ’na ma te mǎta‘u faatura e te tiaturi. Mea maitai taua mǎta‘u ra e e turai te reira ma te puai. E turai te reira ia faaau i to tatou oraraa i nia i to tatou ite i te hinaaro e te huru raveraa a te Atua. Aita ’tu e haerea paari a‘e ta tatou e nehenehe e pee, e paturu noa hoi te mau ture aveia a Iehova i te mea maitai roa ’‘e no te feia e haapao atu i te reira.

6 A piti, e tia ia tatou ia riro ei mea haehaa e te aau faahaihai. Aita e paari o te Atua aita ana‘e e haehaa e e aau faahaihai. (Maseli  11:2) No te aha hoi? Mai te peu e e mea haehaa tatou e te aau faahaihai, e ineine tatou i te farii e aita tatou i ite i te mau mea atoa, e aita to tatou mau mana‘o i tano noa, e te hinaaro ra tatou e ite i te mana‘o o Iehova i te tahi mau parau. “E patoi mai” Iehova “i te feia teoteo,” e oaoa râ oia i te horoa i te paari no te feia aau haehaa.—Iakobo 4:6.

Ia noaa ia tatou te paari o te Atua, e tia ia tatou ia tutava i te paheru i te reira

7 Te toru o te mea faufaa, te haapiiraa ïa i te Parau papaihia a te Atua. Ua heheuhia te paari o Iehova i roto i ta ’na Parau. Ia noaa taua paari ra, e tia ia tatou ia tutava i te paheru i te reira. (Maseli 2:1-5) Te maha o te titauraa, o te pure ïa. Ia ani tatou i te paari i te Atua ma te haavare ore, e horoa rahi mai oia i te reira. (Iakobo 1:5) E pahonohia iho â ta tatou mau pure ia tauturu mai to ’na varua. E maoti to ’na varua e itea mai ai ia tatou te mau tao‘a rahi i roto i ta ’na Parau o te nehenehe e tauturu mai ia faatitiaifaro i te mau fifi, ia ape i te mau ati, e ia rave i te mau faaotiraa paari.—Luka 11:13.

8. Mai te peu e ua roaa mau ia tatou te paari o te Atua, e nafea te reira e ite-maitai-hia ’i?

8 Mai ta tatou i tapao mai i roto i te pene 17, mea nanonano te paari o Iehova. No reira, mai te peu e ua roaa mau ia tatou te paari o te Atua, e ite-maitai-hia te reira na roto i to tatou haerea. Ua faataa te pǐpǐ ra o Iakobo i ta te paari o te Atua e faahotu i to ’na papairaa e: “Te paari no nia maira, [na mua roa] e mea anoi-ore-hia ïa, e te [hau], e te [mana‘o maruhi], e te faaroo ohie, ua î i te aroha . . . hamani maitai [e te mau hotu maitatai], e ore e faahuru ê i te taata, e ore hoi e haavare.” (Iakobo 3:17; MN) A tauaparau ai tatou i teie mau huru taitahi o te paari o te Atua, e ui paha tatou ia tatou iho e, ‘Te ohipa ra anei te paari no nia mai i roto i to ’u oraraa?’

‘Mea anoi-ore-hia, e te hau’

9. Eaha te auraa e riro ei mea anoi-ore-hia, e no te aha e tano ai e o te anoi ore te huru maitai o te paari tei anai-na-mua-hia?

9 “Na mua roa e mea anoi-ore-hia.” Te mea anoi-ore-hia, te mea mâ ïa e te viivii ore eiaha noa i rapaeau, i roto atoa mai râ. E taai te Bibilia i te paari i te aau, eita râ te paari no te ra‘i mai e  tae i roto i te aau tei viivii i te mau mana‘o, te mau hinaaro e te mau mana‘o turai iino. (Maseli 2:10; Mataio 15:19, 20) Teie râ, mai te peu e mea anoi-ore-hia to tatou aau—oia hoi, i te faito maitai roa ’‘e e raea i te taata tia ore—e ‘faarue tatou i te parau ino, e e rave i te parau maitai.’ (Salamo 37:27; Maseli 3:7) E ere anei i te mea tano e o te anoi ore te huru maitai o te paari tei anai-na-mua-hia? Inaha hoi, mai te peu e aita tatou i mâ i te pae morare e te pae varua, e nafea tatou e nehenehe mau ai e pee i te tahi atu mau huru maitatai o te paari no nia mai?

10, 11. (a) No te aha e riro ai ei mea faufaa ia imi tatou i te hau? (b) Ia mana‘o outou e e hara ta outou i te hoê hoa haamoriraa, e nafea outou e nehenehe ai e riro ei taata imi hau? (A hi‘o atoa i te  nota i raro i te api.)

10 “E te hau.” E turai te paari no te ra‘i mai ia tapi tatou i te hau, e hotu hoi tera a te varua o te Atua. (Galatia 5:22) E tutava tatou eiaha ia mutu “te ati ra i te hau” o te tahoê i te nunaa o Iehova. (Ephesia 4:3) E faaitoito hua atoa tatou i te imi faahou i te hau ua tupu ana‘e te peapea. No te aha te reira e riro ai ei mea faufaa? Te na ô ra te Bibilia e: “E parahi ma te hau; e tia ïa te Atua no ’na te aroha e te hau i rotopu ia outou.” (Korinetia 2, 13:11) No reira, a tamau noa ’i tatou i te ora ma te hau, tei ia tatou noa ra te Atua no ’na te hau. E faahopearaa to te huru e haa ’i tatou i nia i te mau hoa haamoriraa i nia i to tatou taairaa e Iehova. E nafea tatou e riro ai ei feia imi hau? E rave ana‘e i te hoê hi‘oraa.

11 Eaha te tia ia outou ia rave ia mana‘o outou e e hara ta outou i te hoê hoa haamoriraa? Ua parau Iesu e: “E teie nei ia hopoi oe i ta oe tao‘a horoa noa i te fata ra, e ua mana‘o ihora oe i reira, e e hara ta to taeae ia oe na; e vaiiho atu i to tao‘a i mua i te fata ra, e mata na i te haere e faite i to taeae, a haere a hopoi ai i ta oe tao‘a.” (Mataio 5:23, 24) E nehenehe ta outou e faaohipa i taua a‘oraa ra na roto i te mataraa i te haere i to outou taeae ra. Ma teihea fa? No te “faite” ia ’na. * No taua fa ra, e tia ia  outou ia ite, eiaha ia tâu‘a ore, i te mauiui o to ’na aau. Ia haere atu outou ia ’na ra ma te fa e faatupu faahou i te hau e ia tapea outou i taua haerea ra, mea papu e e afaro mai te peapea, e tupu te tatarahapa e tano, e te faaoreraa hara. Ia mata outou i te faahau, te faaite ra outou e te arataihia ra outou e te paari o te Atua.

“Te mana‘o maruhi, e te faaroo ohie”

12, 13. (a) Eaha te auraa o te ta‘o i hurihia ei “mana‘o maruhi” i roto i te Iakobo 3:17? (b) E nafea tatou ia faaite e e mana‘o maruhi to tatou?

12 “Te mana‘o maruhi.” Eaha te auraa ei mana‘o maruhi to tatou? Ia au i te mau aivanaa, mea fifi ia huri i te ta‘o tumu Heleni i hurihia ei “mana‘o maruhi” i roto i te Iakobo 3:17 (MN). Ua faaohipa te feia huri i te mau ta‘o mai te “mǎrû,” “faaoromai,” e “haapao maitai.” Te auraa mau o te ta‘o Heleni, e “tuu” ïa. E nafea tatou ia faaite e te ohipa ra teie huru o te paari no nia mai i roto ia tatou?

13 “Ia itea to outou [mana‘o maruhi] e te taata atoa ra,” o ta te  Philipi 4:5 (MN) ïa e parau ra. Te na ô ra te tahi atu huriraa e: “Ei roo no outou tera te riroraa ei taata mana‘o maruhi.” (The New Testament in Modern English, a J. B. Phillips) A tapao na e e ere o to tatou mana‘o ia tatou iho te mea faufaa; e nafea râ vetahi ê ia hi‘o ia tatou, eaha to tatou roo. Eita te hoê taata mana‘o maruhi e onoono noa i nia i te a rii o te ture aore ra i nia i to ’na iho mana‘o. E ineine maoti râ oia i te faaroo ia vetahi ê e, ia tano ra, i te auraro atu i to ratou mau hinaaro. Mea mǎrû atoa oia, e ere i te mea etaeta ia haa oia i nia ia vetahi ê. Mea faufaa te reira no te mau Kerisetiano atoa, mea faufaa roa ’tu â râ no te feia e tavini ra ei matahiapo. Mea anaanatae te mǎrû, e au atu ai te mau matahiapo ia haafatatahia ’tu. (Tesalonia 1, 2:7, 8) E tia ia tatou paatoa ia ui ia tatou iho e, ‘O to ’u anei roo tera te riroraa ei taata haapao maitai, te tuu haere noa, e te mǎrû?’

14. E nafea tatou ia faaite e mea “faaroo ohie” tatou?

14 “Te faaroo ohie.” Aita e itehia ra te ta‘o Heleni i hurihia ei “faaroo ohie” i te tahi atu vahi o te mau Papai Heleni Kerisetiano. Ia au i te hoê aivanaa, e “faaohipa-pinepine-hia” teie ta‘o “i roto i te ohipa a te faehau.” Te vai ra te mana‘o ra “ohie ia haapapuhia te mana‘o” e “auraro” i roto. Te taata e arataihia e te paari no nia mai, e ineine ïa i te auraro i ta te mau Papai e parau ra. Aita oia i matauhia mai te hoê o te rave i te hoê faaotiraa e o te patoi atu ai i te taui ia faahapa te tahi mau mea ia ’na. Area râ, e oioi oia i te taui ia faaitehia ’tu te haapapuraa maramarama i roto i te Bibilia e ua hape to ’na tiaraa aore ra ua hape ta ’na mau faaotiraa. Tera anei to outou roo?

‘Î i te aroha hamani maitai e te mau hotu maitatai’

15. Eaha te aroha hamani maitai, e no te aha e tano ai ia faahiti-amui-hia ‘te aroha hamani maitai’ e “te mau hotu maitatai” (MN) i roto i te Iakobo 3:17?

15 ‘Î i te aroha hamani maitai e te hotu maitatai.’ * Ua riro te  aroha hamani maitai ei tuhaa faufaa o te paari no nia mai, te parauhia ra hoi e ua ‘î taua paari ra i te aroha hamani maitai.’ A tapao na e ua faahiti-amui-hia ‘te aroha hamani maitai’ e “te mau hotu maitatai.” E tano te reira, no te mea i roto i te Bibilia, e pinepine te aroha hamani maitai i te au i te ohipa tapitapi ia vetahi ê, te hoê aumauiui o te faahotu i te mau haaraa maitatai e rave rahi. Te faataa ra te hoê buka i te aroha hamani maitai mai “te huru aau o te haapeapea no te huru tupuraa ino o te hoê taata e te tamataraa i te rave i te hoê mea no te reira.” E ere ïa te paari o te Atua i te mea anaanatae ore, te mea toetoe, aore ra i to te upoo noa. Mea mahanahana râ, mea aau tae, e mea taa i to vetahi ê huru. E nafea tatou e faaite ai e ua î tatou i te aroha hamani maitai?

16, 17. (a) Taa ê atu i te here i te Atua, na te aha e turai ia tatou ia rave i te ohipa pororaa, e no te aha? (b) E nafea tatou ia faaite e ua î tatou i te aroha hamani maitai?

16 Papu maitai, te hoê ravea faufaa, te faaiteraa ïa i te parau apî maitai o te Basileia o te Atua ia vetahi ê. Na te aha e turai ia tatou ia rave i taua ohipa ra? Na mua roa, na te here i te Atua. E tia atoa râ ia tatou ia turaihia e te aroha hamani maitai, aore ra te aumauiui ia vetahi ê. (Mataio 22:37-39) Mea rahi i teie tau tei ‘purara e tei faarue-taue-hia, mai te mamoe tiai ore ra.’ (Mataio 9:36) Aita ratou i haapaohia e ua haapourihia ratou i te pae varua e te mau tiai mamoe haavare. Ei faahopearaa, aita ratou i ite i te aratairaa paari e vai ra i roto i te Parau a te Atua aore ra i te mau haamaitairaa ta te Basileia e fatata i te hopoi mai i te fenua nei. No reira, ia feruri tatou i te mau hinaaro pae varua o te taata e haaati ra ia tatou, e turai to tatou aumauiui aau tae ia rave hope tatou i tei maraa ia tatou no te faaite atu i te opuaraa î i te here a Iehova.

Ia faaite tatou i te aroha hamani maitai, aore ra te aumauiui, ia vetahi ê, te pee ra tatou i “te paari no nia maira”

17 E nafea ’tu â tatou ia faaite e ua î tatou i te aroha hamani maitai? A haamana‘o na i te parabole a Iesu o te Samaria tei ite i te hoê ratere e tarava ra i te pae purumu, tei eiâhia e tei taparahihia. Ma te turaihia e te aumauiui, ua “haa” te Samaria “ma te aroha hamani maitai,” a vehî ai i te mau pepe o te taata  ati ra i te ahu e a utuutu atu ai ia ’na. (Luka 10:29-37, MN) Aita anei te reira e faaite ra e e titau te aroha hamani maitai ia pûpû i te tauturu mau i te feia e hinaaro ra? Te parau maira te Bibilia e ‘hamani maitai i te taata atoa, ia rahi atu râ i to te fetii faaroo ra.’ (Galatia 6:10) E hi‘opoa ana‘e i te tahi mau ravea. Te hinaaro ra paha te hoê hoa faaroo paari i te faurao no te haere atu i te mau putuputuraa Kerisetiano e no te ho‘i i te fare. Te hinaaro ra paha te hoê vahine ivi i roto i te amuiraa i te tauturu no te tataî i to ’na fare. (Iakobo 1:27) Te hinaaro ra paha te hoê taata tei toaruaru i te hoê “parau maitai” o te faaitoito faahou mai ia ’na. (Maseli 12:25) Ia na reira tatou i te faaite i te aroha hamani maitai, e haapapu tatou e te ohipa ra te paari no nia mai i roto ia tatou.

“E ore e faahuru ê i te taata, e ore hoi e haavare”

18. Ia arataihia tatou e te paari no nia mai, eaha te tia ia tatou ia tutava i te taihitumu i roto i to tatou aau, e no te aha?

18 “E ore e faahuru ê i te taata.” To nia ’‘e te paari o te Atua i te mana‘o ino i te nunaa ê e i te teoteo here ai‘a. Ia arataihia tatou e taua paari ra, e tutava tatou i te taihitumu i te hinaaro atoa e faatia paetahi i roto i to tatou aau. (Iakobo 2:9) Eita tatou e hamani maitai ia vetahi ê no to ratou faito ite, to ratou tiaraa i te pae o te moni, aore ra ta ratou hopoia i roto i te amuiraa; eita atoa tatou e hi‘o ino i te hoê noa ’‘e o to tatou mau hoa haamoriraa, noa ’tu to ratou hi‘oraa riirii roa. Mai te peu e ua faafana‘o Iehova ia ratou i to ’na here, e tia mau â ia tatou ia mana‘o e e au ia ratou to tatou here.

19, 20. (a) Eaha te auraa o te ta‘o Heleni no “haavare”? (b) E nafea tatou ia faaite i “te aroha taeae haavare ore,” e no te aha e riro ai ei mea faufaa?

19 “E ore hoi e haavare.” E nehenehe te ta‘o Heleni no “haavare” e au i “te hoê taata hauti teata.” I te tau tahito, e tamau te feia hauti teata Heleni e Roma i te mau tapo‘i mata rarahi ia hauti ratou. No reira, ua au atura te ta‘o Heleni no “haavare” i te hoê taata e haavarevare ra. E tia ia ohipa teie tuhaa o  te paari o te Atua eiaha noa i nia i ta tatou huru haaraa i nia i te mau hoa haamoriraa, i nia atoa râ i to tatou mana‘o ia ratou.

20 Ua parau te aposetolo Petero e e tia ia tatou ia ‘faaroo i te parau mau’ no to tatou “aroha taeae haavare ore.” (Petero 1, 1:22) Oia, eiaha to tatou here i to tatou mau taeae ia riro ei huru rapaeau noa. Eita tatou e tamau i te mau tapo‘i mata aore ra e hauti i te teata no te haavare ia vetahi ê. Ei mea mau iho â to tatou here, ei mea aau tae. Mai te reira ana‘e, e noaa ia tatou te tiaturi o to tatou mau hoa faaroo, ua ite hoi ratou e o to tatou huru mau ta tatou e faaite ra. E faaineine taua haerea rotahi ra e ia tupu te mau taairaa mahora e te haavare ore i rotopu i te mau Kerisetiano e e tauturu ia faatupu i te tiaturi i roto i te amuiraa.

 “E tapeâ oe i te paari maitai”

21, 22. (a) Mea nafea to Solomona manuïa-ore-raa i te tapea noa i te paari? (b) E nafea tatou e tapea noa ’i i te paari, e e nafea tatou e faufaahia ’i i te na reiraraa?

21 E ô a Iehova te paari o te Atua, e tia ia tatou ia tapea noa ’tu. Ua parau Solomona e: “E tau tamaiti, . . . e tapeâ oe i te paari maitai e te haapao.” (Maseli 3:21) Ma te peapea, aita Solomona iho i manuïa i reira. E paari noa iho â to ’na a vai faaroo noa ’i to ’na aau. I te pae hopea râ, ua faafariu ê ta ’na mau vahine ěê e rave rahi i to ’na aau i te haamoriraa viivii ore a Iehova. (Mau arii 1, 11:1-8) Te faaite maitai ra te faahopearaa i nia ia Solomona e mea faufaa ore te ite ia ore tatou e faaohipa maitai atu.

22 E nafea tatou e tapea noa ’i i te paari maitai? E ere noa mea na roto i te taio-tamau-raa i te Bibilia e te mau papai niuhia i nia i te Bibilia tei faaineinehia e “te tavini haapao maitai e te paari,” mea na roto atoa râ i te tutavaraa i te faaohipa i ta tatou e haapii ra. (Mataio 24:45) E rau te tumu e faaohipa ’i tatou i te paari o te Atua. E horoa mai te reira i te hoê huru oraraa maitai a‘e i teie nei. Maoti te reira e ‘tapea papu ai tatou i te ora mau’—te ora i roto i te ao apî a te Atua. (Timoteo 1, 6:19, MN) E te mea faufaa roa ’‘e, ia faahotu tatou i te paari no nia mai, e fatata ’tu â tatou i te tumu o te paari atoa, te Atua ra o Iehova.

^ par. 1 Ia au i Te mau arii 1, 3:16, e faaturi na vahine toopiti. Te na ô ra te Étude perspicace des Écritures e: “E mau faaturi paha taua na vahine ra, eiaha na roto i te auraa e mea tamoni, e mau vahine râ tei taiata, e mau ati Iuda anei aore ra, mea huru papu, e mau vahine ěê.”—Neneihia e te mau Ite no Iehova.

^ par. 11  No roto mai te parau Heleni i hurihia ei “faite” i te hoê ihoparau teie te auraa “‘e faatupu i te hoê tauiraa, e faataui,’ e no reira, ‘e faahau’ ïa.” No reira, ta outou fa, te faatupuraa ïa i te hoê tauiraa, te tatararaa, mai te peu e e tia, i te inoino i roto i te aau o tei harahia.—Roma 12:18.

^ par. 15 I roto i te tahi atu Bibilia, ua hurihia taua mau parau ra ei “î i te aumauiui e te mau ohipa maitatai.”—A Translation in the Language of the People, a Charles B. Williams.

No te ite atu â

E haafaufaa roa i te taioraa Bibilia

E faufaahia tatou i te Bibilia i te taime noa e haapii ai e e faaohipa ’i tatou i ta ’na e parau ra. A haapii e nafea ia haamaitai roa ’tu â i ta oe taioraa Bibilia.

A faaohipa i te Bibilia no oe e no vetahi ê

Mea faufaa anei te Bibilia no oe? A hi‘opoa i te Timoteo 2, 3:16, e tiaturi atu â oe i teie ô no ǒ mai ia Iehova.