Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 3

“E mo‘a, e mo‘a, e mo‘a, o Iehova”

“E mo‘a, e mo‘a, e mo‘a, o Iehova”

1, 2. Eaha te orama i tae mai i te peropheta Isaia ra, e eaha ta te reira e haapii maira no nia ia Iehova?

UA Î roa Isaia i te mǎta‘u faatura i te mea ta ’na e mataitai ra—te hoê orama no ǒ mai i te Atua ra. E au ra pa‘i i te tupuraa mau! Ua papai Isaia i muri a‘e e ua ‘hi‘o mau oia ia Iehova’ i nia i to ’na terono teitei. Ua î roa te hiero rahi i Ierusalema i te hiti ahu roroa o Iehova.—Isaia 6:1, 2.

2 Ua î roa atoa Isaia i te mǎta‘u faatura i te mea ta ’na e faaroo ra—e himene puai maitai tei faaaueue roa i te hiero e tae noa ’tu i te niu iho. O te mau seraphi, te mau varua ora tiaraa teitei roa, tera e himene ra. Te ta‘i ra ta ratou himene navenave e te puai maitai ma te mau parau hanahana ra: “E mo‘a, e mo‘a, e mo‘a, o Iehova sabaota, [te î o] te fenua atoa nei [o to ’na ïa] hanahana.” (Isaia 6:3, 4; MN) Te haamahitihiti taa ê ra te himeneraa e toru taime i te ta‘o ra “mo‘a” i te reira huru, e ua tano iho â, no te mea e mo‘a Iehova i te faito hope. (Apokalupo 4:8) Te haamahitihitihia ra te mo‘araa o Iehova i roto i te Bibilia taatoa. E taai tau hanere irava i to ’na i‘oa i te mau ta‘o ra “mo‘a” e “mo‘araa.”

3. E nafea te mau mana‘o hape no nia i te mo‘araa o Iehova e aratai ai i te feia e rave rahi ia fariu ê i te Atua eiaha râ ia haafatata ’tu ia ’na?

3 Papu mau ïa e hoê o te mau mea matamua ta Iehova e hinaaro ra ia taa ia tatou no nia ia ’na, o te mea ïa e mea mo‘a oia. Mea rahi râ i teie tau o te au ore i taua iho mana‘o ra. E taai te tahi pae ma te hape i te mo‘araa i te faahua-parau-tia-raa aore ra i te paieti haavarevare. E mana‘o paha te feia e haafaufaa ore ra ia ratou iho e e ere te mo‘araa o te Atua i te mea anaanatae na ratou, mea riaria râ. E mǎta‘u paha ratou e eita roa ’tu ratou e au ia haafatata ’tu i teie Atua mo‘a. No reira, e rave rahi te fariu ê i te Atua no to ’na mo‘araa. Mea peapea te reira, no te mea ua riro mau â te mo‘araa o te Atua  ei tumu maitai e haafatata ’tu ai ia ’na. No te aha? Hou e pahono atu ai i teie uiraa, e tauaparau ana‘e eaha te mo‘araa mau.

Eaha te mo‘araa?

4, 5. (a) Eaha te mo‘araa, e e ere te reira i te aha? (b) Eaha na ravea faufaa e piti e “taa ê” ai Iehova?

4 E ere i te mea e mea mo‘a te Atua, mea teoteo ïa oia, mea faateitei aore ra mea vahavaha ia vetahi ê. E ere roa ’tu, mea riri râ na ’na taua mau huru ra. (Maseli 16:5; Iakobo 4:6) No reira, eaha te auraa mau o te ta‘o ra “mo‘a”? I roto i te reo Hebera o te Bibilia, no roto mai te ta‘o i te hoê parau e “faataa ê” te auraa. I roto i te haamoriraa, e au te parau “mo‘a” i te mea i faataa-ê-hia i te mea matau-noa-hia, aore ra i faarirohia ei mea tǎpǔ. Mea puai atoa te mana‘o o te mâraa e te viivii ore i roto i te mo‘araa. E nafea teie ta‘o e au ai ia Iehova? O te auraa anei e e “taa ê” oia, e atea roa i te taata tia ore nei?

5 Eita roa ’tu. Ei “Tei mo‘a i Iseraela,” ua faataa Iehova ia ’na iho e parahi ra “i rotopu” i to ’na nunaa, noa ’tu to ratou huru hara. (Isaia 12:6; Hosea 11:9) Aita ïa to ’na mo‘araa e faaatea roa ra ia ’na. E nafea ïa oia e “taa ê ai”? Na roto e piti ravea faufaa. A tahi, e taa ê oia i te mau mea atoa i poietehia i te mea e o oia ana‘e te Teitei Roa ’‘e. Mea otia ore to ’na viivii ore, to ’na mâraa. (Salamo 40:5; 83:18) A piti, e taa ê roa Iehova i te hara atoa, e e tamahanahanaraa tera. No te aha?

6. No te aha tatou e nehenehe ai e tamahanahanahia i te mea e e taa ê roa Iehova i te hara?

6 Te ora nei tatou i roto i te hoê ao mea varavara roa te mo‘araa mau. Mea viivii iho â te mau mea atoa i roto i te huitaata i atea ê i te Atua, ua viivii i te hara e mea tia ore. E tia ia tatou paatoa ia aro i te hara e vai ra i roto ia tatou. E e nehenehe tatou paatoa e roohia i te hara ia ore tatou e ara. (Roma 7:15-25; Korinetia 1, 10:12) Eita Iehova e roohia i te  reira. Ma te atea roa ino i te hara, eita roa ’tu oia e viivii i te hara haihai roa ’‘e. E haapapu maitai â te reira i to tatou mana‘o e e Metua maitai roa Iehova, no te mea e nehenehe oia e tiaturi-roa-hia. Eiaha mai te mau metua taata hara e rave rahi, eita roa ’tu Iehova e haapi‘ohia, e pee i te haerea hairiiri, aore ra e hamani ino. No to ’na mo‘araa e ore roa ’i e tia ia ’na taua mau mea ra. Ua tǎpǔ atoa Iehova i te tahi taime na nia i to ’na iho mo‘araa, no te mea aita ’tu mea papu a‘e i te reira. (Amosa 4:2) E ere anei te reira i te mea tamahanahana?

7. No te aha e nehenehe ai e parau e o te natura iho o Iehova te mo‘araa?

7 O te natura iho o Iehova te mo‘araa. Eaha ïa te auraa? Ei hi‘oraa: A rave na i te mau ta‘o ra “taata” e “tia ore.” Eita ta outou e nehenehe e faataa i te taata ma te ore e faahiti i te huru tia ore. Mea tia ore roa tatou e e ohipa te reira i nia te mau mea atoa ta tatou e rave. I teie nei, a rave na e piti ta‘o ê roa—“Iehova” e “mo‘a.” E mo‘a roa Iehova. Mea mâ, mea viivii ore e te tia te mau mea atoa no ’na. Eita e noaa ia tatou i te ite ia Iehova ia au i to ’na huru mau ia ore ia taa ia tatou teie ta‘o hohonu—“mo‘a.”

“Tei ia Iehova te mo‘araa”

8, 9. Eaha te faaite e e tauturu Iehova i te taata tia ore ia mo‘a ratou ma te huru au noa?

8 I te mea e o Iehova iho te mo‘araa, e tano iho â ia parau e o oia te tumu o te mau mea mo‘a atoa. Eita oia e tapea noa ma te miimii i teie huru maitai faahiahia; e horoa oia i te reira na vetahi ê, e mea horoa maitai. A hi‘o na pa‘i, i to Iehova paraparauraa ia Mose na roto i te hoê melahi i te pu aihere ama ra, ua mo‘a atoa te repo e haaati ra no to ’na taairaahia ia Iehova!—Exodo 3:5.

9 E nehenehe anei te taata tia ore e mo‘a ma te tauturu a Iehova? Oia, ma te huru au noa. Ua horoa te Atua i te ravea e riro ei “nunaa mo‘a” i to ’na nunaa o Iseraela. (Exodo 19:6) Ua haamaitai oia i taua nunaa ra i te hoê faanahoraa no te  haamoriraa tei riro ei mea mo‘a, te mâ e te viivii ore. E tumu parau ïa o te ho‘i pinepine mai te mo‘araa i roto i te Ture a Mose. Oia mau, i mua i te taupoo o te tahu‘a rahi, te vai ra te hoê tâpû auro e itehia e te taata atoa ia anapa i te vahi maramarama. Ua nana‘ohia i nia iho te mau parau ra: “Tei ia Iehova te mo‘araa.” (Exodo 28:36, MN) Ia taa ê ïa ta ratou haamoriraa e, oia mau, to ratou huru oraraa maoti te hoê faito mâraa e viivii ore teitei. Ua parau Iehova ia ratou e: “Ia mo‘a outou, no te mea, te mo‘a nei au, o to outou Atua ra o Iehova.” (Levitiko 19:2) A ora noa ’i te mau Iseraela ia au i te a‘oraa a te Atua i te faito hope e maraa i te taata tia ore, mea mo‘a ratou ma te huru au noa.

10. I te pae o te mo‘araa, eaha te taa-ê-raa i vai na i rotopu ia Iseraela i tahito ra e te mau nunaa e haaati ra?

10 E taa ê roa teie onoonoraa i nia i te mo‘araa i te haamoriraa a te mau nunaa e haaati ra ia Iseraela. I haamori na taua mau nunaa etene ra i te mau atua, e haavare hoi to ratou noa iho vairaa, mau atua i faataahia ei mea u‘ana, nounou, e te taiata. Mea mo‘a ore ratou i roto i te mau tuhaa atoa. Ua mo‘a ore te taata i te haamoriraa i taua mau atua ra. No reira Iehova i faaara ’i i ta ’na mau tavini ia faataa ê mai i te feia haamori etene e ta ratou mau peu faaroo viivii.—Levitiko 18:24-28; Mau arii 1, 11:1, 2.

11. E nafea te mo‘araa o te faanahonahoraa a Iehova i te ra‘i e itehia ’i i roto (a) i te mau melahi? (b) te mau seraphi? (c) ia Iesu?

11 Tae noa ’tu i te taime maitai roa ’‘e, ua noaa i te nunaa maitihia o Iehova oia o Iseraela i tahito ra i te pee rii noa i te mo‘araa o ta ’na faanahonahoraa i nia i te ra‘i. Te faahitihia ra te mau mirioni varua ora e tavini ra i te Atua ma te taiva ore mai ta ’na “muriadi feia mo‘a.” (Deuteronomi 33:2, MN; Iuda 14, MN) Ua pee ratou ma te tia roa i te nehenehe rahi mau o te mo‘araa o te Atua. E a haamana‘o na i te mau seraphi ta Isaia i ite i roto i ta ’na orama. Te faaite ra te mau parau o ta ratou himene e e tuhaa faufaa ta teie mau varua ora puai i roto i te poro-haere-raa i te mo‘araa o Iehova na te  ao taatoa. To nia ’‘e râ te hoê varua ora ia ratou paatoa—te Tamaiti fanau tahi a te Atua. O Iesu tei pee maite roa ’‘e i te mo‘araa o Iehova. Ma te tano, ua parauhia oia “Tei Mo‘a a te Atua.”—Ioane 6:68, 69, MN.

I‘oa mo‘a, varua mo‘a

12, 13. (a) No te aha te i‘oa o te Atua i faataahia ’i ma te tia ei mea mo‘a? (b) No te aha e tia ’i ia raa te i‘oa o te Atua?

12 E te i‘oa ïa o te Atua? Mai ta tatou i ite i roto i te pene 1, e ere taua i‘oa ra i te hoê noa i‘oa toroa aore ra te hoê faataa parau. E faahoho‘a te reira i te Atua ra o Iehova, e au i to ’na mau huru maitatai atoa. No reira te Bibilia e parau mai ai e “no ’na te i‘oa Mo‘a ra.” (Isaia 57:15) Ia au i te Ture a Mose, e hara pohe te faainoraa i te i‘oa o te Atua. (Levitiko 24:16) E a tapao na eaha ta Iesu i tuu i te parahiraa matamua i roto i te pure ra: “E to matou Metua i te ao ra, ia raa to oe i‘oa.” (Mataio 6:9) E faaraa i te hoê mea, e faataa ê atu ïa ei mea tǎpǔ e e faahanahana ’tu, e faariro atu ei mea mo‘a. No te aha râ hoi te hoê mea viivii ore mai te i‘oa iho o te Atua e tia ’i ia faaraahia?

13 Ua patoihia e ua haaviiviihia te i‘oa o te Atua i te haavare e te faainoraa. I Edene, ua haavare Satani no nia ia Iehova e ua faahiti oia i te mana‘o e e Arii parau-tia ore Oia. (Genese 3:1-5) Mai reira mai, ua haapapu Satani—te arii o teie nei ao mo‘a ore—e ia rahi roa mai te mau haavare no nia i te Atua. (Ioane 8:44; 12:31; Apokalupo 12:9) Ua faataa te mau haapaoraa i te Atua mai te hoê Atua haavî, te atea, aore ra te taehae. Ua faahua parau ratou e te turu ra oia ia ratou i roto i ta ratou mau tama‘i haamanii rahi toto. E pinepine te mau ohipa faahiahia ta te Atua i poiete i te parauhia e mea tupu matapo noa mai, aore ra ua tauiui noa. Oia, ua faaino-mau-hia te i‘oa o te Atua. Ia raa ïa te reira; ia faaho‘ihia mai to ’na hanahana tia. Te tiai ru nei tatou ia raa to ’na i‘oa e ia faatiahia to ’na mana arii, e te oaoa nei tatou i te rave i te tahi tuhaa i roto i taua opuaraa rahi ra.

14. No te aha te varua o te Atua e parauhia ’i e mo‘a, e no te aha te faainoraa i te varua mo‘a e riro ai ei mea ino roa?

 14 Te vai ra te tahi atu mea i taai-roa-hia ia Iehova o te parauhia fatata i te mau taime atoa e mea mo‘a—o to ’na ïa varua, aore ra puai ohipa. (Genese 1:2) E faaohipa Iehova i teie puai hau ê no te faatupu i ta ’na mau opuaraa. Te mau mea atoa ta te Atua e rave, e rave oia ma te mo‘a, te viivii ore e te mâ, no reira e tano ai ia parauhia to ’na puai ohipa e varua mo‘a. (Luka 11:13; Roma 1:4) Te faainoraa i te varua mo‘a, oia hoi te aroraa ma te hinaaro mau i te mau opuaraa a Iehova, e hara ïa o te ore e faaorehia.—Mareko 3:29.

No te aha te mo‘araa o Iehova e faatae ai ia tatou ia ’na

15. No te aha e tano ai te mǎta‘u paieti i mua i te mo‘araa o Iehova, e eaha te titauhia no taua mǎta‘u ra?

15 E ere ïa i te mea fifi ia taa no te aha te Bibilia e taai ai i te mo‘araa o te Atua i te mǎta‘u paieti o te taata. Ei hi‘oraa, te na ô ra te Salamo 99:3 e: “Ia haamaitai ratou i to i‘oa rahi e te mǎta‘u, e i‘oa mo‘a hoi te reira.” E ere râ teie mǎta‘u i te mehameha ino. Area râ, e mǎta‘u faatura hohonu, e faatura i te faito maitai roa ’‘e. E tano iho â te reira, tei nia ê roa hoi te mo‘araa o te Atua ia tatou nei. Mea mâ te reira ma te anaana roa e mea hanahana. Eiaha râ te reira ia faariaria ia tatou. E haafatata ’tu râ te hoê mana‘o tano i te mo‘araa o te Atua ia tatou ia ’na ra. No te aha?

Mai ia tatou e anaanatae atu i te nehenehe, e na reira atoa i te mo‘araa

16. (a) E nafea te mo‘araa e taaihia ’i i te nehenehe? A horoa na i te hoê hi‘oraa. (b) E nafea te mau orama e faataa ra ia Iehova e haamahitihiti ai i te mâraa, te viivii ore, e te maramarama?

16 Na mua roa, e taai te Bibilia i te mo‘araa i te nehenehe. I roto i te Isaia 63:15, te faataahia ra te ra‘i mai te “parahiraa mo‘a e te nehenehe” o te Atua. Mea anaanatae na tatou te nehenehe. Ei hi‘oraa, a hi‘o na i te hoho‘a i te api 33. Aita anei outou e anaanatae ra i te reira? Eaha te mea e au roa ’i te reira? A tapao na i te huru ateate o te pape. Mea mâ atoa iho â ïa te reva, inaha hoi mea ninamu te ra‘i e e au ra e te anaana  ra te maramarama. I teie nei, ahiri e ua faahuru-ê-hia taua noâ hoho‘a ra—ua î te anavai i te pehu, ua ino roa te mau tumu raau e te mau mato i te papaipai, ua viivii te reva i te auauahi—eita ïa tatou e anaanatae faahou atu; e faafaufau râ tatou. E taai iho â tatou i te nehenehe i te mâraa, te viivii ore, e te maramarama. E nehenehe teie noâ mau parau e faaohipahia no te faataa i te mo‘araa o Iehova. E ere i te mea maere ia anaanatae roa tatou i te mau orama e faataa ra ia Iehova! E anaana ra mai te maramarama, e pura ra mai te mau ofai maitatai, e ‘ama‘ama ra mai te auahi aore te metara maitai mâ roa ’‘e e te anaana roa ’‘e—mai tera ïa te nehenehe o to tatou Atua mo‘a.—Ezekiela 1:25-28; Apokalupo 4:2, 3.

17, 18. (a) Mea nafea to te orama ohiparaa i nia ia Isaia i te omuaraa? (b) Mea nafea to Iehova faaohiparaa i te hoê seraphi no te tamahanahana ia Isaia, e eaha te auraa o te ohipa a te seraphi?

17 Teie râ, e tia anei ia haamana‘o te mo‘araa o te Atua ia tatou e mea iti a‘e tatou? Mea papu iho â ïa te pahonoraa, e. Inaha hoi, mea iti a‘e tatou ia Iehova—e mea navai ore roa teie parau. E tia anei ia faaatea ê tatou ia ’na no te iteraa i te reira? A hi‘o na i te huru o Isaia i to ’na faarooraa i te mau seraphi ia faaite i te mo‘araa o Iehova. “Auê hoi au nei e! ua mamû iho nei au; e taata vaha viivii hoi au; e tei rotopu hoi au i te mau taata vaha viivii atoa i te parahiraa: ua hi‘o hoi tau mata nei i te arii, ia Iehova sabaota ra.” (Isaia 6:5) Oia, ua haamana‘o te mo‘araa hope o Iehova ia Isaia mai te aha râ oia i te hara e te tia ore. I te omuaraa, ua hepohepo roa taua taata haapao maitai ra. Aita râ Iehova i vaiiho ia ’na mai tera.

18 Ua tamǎrû oioi te hoê seraphi i te peropheta. Nafea? Ua maue atu te varua puai i nia i te fata, ua rave mai i te hoê arahu i reira, e ua tuu atura i te arahu i nia i te vaha o Isaia. E au ra hoi e mea mauiui te reira, e ere râ i te mea tamahanahana. A haamana‘o na râ e e orama tera e mea rahi to ’na auraa taipe. Ua ite iho â Isaia, te hoê ati Iuda haapao maitai, e e pûpûhia te mau tusia taraehara i te mau mahana atoa i te hiero. E ua haamana‘o atu te seraphi i te peropheta ma te  here e noa ’tu e mea tia ore mau oia, e “taata vaha viivii” oia, e nehenehe â e roaa ia ’na te hoê tiaraa mâ i mua i te Atua. * Te hinaaro ra Iehova e hi‘o i te hoê taata tia ore e te hara ei mea mo‘a—ma te huru au noa ’‘e.—Isaia 6:6, 7.

19. E nafea tatou e nehenehe ai e riro ei mea mo‘a ma te huru au noa, noa ’tu to tatou huru tia ore?

19 Hoê â atoa i teie tau. E ata ana‘e te mau tusia atoa i pûpûhia i nia i te fata i Ierusalema no te hoê mea rahi a‘e—te tusia tia roa i pûpûhia e Iesu Mesia i te matahiti 33 T.T. (Hebera 9:11-14) Ia tatarahapa mau tatou i ta tatou mau hara, ia faatitiaifaro i to tatou haerea hape, e ia faaohipa i te faaroo i taua tusia ra, e faaorehia ta tatou mau hara. (Ioane 1, 2:2) E nehenehe atoa tatou e fana‘o i te hoê tiaraa mâ i mua i te Atua. No reira te aposetolo Petero i haamana‘o mai ai e: “Ua oti hoi i te papaihia e, Ia maitai [aore ra, ia mo‘a] outou; te maitai nei hoi au.” (Petero 1, 1:16) A tapao na e aita Iehova i parau e e tia ia tatou ia riro mai ia ’na i te mo‘a. Eita roa ’tu oia e titau i tei ore e maraa ia tatou. (Salamo 103:13, 14) Area  râ, te parau maira Iehova ia mo‘a tatou no te mea mea mo‘a oia. Ei “tamarii herehia ra,” e tutava tatou i te pee ia ’na i te faito hope ei taata tia ore. (Ephesia 5:1) E ohipa tamau ïa te tapiraa i te mo‘araa. A tupu ai tatou i te pae varua, e haa tatou i ‘te faatupu-hua-raa i te maitai’ i tera mahana e tera mahana.—Korinetia 2, 7:1.

20. (a) No te aha e faufaa ’i ia taa e e nehenehe tatou e riro ei mea mâ i te hi‘oraa o to tatou Atua mo‘a? (b) Mea nafea to Isaia tauiraa i to ’na iteraa e ua faaorehia ta ’na mau hara?

20 Mea au na Iehova te mea tia e te viivii ore. Mea riri na ’na te hara. (Habakuka 1:13) Eita râ oia e riri ia tatou. A tamau noa ’i tatou i te hi‘o i te hara mai ia ’na—i te riri i te ino, e te hinaaro i te maitai—e a tutava ’i tatou i te pee i te mau taahiraa tia roa o te Mesia ra o Iesu, e faaore Iehova i ta tatou mau hara. (Amosa 5:15; Petero 1, 2:21) Ia taa ia tatou e e nehenehe tatou e riro ei mea mâ i te hi‘oraa o to tatou Atua mo‘a, mea hohonu te mau faahopearaa. Eiaha ia moe ia outou e, i te omuaraa, ua haamana‘o te mo‘araa o Iehova ia Isaia i to ’na iho mâ ore. Ua tuô oia e: “Auê hoi au nei e!” I te taaraa râ ia ’na e ua faaorehia ta ’na mau hara, ua taui to ’na mana‘o. I to Iehova titauraa i te hoê taata ihotae no te rave i te hoê hopoia, ua pahono oioi Isaia, noa ’tu e aita oia i ite eaha te ohipa e titauhia ra. Ua parau oia e: “Inaha, teie au; o vau ta oe e tono.”—Isaia 6:5-9.

21. Eaha te tumu e tiaturi ai tatou e e nehenehe ta tatou e faahotu i te huru maitai o te mo‘araa?

21 Ua poietehia tatou ia au i te huru o te Atua mo‘a, ma te mau huru maitatai morare e te ravea e taa ’i te mau mea pae varua. (Genese 1:26) Te vai ra te tahi maa mo‘araa i roto ia tatou paatoa. A tamau ai tatou i te faahotu i te mo‘araa, e oaoa Iehova i te tauturu mai. A na reira ’i tatou, e haafatata ’tu â tatou i to tatou Atua mo‘a. Hau atu â, a hi‘opoa ’i tatou i te mau huru maitatai o Iehova i roto i te mau pene i muri nei, e ite mai tatou e mea rahi te mau tumu puai e haafatata ’tu ai ia ’na!

^ par. 18 E tano roa te parau ra “taata vaha viivii,” no te mea e pinepine te vaha i te ravehia i roto i te Bibilia no te faahoho‘a i te parau. I roto i te mau taata tia ore atoa, e nehenehe e parauhia e te hoê tuhaa rahi roa o te mau hara, no te faaohiparaa ïa i te parau.—Maseli 10:19; Iakobo 3:2, 6.