Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 4

‘Te rahi ra to Iehova mana’

‘Te rahi ra to Iehova mana’

1, 2. Eaha te mau mea maere ta Elia i ite i roto i to ’na oraraa, eaha râ te mau tupuraa faahiahia roa ta ’na i ite mai roto mai i te ana i nia i te mou‘a Horeba?

UA ITE o Elia i te mau mea maere na mua ’‘e. Ua ite oia i te mau oreba i te hopoiraa mai i te maa na ’na e piti taime i te mahana a tapuni noa ’i oia. Ua ite oia e piti farii i te horoaraa i te faraoa ota e te hinu i te roaraa o te hoê tau o‘e maoro ma te ore roa ’tu e pau. Ua ite atoa oia i te auahi i te mairiraa mai nia mai i te ra‘i ei pahonoraa i ta ’na pure. (Mau arii 1, mau pene 17, 18) Teie râ, aitâ Elia i ite a‘enei i te hoê mea mai teie.

2 A puto‘i ai oia i pihai i te uputa o te hoê ana i nia i te mou‘a Horeba, ua ite oia i te hoê anairaa tupuraa faahiahia roa. Na mua, te vai ra te hoê mata‘i. Mea puai roa paha te haruru o te mata‘i, ua parari hoi te mou‘a e te mato i te reira. I muri iho, ua tupu te hoê aueueraa fenua, tei tuu i te mau puai rarahi e vai ra i roto i te paa fenua. E oti a‘era, e auahi atura. A tairi ai te reira i te tuhaa fenua ra, ua ite mau paha o Elia i te ahu rahi i te puihauraa mai i nia ia ’na.—Mau arii 1, 19:8-12.

“Inaha, ua haere ihora Iehova na reira iho”

3. Ua ite o Elia i te haapapuraa o teihea ateriputi o te Atua, e ihea tatou e ite ai i te haapapuraa o teie atoa huru?

3 Hoê mea o te taai ra i teie mau tupuraa huru rau ta Elia i ite—e faaiteraa ana‘e o te mana rahi o te Atua ra o Iehova. Parau mau, aita e faufaa ia ite roa ’tu tatou i te semeio e taa ’i ia tatou e tera te tahi ateriputi o te Atua. E ite-noa-hia te reira. Te faaite maira te Bibilia e te haapapu ra tei poietehia i te “mana hope ra e te Atuaraa” o Iehova. (Roma 1:20) A feruri noa na i te mau ama uira anaana e te mau haruru patiri puai o te hoê vero, te toparaa hanahana o te hoê pape puai, te rahi hahano o te hoê ra‘i î i te fetia! Aita anei outou e ite ra i te mana o te Atua i roto i taua mau faaiteraa ra? Teie râ, mea iti i roto i te ao i teie tau o te farii mau ra i te mana o te Atua. Mea iti atu â o te hi‘o ra i te reira ma te tano. Ia taa râ ia tatou teie ateriputi o  Iehova, mea rahi ïa tumu e haafatata ’tu ai tatou ia ’na. I roto i teie tuhaa, e faahohonu maite tatou i te mana faito ore o Iehova.

Te hoê ateriputi faufaa roa o Iehova

4, 5. (a) Eaha te taairaa e vai ra i roto i te i‘oa o Iehova e to ’na puai, aore ra mana? (b) No te aha e tano ai to Iehova maitiraa i te puaatoro oni no te faataipe i to ’na mana?

4 Mea otahi o Iehova i te pae o te mana. Te na ô ra te Ieremia 10:6 e: “Aore roa o oe e faito, e Iehova, te rahi ra hoi oe, e te rahi atoa ra to oe i‘oa i te puai.” A tapao na e ua taaihia te puai, aore ra mana, i te i‘oa o Iehova. A haamana‘o e “Na ’na e faariro ” te auraa o teie i‘oa. Maoti te aha e nehenehe ai ta Iehova e hamani i te mau mea atoa e e faariro ia ’na mai ta ’na atoa e hinaaro? O te mana te tahi. Oia, aita e otia to te ravea a Iehova no te haa, no te faatupu i to ’na hinaaro. Taua mana ra, o te hoê ïa o to ’na mau ateriputi faufaa roa.

5 No te mea eita roa ’tu e taa ia tatou te faito hope o to ’na mana, e rave Iehova i te mau faahoho‘araa no te tauturu ia tatou. Mai ta tatou i ite mai, e rave oia i te puaatoro oni no te faataipe i to ’na mana. (Ezekiela 1:4-10) Mea tano taua maitiraa ra, e animara rahi e te puai atoa hoi te puaatoro rata. Mea varavara to Paretetina i te tau bibilia i te farerei, peneia‘e te ore roa ’tu, i te hoê animara puai a‘e. Ua ite râ ratou e te vai ra te hoê huru puaatoro oni riariahia ’tu â—te reema, aore ra aurochs, tei ore roa mai taua tau mai ra. (Ioba 39:9-12) Ua faataa te emepera Roma ra o Jules César i te hoê taime e fatata hoê â rahi to teie puaatoro oni e to te elefani. “E rahi to ratou puai,” o ta ’na ïa i papai, “e e rahi to ratou vitiviti.” A feruri na i to outou nainai e te paruparu i pihai iho i teie animara!

6. No te aha e riro ai e o Iehova ana‘e te parauhia te “Mana hope”?

6 Oia atoa, mea nainai e te puai ore te taata ia faaauhia i te Atua mana ra o Iehova. Ia ’na, e au atoa te mau fenua puai i te hu‘a repo i nia i te faito ra. (Isaia 40:15) Eiaha mai te mau  mea atoa ta ’na i poiete, e mana otia ore to Iehova, o oia ana‘e hoi te parauhia te “Mana hope.” * (Apokalupo 15:3) E “mana rahi” to Iehova e te “puai rahi.” (Isaia 40:26) O oia te tumu pau ore o te mana. Aita oia i taaihia i te tahi tumu ito ê, no te mea “no te Atua te mana.” (Salamo 62:11) Mea na roto râ i teihea ravea e faaohipa ’i Iehova i to ’na mana?

E nafea Iehova ia faaohipa i to ’na mana

7. Eaha te varua mo‘a o Iehova, e eaha te mana‘o e vai ra i roto i te mau ta‘o o te reo tumu i faaohipahia i roto i te Bibilia?

7 E faaohipa Iehova i to ’na varua mo‘a ma te taotia ore. O te mana te reira o te Atua e ohipa ra. Oia mau, i roto i te Genese 1:2 (MN), te parau ra te Bibilia i te reira “te puai ohipa” o te Atua. E nehenehe na ta‘o Hebera e Heleni tumu i hurihia ei “varua” e hurihia i roto i te tahi atu mau irava ei “mata‘i,” e ei “aho.” Ia au i te feia faatoro parau, i roto i te mau ta‘o o te reo tumu, te vai ra te mana‘o o te hoê puai itea ore e ohipa ra. Mai te mata‘i, eita te varua o te Atua e itehia i to tatou mata, mea mau râ to ’na ohiparaa e te itehia.

8. I roto i te Bibilia, e faahoho‘ahia te varua o te Atua i te aha, e no te aha teie mau faaauraa e tano ai?

8 E hope te rau te huru e faaohipahia ’i te varua mo‘a o te Atua. E nehenehe ta Iehova e faaohipa i te reira no te faatupu i te opuaraa atoa ta ’na e mana‘o ra. E tano ïa ia faahoho‘ahia te varua o te Atua i roto i te Bibilia i to ’na “rima,” to ’na “rima puai,” aore ra i to ’na “rima i faatorohia.” (Luka 11:20; Deuteronomi 5:15; Salamo 8:3) Mai te hoê taata o te faaohipa i to ’na rima no te rave i te hoê anairaa ohipa rahi o te titau i te faito puai aore ra aravihi huru rau, e nehenehe atoa ta te Atua e faaohipa i to ’na varua no te faatupu i te mau opuaraa atoa—mai te poieteraa i te hu‘a atomi nainai roa aore ra te faataa-ê-raa i te Miti Uteute aore ra te horoaraa i te ravea ia paraparau te mau Kerisetiano no te senekele matamua i te mau reo ěê.

9. Mai te aha te rahi o te mana faatere o Iehova?

 9 E faaohipa atoa Iehova i te puai na roto i to ’na mana faatere ei Arii o te ao taatoa. E nehenehe anei ta outou e feruri e e mau mirioni e mau mirioni tino huiraatira maramarama e te aravihi ta outou o te tae te aau e haapao i ta outou faaueraa? Tera te mana faatere ta Iehova e faaohipa. E mau tavini taata ta ’na o te pinepine i te faahoho‘ahia i te hoê nuu i roto i te Bibilia. (Salamo 68:11; 110:3) Mea paruparu râ te hoê taata ia faaauhia i te hoê melahi. Inaha, i to te nuu no Asura aroraa i te nunaa o te Atua, na te hoê noa melahi i haapohe 185 000 o taua mau faehau ra i te hoê noa po! (Mau arii 2, 19:35) E “hau i te puai” te mau melahi a te Atua.—Salamo 103:19, 20.

10. (a) No te aha te Mana hope e parauhia ’i o Iehova o te mau nuu? (b) O vai te mea puai roa ’‘e o te mau mea atoa i poietehia e Iehova?

10 Ehia rahiraa melahi e vai ra? Ua ite te peropheta Daniela i te hoê orama o te ra‘i e hau atu i te 100 mirioni varua ora to mua i te terono o Iehova, aita râ e faaiteraa e ua ite anei oia i te taatoaraa o te mau melahi i poietehia. (Daniela 7:10) Te vai ra paha ïa e rave rahi hanere mirioni melahi. No reira te Atua i parauhia ’i o Iehova sabaota aore ra o te mau nuu. Te faataa ra teie i‘oa toroa i to ’na tiaraa mana ei Tomana o te hoê nuu melahi puai rahi roa e te faanahohia. I nia ’‘e i teie mau varua ora atoa, ua tuu oia hoê ei tavana, o ta ’na iho Tamaiti here, “[te matahiapo o] te mau mea atoa i hamanihia.” (Kolosa 1:15; MN) Ei melahi rahi—te upoo o te mau melahi, te mau seraphi, e o te mau kerubi atoa,—o Iesu te mea puai roa ’‘e o te mau mea atoa i poietehia e Iehova.

11, 12. (a) Mea nafea te puai o te parau a te Atua e ohipa ’i? (b) Mea nafea to Iesu haapapuraa i te rahi o te mana o Iehova?

11 Te vai ra râ ta Iehova te tahi atu ravea e faaohipa ’i i te mana. Te na ô ra te Hebera 4:12 e: “E mea ora hoi te parau a te Atua, e te puai rahi.” Ua taa anei ia outou te puai rahi o te parau a te Atua, aore ra poroi faauruahia i te varua, tei tapaohia i teie nei i roto i te Bibilia. E nehenehe ta te reira e haapuai ia tatou, e patu i to tatou faaroo, e e tauturu mai ia rave i te mau  tauiraa rarahi i roto ia tatou iho. Ua faaara te aposetolo Paulo i te mau hoa faaroo no nia i te taata e pee ra i te huru oraraa morare ore roa ino. Ua parau atura oia e: “Mai te reira hoi te hoê pae o outou na.” (Korinetia 1, 6:9-11) Oia, ua ohipa te puai o “te parau a te Atua” i roto ia ratou e ua tauturu atu ia taui.

12 No te rahi o to Iehova mana e te maitai o ta ’na mau ravea no te faaohipa ’tu e ore ai oia e tapeahia e te hoê noa ’‘e mea. Ua parau Iesu e: “E tia râ te mau mea atoa nei i te Atua.” (Mataio 19:26) No teihea mau opuaraa e faaohipa ’i Iehova i to ’na mana?

Te mana e faaohipahia ia au i te opuaraa

13, 14. (a) No te aha tatou e nehenehe ai e parau e e ere Iehova i te hoê tumu o te mana ihotaata ore? (b) E nafea Iehova ia faaohipa i to ’na mana?

13 E hau ê te varua o Iehova i te rahi i te puai pae ihi materia atoa; e e ere o Iehova i te hoê puai ihotaata ore, te hoê noa tumu o te mana. E ihotaata teie Atua e e vî maite ia ’na to ’na iho mana. Na te aha râ e turai ia ’na ia faaohipa ’tu?

14 Mai ta tatou e ite mai, e faaohipa te Atua i te mana no te poiete, te haamou, te paruru, te tataî—ei haapotoraa, no te rave i te mau mea atoa e au i ta ’na mau opuaraa tia roa. (Isaia 46:10) I te tahi taime, e faaohipa Iehova i to ’na mana no te heheu i te tahi mau tuhaa faufaa o to ’na huru e o ta ’na mau ture aveia. Hau atu i te mau mea atoa, e faaohipa oia i to ’na mana no te faatupu i to ’na hinaaro—te faatia i to ’na mana arii e te faaraa i to ’na i‘oa mo‘a na roto i te Basileia o te Mesia. Aita roa ’tu e mea o te nehenehe e tapea i taua opuaraa ra.

15. E faaohipa Iehova i to ’na mana no teihea opuaraa i taaihia i ta ’na mau tavini, e mea nafea te reira i te faaiteraahia i roto i te tupuraa o Elia?

15 E faaohipa atoa Iehova i to ’na mana no te haamaitai ia tatou ei taata taitahi. A tapao na eaha ta te Paraleipomeno 2, 16:9 e parau ra: “Te hi‘o nei te mata o Iehova i to te ao atoa nei, ia horoa mai oia i te etaeta i te feia i tia te aau ia ’na.” O te tupuraa  o Elia, tei faahitihia i te omuaraa, te hoê hi‘oraa. No te aha Iehova i rave ai i taua faaiteraa hahano ra o to ’na mana i mua ia ’na? Inaha, ua euhe te arii vahine ino ra o Iezebela e haapohe ia Elia. Ua horo ê te peropheta, ia ora oia. Ua ite oia i te moemoe, ua mǎta‘u oia e ua tarapape to ’na aau—mai te huru ra e ua faufaa ore te ohipa atoa ta ’na i rave puai. No te tamahanahana i te taata e peapea ra, ua haamana‘o Iehova ma te oraora mau ia Elia i to ’na mana. Ua faaite te mata‘i, te aueueraa fenua, e te auahi e tei ia Elia ra te Ora mana roa ’‘e o te ao taatoa. Eaha ta ’na ia mǎta‘u ia Iezebela, to pihai iho hoi te Atua mana hope ia ’na?—Mau arii 1, 19:1-12. *

16. No te aha tatou e nehenehe ai e tamahanahanahia ia feruriruri tatou i te mana rahi o Iehova?

16 Noa ’tu e e ere teie to ’na taime no te faatupu i te mau semeio, aita Iehova i taui mai te tau mai â o Elia. (Korinetia 1, 13:8) Hoê â noâ to ’na anaanatae i teie tau e faaohipa i to ’na mana no te feia e here ra ia ’na. Parau mau, te parahi ra oia i roto i te hoê ao varua teitei roa, aita râ oia i atea ê roa ia tatou. Mea otia ore to ’na mana, e ere ïa te atearaa i te hoê fifi. Area râ, “te fatata maira Iehova i te feia atoa i tiaoro atu ia ’na.” (Salamo 145:18) I te hoê taime, i to te peropheta Daniela piiraa i te tauturu ia Iehova, ua fa mai te hoê melahi aitâ ïa ta ’na pure i oti atura! (Daniela 9:20-23) Aita e mea e nehenehe e tapea ia Iehova ia tauturu e ia haapuai i te feia ta ’na e here ra.—Salamo 118:6.

Eita anei te Atua e nehenehe e haafatatahia ’tu no to ’na mana?

17. Na roto i teihea auraa e faatupu ai te mana o Iehova i te mǎta‘u i roto ia tatou, eaha râ te huru mǎta‘u ta te reira e ore e faatupu?

17 E tia anei ia mǎta‘u tatou i te Atua no to ’na mana? E tia ia  tatou ia pahono oia e eita. Oia no te mea ua riro teie ateriputi ei tumu e mǎta‘u ai tatou ia ’na, te mǎta‘u hohonu e te faatura ta tatou i tauaparau poto i roto i te pene na mua ’tu. Te parau maira te Bibilia e o “te matamua o te paari” taua mǎta‘u ra. (Salamo 111:10) E pahono atoa râ tatou e eita no te mea aita e tumu e pohe ai tatou i te mehameha ia ’na no to ’na mana aore ra e ore ai e haafatata ’tu ia ’na.

18. (a) No te aha te taata e rave rahi e ore ai e tiaturi i te feia mana? (b) Mea nafea tatou e ite ai e eita Iehova e inohia i to ’na mana?

18 “E nehenehe te taata e inohia i te mana e e ino-mau-hia te taata i te mana otia ore.” O ta te taata fanauraa teitei Beretane o Lord Acton ïa i papai i te matahiti 1887 ra. Ua faahiti-pinepine-hia ta ’na parau, peneia‘e no te mea mea rahi roa te taata o te ite ra e e parau mau roa iho â te reira. E pinepine te taata tia ore i te faaohipa hua i te mana, mai ta te tuatapaparaa i haapapu ehia rahiraa taime. (Koheleta 4:1; 8:9) No reira te taata e rave rahi e ore ai e tiaturi i te feia mana e e fariu ê ai ia ratou. Ei teie nei, e mana otia ore to Iehova. Ua ino-rii-noa-hia anei oia? Aita roa ’tu! Mai ta tatou i ite mai, mea mo‘a oia, e te noaa ore ia haapi‘o. E ere Iehova mai te mau tane e te mau vahine mana tia ore i roto i teie nei ao pi‘o. Aita oia i faaohipa hua a‘enei i to ’na mana, e eita roa ’tu oia e na reira.

19, 20. (a) Ia au i teihea ’tu â mau huru maitatai e faaohipa noa ’i Iehova i to ’na mana, e no te aha te reira e riro ai ei mea tamahanahana? (b) E nafea outou e nehenehe ai e faahoho‘a i to Iehova haavîraa ia ’na iho, e no te aha outou e anaanatae ai i te reira?

19 A haamana‘o na, e ere o te mana ana‘e to Iehova ateriputi. Te toe râ ia tatou i te haapii i to ’na parau-tia, to ’na paari, e to ’na aroha. Eiaha râ tatou ia mana‘o e e faaite Iehova i to ’na mau ateriputi ma te etaeta e mai te matini ra te huru, mai te mea ra e e faaohipa noa oia hoê huru i te hoê haereraa. Area râ, e ite mai tatou i roto i te mau pene i muri nei e e faaohipa noa Iehova i to ’na mana ia au i to ’na parau-tia, to ’na paari, e to ’na aroha. A feruri na i te tahi atu huru maitai o te Atua, te hoê mea varavara i te itehia i roto i te feia faatere o teie nei ao—te haavîraa ia ’na iho.

 20 A feruri na e te farerei ra outou i te hoê taata rahi roa e te mana roa a horuhoru roa ’i outou ia ’na. Teie râ, ia maoro rii, e ite mai outou e e au ra e mea mǎrû oia. E ineine noa oia e te tae noa te aau i te faaohipa i to ’na mana no te tauturu e te paruru i te taata, i te feia paruru ore iho â râ e te ohie ia hamani-ino-hia. Eita roa ’tu oia e faaohipa hua i to ’na puai. E ite outou ia faainohia oia ma te tumu ore, teie râ, mea aueue ore to ’na haerea e te hitahita ore râ, mea tura, mea maitai atoa. E uiui outou ia outou iho e e nehenehe anei ta outou e faaite i taua atoa ra mǎrû e taua hitahita ore ra, mai te peu iho â râ e mai tera atoa outou i te puai! A matau ai ia outou taua taata ra, eita anei outou e haamata i te anaanatae atu ia ’na? Te vai ra ’tu â te tumu e haafatata ’tu ai tatou i te mana hope ra o Iehova. A feruri na i te pereota taatoa tei ravehia ei niu o te upoo parau o teie pene: “E ore Iehova e ru i te riri, te rahi ra râ to ’na mana.” (Nahuma 1:3) Eita Iehova e faaohipa vave i to ’na mana i nia i te taata, tae noa ’tu i te feia iino. Mea mǎrû oia e te maitai. Ua faaite oia e “e ore” oia “e ru i te riri” i mua i te mau faaoooraa e rave rahi.—Salamo 78:37-41.

21. No te aha Iehova e ore ai e faahepo i te taata ia rave i to ’na hinaaro, e eaha ta te reira e haapii mai no nia ia ’na?

21 A feruri na i to Iehova haavîraa ia ’na iho i te hoê paeau ê  atu. Ahiri e e mana otia ore to outou, eita anei outou, i te tahi taime, e hinaaro e faarave i te taata i te mau mea ia au i to outou mana‘o? Noa ’tu to ’na mana, eita Iehova e faahepo i te taata e tavini ia ’na. Noa ’tu e mea na roto noa i te taviniraa i te Atua e roaa ’i te ora mure ore, eita Iehova e faahepo ia tatou ia na reira. Area râ, ua faatura oia i te taata taitahi ma te horoa ’tu ma te maitai i te tiamâraa e maiti. E faaara oia no nia i te mau faahopearaa o te mau maitiraa paari ore e e faaite mai i te mau haamaitairaa o te mau maitiraa maitatai. E vaiiho râ oia e na tatou iho e maiti. (Deuteronomi 30:19, 20) Eita roa ’tu Iehova e anaanatae i te taviniraa e ravehia ma te faahepohia aore ra ma te pohe i te mehameha i to ’na mana hahano. E imi oia i te feia o te tavini ia ’na ma te aau tae, no to ratou here ia ’na.—Korinetia 2, 9:7.

22, 23. (a) Eaha te mea e faaite ra e mea au na Iehova e horoa i te mana no vetahi ê? (b) Eaha ta tatou e hi‘opoa i roto i te pene i muri nei?

22 E hi‘o ana‘e i te hoê tumu hopea e faufaa ore ai ia ora tatou ma te mehameha i te Atua Mana hope. E huru taiâ te feia mana ia roaa atoa te mana ia vetahi ê. O Iehova râ, mea au ïa na ’na e horoa i te mana no to ’na feia haamori taiva ore. E vaiiho oia i te mana rahi no vetahi ê, mai ta ’na Tamaiti. (Mataio 28:18) E horoa atoa Iehova i te mana no ta ’na mau tavini na roto i te tahi atu ravea. Te faataa ra te Bibilia e: “Tei ia oe, e Iehova, te rahi, e te mana, e te hanahana, e te pau, e te tura, to nia i te ra‘i ra, e to nia i te fenua, na oe ana‘e ïa. . . . Tei to rima te puai e te etaeta; e na oe e faarahi mai, e te horoa mai i te etaeta i te taata atoa nei.”—Paraleipomeno 1, 29:11, 12.

23 Oia, e oaoa Iehova i te horoa i te puai no outou. E horoa atoa oia i “te puai i hau a‘e i tei matauhia” no te feia e hinaaro e tavini ia ’na. (Korinetia 2, 4:7, MN) Te anaanatae ra anei outou i teie Atua î i te ito, o te faaohipa i to ’na mana mai teie i te maitai e ia au i te mau ture morare maitatai roa? I roto i te pene i muri nei, e hi‘o maitai mai tatou e nafea Iehova e faaohipa ’i i to ’na mana poiete.

^ par. 6 Teie te auraa mau o te ta‘o Heleni i hurihia ei “Mana hope,” “Arii i nia i te mau mea atoa; Tei ia ’na ana‘e ra te mana atoa.”

^ par. 15 Te parau ra te Bibilia e “aita . . . Iehova i roto i taua mata‘i ra . . . , taua aueueraa fenua ra . . . , taua auahi ra.” Eiaha mai te feia haamori i te mau atua o te natura no roto i te mau aai, eita te mau tavini a Iehova e imi ia ’na i roto i te mau puai o te natura. E hau ê roa oia i te rahi, eita ïa e ô i roto i te hoê mea ta ’na i poiete.—Mau arii 1, 8:27.