Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 6

Mana haamou—“E puai rahi to Iehova i te tama‘i”

Mana haamou—“E puai rahi to Iehova i te tama‘i”

1-3. (a) Eaha te haamǎta‘uraa ta te mau Iseraela i farerei i to Aiphiti ra? (b) Mea nafea to Iehova aroraa no to ’na nunaa?

TO ROTO te mau Iseraela i te hoê marei—ua mau ratou i rotopu i te mau mou‘a tarere o te tâpû i to ratou e‘a e te hoê miti eita e nehenehe e haere atu i ǒ mai. Te a‘ua‘u ra te nuu Aiphiti, te hoê faanahonahoraa haapohe taata aroha ore, ia ratou ma te faaoti maite e haamou roa ’tu. * Ua faaitoito râ Mose i te nunaa o te Atua eiaha e faaea i te tiaturi. Ua haamahanahana ’tu oia ia ratou i te na ôraa e, “na Iehova hoi e aro i ta outou tama‘i.”—Exodo 14:14.

2 Noa ’tu â râ, e au ra e ua tiaoro atu Mose ia Iehova, e ua pahono mai te Atua e: “Eaha oe i tiaoro mai ai ia ’u? . . . A hopoi na i to raau i nia, a titoo na i to rima i nia i te miti, e vahi.” (Exodo 14:15, 16) A feruri noa na i te mau mea e haamata ra i te tupu. E faaue oioi Iehova i te hoê melahi, e e haere atu te pou ata i muri mai i te mau Iseraela, peneia‘e ma te tarava mai te hoê patu ra e te tâpûraa i te reni aroraa a to Aiphiti. (Exodo 14:19, 20; Salamo 105:39) E titoo Mose i to ’na rima. Ma te turaihia e te hoê mata‘i puai, e vahi te miti. E putua te miti aita tatou i ite mea nafea e e tia noa mai te mau patu ra, a iriti ai i te hoê e‘a aano maitai e ia ô roa te nunaa taatoa!—Exodo 14:21; 15:8.

3 I mua i teie faaiteraa mana, e tia ia Pharao ia faaue i ta ’na nuu e otohe. Eita râ, e faaue te Pharao teoteo ra e aro. (Exodo 14:23) E horo to Aiphiti i roto i te anavai e a‘ua‘u, e riro râ  ta ratou aroraa ei huananeraa ia mahiti te mau huira o to ratou pereoo. Ia tae maitai te mau Iseraela i te tahi atu pae, e faaue Iehova ia Mose e: “A faatoro na i to rima i nia iho i te moana, ia ho‘i mai te miti i nia iho i to Aiphiti; ei nia iho i to ratou mau pereoo, e to ratou feia puaahorofenua atoa ra.” E topa mai te mau patu pape ra e e moe roa Pharao e ta ’na nuu!—Exodo 14:24-28; Salamo 136:15.

I te Miti Uteute ra, ua faaite Iehova e e ‘puai rahi to ’na i te tama‘i’

4. (a) Eaha ta Iehova i faaite i te Miti Uteute ra? (b) Eaha paha te huru o te tahi pae i mua i teie faataaraa ia Iehova?

4 E tupuraa rahi roa te faaoraraa i te nunaa Iseraela i te Miti Uteute ra i roto i te tuatapaparaa o te mau haaraa a te Atua i nia i te taata. I reira, ua faaite Iehova e ‘e puai rahi to ’na i te tama‘i.’ (Exodo 15:3) Eaha râ to outou huru i mua i teie faataaraa ia Iehova? Parau mau, ua hopoi mai te tama‘i i te mauiui rahi e te oto rahi i nia i te taata. E riro anei to te Atua faaohiparaa i te mana haamou ei faataupupuraa eiaha râ ei turairaa ia outou ia haafatata ’tu ia ’na?

Te mau tama‘i a te Atua ia faaauhia i te mau aroraa a te taata

5, 6. (a) No te aha te Atua i parauhia ’i ma te tano o “Iehova sabaota”? (b) E nafea te tama‘i a te Atua e taa ê ai i te tama‘i a te taata?

5 Fatata e toru hanere taime i roto i te mau Papai Hebera e e piti taime i roto i te mau Papai Heleni Kerisetiano to te Atua parauraahia o “Iehova sabaota.” (Samuela 1, 1:11) Ei Arii Rahi, e faatere Iehova i te hoê nuu melahi rahi roa. (Iosua 5:13-15; Mau arii 1, 22:19) Mea riaria te puai haamouraa o taua nuu ra. (Isaia 37:36) E ere i te mea au ia hi‘o atu i te haapoheraa taata. E tia râ ia tatou ia haamana‘o e e ere te mau tama‘i a te Atua mai te mau aroraa rii a te taata. E tamata paha te mau raatira faehau aore ra poritita i te faariro i ta ratou aroraa ei mea maitai. Eita râ e ore e e nounou e e miimii to muri mai i te tama‘i a te taata.

 6 I te tahi roa ’‘e pae, eita Iehova e turaihia e te huru aau feruri-ore-hia. Te na ô ra te Deuteronomi 32:4 e: “Oia te Mato, o tei tia roa ta ’na ohipa ra; o tei au atoa to ’na ra mau haerea; e Atua parau mau, e te ino ore ra; e parau-tia ta ’na e te titiaifaro!” Te faahapa ra te Parau a te Atua i te riri, te taehae, e te peu u‘ana vî ore. (Genese 49:7; Salamo 11:5) No reira, eita roa ’tu Iehova e ohipa ma te tumu ore. Mea varavara oia i te faaohipa i to ’na mana haamou e ei ravea hopea noa. Ua riro ïa mai ta ’na i parau na roto i ta ’na peropheta o Ezekiela: “Huru mauruuru iti a‘e anei to ’u i te pohe o te taata ino, te na reira maira te Fatu ra o Iehova? e eiaha oia ia fariu mai i tana e‘a ia ora?”—Ezekiela 18:23.

7, 8. (a) Eaha ta Ioba i faaoti ma te hape no nia i to ’na mau mauiui? (b) Mea nafea to Elihu faatitiaifaroraa i to Ioba mana‘o i te reira paeau? (c) Eaha te haapiiraa ta tatou e nehenehe e huti mai na roto i te aamu o Ioba?

7 No te aha ïa Iehova e faaohipa ’i i te mana haamou? Hou e pahono ai, e tia ia tatou ia haamana‘o i te taata parau-tia ra o Ioba. Ua mârô Satani e eita Ioba—oia mau, te taata atoa—e tapea i to ’na hapa ore ia tamatahia oia. Ua pahono Iehova i taua mârôraa ra na roto i te faatiaraa ia tamata Satani i te hapa ore o Ioba. Ei faahopearaa, ua roohia Ioba i te ma‘i, ua ere i ta ’na mau faufaa e ua pohe ta ’na mau tamarii. (Ioba 1:1–2:8) Ma te ite ore i te mau tumu parau i faahitihia, ua faaoti Ioba ma te hape e ua riro to ’na mauiui ei faautuaraa tia ore a te Atua. Ua ui oia i te Atua no te aha Oia i faariro ai ia ’na ei “fa” na ’na, “ei enemi.”—Ioba 7:20; 13:24.

8 Ua faaite te hoê taurearea o Elihu te i‘oa i te vahi hape o te mana‘o o Ioba: “Ua parau hoi oe e, Ua hau te parau-tia na ’u i ta te Atua ra?” (Ioba 35:2) Oia, e ere i te haerea paari te mana‘oraa e mea ite a‘e tatou i te Atua aore ra ua hape to ’na haerea. “Eiaha roa te parau ino ra e hurihia ’tu i te Atua! eiaha roa te Puaihope ia parauhia i te rave parau ino ra,” o ta Elihu ïa i parau. I muri a‘e, ua na ô oia e: “I te Puaihope ra! e ore e itea e tatou; aore ïa e faito i te mana e te auraa o te parau,  te rahi roa ra te parau-tia na ’na, e ore e hamani ino.” (Ioba 34:10; 36:22, 23; 37:23) E nehenehe e papu ia tatou e ia aro te Atua, e tumu maitai ta ’na e na reira ’i. Ma te mana‘o i te reira, e hi‘opoa ana‘e i te tahi mau tumu e rave ai te Atua hau i te tiaraa taata tama‘i i te tahi taime.—Korinetia 1, 14:33.

No te aha te Atua hau e turaihia ’i ia aro

9. No te aha te Atua hau e aro ai?

9 I muri a‘e i te arueraa e “e puai rahi to Iehova i te tama‘i,” ua parau Mose e: “O vai to te mau atua e au ia oe, e Iehova? o vai tei au ia oe, o tei hau ê i te maitai ra?” (Exodo 15:11) Ua papai atoa te peropheta Habakuka e: “E ore to oe mata maitai e tia ia hi‘o i te ino, e ore hoi e au ia oe ia hi‘o i te parau ino.” (Habakuka 1:13) Noa ’tu e e Atua aroha o Iehova, e Atua mo‘a e te parau-tia atoa oia. I te tahi taime, ua turai taua mau huru maitatai ra ia ’na ia faaohipa i to ’na mana haamou. (Isaia 59:15-19; Luka 18:7) Eita ïa te Atua e tuino i to ’na mo‘araa ia aro oia. E aro râ oia no te mea mea mo‘a oia.—Exodo 39:30.

10. (a) Afea ra e nafea te titau-na-mua-raahia i te Atua ia aro? (b) E nafea noa te au ore i tohuhia i roto i te Genese 3:15 e faaorehia ’i, e eaha te mau haamaitairaa e noaa mai i te feia parau-tia?

10 A feruri na i tei tupu i muri a‘e i to na taata matamua, o Adamu e o Eva, orureraa i te hau i te Atua. (Genese 3:1-6) Ahiri oia i faatia noa i to raua haerea tia ore, ua haaparuparu ïa Iehova i to ’na iho tiaraa Arii o te ao taatoa. Ei Atua parau-tia, mea titauhia ia faautua oia ia raua i te pohe. (Roma 6:23) I roto i te parau tohu bibilia matamua, ua faaite atea oia e e tupu te au ore i rotopu i ta ’na iho mau tavini e te feia e pee i te “ophi” ra o Satani. (Apokalupo 12:9; Genese 3:15) I te pae hopea, e ore taua au ore ra na roto noa i te haamouraa ia Satani. (Roma 16:20) Maoti râ taua ohipa haavaraa ra e noaa ’i te mau haamaitairaa rarahi i te feia parau-tia, e mâ  ’i te fenua i te mana o Satani e e mahiti ai te e‘a e tae atu ai i te paradaiso o te ao atoa nei. (Mataio 19:28) Hou te reira, e riro noa te feia no te pae o Satani ei haamǎta‘uraa tamau i te maitai pae tino e pae varua o to te Atua mau taata. I te tahi taime, mea titauhia ia arai mai Iehova.

E ohipa te Atua no te faaore i te ino

11. No te aha te Atua i mana‘o ai e mea titauhia ia hopoi mai i te hoê diluvi na te ao atoa nei?

11 Ua riro te diluvi i te tau o Noa ei hi‘oraa o to te Atua arairaa mai. Te na ô ra te Genese 6:11, 12 e: “Ua ino roa ra te fenua i mua i te aro o te Atua, ua î te fenua i te parau-tia ore. Ua hi‘o ihora hoi te Atua i te fenua nei, e inaha, ua ino roa; ua ino roa te haerea o te taata atoa o te ao nei.” E faatia anei te Atua ia faaore roa te feia iino i te toea morare e vai ra i nia i te fenua? Eita. Ua mana‘o Iehova e mea titauhia ia hopoi mai i te hoê diluvi na te ao atoa nei no te tamâ i te fenua nei i te feia i matau i te peu u‘ana e te morare ore.

12. (a) Eaha ta Iehova i tohu no nia i te “huero” o Aberahama? (b) No te aha i tia ’i ia haamouhia te ati Amori?

12 Mai te reira atoa to te Atua haavaraa i to Kanaana. Ua faaite Iehova e mea na roto ia Aberahama e tae mai ai te hoê “huero,” ei ia ’na hoi e maitai ai te mau fetii atoa o te ao nei. Ia au i taua opuaraa ra, ua faaoti te Atua e horoa i te fenua o Kanaana tei faaeahia e te hoê nunaa o te ati Amori te i‘oa, no te huaai o Aberahama. E nafea te Atua e faatanohia ’i ia tiavaru oia i teie nunaa mai to ratou atu fenua na roto i te puai? Ua tohu Iehova e e tupu te tiavaruraa fatata e 400 matahiti i muri a‘e—ia “navai roa te hara a te ati Amori ra.” * (Genese 12:1-3; 13:14, 15, MN; 15:13, 16; 22:18, MN) I te roaraa o taua anotau ra, ua topa noa ’tu â te mau ati Amori i roto i te viivii i te pae morare. Ua riro mai o Kanaana ei fenua  haamoriraa idolo, haamaniiraa toto, e peu taatiraa hairiiri. (Exodo 23:24; 34:12, 13; Numera 33:52) Ua haapohe atoa to te fenua ra i te mau tamarii i roto i te auahi ei tusia. E tia anei i te hoê Atua mo‘a ia tuu i to ’na nunaa i roto i taua ino ra? Eita! Ua parau oia e: “Ua viivii hoi te fenua: e tahoo ai au i ta ’na hara i nia ia ’na iho, e na te fenua iho e haapuai i to ’na taata i rapae au.” (Levitiko 18:21-25) Aita râ Iehova i haapohe matapo noa i te taata. Ua faaorahia te tahi feia no Kanaana i tia te aau, mai ia Rahaba e te ati Gibeona.—Iosua 6:25; 9:3-27.

Aroraa no to ’na i‘oa

13, 14. (a) No te aha Iehova i titauhia ’i ia faaraa i to ’na i‘oa? (b) Ua nafea Iehova i te faaoreraa i te faaino i to ’na i‘oa?

13 No te mea mea mo‘a Iehova, mea mo‘a atoa to ’na i‘oa. (Levitiko 22:32) Ua haapii Iesu i ta ’na mau pǐpǐ ia pure e: “Ia raa to oe i‘oa.” (Mataio 6:9) Ua vahavaha te orureraa hau i Edene i te i‘oa o te Atua, a haafeaa ’i no nia i to ’na roo e ta ’na huru faatereraa. Eita roa ’tu ta Iehova e nehenehe e tapo i te mata i mua i taua pariraa haavare e taua orureraa hau ra. Mea titauhia ia faaore oia i te faaino i to ’na i‘oa.—Isaia 48:11.

14 A rave faahou na i te mau Iseraela. A faaea tîtî noa ’i ratou i Aiphiti, e au ra e aita e ravea e tupu ai te tǎpǔ a te Atua ia Aberahama e mea na roto i to ’na Huaai e haamaitaihia ’i te mau fetii atoa o te ao nei. Na roto râ i te faaoraraa mai ia ratou e te faariroraa ia ratou ei nunaa, ua faaore Iehova i te faaino i to ’na i‘oa. No reira te peropheta Daniela i haamana‘o ai i roto i te pure e: “E te Fatu, e to matou Atua, o tei aratai mai i to mau taata mai te fenua ra mai Aiphiti ma te puai rahi, e ua itea to oe i‘oa.”—Daniela 9:15.

15. No te aha Iehova i faaora ’i i te mau ati Iuda i te faatîtîraa i Babulonia?

15 Ma te faahiahia, ua na reira Daniela i te pure i to te mau ati Iuda hinaaroraa ia ohipa faahou mai Iehova no to ’Na  i‘oa. To roto â te mau ati Iuda faaroo ore i te faatîtîraa, i teie râ taime i Babulonia ïa. Te vai ano noa ra to ratou iho oire pu o Ierusalema. Ua ite Daniela e e faahanahana te faaho‘iraa i te mau ati Iuda i to ratou fenua i te i‘oa o Iehova. No reira Daniela i pure ai e: “E te Fatu e, e faaore mai i te hara; e te Fatu e, e haapao mai e e rave hoi; eiaha e faaroaroa, i to oe iho hoi i‘oa, e tau Atua; no te mea ua mairihia to oe oire e to oe ra mau taata i to oe iho i‘oa.”Daniela 9:18, 19.

Aroraa no to ’na nunaa

16. A faataa na no te aha to Iehova anaanatae i te faatia i to ’na i‘oa e ere ai i te tapao e mea toetoe oia e te miimii.

16 E tapao anei to Iehova anaanatae i te faatia i to ’na i‘oa e mea toetoe oia e te miimii? Eita, no te mea na roto i te haaraa ia au i to ’na mo‘araa e to ’na hinaaro i te parau-tia, e paruru oia i to ’na mau taata. A rave na i te Genese pene 14. Te taio ra tatou e ua haru e maha na arii i te tamaiti fetii o Aberahama oia o Lota, e to Lota atoa utuafare. Ma te tauturu o te Atua, ua pau ia Aberahama te hoê nuu rahi roa ’‘e! O te aamu matamua paha teie upootiaraa tei faatiahia i roto i “te buka tama‘i na Iehova,” te hoê paha buka tei faataa atoa i te tahi mau tupuraa i te pae tama‘i aita i papaihia i roto i te Bibilia. (Numera 21:14) Mea rahi â upootiaraa to muri a‘e i te reira.

17. Eaha te faaite ra e ua aro Iehova no te mau Iseraela i muri a‘e i to ratou taeraa i te fenua o Kanaana? A horoa i te mau hi‘oraa.

17 Hou rii te mau Iseraela a tae ai i te fenua o Kanaana, ua haapapu Mose ia ratou e: “Na to outou Atua ra na Iehova, o tei na mua ia outou ra e aro i ta outou tama‘i; mai ta ’na atoa i rave ia outou i Aiphiti.” (Deuteronomi 1:30; 20:1) Na nia mai ia Iosua tei mono ia Mose, e i te roaraa o te anotau o te mau Haava e o te faatereraa a te mau arii haapao maitai no Iuda, ua aro mau Iehova no to ’na nunaa, a horoa ’i i te mau upootiaraa rarahi i nia i to ratou mau enemi.—Iosua 10:1-14; Mau tavana 4:12-17; Samuela 2, 5:17-21.

18. (a) No te aha tatou e mauruuru ai e aita Iehova i taui? (b) Eaha te tupu ia raea i te au ore i faataahia i roto i te Genese 3:15 te faito rahi roa ’‘e?

 18 Aita Iehova i taui; aita atoa ta ’na opuaraa e faariro i teie paraneta ei paradaiso hau i taui. (Genese 1:27, 28) Mea riri noâ na te Atua te ino. Mea here atoa na ’na to ’na nunaa e fatata oia i te haa mai no ratou. (Salamo 11:7) Oia mau, te tiaihia ra ia raea i te au ore i faataahia i roto i te Genese 3:15 te hoê faito peapea e te u‘ana taa ê i te hoê tau i fatata roa mai. No te faaraa i to ’na i‘oa e te paruru i to ’na nunaa, e faaite faahou â Iehova e ‘e puai rahi to ’na i te tama‘i’!—Zekaria 14:3; Apokalupo 16:14, 16.

19. (a) A horoa na i te hoê hi‘oraa no te aha tatou e nehenehe ai e haafatata ’tu i te Atua ia faaohipa oia i to ’na mana haamou. (b) Ia nafea to te Atua ineineraa i te aro ia ohipa i nia ia tatou, e tia ’i?

19 E rave ana‘e i te hoê hi‘oraa: A feruri na e te arohia ra te utuafare o te hoê taata e te hoê animara taehae e e horo mai te tane e taparahi i taua animara ra. E mana‘o anei outou e e au ore ta ’na vahine e ta ’na mau tamarii i teie ohipa? Eita roa ’tu, e mana‘o râ outou e e putapû ratou i to ’na here miimii ore ia ratou. Oia atoa, eiaha tatou ia au ore ia faaohipa te Atua i to ’na mana haamou. No to ’na ineineraa i te aro no te paruru ia tatou, e tia ia tatou ia here atu â ia ’na. Ia hohonu  atoa ’tu â to tatou faatura i to ’na mana otia ore. E nehenehe ïa tatou e ‘pûpû i te Atua i te hoê taviniraa mo‘a ma te mǎta‘u i te Atua e te tura.’—Hebera 12:28MN.

A haafatata ’tu i tei ‘puai rahi to ’na mana i te tama‘i’

20. Ia taio tatou i te mau aamu bibilia no nia i te mau tama‘i a te Atua aita e taa maitai ra ia tatou, ia nafea tatou e tia ’i, e no te aha?

20 Papu maitai, aita te Bibilia i haamataratara roa i te mau faaotiraa a Iehova no nia i ta ’na mau tama‘i i roto i te mau tupuraa atoa. E nehenehe râ e papu noa ia tatou e eita roa ’tu Iehova e faaohipa i te mana haamou ma te tia ore, te tumu ore, aore ra ma te ino mau. Mea pinepine, ia hi‘opoa tatou i te mau huru tupuraa o te hoê aamu bibilia aore ra eaha to muri mai, e nehenehe tatou e tauturuhia ia taa maitai te mau mea. (Maseli 18:13) Noa ’tu e aita i noaa ia tatou te mau haamaramaramaraa atoa, ia haapii hau noa ’tu â tatou no nia ia Iehova e ia feruriruri i to ’na mau huru faahiahia, e nehenehe tatou e tauturuhia ia faaore i te mau feaaraa atoa e fa noa mai. Ia na reira tatou, e ite mai tatou e e tumu rahi ta tatou e tiaturi ai i to tatou Atua, o Iehova.—Ioba 34:12.

21. Noa ’tu e “e puai rahi to Iehova i te tama‘i” i te tahi taime, eaha te huru mau o Iehova?

21 Noa ’tu e “e puai rahi to Iehova i te tama‘i” ia titau te huru tupuraa i te reira, e ere ïa te auraa e mea au na ’na te tama‘i. I roto i te orama a Ezekiela o te pereoo i te ra‘i ra, te faataahia ra Iehova e faaineine ra i te aro i to ’na mau enemi. Teie râ, ua ite Ezekiela i te Atua e haaatihia ra e te hoê anuanua—te hoê taipe o te hau. (Genese 9:13; Ezekiela 1:28; Apokalupo 4:3) Papu maitai, mea hitahita ore e te hau o Iehova. ‘E aroha te Atua,’ o ta te aposetolo Ioane ïa i papai. (Ioane 1, 4:8) Mea faito roa te mau huru maitatai atoa o Iehova. E fana‘oraa taa ê mau ïa ta tatou te neheneheraa e haafatata ’tu i teie Atua puai e te î atoa râ i te here!

^ par. 1 Ia au i te taata tuatapapa ati Iuda ra o Josèphe, te “a‘ua‘uhia ra” te mau Hebera “e na pereoo tama‘i e 600 e e na horo puaahorofenua e 50 000 e e na faehau e 200 000 e haere na raro ma te haana tama‘i teiaha.”—Antiquités judaïques, II, 324 [xv, 3].

^ par. 12 Papu maitai, na roto i te mau ta‘o ra “ati Amori,” te parauhia ra te mau nunaa atoa no Kanaana.—Deuteronomi 1:6-8, 19-21, 27; Iosua 24:15, 18.

No te ite atu â

Eaha te Mahana Haavaraa?

Haapii no te aha te Mahana Haavaraa e riro ai ei haamaitairaa no te huitaata taiva ore.