Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 29

“Ia ite i te aroha o te Mesia”

“Ia ite i te aroha o te Mesia”

1-3. (a) Eaha tei turai ia Iesu ia hinaaro e riro mai to ’na Metua? (b) E hi‘opoa tatou i teihea mau tuhaa o to Iesu aroha?

UA ITE a‘ena anei outou i te hoê tamaroa iti ia tamata i te riro mai to ’na papa? E pee paha te tamaiti i te huru e haere ai, e paraparau ai, aore ra e haa ’i to ’na papa. Ia maoro a‘e, e farii roa atoa paha te tamaroa ra i te mau faufaa morare e pae varua a to ’na papa. Oia, e turai te here e te umere o te hoê tamaiti no to ’na papa î i te here ia hinaaro oia e riro mai ia ’na.

2 Eaha ïa no nia i te taairaa i rotopu ia Iesu e to ’na Metua i te ra‘i? “Te hinaaro nei au i te Metua,” o ta Iesu ïa i parau i te hoê taime. (Ioane 14:31) Aita iho â e taata e nehenehe e here ia Iehova hau atu i teie Tamaiti tei vai na i to ’na Metua ra mea maoro hou a poietehia ’i te tahi atu mau mea ora atoa. Ua turai taua here ra i teie Tamaiti haapao maitai ia hinaaro e riro mai to ’na Metua.—Ioane 14:9.

3 I roto i te mau pene matamua o teie buka, ua tauaparau tatou mai te aha te tia roa ia pee Iesu i te mana, te parau-tia, e te paari o Iehova. Mea nafea râ to ’na peeraa i te aroha o to ’na Metua? E hi‘opoa ana‘e e toru tuhaa o to Iesu aroha—to ’na varua haapae ia ’na iho, to ’na aumihi î i te here, e to ’na aau tae e faaore i te hara.

“Aita roa e taata aroha rahi atu i tei reira”

4. Mea nafea to Iesu horoaraa i te hi‘oraa rahi roa ’‘e o te aroha haapae ia ’na iho, ei taata?

4 Ua horoa Iesu i te hoê hi‘oraa faahiahia roa o te aroha haapae ia ’na iho. Te haapaeraa ia ’na iho, te tuuraa ïa ma te miimii ore i to vetahi ê mau hinaaro e mau haapeapearaa na mua ’‘e i to tatou iho. Mea nafea to Iesu faaiteraa i taua aroha  ra? Ua faataa oia iho e: “Ia horoa te taata i to ’na iho ora no to ’na ra mau taua, aita roa e taata aroha [rahi] atu i tei reira.” (Ioane 15:13; MN) Ua horoa Iesu i to ’na ora tia roa no tatou ma te aau tae. Ua riro te reira ei faaiteraa aroha rahi roa ’‘e i ravehia a‘enei e te hoê taata. Ua faaite atoa râ Iesu i te aroha haapae ia ’na iho na roto i te tahi atu mau ravea.

5. No te aha te faarueraa i te ra‘i i riro ai ei haapaeraa î i te here a te Tamaiti fanau tahi a te Atua?

5 I to ’na oraraa hou a riro ai ei taata, e tiaraa taa ê e te teitei to te Tamaiti fanau tahi a te Atua i nia i te ra‘i. E taairaa piri roa to ’na e Iehova e te mau muriadi varua ora atoa. Noa ’tu teie mau fana‘oraa ta ’na, “haapae atura” teie Tamaiti here “i to ’na iho, rave atura i to te tavini ra huru, i te fanauraa mai ma te huru o te taata nei.” (Philipi 2:7) Ua haere mai oia e faaea i roto i te taata hara ma te aau tae i roto i te hoê ao e “vai noa nei . . . i raro a‘e i taua varua ino ra.” (Ioane 1, 5:19) E ere anei tera i te haapaeraa î i te here a te Tamaiti a te Atua?

6, 7. (a) Mea nafea to Iesu faaiteraa i te aroha haapae ia ’na iho i te roaraa o ta ’na taviniraa i te fenua nei? (b) Eaha te hi‘oraa haaputapû o te aroha miimii ore e vai ra i roto i te Ioane 19:25-27?

6 I te roaraa o ta ’na taviniraa i te fenua nei, ua faaite Iesu i te aroha haapae ia ’na iho na roto i te mau ravea rau. Mea miimii ore roa oia. No to ’na rave-maite-raa i ta ’na taviniraa i haapae ai oia i te mau fana‘oraa matauhia e te taata. “E ana to te alope, e tauraa to te manu o te reva,” o ta Iesu ïa i parau, “area te Tamaiti a te taata nei aita o ’na tuaroi.” (Mataio 8:20) I te mea e e tamuta aravihi oia, i nehenehe noa na ta Iesu e rave i te tahi maa taime to ’na no te patu i te hoê fare au mau no ’na iho aore ra e hamani i te mau tauihaa fare haviti e e hoo atu e ia noaa mai te tahi maa moni. Aita râ oia i faaohipa i to ’na mau aravihi no te mau mea materia.

7 Te vai ra te hoê hi‘oraa haaputapû mau o to Iesu aroha haapae ia ’na iho i roto i te Ioane 19:25-27. A feruri na i te mau mea e rave rahi ta ’na e haapeapea ra i roto i to ’na feruriraa e to ’na aau i te avatea o te mahana i pohe ai oia. A mauiui ai oia  i nia i te pou, te tapitapi ra oia i ta ’na mau pǐpǐ, te ohipa pororaa, e to ’na iho â râ hapa ore e te faahopearaa o te reira i nia i te i‘oa o to ’na Metua. Oia mau, to nia i to ’na tapono te a muri a‘e o te huitaata atoa! Teie râ, hou rii oia a pohe ai, ua faaite atoa Iesu i te tapitapi i to ’na metua vahine, o Maria, e au ra e e vahine ivi oia i taua taime ra. Ua ani oia i te aposetolo Ioane e haapao ia Maria mai te huru ra e o to ’na iho metua vahine tera, i muri iho, hopoi atura te aposetolo ia Maria i roto i to ’na fare. Ua faanaho ïa Iesu e ia aupuruhia to ’na metua vahine i te pae tino e varua. E faaiteraa î i te here mau tera i te aroha miimii ore!

“Aroha ’tura ia ratou”

8. Eaha te auraa o te ta‘o Heleni ta te Bibilia e faaohipa no te faataa i te aumihi o Iesu?

8 Mai to ’na Metua, e aumihi to Iesu. Te faataa ra te mau Papai ia ’na mai te hoê o te tutava i te tauturu i te feia e hepohepo ra no te mea ua aroha roa oia ia ratou. No te faataa i te aumihi o Iesu, te faaohipa ra te Bibilia i te hoê ta‘o Heleni i hurihia ei “aroha.” Te na ô ra te hoê aivanaa e: ‘E faataa te reira i te hoê huru aau o te haaputapû i te hohonu-roa-raa o to te hoê taata aau. O te ta‘o Heleni puai roa ’‘e tera no te aumihi.’ E rave ana‘e i te tahi mau tupuraa i reira to Iesu putapûraa i te aumihi rahi o tei turai ia ’na ia haa.

9, 10. (a) Na teihea mau huru tupuraa i turai ia Iesu e ta ’na mau aposetolo ia imi i te hoê vahi moemoe? (b) I te haafifiraahia to ’na faaea-moemoe-raa e te hoê nahoa, eaha to Iesu huru, e no te aha?

9 Turaihia ia haapao i te mau hinaaro pae varua. Te faaite ra te aamu i roto i te Mareko 6:30-34 eaha te mea matamua e turai ia Iesu ia aroha. A feruri na i te tupuraa. Ua oaoa roa te mau aposetolo no te mea no oti noa ’tura ia ratou te hoê tere pororaa rahi. Ua ho‘i ratou ia Iesu ra e ua faatia ma te anaanatae i te mau mea atoa ta ratou i ite e i faaroo. Ua putuputu mai râ te hoê nahoa taata rahi, aita ’tura e taime faahou to Iesu e to ta ’na mau aposetolo no te tamaa. Ma te haapao maitai noa iho â, ua itea ia Iesu e ua rohirohi te mau aposetolo. “A haere  mai outou ana‘e iho, tatou i te hoê vahi moemoe e faaea iti noa ’‘e,” o ta ’na ïa i parau atu. Tauma ’tura ratou i nia i te hoê poti, e fano atura i te tahi pae mai o te poro apatoerau o te Miti no Galilea i te hoê vahi moemoe. Ua ite râ te nahoa i to ratou revaraa. Ua faaroo atoa te tahi atu no nia i te reira. Ua horo paatoa a‘era ratou na te pae apatoerau e ua tapae atura i te tahi pae mai na mua ’‘e i te poti!

10 Ua inoino anei Iesu e ua haafifihia to ’na faaea-moemoe-raa? Aita roa ’tu! Ua putapû roa to ’na aau i te hi‘oraa ’tu i teie nahoa, tau tausani hoi te rahiraa, e tiai ra ia ’na. Ua papai Mareko e: “Hi‘o atura oia i taua feia rahi ra, aroha ’tura ia ratou; no te mea mai te nǎnǎ mamoe tiai ore ra ratou; haapii atura oia ia ratou i te parau e rave rahi.” Ua hi‘o Iesu i teie nahoa mai te mau taata e hinaaro pae varua to ratou. Ua riro ratou mai te mau mamoe e faaea ra ma te tauturu ore, ma te tiai ore no te aratai aore ra te paruru ia ratou. Ua ite Iesu e aita te feia au noa i tâu‘ahia e te mau aratai haapaoraa mafatu ore, tei tiaturihia hoi ia riro ei tiai mamoe î i te here. (Ioane 7:47-49) Ua aroha oia i te taata e ua haamata ’tura i te haapii “i te parau o te basileia o te Atua.” (Luka 9:11) A tapao na e ua aroha Iesu i te taata hou a ite ai i to ratou huru i mua i ta ’na e haapii atu. Te auraa ra, e ere ïa te aumihi î i te here i te faahopearaa o ta ’na haapiiraa i te nahoa, o te mea râ e turai ia ’na e na reira.

‘Faatoro atura oia i te rima, faatiaia ’tura ia ’na’

11, 12. (a) Mea nafea te feia lepera ia hi‘ohia i te tau bibilia, ua nafea râ Iesu i to te hoê taata i “ati i te lepera” tapiriraa ’tu ia ’na? (b) Eaha paha te huru o te taata lepera i to Iesu faatiaiaraa ’tu ia ’na, e eaha te hi‘oraa e vai ra i roto i te aamu o te hoê taote?

11 Turaihia ia tamǎrû i te mauiui. Te taa maite ra i te taata e ma‘i huru rau to ratou te aumihi o Iesu, no reira ratou i anaanatae ai ia ’na. Te ite-taa-ê-hia ra te reira i to te hoê taata tei “ati i te lepera” tapiriraa ’tu ia Iesu o te apeehia ra e te mau nahoa. (Luka 5:12) I te tau bibilia, i tuuhia na te feia lepera i rapae au mai i te puhapa no te paruru i te toea eiaha ia peehia i te ma‘i. (Numera 5:1-4) Ia maoro a‘e râ, ua atuatu te mau aratai e rabi i te mana‘o ino i te lepera e ua faahepo e ia fariihia  ta ratou iho mau ture rii teimaha. * A tapao na râ ua nafea Iesu i mua i te taata lepera: “Ua haere maira te hoê lepera ia ’na ra, tuu maira i te turi i raro i mua ia ’na, ma te parau maitai mai ia ’na, na ô maira, Ia tia ia oe ra, e mâ vau ia oe. Aroha a‘era Iesu ia ’na, faatoro atura i te rima, faatiaia ’tura ia ’na, na ô atura, Ua tia ïa ia ’u, ia mâ oe. E tei te parauraa ’tu oia ra, pee atura te lepera o taua taata i reira ra.” (Mareko 1:40-42) Ua ite Iesu e aita i au i te ture to te taata lepera tiaraa mai i roto i te taata. Aita râ oia i tiahi atu ia ’na, no te mea râ e ua aroha roa oia, ua rave oia i te hoê mea eita e mana‘ohia. Ua faatiaia ’tu Iesu ia ’na!

12 E nehenehe anei ta outou e feruri eaha te auraa o taua faatiaiaraa ra no te taata lepera ra? Ei hi‘oraa, e rave ana‘e i te hoê aamu. Te faatia ra o Paul Brand, taote taa ê no te lepera, no nia i te hoê taata lepera ta ’na i rapaau i Inidia. I te taime hi‘opoaraa, ua tuu te taote i to ’na rima i nia i te tapono o te taata lepera ra e ua faataa, na roto i te arai o te hoê huri parau, i te rapaauraa ta te taata ra e tia ia faatere. Ta‘i taue atura te taata lepera. “Ua parau anei au i te hoê parau hape?” o ta te taote ïa i ui. Ua ui te huri parau i te taurearea na roto i to ’na reo e pahono maira e: “Aita, taote. Te parau ra oia e te ta‘i ra oia no te mea ua tauahi oe ia ’na. Hou oia a haere mai ai i ǒ nei, aita e taata i tapea ia ’na e rave rahi matahiti i te maoro.” No te taata lepera i tapiri atu ia Iesu, e auraa rahi atu â to to ’na faatiaiaraahia. I muri a‘e i te reira, ua ore roa te ma‘i tei faariro na ia ’na ei taata tiavaruhia!

13, 14. (a) Eaha te haereraa ta Iesu i farerei i to ’na piriraa mai i te oire o Naina, e no te aha te reira i riro ai ei tupuraa peapea mau? (b) Ua turai te aumihi o Iesu ia ’na ia rave i teihea ohipa no te vahine ivi no Naina?

 13 Turaihia ia faaore i te oto. Mea aroha roa na Iesu ia oto vetahi ê. E rave ana‘e, ei hi‘oraa, i te aamu i roto i te Luka 7:11-15. Ua tupu te reira i to Iesu taeraa mai i te vahi e haaati ra i te oire o Naina, i Galilea, fatata i ropu i ta ’na taviniraa. A piri mai ai oia i te uputa o te oire, ua farerei oia i te taata e haere ra e huna i te hoê ma‘i. Mea peapea mau te mau huru tupuraa. Ua pohe te hoê taurearea fanau tahi, e e vahine ivi te metua vahine. I te hoê taime na mua ’tu, ua haere a‘ena mau oia i te hoê hunaraa ma‘i mai tera—to ta ’na ïa tane. I teie taime, o to ta ’na ïa tamaiti, o oia ana‘e paha tei aupuru na ia ’na. I roto i te nahoa e apee ra ia ’na, te vai ra paha te feia oto hau e himene ra i te mau himene otoraa e te feia e faata‘i ra i te upaupa otoraa. (Ieremia 9:17, 18; Mataio 9:23) Ua hi‘o tamau râ Iesu i te metua vahine e oto ra, e e haere ra ma te feaa ore na pihai iho i te iri hopoiraa i te tino o ta ’na tamaiti.

14 Ua “aroha” roa Iesu i te metua vahine e oto ra. Ma te reo haamahanahana, ua parau atu oia e: “Eiaha e oto.” Ma te ore e titauhia, ua tapiri atu oia e ua tapea ’tu i te iri hopoiraa. Faaea ihora te feia hopoi—e peneia‘e te toea o te nahoa. Ma te reo mana, ua parau atu Iesu i te tino pohe e: “E teie nei taata apî, a tia, te parau atu nei au ia oe.” Eaha tei tupu i muri a‘e? “Ua tia maira taua taata i pohe ra i nia, e ua parau maira” mai te huru ra e ua faaarahia oia mai te hoê taotoraa maitai roa ra! Parauhia ’tu ai te hoê parau haaputapû roa: “Ua tuu atura Iesu ia ’na i te metua vahine ra.”

15. (a) Te faaite ra te mau aamu bibilia no nia i to Iesu aroharaa i te taata, i teihea taairaa i rotopu i te aumihi e te ohipa? (b) E nafea tatou ia pee ia Iesu i te reira paeau?

15 Eaha ta tatou e haapii maira na roto i teie mau aamu? I roto i te tupuraa taitahi, a tapao na i te taairaa i rotopu i te aumihi e te ohipa. Aita ta Iesu i nehenehe e hi‘o i to vetahi ê hepohepo ma te ore e aroha ’tu, e aita ta ’na i nehenehe e aroha ’tu ma te ore e rave i te hoê mea. E nafea tatou ia pee i to  ’na hi‘oraa? Ei Kerisetiano, e hopoia na tatou te pororaa i te parau apî maitai e te faariroraa i te taata ei pǐpǐ. Na mua roa, na te here i te Atua e turai ia tatou. Ia haamana‘o râ tatou e e titau atoa taua ohipa ra i te aumihi. Mai te peu e e aumauiui to tatou i te taata mai ia Iesu, e turai to tatou mafatu ia tatou ia rave i te mau mea atoa e maraa ia tatou no te faaite atu i te parau apî maitai. (Mataio 22:37-39) E te faaiteraa i te aumihi i nia i te mau hoa faaroo e mauiui ra aore ra e oto ra? Eita e tia ia tatou ia faaora semeio i te ma‘i pae tino aore ra ia faatia i tei pohe. E nehenehe râ ta tatou e faaite i te aumihi na roto i te mataraa i te faahiti i to tatou haapeapearaa aore ra e pûpû i te tauturu e hinaaro-mau-hia.—Ephesia 4:32.

“E tau Metua, e faaore mai i ta ratou hara”

16. E nafea e ite-maitai-hia ’i te aau tae o Iesu e faaore i te hara tae noa ’tu i to ’na rîraahia i nia i te pou haamauiuiraa?

16 Ua pee Iesu i te aroha o to ’na Metua ma te tia roa na roto i te tahi atu ravea faufaa—ua “ineine” oia “i te faaore i te hara.” (Salamo 86:5, MN) Ua ite-maitai-hia teie aau tae to ’na tae noa ’tu i to ’na rîraahia i nia i te pou haamauiuiraa. I to ’na faaheporaahia e faaruru atu i te pohe haama, ma te mau naero e haamauiui ra i to ’na rima e to ’na avae, eaha ta Iesu i parau? Ua tiaoro anei oia ia Iehova e faautua mai i te feia e haapohe ia ’na? Aita roa ’tu, i roto i te mau parau hopea a Iesu, ua na ô oia e: “E tau Metua, e faaore mai i ta ratou hara, aore hoi ratou i ite i ta ratou e rave nei.”—Luka 23:34. *

17-19. Mea nafea to Iesu faaiteraa e ua faaore oia i ta te aposetolo Petero hara oia hoi te hunaraa ia ’Na e toru taime?

17 Peneia‘e te hoê hi‘oraa haaputapû atu â o to Iesu aau tae e  faaore i te hara, o te huru ïa i haa ’i oia i nia i te aposetolo Petero. Aita e feaaraa e mea here roa na Petero o Iesu. I te 14 no Nisana, i te po hopea o to Iesu oraraa, ua parau atu Petero e: “E te Fatu, ua tia ia ’u te pee ia oe e ia tapea-atoa-hia vau, e ia pohe atoa ’tu.” Teie râ, tau hora noa i muri a‘e, ua huna Petero e toru taime e ua ite oia ia Iesu! Te faaite maira te Bibilia eaha tei tupu a faahiti ai Petero i te toru o te hunaraa: “Ua fariu maira te Fatu, hi‘o maira ia Petero.” Ma te neneihia e te rahi o ta ’na hara, “haere atura Petero i rapae, mauiui roa a‘era i te oto rahi.” I to Iesu poheraa i taua mahana ra, ua uiui paha te aposetolo e, ‘Ua faaore anei ta ’u Fatu i ta ’u hara?’—Luka 22:33, 61, 62.

18 Aita Petero i titauhia ia tiai maoro i te pahonoraa. Ua faatiahia mai Iesu i te poipoi 16 no Nisana, e e au ra e i taua iho mahana ra, ua haere oia e hi‘o ia Petero. (Luka 24:34; Korinetia 1, 15:4-8) No te aha Iesu i haapao taa ê atu ai i te aposetolo tei huna hoi ia ’Na ma te etaeta? Ua hinaaro paha Iesu e haamahanahana ia Petero o te tatarahapa ra e te here noa râ e te haafaufaa noa râ to ’na Fatu ia ’na. Aita râ Iesu i haamahanahana noa ia Petero.

19 I muri rii a‘e, ua fa ’tu Iesu i mua i te mau pǐpǐ i te Miti no Galilea ra. I taua taime ra, e toru taime to Iesu uiraa ia Petero (tei huna e toru taime i to ’na Fatu) no nia i to Petero here ia ’na. I muri a‘e i te toru o te taime, ua pahono Petero e: “E te Fatu, aore roa e mea toe i te itea ia oe, ua ite oe e, te hinaaro atu nei au ia oe.” Oia mau, ua ite Iesu eaha to roto i te mau mafatu, ua ite maite ïa oia e mea here na Petero o ’na. Teie râ, te horoa ra Iesu i te ravea e haapapu ai Petero i to ’na here. Hau atu â, ua faaue oia ia Petero e “faaamu” e e “tiai” i ta ’Na “mau mamoe.” (Ioane 21:15-17) Na mua ’tu, ua noaa ia Petero te hopoia e poro. (Luka 5:10) I teie nei râ, na roto i te hoê faaiteraa faahiahia i te tiaturi, te horoa ’tura Iesu i te tahi atu hopoia teimaha—e haapao i te feia e riro mai ei pǐpǐ a te Mesia. Ia maoro rii a‘e, ua horoa oia i te hoê tuhaa rahi i roto i te ohipa a te mau pǐpǐ na Petero. (Ohipa 2:1-41) Eaha râ paha Petero i  te tamǎrûhia i te iteraa e ua faaore Iesu i ta ’na hara e te tiaturi noa râ oia ia ’na!

Ua “ite” anei outou “i te aroha o te Mesia”?

20, 21. E nafea tatou “ia ite” maite “i te aroha o te Mesia”?

20 Oia mau, te faataa ra te Parau a Iehova i te aroha o te Mesia ma te haviti mau. E nafea râ tatou ia pahono i to Iesu aroha, e tia ’i? Te faaitoito maira te Bibilia “ia ite i te aroha o te Mesia, o te ore roa e taea i te ite ra.” (Ephesia 3:19) Mai ta tatou i ite mai, te haapii rahi maira te aamu o te oraraa e te taviniraa a Iesu i roto i te mau Evanelia, no nia i te aroha o te Mesia. Teie râ, “ia ite” maite “i te aroha o te Mesia,” e titauhia hau atu i te haapiiraa eaha ta te Bibilia e parau ra no nia ia ’na.

21 Te auraa o te ta‘o Heleni i hurihia ei “ite,” e ite ïa “na roto i te faaohiparaa, na roto i te tamataraa.” Ia faaite tatou i te aroha mai ia Iesu—na roto i te horoaraa ia tatou iho no te tauturu ia vetahi ê ma te miimii ore, te haapaoraa i to ratou mau hinaaro ma te aumihi, te faaoreraa i ta ratou hara ma to tatou aau atoa—i reira e taa maitai ai ia tatou to ’na mau huru aau. E na reira, na roto i te tamataraa tatou ‘e ite ai i te aroha o te Mesia, o te ore roa e taea i te ite ra.’ E eiaha roa ’tu ia moe ia tatou e ia rahi noa ’tu tatou i te riro mai te Mesia, e fatata noa ’tu â tatou i ta Iesu i pee ma te tia roa, to tatou Atua î i te here o Iehova.

^ par. 11 Te na ô ra te mau ture rii a te mau rabi eiaha te taata e tapiri atu i te hoê taata lepera i raro mai i te maha kubiti (1,8 metera mai tera). Ia puihau mai râ te mata‘i, e tia ia faaatea mai i te taata lepera 100 a‘e kubiti (45 metera). Te faatia ra te hoê buka (Midrash Rabbah) no nia i te hoê rabi tei tapuni na i mua i te feia lepera e te tahi atu tei taue na i te ofai i nia i te feia lepera no te faaatea ia ratou. Ua ite ïa te feia lepera i te mauiui ia patoihia ratou, e te huru aau ia vahavahahia e ia ore ratou e hinaarohia.

^ par. 16 Aita te tuhaa matamua o te Luka 23:34 i roto i te tahi mau papai tahito. No te mea râ e te vai ra taua mau parau ra i roto i te tahi atu mau papai mana e rave rahi, ua tuuhia te reira i roto i te Traduction du monde nouveau e i te tahi atu mau huriraa e rave rahi. Papu mau e te parau ra Iesu no te mau faehau Roma tei patǐtǐ ia ’na i nia i te pou. Aita ratou i ite eaha ta ratou e rave ra, no to ratou ite ore o vai mau na Iesu. O te mau aratai haapaoraa iho â tei opua i taua haapoheraa ra te mea hara roa ’‘e, ua haa hoi ratou ma te ite maite e te ino mau. No te rahiraa o ratou, aita roa ’tu i tia te faaoreraa hara.—Ioane 11:45-53.

No te ite atu â

E nafea ia faaite noa i te mana‘o haapae?

Te vai ra te hoê enemi o te haafifi ra ia tatou ia faaite i te mana‘o haapae. Te faataa ra teie tumu parau o vai tera enemi e e nafea ia faaohipa i te Bibilia ei tauturu no te aro atu.