Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 1

“Inaha, teie to tatou Atua”

“Inaha, teie to tatou Atua”

1, 2. (a) Eaha te mau uiraa ta outou e hinaaro ra e ui atu i te Atua? (b) Eaha ta Mose i ui atu i te Atua?

E NEHENEHE anei ta outou e feruri e te paraparau ra outou e te Atua? E î roa outou i te mǎta‘u faatura i te mana‘o-noa-raa e te paraparau maira te Arii o te ao taatoa ia outou! E haamarirau outou i te omuaraa, i muri iho râ, e nehenehe ta outou e pahono. E faaroo mai oia, e pahono mai, e e faaore atoa i to outou taiâ e ui i te uiraa atoa ta outou i hinaaro. Ei teie nei, eaha te uiraa ta outou e ui atu?

2 Mea maoro a‘enei, tera mau te huru tupuraa o te hoê taata. O Mose to ’na i‘oa. E maere râ paha outou i te uiraa ta ’na i maiti e ui atu i te Atua. Aita oia i ui no nia ia ’na iho, to ’na a muri a‘e, aore ra te huru hepohepo o te huitaata. Ua ui râ oia o vai to te Atua i‘oa. E mana‘o paha outou e mea ê roa tera, ua ite a‘ena hoi Mose i te i‘oa o te Atua. E auraa hohonu atu â ïa to ta ’na uiraa. Oia mau, o te uiraa faufaa roa ’‘e tera ta Mose i ui. E faahopearaa to te pahonoraa i nia ia tatou paatoa. E nehenehe te reira e tauturu ia outou ia rave i te hoê taahiraa faufaa roa no te haafatata ’tu i te Atua. E nafea hoi? E hi‘o ana‘e i taua aparauraa taa ê ra.

3, 4. Eaha te mau tupuraa tei aratai atu i te aparauraa a Mose e te Atua ra, e eaha te vahi faufaa o taua aparauraa ra?

3 E 80 matahiti to Mose. E maha ahuru matahiti atura to ’na faaea-atea-raa i to ’na nunaa, te mau Iseraela, e faatîtîhia ra i Aiphiti. I te hoê mahana, a tiai ai oia i te mau nǎnǎ a to ’na metua hoovai tane, ua ite oia i te hoê ohipa ê roa. Te ama ra te auahi i nia i te hoê pu aihere, aita râ te reira e pau ra. Te ama noa ra te reira, a anaana ’i mai te hoê fare mori i nia i te pae mou‘a. Ua tapiri atu Mose e hi‘opoa. Ua maere mau â oia i to te hoê reo paraparauraa mai ia ’na mai  roto mai i te auahi! Na roto i te arai o te hoê melahi ei auvaha, ua aparau maite ihora te Atua e o Mose. E, mai ta outou paha i ite, faaue atura te Atua ia Mose o te otohetohe ra e faarue i to ’na oraraa hau e e ho‘i i Aiphiti e faaora i te mau Iseraela i te faatîtîraa.—Exodo 3:1-12.

4 I taua taime ra, e nehenehe ta Mose e ui i te uiraa atoa ta ’na i hinaaro. A tapao na râ i te uiraa ta ’na i maiti e ui: “Ia tae râ vau i te tamarii a Iseraela ra, e ia parau atu vau ia ratou e, I tonohia mai au e te Atua o to outou mau metua ia outou nei, ia na ô mai râ ratou ia ’u e, O vai te i‘oa? e nahea ’tu vau ia ratou?”—Exodo 3:13.

5, 6. (a) Te haapii maira te uiraa a Mose i teihea noa ’‘e parau mau faufaa roa? (b) Eaha te ohipa hapa i ravehia i nia i te i‘oa o te Atua? (c) No te aha e riro ai ei mea faahiahia roa e ua faaite te Atua i to ’na i‘oa i te taata?

5 Te haapii maira taua uiraa ra e na mua roa, e i‘oa to te Atua. Eiaha tatou ia haafaufaa ore i teie noa ’‘e parau mau. Te na reira nei râ te taata e rave rahi. Ua iritihia te i‘oa o te Atua mai roto mai i te mau Bibilia e rave rahi e ua monohia e te mau i‘oa toroa mai “te Fatu” e “te Atua.” O te ohipa peapea roa ’‘e e te hapa roa ’‘e teie i ravehia a‘enei na nia i te faaroo. Inaha hoi, eaha te mea matamua ta outou e rave ia farerei outou i te hoê taata? Eita anei outou e ui o vai to ’na i‘oa? Hoê â atoa ia haamatau tatou i te Atua. E ere oia i te hoê mea ora i‘oa ore, te atea, e te naea ore ia ite e ia taa. Noa ’tu e eita oia e itehia, e ihotaata oia, e e i‘oa to ’na—o Iehova.

6 Hau atu â, ia faaite te Atua i to ’na i‘oa, te fatata roa maira ïa te hoê mea taa ê e te re‘are‘a rahi. Te titau maira oia e haamatau ia ’na. Te hinaaro ra oia ia rave tatou i te maitiraa maitai roa ’‘e ta tatou e nehenehe e rave i roto i te oraraa—e haafatata ’tu ia ’na. Ua rave râ Iehova hau atu i te faaite-noa-raa mai i to ’na i‘oa. Ua haapii atoa mai oia mai te aha to ’na huru.

 Te auraa o te i‘oa o te Atua

7. (a) Eaha te auraa o te i‘oa o te Atua? (b) Eaha mau na ta Mose i hinaaro e ite i to ’na uiraa o vai te i‘oa o te Atua?

7 Na Iehova i maiti i to ’na iho i‘oa, te hoê i‘oa e auraa rahi to ’na. “Na ’na e faariro” te auraa o te i‘oa ra “Iehova.” Mea otahi oia i roto i te ao taatoa, na ’na hoi i hamani i te mau mea atoa e na ’na e faatupu i ta ’na mau opuaraa atoa. E faatupu teie mana‘o i te mǎta‘u faatura. Tera noa anei râ te auraa o te i‘oa o te Atua? E au ra e te hinaaro ra Mose e ite hau atu â. Ua ite oia e o Iehova te Atua poiete e o vai te i‘oa o te Atua. Ua faaohipa ê na te taata i taua i‘oa ra ahia ’tura senekele. Ma te feaa ore, i to ’na uiraa o vai te i‘oa o te Atua, te ui ra Mose no nia i te ihotaata no ’na tera i‘oa. Oia mau, te na ô ra ïa oia e: ‘Eaha ta ’u e nehenehe e parau atu i to nunaa ra o Iseraela no nia ia oe e ia faaroo ratou ia oe, e ia papu ia ratou e e faaora mau oe ia ratou?’

8, 9. (a) Mea nafea to Iehova pahonoraa i te uiraa a Mose, e eaha te vahi hape o te huru i huri-pinepine-hia ’i ta ’Na pahonoraa? (b) Eaha te auraa o te parau ra “E riro vau mai ia ’u e riro mai”?

8 Ua faaite atura Iehova i te hoê tuhaa faahiahia o to ’na huru, o tei taaihia i te auraa o to ’na i‘oa. Ua parau oia ia Mose e: “E riro vau mai ia ’u e riro mai.” (Exodo 3:14, MN) E rave rahi Bibilia tei huri mai teie: “Te vai nei au mai ia ’u e vai nei.” Te faaite ra râ te tahi mau huriraa papu e aita te Atua e parau noa ra e te vai mau ra oia. Te haapii ra râ Iehova ia Mose, ia tatou pauroa atoa ïa, e e “riro” oia aore ra e faaoti oia i te riro i tei titauhia ia tupu ta ’na mau parau fafau. Mea papu maitai te huriraa a J. B. Rotherham i teie irava: “E riro mai au ei mea atoa ta ’u e au.” Te faataa ra te hoê taata aravihi i te reo Hebera o te Bibilia i taua parau ra mai teie: “Noa ’tu eaha te huru tupuraa aore ra te hinaaro . . . , e ‘riro’ te Atua ei ravea no taua hinaaro ra.”

9 Eaha to te reira auraa no te mau Iseraela? Noa ’tu eaha te haafifiraa e vai ra i mua ia ratou, noa ’tu te fifi o te huru tupuraa ta ratou paha e farerei, e riro mai Iehova ei mau mea  atoa e hinaarohia no te faaora ia ratou mai te faatîtîraa e te aratai ia ratou i te Fenua Tǎpǔhia. Papu mau e ua faatupu taua i‘oa ra i te tiaturi i te Atua. E nehenehe e na reira atoa no tatou i teie tau. (Salamo 9:10) No te aha?

10, 11. E nafea te i‘oa o Iehova e titau mai ai ia mana‘o ia ’na mai te Metua ite roa ’‘e i te faaau ia ’na iho e te maitai roa ’‘e e nehenehe e ferurihia? A horoa na i te hi‘oraa.

10 Ei hi‘oraa: Ua ite te mau metua e e tia ia ratou ia faaau ia ratou iho ia haapao ratou i ta ratou mau tamarii. I te roaraa o te hoê noa mahana, e nehenehe te hoê metua e titauhia ia riro ei utuutu ma‘i, ei tutu maa, ei orometua haapii, ei taata a‘o, ei haava, e e rave rahi atu â. Mea rahi o te mana‘o ra e ua moe roa ratou i raro a‘e i te mau hopoia huru rau e titauhia ra ia amo ratou. Te ite ra ratou e te tiaturi roa ra ta ratou mau tamarii ia ratou, eita roa ’tu ratou e feaa e e nehenehe ta Papa aore ra ta Mama e tamǎrû i te mauiui, e faaafaro i te mau peapea atoa, e tataî i te mau tao‘a hauti atoa, e e pahono i te mau uiraa atoa e hiti taue mai i roto i to ratou feruriraa ui maere. Te mana‘o ra te tahi mau metua e eita ratou e au ia tiaturihia e i te tahi taime, e inoino ratou no to ratou mau taotiaraa. Te mana‘o ra ratou e aita roa ’tu ratou e tano ra no te amo e rave rahi o teie mau hopoia.

11 E metua î i te here atoa o Iehova. Teie râ, ma te ore e ofati i ta ’na iho mau ture aveia tia roa, aita e mea eita ta ’na e nehenehe e riro mai no te haapao i ta ’na mau tamarii i te fenua nei ma te ravea maitai roa ’‘e. Te titau maira ïa to ’na i‘oa, o Iehova, ia mana‘o ia ’na mai te Metua maitai roa ’‘e e nehenehe e ferurihia. (Iakobo 1:17) Aita i maoro to Mose e to te mau Iseraela haapao maitai atoa iteraa e e au iho â Iehova i to ’na i‘oa. Ua mataitai ratou ma te mǎta‘u faatura a riro ai oia ei Tomana Faehau pau ore, Fatu o te mau puai atoa o te natura, Iriti ture faito ore, Haava, Tahu‘a fare, Horoa maa e te pape, ei Ihotaata o te paruru i te ahu e te tiaa—e te vai ra ’tu â.

12. Mea nafea te haerea o Pharao i nia ia Iehova i taa ê ai i to Mose?

 12 Mea na reira ïa to te Atua faaiteraa i to ’na i‘oa e te mau mea faahiahia no nia i to ’na huru, e to ’na atoa haapapuraa e e parau mau iho â ta ’na i faahiti no nia ia ’na. Aita e feaaraa, te hinaaro ra te Atua ia ite tatou ia ’na. E nafea ïa tatou? Ua hinaaro Mose e ite i te Atua. Ua aratai taua hinaaro puai ra i te oraraa o Mose e ua haafatata roa ’tu oia i to ’na Metua i te ra‘i. (Numera 12:6-8; Hebera 11:27) Ma te peapea, mea iti o to Mose tau tera atoa to ratou hinaaro. I to Mose faahitiraa i te i‘oa o Iehova i mua ia Pharao, ua pahono taua arii Aiphiti teoteo ra e: “O vai Iehova?” (Exodo 5:2) Aita Pharao i hinaaro e ite hau atu â no nia ia Iehova. Area râ, ua patoi oia ma te tâhitohito i te Atua o Iseraela mai te hoê mea faufaa ore. Ua parare roa taua huru hi‘oraa ra i teie tau. E huna te reira i te parau mau faufaa roa ’‘e i mua i te taata—o Iehova te Fatu e Arii.

Te Fatu e Arii ra o Iehova

13, 14. (a) No te aha i horoahia ’i te mau i‘oa toroa e rave rahi no Iehova i roto i te Bibilia, e eaha te tahi o te reira? (A hi‘o i te tumu parau tarenihia “ Te tahi mau i‘oa toroa o Iehova.”) (b) No te aha o Iehova ana‘e te tia ia parauhia te “Fatu e Arii”?

13 No te ite o Iehova i te faaau ia ’na iho e tano ai ia ’na te mau i‘oa toroa e rave rahi i roto i te Bibilia. Eita teie mau i‘oa toroa e hau a‘e i to ’na i‘oa; e haapii hau atu â râ te reira ia tatou no nia i te auraa o to ’na i‘oa. Ei hi‘oraa, e parauhia oia te “Fatu e Arii ra o Iehova.” (Samuela 2, 7:22, MN) Te faaite maira taua i‘oa toroa teitei ra, o te itehia e mau hanere taime i roto i te Bibilia, i te tiaraa o Iehova. O o ’na ana‘e te tia ia riro ei Arii o te ao taatoa. A hi‘o na no te aha.

14 Mea otahi o Iehova ei Atua Poiete. Te na ô ra te Apokalupo 4:11 e: “E au te hanahana ia oe, e te Fatu, e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ’i ratou.” Eita teie mau parau hanahana e au i te tahi noa ’‘e mea ora ê atu. Maoti Iehova i oti mai ai te mau mea atoa i roto i te ao taatoa! Aita  e feaaraa, e au ia Iehova te tura, te mana e te hanahana e au i te Fatu e Arii e Tei poiete i te mau mea atoa.

15. No te aha Iehova e parauhia ’i “te Arii hau mure ore”?

15 Te tahi atu i‘oa toroa i tuuhia i nia noa ia Iehova, o “te Arii hau mure ore” ïa. (Timoteo 1, 1:17; Apokalupo 15:3) Eaha to te reira auraa? Mea fifi ia taa no to tatou feruriraa taotiahia, mea mure ore râ Iehova i na pae e piti atoa ra—te tau a hemo e te tau a muri. Te na ô ra te Salamo 90:2 e: “Te vai ra oe, e te Atua, mai tahito mai â e a muri noa ’tu!” Aita ïa to Iehova e haamataraa; ua vai noa iho â oia. E parauhia oia ma te tano “To te mau mahana tahito ra,”—ua vai noa oia mai te tau mai â hou a oti mai ai te taata atoa aore ra te mau mea atoa i roto i te ao nui! (Daniela 7:9, 13, 22) O vai te nehenehe mau e patoi i to ’na tiaraa e riro ei Fatu e Arii?

16, 17. (a) No te aha tatou e ore ai e ite ia Iehova, e no te aha tatou e ore ai e maere i te reira? (b) I teihea paeau Iehova e riro ai ei mea mau a‘e i te mau mea atoa ta tatou e ite aore ra e fafa?

16 Teie râ, te patoi mau ra te tahi pae i taua tiaraa ra, mai ia Pharao. Te hoê pae o te fifi, o te mea ïa e e tiaturi rahi roa te taata tia ore i ta to ratou mata e ite. Eita tatou e ite i te Fatu e Arii. E varua ora oia, eita e itehia e te mata taata. (Ioane 4:24) Hau atu â, ia tia noa ’tu te hoê taata tino i‘o e te toto i pihai roa i te Atua ra o Iehova, e pohe te noaa mai. Ua na ô Iehova iho ia Mose e: “E ore oe e tia ia hi‘o mai i tau mata; e ore roa hoi te hoê taata e ora ia na reira i te hi‘o mai ia ’u.”—Exodo 33:20; Ioane 1:18.

17 Eiaha tatou ia maere i te reira. Ua noaa ia Mose i te hi‘o i te hoê noa tuhaa o to Iehova hanahana, papu maitai ïa e mea na roto i te hoê melahi tei riro ei tia. Eaha te faahopearaa? I muri a‘e, ua “anaana” te mata o Mose no te tahi maa taime. Ua mǎta‘u te mau Iseraela i te hi‘o roa ’tu i te mata o Mose. (Exodo 33:21-23; 34:5-7, 29, 30) Papu mau ïa e aita e taata e nehenehe e hi‘o atu i te Fatu e Arii iho ma to ’na hanahana atoa! O te auraa anei ïa e e ere oia i te mea mau mai te mau mea atoa ta tatou e nehenehe e hi‘o e e fafa?  Eita, e farii iho â tatou e te vai mau ra te mau mea e rave rahi aita tatou e ite ra—te mata‘i, te mau aru radio, e te mau mana‘o, ei hi‘oraa. Hau atu â, e vai noa Iehova, eita te tau e mairi ra, noa ’tu ehia rahiraa miria matahiti, e taui ia ’na! I te reira paeau, mea mau roa ’tu â ïa oia i te mau mea atoa ta tatou e fafa aore ra e ite, e tahito e e pê atu hoi te ao materia. (Mataio 6:19) E mana‘o anei râ tatou ia ’na mai te tahi noa puai materia ore e te feruriraa ore aore ra te hoê Tumu Matamua papu ore? E hi‘o ana‘e ïa.

Te hoê Atua e huru ihotaata to ’na

18. Eaha te orama i tae mai ia Ezekiela ra, e eaha ta te mata toomaha o na “mea ora” i pihai ia Iehova e faataipe ra?

18 Noa ’tu e eita tatou e ite i te Atua, te vai ra te mau irava faahiahia i roto i te Bibilia o te horoa mai i te ravea e hi‘o atu i nia i te ra‘i iho. Hoê hi‘oraa, o te pene matamua ïa o te Ezekiela. Ua tae mai te hoê orama no nia i te faanahonahoraa a Iehova ia Ezekiela ra, ua ite oia i te reira mai te hoê pereoo rahi i te ra‘i. Mea horuhoru iho â râ te faataaraa i te mau varua ora puai e haaati ra ia Iehova. (Ezekiela 1:4-10) E taairaa piri roa to teie na “mea ora” e Iehova, e te faaite maira to ratou huru rapaeau i te tahi mea faufaa no nia i te Atua ta ratou e tavini ra. E maha mata to ratou taitahi—to te puaatoro oni, te liona, te aeto, e to te taata. Te faataipe ra ïa te reira i na huru maitatai taa ê e maha o Iehova.—Apokalupo 4:6-8, 10.

19. Eaha te huru maitai e faahoho‘ahia e (a) te mata puaatoro oni? (b) te mata liona? (c) te mata aeto? (d) te mata taata?

19 I roto i te Bibilia, e faahoho‘a pinepine te puaatoro oni i te puai, e mea tano roa no te mea e animara puai roa tera. Area te liona ra, e faataipe pinepine ïa i te parau-tia, e titau hoi te parau-tia mau i te itoito, te hoê huru matauhia o te mau liona. Mea matauhia te mau aeto no to ratou mata maramarama roa o te ite i te mau mea nainai roa ehia kilometera i te atea. E faahoho‘a maitai ïa te mata aeto i te  paari ite atea o te Atua. E te mata taata? O te taata ana‘e, tei hamanihia ia au i te huru o te Atua, te nehenehe e pee i te huru maitai rahi roa ’‘e o te Atua—te aroha. (Genese 1:26) No te pinepine teie mau huru o Iehova—te puai, te parau-tia, te paari, e te aroha—i te haamahitihitihia i roto i te Bibilia, e nehenehe e parauhia e o te mau ateriputi rarahi tera o te Atua.

20. E tia anei ia tatou ia haapeapea e ua taui paha te huru o Iehova, e no te aha outou e na reira ’i i te pahono?

20 E tia anei ia tatou ia haapeapea e ua taui paha te Atua i roto i te mau tausani matahiti i muri a‘e i to ’na faataaraahia i roto i te Bibilia? Eita, eita te huru o te Atua e taui. Te na ô maira oia e: “O Iehova hoi au, aore o ’u e huru ê.” (Malaki 3:6) Maoti i te taui taue noa, ua riro Iehova ei Metua maitai roa ia haapao oia i te huru tupuraa taitahi. E faaite oia i taua mau huru to ’na e tano roa ’‘e ra. I roto i na huru maitatai toomaha, te mea rahi roa ’‘e, o te aroha ïa. E itehia te reira i roto i te mau mea atoa ta te Atua e rave. E faaohipa oia i to ’na puai, to ’na parau-tia, e to ’na paari ma te aroha. Oia mau, e parau taa ê to roto i te Bibilia no nia i te Atua e teie huru maitai. Te na ô ra e: “E aroha hoi te  Atua.” (Ioane 1, 4:8) A tapao na e aita e parauhia ra e e aroha to te Atua aore ra ua î te Atua i te aroha. Te parauhia ra râ e o te aroha iho te Atua. Na te aroha, to ’na natura mau, e aratai i te mau mea atoa ta ’na e rave.

“Inaha, teie to tatou Atua”

21. Mai te aha to tatou huru a ite maitai noa ’tu ai tatou i te mau huru maitatai o Iehova?

21 Ua ite a‘ena anei outou i te hoê tamarii ia faaite i to ’na metua tane i to ’na mau hoa e ia parau ma te oaoa e te haapeu ino ore e, “O to ’u papa tera”? E tumu maitai e na reira atoa ’i te feia haamori i te Atua no nia ia Iehova. Te tohu ra te Bibilia no nia i te hoê tau i reira te feia haapao maitai e parau ai e: “Inaha, teie to tatou Atua.” (Isaia 25:8, 9) Ia rahi noa ’tu to outou maramarama i te mau huru maitatai o Iehova, e rahi noa ’tu outou i te taa e to outou te Metua maitai roa ’‘e e nehenehe e ferurihia.

22, 23. E nafea te Bibilia e faataa ’i i to tatou Metua i te ra‘i, e nafea tatou i ite ai e te hinaaro ra oia ia fatata ’tu tatou ia ’na?

22 E ere teie Metua i te mea toetoe, te mea atea roa—noa ’tu te mea ta te tahi feia haapaoraa e philosopho mana‘o rumaruma i haapii. Eita ïa tatou e anaanatae atu i te hoê Atua toetoe, e aita te Bibilia e faataa ra i to tatou Metua i te ra‘i mai te reira. Area râ, te parauhia ra oia “te Atua no ’na te ao.” (Timoteo 1, 1:11) To ’na mau huru aau, mea puai ïa e te mǎrû atoa. E ‘ooo roa to ’na aau’ ia ofati ta ’na mau mea maramarama i poiete i te mau faaueraa ta ’na e horoa ra ia maitai ratou. (Genese 6:6; Salamo 78:41) Ia haa râ tatou ma te paari ia au i ta ’na Parau, e ‘faaoaoa’ tatou i ‘to ’na aau.’—Maseli 27:11.

23 Te hinaaro ra to tatou Metua ia fatata ’tu tatou ia ’na. Te faaitoito maira ta ’na Parau ia ‘perehahu atu ia ’na e ia itea ’tu, aita râ oia i atea ê atu ia tatou atoa nei.’ (Ohipa 17:27) E nafea râ e nehenehe ai i te taata haihai e haafatata ’tu i te Fatu e Arii o te ao taatoa?