Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 26

Te hoê Atua i “ineine i te faaore i te hara”

Te hoê Atua i “ineine i te faaore i te hara”

1-3. (a) Eaha te hopoia teiaha ta te papai salamo ra o Davida i amo, e mea nafea te itearaa mai ia ’na te tamahanahanaraa no to ’na aau ahoaho? (b) Ia hara tatou, eaha paha te hopoia ta tatou e amo ei faahopearaa, te haamahanahana maira râ Iehova i te aha?

“UA NA nia ta ’u nei mau hara i tau upoo,” o ta te fatu salamo ra ïa o Davida i papai. “Mai te hopoia teiaha e ore e maraa ia ’u ra. Ua paruparu roa vau, ua aao roa.” (Salamo 38:4, 8) Ua ite Davida mai te aha te teiaha te hoê mana‘o haava hara. Ua noaa râ ia ’na te tamahanahanaraa no to ’na aau ahoaho. Ua taa ia ’na e noa ’tu e mea riri na Iehova te hara, eita Oia e riri i te taata hara ia tatarahapa mau oia e ia faarue i to ’na haerea hara. Ma te tiaturi roa ino i te aau tae o Iehova e faatupu i te aroha hamani maitai i nia i te feia tatarahapa, ua parau Davida e: ‘O oe, e Iehova, ua ineine oe i te faaore i te hara.’—Salamo 86:5MN.

2 Ia hara tatou, e amo atoa tatou i te hopoia teiaha o te hoê mana‘o haava mauiui. Mea maitai teie huru aau tatarahapa. E nehenehe te reira e turai ia tatou ia rave i te mau taahiraa e titauhia no te faatitiaifaro i ta tatou mau hape. Mea atâta râ ia hepohepo roa tatou i te hara. E onoono paha to tatou aau faahapa ia tatou iho e eita Iehova e faaore i ta tatou hara, noa ’tu to tatou tatarahapa. Ia “horomii-noa-hia” tatou e te hara, e tamata Satani i te rave e ia faarue tatou, ia mana‘o e e hi‘o mai Iehova ia tatou ei mea faufaa ore, e te tano ore ia tavini ia ’na.—Korinetia 2, 2:5-11.

3 E na reira mau anei Iehova ia hi‘o mai? Eita roa ’tu! Ua riro te faaoreraa hara ei tuhaa o to Iehova aroha rahi. I roto i ta ’na Parau, te haamahanahana maira oia e ia tatarahapa mau tatou ma te aau tae, ua ineine oia i te faaore mai i ta tatou hara. (Maseli 28:13) Ia ore tatou ia mana‘o e eita roa ’tu e noaa ia tatou  te faaoreraa hara a Iehova, e hi‘opoa ana‘e no te aha e e nafea oia e faaore ai i te hara.

No te aha Iehova i ‘ineine ai i te faaore i te hara’

4. Eaha ta Iehova e haamana‘o no nia i to tatou huru, e e nafea te reira e ohipa ’i i nia i te huru e haa ’i oia i nia ia tatou?

4 Ua ite maite Iehova i to tatou mau taotiaraa. “Ua ite hoi oia i to tatou huru; te mana‘o ra oia e, e repo tatou nei,” o ta te Salamo 103:14 ïa e parau ra. Eita e moe ia ’na e ua hamanihia tatou i te repo, e e mau paruparu to tatou ei faahopearaa no te huru tia ore. Te haamana‘o maira te parau e ua ite oia i “to tatou huru” e te faaau ra te Bibilia ia Iehova i te hoê potera e ia tatou i te mau au‘a araea ta ’na i hamani. * (Ieremia 18:2-6) E faaau te Potera Rahi i ta ’na mau haaraa i nia ia tatou ia au i te paruparu o to tatou huru hara e i te huru e farii ai aore ra e ore ai tatou e farii i ta ’na aratairaa.

5. E nafea te buka Roma ia faataa i te tapea puai roa a te hara?

5 Ua taa ia Iehova mai te aha te hara i te mana. Te faataa ra ta ’na Parau i te hara mai te hoê mea puai roa e tapea ra i te taata i to ’na mana pohe. Mai te aha râ te tapea a te hara i te puai? I roto i te buka Roma, te faataa ra te aposetolo Paulo e: “To raro a‘e” tatou “i te hara,” mai te mau faehau e vai ra i raro a‘e i to ratou tomana (Roma 3:9, MN); ua “faatere” te hara i te taata mai te hoê arii (Roma 5:21, MN); te “vai” ra i roto ia tatou (Roma 7:17, 20); e ohipa noa ta ’na “ture” i roto ia tatou, oia mau, te tamata ra i te haavî i to tatou haerea. (Roma 7:23, 25) E tapea puai mau ta te hara i nia i to tatou tino hara!—Roma 7:21, 24.

6, 7. (a) Eaha te mana‘o o Iehova i te feia e imi i to ’na aroha hamani maitai ma te aau tatarahapa? (b) No te aha e ore ai e tia ia tatou ia faaohipa hua i te aroha hamani maitai o te Atua?

6 Ua ite ïa Iehova e eita e noaa ia tatou i te auraro ma te tia roa, noa ’tu te haavare ore o to tatou hinaaro e na reira. Te haamahanahana maira oia ma te here e ia imi tatou i to ’na  aroha hamani maitai ma te aau tatarahapa, e faaore oia i ta tatou hara. Te na ô ra te Salamo 51:17 e: “O ta te Atua tusia hinaaro ra, o te aau paruparu ra ïa; o te aau paruparu ra e te oto ra, e ore roa te Atua e vahavaha i te reira.” Eita roa ’tu Iehova e patoi, aore ra e fariu ê, i te hoê aau e “paruparu ra e te oto ra” i te hopoia teiaha o te hara.

7 O te auraa anei ïa e e nehenehe tatou e faaohipa hua i te aroha hamani maitai o te Atua, a rave ai i to tatou huru hara ei otoheraa no te hara? Eiaha roa ’tu! Aita Iehova i arataihia e te mau huru aau noa. E otia to to ’na aroha hamani maitai. Eita roa ’tu oia e faaore i te hara a te feia e rave i te hara ma te hinaaro tae e te aau ino, e te ore roa ’tu e tatarahapa. (Hebera 10:26) Area râ, ia ite oia i te hoê aau tatarahapa, ua ineine oia i te faaore i te hara. E hi‘o ana‘e i teie nei i te tahi mau parau oraora i faaohipahia i roto i te Bibilia no te faataa i teie tuhaa faahiahia o to Iehova aroha.

Mai te aha te tia roa ia faaore Iehova i te hara?

8. Eaha ta Iehova e rave mau ia faaore oia i ta tatou mau hara, e maoti te reira e tiaturi ai tatou i te aha?

8 Ua parau Davida ma te tatarahapa e: “E maoro a‘era, ua fa‘i atura vau i tau hara ia oe . . . e ua faaore mai oe i te ino o taua hara na ’u ra.” (Salamo 32:5) E huriraa te ta‘o ra “faaore” no te hoê ta‘o Hebera e “haamaraa i nia” aore ra e “hopoi” te auraa. Ua faaohipahia te reira i ǒ nei ei hopoi ê i te “hara.” Ua haamaraa mau ïa Iehova i te mau hara a Davida i nia e ua hopoi ê atu. Aita e feaaraa e ua tamǎrû te reira i te mau huru aau hara ta Davida e amo ra. (Salamo 32:3) E nehenehe atoa tatou e tiaturi roa ino i te Atua o te hopoi ê i te mau hara a te feia e imi i ta ’na faaoreraa hara no to ratou faaroo i te tusia taraehara a Iesu.—Mataio 20:28.

9. Mai te aha te atea ia tatou e tuu ai Iehova i ta tatou mau hara?

9 Ua faaohipa Davida i te tahi atu parau no te faataa i ta Iehova faaoreraa hara: “Mai te hitia o te râ e taa ê i te tooa o te râ ra, o ta ’na ia faataa-ê-raa i ta tatou mau hara ia tatou nei.” (Salamo  103:12) Mai te aha te atea te hitia o te râ i te tooa o te râ? E nehenehe e parauhia e tei te vahi atea roa ’‘e iho â e nehenehe e ferurihia te hitia o te râ i te tooa o te râ; eita roa ’tu na vahi e piti e farerei. Te na ô ra te hoê aivanaa e teie te auraa o taua parau ra, “i te vahi atea roa ’‘e ta tatou e nehenehe e feruri.” Te faaite maira te mau parau faauruahia a Davida e ia faaore Iehova i te hara, e tuu oia i ta tatou mau hara i te vahi atea roa ’‘e ia tatou ta tatou e nehenehe e feruri.

‘Ta outou mau hara ra, e riro ïa mai te hiona i te teatea’

10. Ia faaore Iehova i ta tatou mau hara, no te aha e ore ai e tia ia tatou ia mana‘o e te vai noa ra te tafetafeta o taua mau hara ra i nia ia tatou no te toea o to tatou oraraa?

10 Ua tamata a‘ena anei outou i te faaore i te hoê tafetafeta i nia i te hoê ahu peni maramarama? Peneia‘e e noa ’tu ta outou mau tutavaraa, te ite-noa-hia râ te tafetafeta. A tapao na e nafea Iehova ia faataa i to ’na tiaraa i te faaore i te hara: “Ia uteute roa ta outou mau hara [mai te écarlate] ra, e riro ïa mai te hiona; e ia uraura noa ’tu mai te faaio ra, e riro ïa mai te vavai ra i te teatea.” (Isaia 1:18; MN) Te faataa ra te ta‘o ra  “écarlate” i te hoê û uteute pura maitai. * Te “faaio,” o te hoê ïa o te mau û pa‘o o te mau ahu penihia. (Nahuma 2:3) Eita roa ’tu e matara ia tatou iho te tafetafeta o te hara. E nehenehe râ ta Iehova e rave i te mau hara e au i te écarlate e te faaio e e faauouo atu mai te hiona aore ra te vavai aita i penihia. Ia faaore Iehova i ta tatou mau hara, eiaha tatou ia mana‘o e te vai noa ra te tafetafeta o taua mau hara ra i nia ia tatou no te toea o to tatou oraraa.

11. Eaha te auraa e e faarue Iehova i ta tatou mau hara i muri mai i to ’na tua?

11 I roto i te hoê himene haamaitairaa putapû ta Hezekia i fatu i muri a‘e i to ’na faaoraraahia i te hoê ma‘i pohe, ua parau oia ia Iehova e: “Ua faarue oe i tau mau hara atoa nei i muri mai i to tua ra.” (Isaia 38:17) Te faataahia ra Iehova i ǒ nei e te rave ra i te mau hara a te hoê taata rave hara e tatarahapa ra e te faarue atura i muri mai ia ’Na i te vahi eita Oia e ite atu, eita atoa e haapao faahou atu. Ia au i te hoê buka, e nehenehe e na ôhia taua mana‘o ra e: “Ua faariro oe i [ta ’u mau hara] mai te huru ra e aita i tupu.” E ere anei tera i te mea tamahanahana?

12. E nafea te peropheta Mika ia faaite e ia faaore Iehova i te hara, e tatara Oia i te reira ma te taraire?

12 I roto i te hoê parau fafau no nia i te faaapîraa, ua faaite te peropheta Mika e mea papu ia ’na e e faaore Iehova i te hara a to ’na nunaa e tatarahapa ra: “O vai ïa Atua e au ia oe ra, i te . . . faarueraa ’tu i te hapa a te toea o to ’na kelero? . . . E faarue paatoa oe i ta ratou hara i raro roa i te moana ra.” (Mika 7:18, 19) A feruri na i te auraa o taua mau parau ra no te feia e ora ra i te tau bibilia. Te vai ra anei te hoê noa ’‘e ravea e noaa faahou mai ai te hoê mea i tauehia “i raro roa i te moana”? Te faaite ra ïa te mau parau a Mika e ia faaore Iehova i te hara, e tatara oia i te reira ma te taraire.

13. Eaha te auraa o te mau parau a Iesu ra “E faaore mai i ta matou mau tarahu”?

13 Ua faaohipa Iesu i te taairaa i rotopu i te horoa tarahu e te  aitarahu no te faahoho‘a i ta Iehova faaoreraa hara. Ua faaitoito mai Iesu ia pure e: “E faaore mai i ta matou [mau tarahu].” (Mataio 6:12; MN) Ua faaau ïa Iesu i te mau hara i te mau tarahu. (Luka 11:4) Ia hara tatou, e riro tatou ei “aitarahu” na Iehova. No nia i te auraa o te ihoparau Heleni i hurihia ei “faaore i te hara,” te na ô ra te hoê buka e: “E vaiiho, e faarue, i te hoê tarahu, na roto i te oreraa e titau atu.” E nehenehe e parauhia e, ia faaore Iehova i te hara, e tumâ oia i te tarahu, aita ana‘e to nia noa ïa ia tatou i te vairaa. E nehenehe ïa te feia rave hara o te tatarahapa e haamahanahanahia. Eita roa ’tu Iehova e faaaufau i te hoê tarahu ta ’na i tumâ!—Salamo 32:1, 2.

14. E faahiti te parau ra “ia paraihia ta outou hara” i teihea faahoho‘araa i roto i to outou feruriraa?

14 Te faataa-faahou-hia ra te faaoreraa hara a Iehova i roto i te Ohipa 3:19: “E teie nei, e tatarahapa outou, e e fariu mai, ia paraihia ta outou hara.” E huriraa teie parau hopea nei no te hoê ihoparau Heleni e nehenehe hoi te auraa e riro ei “horoi, . . . tumâ aore ra e faaore.” Ia au i te tahi mau aivanaa, te faahoho‘araa, o to te tumâraa ïa i tei papai-rima-hia. Mea nafea ïa? Te inita i faaohipa-pinepine-hia i te tau tahito, mea hamanihia ïa i te hoê anoiraa arahu, tapau, e te pape. I muri rii noa ’‘e i te papairaa e taua inita ra, i nehenehe na te hoê taata e rave i te hoê rimu rari e e tumâ i te papai. Te vai ra ïa te hoê faahoho‘araa nehenehe i to Iehova aroha hamani maitai. Ia faaore oia i ta tatou mau hara, ua riro mai te huru ra e te rave ra oia i te hoê rimu e tumâ ’tu.

Te hinaaro ra Iehova ia ite tatou e ua ‘ineine oia i te faaore i te hara’

15. Eaha ta Iehova e hinaaro ra ia ite tatou no nia ia ’na?

15 Ia feruri tatou i teie mau faahoho‘araa huru rau, e ere anei i te mea papu e te hinaaro ra Iehova ia ite tatou e ua ineine mau oia i te faaore i ta tatou mau hara mai te peu e te ite ra oia e te tatarahapa mau ra tatou? Eiaha tatou ia mǎta‘u e e faahapa mai oia a muri a‘e no taua mau hara ra. Te faaitehia ra te reira e te tahi atu mea ta te Bibilia e faaite ra no nia i te aroha hamani maitai rahi o Iehova: Ia faaore oia i te hara, e haamoe oia.

 “E ore au e mana‘o faahou i ta ratou hara”

16, 17. Ia parau te Bibilia e e haamoe Iehova i ta tatou mau hara, eaha ïa te auraa, e no te aha outou e na reira ’i i te pahono?

16 Ua fafau Iehova no nia i te feia to roto i te faufaa apî e: “E faaore hoi au i ta ratou hara, e ore au e mana‘o faahou i ta ratou [hara].” (Ieremia 31:34; MN) O te auraa anei ïa e ia faaore Iehova i te hara, eita ta ’na e nehenehe faahou e haamana‘o atu? E ere roa ’tu mai tera. Te faaite maira te Bibilia i te mau hara a te mau taata e rave rahi ta Iehova i faaore, tae noa ’tu ta Davida. (Samuela 2, 11:1-17; 12:13) Papu maitai e te ite noa râ Iehova i te mau hape ta ratou i rave. Ua papaihia te aamu o ta ratou mau hara, e o to ratou atoa tatarahapa e o ta te Atua faaoreraa hara, no to tatou maitai. (Roma 15:4) Eaha ïa te auraa  ia parau te Bibilia e eita Iehova e “mana‘o faahou” i te mau hara ta ’na i faaore?

17 Te ihoparau Hebera i hurihia ei “mana‘o faahou,” e ere noa ïa te haamana‘oraa i te tau ahemo. Te tapao ra te hoê buka (Theological Wordbook of the Old Testament) e e au atoa te reira i “te rave-atoa-raa i te ohipa e tano.” No reira, na roto i teie auraa, e “mana‘o faahou” i te hara, te raveraa ïa i te hoê ohipa i nia i te feia rave hara. (Hosea 9:9) Ia parau râ te Atua e “e ore au e mana‘o faahou i ta ratou [hara],” te haamahanahana maira oia e ia faaorehia te hara a te feia rave hara e tatarahapa ra, eita oia e ohipa i nia ia ratou no taua mau hara ra a muri a‘e. (Ezekiela 18:21, 22) E haamoe ïa Iehova na roto i te auraa e eita oia e haamana‘o noa mai i ta tatou mau hara no te pari aore ra no te faautua mai, na nia iho e na nia iho â. E ere anei i te mea mahanahana ia ite e e faaore te Atua i te hara e e haamoe atu ai?

E te mau faahopearaa?

18. No te aha te faaoreraa hara e ore ai e faatiamâ i te taata rave hara e tatarahapa ra i te mau faahopearaa atoa o to ’na haerea ino?

18 No to Iehova ineineraa i te faaore i te hara, e tiamâ anei te taata rave hara e tatarahapa ra i te mau faahopearaa atoa o to ’na haerea ino? Eita roa ’tu. Eita ta tatou e nehenehe e hara ma te ore e fifihia. Ua papai Paulo e: “O ta te taata e ueue ra, o ta ’na â ïa e ooti mai.” (Galatia 6:7) E faaû tatou i te tahi mau faahopearaa o ta tatou mau ohipa. E ere ïa te auraa e i muri a‘e i to ’na faaoreraa mai i ta tatou hara, e faatupu Iehova i te ati i nia ia tatou. Ia tupu te mau fifi, eiaha te hoê Kerisetiano e mana‘o e, ‘Te faautua maira paha Iehova ia ’u no te tahi hara tahito.’ (Iakobo 1:13) I te tahi a‘e pae, eita Iehova e paruru ia tatou i te mau faahopearaa atoa o ta tatou mau ohipa iino. Te faataaraa, te hapûraa hinaaro-ore-hia, te ma‘i purumu, te ereraa i to vetahi ê tiaturi e i te tura—e mau faahopearaa peapea e te hape ore ana‘e teie mau mea no te hara. A haamana‘o na e i muri a‘e i to ’na faaoreraa i ta Davida mau hara i taaihia ia Bate-seba e ia Uria, aita Iehova i paruru ia Davida i te mau faahopearaa riaria i tupu mai.—Samuela 2, 12:9-12.

19-21. (a) Mea nafea to te ture i papaihia i roto i te Levitiko 6:1-7 riroraa ei mea maitai no te taata ati e te rave hara atoa? (b) Mai te peu e ua haamauiui ta tatou mau hara ia vetahi ê, e oaoa Iehova ia aha tatou?

 19 E faatupu paha ta tatou mau hara i te tahi atu â mau faahopearaa, ia haamauiui iho â râ te reira ia vetahi ê. E rave ana‘e, ei hi‘oraa, i te aamu i roto i te Levitiko pene 6. No nia te Ture a Mose i ǒ nei i te tupuraa i reira te hoê taata e rave ai i te hoê hara ino i te haruraa i te mau tauihaa a te hoê hoa Iseraela na roto i te eiâraa, aore ra te taviriraa. Eita te rave hara e fa‘i i ta ’na hara, eita atoa e mǎta‘u i te tǎpǔ haavare. O te parau ïa a te hoê taata e faaû ra i ta te tahi. I muri a‘e râ, e hauti te mana‘o haava o te rave hara e e fa‘i oia i ta ’na hara. Ia faaorehia ta ’na hara e te Atua, e tia ia ’na ia rave e toru ohipa toe: e faaho‘i i ta ’na i rave, e aufau i te taata ati i te hoê utua e 20 % o te faufaa o te mau mea i eiâhia, e e horoa i te hoê mamoe oni ei tusia no te hara. Na ô atu ai te ture e: “Na te tahu‘a e hopoi i te taraehara na ’na i mua i te aro o Iehova, e e faaorehia ta ’na hara.”—Levitiko 6:1-7.

20 Ua riro taua ture ra ei faanahoraa a te Atua î i te aroha hamani maitai. Mea maitai no te taata ati, e faaho‘ihia hoi ta ’na faufaa e aita e feaaraa, e tamǎrû-rahi-hia oia ia fa‘i te rave hara i ta ’na hara ia maoro a‘e. I taua atoa taime ra, mea maitai te ture no te taata tei turaihia i te pae hopea e to ’na mana‘o haava ia fa‘i i ta ’na hara e ia faatitiaifaro i ta ’na ohipa ino. Oia mau, ia ore oia ia na reira, eita ïa te Atua e faaore i ta ’na hara.

21 Noa ’tu e aita tatou to raro a‘e i te Ture a Mose, e horoa mai taua Ture ra i te haroaroaraa i roto i te feruriraa o Iehova, tae noa ’tu i to ’na mana‘o i te faaoreraa hara. (Kolosa 2:13, 14) Mai te peu e ua haamauiui ta tatou mau hara ia vetahi ê, e oaoa te Atua ia rave tatou i tei maraa ia tatou no te faatitiaifaro i te ino. (Mataio 5:23, 24) E titauhia paha ia fa‘i i ta tatou hara, e ia taparuparu i te taata i harahia. E nehenehe atu ai tatou e tiaoro ia Iehova maoti te tusia o Iesu e e ite i te haapapuraa e ua faaorehia ta tatou hara e te Atua.—Hebera 10:21, 22.

22. Eaha paha te apee i ta Iehova faaoreraa hara?

22 Mai te mau metua î i te here atoa, e apiti paha Iehova i te  a‘oraa i te faaoreraa hara. (Maseli 3:11, 12) E vaiiho paha te hoê Kerisetiano e tatarahapa ra i ta ’na fana‘oraa taa ê ei matahiapo, ei tavini tauturu, aore ra ei poro evanelia taime taatoa. E oto paha oia ia ere oia no te hoê maa taime i te mau fana‘oraa taa ê mea faufaa hoi na ’na. E ere râ te auraa o taua a‘oraa ra e aita Iehova i faaore i ta ’na hara. E tia ia tatou ia haamana‘o e e haapapuraa no to ’na here ia tatou ia a‘o mai Iehova. Mea maitai roa no tatou ia farii atu e ia faaohipa ’tu tatou.—Hebera 12:5-11.

23. No te aha e ore ai e tia ia tatou ia mana‘o e eita roa ’tu e au ia tatou te aroha hamani maitai o Iehova, e no te aha e tia ’i ia tatou ia pee i ta ’na faaoreraa hara?

23 Mea mahanahana mau ia ite e ua “ineine” to tatou Atua “i te faaore i te hara”! Noa ’tu te mau hape ta tatou i rave, eiaha roa ’tu tatou e mana‘o e eita roa ’tu e au ia tatou te aroha hamani maitai o Iehova. Ia tatarahapa mau tatou, ia rave i te mau taahiraa no te faatitiaifaro i te ino, e ia pure ma te haavare ore ia faaorehia mai ta tatou hara maoti te toto o Iesu i maniihia, e nehenehe tatou e tiaturi maite e e faaore mai Iehova i ta tatou hara. (Ioane 1, 1:9) E pee ana‘e i ta ’na faaoreraa hara ia haa tatou te tahi i nia i te tahi. Inaha hoi, mai te peu e e faaore mai Iehova, o te ore hoi e hara, i ta tatou hara, eita anei ta tatou, te taata hara, e nehenehe e tutava i te faaore i ta te tahi hara?

^ par. 4 E faaohipa-atoa-hia te ta‘o Hebera i hurihia ei “to tatou huru” no te mau au‘a araea hamanihia e te hoê potera.—Isaia 29:16.

^ par. 10 Te na ô ra te hoê aivanaa e “e û taraire, aore ra mau roa” te écarlate. “Eita te reira e ore i te hupe, te ûa, te pu‘araa, te faaohipa-maoro-raa.”