Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 5

Mana poiete—“Tei hamani i te mau ra‘i e te fenua”

Mana poiete—“Tei hamani i te mau ra‘i e te fenua”

1, 2. E nafea te mahana ia haapapu i to Iehova mana poiete?

UA TIA a‘ena anei outou i pihai iho i te hoê auahi i te hoê po toetoe? Peneia‘e ua toro outou i to outou na rima i te atearaa tano noa i te auahi no te fana‘o i te mahanahana. Ia pi‘o outou i mua e ia piri roa ’tu, eita ta outou e nehenehe faahou e faaoromai i te ahu. Ia otohe outou i muri e ia atea roa, e roohia outou i te mata‘i toetoe o te po, e e toetoe roa outou.

2 Te vai ra te hoê “auahi” o te haamahanahana i to tatou iri ia ao. Te ama ra taua “auahi” ra i te atearaa fatata 150 mirioni kilometera! * Eaha râ te mahana i te puai, inaha hoi, te fana‘o ra outou i to ’na ahu i taua atearaa ra! Teie râ, te haaati ra te fenua i taua umu atomi ahu hahano ra i te atearaa tano noa. Ia fatata roa ’tu, era te pape o te fenua ua mǎrô; ia atea roa, era ïa ua toetoe roa. I roto i na tupuraa hope, mea pohe ïa to tatou paraneta. Mea faufaa te maramarama o te mahana no te ora i nia i te fenua, mea mâ atoa e te maitai, e te au mau.—Koheleta 11:7.

“Na” Iehova “i rave i te maramarama e te mahana”

3. Te haapapu ra te mahana i teihea parau mau faufaa?

3 Aita râ te rahiraa o te taata e tâu‘a rahi ra i te mahana, noa ’tu e ua taaihia to ratou ora i te reira. No reira, te ere ra ratou i ta te mahana e nehenehe e haapii mai. Te na ô ra te Bibilia no nia ia Iehova e: “Na oe . . . i rave i te maramarama e te mahana!” (Salamo 74:16) Oia, e faahanahana te mahana ia Iehova, “tei hamani i te mau ra‘i e te fenua.” (Salamo 19:1; 146:6) O te hoê noa tera o te mau mea o te ra‘i e ore e pau ia taio o te haapii mai no nia i te mana poiete iti rahi o Iehova. E hi‘opoa  maitai a‘e ana‘e i te tahi o te reira e e haapao ana‘e atu ai i te fenua e te ora e tupu rahi ra i nia iho.

“A nânâ na i to outou mata i nia”

4, 5. Mai te aha te puai e te rahi o te mahana, mai te aha râ to ’na huru ia faaauhia i te tahi atu mau fetia?

4 Ua ite paha outou e e fetia to tatou mahana. E au ra e e rahi a‘e oia i te mau fetia ta tatou e ite ra ia po no te mea, ia faaauhia ’tu, mea fatata a‘e oia. Mai te aha to ’na puai? I ropu roa ino, e taea i te mahana fatata 15 000 000 teteri. Ahiri e e nehenehe ta outou e rave mai i te hoê tuhaa o te ropuraa o te mahana mai te upoo pine ra i te rahi e e tuu mai i ǒ nei i nia i te fenua, eita ta outou e nehenehe e tia ma te ino ore i raro mai i te 140 kilometera i te atea i taua tumu ahu nainai roa ra! I te mau tetoni atoa, e faatupu te mahana i te ito o te faito e te paainaraa o na paura atomi e rave rahi hanere mirioni.

5 Mea rahi roa te mahana, e ô hau atu i te 1 300 000 paraneta hoê â faito e to tatou fenua i roto. E fetia taa ê anei i te rahi te mahana? Eita, ua mairi te mau aivanaa ihi reva teitei ia ’na ei pone rearea. Ua papai te aposetolo Paulo e “e huru ê hoi to  te tahi fetia i to te tahi i te anaana.” (Korinetia 1, 15:41) Aita oia i ite e e parau mau roa taua mau parau faauruahia ra. Te vai ra te hoê fetia rahi roa, ia tuuhia oia i te vahi to reira mau te mahana, to roto mai ïa to tatou fenua ia ’na. Ia na reirahia te tahi atu fetia rahi roa, e taea roa ia ’na o Saturne—noa ’tu e mea atea roa taua paraneta ra i te fenua e e titauhia e maha matahiti e tae ai te hoê pahi reva teitei i reira, ma te tere e 40 taime vitiviti a‘e i te hoê ofai e pupuhihia e te hoê pupuhi puai roa!

6. E nafea te Bibilia ia faaite e mea rahi roa te mau fetia i te hi‘oraa a te taata?

6 Mea hahano roa ’tu â te rahiraa fetia i to ratou faitotia. Oia mau, te na ô ra te Bibilia e eita ratou e pau ia taio, mai “te one tahatai” i te fifi ia taio. (Ieremia 33:22) Te na ôhia ra ïa e e hau ê roa te rahiraa fetia i ta te mata noa e ite. Inaha hoi, ahiri te  hoê papai Bibilia, mai ia Ieremia, i hi‘o i nia i te ra‘i i te po e i tamata i te taio i te mau fetia e itehia, e taea noa ia ’na e toru tausani aore ra fatata noa, o te numera ïa ta te mata taata aita e mauhaa e nehenehe e ite atu i te hoê po tapo‘ipo‘i ore. E nehenehe taua numera ra e faaauhia i te numera o te one e vai ra i roto noa i te hoê apu rima î. Mea riaria mau ïa te rahiraa fetia, mai te one tahatai. * O vai te nehenehe e taio i te hoê numera mai tera?

“Ua mairi-ana‘e-hia to ratou mau i‘oa e ana”

7. (a) Fatata ehia rahiraa fetia e vai ra i roto i to tatou haapueraa fetia oia te Voie Lactée, e mai te aha te rahi o taua numera ra? (b) No te aha e ere ai i te mea maere ia parau te mau aivanaa ihi reva teitei e mea fifi roa ia numera i te mau haapueraa fetia, e eaha ta te reira e haapii maira no nia i te mana poiete o Iehova?

7 Te pahono ra te Isaia 40:26 e: “A nânâ na i to outou mata i nia; a hi‘o ai i tei hamani i te reira, te aratai ra oia i taua mau nuu ra i rapae ma te taiohia; e ua mairi-ana‘e-hia to ratou mau i‘oa e ana.” Te na ô ra te Salamo 147:4 e: “Ua hope te mau fetia i te taiohia e ana.” Ehia rahiraa fetia e vai ra? E ere tera i te hoê tumu parau ohie. Te mana‘o ra te mau aivanaa ihi reva teitei e ua hau atu i te 100 miria fetia i roto noa i to tatou haapueraa fetia oia te Voie Lactée. * O te hoê noa râ to tatou haapueraa fetia i roto i te rahiraa, e mea rahi roa ’tu â te mau fetia i roto i te tahi atu mau pueraa. Ehia rahiraa haapueraa fetia e vai ra? Ua mana‘o te tahi mau aivanaa ihi reva teitei e e 50 miria. Ua numera te tahi atu e te vai ra paha 125 miria. Eita hoi ta te taata e nehenehe e faataa i te rahiraa haapueraa fetia, eiaha ïa e parauhia te numera tia o te mau miria fetia e vai ra i roto. Ua ite râ Iehova i taua numera ra. Hau atu â, e mairi oia i te fetia taitahi i to ’na i‘oa!

8. (a) E nafea outou ia faataa i te aano o te Voie Lactée? (b) E nafea Iehova ia faanaho i te tere o te mau mea o te ra‘i?

 8 E rahi noa ’tu â to tatou mǎta‘u faatura i te Atua ia hi‘o tatou i te faito rahi o te mau haapueraa fetia. Ua mana‘ohia e fatata 100 000 années-lumière te aanoraa o te Voie Lactée. A feruri na i te hihi maramarama e tere ra i te tere vitiviti roa e 300 000 kilometera i te tetoni. E rave taua hihi ra 100 000 matahiti no te tere mai te hoê pae o to tatou haapueraa fetia e i te tahi atu! E te vai ra te tahi mau haapueraa fetia e rave rahi taime rahi a‘e i to tatou. Te parau ra te Bibilia e ‘te hohora ra’ Iehova i teie mau ra‘i aano mai te huru ra e e ahu. (Salamo 104:2) Ua faanaho atoa oia i te tere o teie mau mea poietehia. Mai te mau hu‘a repo nainai roa ’‘e i rotopu i te mau fetia e tae atu i te haapueraa fetia rahi roa ’‘e, e tere te mau mea atoa ia au i te mau ture ihi materia ta te Atua i haamau e i faatere. (Ioba 38:31-33) No reira te mau aivanaa i faaau ai i te mau tere tano maitai o te mau mea o te ra‘i i te faanahoraa o te hoê ori faahiahia roa! A feruri na ïa i Tei poiete i teie mau mea. Eita anei outou e î i te mǎta‘u faatura i te Atua tera te rahi o to ’na mana poiete?

“Na ’na i hamani i te fenua i to ’na ra mana”

9, 10. E nafea e ite-maitai-hia ’i te mana o Iehova i to ’na faatanoraa i to tatou faanahoraa e te mahana, ia Jupiter, i te fenua, e i te ava‘e?

9 Te ite-maitai-hia ra te mana poiete o Iehova i nia i to tatou nei nohoraa, te fenua. Ua tuu oia i te fenua ma te haapao maitai roa i roto i teie ao nui. Te tiaturi ra te tahi mau aivanaa e mea rahi te mau haapueraa fetia eita e tia ia faaea i nia iho ia faaauhia i te hoê paraneta o te farii i te ora mai to tatou nei. Aita iho â te rahiraa o te Voie Lactée i opuahia no te farii i te ora. Ua î to ’na ropuraa i te fetia. Mea teitei roa te radiation, e mea pinepine te mau fetia i te fatata i te û te tahi i te tahi. Te ere ra te mau hiti o te haapueraa i te rahiraa o te mau mea faufaa no te ora. Tei te faito au noa to tatou faanahoraa e te mahana.

10 Te fana‘o ra te fenua i te hoê paruru atea e te rahi roa râ—te paraneta Jupiter. Ma te rahi a‘e i te fenua e hau atu i te hoê  tausani taime, e puai aratoraa rahi roa ino to Jupiter. Eaha te faahopearaa? E haamǎrû aore ra e faatioi oia i te mau tao‘a e tere puai ra na te rave teitei. Ua numera te mau aivanaa e ahiri aita o Jupiter, 10 000 taime ino atu â i to teie nei ia tairi te mau tao‘a rarahi i te fenua. Piri a‘e mai ia tatou nei, te fana‘o ra te fenua i te hoê paraneta peeutari maere mau—te ava‘e. Hau atu i te hoê noa tao‘a nehenehe e te hoê “maramarama no te po,” maoti te ava‘e e opa tamau noa ’i te fenua. Na taua oparaa ra e faatupu i te mau anotau ohu tamau e te tae mau mai iho â o te fenua—te tahi atu ïa mea maitai e te faufaa no te ora i ǒ nei.

11. Mea nafea te reva mata‘i o te fenua i te opuaraahia no te riro ei paruru?

11 E ite-maitai-hia te mana poiete o Iehova i roto i te mau tuhaa atoa o te fenua. A rave na i te reva mata‘i o te riro mai te hoê paruru. E faatae mai te mahana i te mau hihi maitai no te ea e te mea ino roa. Ia tairi te mau hihi pohe i te reva teitei a‘e o te fenua, e faariro te reira i te mata‘i ora ei ozone. E tapea te vauvau ozone i te rahiraa o taua mau hihi ra. Oia mau, ua opuahia to tatou paraneta ma to ’na iho fare amarara parururaa!

12. E nafea te ohuraa o te pape na te reva mata‘i e faataa ’i i te mana poiete o Iehova?

12 Hoê noa tera o te mau huru o to tatou reva mata‘i, teie anoiraa mata‘i taa ê tano maitai no te aupuru i te mau mea e ora ra i nia i te fenua aore ra i pihai roa. I roto i te mau mea maere o te reva mata‘i, te vai ra te ohuraa o te pape. I te matahiti hoê, e faariro te mahana e 400 000 kilometera afata pape no roto mai i te mau moana e te mau miti o te fenua ei ata pape. E riro mai te mau ata pape ei ata o te ta‘ita‘ihia e te mau mata‘i o te reva na te mau vahi atea atoa. E topa mai teie pape, tei titiahia e tei tamâhia i teie nei, ei ûa, ei hiona, ei vai paari, e e î faahou mai te mau vairaa pape. E riro ïa mai ta te Koheleta 1:7 e parau ra: “Te tahe nei te mau pape atoa nei i raro i te tai, aita râ te tai i manii ê noa ’tu: te vahi no reira mai te pape ra, te ho‘i faahou nei ratou i taua vahi mau ra.” O Iehova ana‘e tei nehenehe i haamau i te hoê ohuraa mai teie.

13. Eaha te haapapuraa i te mana o te Atua Poiete ta tatou e ite ra i roto i te mau tumu tiare e te repo o te fenua?

 13 I te vahi atoa e itehia ’i te ora, e ite papu tatou i te mana o te Atua Poiete. Mai te tumu raau rahi roa ra oia te séquoia o te teitei a‘e i te hoê fare e 30 tahua e tae noa ’tu i te mau tumu tiare nainai roa ino e rave rahi roa e ora ra i roto i te mau moana e te horoa maira i te rahiraa o te mata‘i ora ta tatou e huti ra, e ite-papu-hia te mana poiete o Iehova. Ua î roa te repo iho i te mau mea ora—te toe, te rimu, e te mau manumanu, o te haa amui ma te mau ravea fifi o te tauturu i te mau tumu tiare ia tupu. Ma te tano, te parau ra te Bibilia e e puai to te repo.—Genese 4:12.

14. Eaha te puai itea ore e vai ra i roto i te hoê atomi nainai roa?

14 Ma te feaa ore, na Iehova i “hamani i te fenua i to ’na ra mana.” (Ieremia 10:12) E ite-maitai-hia te mana o te Atua i roto atoa i te mau mea nainai roa ’‘e ta ’na i poiete. Ei hi‘oraa, ia tuuhia hoê mirioni atomi te tahi i pihai iho i te tahi, eita e raea te meumeuraa o te rouru taata. E noa ’tu e e faaroahia te hoê atomi e ia teitei mai te hoê fare 14 tahua, e riro to ’na pu mai te hoê noa maa miti papaa i te rahi i nia i te hituraa o te tahua. Teie râ, o taua pu nainai roa ra te tumu o te puai riaria mau ore i roto i te hoê paainaraa atomi!

“O tei huti i te aho”

15. Na roto i te tauaparauraa no nia i te mau animara oviri e rave rau, eaha te haapiiraa ta Iehova i horoa ia Ioba?

15 Te tahi atu â haapapuraa oraora o te mana poiete o Iehova, o te rahiraa animara ïa e ora ra i nia i te fenua. Te nanai ra te Salamo 148 e rave rahi mau mea o te arue ia Iehova, e i roto i te irava 10 (MN), te vai atoa ra “te mau manu [oviri], e te mau puaa [rata] atoa.” No te faaite no te aha e tia ’i i te taata ia mǎta‘u i te Atua Poiete ma te faatura, ua paraparau Iehova ia Ioba i te hoê taime no nia i te mau animara mai te liona, te asini oviri toretore, te reema, te Behemota (aore ra, te puaa pape), e te Leviatana (te moo pape paha ïa). Eaha te mana‘o tumu? Mai te peu e e mǎta‘u te taata i teie mau animara puai,  te riaria e te ore e noaa ia haavî, mai te aha ïa to ’na huru i mua i Tei poiete ia ratou.—Ioba, mau pene 38-41.

16. Eaha te mea ta outou e maere roa ’‘e no nia i te tahi mau manu ta Iehova i poiete?

16 Te faahiti atoa ra te Salamo 148:10 i “te mau manu pererau.” A feruri noa na i te rau o to ratou huru! Ua paraparau Iehova ia Ioba no nia i te renanima o te ‘ata i te puaahorofenua e to nia atoa ia ’na ra.’ Oia mau, noa ’tu e eita teie manu e 2,5 metera i te teitei, e maurere, e nehenehe râ ta ’na e horo e 65 kilometera i te hora, hoê noa hoi taahiraa avae e mahemo ia ’na e 4,5 metera! (Ioba 39:13, 18) I te tahi a‘e pae, to nia noa te albatros i te reva i nia mai i te miti i te rahiraa o te taime. Ei manu aravihi i te faahee, ia hohora oia i to ’na na pererau, e taea ia ’na e 3 metera. E maraa noa oia i nia ehia hora i te maoro i te hoê noa haereraa ma te ore e tairiiri i to ’na na pererau. Area râ, o te colibri calypte d’Hélène te manu nainai roa ’‘e i te ao nei, e 5 noa hoi tenetimetera to ’na. E nehenehe ta ’na e tairiiri i to ’na na pererau e 80 taime i te tetoni! E nehenehe ta te mau colibris, o te anaana mai te mau ofai maitatai e pererau to nia iho, e tautau i nia i te aore mai te mau manureva tautau na te reva e e rere atoa i muri.

17. Mai te aha te rahi o te tohora ninamu, e eaha te faaotiraa ta tatou iho â e huti mai ia feruri tatou i te mau animara ta Iehova i poiete?

17 Te na ô ra te Salamo 148:7 e e arue atoa “te mau mea rarahi o te tai” ia Iehova. A rave na i ta te taata e parau pinepine e o te animara rahi roa ’‘e i ora a‘enei i nia i teie paraneta, te tohora ninamu. E nehenehe e raea i teie ‘mea rahi’ o te mau vahi hohonu e 30 metera i te roa aore ra hau atu. E nehenehe to ’na faito kilo e tuati e to te hoê nǎnǎ e 30 elefani paari. To ’na noa arero, hoê â ïa teiaharaa e te hoê elefani. Hoê â rahi to to ’na mafatu e to te hoê pereoo nainai. E tupaipai teie melo rahi roa e 9 noa taime i te minuti—area to te colibri mafatu, e tupaipai ïa fatata 1 200 taime i te minuti. Hoê noa ’‘e o te mau uaua toto o te tohora ninamu, e navai ïa i te aano e ia ǎu te hoê tamarii i roto mai. Papu maitai e e turai to tatou aau ia tatou ia pee atoa i te a‘oraa o te faahope i te buka Salamo: “O  tei huti i te aho ra ia haamaitai ana‘e ïa ia Iehova.”—Salamo 150:6.

Te haapiiraa na roto i to Iehova mana poiete

18, 19. Mai te aha te rau o te mau mea ora ta Iehova i hamani i nia i teie fenua, e eaha ta te poieteraa e haapii maira no nia i to ’na mana arii?

18 Eaha ta tatou e haapii mai na roto i to Iehova faaohiparaa i to ’na mana poiete? E î tatou i te mǎta‘u faatura no te huru rau o te mau mea i poietehia. Ua na ô te hoê papai salamo e: “Aita te huru rau o ta oe ra ohipa, e Iehova! . . . Ua î te fenua nei i ta oe ra tao‘a.” (Salamo 104:24) Auê te parau mau e! Ua faataa te mau aivanaa ihiora hau roa ’tu i te hoê mirioni huru mea ora i te fenua nei; aita râ te mau mana‘o e tu ra 10 mirioni anei, aore ra e 30 mirioni, aore ra hau atu â. E nehenehe te hoê taata rimaî e mana‘o i te tahi taime e te ore ra to ’na aravihi. Area râ, mea papu maitai e eita te aravihi o Iehova—to ’na mana e hamani e e poiete i te mau mea apî e te huru rau—e ore.

19 Te haapii maira to Iehova faaohiparaa i to ’na mana poiete no nia i to ’na mana arii. Na te parau iho “Atua Poiete” e faataa ê ia Iehova i te toea o te mau mea i roto i te ao nui, mea “poiete-ana‘e-hia” hoi. Tae noa ’tu ta Iehova iho Tamaiti fanau tahi tei riro ei “rave ohipa aravihi” i te taime poieteraa, aita roa ’tu oia i parauhia a‘enei ei Atua Poiete aore ra ei Atua  Poiete apiti i roto i te Bibilia. (Maseli 8:30, MN; Mataio 19:4) Area râ, o oia “te matahiapo o te mau mea atoa i poietehia.” (Kolosa 1:15, MN) No to ’na tiaraa Atua Poiete, e tia roa ia Iehova ia faaohipa o oia ana‘e i te mana arii i nia i te ao taatoa.—Roma 1:20; Apokalupo 4:11.

20. Mea na roto i teihea auraa to Iehova faaearaa i te otiraa ta ’na ohipa poieteraa i te fenua nei?

20 Ua faaea anei Iehova i te faaohipa i to ’na mana poiete? Te parau ra iho â te Bibilia e i te otiraa te ohipa poieteraa a Iehova i te ono o te mahana poieteraa, “faaea ihora oia i te mahana hitu, i ta ’na atoa ra mau ohipa i hamanihia e ana ra.” (Genese 2:2) Ua faaite te aposetolo Paulo e e mau tausani matahiti i te maoro to teie “mahana” hitu, to roto noâ hoi oia i taua mahana ra i to ’na ra tau. (Hebera 4:3-6) Eaha râ te auraa e “faaea,” ua faaea anei Iehova i te rave atoa i te ohipa? Aita, aita Iehova i faaea a‘enei i te rave i te ohipa. (Salamo 92:4; Ioane 5:17) To ’na faaearaa, o to ’na noa ïa faaearaa i ta ’na ohipa poieteraa materia i taaihia i te fenua nei. Ua tamau noa râ ta ’na ohipa e faatupu roa i ta ’na mau opuaraa ma te mutu ore. To roto te faauruaraa i te mau Papai Mo‘a i taua ohipa ra. To roto atoa te faatupuraa i te “taata apî” i ta ’na ohipa, e tauaparauhia hoi te reira i roto i te pene 19.—Korinetia 2, 5:17.

21. E nafea te mana poiete o Iehova e taaihia ’i i te taata haapao maitai i te roaraa o te tau mure ore?

21 Ia hope te mahana faaearaa o Iehova, e nehenehe ta ’na e parau e “mea maitai roa” ta ’na mau ohipa atoa i te fenua nei, mai ta ’na i parau i te hopea o na mahana poieteraa e ono. (Genese 1:31) E nafea oia e maiti ai e faaohipa i to ’na mana poiete otia ore i muri a‘e, e tiai ïa tatou e ite atu ai. Noa ’tu te huru tupuraa, e nehenehe e papu ia tatou e e tamau noa tatou i te maere ia faaohipa Iehova i to ’na mana poiete. I te roaraa o te tau mure ore, e haapii hau atu â tatou no nia ia Iehova na roto i ta ’na i poiete. (Koheleta 3:11) E rahi atu tatou i te haapii no nia ia ’na, e rahi atu to tatou mǎta‘u faatura—e e fatata noa ’tu â tatou i to tatou Atua Poiete Rahi.

^ par. 2 Ia taa ia outou taua numera rahi roa ra, a feruri na i teie: Ia tere outou i taua atearaa ra na nia i te pereoo—noa ’tu e e tere puai noa outou 160 kilometera i te hora, e 24 hora i te mahana—e titauhia hau atu i te hoê hanere matahiti!

^ par. 6 Te mana‘o ra te vetahi e ua rave paha to tahito ra i te tau o te Bibilia i te hoê hoho‘a hi‘o fetia tahito. Aita ana‘e, o ta ratou ïa e feruri ra, ua nafea te taata o taua tau ra i te iteraa e mea rahi roa te mau fetia, eita e pau ia taio, i te hi‘oraa a te taata? Eita taua huru mana‘o niu ore ra e faahanahana e e farii ia Iehova, te Fatu o te Bibilia.—Timoteo 2, 3:16.

^ par. 7 A hi‘o na eaha te maororaa e pau ai ia outou i te taio noa 100 miria fetia. Mai te peu e e nehenehe ta outou e taio hoê fetia apî i te tetoni hoê—e na reira noa e 24 hora i te mahana—e rave outou e 3 171 matahiti!

No te ite atu â

E itehia te Atua ora i ta ’na i hamani

Haapii e nafea ia tauturu ia vetahi ê ia taa i te parau mau no nia i te Atua Poiete e i te hoê â taime ia tiaturi atu â ia ’na.