Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 9

‘Te Mesia, te mana o te Atua’

‘Te Mesia, te mana o te Atua’

1-3. (a) Eaha te tupuraa riaria ta te mau pǐpǐ i farerei i nia i te roto i Galilea, e eaha ta Iesu i rave? (b) No te aha i tano ai to Iesu parauraahia ‘te Mesia, te mana o te Atua’?

TE POHE ra te mau pǐpǐ i te riaria. Te tere ra ratou na nia i te roto i Galilea a roo-taue-hia ’i ratou e te hoê vero. Aita e feaaraa e ua ite a‘ena ratou i te mau vero i nia i teie roto na mua ’‘e—inaha hoi, e mau ravaai aravihi te tahi o teie mau taata. * (Mataio 4:18, 19) E “maa mata‘i rahi” râ teie tei faaarepurepu roa i te roto. Ua haa puai roa ino te mau taata i te faatere i te pahi, mea puai a‘e râ te vero. Te “fati maira te are i nia i te pahi” tei haamata i te î i te pape. Noa ’tu te maniania, te taoto maitai ra Iesu i te reimuri, ua rohirohi roa i muri a‘e hoê mahana haapiiraa i te mau nahoa taata. Ma te mǎta‘u no to ratou ora, ua faaara te mau pǐpǐ ia ’na, a taparuparu atu ai e: “E te Fatu, faaora ia tatou, ua pohe tatou!”—Mareko 4:35-38; Mataio 8:23-25.

2 Aita Iesu e riaria ra. Ma te tiaturi roa ino, ua avau oia i te mata‘i e te roto e: “A faaea, a mania.” I ǒ noa, auraro a‘era te mata‘i e te roto—faaea ’tura te vero, topa ihora te are, e “mania roa ’tura.” Î roa a‘era te mau pǐpǐ i te mǎta‘u. “O vai hoi teie?” o ta ratou ïa i muhumuhu te tahi i te tahi. Oia mau, o vai hoi te taata o te nehenehe e avau i te mata‘i e te roto mai te huru ra e te a‘o ra oia i te hoê tamarii hauti.—Mareko 4:39-41; Mataio 8:26, 27.

3 E ere râ Iesu i te hoê taata au noa. Ua faaohipahia te mana  o Iehova no ’na e na roto ia ’na ia au i te mau ravea taa ê mau. Ua tano mau te aposetolo Paulo tei faauruahia i te faahitiraa ia ’na mai ‘te Mesia, te mana o te Atua.’ (Korinetia 1, 1:24) E nafea te mana o te Atua e faaitehia ’i na roto ia Iesu? E e nafea to Iesu faaohiparaa i te mana e ohipa ’i i nia i to tatou oraraa?

Te mana o te Tamaiti fanau tahi a te Atua

4, 5. (a) Ua horoa Iehova i teihea puai e teihea mana no ta ’na Tamaiti fanau tahi? (b) Eaha te mauhaa a teie Tamaiti no te faatupu i te mau opuaraa i te pae poieteraa a to ’na Metua?

4 A feruri na i te mana o Iesu i to ’na oraraa hou a riro ai ei taata. Ua faaohipa Iehova i to ’na iho “mana hope” i to ’na poieteraa i ta ’na Tamaiti fanau tahi tei parauhia o Iesu Mesia. (Roma 1:20; Kolosa 1:15) I muri iho, ua horoa Iehova i te puai e te mana rahi roa no ta ’na Tamaiti, a faaue atu ai e faatupu i ta ’Na mau opuaraa i te pae poieteraa. No nia i te Tamaiti, te na ô ra te Bibilia e: “Na ’na i hamani i te mau mea atoa nei, aore [oia ra, aore ïa e] mea i hamanihia.”—Ioane 1:3MN.

5 E nehenehe e taa rii noa ia tatou te rahi o taua ohipa faauehia ra. A feruri na i te puai i hinaarohia no te hamani i te mau mirioni melahi î i te ito, i te ao materia e to ’na mau miria haapueraa fetia, e te fenua e to ’na rahiraa mea ora huru rau. No te rave i taua mau ohipa ra, te vai ra i te Tamaiti fanau tahi ra te puai rahi roa ’‘e o te ao taatoa—te varua mo‘a o te Atua. Ua oaoa rahi teie Tamaiti i te riroraa ei Rave ohipa aravihi ta Iehova i faaohipa no te poiete i te mau mea ê atoa.—Maseli 8:22-31.

6. I muri a‘e i to ’na poheraa i te fenua nei e to ’na tia-faahou-raa, eaha te puai e te mana i horoahia no Iesu?

6 E nehenehe anei ta te Tamaiti fanau tahi e fana‘o hau atu â i te puai e te mana? I muri a‘e i to Iesu poheraa i te fenua nei e to ’na tia-faahou-raa, ua parau oia e: “O te mana atoa i te ra‘i e te ao atoa nei ua pûpûhia mai tei ia ’u ana‘e.” (Mataio 28:18) Oia, ua horoahia te ravea e te tiaraa no Iesu e faaohipa i te mana na te ao taatoa. Ei ‘Arii o te mau arii, e ei Fatu o te mau fatu,’ ua faatiahia oia e rave e ‘ia hope roa i te faaorehia e ana te mau hau, e te mana, e te puai’—te itea e te ore e itea—e patoi  ra i to ’na Metua. (Apokalupo 19:16; Korinetia 1, 15:24-26) ‘Aita e mea i toe i te tuuhia e te Atua i raro a‘e ia’ Iesu—taa ê atu iho â ïa o Iehova iho.—Hebera 2:8; Korinetia 1, 15:27.

7. No te aha e papu ai ia tatou e eita roa ’tu Iesu e faaohipa hua i te mana ta Iehova i tuu atu i roto i to ’na rima?

7 E tia anei ia tatou ia haapeapea e e faaohipa hua Iesu i to ’na mana? Eita roa ’tu! Mea here mau na Iesu to ’na Metua e eita roa ’tu oia e rave i te hoê noa ’‘e mea o te faariri ia ’na. (Ioane 8:29; 14:31) Ua ite maitai Iesu e eita roa ’tu Iehova e faaohipa hua i to ’na puai hope. E parahiraa maitai roa to Iesu no te ite e e imi iho â Iehova i te ravea e ‘horoa mai ai i te etaeta i te feia i tia te aau ia ’na.’ (Paraleipomeno 2, 16:9) Oia mau, hoê â to Iesu aroha i te huitaata e to to ’na Metua, e nehenehe ïa tatou e tiaturi e e faaohipa noa iho â oia i to ’na mana no te mea maitai. (Ioane 13:1) Ua haapapu maite Iesu i to ’na roo hapa ore i te reira paeau. E hi‘o ana‘e i te mana ta ’na i fana‘o a tia mai ai oia i te fenua nei e mea nafea to ’na turairaahia ia faaohipa ’tu.

‘Mana i te parau’

8. I muri a‘e i to ’na faatavairaahia, ua horoahia te mana no Iesu ia rave i te aha, e ua nafea oia i te faaohiparaa i to ’na mana?

8 Papu maitai, aita Iesu i faatupu i te semeio a vai tamarii noa ’i e a paari mai ai oia i Nazareta. Ua taui râ te reira i muri a‘e i to ’na bapetizoraahia i te matahiti 29 T.T., i te 30raa o to ’na matahiti. (Luka 3:21-23) Te faaite maira te Bibilia e: ‘Ua faatahinu te Atua ia ’na i te [varua mo‘a] e te mana ra; e ua hamani maitai haere oia, e ua faaora i te feia atoa i neineihia e te Diabolo ra.’ (Ohipa 10:38; MN) “Hamani maitai”—aita anei te reira e faaite ra e ua faaohipa Iesu i to ’na mana ma te tano? I muri a‘e i to ’na faatavairaahia, ua riro mai oia ei ‘peropheta mana i te ravea, e te parau.’—Luka 24:19.

9-11. (a) Ihea to Iesu vauvauraa i te rahiraa o ta ’na haapiiraa, e eaha te tautooraa ta ’na i farerei? (b) No te aha te mau nahoa i maere roa ’i i te huru haapiiraa a Iesu?

9 Ua nafea Iesu i te manaraa i te parau? Ua haapii pinepine  oia i rapaeau—i te pae roto e te pae mou‘a, i nia atoa i te purumu e i te mau aroâ hooraa maa. (Mareko 6:53-56; Luka 5:1-3; 13:26) I nehenehe noa na ta te feia e faaroo ra ia ’na e haere ê atu ia ore ratou e anaanatae atu i ta ’na mau parau. I te tau hou te neneiraa buka, mea titauhia ia haapao te feia faaroo e au ra, i te mau parau i roto i to ratou feruriraa e to ratou mafatu. I tia na ïa i te haapiiraa a Iesu ia riro ei mea maerehia, ia taa-maitai-hia, e ia mau ohie. E ere râ teie tautooraa i te mea fifi na Iesu. A rave na i ta ’na A‘oraa i nia i te mou‘a.

10 I te hoê poipoi i te omuaraa o te matahiti 31 T.T., ua haaputuputu te hoê nahoa taata i nia i te pae mou‘a i pihai i te roto i Galilea. No Iudea e no Ierusalema mai te tahi pae i te haereraa mai i te atearaa 100 e tae atu i te 110 kilometera. No te tuhaa fenua i te pae miti o Turia e Sidona i te pae apatoerau mai te tahi atu. Mea rahi te taata ma‘i tei haafatata ’tu ia Iesu no te tapea ia ’na, e ua faaora oia ia ratou paatoa. Aita faahou ana‘e e taata e ma‘i ino to ’na, i reira oia e haamata ’i i te haapii. (Luka 6:17-19) Ia oti ta ’na paraparauraa ia maoro rii a‘e, e maere roa ratou i ta ratou i faaroo. No te aha?

11 E rave rahi matahiti i muri a‘e, ua papai te hoê taata tei faaroo i taua a‘oraa ra e: “Ua maere ana‘e ihora te taata atoa i te huru o ta ’na parau: i haapii hoi oia ia ratou ma te mana.” (Mataio 7:28, 29) Ua paraparau Iesu ma te hoê mana ta ratou i ite roa ’tu. Ua paraparau oia ei tia no te Atua e ua paturu i ta ’na haapiiraa i te mana o te Parau a te Atua. (Ioane 7:16) Mea maramarama te mau parau a Iesu, e haapapu ta ’na mau a‘oraa i te mana‘o, e mea aueue ore ta ’na mau haaferuriraa. E haere tia ta ’na mau parau i nia i te vahi faufaa roa ’‘e o te mau tumu parau e oia atoa i roto i te aau o te feia e faaroo ra ia ’na. Ua haapii oia ia ratou e nafea e itea mai ai te oaoa, e nafea ia pure, ia imi i te Basileia o te Atua, e ia patu no te hoê a muri a‘e panoonoo ore. (Mataio 5:3–7:27) Ua haaputa ta ’na mau parau i te aau o te feia e hiaai ra i te parau mau e te parau-tia. Ua ineine taua mau taata ra i te “faarue” ia ratou iho e te mau  mea atoa no te pee ia ’na. (Mataio 16:24; Luka 5:10, 11) Tera mau te haapapuraa i te mana o ta Iesu mau parau!

‘Mana i te ravea’

12, 13. Mea na roto i teihea auraa i ‘mana ’i Iesu i te ravea,’ e mai te aha te rau o ta ’na mau semeio?

12 Mea “mana” atoa o Iesu “i te ravea.” (Luka 24:19) Te faataa ra te mau Evanelia hau atu i te 30 semeio taa maitai ta ’na i faatupu—mea na roto ana‘e hoi i te ‘mana o Iehova.’ * (Luka 5:17) Ua ohipa te mau semeio a Iesu i nia i te oraraa o te mau tausani taata. Ua taaihia e piti noa semeio—te faatamaaraa i na tane e 5 000 e i muri a‘e i na tane e 4 000, “te vai ra hoi te vahine e te tamarii”—i te mau nahoa fatata paha e 20 000 rahiraa taata!—Mataio 14:13-21; 15:32-38.

“Ite maira ratou ia Iesu i te haere-noa-raa ’tu na nia i te are”

13 E rau roa te huru o te mau semeio a Iesu. E mana to ’na i nia i te mau demoni, a tiavaru atu ai ma te ohie. (Luka 9:37-43) E mana to ’na i nia i te mau mea materia, a faariro ai i te pape ei uaina. (Ioane 2:1-11) Ua maere roa ta ’na mau pǐpǐ i to ’na haereraa na nia i te roto i Galilea e arepurepu ra i te mata‘i. (Ioane 6:18, 19) E mana to ’na i nia i te ma‘i, a faaora ’i i te mau hape o te mau melo, te mau ma‘i tupu tamau, e te mau ma‘i pohe. (Mareko 3:1-5; Ioane 4:46-54) Ua faatupu oia i taua mau faaoraraa ra na roto i te mau ravea rau. Ua faaorahia te tahi mau taata na te atea mai, area te tahi ra, ua tapea-roa-hia ’tu ïa e Iesu. (Mataio 8:2, 3, 5-13) Ua faaora-taue-hia te tahi pae, e te tahi ra, ua faaora-mǎrû-hia ïa.—Mareko 8:22-25; Luka 8:43, 44.

14. I roto i teihea mau tupuraa i faaite ai Iesu e e mana to ’na no te faaore i te pohe?

14 Ma te faahiahia, e mana to Iesu no te faaore i te pohe. E toru taime te faataaraahia e ua faatia oia i tei pohe, a faaho‘i  ai i te hoê tamahine 12 matahiti i to ’na mau metua ra, te hoê tamarii otahi i to ’na metua vahine ivi ra, e te hoê tuaane here i to ’na mau tuahine ra. (Luka 7:11-15; 8:49-56; Ioane 11:38-44) Aita e tupuraa i riro ei mea fifi roa na ’na. Ua faatia mai oia i te tamahine 12 matahiti i nia i to ’na ro‘i taata pohe i muri rii noa ’‘e i to ’na poheraa. Ua faatia mai oia i te tamaiti a te vahine ivi i nia i te iri hopoi taata pohe, ma te feaa ore i te mahana mau i pohe ai oia. E ua faatia mai oia ia Lazaro mai roto mai i te apoo e maha mahana i muri a‘e i to ’na poheraa.

Faaohiparaa i te mana ma te miimii ore, te huru taata paari, e te haapao ia vetahi ê

15, 16. Eaha te haapapuraa e mea miimii ore Iesu ia faaohipa oia i to ’na mana?

15 E nehenehe anei ta outou e feruri mai te aha te tano ore ia faaohipahia te mana o Iesu ahiri i tuuhia ’tu i te rima o te hoê arii tia ore? Mea hara ore râ o Iesu. (Petero 1, 2:22) Ua patoi oia eiaha oia ia viivii i te miimii, te hinaaro i te tiaraa, e te nounou o te turai i te taata tia ore ia faaohipa i to ratou mana no te haamauiui ia vetahi ê.

16 E faaohipa Iesu i to ’na mana ma te miimii ore, aita oia i rave a‘enei i te reira no to ’na iho maitai. I te poiaraa oia, ua patoi oia i te faariro i te ofai ei maa na ’na iho. (Mataio 4:1-4) E haapapuraa ta ’na maa faufaa rii e aita oia i faaohipa i to ’na mana e ia noaa ta ’na tao‘a materia. (Mataio 8:20) Te vai ra ’tu â te haapapuraa e na te mau tumu miimii ore i turai ia ’na ia rave i ta ’na mau ohipa mana. Ia faatupu oia i ta ’na mau semeio, e pau rii oia. Ia faaora oia i te taata ma‘i, e haere te tahi puai i rapaeau ia ’na. E ite maite oia i teie pauraa o te puai, tae noa ’tu i roto i te hoê noa faaoraraa. (Mareko 5:25-34) Teie râ, ua vaiiho oia i te mau nahoa taata ia tapea ia ’na, e ua ora ratou. (Luka 6:19) Auê ïa aau miimii ore e!

17. Mea nafea to Iesu faaiteraa e e faaohipa oia i to ’na mana ma te huru taata paari?

17 E faaohipa Iesu i to ’na mana ma te huru taata paari. Aita  oia i rave a‘enei i te mau ohipa mana no te faaahaaha noa aore ra no te faaiteite hua faufaa ore noa. (Mataio 4:5-7) Aita oia i hinaaro e rave i te mau tapao no te haamâha noa i te anoenoe tia ore o Heroda. (Luka 23:8, 9) Aita roa ’tu Iesu i faatianiani i to ’na mana, ua faaue pinepine râ oia i te feia ta ’na i faaora eiaha e faaite i te taata. (Mareko 5:43; 7:36) Aita oia i hinaaro ia huti te taata i te mau faaotiraa no nia ia ’na na nia i te mau faatiaraa faahoruhoru.—Mataio 12:15-19.

18-20. (a) Na te aha i faataa i te huru i faaohipa ’i Iesu i to ’na mana? (b) Eaha to outou mana‘o i te huru i faaora ’i Iesu i te hoê taata tari‘a turi?

18 E ere roa ’tu teie taata puai, o Iesu, mai te feia faatere tei faaohipa i te mana ma te vahavaha ino mau i to vetahi ê mau hinaaro e mau mauiui. Ua tapitapi Iesu i te taata. E putapû roa oia i te ite-noa-raa ’tu i tei hepohepo e e turai-roa-hia oia ia faaore i to ratou mauiui. (Mataio 14:14) Mea haapao na ’na to ratou huru aau e to ratou mau hinaaro, e na teie haapeapearaa î i te here i faataa e nafea oia ia faaohipa i to ’na mana. E itehia te hoê hi‘oraa o te haaputapû i roto i te Mareko 7:31-37.

19 I taua taime ra, ua ite mai te mau nahoa ia Iesu e ua hopoi atu i te feia ma‘i e rave rahi, e ua faaora oia ia ratou paatoa. (Mataio 15:29, 30) Ua faataa ê râ Iesu i te hoê taata e ua haapao taa ê atu ia ’na. E tari‘a turi to te taata ra e e fifi to ’na no te paraparau. Ua taa paha ia Iesu te taiâ e te haamâ taa ê o teie taata. Ma te haapao maitai atu, ua hopoi Iesu i te taata ra i te hiti—ia atea ’tu te nahoa—i te hoê vahi moemoe. I reira to Iesu tohutohuraa no te faataa ’tu i te taata ra eaha ta ’na e rave. Ua “tuu atura” Iesu “i tana rima i roto i to ’na tari‘a, ua tufa ihora oia i te huare, e ua faatiaia ’tura i to ’na arero.” * (Mareko 7:33) I muri iho, ua hi‘o Iesu i nia i te ra‘i e ua uuru a‘era a pure  ai. E faaite ïa teie mau mea i te taata e, ‘Te mea ta ’u e rave ra no oe, mea na roto ïa i te mana no ǒ mai i te Atua ra.’ I te pae hopea, ua parau Iesu e: “Ia amaha.” (Mareko 7:34) I reira, faaroo atura te taata ra, e ua nehenehe atura e paraparau maitai.

20 Mea putapû mau ia mana‘o e ia faaohipa oia i to ’na mana no ǒ mai i te Atua ra no te faaora i tei roohia i te ati, ua faaite Iesu e ua haapao oia ma te aumauiui i to ratou huru aau! E ere anei i te mea mahanahana ia ite e ua tuu Iehova i te Basileia o te Mesia i roto i te rima o te hoê Arii aumauiui e te haapao ia vetahi ê mai teie?

Te hoê faaite-atea-raa i te mau mea e fatata maira

21, 22. (a) Eaha ta te mau semeio a Iesu i faaite atea? (b) I te mea e e vî te mau puai o te natura ia Iesu, eaha ta tatou e nehenehe e tiaturi ia faatere mai to ’na Basileia?

21 Ua riro te mau ohipa mana ta Iesu i rave i te fenua nei ei faaite-atea-raa noa i te mau haamaitairaa rahi atu â e fatata maira a ta ’na faatereraa arii. I roto i te ao apî a te Atua, e rave â Iesu i te mau semeio—na te ao atoa nei râ! A hi‘o na i te tahi mau mea faahiahia e tupu a muri a‘e.

22 E faaapî Iesu i te ihi heiora o te fenua e ia maitai roa ino. A haamana‘o na e ua faaite oia na roto i te faatoparaa i te hoê vero e e vî te mau puai o te natura ia ’na. Papu ïa e i raro a‘e i te faatereraa a te Basileia o te Mesia, aita e tumu e mǎta‘u ai te taata e e ino ratou i te puahiohio, te aueueraa fenua, te tutuharaa mai te mou‘a i te auahi, aore ra te tahi atu mau ati natura. I te mea e o Iesu te Rave ohipa aravihi ta Iehova i faaohipa no te poiete i te fenua e te ora atoa i nia iho, ua taa maitai ia ’na te huru o te fenua. Ua ite oia e nafea ia faaohipa i to ’na mau maitai ma te tano. I raro a‘e i ta ’na faatereraa, e riro teie fenua taatoa ei Paradaiso.—Luka 23:43.

23. Ei Arii, e nafea Iesu ia haamâha i te mau hinaaro o te huitaata?

23 E te mau hinaaro o te huitaata? Te haapapu maira te ravea a Iesu e faatamaa maitai i te mau tausani taata ma te faaohipa noa i te tahi maa maa rii, e e faaore ta ’na faatereraa i te  pohe poia. Oia mau, maoti te puea maa o te opere-maite-hia e ore roa ’i te pohe poia e a muri noa ’tu. (Salamo 72:16) Te faaite maira to ’na mana i nia i te ma‘i e e faaora-roa-hia e a muri noa ’tu te feia ma‘i, te matapo, te tari‘a turi, tei ere i te hoê melo, e te pirioi. (Isaia 33:24; 35:5, 6) Te haapapu ra ta ’na ravea e faatia mai i tei pohe e te vai atoa ra to ’na mana ei Arii i te ra‘i no te faatia mai i te mau mirioni e mau mirioni taata ta to ’na Metua e anaanatae mau i te haamana‘o.—Ioane 5:28, 29.

24. A feruri ai tatou i te mana o Iesu, eaha ta tatou e haamana‘o noa, e tia ’i, e no te aha?

24 A feruri ai tatou i te mana o Iesu, e haamana‘o ana‘e e e pee teie Tamaiti i to ’na Metua ma te tia roa. (Ioane 14:9) Te faataa maitai maira ïa te huru e faaohipa ’i Iesu i te mana i te huru e faaohipa ’i Iehova i te mana. Ei hi‘oraa, a feruri na i te huru î i te here i faaora ’i Iesu i te hoê taata lepera. Ma te aroha, ua faatiaia ’tu Iesu i te taata ra e ua na ô atura e: “Ua tia ïa ia ’u.” (Mareko 1:40-42) Na roto i te mau aamu mai teie, te na ô mai ra ïa Iehova e: ‘E na reira vau ia faaohipa i te mana!’ Aita anei outou e turaihia ra ia arue i to tatou Atua puai hope e ia haamauruuru ia ’na e e faaohipa oia i to ’na mana mai teie i te here?

^ par. 1 Mea matauhia e e tupu taue noa mai te mau vero i nia i te roto i Galilea. No te faito haehaa o te roto (fatata e 200 metera i raro mai i te faito o te miti), mea veavea a‘e te mata‘i i reira i te mau vahi e haaati ra, e e faatupu te reira i te mau arepurepuraa o te reva mata‘i. E mata‘i puai te pou mai mai nia i te mou‘a Heremona i te pae apatoerau atu e i raro i te peho o Ioridana. E nehenehe noa te hoê taime mania e riro oioi ei vero u‘ana.

^ par. 12 Hau atu â, i te tahi taime, e amui te mau Evanelia i te mau semeio rau i roto i te hoê noa faataaraa. Ei hi‘oraa, i te hoê taime, ua haere mai “to te oire atoa” e hi‘o ia ’na, e ua faaora oia i te taata ma‘i “e rave rahi.”—Mareko 1:32-34.

^ par. 19 Ua riro te tufaraa huare ei ravea aore ra ei tapao o te faaoraraa i fariihia e te ati Iuda e te Etene atoa, e to roto te faaohiparaa i te huare no te rapaauraa, i te mau papai a te mau rabi. Ua tufa paha Iesu no te faaite noa i te taata ra e fatata roa oia i te ora. Noa ’tu eaha te tupuraa, aita Iesu i faaohipa i to ’na huare ei raau natura.

No te ite atu â

Afea te Basileia o te Atua e tae mai ai?

No te aha e tiaturi ai e fatata te Arii faatavaihia a te Atua i te rave i te tahi atu â mau mea ia ravehia to te Atua hinaaro i te fenua?