Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 18

Te paari i roto i ‘te parau na te Atua’

Te paari i roto i ‘te parau na te Atua’

1, 2. Eaha te “rata” ta Iehova i papai mai na tatou, e no te aha?

TE HAAMANA‘O ra anei outou i te taime hopea i tae mai ai ta outou hoê rata a te hoê taata here e faaea ra i te vahi atea? Mea iti te mau mea o te faaoaoa ia tatou mai te hoê rata haavare ore a te hoê taata ta tatou e here. E oaoa tatou i te faaroo no nia i to ’na vai-maitai-raa, te mau mea ta ’na i farerei, e ta ’na mau opuaraa. E haafatata ’tu â taua paraparauraa ra i te feia here te tahi i te tahi, noa ’tu e mea atea te tahi i te tahi.

2 Eaha te nehenehe e faaoaoa ’tu â ia tatou i te fariiraa i te hoê poroi papaihia no ǒ i te Atua ta tatou e here ra? Mai te huru ra e ua papai Iehova i te hoê “rata” na tatou—ta ’na Parau, te Bibilia. I reira, te faaite maira oia o vai oia, eaha ta ’na i rave, eaha ta ’na e opua ra, e e rave rahi atu â. Ua horoa mai Iehova i ta ’na Parau no te mea te hinaaro ra oia ia fatata ’tu tatou ia ’na. Ua maiti to tatou Atua paari hope i te ravea maitai roa ’‘e no te paraparau mai ia tatou. E paari faaau ore to te huru i papaihia ’i te Bibilia e to tei papaihia i roto.

No te aha te hoê Parau papai?

3. Mea nafea to Iehova horoaraa i te Ture ia Mose ra?

3 E maere paha te tahi pae e, ‘No te aha Iehova i ore ai e faaohipa i te hoê ravea faahiahia ’tu â—ei hi‘oraa, te hoê reo no te ra‘i mai—no te paraparau i te taata?’ Ua paraparau iho â Iehova i te tahi taime mai te ra‘i mai na roto i te mau melahi ei tia no ’na. Ua na reira oia, ei hi‘oraa, i to ’na horoaraa i te Ture ia Iseraela. (Galatia 3:19) Mea hahano te reo mai te ra‘i mai—no reira te mau Iseraela tei riaria roa i ani ai eiaha Iehova ia paraparau mai ia ratou mai tera, na roto râ ia Mose. (Exodo 20:18-20) No reira te Ture, fatata hoi e 600 ture faataahia to roto, i parau-vaha-hia ’i ia Mose, tera parau e tera parau.

4. A faataa na no te aha te parau vaha e ere ai i te ravea maitai no te tuu mai i te mau ture a te Atua.

 4 Eaha râ ïa ahiri e aita roa ’tu taua Ture ra i papaihia? Ua nehenehe anei ïa ta Mose e haamana‘o i te mau parau atoa o taua ture i haamataratarahia ra e e tuu atu i te toea o te nunaa ra ma te hape ore? E to muri mai mau ui? E tiaturi noa anei ratou i te parau vaha? E ere te reira i te ravea maitai no te tuu mai i te mau ture a te Atua. A feruri na eaha te tupu mai ahiri e e titauhia ia faatia outou i te hoê aamu i te hoê anairaa taata roa na roto i te faatiaraa ’tu i te taata matamua e na ’na ’tu ai e faatia ’tu i te piti e na reira noa e ia tae roa i te hopea. E taa ê rahi mau paha te mea ta te taata hopea i faaroo, i te aamu mau. Aita te mau parau o te Ture a te Atua i fifi mai tera.

5, 6. Eaha ta Iehova i faaue ia Mose no nia i ta ’Na mau parau, e no te aha e riro ai ei haamaitairaa no tatou te fana‘oraa i te Parau papai a Iehova?

5 Ma te paari, ua maiti Iehova e haapapai i ta ’na mau parau. Ua faaue oia ia Mose e: “E papai oe i taua parau nei, o te huru hoi teie no te parau o te faufaa ta ’u e faaau ia oe, e ia Iseraela atoa nei.” (Exodo 34:27) I reira te haamataraa te tau o te papairaa Bibilia, i te matahiti 1513 H.T.T. I te roaraa o na 1 610 matahiti i muri mai, ua “parau riirii mai” Iehova “e rave rahi te huru o te parauraa mai” i na feia papai e 40 tei papai i te Bibilia. (Hebera 1:1) Na roto i taua taime ra, ua haapao maitai te feia papai hoho‘a paieti e hamani i te mau hoho‘a tano eiaha te mau Papai ia moe.—Ezera 7:6; Salamo 45:1.

6 Ua haamaitai mau â Iehova ia tatou na roto i te paraparauraa mai na roto i te papai. Ua tae a‘ena mai anei ta outou hoê rata ta outou i poihere roa—peneia‘e no te mea ua horoa mai te reira i te tamahanahanaraa i hinaarohia—e ua tapea noa mai outou i te reira a taio atu ai na nia iho e na nia iho? Mai te reira atoa te “rata” a Iehova na tatou. No te mea ua haapapai Iehova i ta ’na mau parau, e nehenehe ta tatou e taio tamau atu e e feruriruri atu. (Salamo 1:2) E noaa ia tatou “te  mahanahana o te parau i papaihia ra” i te taime atoa e hinaaro ai tatou.—Roma 15:4.

No te aha e rave ai e na te taata e papai?

7. E nafea te paari o Iehova e itehia ’i i roto i to ’na faaohiparaa i te taata papai?

7 Ua faaite Iehova i to ’na paari na roto i te raveraa e na te taata e papai i ta ’na Parau. A feruri na: Ahiri Iehova i rave e na te mau melahi e papai i te Bibilia, hoê â anei ïa anaanataeraa? Parau mau, e nehenehe ta te mau melahi e faataa ia Iehova ia au i to ratou mana‘o teitei, e faaite i to ratou here ia ’na, e e faatia i te aamu o te mau tavini haapao maitai a te Atua. E taa anei râ ia tatou te mana‘o o te mau varua poietehia, e hau ê hoi to ratou ite, to ratou paari, e to ratou puai i to tatou iho?—Hebera 2:6, 7.

“Te mau Papai atoa, e mea faaurua ïa e te Atua”

8. Mea nafea te vaiihoraahia ia faaohipa te feia papai Bibilia i to ratou iho feruriraa? (A hi‘o atoa i te  nota i raro i te api.)

8 Na roto i to ’na faaohiparaa i te taata papai, ua horoa Iehova i te mea noa ta tatou e hinaaro ra—te hoê buka ‘faauruahia e te Atua,’ o te haamana‘o râ i te taata. (Timoteo 2, 3:16) Mea nafea to ’na raveraa i te reira? I te rahiraa o te taime, e au ra e ua vaiiho oia ia faaohipa te feia papai i to ratou iho feruriraa no te maiti i “te parau fariihia ra; e o tei papaihia ra, e parau-tia ïa e te parau mau.” (Koheleta 12:10, 11) No reira e rau ai te huru papairaa o te Bibilia; e au noa hoi te mau papai i te huru oraraa e te huru taata o te taata papai taitahi. * Ua “riro” râ taua mau taata ra “ei auvaha no te Atua, mai te huru ra e ua ta‘ita‘ihia ratou e te varua mo‘a.” (Petero 2, 1:21, MN) No reira, i te pae hopea, o te “parau” iho â tera “na te Atua.”—Tesalonia 1, 2:13.

9, 10. No te aha maoti te raveraahia te taata papai e mahanahana ’tu â ’i e e anaanataehia ’tu â ’i te Bibilia?

9 Maoti te raveraahia te taata papai e mahanahana rahi ai e  e anaanatae-rahi-hia ’i te Bibilia. Hoê â te mau huru aau o te feia papai e to tatou. I te mea e mea tia ore ratou, ua faaû ratou i te ati e te faaheporaa mai to tatou iho. I te tahi taime, ua faaurua te varua o Iehova ia ratou e papai no nia i to ratou iho mau huru aau e mau tutavaraa. (Korinetia 2, 12:7-10) No reira ratou i papai ai no nia ia ratou iho, eita hoi ta te mau melahi e nehenehe e na reira.

10 E rave ana‘e, ei hi‘oraa, i te arii no Iseraela o Davida. I muri a‘e i to ’na raveraa i te tahi mau hara iino, ua fatu Davida i te hoê salamo i reira to ’na niniiraa i to ’na aau, a taparuparu ai i te Atua e faaore mai i ta ’na hara. Ua papai oia e: “Tamâ hua mai ia ’u i ta ’u nei hara. Te fa‘i nei hoi au i ta ’u nei hara, e te vai noa nei â to ’u ino i pihai iho ia ’u. Inaha, i fanau mai au ma te hara! e i tôhia vau e tau metua vahine ma te ino. Eiaha e faarue ia ’u i mua i to aro nei, eiaha hoi e rave ê atu i to [varua mo‘a] ia ’u nei. O ta te Atua tusia hinaaro ra, o te aau paruparu ra ïa; o te aau paruparu ra e te oto ra, e ore roa te Atua e vahavaha i te reira.” (Salamo 51:2, 3, 5, 11, 17; MN) Aita anei e taa ra ia outou te ahoaho o te taata papai? O vai maori râ te hoê taata tia ore o te nehenehe e faahiti i te mau huru aau hohonu mai tera?

No te aha te hoê buka no nia i te taata?

11. Teihea mau faahi‘oraa no nia i te oraraa mau i papaihia i roto i te Bibilia “ia ite tatou”?

11 Te vai ra te tahi atu mea o te faariro i te Bibilia ei mea anaanatae atu â. I te pae rahi, e buka tera no nia i te taata—te taata mau—tei tavini i te Atua e tei ore i tavini ia ’na. E taio tatou no nia i tei roohia e ratou, to ratou mau fifi, e mau oaoaraa. E ite tatou i te faahopearaa o ta ratou mau maitiraa i roto i te oraraa. Ua papaihia taua mau aamu ra “ia ite tatou.” (Roma 15:4) Na roto i teie mau faahi‘oraa no nia i te oraraa mau, e haapii mai Iehova ia au i te mau ravea e putapû ai to tatou aau. E rave ana‘e i te tahi mau hi‘oraa.

12. E nafea te mau aamu bibilia no nia i te mau taata taiva ia tauturu mai ia tatou?

 12 Te faaite ra te Bibilia no nia i te mau taata taiva, e te iino atoa, e te mea i roohia ’i ratou. I roto i taua mau aamu ra, te faaite ra ta ratou mau ohipa i te mau huru au ore, e ohie a‘e ïa ia tatou ia taa ’tu. Ei hi‘oraa, eaha te faaueraa eiaha e taiva e puai a‘e i te hi‘oraa oraora o teie huru e itehia i to Iuda raveraa i ta ’na opuaraa ino e haavare ia Iesu? (Mataio 26:14-16, 46-50; 27:3-10) E putapû a‘e to tatou aau i te mau aamu mai teie, o te tauturu ia tatou ia ite e ia patoi i te mau huru taata hairiiri.

13. E nafea te Bibilia ia tauturu mai ia taa ia tatou te mau huru maitatai au mau?

13 E faataa atoa te Bibilia i te mau tavini haapao maitai e rave rahi a te Atua. E taio tatou no nia i to ratou paieti. E ite tatou i te mau hi‘oraa oraora no nia i te mau huru maitatai ta tatou e hinaaro e faahotu no te haafatata ’tu i te Atua. E rave ana‘e i te faaroo, ei hi‘oraa. Te faataa ra te Bibilia i te faaroo e te faaite maira e mea faufaa roa te reira ia hinaaro tatou e faaoaoa i te Atua. (Hebera 11:1, 6) Te vai atoa ra râ te mau hi‘oraa oraora no nia i te faaohiparaa i te faaroo i roto i te Bibilia. A feruri na i te faaroo o Aberahama i to ’na tamataraa i te pûpû ia Isaaka. (Genese, pene 22; Hebera 11:17-19) Na roto i taua mau aamu ra, e aano atu â te auraa o te ta‘o ra “faaroo” e e taa-ohie-a‘e-hia. E paari mau to Iehova i te a‘oraa ia tatou eiaha noa ia faahotu i te mau huru maitatai au mau, i te horoaraa atoa mai râ i te mau hi‘oraa o te oraraa mau!

14, 15. Eaha ta te Bibilia e faaite maira no nia i te hoê vahine tei haere mai i te hiero, e eaha ta tatou e haapii no nia ia Iehova na roto i teie aamu?

14 E pinepine te mau aamu o te oraraa mau e itehia i roto i te Bibilia i te haapii mai i te hoê mea no nia i te huru o Iehova. E feruri ana‘e i ta tatou e taio no nia i te hoê vahine ta Iesu i hi‘opoa i roto i te hiero. Te parahi ra Iesu i pihai iho i te mau afata tao‘a, te mataitai ra oia i te taata ia tuu i ta ratou ô i roto. Mea rahi te feia tao‘a rahi tei haere mai e horoa i ‘te tiahapa no ta ratou tao‘a rahi.’ Ua mau noa râ te mata o Iesu i nia i te  hoê vahine ivi veve. “E piti lepeta, [mea iti roa hoi te faufaa],” ta ’na i horoa. * Tera ana‘e ta ’na moni e toe ra. Ua parau Iesu, hoê â roa hoi to ’na mana‘o e to Iehova i taua mea ra, e: “E rahi ta teie nei vahine ivi tao‘a ore i tuu i roto i te pueraa tao‘a nei i ta ratou atoa.” Ia au i taua mau parau ra, ua tuu oia hau atu i ta te toea atoa ra.—Mareko 12:41-44; MN; Luka 21:1-4; Ioane 8:28.

15 E ere anei i te mea faahiahia e, i roto i te taata atoa tei haere mai i te hiero i taua mahana ra, ua itehia ’tu teie vahine ivi e ua faahitihia i roto i te Bibilia? Na roto i teie hi‘oraa, te haapii maira Iehova e e Atua oia o te mauruuru. E oaoa oia i te farii i ta tatou mau ô horoahia ma te aau tae, aita e hi‘oraa ehia ta vetahi ê e nehenehe e horoa. Aita ’tu ravea maitai a‘e e haapii mai ai Iehova i teie parau mau mahanahana!

Te mea aita to roto i te Bibilia

16, 17. E nafea te paari o Iehova e itehia ’i i roto atoa i te mea ta ’na i maiti eiaha e tuu i roto i ta ’na Parau?

16 Ia papai outou i te hoê rata na te hoê taata here, mea taotiahia te mea ta outou e nehenehe e papai. E faaohipa ïa outou i te paari ia maiti outou i ta outou e papai. Oia atoa, ua maiti Iehova e faahiti i te tahi mau taata e te tahi mau tupuraa i roto i ta ’na Parau. I roto râ i teie mau aamu, eita te Bibilia e faaite pauroa i te mau mea rii atoa. (Ioane 21:25) Ei hi‘oraa, ia faaite te Bibilia i te haavaraa a te Atua, eita paha e horoahia te pahonoraa i ta tatou mau uiraa atoa. E itehia te paari o Iehova tae noa ’tu i roto i ta ’na i maiti eiaha e tuu i roto i ta ’na Parau. Eaha ïa?

17 Na roto i te huru i papaihia ’i te Bibilia, e tamatahia eaha to roto i to tatou aau. Te na ô ra te Hebera 4:12 e: “E mea ora hoi te parau [aore ra, poroi] a te Atua, e te puai rahi, e te ooi  rahi hoi to te reira i to te ‘o‘e mata piti ra, i te putapupû-roa-raa hoi e taa ê noa ’tu te varua e te aau . . . e te hi‘opoa hoi i te mana‘o e te opua o te aau ra.” E haere te poroi o te Bibilia i te hohonuraa, e e faaite i to tatou huru feruriraa e mau mana‘o turai mau. E pinepine te feia o te taio ma te aau faahapa i te turori i te mau aamu aita i navai te parau i roto e mauruuru ai ratou. E feaa atoa paha taua huru taata ra e mea î mau anei Iehova i te here, te paari e te parau-tia.

18, 19. (a) No te aha e ore ai e tia ia tatou ia aueue ia faahiti te hoê aamu bibilia taa maitai i te tahi mau uiraa eita e ite-oioi-hia te mau pahonoraa? (b) Eaha te hinaarohia e taa ’i ia tatou te Parau a te Atua, e e nafea te reira e haapapu ai i te paari rahi o Iehova?

18 I te tahi roa ’‘e pae, ia faahohonu maitai tatou i te Bibilia ma te aau rotahi, e ite mai tatou ia Iehova i roto i te huru tupuraa ta te Bibilia taatoa e faaite ra. No reira, eita tatou e aueue ia faahiti te hoê aamu i te tahi mau uiraa eita e ite-oioi-hia te mau pahonoraa. Ei hi‘oraa: Ia faanaho tatou i te mau tuhaa o te hoê hoho‘a rahi tapûpûhia, eita paha e itea oioi mai ia tatou te hoê tuhaa taa maitai aore ra aita tatou e ite ra e nafea te hoê tuhaa e ô ai i roto. Teie râ, ua navai paha te mau tuhaa i tapiripirihia ia taa ia tatou mai te aha te huru o te hoho‘a i te pae hopea. Oia atoa, ia haapii tatou i te Bibilia, e ite mǎrû mai tatou i te huru Atua o Iehova, e e noaa mai te hoê hoho‘a taa maitai. Noa ’tu e eita e taa oioi ia tatou te hoê aamu aore ra aita tatou e ite ra e nafea te reira e au ai e te huru o te Atua, ua haapii maitai a‘ena mai ta tatou haapiiraa bibilia no nia ia Iehova e ia ite tatou e e Atua oia o te î mau â i te here e te parau-tia.

19 Ia taa ia tatou te Parau a te Atua, e tia ïa ia tatou ia taio e ia haapii atu ma te aau rotahi e te feruriraa faatia pae tahi ore. E ere anei te reira i te haapapuraa o te paari rahi o Iehova? E nehenehe ta te taata maramarama e papai i te mau buka e taa noa i “te feia paari e te ite.” No te papai râ i te hoê buka e taa noa i te feia mea tano to ratou mana‘o turai—e titauhia ïa te paari o te Atua!—Mataio 11:25.

 Te hoê buka î i te “paari o te ohipa”

20. No te aha e riro ai e o Iehova ana‘e te nehenehe e faaite mai i te huru oraraa maitai roa ’‘e, e eaha to roto i te Bibilia o te nehenehe e tauturu mai?

20 I roto i ta ’na Parau, te faaite maira Iehova i te huru oraraa maitai roa ’‘e. Ei Atua tei poiete ia tatou, mea ite a‘e oia i to tatou mau hinaaro ia tatou iho. E aita i taui te mau hinaaro tumu o te taata—tae noa ’tu te hinaaro e ite mai i te here, te oaoa, e ia manuïa te mau faahoaraa. Ua î te Bibilia i te “paari o te ohipa” o te nehenehe e tauturu ia tatou ia ora i te oraraa faahiahia. (Maseli 2:7, MN) Te vai ra i roto i te tuhaa taitahi o teie buka haapiiraa te hoê pene o te faaite e nafea ia faaohipa i te a‘oraa paari o te Bibilia, e rave noa ana‘e na hoê hi‘oraa.

21-23. Eaha te a‘oraa paari e nehenehe e tauturu ia tatou eiaha ia atuatu i te riri e te inoino?

21 Ua tapao a‘ena anei outou e e pinepine te feia o te atuatu i te inoino i te haamauiui ia ratou iho i te pae hopea? E hopoia teimaha te inoino ia amo i roto i te oraraa. Ia atuatu tatou i te reira, to nia noa to tatou mana‘o i te reira, e ore atu to tatou hau, e to tatou oaoa. Te faaite ra te mau maimiraa a te ihi e e nehenehe te atuaturaa i te riri e haamaraa i te fifi o te ma‘i mafatu e e faatupu i te tahi atu mau ma‘i tupu tamau e rave rahi. Mea maoro a‘enei hou taua mau maimiraa a te ihi ra, ua parau te Bibilia ma te paari e: “Faarue i te tairoiro, [e haapae i] te riri.” (Salamo 37:8; MN) E nafea râ tatou e na reira ’i?

22 Te horoa maira te Parau a te Atua i teie a‘oraa paari: “Na te [haroaroaraa] o te taata e ore e riri vave ai; o to ’na ïa maitai te faaore i te hara ra.” (Maseli 19:11; MN) Te haroaroaraa, o te aravihi ïa i te ite i te hohonuraa, i te hi‘o i te ore e itea ia hi‘o. E atuatu te haroaroaraa i te maramarama, no te mea e tauturu te reira ia taa maite no te aha te hoê taata i parau ai aore ra i haa ’i mai tera. E tauturu te tutavaraa ia taa ia tatou to ’na mau mana‘o turai mau, to ’na mau huru aau mau, e te mau huru tupuraa mau ia faaore tatou i te mau mana‘o faaino e te mau huru aau iino i nia ia ’na.

 23 Teie te tahi atu â a‘oraa bibilia: “E faaoromai te tahi i te tahi, e e faaore te tahi i ta te tahi hapa.” (Kolosa 3:13) Te na ô ra ïa te parau ra “e faaoromai te tahi i te tahi” e eiaha e fatimauu ia vetahi ê, e haamahu i te mau huru taata ta tatou e taahoa ra. E tauturu taua faaoromai ra eiaha tatou ia atuatu i te mau inoino rii. E ‘faaore i te hapa,’ e vaiiho ïa i te inoino. Ua ite to tatou Atua paari e mea hinaarohia ia faaore tatou i ta vetahi ê hapa mai te peu e e tano ia na reira. E ere noa no to ratou maitai, no to tatou iho râ hau o te feruriraa e o te aau. (Luka 17:3, 4) Auê ïa paari e itehia i roto i te Parau a te Atua e!

24. Eaha te faahopearaa ia faaau tatou i to tatou oraraa i nia i te paari o te Atua?

24 Ma te turaihia e to ’na here otia ore, ua hinaaro Iehova e paraparau mai ia tatou. Ua maiti oia i te ravea maitai roa ’‘e—te “rata” i papaihia e te taata i raro a‘e i te aratairaa a te varua mo‘a. Ei faahopearaa, e itehia to Iehova iho paari i roto i to ’na mau api. E “parau mau” roa teie paari. (Salamo 93:5) A faaau ai tatou i to tatou oraraa i nia i te reira e a faaite ai tatou i te reira ia vetahi ê, e fatata noa ’tu iho â tatou i to tatou Atua paari hope. I roto i te pene i muri nei, e tauaparau tatou i te tahi atu hi‘oraa faahiahia o te paari ite atea o Iehova: to ’na aravihi i te tohu i to a muri a‘e e te faatupu i ta ’na opuaraa.

^ par. 8  Ei hi‘oraa, ua rave Davida, te hoê tiai mamoe, i te mau hi‘oraa no roto i te oraraa tiai mamoe. (Salamo 23) Ua faahiti rahi o Mataio, te hoê telona, i te mau numera e te mau faufaa moni. (Mataio 17:27; 26:15; 27:3) Ua faaohipa Luka, te hoê taote, i te mau ta‘o o te au i to ’na oraraa taata rapaau ma‘i.—Luka 4:38; 14:2; 16:20.

^ par. 14 E lepeta na moni e piti ra, o te moni ati Iuda nainai roa ’‘e tera e vai ra i taua tau ra. E piti lepeta, o te moni ïa no te 1 tuhaa i nia i te 64 o te mahana ohiparaa. Eita nei e navai no te hoo mai i te hoê noa manu rii, te manu mâmâ roa ’‘e e ravehia ei maa na tei veve.

No te ite atu â

E haafaufaa roa i te taioraa Bibilia

E faufaahia tatou i te Bibilia i te taime noa e haapii ai e e faaohipa ’i tatou i ta ’na e parau ra. A haapii e nafea ia haamaitai roa ’tu â i ta oe taioraa Bibilia.

No te aha te mau Ite no Iehova i nenei ai te Huriraa o te ao api?

No te aha e mea taa ê ai te huriraa o te Huriraa o te ao api?