Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 8

Mana faaapî—“Te faaapî nei” Iehova “i te mau mea atoa nei”

Mana faaapî—“Te faaapî nei” Iehova “i te mau mea atoa nei”

1, 2. I teie tau, te ere ra te huitaata i teihea mau mea, e e nafea te reira ia ohipa i nia ia tatou?

UA MOE aore ra ua parari te tao‘a hauti ta te hoê tamarii e au roa ’‘e e te ta‘i ra oia ma te peapea. E puta roa te aau ia faaroo atu! Ua ite a‘ena râ anei outou e nafea te mata o te hoê tamarii ia anaanatae roa mai ia faaho‘i mai te hoê metua i tei moe? No te metua, e ere paha i te ohipa rahi ia imi i te tao‘a hauti aore ra ia tataî atu. E oaoa roa râ te tamarii e mea faahiahia roa na ’na. Ua roaa faahou mai hoi tei au ra e aita e ravea faahou!

2 E mana to Iehova, te Metua maitai roa ’‘e, no te faaapî i ta ta ’na mau tamarii i te fenua nei e mana‘o ra e aita e ravea faahou. Papu maitai, aita matou e faahiti ra i te mau tao‘a hauti. I teie nei tau “ati rahi faaruru atâ,” e tia ia tatou ia faaruru i te mau ereraa ino roa ’tu â. (Timoteo 2, 3:1-5, MN) Te faaû noa ra te rahiraa o te mau mea ta te taata e poihere—te fare, te mau faufaa, te ohipa, e tae noa ’tu te ea—i te ati. E peapea roa atoa paha tatou ia hi‘o tatou ia tuinohia te natura e, ei faahopearaa o te reira, ia ore roa te mau huru mea ora e rave rahi. Aita râ e mea o te haamauiui hau atu ia tatou i te poheraa o te hoê taata ta tatou e here. E nehenehe tatou e î roa i te peapea e i te mana‘o e aita e ravea faahou.—Samuela 2, 18:33.

3. Eaha te tiaturiraa mahanahana i faataahia i roto i te Ohipa 3:21, e e nafea Iehova ia faatupu i te reira?

3 Mea mahanahana mau ïa ia haapii no nia i te mana faaapî o Iehova! Mai ta tatou e ite mai, mea maere roa te rahi o te mau mea ta te Atua e nehenehe e e hinaaro e faaapî no ta ’na mau tamarii i te fenua nei. Oia mau, te faaite ra te Bibilia e te opua ra Iehova i te “[faaapîraa i] te mau mea atoa nei.” (Ohipa 3:21; MN) No te rave i te reira, e faaohipa Iehova i te Basileia o te Mesia faaterehia e ta ’na Tamaiti o Iesu Mesia. Te vai  ra te haapapuraa e ua haamata teie Basileia i te faatere i nia i te ra‘i i te matahiti 1914 ra. * (Mataio 24:3-14) Eaha te faaapîhia? E hi‘o ana‘e i te tahi o te mau ohipa faaapîraa faahiahia a Iehova. Te ite a‘ena ra tatou i te hoê o te reira. E tupu te tahi atu i nia i te hoê faito rahi roa a muri a‘e.

Te faaapîraahia te haamoriraa viivii ore

4, 5. Eaha te mea i roohia ’i te nunaa o te Atua i te matahiti 607 H.T.T., e eaha te tiaturiraa ta Iehova i horoa ’tu?

4 O te haamoriraa viivii ore te hoê mea ta Iehova i faaapî a‘ena. Ia taa ia outou te auraa o te reira, e hi‘opoa poto ana‘e i te tuatapaparaa o te basileia o Iuda. Ia na reira tatou, e re‘are‘a tatou i te ite-roa-raa ’tu i te mana faaapî o Iehova i te ohiparaa.—Roma 15:4.

5 A feruri noa na eaha te huru o te mau ati Iuda haapao maitai i te matahiti 607 H.T.T. ra i to Ierusalema haamouraahia. Ua faaanohia to ratou oire here, e ua parari te mau patu. Te mea ino atu â, ua vavahihia te hiero hanahana ta Solomona i patu, te pu iho o te haamoriraa viivii ore a Iehova i te ao atoa nei. (Salamo 79:1) Ua hopoi-tîtî-hia tei ora mai i Babulonia, a faarue ai i to ratou fenua ai‘a ei vahi oraraa ano no te mau animara oviri. (Ieremia 9:11) I te hi‘oraa a te taata, e au ra e aita e ravea faahou. (Salamo 137:1) Ua horoa râ Iehova, tei tohu a‘ena i teie haamouraa, i te tiaturiraa e te vai ra te hoê tau faaapîraa i mua.

6-8. (a) Eaha te tumu parau i faahiti-pinepine-hia i roto i te mau papai a te mau peropheta Hebera, e eaha te tupuraa matamua o taua mau parau tohu ra? (b) I teie tau, mea nafea to te nunaa o te Atua iteraa i te hoê tupuraa o te parau tohu e rave rahi no nia i te faaapîraa?

6 Oia mau, e tumu parau faahiti-pinepine-hia te faaapîraa i  roto i te mau papai a te mau peropheta Hebera. * Na roto ia ratou, ua tǎpǔ Iehova i te hoê fenua o te faaapîhia e te î faahou mai i te taata, te hotu maitai, e te paruruhia i te animara oviri e te aroraa enemi. Ua faataa oia i to ratou fenua e faaapîhia mai te hoê paradaiso mau! (Isaia 65:25; Ezekiela 34:25; 36:35) Hau atu â, e faaapîhia te haamoriraa viivii ore, e e patu-faahou-hia te hiero. (Mika 4:1-5) Ua horoa teie mau parau tohu i te tiaturiraa i te mau ati Iuda e parahi tîtî ra a tauturu ai ia ratou ia faaoromai i to ratou faatîtîraa e 70 matahiti i Babulonia.

7 I te pae hopea, ua tae mai te tau faaapîraa. Ua tuuhia te mau ati Iuda mai Babulonia mai, ua ho‘i i Ierusalema e ua patu faahou i te hiero o Iehova. (Ezera 1:1, 2) A pee maite noa ’i ratou i te haamoriraa viivii ore, ua haamaitai Iehova ia ratou e ua rave e ia hotu maitai e ia ruperupe mai to ratou fenua. Ua paruru oia ia ratou i te enemi e te animara oviri tei faaî i to ratou fenua e rave rahi matahiti i te maoro. Ua oaoa mau paha ratou i te mana faaapî o Iehova! Ua riro noa râ taua mau mea ra ei tupuraa matamua e te taotiahia o te mau parau tohu no nia i te faaapîraa. To muâ te tupuraa rahi a‘e, “i te mau mahana hopea ra,” oia to tatou iho tau, ia faateronohia te Taata ai‘a o te arii Davida i tǎpǔ-atea-hia.—Isaia 2:2-4; 9:6, 7.

8 I muri rii a‘e i to Iesu faateronoraahia i roto i te Basileia i te ra‘i i te matahiti 1914 ra, ua haapao mai oia i te mau hinaaro pae varua o te nunaa haapao maitai o te Atua i te fenua nei. Mai te taata haru fenua no Peresia ra o Kuro tei faaora i te toea ati Iuda mai Babulonia mai i te matahiti 537 H.T.T., ua faaora Iesu i te toea ati Iuda pae varua—ta ’na iho mau pǐpǐ—i te mana o te Babulonia no teie tau, oia te hau emepera o te ao atoa o te haapaoraa hape. (Roma 2:29; Apokalupo 18:1-5) Mai te matahiti 1919 mai, ua faaapîhia te haamoriraa viivii ore i to ’na parahiraa mau i roto i te oraraa o te mau Kerisetiano mau. (Malaki 3:1-5) Mai reira mai, ua haamori te nunaa o Iehova ia ’na i roto i to ’na hiero pae varua tamâhia—te faanahoraa a te  Atua no te haamoriraa viivii ore. No te aha te reira e riro ai ei mea faufaa na tatou i teie tau?

Faaapîraa pae varua—no te aha e riro ai ei mea faufaa

9. I muri a‘e i te tau o te mau aposetolo, eaha ta te mau ekalesia o te Amuiraa faaroo Kerisetiano i rave i nia i te haamoriraa a te Atua, eaha râ ta Iehova i rave i to tatou tau?

9 E hi‘o ana‘e ia au i te tuatapaparaa. Ua fana‘o te mau Kerisetiano i te mau haamaitairaa pae varua e rave rahi i te senekele matamua. Ua tohu râ Iesu e te mau aposetolo e e haaviiviihia te haamoriraa mau e e ore roa ’tu. (Mataio 13:24-30; Ohipa 20:29, 30) I muri a‘e i te tau o te mau aposetolo, ua fa mai te Amuiraa faaroo Kerisetiano. Ua farii te pǔpǔ ekalesiatiko i te mau haapiiraa e te mau peu etene. No ratou i riro atoa ’i ei mea fifi roa na te taata e haafatata ’tu i te Atua no te mea ua faataa ratou ia ’na mai te hoê Toru Tahi taa ore e ua haapii i te taata ia fa‘i i te hara i mua i te mau perepitero e ia pure ia Maria e te mau “peata” e rave rau eiaha râ ia Iehova. I teie nei, i muri a‘e ehia senekele taviriraa parau, eaha ta Iehova i rave? I roto i te ao i teie tau—te hoê ao i î roa i te haavare a te haapaoraa e i viivii roa i te mau peu paieti ore—ua arai mai oia e ua faaapî ihora i te haamoriraa viivii ore! Ma te ore e faarahi, e nehenehe ta tatou e parau e o teie faaapîraa te tupuraa faahiahia roa ’‘e o teie tau.

10, 11. (a) Eaha na tuhaa e piti o te paradaiso pae varua, e e nafea te reira ia ohipa i nia ia outou? (b) Ua haaputuputu Iehova i teihea huru taata i roto i te paradaiso pae varua, e e haamaitaihia ratou e ite atu i te aha?

10 Te fana‘o ra ïa te mau Kerisetiano mau i te hoê paradaiso pae varua i teie tau. Eaha to teie paradaiso? Na mua roa, e piti tuhaa. A tahi, o te haamoriraa viivii ore tera a te Atua mau ra o Iehova. Ua haamaitai mai oia ia tatou i te hoê huru haamoriraa aita e haavare e e taviriraa parau to roto. Ua horoa mai oia i te maa varua. Maoti te reira i haapii ai tatou no nia i to tatou Metua i te ra‘i, i faaoaoa ’i e i haafatata ’tu ai tatou ia ’na. (Ioane 4:24) Ua taaihia te piti o te tuhaa o te paradaiso pae varua i te taata.  Mai ta Isaia i tohu, “ia tae i te mau mahana hopea ra,” ua haapii Iehova i to ’na feia haamori i te e‘a o te hau. Ua faaore oia i te tama‘i i rotopu ia tatou. Noa ’tu to tatou huru tia ore, te tauturu maira oia ia tatou ia ahu i ‘te huru taata apî.’ E haamaitai oia i ta tatou mau tutavaraa na roto i te horoaraa mai i to ’na varua mo‘a, o te faatupu i te mau hotu maitatai i roto ia tatou. (Ephesia 4:22-24; Galatia 5:22, 23) Ia ohipa outou ia au i te varua o te Atua, to roto mau ïa outou i te paradaiso pae varua.

11 Ua haaputuputu Iehova i te huru taata ta ’na e here—te feia e here ra ia ’na, e hinaaro ra i te hau, e te “ite i to ratou veve i te pae varua”—i roto i taua paradaiso pae varua ra. (Mataio 5:3, MN) Tera te mau taata e haamaitaihia e ite atu i te hoê faaapîraa faahiahia ’tu â—to te huitaata ïa e to te fenua taatoa.

“Inaha, te faaapî nei au i te mau mea atoa nei”

12, 13. (a) No te aha e tia ’i ia tupu â te mau parau tohu no nia i te faaapîraa? (b) Eaha te opuaraa a Iehova no te fenua mai tei parauhia i Edene, e no te aha te reira e horoa mai ai i te tiaturiraa no a muri a‘e?

12 Ua taaihia te mau parau tohu e rave rahi no nia i te faaapîraa eiaha noa i te faaapîraa pae varua. Ua papai o Isaia, ei hi‘oraa, no nia i te hoê tau i reira te taata ma‘i, te pirioi, te matapo e te tari‘a turi e faaorahia ’i e e faaore-roa-atoa-hia ’i te pohe iho. (Isaia 25:8; 35:1-7) Aita taua mau parau fafau ra i tupu i te pae tino i Iseraela i tahito ra. E noa ’tu e ua ite tatou i te hoê tupuraa pae varua o teie mau parau fafau i to tatou nei tau, te vai ra te tumu papu e tiaturi ai e a muri a‘e, e tupu roa ino te reira i te pae tino. Mea nafea tatou i ite ai?

13 I te ô i Edene ra, ua faataa maitai Iehova i ta ’na opuaraa no te fenua: Ia faaeahia ïa e te hoê hui fetii oaoa, te oraora maitai e te tahoê. Ua opuahia e ia haapao maitai te tane e te vahine i te fenua e i te mau mea ora atoa i poietehia i nia iho, ia faariro i te paraneta taatoa ei paradaiso. (Genese 1:28) Mea taa ê roa ïa i te huru o te mau mea i teie nei. E nehenehe râ tatou e tiaturi e eita roa ’tu te mau opuaraa a Iehova e faataupupuhia. (Isaia 55:10, 11) E faatupu Iesu, ei Arii e Mesia faatoroahia e Iehova, i taua Paradaiso ra i te ao atoa nei.—Luka 23:43.

14, 15. (a) E nafea Iehova ia ‘faaapî i te mau mea atoa nei’? (b) Mai te aha te huru o te oraraa i roto i te Paradaiso, e eaha te tuhaa mea au roa ’‘e na outou?

 14 A feruri na e te ite ra outou i te fenua taatoa ia riro ei Paradaiso! Te na ô ra Iehova no nia i taua tau ra e: “Inaha, te faaapî nei au i te mau mea atoa nei.” (Apokalupo 21:5) A hi‘o na eaha to te reira auraa. Ua faaohipa ana‘e Iehova i to ’na mana haamou i nia i teie faanahoraa tahito e te ino, e toe noa mai “te ra‘i apî e te fenua apî.” Na te hoê ïa faatereraa apî e faatere mai nia mai i te ra‘i i te hoê huitaata apî i te fenua nei oia hoi te feia e here ra ia Iehova e e rave ra i to ’na hinaaro. (Petero 2, 3:13) Eita ta Satani e ta ’na atoa mau demoni e nehenehe faahou e ohipa. (Apokalupo 20:3) A tahi ra ïa i roto i te mau tausani matahiti te huitaata e tiamâ ’i i taua mana viivii ra, te faufau e te ino. Aita e feaaraa e e topa mau te hau.

15 I te pae hopea, e tia ia tatou ia haapao maitai i teie paraneta nehenehe mai tei opuahia i te omuaraa. E puai faaapîraa ia ’na iho to te fenua. E mâ noa mai te mau roto e te mau anavai i haaviiviihia ia faaorehia te tumu i viivii ai; e maitai mai te mau fenua i tuinohia ia faaea te mau tama‘i. Mea au mau ïa ia ohipa ia au i te natura o te fenua, a tauturu ai i te faariro atu ei aua tiare, ei ô i Edene na te ao atoa nei ma te mau mea ora huru rau hope! Maoti i te faaore faufaa ore noa i te mau huru animara e tiare, e faaea hau te taata e te mau mea atoa i poietehia i nia i te fenua. Aita atoa e tumu e mǎta‘u ai te tamarii i te mau animara oviri.—Isaia 9:6, 7; 11:1-9.

16. I roto i te Paradaiso, eaha te faaapîraa e tupu i nia i te taata haapao maitai atoa?

16 E ite atoa tatou i te faaapîraa i nia ia tatou iho. I muri a‘e i Aramagedo, e ite te feia e ora ’tu i te mau faaoraraa semeio na te ao atoa nei. Mai ta ’na i rave a tia noa ’i oia i te fenua nei, e faaohipa Iesu i te mana ta te Atua i horoa mai no te faaora i te matapo, te tari‘a turi, e te tino o te pirioi e o te paruparu. (Mataio 15:30) E oaoa te feia paari ia faaapîhia to ratou puai, to ratou ea, e to ratou itoito. (Ioba 33:25) Eita te mau iri e oriorio faahou, e etaetahia mai te mau melo, e e fatifati maitai te mau  uaua i‘o ma te puai apî. E taa noa i te huitaata haapao maitai atoa ia ore mǎrû atu te mau faahopearaa o te hara e o te huru tia ore. E mauruuru mau tatou i te Atua ra o Iehova no to ’na mana faaapî faahiahia! E hi‘o maitai ana‘e i teie nei hoê tuhaa mahanahana mau o teie tau faaapîraa oaoa mau.

Faaho‘iraa mai i te ora o tei pohe

17, 18. (a) No te aha Iesu i a‘o ai i te mau Sadukea? (b) Eaha te mau tupuraa tei turai ia Elia ia ani ia Iehova e rave i te hoê faatia-faahou-raa?

17 I te senekele matamua T.T., aita te tahi mau aratai haapaoraa, parauhia te mau Sadukea, e tiaturi ra i te tia-faahou-raa. Ua a‘o Iesu ia ratou na roto i teie mau parau: “Te hape nei outou i te ite ore i te parau i papaihia ra, e te mana o te Atua.” (Mataio 22:29) Oia, te faaite ra te mau Papai e te vai ra to Iehova tera mana faaapî. E nafea hoi?

18 A feruri na i tei tupu i te tau o Elia. Te tapea ra te hoê vahine ivi i te tino rarerare o ta ’na tamaiti otahi i nia i to ’na rima. Ua pohe te tamaiti. Ua horuhoru paha te peropheta Elia tei farii-manihini-hia e te vahine ivi ra e rave rahi mahana i te maoro. Na mua ’‘e, ua faaora mai oia i taua tamarii ra i te o‘e. Peneia‘e e ua here atoa o Elia i te hoa iti ra. Ua oto roa te aau o te metua vahine. O teie ana‘e tamaiti te haamana‘o mai i ta ’na tane i pohe. Ua tiaturi paha oia e na ta ’na tamaiti e aupuru mai ia ’na ia paari roa oia. Ma te hepohepo roa, ua mǎta‘u te vahine ivi ra e ua faautuahia oia no te tahi hape tahito. Aita ta Elia i nehenehe e faaoromai i te iteraa e ua ino atu â teie ati mai teie. Ua rave mǎrû mai oia i te tino pohe mai nia mai i te ouma o te metua vahine, ua hopoi atu i nia i roto i to ’na piha, e ua ani atu i te Atua ra o Iehova ia faaho‘i mai i te nephe, aore ra ora, o te tamarii.—Mau arii 1, 17:8-21.

19, 20. (a) Mea nafea to Aberahama faaiteraa i to ’na faaroo i te mana faaapî o Iehova, e eaha te tumu o taua faaroo ra? (b) Mea nafea to Iehova haamaitairaa i te faaroo o Elia?

19 E ere o Elia te taata matamua tei tiaturi i te tia-faahou-raa. E rave rahi senekele na mua ’‘e, ua tiaturi o Aberahama e te vai ra to Iehova taua mana faaapî ra—e tumu maitai ta ’na i na  reira ’i. I te 100raa o to Aberahama matahiti e te 90raa o to Sara, ua faaapî Iehova i to raua puai fanauraa i pohe, a rave semeio ai e ia fanau o Sara i te hoê tamaiti. (Genese 17:17; 21:2, 3) I muri a‘e, i to te tamaiti paariraa mai, ua ani Iehova ia Aberahama e pûpû ia ’na ei tusia. Ua faaite o Aberahama i to ’na faaroo, ua tiaturi oia e e nehenehe ta Iehova e faaho‘i mai i ta ’na tamaiti here o Isaaka. (Hebera 11:17-19) No taua faaroo puai ra e taa ’i ia tatou no te aha Aberahama i haapapu ai i ta ’na mau tavini, hou a paiuma ’i i nia i te mou‘a e pûpû i ta ’na tamaiti, e e ho‘i mai raua o Isaaka.—Genese 22:5.

“Inaha, ua ora to tamaiti”!

20 Ua faaora Iehova ia Isaaka, no reira aita i hinaarohia te hoê tia-faahou-raa i taua taime ra. I roto râ i te tupuraa o Elia, ua pohe a‘ena te tamaiti a te vahine ivi—e ere râ no te hoê tau roa. Ua haamaitai Iehova i te faaroo o te peropheta na roto i te faatiaraa mai i te tamarii! Ua tuu atura o Elia i te tamaiti i to ’na metua vahine ra, ma te parau atu i teie mau parau eita e moehia: “Inaha, ua ora to tamaiti”!—Mau arii 1, 17:22-24.

21, 22. (a) Eaha te fa o te mau faatia-faahou-raa i tapaohia i roto i te mau Papai? (b) I roto i te Paradaiso, i nia i teihea faito e ravehia ’i te faatia-faahou-raa, e na vai te reira e rave?

21 A tahi ra ïa i roto i te aamu bibilia tatou e ite ai ia Iehova ia faaohipa i to ’na mana no te faaho‘i mai i te ora o te hoê taata. I muri a‘e, ua horoa atoa Iehova i te mana na Elisaia, Iesu, Paulo e na Petero e faaho‘i mai i tei pohe. Parau mau, ua pohe faahou tei faatiahia mai. Teie râ, te horoa maira taua mau aamu bibilia ra i te hoê hi‘o-atea-raa faahiahia i te mau mea e tupu a muri a‘e.

22 I roto i te Paradaiso, e rave Iesu i ta ’na tuhaa i roto i “te tia-faahou-raa e te ora.” (Ioane 11:25) E faatia mai oia i te mau mirioni taata, a horoa ’tu ai i te ravea e ora e a muri noa ’tu i roto i te Paradaiso i te fenua nei. (Ioane 5:28, 29) A feruri na i te mau farereiraa a tauahi ai te mau hoa e te mau fetii tei faataa-ê-maoro-hia e te pohe, te tahi i te tahi ma te re‘are‘a rahi roa e te  oaoa! E arue te huitaata taatoa ia Iehova no to ’na mana faaapî.

23. Eaha te faaiteraa rahi roa ’‘e i te mana o Iehova, e e nafea te reira ia haapapu i to tatou tiaturiraa no a muri a‘e?

23 Ua horoa mai Iehova i te haapapuraa paari e mea mau roa taua mau tiaturiraa ra. I roto i te faaiteraa rahi roa ’‘e i to ’na mana, ua faatia mai oia i ta ’na Tamaiti o Iesu ei varua ora puai roa ’‘e i muri a‘e ia ’na iho. Ua fa ’tu Iesu tei faatiahia mai i mua i te mau hanere ite. (Korinetia 1, 15:5, 6) Tae noa ’tu no te feia feaa, mea navai hoi teie haapapuraa. E mana to Iehova e faaho‘i mai i te ora.

24. No te aha tatou e nehenehe ai e tiaturi e e faatia mai Iehova i tei pohe, e eaha te tiaturiraa ta tatou taitahi e nehenehe e poihere?

24 E ere noa e e mana to Iehova e faaho‘i mai i tei pohe, e hinaaro atoa râ oia e na reira. Ua faauruahia te taata haapao maitai ra o Ioba e parau e te oto mau ra Iehova i te tiairaa no te faaho‘i mai i tei pohe. (Ioba 14:15) Aita anei outou e anaanatae atura i to tatou Atua o te hinaaro mau e faaohipa i to ’na mana faaapî ma teie huru î i te here? A haamana‘o na râ e ua riro te tia-faahou-raa ei hoê noa tuhaa o te ohipa faaapîraa rahi a Iehova e vai ra i mua. A haafatata noa ’tu ai outou ia ’na, a poihere noa i te tiaturiraa faahiahia e e nehenehe outou e tia ’tu i reira e hi‘o ai ia Iehova ia ‘faaapî i te mau mea atoa nei.’—Apokalupo 21:5.

^ par. 3 Ua haamata “te tau [faaapîraa i] i te mau mea atoa” i te haamauraahia te Basileia o te Mesia ma te hoê taata ai‘a o te arii Davida i nia i te terono. Ua tǎpǔ Iehova ia Davida e e faatere to ’na hoê taata ai‘a e a muri noa ’tu. (Salamo 89:35-37) I muri a‘e râ i to Babulonia haamouraa ia Ierusalema i te matahiti 607 H.T.T., aita e huaai taata o Davida i parahi i nia i te terono o te Atua. Ua riro Iesu tei fanauhia i nia i te fenua ei taata ai‘a o Davida, ei Arii i tǎpǔ-atea-hia i to ’na faateronoraahia i nia i te ra‘i.

^ par. 6 Ei hi‘oraa, ua haamataratara paatoa o Mose, Isaia, Ieremia, Ezekiela, Hosea, Ioela, Amosa, Obadia, Mika, e o Zephania i teie tumu parau.

No te ite atu â

Eaha te opuaraa a te Atua no te fenua?

E tupu anei te opuaraa a te Atua no te paradaiso i te fenua? Mai te peu e e, afea?