Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 2

E nehenehe mau anei ta outou e “haafatata ’tu i te Atua”?

E nehenehe mau anei ta outou e “haafatata ’tu i te Atua”?

1, 2. (a) I te feia e rave rahi, eaha te mea e au ra e eita roa ’tu e nehenehe e tupu, eaha râ ta te Bibilia e haapapu maira? (b) Teihea auhoaraa piri i roaa ia Aberahama, e no te aha?

EAHA to outou huru mai te peu e e parau te Atua i poiete i te ra‘i e te fenua no outou e, “O to ’u hoa teie”? I te feia e rave rahi, e au ra e eita roa ’tu te reira e nehenehe e tupu. E nafea hoi te hoê taata haihai e nehenehe ai e faatupu i te auhoaraa e te Atua ra o Iehova? Te haapapu maira râ te Bibilia e e nehenehe mau â ta tatou e haafatata ’tu i te Atua.

2 O Aberahama i tahito ra te hoê tei fana‘o i taua taairaa piri ra. Ua parau Iehova no taua patereareha ra e “tau hoa.” (Isaia 41:8) Oia, ua faariro Iehova ia Aberahama ei hoa no ’na. Ua roaa ia Aberahama taua auhoaraa piri ra no te mea ua ‘faaroo oia ia Iehova.’ (Iakobo 2:23) I teie tau atoa, e imi Iehova i te mau taime maitatai no te “faatupu i te taairaa” e te feia e tavini ra ia ’na no to ratou here. (Deuteronomi 10:15, MN) Te a‘o ra ta ’na Parau e: “E haafatata ’tu i te Atua, e na ’na e haafatata mai ia outou na.” (Iakobo 4:8) I roto i teie mau parau, te ite ra tatou i te hoê titauraa e te hoê atoa parau fafau.

3. Eaha ta Iehova e titau maira ia tatou, e eaha te parau fafau i taaihia i te reira?

3 Te titau maira Iehova e haafatata ’tu ia ’na. Ua ineine e te hinaaro ra oia e farii maitai ia tatou ei hoa. I taua atoa taime ra, te fafau ra oia e ia rave tatou i te mau taahiraa no te haafatata ’tu ia ’na, e na reira atoa oia. E haafatata mai oia ia tatou. E na reira ïa tatou e fana‘o ai i te hoê mea faahiahia mau—“te auhoaraa piri roa e Iehova.” * (Salamo 25:14, MN) I roto i te  ta‘o Hebera i hurihia ei “auhoaraa piri roa,” te vai ra te mana‘o o te aparauraa moe e te hoê hoa taa ê.

4. E nafea outou ia faataa i te hoê hoa piri roa, e e nafea Iehova e riro ai ei hoa mai tera no te feia e haafatata ’tu ia ’na?

4 Te vai ra anei to outou te hoê hoa piri roa ta outou e nehenehe e tiaturi? E tapitapi mai te hoê hoa mai tera ia outou. E tiaturi outou ia ’na, no te mea ua faaite oia i to ’na taiva ore. E rahi atu â to outou oaoa ia faaite atu outou i te reira ia ’na. No te mea e faaroo mai oia ma te aumauiui, e mâmâ mai to outou mau haapeapearaa. Noa ’tu e aita ’tu e taata te taa maira ia ’na to outou huru, te taa ra ia ’na. Oia atoa, ia haafatata ’tu outou i te Atua, e noaa ia outou te hoê Hoa taa ê o te haafaufaa mau ia outou, te tapitapi roa ia outou, e te taa maite ra ia ’na to outou huru. (Salamo 103:14; Petero 1, 5:7) E tiaturi outou ia ’na i roto i te hohonuraa o to outou aau, no te mea ua ite outou e eita oia e taiva i te feia e ore e taiva ia ’na. (Salamo 18:25) Teie râ, e noaa ia tatou teie auhoaraa piri roa e te Atua ei fana‘oraa taa ê no te mea noa ua rave oia e ia nehenehe e na reira.

Ua iriti Iehova i te e‘a

5. Eaha ta Iehova i rave e nehenehe ai tatou e haafatata ’tu ia ’na?

5 O tatou noa ana‘e, eita roa ’tu ta tatou ei feia hara e nehenehe e haafatata ’tu i te Atua. (Salamo 5:4) “Ua faarahi râ te Atua i to ’na aroha ia tatou nei, i te mea te vai taata hara noa nei â tatou, i pohe ai te Mesia no tatou nei,” o ta te aposetolo Paulo ïa i papai. (Roma 5:8) Oia, ua faanaho Iehova e ia “horoa” Iesu “i to ’na ora ei hoo no te taata e rave rahi.” (Mataio 20:28) Maoti to tatou faaroo i taua tusia taraehara ra e nehenehe ai tatou e haafatata ’tu i te Atua. I te mea e o te Atua “tei hinaaro mai na ia tatou nei,” ua haamau oia i te niu ia faatupu tatou i te auhoaraa e oia.—Ioane 1, 4:19.

6, 7. (a) Mea nafea tatou i ite ai e e ere Iehova i te hoê Atua huna e te noaa ore i te matau? (b) Eaha te mau ravea i faaite ai Iehova ia ’na iho?

6 Ua rave Iehova i te tahi atu taahiraa: Ua faaite mai oia ia ’na iho ia tatou nei. I roto i te mau auhoaraa atoa, ua niuhia  te piri-roa-raa i nia i te matau-maitai-raa i te hoê taata, te haafaufaaraa i to ’na mau huru maitatai e ta ’na mau ravea. No reira, ahiri Iehova e Atua huna e te noaa ore i te matau, eita roa ’tu tatou e nehenehe e haafatata ’tu ia ’na. Teie râ, aita roa ’tu oia e tapuni ra, te hinaaro ra râ oia ia ite tatou ia ’na. (Isaia 45:19) Hau atu â, te mea ta ’na e faaite ra no nia ia ’na, e noaa ïa i te taata atoa, tae noa ’tu i to roto ia tatou e parauhia e e feia riirii ia au i te mau faito a to te ao.—Mataio 11:25.

Ua faaite Iehova ia ’na iho na roto i ta ’na mau ohipa i poiete e ta ’na Parau papaihia

7 Mea nafea to Iehova faaiteraa mai ia ’na iho ia tatou nei? Te faaite maira ta ’na mau ohipa i poiete i te tahi mau huru to ’na—te rahi o to ’na puai, o to ’na paari, e o to ’na aroha. (Roma 1:20) Aita râ Iehova i faaite mai ia ’na iho na roto noa i te mau mea ta ’na i poiete. I te mea e e haamaramarama noa oia i te taata, ua horoa oia i te hoê faaiteraa ia ’na iho tei papaihia i roto i ta ’na Parau, te Bibilia.

Mataitairaa i “te nehenehe o Iehova”

8. No te aha e nehenehe ai e parau e e tapao faaite te Bibilia iho no to Iehova here ia tatou?

8 E tapao faaite te Bibilia iho no to Iehova here ia tatou. I roto i ta ’na Parau, te faaite ra oia ia ’na iho na roto i te mau parau e taa ia tatou—e tapao ïa e, eiaha noa e mea here na ’na ia tatou, te hinaaro atoa ra râ oia ia ite e ia here tatou ia ’na. Maoti te mea ta tatou e taio i roto i teie buka faahiahia e mataitai ai tatou i “te nehenehe o Iehova” e e turaihia ’i tatou ia hinaaro e haafatata ’tu ia ’na. (Salamo 90:17, MN) E tauaparau ana‘e no nia i te tahi mau ravea tamahanahana e faaite ai Iehova ia ’na iho i roto i ta ’na Parau.

9. Eaha te tahi mau hi‘oraa o te mau parau taa maitai i roto i te Bibilia e faataa ra i te mau huru maitatai o te Atua?

9 I roto i te mau Papai, mea rahi te mau parau taa maitai e faataa ra i te mau huru maitatai o te Atua. A tapao na i te tahi mau hi‘oraa. “E mea au hoi na Iehova te parau-tia.” (Salamo 37:28) “Aore” o te Atua “e faito i te mana.” (Ioba 37:23) “E [ore hoi au e taiva], te na reira maira Iehova.” (Ieremia 3:12; MN) E “paari o te aau” to ’na. (Ioba 9:4) “E Atua aroha noa, e  te hamani maitai rahi, e te faaoromai rahi, e te maitai rahi, e te parau mau.” (Exodo 34:6) “Te maitai ra hoi oe, e te Fatu, e ua tia ia oe te faaore mai i te hara nei.” (Salamo 86:5) E, mai tei faahitihia i roto i te pene na mua ’tu, teie te huru maitai rahi roa ’‘e: “E aroha te Atua.” (Ioane 1, 4:8) A feruriruri ai outou i teie mau ateriputi au mau, aita anei outou e anaanatae atura i teie Atua faaau ore?

E tauturu te Bibilia ia tatou ia haafatata ’tu ia Iehova

10, 11. (a) No te tauturu ia tatou ia ite i to ’na huru ma te maramarama ’tu â, eaha ta Iehova i tuu atoa i roto i ta ’na Parau? (b) Teihea hi‘oraa o te Bibilia e tauturu ia tatou ia feruri e nafea te mana o te Atua ia ohipa?

10 Hau atu i te faaiteraa mai eaha to ’na mau huru maitatai, ua tuu atoa Iehova ma te here i te mau hi‘oraa papu mea nafea to ’na faaohiparaa i teie mau huru i nia i te taata, i roto i ta ’na Parau. E faatupu teie mau aamu i te mau hoho‘a oraora i roto i te feruriraa o te tauturu mai ia tatou ia ite i te mau tuhaa rau o to ’na huru ma te maramarama ’tu â. E tauturu atu ai te reira ia tatou ia haafatata ’tu ia ’na. E rave ana‘e i te hoê hi‘oraa.

11 Mea ê te taioraa e e “mana rahi” to te Atua. (Isaia 40:26) Mea ê te taioraa mea nafea to ’na faaoraraa ia Iseraela mai roto mai i te Miti Uteute a aupuru atu ai i te nunaa i roto i te medebara e 40 matahiti i te maoro. E ite roa outou ia vetea te miti e tahe puai maira. E feruri outou i te nunaa—peneia‘e e 3 000 000 taatoa—e haere ra na nia i te repo mǎrô, ma te miti putua e tia noa ra mai te mau patu rarahi i na pae e piti ra. (Exodo 14:21; 15:8) Mea papu roa ia outou e te aupuru ra e te paruru ra te Atua ia ratou i roto i te medebara. E tahe te pape mai roto mai i te mato. E topa mai te maa e au i te huero uouo i nia i te repo. (Exodo 16:31; Numera 20:11) I ǒ nei, aita noa  Iehova e faaite ra e e mana to ’na, te faaohipa ra râ oia i te reira no to ’na nunaa. E ere anei i te mea mahanahana ia ite e e tae atu ta tatou mau pure i te hoê Atua puai mau ra o te riro ei ‘haapuraa e ei etaeta no tatou, ei tauturu fatata ia roohia e te ati ra’?—Salamo 46:1.

12. E nafea Iehova e tauturu mai ai ia “ite” tatou ia ’na na roto i te mau parau e taa ia tatou?

12 Ua rave hau atu â Iehova, e varua hoi oia, no te tauturu mai ia tatou ia ite ia ’na. Ei taata, e ite noa tatou i te mau mea e itehia i te mata, eita ’tura ïa tatou e ite atu i te ao varua. Ahiri te Atua i faataa mai i to ’na huru na roto i te parau varua, e au ïa ia tamata outou i te faataa i te mau tuhaa rii o to outou huru rapaeau, mai te û o to outou orio mata aore ra to outou huru purepure, i te hoê taata fanau-matapo-hia. Aita râ, te tauturu maira Iehova ma te maitai ia “ite” tatou ia ’na na roto i te mau parau e taa ia tatou. I te tahi taime, e faaohipa oia i te mau faahoho‘araa a faaau ai ia ’na i te mau mea matauhia e tatou. E faataa atoa oia ia ’na iho ma te tahi mau huru o te taata. *

13. Eaha te hoho‘a ta te Isaia 40:11 e haaputa i roto i te feruriraa, e e nafea te reira e ohipa ’i i nia ia outou?

13 A tapao na i te faataaraa ia Iehova i roto i te Isaia 40:11: “E faaamu oia i ta ’na nǎnǎ mai te tiai mamoe ra; e haaputu oia i te mau fanau‘a rii i roto i tana rima, e ei roto ratou i tana ouma ia hopoi.” Te faaauhia ra Iehova i ǒ nei i te hoê tiai mamoe o te amo i te mau pinia mamoe i roto i “tana rima.” Te faaite ra te reira e e nehenehe ta te Atua e paruru e e aupuru i to ’na nunaa, tae noa ’tu i te mea paruparu a‘e. E ite tatou i te haapuraa i roto i to ’na rima puai, no te mea ia ore tatou e taiva ia ’na, eita roa ’tu oia e faarue ia tatou. (Roma 8:38, 39) E ta‘ita‘i te Tiai mamoe Rahi i te mau pinia mamoe ‘i roto i tana  ouma’—te hoê parau e haamana‘o maira i te tufetu fatafata o te ahu rapae i reira te tiai mamoe e ta‘ita‘i ai i te tahi taime i te hoê mamoe fanau apî. Te haamahanahanahia ra ïa tatou e te here maira e te haapao maira Iehova ia tatou ma te here. E hinaaro iho â ïa tatou e haafatata ’tu ia ’na.

‘E hinaaro te Tamaiti e faaite ia ’na’

14. No te aha e nehenehe ai e parau e te horoa maira Iehova i te faaiteraa hohonu roa ’‘e ia ’na iho na roto ia Iesu?

14 I roto i ta ’na Parau, te horoa maira Iehova i te faaiteraa hohonu roa ’‘e ia ’na iho na roto i ta ’na Tamaiti here, o Iesu. Aita e taata i nehenehe e pee maite i te huru feruriraa e te mau huru aau o te Atua aore ra e faataa ia ’Na ma te oraora mau maori râ o Iesu ana‘e. Inaha hoi, te vai noa ra taua Tamaiti matahiapo ra i pihai i to ’na Metua hou a poietehia ’i te tahi atu mau mea ora varua e te ao materia. (Kolosa 1:15) Ua matau maitai roa ino Iesu ia Iehova. No reira oia i nehenehe ai e parau e: “Aore roa te hoê i ite i te Tamaiti maori râ o te Metua; aore hoi te hoê i ite i te Metua, maori râ o te Tamaiti, e o ta te Tamaiti i hinaaro i te faaite atu.” (Luka 10:22) I to ’na tiaraa  mai i te fenua nei ei taata, ua faaite Iesu i to ’na Metua na roto e piti ravea faufaa.

15, 16. Eaha na ravea e piti i faaite mai ai Iesu i to ’na Metua?

15 A tahi, e tauturu mai te mau haapiiraa a Iesu ia ite i to ’na Metua. Ua faataa Iesu ia Iehova na roto i te mau parau o te haaputapû i to tatou aau. Ei hi‘oraa, no te faataa i te Atua î i te aroha hamani maitai o te farii faahou i te feia hara e tatarahapa ra, ua faaau Iesu ia Iehova i te hoê metua tane o te faaore i te hara e te putapû roa i te iteraa i ta ’na tamaiti haamâu‘a faufaa e ho‘i maira, a horo roa ’tu ai e tauvahi i to ’na a‘î e e apâ ia ’na ma te here. (Luka 15:11-24) Ua faataa atoa Iesu ia Iehova mai te hoê Atua o te “faatae” i te feia aau tia no te mea mea here na ’na ia ratou taitahi. (Ioane 6:44) E ite roa atoa hoi oia ia mairi te hoê manu rii haihai i raro i te fenua. “Eiaha maori outou e mǎta‘u,” o ta Iesu ïa i faataa, “e maitai rahi hoi to outou i to te manu e ia rahi noa ’tu.” (Mataio 10:29, 31) Eita e ore tatou i te tae i taua huru Atua î i te here ra.

16 A piti, e faaite mai te hi‘oraa o Iesu mai te aha te huru o Iehova. No to Iesu peeraa i te huru o to ’na Metua ma te tia roa i nehenehe ai oia e parau e: “O tei hi‘o mai ia ’u ra, ua hi‘o ïa i te Metua.” (Ioane 14:9) No reira, ia taio tatou i roto i te mau Evanelia no nia ia Iesu—te mau huru aau ta ’na i faaite e to ’na huru i nia ia vetahi ê—mai te mea ra ïa e te ite ra tatou i te hoê hoho‘a oraora o to ’na Metua. Aita ’tu e faaiteraa i to ’na mau huru maitatai maramarama a‘e i tera ta Iehova i nehenehe e horoa mai. No te aha?

17. A faahoho‘a na eaha ta Iehova i rave no te tauturu mai ia taa ia tatou mai te aha to ’na huru.

17 Ei faahoho‘araa: A feruri na e te tamata ra outou i te faataa eaha te maitai. E faataa paha outou i te reira na roto i te mau ta‘o. Ia nehenehe mau râ outou e faahiti i te hoê taata o te rave mau ra i te hoê ohipa maitai e e parau e, “Era te hoê hi‘oraa o te maitai,” i reira te auraa o te ta‘o ra “maitai” e hohonu atu â ’i e e taa-maitai-a‘e-hia ’i. Ua na reira atoa Iehova no te tauturu mai ia taa ia tatou mai te aha to ’na huru. Taa ê atu i  te faataaraa mai ia ’na na roto i te mau parau, ua horoa atoa mai oia i te hi‘oraa oraora o ta ’na Tamaiti. I nia ia Iesu, e itehia ia ohipa te mau huru maitatai o te Atua. Na roto i te mau aamu o te Evanelia e faataa ra ia Iesu, te na ô maira ïa Iehova e: “Mai tera to ’u huru.” E nafea te papai faauruahia e faataa ’i ia Iesu a tia mai ai oia i te fenua nei?

18. Mea nafea to Iesu faaiteraa i te mau ateriputi o te mana, te parau-tia, e te paari?

18 Ua itehia ma te nehenehe na ateriputi rarahi e maha o te Atua i roto ia Iesu. Ua mana oia i nia i te ma‘i, te poia, e tae noa ’tu i te pohe. Teie râ, eiaha mai te mau taata miimii o te faaohipa hua i to ratou mana, aita roa ’tu oia i faaohipa a‘enei i te mana semeio no ’na iho aore ra no te haamauiui ia vetahi ê. (Mataio 4:2-4) Mea au na ’na te parau-tia. Ua î roa to ’na aau i te riri tia i to ’na iteraa i te feia hoo tia ore ia eiâ i te taata. (Mataio 21:12, 13) Aita oia i hi‘o ino i te feia riirii e tei hepohepo, ua tauturu râ oia ia ratou ia itea mai “te ora” no to ratou nephe. (Mataio 11:4, 5, 28-30) E paari faito ore to roto i te mau haapiiraa a Iesu tei ‘rahi a‘e ia Solomona.’ (Mataio 12:42) Aita râ Iesu i faaahaaha a‘enei no to ’na paari. Ua putapû te aau o te feia riirii i ta ’na mau parau no te mea mea maramarama ta ’na mau haapiiraa, mea haapeu ore e te nanonano.

19, 20. (a) Mea nafea to Iesu riroraa ei hi‘oraa faahiahia roa no te aroha? (b) A taio ai e a feruriruri ai tatou i te hi‘oraa o Iesu, eaha te tia ia tatou ia haamana‘o?

19 E hi‘oraa faahiahia roa Iesu no te aroha. I te roaraa o ta ’na taviniraa, ua faaite oia i te aroha e to ’na mau paeau e rave rahi, tae noa ’tu i te aumauiui. Aita ta ’na i nehenehe e hi‘o i te mauiui o vetahi ê ma te ore e aroha ’tu. Mea pinepine roa to taua aumauiui ra turairaa ia ’na ia haa. (Mataio 14:14) Noa ’tu e ua faaora oia i te feia ma‘i e ua faatamaa i tei poia, ua faaite Iesu i te aumauiui ma te faufaa roa ’tu â. Ua tauturu oia ia vetahi ê ia ite, ia farii, e ia hinaaro i te parau mau no nia i te Basileia o te Atua, o te haamaitai i te huitaata e a muri noa ’tu. (Mareko 6:34; Luka 4:43) Hau atu â, ua faaite Iesu i te  aroha haapae ia ’na iho na roto i te ineineraa i te horoa i to ’na ora no vetahi ê.—Ioane 15:13.

20 E maere anei ïa tatou e ua hinaaro te mau taata o te mau faito matahiti e te mau faito totiare atoa e haafatata ’tu i teie taata mǎrû e te mahanahana e te aau maitai? (Mareko 10:13-16) A taio ai râ e a feruriruri ai tatou i te hi‘oraa oraora o Iesu, e haamana‘o noa ana‘e e i roto i teie Tamaiti, te ite ra tatou i te hoho‘a mau o to ’na Metua.—Hebera 1:3.

Te hoê buka haapiiraa no te tauturu ia tatou

21, 22. Eaha te titauhia no te imi ia Iehova, e eaha to roto i teie buka haapiiraa o te tauturu mai ia tatou i roto i teie tutavaraa?

21 Na roto i te faaiteraa ia ’na iho ma te maramarama roa i roto i ta ’na Parau, te haapapu maitai ra Iehova e te hinaaro ra oia ia fatata ’tu tatou ia ’na. I taua atoa taime ra, eita oia e faahepo ia tatou ia imi i te taairaa farii-maitai-hia e oia. Tei ia tatou noa te imiraa ia Iehova “oi itea ’‘e oia.” (Isaia 55:6) E titau te imiraa ia Iehova ia ite i to ’na mau huru maitatai e ta ’na mau ravea i faaitehia i roto i te Bibilia. Ua opuahia te buka haapiiraa ta outou e taio ra i teie nei no te tauturu ia outou i roto i taua tutavaraa ra.

22 E itea mai ia outou e ua vahihia teie buka na roto i na tuhaa e au i na ateriputi rarahi e maha o Iehova: te mana, te parau-tia,  te paari, e te aroha. E haamata te tuhaa taitahi na roto i te hoê haapotoraa o te huru maitai. E tauaparau te mau pene i muri mai i te ravea e faaite ai Iehova i taua huru maitai ra i roto i to ’na mau paeau rau. I roto i te tuhaa taitahi, te vai atoa ra hoê pene e faaite ra mea nafea to Iesu horoaraa i te hi‘oraa o taua huru maitai ra, e hoê pene e faahohonu ra e nafea tatou e nehenehe ai e pee i te reira i roto i to tatou oraraa.

23, 24. (a) A faataa na i te tuhaa taa ê ra “Mau uiraa ei feruriruriraa.” (b) E nafea te feruriruriraa e tauturu mai ai ia haafatata ’tu â i te Atua?

23 Ma te haamata na nia i teie pene, te vai ra te hoê tuhaa taa ê teie te upoo parau “Mau uiraa ei feruriruriraa.” Ei hi‘oraa, a hi‘o na i te tumu parau tarenihia i te api 24. Aita te mau irava e te mau uiraa i opuahia ei hi‘o-faahou-raa i te pene. Te fa râ o te reira, te tautururaa ïa ia outou ia feruriruri i te tahi atu â mau vahi faufaa o te tumu parau. E nafea outou e nehenehe ai e faaohipa maitai i teie tuhaa? A imi i te mau irava atoa i faahitihia, e a taio maitai atu. A hi‘o atu ai i te uiraa e apee ra i te mau irava. A feruriruri i te mau uiraa. E rave paha outou i te tahi mau maimiraa. A ui i te tahi mau uiraa hau ia outou iho: ‘Eaha ta teie parau e haapii maira no nia ia Iehova? E nafea te reira e ohipa ’i i nia i to ’u oraraa? E nafea vau e faaohipa ’i i te reira no te tauturu ia vetahi ê?’

24 E nehenehe taua feruriruriraa ra e tauturu ia tatou ia haafatata ’tu â ia Iehova. No te aha? E taai te Bibilia i te feruriruriraa i te aau. (Salamo 19:14) Ia feruriruri tatou ma te aau mehara i te mea ta tatou e haapii ra no nia i te Atua, e tomo te parau i roto i to tatou mafatu taipe i reira e ohipa ’i i nia i to tatou mana‘o, e haaputapû ai i to tatou aau, e i te pae hopea e turai ai ia tatou ia haa. E hohonu atu â to tatou here i te Atua, e na te here atu ai e turai ia tatou ia hinaaro e faaoaoa ia ’na ei Hoa here roa ’‘e no tatou. (Ioane 1, 5:3) Ia noaa taua huru auhoaraa ra, e tia ia tatou ia ite i te mau huru maitatai e te mau ravea a Iehova. Na mua râ, e tauaparau ana‘e i te hoê tuhaa o te huru o te Atua o te horoa mai i te tumu puai e haafatata ’tu ai ia ’na—to ’na mo‘araa.

^ par. 3 Ma te faahiahia, ua faaohipahia te ta‘o Hebera i hurihia ei “auhoaraa piri roa” i roto i te Amosa 3:7 e na ô ra e e faaite te Fatu e Arii ra o Iehova i ta ’na “parau i moe” i ta ’na mau tavini, a faaara atea ’i ia ratou eaha ta ’na e opua ra e rave.

^ par. 12 Ei hi‘oraa, te parau ra te Bibilia no nia i te aro, te mata, te tari‘a, te apoo ihu, te vaha, te rima e te avae o te Atua. (Salamo 18:15; 27:8; 44:3; Isaia 60:13; Mataio 4:4; Petero 1, 3:12) Eiaha teie mau parau faahoho‘a ia ravehia na roto i to ratou auraa mau, mai te reira atoa hoi no te mau faahitiraa ia Iehova mai “te Mato” aore ra “te paruru.”—Deuteronomi 32:4; Salamo 84:11.