Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 10

“Ei pee outou i te Atua” ia faaohipa outou i te mana

“Ei pee outou i te Atua” ia faaohipa outou i te mana

1. E topa haere noa te taata tia ore i roto i teihea marei huna?

“AITA roa ’tu e taata e mana to ’na aita e marei to mua ia ’na.” Te faaara maira taua mau parau ra a te hoê rohipehe no te senekele 19 no nia i te hoê fifi huna: te faaohipa-hua-raa i te mana. Ma te peapea, e topa haere noa te taata tia ore atoa i roto i taua marei ra. Oia mau, i te roaraa o te tuatapaparaa, ‘ua faatere te taata i te taata e ia ino atu.’ (Koheleta 8:9, MN) Ua haamauiui rahi roa te faaohiparaa i te mana ma te aroha ore, i te taata.

2, 3. (a) Eaha te vahi faahiahia ia faaohipa Iehova i te mana? (b) Eaha to tatou mana, e e nafea e tia ’i ia tatou ia faaohipa i taua mana ra?

2 E ere anei ïa i te mea faahiahia e eita roa ’tu te Atua ra o Iehova, e mana otia ore hoi to ’na, e faaohipa hua i taua mana ra? Mai ta tatou i tapao i roto i te mau pene na mua ’tu, e faaohipa noa iho â oia i to ’na mana—poiete anei, haamou anei, paruru anei, aore ra faaapî—ia au i ta ’na mau opuaraa î i te here. Ia hi‘o tatou i te huru e faaohipa ’i oia i to ’na mana, e hinaaro tatou e haafatata ’tu ia ’na. Na te reira ’tu ai e turai ia tatou ia ‘pee i te Atua’ ia faaohipa tatou i te mana. (Ephesia 5:1) Eaha râ te mana e vai ra ia tatou ra te taata haihai?

3 A haamana‘o na e ua poietehia te taata ‘ma te huru o te Atua’ e ia au i to ’na hoho‘a. (Genese 1:26, 27) No reira, e mana atoa to tatou—maa faito rii a‘e. To tatou mana, te ravea ïa no te rave i te tahi mau mea, no te ohipa; te neheneheraa e haavî aore ra e faatere ia vetahi ê; te aravihi i te ohipa i nia ia vetahi ê, te feia iho â râ e here ra ia tatou; te puai o te tino; aore ra te mau ravea pae materia. No nia ia Iehova, ua parau te papai salamo e: “Tei ia oe hoi te tumu o te ora.” (Salamo 36:9) No reira, ma te piri roa aore ra ma te atea, o te Atua te tumu o te mana atoa ta tatou e fana‘o ra. E hinaaro ïa tatou e  faaohipa i te reira ia au i te mau ravea e oaoa ’i oia. E nafea ïa?

O te aroha te ravea

4, 5. (a) Eaha te ravea e faaohipa ’i i te mana ma te tano, e e nafea te hi‘oraa iho o te Atua e haapapu ai i te reira? (b) E nafea te aroha ia tauturu mai ia faaohipa i to tatou mana ma te tano?

4 Te ravea e faaohipa ’i i te mana ma te tano, o te aroha ïa. Aita anei te hi‘oraa iho o te Atua e haapapu ra i te reira? A haamana‘o na i te tauaparauraa i na ateriputi rarahi e maha o te Atua—te mana, te parau-tia, te paari e te aroha—i roto i te pene 1. I roto i na huru maitatai e maha, teihea te mea rahi roa ’‘e? O te aroha. “E aroha hoi te Atua,” o ta te Ioane 1, 4:8 ïa e parau ra. Oia, o te aroha te huru iho o Iehova; e ohipa te reira i nia i te mau mea atoa ta ’na e rave. No reira, i te mau taime atoa e faaohipa ’i oia i to ’na mana, na te aroha oia e turai e no te maitai noa iho â o te feia e here ra ia ’na.

5 E tauturu atoa te aroha ia tatou ia faaohipa i to tatou mana ma te tano. Inaha hoi, te faaite maira te Bibilia e e “hamani maitai” te aroha e “eita e imi i te maitai no ’na iho.” (Korinetia 1, 13:4, 5) No reira, eita te aroha e faatia ia haa tatou ma te etaeta aore ra ma te ino i nia i te feia e mana rii to tatou i nia ia ratou. E haa râ tatou i nia ia vetahi ê ma te tura e e tuu tatou i to ratou mau hinaaro e mau huru aau na mua ’‘e i to tatou iho.—Philipi 2:3, 4.

6, 7. (a) Eaha te mǎta‘u i te Atua, e no te aha teie huru maitai e tauturu ai ia tatou eiaha ia faaohipa hua i te mana? (b) A horoa na i te hi‘oraa no nia i te taairaa i rotopu i te mǎta‘u i te faariri i te Atua e te here i te Atua.

6 Ua taaihia te aroha i te tahi atu huru maitai o te nehenehe e tauturu ia tatou eiaha ia faaohipa hua i te mana: oia, te mǎta‘u i te Atua. Eaha te faufaaraa o teie huru maitai? “Te faarue nei te taata i te ino i te mǎta‘u ia Iehova,” o ta te Maseli 16:6 ïa e parau ra. To roto mau te faaohipa-hua-raa i te mana i te mau mea iino e tia ia tatou ia faarue. E tapea te mǎta‘u i te Atua ia tatou eiaha ia hamani ino i te feia e mana to tatou i nia ia ratou. No te aha? Te hoê tumu, oia hoi, ua ite tatou e e tia tatou  no tatou iho i mua i te Atua no te huru e haa ’i tatou i nia ia ratou. (Nehemia 5:1-7, 15) E titau râ te mǎta‘u i te Atua hau atu i te reira. Ua taai-pinepine-hia te mau ta‘o o te reo tumu i hurihia ei “mǎta‘u” i te faatura rahi e te mǎta‘u faatura i te Atua. No reira te Bibilia e taai ai i te mǎta‘u i te here i te Atua. (Deuteronomi 10:12, 13) To roto te mǎta‘u maitai eiaha e faariri i te Atua i taua mǎta‘u faatura ra—e ere noa no te mea te mǎta‘u ra tatou i te mau faahopearaa, no te mea râ e te here mau ra tatou ia ’na.

7 Ei hi‘oraa: A feruri na i te taairaa maitai i rotopu i te hoê tamaiti iti e to ’na papa. Te taa ra i te tamaiti e te haapao ra to ’na papa ia ’na ma te mahanahana e te here. Ua ite atoa râ oia eaha ta to ’na papa e titau ra ia ’na, e ua ite oia e e a‘o to ’na papa ia ’na ia faaroo ore oia. Eita te tamaiti e ora i roto i te mehameha i to ’na papa. Area râ, mea here roa na ’na to ’na papa. Mea au na te tamarii ra e rave i te mea e farii maitai ai to ’na papa ia ’na. Mea na reira atoa e te mǎta‘u i te Atua. No te mea mea here na tatou o Iehova, to tatou Metua i te ra‘i, e mǎta‘u tatou i te rave i te hoê noa ’‘e mea e ‘ooo roa ’i to ’na aau.’ (Genese 6:6) E hinaaro roa râ tatou e faaoaoa i to ’na aau. (Maseli 27:11) No reira tatou e hinaaro ai e faaohipa i to tatou mana ma te tano. E hi‘opoa ana‘e e nafea tatou ia na reira.

I roto i te utuafare

8. (a) Eaha te mana o te mau tane i roto i te utuafare, e e nafea te reira ia faaohipahia e tia ’i? (b) E nafea te hoê tane e faaite ai e te faatura ra oia i ta ’na vahine?

8 A rave na na mua i te oraraa utuafare. “O te tane hoi to te vahine ra upoo,” o ta te Ephesia 5:23 ïa e parau ra. E nafea te hoê tane ia faaohipa i teie mana no ǒ mai i te Atua ra? Te parau ra te Bibilia i te mau tane e parahi e ta ratou vahine “ma te ite, i te faaturaraa ’tu . . . i te farii paruparu ra.” (Petero 1, 3:7) Te auraa o te ta‘o Heleni i hurihia ei ‘tura,’ e “maitai, faahiahia, . . . faufaa” ïa. Ua hurihia te tahi mau huru o teie ta‘o ei “ô” e ei “maitai rahi.” (Ohipa 28:10, MN; Petero 1, 2:7) Eita  roa ’tu te hoê tane o te faatura i ta ’na vahine e hamani ino ia ’na i te pae tino; eita atoa oia e faahaehaa ’tu aore ra e faaino atu, a mana‘o oia e aita to ’na e faufaa. Area râ, e farii oia i to ’na faahiahia e e haa oia i nia ia ’na ma te faatura. E faaite oia na roto i ta ’na mau parau e ta ’na mau ohipa—i te vahi moemoe e i te vahi taata—e mea faufaa oia na ’na. (Maseli 31:28) E noaa i taua huru tane ra eiaha noa te here e te faatura o ta ’na vahine, te mea faufaa ’tu â râ, te farii maitai a te Atua.

E faaohipa te mau tane e te mau vahine i to ratou mana ma te tano na roto i te haaraa te tahi i nia i te tahi ma te here e te faatura

9. (a) Eaha te mana o te mau vahine i roto i te utuafare? (b) Eaha te nehenehe e tauturu i te hoê vahine ia faaohipa i to ’na mau aravihi no te turu i ta ’na tane, e ma teihea mau faahopearaa?

9 E maa mana atoa to te mau vahine i roto i te utuafare. Te parau ra te Bibilia no nia i te tahi mau vahine paieti tei haa i nia i ta ratou tane ma te ore e na nia ’‘e i te upoo, ma te maitai aore ra no te tauturu atu eiaha ratou ia rave i te faaotiraa hape. (Genese 21:9-12; 27:46–28:2) Mea vitiviti a‘e paha te feruriraa o te hoê vahine i to ta ’na tane, aore ra te vai ra ’tu â to ’na mau aravihi aita to ta ’na tane. Teie râ, mea titauhia ia “faatura maite” oia i ta ’na tane e ia “auraro” atu, mai “i te Fatu ra.” (Ephesia 5:22, 33, MN) Ia haamana‘o te hoê vahine i te faaoaoa i te Atua, e nehenehe te reira e tauturu ia ’na ia faaohipa i to ’na mau aravihi no te turu i ta ’na tane eiaha râ no te faahaehaa ia ’na aore ra no te tamata i te na nia ’‘e ia ’na. E haa amui te hoê “vahine paari” mau e ta ’na tane no te patu i te utuafare. E na reira ïa oia e atuatu ai i te hau e te Atua.—Maseli 14:1.

10. (a) Eaha te mana ta te Atua i horoa no te mau metua? (b) Eaha te auraa o te ta‘o ra “a‘o,” e e nafea te reira ia horoahia? (A hi‘o atoa i te  nota i raro i te api.)

10 E mana atoa to te mau metua no ǒ mai i te Atua ra. Te a‘o ra te Bibilia e: “O outou hoi, e te feia metua ra, eiaha e faaooo atu i ta outou tamarii ia riri, e haapii râ ia ratou e ia paari ma te a‘o a te Fatu ra.” (Ephesia 6:4) I roto i te Bibilia, e nehenehe te ta‘o ra “a‘o” e au i “te aratairaa, te faaineineraa, te haapiiraa.” E hinaaro te mau tamarii i te a‘o; e tupu maitai ratou mai te peu e te vai ra te mau aratairaa e te mau otia taa maitai. E  taai te Bibilia i taua a‘o ra, aore ra haapiiraa, i te here. (Maseli 13:24) No reira, eiaha roa ’tu ‘te pǎpǎi e te a‘o’ ia riro ei mea teimaha roa—no te aau e no te tino. * (Maseli 22:15; 29:15) E faaohipa-hua-raa i te mana o te metua ia etaeta roa te a‘o e aita ana‘e e aroha e e nehenehe te reira e faataiâ roa i te aau o te hoê tamarii. (Kolosa 3:21) I te tahi a‘e pae, e faaite te a‘o faito noa e te tano i te horoaraahia, i te mau tamarii e te here ra to ratou mau metua ia ratou e te tapitapi ra i te huru taata ta ratou e riro maira.

11. E nafea te mau tamarii ia faaohipa i to ratou mana ma te tano?

11 E te mau tamarii? E nafea ratou ia faaohipa i to ratou mana ma te tano? “Te puai te hinuhinu o te taata apî ra,” o ta te Maseli 20:29 ïa e parau ra. Papu maitai e aita ’tu e ravea maitai a‘e no te feia apî ia faaohipa ratou i to ratou puai e to ratou ito no te tavini i to tatou “Atua Poiete Rahi.” (Koheleta 12:1, MN) Mea maitai ia haamana‘o te feia apî e e ohipa to ratou haerea i nia i te aau o to ratou mau metua. (Maseli 23:24, 25) Ia faaroo te mau tamarii i to ratou mau metua o te mǎta‘u i te Atua e ia pee ratou i te haerea maitai, e faaoaoa ratou i te aau o to ratou mau metua. (Ephesia 6:1) “Mea mauruuru” taua haerea ra “i te Fatu.”—Kolosa 3:20.

I roto i te amuiraa

12, 13. (a) E nafea te mau matahiapo ia hi‘o i to ratou mana i roto i te amuiraa e tia ’i? (b) A horoa na i te hi‘oraa no te aha e tia ’i i te mau matahiapo ia haa ma te here i nia i te nǎnǎ.

12 Ua horoa Iehova i te mau tiaau ia aratai ratou i te amuiraa Kerisetiano. (Hebera 13:17) E tia i teie mau tane aravihi ia faaohipa i to ratou mana no ǒ mai i te Atua ra no te horoa i te tauturu e hinaarohia e te haamaitai i te ea pae varua o te nǎnǎ. E tia anei i te mau matahiapo ia faatere i to ratou mau hoa faaroo no te mea e tiaraa to ratou? Eita roa ’tu! E tia ei hi‘oraa  faito noa e te haehaa ta te mau matahiapo i ta ratou hopoia i roto i te amuiraa. (Petero 1, 5:2, 3) Te parau ra te Bibilia i te mau tiaau e: ‘Ia faaamu i te [amuiraa a] te Atua, o ta ’na i hoo i [te toto o ta ’na iho Tamaiti].’ (Ohipa 20:28; MN) E tumu puai teie e haa ’i ma te here i nia i te melo taitahi o te nǎnǎ.

13 E nehenehe tatou e faahoho‘a i te reira mai teie. E ani mai te hoê hoa rahi ia outou e haapao i te hoê tao‘a poiherehia. Ua ite outou e ua aufau to outou hoa i te hoê moni rahi no taua tauihaa ra. Eita anei outou e haapao maitai atu eiaha ia ino? Oia atoa, ua horoa te Atua i te hopoia na te mau matahiapo e haapao i te hoê tao‘a faahiahia mau: te amuiraa, e au hoi to ’na mau melo i te mamoe. (Ioane 21:16, 17) Mea here na Iehova ta ’na mau mamoe—ua tae roa hoi oia i te hoo mai ia ratou i te toto faufaa rahi o ta ’na Tamaiti fanau tahi, o Iesu Mesia. Aita ’tu hoo rahi a‘e ta Iehova i nehenehe e aufau no ta ’na mau mamoe. E haamana‘o te mau matahiapo haehaa i te reira e e haa ratou i nia i te mau mamoe a Iehova ia au i te reira.

“Te mana o te arero”

14. Eaha te mana o te arero?

14 “Tei [te mana] o te arero te pohe e te ora i te vairaa,” o ta te Bibilia ïa e parau ra. (Maseli 18:21; MN) Oia mau, e nehenehe te arero e faatupu i te ino rahi. O vai tei ore i ite a‘enei i te mauiui no te hoê parau feruri-ore-hia aore ra o te faaino? E mana faaora atoa râ to te arero. “O te arero râ o te taata paari ra, mai te raau rapaau ma‘i ra ïa,” o ta te Maseli 12:18 ïa e parau ra. Oia, e nehenehe te mau parau faaitoito e te maitai e riro mai te parairaa raau, te raau rapaau aau. E rave ana‘e i te tahi mau hi‘oraa.

15, 16. E nafea tatou e nehenehe ai e faaohipa i te vaha no te faaitoito ia vetahi ê?

15 “E haamahanahana ’tu i te aau taiâ,” o ta te Tesalonia 1, 5:14 ïa e parau ra. Oia, e aro atoa te mau tavini haapao maitai a Iehova i te taiâ i te tahi taime. E nafea tatou ia tauturu ia  ratou? A pûpû atu i te mau haapopouraa mau e te taa maitai no te tauturu atu ia ite i to ratou iho faufaa i te aro o Iehova. A taio atu i te mau parau mana o te mau irava bibilia e faaite ra e te tapitapi mau ra e te here mau ra Iehova i te feia “aau paruparu” e “te taata aau taiâ.” (Salamo 34:18) Ia faaohipa tatou i te mana o to tatou arero no te tamahanahana ia vetahi ê, te faaite ra tatou e te pee ra tatou i to tatou Atua aumauiui, “o te haamahanahana i tei hepohepo.”—Korinetia 2, 7:6, New American Standard Bible.

16 E nehenehe atoa ta tatou e faaohipa i te mana o to tatou arero no te horoa i te faaitoitoraa e hinaaro-rahi-hia ra ia vetahi ê. Ua moe anei to te hoê hoa faaroo te hoê taata here i roto i te pohe? E haamahanahana te mau parau aumauiui o te faaite i to tatou haapeapea, i te hoê aau oto. Te mana‘o ra anei te hoê taeae aore ra te hoê tuahine paari e aita oia e hinaarohia ra? E haapapu te hoê vaha haapao maitai i te feia paari e mea faufaa ratou e te auhia. Te aro ra anei te hoê i te ma‘i tupu tamau? E tamǎrû te mau parau maitatai na roto i te niuniu paraparau aore ra i mua i te taata, i te aau o te taata ma‘i. E oaoa mau to  tatou Atua Poiete ia faaohipa tatou i te mana o te vaha no te faahiti i te mau parau “e tupu ai te maitai”!—Ephesia 4:29.

Te faaiteraa i te parau apî maitai—te hoê ravea maitai roa no te faaohipa i to tatou puai

17. Eaha te ravea faufaa e faaohipa ’i tatou i to tatou vaha e ia maitai atu vetahi ê, e no te aha e tia ’i ia tatou ia na reira?

17 Aita ’tu e ravea faufaa a‘e e faaohipa ’i i te mana o te arero i te faaiteraa i te parau apî maitai o te Basileia o te Atua ia vetahi ê. “Eiaha oe e tapea i te maitai i te taata e au ia ’na ia hopoi ra, tei to rima taua maitai ra ia hopoi,” o ta te Maseli 3:27 ïa e parau ra. Mea titauhia ia faaite tatou i te parau apî maitai o te faaora, ia vetahi ê. Eita e tano ia tapea tatou na tatou i te poroi ru ta Iehova i horoa maitai mai na tatou. (Korinetia 1, 9:16, 22) I nia râ i teihea faito e hinaaro ai Iehova ia rave tatou i teie ohipa?

 Taviniraa ia Iehova ma to tatou “puai atoa”

18. Eaha ta Iehova e hinaaro ra ia tatou?

18 E turai to tatou here ia Iehova ia apiti maite tatou i roto i te taviniraa Kerisetiano. Eaha ta Iehova e hinaaro ra ia tatou i te reira pae? Te hoê mea ta tatou paatoa e nehenehe e horoa aita e hi‘oraa eaha to tatou huru tupuraa i roto i te oraraa: “E ta outou mau mea atoa e rave ra, e rave ma te aau atoa mai te mea e e na te Fatu [ra o Iehova], eiaha na te taata.” (Kolosa 3:23) I to ’na faahitiraa i te faaueraa rahi roa ’‘e, ua parau Iesu e: “E hinaaro oe i to Atua ia Iehova ma to aau atoa, e ma to [nephe] atoa, e ma to mana‘o atoa, e ma to puai atoa.” (Mareko 12:30; MN) Oia, te hinaaro ra Iehova ia here e ia tavini tatou paatoa ia ’na ma to tatou nephe atoa.

19, 20. (a) I te mea e to roto atoa te aau, te mana‘o e te puai i te nephe, no te aha teie mau ravea e faahiti-atoa-hia ’i i roto i te Mareko 12:30? (b) Eaha te auraa e tavini ia Iehova ma te nephe atoa?

19 Eaha te auraa e tavini i te Atua ma te nephe atoa? E au te nephe i te taata taatoa, ma to ’na mau aravihi atoa i te pae tino e te pae feruriraa. I te mea e to roto atoa te aau, te mana‘o e te puai i te nephe, no te aha teie mau ravea e faahiti-atoa-hia ’i i roto i te Mareko 12:30? E rave ana‘e i te hoê hi‘oraa. I te tau bibilia, e hoo paha te hoê taata ia ’na iho (to ’na nephe) ei tîtî. Teie râ, eita paha te tîtî e tavini i to ’na fatu ma to ’na aau atoa; eita paha oia e faaohipa i to ’na puai atoa aore ra to ’na aravihi atoa i te pae feruriraa no te faahaere i te mau faufaa a to ’na fatu i mua. (Kolosa 3:22) No reira, mea papu e ua faahiti Iesu i teie mau ravea no te onoono e eita e tia ia tatou ia pipiri i te hoê noa ’‘e mea i roto i ta tatou taviniraa i te Atua. Te taviniraa i te Atua ma to tatou nephe atoa, te faaohipa-hope-raa ïa i to tatou puai e to tatou ito i te taviniraa ia ’na.

20 Te taviniraa ma te nephe atoa, o te auraa anei ïa e e tia ia tatou paatoa ia horoa i te hoê â rahiraa hora e ito i roto i te taviniraa? Mea fifi roa ïa te reira, e taa ê hoi to te hoê taata huru tupuraa e mau ravea i to te tahi atu. Ei hi‘oraa, e nehenehe ta te hoê taata apî e ea maitai to ’na e mea itoito i te pae tino e  horoa i te taime rahi a‘e i roto i te pororaa i te hoê mea iti a‘e to ’na puai no te matahiti rahi. E nehenehe ta te hoê taata taa noa aita ta ’na e hopoia utuafare e rave hau a‘e i te hoê o te tia ia aupuru i te hoê utuafare. Mai te peu e e au to tatou puai e to tatou huru tupuraa no te rave rahi i roto i te taviniraa, e tia mau ïa ia tatou ia î i te mauruuru! Papu maitai, eiaha roa ’tu to tatou ei aau faaino, a faaau ai ia tatou iho ia vetahi ê i te reira paeau. (Roma 14:10-12) Area râ, e hinaaro tatou e faaohipa i to tatou mana no te faaitoito ia vetahi ê.

21. Eaha te ravea maitai roa ’‘e e te faufaa roa ’‘e e faaohipa ’i i to tatou puai?

21 Ua horoa Iehova i te hi‘oraa tia roa i te faaohiparaa i to ’na mana ma te tano. E hinaaro tatou e pee maite ia ’na ma to tatou aravihi hope ei taata tia ore. E nehenehe ta tatou e faaohipa i to tatou mana ma te tano na roto i te haaraa ma te tura i nia i te feia e mana rii to tatou i nia ia ratou. Hau atu â, e hinaaro tatou e rave ma te nephe atoa i te ohipa pororaa e faaoraraa ta Iehova i horoa mai na tatou e rave. (Roma 10:13, 14) A haamana‘o na e e oaoa Iehova ia horoa outou i te faito maitai roa ’‘e ta outou—ta to outou nephe—e nehenehe e horoa. Aita anei to outou mafatu e turai ra ia outou ia hinaaro e rave i te mea atoa ta outou e nehenehe i roto i te taviniraa i te hoê Atua o te taa mai e te here mai mai teie? Aita ’tu e ravea maitai a‘e aore ra faufaa a‘e e faaohipa ’i i to outou puai.

^ par. 10  I te tau bibilia, te ta‘o Hebera i hurihia ei “pǎpǎi,” o te hoê ïa raau mai ta te hoê tiai mamoe e rave no te aratai i ta ’na mau mamoe. (Salamo 23:4) Oia atoa, e au “te pǎpǎi” o te mana o te metua i te aratairaa î i te here, eiaha râ i te faautuaraa etaeta e te vî.

No te ite atu â

E rave anei oe i te mau haapaeraa no te Basileia?

Haapii e nafea ia faaohipa i to tatou taime, puai, aravihi e ta tatou moni no te turu i te Basileia a te Atua.