Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 21

E faaite Iesu i te ‘paari no ǒ i te Atua ra’

E faaite Iesu i te ‘paari no ǒ i te Atua ra’

1-3. Ua nafea te feia tapiri o Iesu no mutaa ihora i ta ’na haapiiraa, e eaha te mea aita ratou i farii no nia ia ’na?

UA MAERE roa te feia e faaroo ra. Te tia ra te taurearea ra o Iesu i mua ia ratou i roto i te sunago e te haapii ra. E ere oia i te taata ê na ratou—ua paari oia i roto i to ratou oire, e e rave rahi matahiti to ’na raveraa i te ohipa tamuta i roto ia ratou. Peneia‘e te faaea ra te tahi o ratou i roto i te mau fare ta Iesu i tauturu i te patu, aore ra te faaapu ra paha ratou i to ratou fenua e te mau arote e te mau zugo ta ’na i hamani i to ’na iho rima. * E nafea râ ratou i te haapiiraa a teie tamuta tahito?

2 Te maere roa ra te rahiraa o te feia e faaroo ra, a ui ai e: ‘Nohea te paari o teie nei taata?’ Ua tapao atoa râ ratou e: “E ere anei teie i te tamuta, te tamaiti a Maria ra.” (Mataio 13:54-58; Mareko 6:1-3) Ma te peapea, ua feruri te feia tapiri o Iesu no mutaa ihora e, ‘E taata no ǒ nei noa, mai ia tatou nei, teie tamuta.’ Noa ’tu te paari o ta ’na mau parau, ua patoi ratou ia ’na. Aita ratou e ite ra e e ere no ’na iho te paari ta ’na e horoa ra.

3 Nohea mai teie paari to Iesu? Ua na ô oia e: “E ere i ta ’u ta ’u e haapii nei, na ’na râ, na tei tono mai ia ’u nei.” (Ioane 7:16) Ua faataa te aposetolo Paulo e ‘ua riro’ Iesu ‘ei paari no ǒ i te Atua ra no tatou.’ (Korinetia 1, 1:30) Te faaitehia ra te paari o Iehova iho na roto i ta ’na Tamaiti o Iesu. Oia mau, e parau mau roa te reira i parau roa ’i Iesu e: “O vau e te Metua ra, hoê â ïa.” (Ioane 10:30) E hi‘opoa ana‘e e toru tuhaa i reira to Iesu faaohiparaa i te ‘paari no ǒ i te Atua ra.’

 Te mea ta ’na i haapii

4. (a) Eaha te tumu parau o te poroi a Iesu, e no te aha te reira i riro ai ei mea faufaa roa? (b) No te aha e mea nanonano noa ’i te a‘oraa a Iesu e e mea maitai roa ’‘e ai no te feia e faaroo ra ia ’na?

4 A tahi, e hi‘o ana‘e i te mea ta Iesu i haapii. O “te parau maitai o te basileia” te tumu parau o ta ’na poroi. (Luka 4:43) Mea faufaa roa te reira no te tuhaa a te Basileia i roto i te faatiaraa i te mana arii o Iehova e te hopoiraa mai i te mau haamaitairaa taraire na te taata. I roto i ta ’na haapiiraa, ua horoa atoa Iesu i te a‘oraa paari no te oraraa i te mau mahana atoa. Ua faaite oia e o oia te “A‘o faahiahia” i tohuhia. (Isaia 9:6, MN) Oia mau, eaha hoi ta ’na a‘oraa e ore ai e riro ei mea faahiahia? E ite iti rahi hoi to ’na i te Parau e te hinaaro o te Atua, e taa maitai ia ’na te huru o te taata, e mea here roa na ’na te huitaata. Mea nanonano noa iho â ïa ta ’na a‘oraa e ua hopoi mai i te mea maitai roa ’‘e na te feia e faaroo ra ia ’na. Ua faahiti Iesu i “te parau o te ora mure ore ra.” Oia mau, ia haapaohia ’tu, e aratai ta ’na a‘oraa i te ora ra.—Ioane 6:68.

5. Eaha te tahi mau tumu parau ta Iesu i puohu i roto i te A‘oraa i nia i te mou‘a?

5 Ua riro te A‘oraa i nia i te mou‘a ei hi‘oraa faahiahia roa o te paari faaau ore e vai ra i roto i te mau haapiiraa a Iesu. E 20 minuti noa paha te maoro ia vauvauhia teie a‘oraa i papaihia i roto i te Mataio 5:3–7:27. E au râ te reira i te mau tau atoa—e tano no teie tau mai i te taime matamua i vauvauhia ’i. Ua puohu Iesu i te hoê anairaa tumu parau roa, tae noa ’tu e nafea ia haamaitai i te mau taairaa e vetahi ê (5:23-26, 38-42; 7:1-5, 12), e nafea ia vai mâ noa i te pae morare (5:27-32), e e nafea ia ora i te hoê oraraa faufaa (6:19-24; 7:24-27). Aita râ Iesu i parau noa i te feia e faaroo ra eaha te haerea paari; ua faaite atoa oia i te reira na roto i te faataaraa, te haaferuriraa, e te vauvauraa i te haapapuraa.

6-8. (a) Eaha te tahi mau tumu papu ta Iesu e horoa ra e ape ai tatou i te tapitapi? (b) Na te aha e faaite ra e e paari no nia mai to roto i te a‘oraa a Iesu?

 6 E rave ana‘e, ei hi‘oraa, i te a‘oraa paari a Iesu e nafea ia faaruru i te tapitapi i te mau mea materia, ia au i te Mataio pene 6. “Eiaha e tapitapi i to outou ora, i ta outou e amu, e ta outou e inu; e te ahu no to outou tino,” o ta Iesu ïa e a‘o maira. (Irava 25) Mea hinaarohia iho â te maa e te ahu, e mea tano iho â ia tapitapi tatou e ia noaa mai te reira. Te parau maira râ Iesu “eiaha e tapitapi” i taua mau mea ra. * No te aha?

7 A faaroo na a faataa ’i Iesu ma te haapapu i te mana‘o. I te mea e ua horoa mai Iehova i te ora e te hoê tino, eita anei e tia ia ’na ia horoa mai i te maa no te atuatu i taua ora ra e te ahu no taua tino ra? (Irava 25) Mai te peu e e horoa te Atua i te maa na te manu e e ahu oia i te mau tiare i te unauna, e hau atu â ïa oia i te aupuru mai i to ’na mau taata haamori! (Irava 26, 28-30) Oia mau, mea faufaa ore iho â te tapitapi tia ore. Eita to tatou ora e roa ’tu â i te reira, noa ’tu e maa vahi iti noa. * (Irava 27) E nafea tatou ia ape i te tapitapi? Te a‘o maira Iesu e: A tamau i te tuu i te haamoriraa i te Atua i te parahiraa matamua i roto i te oraraa. E nehenehe ta te feia e na reira ra e tiaturi e “e amui-atoa-hia mai” te mau mea atoa ta ratou e hinaaro i te mau mahana atoa e to ratou Metua i te ra‘i. (Irava 33) I te pae hopea, e horoa Iesu i te mana‘o nanonano roa ’‘e—a haapao noa hoê mahana i te hoê haereraa. No te aha e amui mai ai i to ananahi tapitapi i to teie mahana? (Irava 34) Hau atu â, eaha hoi e haapeapea ’i ma te faufaa ore no te mau mea e ore roa ’tu paha e tupu? Ia faaohipa tatou i taua  a‘oraa paari ra, e nehenehe tatou e ape i te mauiui aau e rave rahi i roto i teie ao faatupu hepohepo.

8 Papu maitai, te nanonano noa râ te a‘oraa a Iesu i teie tau mai i te taime i faahitihia ’i fatata a 2 000 matahiti a‘enei. E ere anei tera i te haapapuraa e no nia mai taua paari ra? Tae noa ’tu te a‘oraa maitai roa ’‘e a te taata a‘o, eita e maoro, ua tahito ïa e e faaapîhia aore ra e monohia. Area te mau haapiiraa a Iesu ra, te faufaa noa râ ïa noa ’tu te roa o te tau. Eiaha râ tatou ia maere, te faahiti ra hoi teie A‘o faahiahia i ‘ta te Atua parau.’—Ioane 3:34.

Te huru i haapii ai oia

9. Eaha ta te tahi mau faehau i parau no nia i te haapiiraa a Iesu, e no te aha e ere ai te reira i te faarahiraa?

9 Te piti o te tuhaa i reira to Iesu peeraa i te paari o te Atua, o te huru ïa i haapii ai oia. I te hoê taime, ua tonohia te tahi mau faehau e tapea ia ’na, ho‘i mai nei ratou aita oia, na ô a‘era e: “Aita roa e taata e au te parau i ta tera a‘era taata.” (Ioane 7:45, 46) Aita ratou e faarahi ra. I roto i te mau taata atoa i ora a‘enei, to Iesu, “no nia” mai hoi oia, te ite e te paari rahi roa ’‘e ta tatou e nehenehe e fana‘o. (Ioane 8:23) Ua haapii mau oia ia au i te hoê huru eita e noaa i te tahi atu taata. E hi‘o ana‘e e piti noa ravea a teie Orometua paari.

“Ua maere ana‘e ihora te taata atoa i te huru o ta ’na parau”

10, 11. (a) No te aha tatou e umere ai iho â i ta Iesu faaohiparaa i te mau faahoho‘araa? (b) Eaha te mau parabole, e eaha te hi‘oraa e faaite ra no te aha te mau parabole a Iesu e riro ai ei mea nanonano roa no te haapiiraa?

10 Faaohiparaa nanonano i te mau faahoho‘araa. ‘E na roto i te mau parabole to Iesu parauraa ’tu ia ratou,’ o tei faaitehia mai ïa, “i na te parabole ana‘e ra hoi oia i te haapiiraa ’tu ia ratou.” (Mataio 13:34) E umere iho â tatou i to ’na aravihi faaau ore i te haapii i te mau parau mau hohonu na roto i te mau mea no te mau mahana atoa. Te feia faaapu e ueue ra i te huero, te mau vahine e faaineine ra i te eu i te faraoa, te mau tamarii e hauti ra i te vahi hooraa, te mau ravaai e ume ra i te upe‘a, te mau tiai mamoe e imi ra i te mamoe i moe—e mau  mea ana‘e ïa ta te feia e faaroo ra i ite pinepine roa. Ia taaihia te mau parau mau faufaa i te mau mea matauhia, e puta oioi taua mau parau mau ra ma te hohonu i roto i te feruriraa e te aau.—Mataio 11:16-19; 13:3-8, 33, 47-50; 18:12-14.

11 Ua faaohipa pinepine Iesu i te mau parabole, te mau aamu poto i reira oia e huti mai ai i te mau parau mau morare aore ra pae varua. I te mea e e taa ohie a‘e e e mau a‘e te mau aamu i te mau mana‘o, e tauturu te mau parabole ia tamau i te haapiiraa a Iesu. I roto i te mau parabole e rave rahi, ua faataa Iesu i to ’na Metua ma te mau hoho‘a oraora eita e moe-ohie-hia. Ei hi‘oraa, o vai te ore e taa ia ’na te mana‘o o te parabole o te tamaiti haamâu‘a faufaa—oia hoi ia tatarahapa mau te hoê tei atea ê, e aroha Iehova ia ’na e e farii faahou atu ma te here ia ho‘i mai oia?—Luka 15:11-32.

12. (a) Mea nafea to Iesu faaohiparaa i te mau uiraa i roto i ta ’na haapiiraa? (b) Mea nafea to Iesu haamamûraa i te feia e mârô ra i to ’na mana?

12 Faaohiparaa aravihi i te mau uiraa. Ua faaohipa Iesu i te mau uiraa e ia huti te feia e faaroo ra i ta ratou iho mau faaotiraa, ia hi‘opoa i to ratou mau mana‘o turai, aore ra ia rave i te mau opuaraa. (Mataio 12:24-30; 17:24-27; 22:41-46) I to te mau aratai haapaoraa mârôraa e na te Atua anei to ’na mana i horoa, ua pahono Iesu e: “O te bapetizo a Ioane nei, no te ra‘i mai anei e na te taata anei?” Ua hitimaue ratou i te uiraa, e ua feruri ihora ratou ratou iho: “Ia parau tatou, No te ra‘i mai, e riro oia i te parau mai e, Eaha ihora outou i ore i faaroo atu ai ia ’na? Ia parau râ tatou, Na te taata; te mǎta‘u nei hoi tatou i te taata, te parau nei hoi te taata atoa e, e peropheta mau Ioane.” I te pae hopea, ua pahono ratou e: “Aore matou i ite.” (Mareko 11:27-33; Mataio 21:23-27) Na roto noa i te hoê uiraa ohie, ua mamû roa ratou ia Iesu e ua faaitehia te huru haavare o to ratou aau.

13-15. E nafea te parabole o te Samaria maitai ra e faaite ai i te paari o Iesu?

13 I te tahi taime, ua amui Iesu i te mau raveraa na roto i te  faaôraa i te mau uiraa o te haaferuri i roto i ta ’na mau faahoho‘araa. I to te hoê haapii ture uiraa ia Iesu eaha te titauhia e roaa ’i te ora mure ore, ua faahoro Iesu ia ’na i roto i te Ture a Mose o te faaue e here i te Atua e e aroha i te taata-tupu. Ma te hinaaro e faaite e e parau-tia ta ’na, ua ui te taata ra e: “O vai hoi to ’u taata-tupu?” Ua pahono Iesu na roto i te faatiaraa i te hoê aamu. Te ratere ra te hoê ati Iuda o oia ana‘e i to ’na aroraahia e te tahi mau eiâ tei faarue ia ’na ua fatata i te pohe. Haere mai nei e piti ati Iuda, te hoê tahu‘a na mua e i muri iho te hoê ati Levi. Aita raua e piti atoa ra i tâu‘a ’tu ia ’na. Tae mai nei râ te hoê Samaria. Ma te aroha, ua rapaau mǎrû oia i te mau pepe o te taata ati ra e ua hopoi atura ia ’na ma te here i te vahi panoonoo ore, i te hoê fare tipaeraa i reira oia e ora mai ai. Ei faaotiraa i te aamu, ua ui Iesu i te taata e ui maere ra ia ’na e: “O vai te taata-tupu i to oe mana‘oraa i taua na taata tootoru ra, i te taata i roohia i te nǎnǎ eiâ hara ra?” Ua faahepohia te taata ra e pahono e: “O tei aroha ia ’na ra.”—Luka 10:25-37.

14 E nafea te parabole ia faaite i te paari o Iesu? I te tau o Iesu, i faaau na te mau ati Iuda i te ta‘o ra “taata-tupu” i te feia noa e haapao ra i ta ratou tutuu—eiaha mau ïa i to Samaria. (Ioane 4:9) Ahiri Iesu i faatia i te aamu e o te Samaria te taata ati e o te ati Iuda te tauturu, e faataui anei te reira i te mana‘o ino? Ua hamani Iesu i te aamu ma te paari e na te Samaria e tauturu i te ati Iuda ma te here. A tapao atoa na i te uiraa a Iesu i te hopea o te aamu. Ua taui oia i te tiaraa mau o te “taata-tupu.” Ua ui mau hoi te haapii ture ra e: ‘O vai te tia ia ’u ia here mai to ’u taata-tupu?’ Ua ui râ Iesu e: “O vai te taata-tupu i to oe mana‘oraa i taua na taata tootoru ra?” Ua onoono Iesu, eiaha i nia i te taata i fana‘o i te maitai, oia te taata ati, i nia râ i te taata i faaite i te maitai, oia te Samaria. E mata te hoê taata-tupu mau i te faaite i te here ia vetahi ê aita e hi‘oraa eaha to ratou nunaa. Aita ’tu ravea aravihi a‘e e haamahiti ai Iesu i teie mana‘o.

15 Mea maere anei e ua haafaahiahia te taata i “te huru o ta” Iesu “parau” e ua tae to ratou aau ia ’na? (Mataio 7:28, 29) I te  hoê taime, ua faaea mai ‘te taata e rave rahi’ i pihai iho ia ’na e toru mahana i te maoro, noa ’tu e aita ta ratou e maa!—Mareko 8:1, 2.

To ’na huru oraraa

16. Mea nafea to Iesu faaiteraa i “te haapapuraa nanonano” e na te paari o te Atua oia e aratai ra?

16 Te toru o te tuhaa i reira to Iesu peeraa i to Iehova paari, o to ’na ïa huru oraraa. Mea nanonano te paari; e ohipa te reira. “O vai to roto ia outou e paari to ’na?” o ta te pǐpǐ ra ïa o Iakobo i ui. Pahono atu ai oia i ta ’na iho uiraa, a na ô ai e: “Ia faaite to ’na haerea tia i te haapapuraa nanonano o te reira.” (Iakobo 3:13, The New English Bible) Ua faaite te haerea o Iesu i “te haapapuraa nanonano” e na te paari o te Atua oia e aratai ra. E hi‘o ana‘e mea nafea to ’na faaiteraa i te haroaroaraa maitai, i roto i to ’na huru oraraa e to ’na haaraa i nia ia vetahi ê.

17. Eaha te mau haapapuraa e ua vai faito maitai noa Iesu i roto i to ’na oraraa?

17 Ua tapao a‘ena anei outou e e pinepine e mana‘o maruhi ore to te taata haroaroaraa ore? Oia, e titauhia te paari e vai faito noa ’i. No te mea e pee oia i te paari o te Atua, e vai faito maitai noa Iesu. Hau atu i te mau mea ê atoa, ua tuu oia i te mau mea pae varua i te parahiraa matamua i roto i to ’na oraraa. Ua rave hua noa oia i te ohipa pororaa i te parau apî maitai. “O to ’u hoi ïa tere i haere mai ai,” o ta ’na ïa i parau. (Mareko 1:38) E ere iho â te mau mea materia i te mea faufaa roa na ’na; e au ra e mea iti roa ta ’na i te reira paeau. (Mataio 8:20) E ere râ oia i te hoê taata haapae hua. Mai to ’na Metua, “te Atua no ’na te ao,” e taata oaoa o Iesu, e e faaoaoa atoa oia ia vetahi ê. (Timoteo 1, 1:11; 6:15) I to ’na haereraa i te hoê oroa faaipoiporaa—te hoê tupuraa taa ê te vai ra te upaupa, te himene, e te arearearaa—e ere ïa no te haapeapea ’tu. I te pauraa te uaina, ua faariro oia i te pape ei uaina maitatai, te hoê inu “e oaoa ai te aau o te taata nei.” (Salamo 104:15; Ioane 2:1-11) Ua farii Iesu e rave rahi titau-manihini-raa i te mau oroa  tamaaraa, e ua faaohipa pinepine oia i taua mau taime ra no te haapii.—Luka 10:38-42; 14:1-6.

18. Mea nafea to Iesu faaiteraa i te haroaroaraa hape ore i to ’na haaraa i nia i ta ’na mau pǐpǐ?

18 Ua faaite Iesu i te haroaroaraa hape ore i to ’na haaraa i nia ia vetahi ê. Maoti to ’na haroaroaraa i te huru o te taata i taa maitai ai ia ’na te huru o ta ’na mau pǐpǐ. Ua ite maitai oia e e ere ratou i te mea tia roa. Ua taa râ ia ’na to ratou mau huru maitatai. Ua itea ia ’na te ravea a teie mau taata ta Iehova i faatae. (Ioane 6:44) Noa ’tu to ratou mau hapa, ua faaite Iesu i te aau tae e tiaturi ia ratou. A faaite ai i taua tiaturi ra, ua horoa oia i te hoê hopoia teimaha na ta ’na mau pǐpǐ. Ua faaue oia ia ratou e poro i te parau apî maitai, e ua tiaturi oia i to ratou aravihi i te faatupu i taua faaueraa ra. (Mataio 28:19, 20) Te haapapu ra te buka Ohipa e ua rave maitai ratou i te ohipa ta ’na i faaue atu ia ratou. (Ohipa 2:41, 42; 4:33; 5:27-32) Papu maitai ïa, e paari to Iesu i te tiaturiraa ia ratou.

19. Mea nafea to Iesu faaiteraa e “te mǎrû nei” oia “e te haehaa o te aau”?

19 Mai ta tatou i tapao i roto i te pene 20, te taai ra te Bibilia i te haehaa e te mǎrû i te paari. Na Iehova iho â ïa i horoa i te hi‘oraa maitai roa ’‘e i te reira paeau. Eaha râ ïa no nia ia Iesu? Mea mahanahana ia hi‘o i te haehaa ta Iesu i faaite i to ’na haaraa i nia i ta ’na mau pǐpǐ. Ei taata tia roa, e hau ê oia ia ratou.  Aita râ oia i vahavaha i ta ’na mau pǐpǐ. Aita oia i tamata a‘enei i te oomo i te mana‘o e mea faufaa ore ratou aore ra e mea aravihi ore. Area râ, mea haapao maitai oia i to ratou mau taotiaraa e mea faaoromai i to ratou mau hapa. (Mareko 14:34-38; Ioane 16:12) E ere anei i te mea faahiahia e mea au atoa na te mau tamarii e tapiri atu ia Iesu? Papu maitai e ua anaanatae ratou ia ’na no te mea te taa ra ia ratou e “te mǎrû nei” oia “e te haehaa o te aau.”—Mataio 11:29; Mareko 10:13-16.

20. Mea nafea to Iesu faaiteraa i te mana‘o maruhi i to ’na haaraa i nia i te hoê vahine Etene ua uruhia to ’na tamahine i te demoni?

20 Ua pee Iesu i te haehaa o te Atua na roto i te tahi atu â ravea. E mana‘o maruhi aore ra tuu haere noa to ’na, ia faatia te aroha hamani maitai i te reira. A haamana‘o na, ei hi‘oraa, i te taime i taparuparu ai te hoê vahine Etene ia ’na e faaora i to ’na tamahine i uru-ino-hia i te demoni. Na roto e toru ravea taa ê, ua faaite na mua Iesu e eita oia e tauturu ia ’na—a tahi, na roto i te oreraa e pahono atu; a piti, na roto i te parau-tanai-raa ’tu e ua tonohia oia, eiaha i te Etene ra, i te ati Iuda ra râ; e a toru, na roto i te faahitiraa i te hoê faahoho‘araa e paturu ra i taua mana‘o ra ma te maitai. Ua onoono râ te vahine ra, o te haapapu ïa e e faaroo faahiahia roa to ’na. Ia hi‘o tatou i teie tupuraa taa ê, ua nafea o Iesu? Ua rave oia i te mea mau ta ’na i parau e eita oia e rave. Ua faaora oia i te tamahine o te vahine ra. (Mataio 15:21-28) E haehaa faahiahia mau tera, e ere anei? E a haamana‘o na, ua riro te haehaa ei niu no te paari mau.

21. No te aha e tia ’i ia tatou ia tutava i te pee i te huru taata, te paraparau, e te huru raveraa a Iesu?

21 E nehenehe mau tatou e mauruuru e te faaite maira te mau Evanelia i te mau parau e te mau ohipa a te taata paari roa ’‘e i ora a‘enei! E haamana‘o ana‘e e ua pee Iesu i to ’na Metua ma te tia roa. Na roto i te peeraa i te huru taata, te paraparau, e te huru raveraa a Iesu, te faahotu ra ïa tatou i te paari no nia mai. I roto i te pene i muri nei, e hi‘o tatou e nafea tatou ia faaohipa i te paari o te Atua i roto i to tatou oraraa.

^ par. 1 I te tau bibilia, e ravehia te mau tamuta no te patu i te fare, te hamani i te mau tauihaa fare, e te mau mauhaa faaapu. Ua papai o Justin, no te senekele piti T.T., no nia ia Iesu e: “E tamuta ta ’na ohipa matauhia a tia mai ai oia i roto i te taata nei, i hamani na oia i te mau arote e te mau zugo.”

^ par. 6 Te auraa o te ihoparau Heleni i hurihia ei “tapitapi,” e “faanevaneva [ïa] i te feruriraa.” I roto i te Mataio 6:25, e au te reira i te mǎta‘u haapeapea o te faanevaneva aore ra te haafeaa i te feruriraa, o te faaere hoi i te oaoa i roto i te oraraa.

^ par. 7 Oia mau, ua faaite te maimiraa a te ihi e e nehenehe te haapeapearaa e te hepohepo rahi roa e faatupu i te ma‘i mafatu e te tahi atu mau ma‘i e rave rahi o te haapoto i te oraraa.