Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 7

Mana paruru—“O te Atua to matou haapuraa”

Mana paruru—“O te Atua to matou haapuraa”

1, 2. Te faaû ra te mau Iseraela i teihea ati a tae ai ratou i te tuhaa fenua no Sinai i te matahiti 1513 H.T.T., e mea nafea to Iehova tamahanahanaraa ia ratou?

TE FAAÛ ra te mau Iseraela i te ati a tae ai ratou i te tuhaa fenua no Sinai i te omuaraa o te matahiti 1513 H.T.T. Te tiai maira te hoê tere riaria ia ratou, te hoê tere na roto atu i te hoê “medebara rahi mǎta‘u ra, tei reira te ophi veavea ra, e te pata.” (Deuteronomi 8:15) Ua farerei atoa ratou i te haamǎta‘uraa ia aro mai te mau nunaa enemi. Ua aratai Iehova i to ’na nunaa i roto i taua huru tupuraa ra. Ei Atua no ratou, e tia anei ia ’na ia paruru ia ratou?

2 Mea mahanahana roa teie mau parau a Iehova: “Ua ite outou i ta ’u i rave i to Aiphiti ra, e ua maraa outou ia ’u na nia i te pererau aeto ra, e ua hopoi mai ia outou i ǒ nei ia ’u iho nei.” (Exodo 19:4) Ua haamana‘o Iehova i to ’na nunaa e ua faaora oia ia ratou i to Aiphiti, ma te faaohipa i te mau aeto, ei auraa parau, no te hopoi ia ratou i te vahi panoonoo ore. Te vai atu â râ te tumu e tano ai ia faahoho‘a “te pererau aeto” i te paruru a te Atua.

3. No te aha e tano ai ia faahoho‘a “te pererau aeto” i te paruru a te Atua?

3 Eita te aeto e faaohipa i to ’na pererau aano e te puai no te maurere noa i nia. I te taime veavea roa o te mahana, e hohora te aeto ufa i to ’na pererau—o te nehenehe e taea hau atu i te 2 metera—e ia riro ei amarara o te paruru i to ’na mau fanau‘a iti i te mahana puai. I te tahi atu mau taime, e puohu oia i to ’na mau fanau‘a i to ’na pererau no te paruru ia ratou i te mata‘i toetoe. Mai te aeto o te tiai i to ’na mau fanau‘a, ua paruru Iehova i te nunaa apî ra o Iseraela. I teie nei i te medebara, e tamau noa to ’na nunaa i te imi i te haapuraa i raro a‘e i te maru o to ’na pererau puai a vai taiva ore noa ’i ratou.  (Deuteronomi 32:9-11; Salamo 36:7) E tano anei râ ia tiaturi tatou i te paruru a te Atua i teie tau?

Te parau fafau e e paruru mai te Atua

4, 5. No te aha tatou e nehenehe ai e tiaturi roa i te parau fafau a te Atua e paruru mai?

4 Papu maitai e e tia ia Iehova ia paruru i ta ’na mau tavini. O oia “te Atua Mana hope”—te hoê i‘oa toroa o te faaite e e mana to ’na o te ore e noaa ia patoi. (Genese 17:1) Mai te hoê nanuraa miti o te ore e mau ia tapea, eita te mana ta Iehova e faaohipa e nehenehe e haafifihia. I te mea e e tia ia ’na ia rave i te mau mea atoa ta to ’na hinaaro e faaoti, e ui paha tatou e, ‘O te hinaaro anei o Iehova e faaohipa i to ’na mana no te paruru i to ’na nunaa?’

5 Te pahonoraa, hoê noa ïa parau, e! Te tamahanahana maira Iehova e e paruru oia i to ’na nunaa. Te na ô ra te Salamo 46:1 e: “O te Atua to matou haapuraa e to matou etaeta, e tauturu fatata ia roohia e te ati ra.” I te mea e e “ore e tia” i te Atua “ia haavare,” e nehenehe ta tatou e tiaturi roa i ta ’na parau fafau e paruru mai. (Tito 1:2) E hi‘o ana‘e i te tahi mau faahoho‘araa oraora ta Iehova i faaohipa no te faataa e te aupuru e te paruru maira oia.

6, 7. (a) I horoa na te tiai mamoe o te tau bibilia i teihea paruru i ta ’na mau mamoe? (b) E nafea te Bibilia ia faahoho‘a i te hinaaro tae o Iehova e paruru e e aupuru i ta ’na mau mamoe?

6 E Tiai mamoe o Iehova, e “e taata” tatou “no ’na, e te mamoe no tana ra aua.” (Salamo 23:1; 100:3) Aita i rahi te animara o te riro ei mea ravea ore mai te mamoe rata ra. I tia na i te tiai mamoe o te tau bibilia ia riro ei mea itoito i te paruru i ta ’na mau mamoe i te liona, te luko, e te daba, e oia atoa i te eiâ. (Samuela 1, 17:34, 35; Ioane 10:12, 13) Te vai ra râ te tahi mau taime i hinaarohia ’i te mǎrû no te paruru i te mamoe. Ia fanau te hoê mamoe i te fanau‘a i te hoê vahi atea i te aua, e tiai te tiai mamoe î i te here i te ufa i to ’na mau taime ravea  ore a rave mai ai i te fanau‘a mamoe paruru ore e a hopoi atu ai i roto i te aua.

“Ei roto ratou i tana ouma ia hopoi”

7 Na roto i te faaauraa ia ’na i te hoê tiai mamoe, te tamahanahana maira Iehova e te hinaaro mau ra oia e paruru ia tatou. (Ezekiela 34:11-16) A haamana‘o na i te faataaraa ia Iehova i roto i te Isaia 40:11, tei tauaparauhia i roto i te pene 2 o teie buka: “E faaamu oia i ta ’na nǎnǎ mai te tiai mamoe ra; e haaputu oia i te mau fanau‘a rii i roto i tana rima, e ei roto ratou i tana ouma ia hopoi.” E nafea te mamoe iti ia tae i roto i te “ouma” o te tiai mamoe—oia te mau tufetu o to ’na ahu rapaeau? Ua tapiri atu paha te pinia mamoe i te tiai mamoe, a mirimiri atu ai i to ’na avae. Teie râ, na te tiai mamoe e pi‘o roa ’tu e rave mai i te mamoe iti, e e tuu mǎrû atu ia ’na i te vahi panoonoo ore o to ’na ouma. E hoho‘a mǎrû mau tera o te aau tae o to tatou Tiai mamoe Rahi e paruru ia tatou!

8. (a) Ua faataehia te parau fafau a te Atua e paruru mai ia vai ra, e mea nafea te reira i te faaiteraahia i roto i te Maseli 18:10? (b) Eaha te titauhia no te imi i te haapuraa i roto i te i‘oa o te Atua?

8 Eita te parau fafau a te Atua e paruru mai e au i te taata atoa—e fana‘o-noa-hia e te feia e haafatata ’tu ia ’na. Te na ô ra te Maseli 18:10 e: “Te i‘oa o Iehova ra, e pare etaeta ïa; te horo nei te parau-tia i reira e ua ora ihora.” I te tau bibilia, i patuhia na te tahi mau pare i te medebara ei vahi haapuraa. Tei te taata râ e faaû ra i te ati te hororaa i taua huru pare ra e imi i te ora. Hoê â atoa e te imiraa i te haapuraa i roto i te i‘oa o te Atua. E titau te reira hau atu i te faahiti-tamau-raa i te i‘oa o te Atua; e ere hoi taua i‘oa ra i te tao‘a tahutahu. Area râ, e tia ia tatou ia ite e ia tiaturi i te Fatu o taua i‘oa ra e ia ora ia au i ta ’na mau ture aveia tia. Mea maitai mau Iehova i te tamahanahanaraa mai e, ia fariu tatou i nia ia ’na ma te faaroo, e riro oia ei pare parururaa no tatou!

‘E tia i to matou Atua ia faaora ia matou’

9. Mea nafea to Iehova raveraa hau atu i te fafau noa e e paruru mai oia?

9 Ua rave hau atu Iehova i te fafau noa e e paruru mai oia. I  te tau bibilia, ua faaite oia na roto i te semeio e e tia ia ’na ia paruru i to ’na nunaa. I te roaraa o to Iseraela tuatapaparaa, mea pinepine te mau enemi puai i te vî i te “rima” etaeta o Iehova. (Exodo 7:4) Ua faaohipa atoa râ Iehova i to ’na mana paruru no te tahi mau taata.

10, 11. Eaha te mau hi‘oraa bibilia e faaite ra mea nafea to Iehova faaohiparaa i to ’na mana paruru no te tahi mau taata?

10 I to na taurearea Hebera e toru—o Sadaraka, o Meseka, e o Abede-nego—patoiraa i te tipapa i raro i mua i te hoho‘a auro a te arii Nebukanesa, ua riri roa te arii e ua haamǎta‘u a‘era e taora ia ratou i roto i te umu i tahu-puai-maitai-hia. “O vai te Atua e faaora ia outou i to ’u nei rima?” mea na reira ïa to Nebukanesa, te arii puai roa ’‘e i te ao nei, tâhitohitoraa. (Daniela 3:15) Te tiaturi roa ra na taurearea e toru i te mana o to ratou Atua no te paruru ia ratou, aita râ ratou i mana‘o a‘ena e e na reira oia. No reira ratou i pahono ai e: “Ia hinaaro oia iho, e tia ïa i to matou Atua e haamori nei ia faaora oia ia matou.” (Daniela 3:17) Oia mau, e ere roa ’tu taua umu auahi ura ra, noa ’tu e ua tataihituhia te tahuraa i tei matauhia, i te mea fifi na to ratou Atua puai hope. Ua paruru iho â oia ia ratou, e ua faahepohia te arii ia fa‘i e: “Aita ’tu Atua e tia ’i ia faaora mai teie nei te huru.”—Daniela 3:29.

11 Mea faahiahia mau atoa to Iehova faaiteraa i to ’na mana paruru i to ’na tuuraa i te ora o ta ’na Tamaiti fanau tahi i roto i te opu o te paretenia ati Iuda ra o Maria. Ua faaara te hoê melahi ia Maria e e ‘tô oia, e e tamaiti ta ’na e fanau.’ Ua faataa te melahi e: ‘E pou mai te varua mo‘a i nia iho ia oe, e na te mana o te Teitei e tamaru i nia iho ia oe.’ (Luka 1:31, 35) E au ra e aita te Tamaiti a te Atua i riro a‘enei ei mea paruru ore mai tera. E viivii anei te tamarii i roto i te opu i te hara e te huru tia ore o te metua vahine? E nehenehe anei ta Satani e haapepe aore ra e taparahi i taua Tamaiti ra hou Oia e fanauhia ’i? Eita roa ’tu! Oia mau, ua tuu Iehova i te hoê patu parururaa e ati a‘e o Maria eiaha te hoê noa ’‘e mea—te huru tia ore, te puai haapepe, te taparahi taata, aore ra te tahi noa ’‘e  demoni—ia tuino i te tamarii e tupu ra, mai te taime atu i tôhia ’i. Ua tamau noa Iehova i te paruru ia Iesu i to ’na apîraa ra. (Mataio 2:1-15) E ia tae roa i te taime i faataahia e te Atua, aita ta ’na Tamaiti here i noaa haere noa.

12. No te aha Iehova i paruru semeio ai i te tahi mau taata i te tau bibilia?

12 No te aha Iehova i paruru ai i te tahi mau taata na roto i taua mau ravea semeio ra? I roto i te mau tupuraa e rave rahi, ua paruru Iehova i te tahi mau taata no te paruru i te hoê mea faufaa roa ’tu â: te tupuraa o ta ’na opuaraa. Ei hi‘oraa, mea faufaa roa ia ora mai te tamarii ra o Iesu no te tupuraa o te opuaraa a te Atua, o te haamaitai i te huitaata i te pae hopea. Ua riro te aamu o teie mau faaiteraa mana paruru ei tuhaa o te mau parau faauruahia tei ‘papaihia ia ite tatou, ia noaa to tatou tiairaa, i te faaoromai e te mahanahana o te parau i papaihia ra.’ (Roma 15:4) Oia, e haapaari teie mau hi‘oraa i to tatou faaroo i to tatou Atua puai hope. Eaha râ te paruru ta tatou e nehenehe e tiai i te Atua ra i teie tau?

Eaha te mea e ere te reira te parau fafau a te Atua e paruru mai

13. Mea titauhia anei ia rave Iehova i te semeio no tatou? A faataa na.

13 Te parau fafau a te Atua e paruru mai, e ere ïa te auraa e mea titauhia ia rave Iehova i te mau semeio no tatou. Aita, aita te Atua i haapapu mai e e ora tatou ma te fifi ore i roto i teie faanahoraa tahito. Mea rahi te mau tavini haapao maitai a Iehova e faaû ra i te ati iti rahi, tae noa ’tu i te veve, te tama‘i, te ma‘i, e te pohe. Ua parau maitai Iesu i ta ’na mau pǐpǐ e, ei taata taitahi, e nehenehe ratou e haapohehia no to ratou faaroo. No reira Iesu i onoono ai e mea hinaarohia ia faaoromai e tae noa ’tu i te hopea. (Mataio 24:9, 13) Ahiri Iehova e faaohipa i to ’na mana no te rave i te faaoraraa semeio i roto i te mau tupuraa atoa, e tumu ïa ta Satani e tâhitohito ai ia Iehova e e mârô ai e mea mau anei to tatou here i to tatou Atua.—Ioba 1:9, 10.

14. Eaha te mau hi‘oraa e faaite ra e eita Iehova e paruru noa i ta ’na mau tavini atoa na roto i te hoê â ravea?

 14 I te tau bibilia atoa, aita Iehova i faaohipa i to ’na mana paruru no te faaora mai i ta ’na mau tavini i te pohe oioi. Ei hi‘oraa, ua haapohehia te aposetolo Iakobo e Heroda i te matahiti 44 T.T. ra; i muri rii a‘e râ, ua faaorahia Petero “i te rima o Heroda.” (Ohipa 12:1-11) E ua ora maoro a‘e o Ioane, te taeae o Iakobo, ia ’na e ia Petero. Papu maitai, eita e tia ia tatou ia mana‘o e e paruru to tatou Atua i ta ’na mau tavini atoa na roto i te hoê â ravea. Hau atu â, “e tau e e tupuraa mana‘o-ore-hia” to tatou atoa. (Koheleta 9:11, MN) E nafea ïa Iehova e paruru ai ia tatou i teie tau?

E paruru Iehova i te pae tino

15, 16. (a) Eaha te haapapuraa e ua paruru Iehova i to ’na feia haamori i te pae tino ei pǔpǔ? (b) No te aha e papu ai ia tatou e e paruru Iehova i ta ’na mau tavini i teie nei e ia tae mai “te ati rahi”?

15 E rave ana‘e na mua i te paruru i te pae tino. Ei feia haamori ia Iehova, e nehenehe ta tatou e tiaturi i taua paruru ra ei pǔpǔ. Aita ana‘e, e noaa haere noa ïa tatou ia Satani. A feruri na i teie: Aita ’tu to Satani, “te arii o teie nei ao,” hinaaro maori râ te faaoreraa i te haamoriraa mau. (Ioane 12:31; Apokalupo 12:17) Ua opani te tahi o te mau hau faatere puai roa ’‘e o te ao nei i ta tatou ohipa pororaa e ua tamata i te faaore roa ia tatou. Ua mau papu noa râ te nunaa o Iehova e ua tamau noa i te poro ma te tuutuu ore! No te aha te mau fenua puai i ore ai i manuïa i te tapea i te ohipa a teie pǔpǔ Kerisetiano nainai hoi e te ravea ore ia hi‘ohia ’tu? No te mea ua paruru Iehova ia tatou i to ’na pererau puai!—Salamo 17:7, 8.

16 E ia tae mai “te ati rahi” e fatata maira, eaha ïa no nia i te paruru i te pae tino? Eiaha tatou ia mǎta‘u ia faatupuhia te haavaraa a te Atua. Inaha hoi, “ua ite maori te Fatu i te faaora i te feia paieti i roto i te ati ra, e te tapea i te feia parau-tia ore e ia tae i te mahana haavaraa, ia pohe.” (Apokalupo 7:14; Petero 2, 2:9) Hou te reira, e piti mea e nehenehe e papu noa ia tatou. A tahi, eita roa ’tu Iehova e vaiiho ia faaore-roa-hia ta ’na  mau tavini taiva ore i te fenua nei. A piti, e haamaitai oia i te feia e mau i te hapa ore, i te ora mure ore i roto i ta ’na ao apî parau-tia—mai te peu e e titauhia, na roto i te tia-faahou-raa. No te feia e pohe noa ’tu, aita ’tu vahi maitai a‘e e vai ai maori râ te mehara o Iehova.—Ioane 5:28, 29.

17. E nafea Iehova ia tiai ia tatou na roto i ta ’na Parau?

17 I teie nei â, te tiai ra Iehova ia tatou na roto i ta ’na “parau” ora, e puai hoi to te reira no te turai i te taata e ia ora mai to ratou mafatu e ia taui to ratou oraraa. (Hebera 4:12) Na roto i te faaohiparaa i te mau faaueraa tumu, e nehenehe ta tatou e paruru i to tatou tino i te mea ino i roto te tahi mau tuhaa. ‘O vau o Iehova o tei faaite ia oe i te mea e maitai ai oe ra,’ o ta te Isaia 48:17 ïa e parau ra. Ma te feaa ore, e nehenehe te oraraa ia au i te Parau a te Atua e haamaitai i to tatou ea e e faaroa i to tatou oraraa. Ei hi‘oraa, no te mea e faaohipa tatou i te a‘oraa bibilia e haapae i te poreneia e e tamâ ia tatou iho i te viivii, e patoi tatou i te mau peu viivii e te mau peu matau iino o te faahuehue i te oraraa o te feia paieti ore e rave rahi. (Ohipa 15:29; Korinetia 2, 7:1) Auê tatou i te mauruuru no te paruru a te Parau a te Atua!

E paruru Iehova ia tatou i te pae varua

18. Eaha te paruru pae varua ta Iehova e horoa mai?

18 Te mea faufaa roa ’‘e, e horoa Iehova i te paruru pae varua. E paruru to tatou Atua î i te here ia tatou i te ati pae varua na roto i te horoaraa mai i te mea ta tatou e hinaaro no te faaoromai i te mau tamataraa e te atuatu i to tatou taairaa e oia. E haa ïa Iehova no te paruru i to tatou ora, eiaha noa no tau matahiti poto, e a muri noa ’tu râ. A hi‘o na i te tahi o te mau faanahoraa a te Atua o te nehenehe e paruru ia tatou i te pae varua.

19. E nafea te varua o Iehova ia tauturu mai ia tatou ia faaruru i te mau ati atoa ta tatou e farerei?

19 O Iehova “tei faaroo i te pure.” (Salamo 65:2) Ia rahi roa te faateimaharaa i roto i te oraraa, e nehenehe tatou e tamahanahana-rahi-hia  ia ninii tatou i to tatou aau i mua ia ’na. (Philipi 4:6, 7) Eita paha oia e faaore semeio i to tatou mau ati, ei pahonoraa râ i ta tatou mau pure haavare ore, e nehenehe ta ’na e horoa mai i te paari no te faaruru atu. (Iakobo 1:5, 6) Hau atu â, e horoa Iehova i to ’na varua mo‘a i te feia e ani atu. (Luka 11:13) E nehenehe taua varua puai ra e tauturu ia tatou ia faaruru i te ati aore ra te fifi atoa ta tatou e farerei. E nehenehe ta te reira e faaî ia tatou i “te puai i hau a‘e i tei matauhia” no te faaoromai e ia faaore roa Iehova i te mau fifi mauiui atoa i roto i te ao apî e fatata roa maira.—Korinetia 2, 4:7MN.

20. E nafea te mana paruru o Iehova e faaitehia ’i na roto i to tatou mau hoa haamoriraa?

20 I te tahi taime, e ite tatou i te mana paruru o Iehova na roto i to tatou mau hoa haamoriraa. Ua faatae Iehova i to ’na nunaa i roto i te “hui taeae” no te ao atoa nei. (Petero 1, 2:17; Ioane 6:44) I roto i te mahanahana o taua huitaeae ra, e ite tatou i te haapapuraa oraora o te mana o te varua mo‘a o te Atua ia turai i te taata ia rave i te maitai. E faatupu taua varua ra i te mau hotu i roto ia tatou, e mau huru maitatai nehenehe ïa e te faahiahia to roto hoi te aroha, te aau maitai e te maitai. (Galatia 5:22, 23) No reira, ia ahoaho tatou e  ia turaihia te hoê hoa faaroo e horoa mai i te a‘oraa faufaa aore ra i te mau parau faaitoito hinaaro-rahi-hia, e nehenehe tatou e haamauruuru ia Iehova no taua mau faaiteraa ra e te aupuru e te paruru maira oia.

21. (a) Eaha te maa varua i te hora mau ta Iehova e horoa na roto i “te tavini haapao maitai e te paari”? (b) Mea nafea to outou iho faufaaraahia i ta Iehova i rave no te paruru ia tatou i te pae varua?

21 E horoa mai Iehova i te tahi atu mea no te paruru ia tatou: te maa varua i te hora mau ra. No te tauturu ia tatou ia noaa mai te puai no roto i ta ’na Parau, ua faaue Iehova i “te tavini haapao maitai e te paari” e horoa mai i te maa varua. E faaohipa taua tavini haapao maitai ra i te mau papai neneihia, to roto hoi te mau vea ra Te Pare Tiairaa e te A ara mai na!, oia atoa te mau putuputuraa e te mau tairururaa no te horoa mai i te “maa i te hora mau ra”—ta tatou e hinaaro ra, i te taime e hinaaro ai tatou. (Mataio 24:45) Ua faaroo a‘ena anei outou i te hoê mea i te hoê putuputuraa Kerisetiano—i roto i te hoê pahonoraa, te hoê oreroraa parau, aore ra te hoê pure—tei horoa mai i te puai e te itoito i hinaarohia? Ua taui anei to outou oraraa no te hoê tumu parau taa maitai i neneihia i roto i te hoê o ta tatou mau vea? A haamana‘o na, e horoa mai Iehova i taua mau mea atoa ra no te paruru ia tatou i te pae varua.

22. E nafea noa Iehova e faaohipa ’i i to ’na mana, e no te aha te na reiraraa oia e riro ai ei mea maitai roa no tatou?

22 E paruru mau o Iehova no “te feia atoa e tiaturi ia ’na ra.” (Salamo 18:30) Te taa ra ia tatou e eita oia e faaohipa i to ’na mana no te paruru ia tatou i te mau ati atoa i teie nei. E faaohipa mau râ oia i to ’na mana paruru no te haapapu i te tupuraa o ta ’na opuaraa. I te pae hopea, e riro te na reiraraa oia ei mea maitai roa no to ’na nunaa. Ia haafatata tatou ia ’na e ia vai noa i roto i to ’na here, e horoa mai Iehova i te ora tia roa e te mure ore. Ma te haamana‘o i taua tiaturiraa ra, e nehenehe mau tatou e hi‘o i te mau mauiui atoa i roto i teie faanahoraa ei “pohe iti poto mâmâ.”—Korinetia 2, 4:17.

No te ite atu â

A faaea noa i roto i te peho paruruhia e Iehova

Eaha te peho paruruhia e e nafea te feia haamori ia Iehova e paruruhia ’i i reira?