Eaha to roto?

Mau faaho'iraa ê

Tapura tumu parau

Ite no Iehova

Tahiti

E haafatata ’tu ia Iehova

 PENE 27

“I te rahi hoi o to ’na maitai e!”

“I te rahi hoi o to ’na maitai e!”

1, 2. E taea roa i te maitai o te Atua teihea mau mea, e mai te aha te aau tae ia faahiti te Bibilia i teie huru?

MA TE tara‘i i te maramarama mahanahana o te toparaa mahana, te fana‘o ra te tahi mau hoa matuatua i te hoê tamaaraa i rapaeau, te ata ra e te paraparau ra a umere ai i te fenua. I te atea roa, te hi‘o ra te hoê taata i ta ’na mau faaapu e te ataata ra no te mauruuru no te mea te haapouri ra e te topa ra te mau topata ûa matamua i nia i ta ’na maa i tanu. I te tahi atu vahi, te oaoa roa ra te hoê tane e ta ’na vahine i te ite atu i to raua aiû e rave ra i to ’na mau taahiraa avae matamua papu ore.

2 Ua ite anei ratou aore ra aita, te fana‘o ra taua mau taata ra i te hoê â mea—te maitai o te Atua ra o Iehova. E faahiti pinepine te tahi mau taata e haapaoraa ta ratou i te parau ra “Mea maitai te Atua.” Mea aau tae roa ’tu â te parau i roto i te Bibilia. Te na ô ra e: “I te rahi hoi o to ’na maitai e!” (Zekaria 9:17) E au ra râ e aita i rahi i teie tau o te ite mau eaha te auraa o taua mau parau ra. Eaha mau na tei taaihia i te maitai o te Atua ra o Iehova, e e nafea teie huru o te Atua e ohipa ’i i nia ia tatou taitahi?

Te hoê paeau faahiahia roa o te aroha o te Atua

3, 4. Eaha te maitai, e no te aha mea au a‘e ai ia faataahia te maitai o Iehova mai te hoê faaiteraa i to ’na aroha?

3 I roto i te mau reo e rave rahi no teie tau, e ta‘o au noa te ta‘o ra “maitai.” Ia au râ i ta te Bibilia e faaite ra, e ere roa ’tu te maitai i te mea au noa. Na mua roa, e au te reira i te maitai-roa-raa morare. E nehenehe ïa e parauhia e ua î Iehova i te maitai. Mea maitai roa ino to ’na mau ateriputi atoa—tae noa ’tu to ’na puai, ta ’na parau-tia, e to ’na paari. Teie râ, mea au a‘e ia faataahia te maitai mai te hoê faaiteraa i to Iehova aroha. No te aha?

 4 Te maitai, o te hoê ïa huru e faaite-tamau-hia na roto i te ohipa. Ua faaite te aposetolo Paulo e, i roto i te taata, mea anaanatae a‘e te maitai i te parau-tia. (Roma 5:7) E nehenehe e tiaturihia e e haapao maitai iho â te taata parau-tia i te mau titauraa a te ture, e hau atu â râ ta te taata maitai e rave. E mata oia i te imi ma te itoito i te ravea e maitai ai vetahi ê. Mai ta tatou e ite mai, mea maitai mau â Iehova na roto i taua auraa ra. Papu roa, no roto mai taua maitai ra i te aroha otia ore o Iehova.

5-7. No te aha Iesu i patoi ai ia parauhia oia “te orometua maitai ra,” e eaha ïa te parau mau hohonu ta ’na i haapapu?

5 Mea otahi atoa Iehova i roto i to ’na maitai. Aita i maoro hou Iesu a pohe ai, ua haere mai te hoê taata e ui i te hoê uiraa ia ’na ma te parau atu e “te orometua maitai ra.” Ua pahono atu Iesu e: “Eaha oe i haamaitai mai ai ia ’u? o te Atua ana‘e ra te maitai.” (Mareko 10:17, 18) Te maere roa ra paha outou i taua pahonoraa ra. No te aha hoi Iesu i faatitiaifaro ai i te taata ra? E ere mau anei Iesu i te hoê “orometua maitai”?

6 Papu maitai, te faaohipa ra te taata ra i te mau ta‘o ra “orometua maitai” mai te hoê i‘oa toroa e ma te vahavai. Ua faaho‘i Iesu ma te aau faahaihai i taua hanahana ra i nia i to ’na Metua i te ra‘i o te maitai na roto i te auraa rahi roa ’‘e. (Maseli 11:2) Te haapapu atoa ra râ Iesu i te hoê parau mau hohonu. O Iehova ana‘e te ture aveia no te mea maitai. To ’na ana‘e te tiaraa rahi roa ’‘e e faataa eaha te mea maitai e eaha te mea ino. Ua tamata Adamu e o Eva, na roto i te orureraa i te hau e te raveraa i to te raau e ite ai i te maitai e te ino, i te faaohipa raua iho i taua tiaraa ra. Eiaha mai ia raua, ua vaiiho Iesu ma te haehaa e na to ’na Metua e haamau i te mau ture aveia.

7 Hau atu â, ua ite Iesu e o Iehova te tumu o te mau mea maitai mau atoa. O oia Tei horoa i “te mau mea maitatai i ho-mai-hia mai, e te mau mea tia roa e maitai roa ’i.” (Iakobo 1:17) E hi‘o ana‘e e nafea te maitai o Iehova e ite-maitai-hia ’i i roto i to ’na horoa rahi.

 Haapapuraa i te maitai rahi roa o Iehova

8. Mea nafea to Iehova faaiteraa i te maitai i nia i te huitaata atoa?

8 Ua fana‘o iho â te taata atoa i ora a‘enei i te maitai o Iehova. Te na ô ra te Salamo 145:9 e: “Hamani maitai to Iehova i te taata atoa.” Eaha te tahi mau hi‘oraa o to ’na maitai tia roa? Te na ô ra te Bibilia e: “Aita râ oia i ere i te faaite ia ’na iho, oia i hamani maitai mai, e te horoaraa mai i te ûa no nia i te ra‘i ra, e te anotau auhune, e te faaîraa mai i to tatou aau i te maa e te oaoa.” (Ohipa 14:17) Ua oaoa a‘ena roa anei outou i te hoê tamaaraa au mau? Ahiri Iehova aita i opua i teie fenua e to ’na pape toetoe o te faaapî tamau noa e to ’na mau “anotau auhune” e ia horoa mai i te maa rahi roa, aita ïa e tamaaraa. Aita Iehova i faatae i taua maitai ra i nia noa i te feia e here ra ia ’na, i nia râ i te taata atoa. Ua parau Iesu e: “Te faahiti  nei hoi oia i to ’na mahana i nia i te ino e te maitai, e te haamairi mai nei oia i te ûa i nia i te parau-tia e te parau-tia ore.”—Mataio 5:45.

‘Te horoa maira Iehova i te ûa no nia i te ra‘i ra, e te anotau auhune no outou’

9. E nafea te apara ia faahoho‘a i te maitai o Iehova?

9 Mea rahi o te oioi roa i te haafaufaa ore i te puea faahiahia roa ’‘e i horoa-rahi-hia na te huitaata no te ohipa tamau a te mahana, te ûa, e te anotau auhune. Ei hi‘oraa, e rave ana‘e i te apara. Na te mau tuhaa fenua anuvera faito au noa o te ao nei, e hotu haere noa teie maa. Mea nehenehe râ, mea au ia amu, e te î i te pape haumârû e te mea maitatai. Ua ite anei outou e na te ao atoa nei, te vai ra fatata e 7 500 huru apara,  mai te uteute e tae atu i te û o te auro, i te rearea, i te matie, e mai te hoê taporo i te rahi e tae atu i te faito o te hoê anani papaa? Ia rave outou i te hoê huero apara i roto i to outou rima, e hi‘oraa faufaa ore roa. No roto mai râ i te reira e tupu mai ai hoê o te mau raau haviti roa ’‘e. (Sire a Solomona 2:3) I te mau tau uaaraa tiare atoa, e hei tiare hope i te haviti to nia i te tumu apara; i te mau tau auhune atoa e hotu mai te maa. I te matahiti hoê—e ia taea noa ’tu e 75 matahiti i te maoro—e horoa mai te hoê tumu apara au noa i te maa e ia î noa ’tu e 20 afata 19 kilo hoê!

No roto mai i teie huero nainai roa e tupu mai ai te hoê tumu raau o te nehenehe e faatamaa e e faaoaoa i te taata e rave rahi matahiti i te maoro

10, 11. E nafea te mau tumu ite e faaite ai i te maitai o te Atua?

10 I roto i to ’na maitai hope, ua horoa mai Iehova i te hoê tino mea ‘taa ê hoi te hamaniraahia,’ ma te mau tumu ite o te tauturu mai ia haroaroa i ta ’na mau ohipa e te oaoa ’tu. (Salamo 139:14) A feruri faahou na i te mau tupuraa i faataahia i te omuaraa o teie pene. Eaha te mau mea ta te mata e ite o te faatupu i te oaoa i taua mau taime ra? Na paparia mauteute o te hoê tamarii oaoa. Te ûa e topa ra i nia i te mau faaapu. Te mau û uteute, auro, e vareau o te hoê toparaa mahana. Ua hamanihia te mata taata e ia ite e 300 000 û taa ê! E e haru mai to tatou tumu ite o te faarooraa i te mau ta‘i huru rau o te hoê reo here-rahi-hia, te muhumuhu o te mata‘i na roto i te mau raau, te ata oaoa roa o te hoê aiû iti. No te aha tatou e oaoa ’i i taua mau mea ra ta te mata e ite e taua mau ta‘i ra? Te na ô ra te Bibilia e: “Te tari‘a e faaroo ra, e te mata e hi‘o ra, na Iehova atoa ïa i hamani.” (Maseli 20:12) E piti noa râ tera o te mau tumu ite.

11 O te tumu ite o te hau‘a te tahi atu haapapuraa o te maitai o Iehova. E nehenehe ta te ihu taata e faataa fatata 10 000 hau‘a rau. A feruri na i te tahi noa ’‘e: ta outou maa tunu au roa ’‘e, te mau tiare, te mau rauere i topa, te maa auauahi rii o te hoê auahi mahanahana. E maoti to outou tumu ite o te fafaraa e nehenehe ai outou e ite i te mata‘i mǎrû i nia i to outou mata, te tauahi haamahanahana o te hoê taata here, te mǎrû au mau o te hoê tâpû maa hotu i roto i to outou rima.  Ia amu atu outou, i reira to outou tumu ite o te taota e ohipa ’i. E anaanatae roa outou i te mau taota huru rau a taa ’i i to outou mau puupuu o te taota i te mau mea rii i faatupuhia e te huru hamaniraa taa ê o te hotu ra. Oia, e tumu iho â e parau ai tatou no nia ia Iehova e: “I te rahi hoi o te mau mea maitatai na oe, i tei vaiihohia e oe no te feia i mǎta‘u ia oe ra!” (Salamo 31:19) Mea nafea râ to Iehova ‘vaiihoraa’ i te maitai no te feia e mǎta‘u ra ia ’na?

Te maitai o te horoa mai i te mau haamaitairaa mure ore

12. Teihea mau faanahoraa a Iehova e mea faufaa roa ’‘e, e no te aha?

12 Ua parau Iesu e: “Ua papaihia, E ore te taata e ora i te maa ana‘e ra, i te mau mea atoa râ i [parauhia] e te Atua.” (Mataio 4:4; MN) Oia mau, e nehenehe ta te mau faanahoraa pae varua a Iehova e haamaitai hau atu â ia tatou i te mau faanahoraa pae tino, e aratai hoi te reira i te ora mure ore ra. I roto i te pene 8 o teie buka, ua tapao tatou e ua faaohipa Iehova i to ’na mana faaapî i teie nei anotau hopea no te faatupu i te hoê paradaiso pae varua. Te hoê huru faahiahia o taua paradaiso ra, o te rahi ïa o te maa varua.

13, 14. (a) Eaha ta te peropheta Ezekiela i ite orama, eaha ïa te auraa no tatou i teie tau? (b) Eaha te mau faanahoraa pae varua no te ora ta Iehova e rave no ta ’na mau tavini haapao maitai?

13 I roto i te hoê o te mau parau tohu bibilia rahi no nia i te faaapîraa, ua faataehia te hoê orama no nia i te hiero i faaapîhia e i faahanahanahia i te peropheta Ezekiela ra. Mai roto i taua hiero ra, te tahe maira te hoê anavai iti o te aano noa ’tu e te hohonu noa ’tu e ia riro roa mai ei “pape tei tataipiti i te rahi.” I te mau vahi atoa i tahe ai taua anavai ra, ua hopoi atu ïa i te mau haamaitairaa. I na hiti anavai, ua ruperupe te mau tumu raau tei horoa i te maa e te faaoraraa. E ua faaora atoa te anavai i te Miti Pohe avaava aita e ora to roto e ua ruperupe faahou mai te reira! (Ezekiela 47:1-12, MN) Eaha râ te auraa o te reira mau mea atoa?

14 Te faaite ra te orama e e faaapî Iehova i ta ’na faanahoraa  no te haamoriraa viivii ore tei faahoho‘ahia e te hiero ta Ezekiela i ite. Mai taua anavai o te orama ra, e tahe rahi atu â te mau faanahoraa a te Atua no te ora i nia i to ’na nunaa. Mai te faaapîraa mai o te haamoriraa viivii ore i te matahiti 1919 ra, ua horoa rahi mai Iehova i te mau ô no te ora i to ’na nunaa. Mea nafea? Ua tauturu ana‘e te mau Bibilia, te mau papai niuhia i nia i te Bibilia, te mau putuputuraa, e te mau tairururaa, i te hopoi i te mau parau mau ora na te mau mirioni taata. Na roto i taua mau ravea ra, ua haapii Iehova i te taata no nia i te faanahoraa faufaa roa ’‘e no te ora—te tusia taraehara o te Mesia o te horoa mai i te hoê tiaraa mâ i mua ia Iehova e te tiaturiraa o te ora mure ore i te feia atoa e here mau e e mǎta‘u mau i te Atua. * No reira, i te roaraa o teie anotau hopea, a mauiui ai teie nei ao i te o‘e pae varua, ua tamaa maitai te nunaa o Iehova i te pae varua.—Isaia 65:13.

15. Na roto i teihea auraa e tahe ai te maitai o Iehova i nia i te huitaata haapao maitai i te roaraa o te Faatereraa tausani matahiti a te Mesia?

15 Eita râ te anavai o te orama a Ezekiela e faaea i te tahe ia hope teie faanahoraa tahito o te mau mea. Area râ, e tahe rahi atu â i te roaraa o te Faatereraa tausani matahiti a te Mesia. I reira, na roto i te Basileia o te Mesia, e faaohipa Iehova i te faufaa hope o te tusia o Iesu, a aratai riirii ai i te huitaata haapao maitai i te tia-roa-raa ra. Auê ïa tatou i te re‘are‘a i te maitai o Iehova e!

Te tahi atu â mau tuhaa o te maitai o Iehova

16. E nafea te Bibilia ia faaite e e au te maitai o Iehova i te tahi atu mau huru maitatai, e eaha te tahi o te reira?

16 Aita noa te maitai o Iehova i taaihia i te horoa rahi. Ua parau te Atua ia Mose e: “E tuu vau i te maitai atoa na ’u ra na mua ia oe, e faaite au i te i‘oa ra o Iehova na mua ia oe.” I muri a‘e, te na ô ra te faatiaraa e: “Ua haere ihora Iehova na  mua ia ’na, ua parau maira, O Iehova, o Iehova, e Atua aroha [hamani maitai] noa, e te [aau maitai], e te faaoromai rahi, e te [î i te aau aroha], e te parau mau.” (Exodo 33:19; 34:6; MN) E au ïa te maitai o Iehova i te mau huru maitatai e rave rahi. E hi‘o noa ana‘e e piti o te reira.

17. Eaha te aau maitai, e mea nafea to Iehova faaiteraa i te reira i nia i te taata haihai tia ore?

17 “Te aau maitai.” Te faaite rahi maira teie huru no nia i te ravea e haa ’i Iehova i nia i ta ’na mau mea ora i poietehia. E ere oia i te mea iria, te mea toetoe, aore ra te mea haavî, e pinepine hoi e parau mau te reira no te feia mana, mea mǎrû râ Iehova e te maitai. Ei hi‘oraa, ua parau Iehova ia Aberama e: “A nânâ na i to mata i nia, i tena vahi ta oe e parahi na, a hi‘o i te pae i apatoerau, e te pae i apatoa, e te pae i te hitia o te râ, e te pae i te tooa o te râ.” (Genese 13:14) Mea rahi huriraa o te faaore i te ta‘o ra “na.” Te tapao ra râ te tahi mau aivanaa Bibilia e te vai ra te hoê ta‘o iti i roto i te parau Hebera tumu o te faariro i te faaueraa ei titauraa faatura. Te vai ra te tahi atu â mau hi‘oraa mai tera. (Genese 31:12; Ezekiela 8:5) A feruri na, ua faahiti roa te Arii o te ao taatoa i te ta‘o ra “na” i nia i te taata haihai! I roto i te hoê ao mea matauhia te parau etaeta, te huru faahepo e te iria, e ere anei i te mea haumârû ia feruriruri atu i te aau maitai o to tatou Atua o Iehova?

18. Na roto i teihea auraa e “î” ai Iehova “i te parau mau,” e no te aha taua mau parau ra e haamahanahana ’i?

18 “Î i te . . . parau mau.” Ua riro te haerea tia ore ei peu matau na te ao i teie tau. Te haamana‘o maira râ te Bibilia e: “E ere te Atua i te taata, a haavare mai ai oia.” (Numera 23:19) Oia mau, te na ô ra te Tito 1:2 e ‘e ore e tia i te Atua ia haavare.’ Mea maitai roa oia e na reira ’i. No reira, e nehenehe e tiaturi roa ino i te mau parau fafau a Iehova; e e papu roa iho â ta ’na mau parau i te tupu. E parau-atoa-hia Iehova “te Atua parau mau.” (Salamo 31:5) Eita noa oia e tapea i te parau i te haavare, e horoa atoa râ oia i te parau mau e rave rahi. E ere oia i te mea tapunipuni, te mea pipiri i te ite, aore ra i te mea huna i te parau; area râ, e haamaramarama rahi oia i ta ’na mau  tavini haapao maitai maoti to ’na paari otia ore. * E haapii atoa oia ia ratou e nafea ia ora ia au i te mau parau mau ta ’na e horoa e ia ‘tamau noa ratou i te haapao i te parau mau.’ (Ioane 3, 3) Ia nafea te maitai o Iehova ia ohipa i nia ia tatou taitahi?

‘Ia anaana te mata i te maitai o Iehova’

19, 20. (a) Mea nafea to Satani tutavaraa i te faaore i te tiaturi o Eva i te maitai o Iehova, e eaha te faahopearaa? (b) Ia nafea te maitai o Iehova ia ohipa i nia ia tatou e tano ai, e no te aha?

19 I to Satani faahemaraa ia Eva i roto i te ô i Edene, ua haamata oia na roto i te faaore-mǎrû-raa i to ’na tiaturi i te maitai o Iehova. Ua parau Iehova ia Adamu e: “E amu noa oe i to te mau raau atoa o te ô nei.” I roto i te mau tausani raau e faaunauna ra i taua ô ra, hoê noa tei opanihia e Iehova. Teie râ, a tapao na mea nafea to Satani faahitiraa i ta ’na uiraa matamua i nia ia Eva: “Oia ïa, ua parau mai te Atua e, Eiaha orua e amu i to te mau raau atoa o te ô nei?” (Genese 2:9, 16; 3:1) Ua taviri Satani i te mau parau a Iehova e ia mana‘o Eva e te tapea ra Iehova i te hoê mea maitai. Ma te peapea, ua manuïa taua ravea ra. Ua haamata Eva, mai te mau tane e te mau vahine e rave rahi i muri a‘e ia ’na, i te feaa i te maitai o te Atua tei horoa ’tu hoi i te mau mea atoa e vai ra ia ’na ra.

20 Ua ite tatou i te ati e te peapea iti rahi i hopoihia mai e taua mau feaaraa ra. E pee ana‘e ïa i te mau parau o te Ieremia 31:12: “E anaana to ratou mata i te maitai o Iehova.” (MN) Ia anaana mau ïa to tatou mata i te oaoa i te maitai o Iehova. Eiaha roa ’tu tatou ia feaa i te mau mana‘o turai o to tatou Atua o te î roa hoi i te maitai. E nehenehe tatou e tiaturi roa ino ia ’na, aita ’tu hoi mea ta ’na e hinaaro ra no te feia e here ra ia ’na maori râ te maitai.

21, 22. (a) Eaha te tahi mau ravea e hinaaro ai outou e pahono atu i te maitai o Iehova? (b) Eaha te huru maitai ta tatou e tauaparau i roto i te pene i muri nei, e e nafea te reira e taa ê ai i te maitai?

 21 Hau atu â, ia fana‘o tatou i te hoê taime maitai e paraparau ai ia vetahi ê no nia i te maitai o te Atua, e oaoa roa tatou. No nia i te nunaa o Iehova, te na ô ra te Salamo 145:7 e: “E parau â ratou i te mana‘oraa o to oe ra maitai rahi.” I te mau mahana atoa ta tatou e ora nei, e fana‘o tatou i te maitai o Iehova na roto i te hoê aore ra i te tahi ravea. Eaha hoi e ore ai e faariro ei peu matau i te mau mahana atoa te haamauruururaa ia Iehova no to ’na maitai, ma te faataa roa ’tu no teihea mea? E tauturu te feruriraa, te haamauruururaa ia Iehova, e te faaiteraa ia vetahi ê no nia i taua huru ra, ia pee tatou i to tatou Atua maitai. E a imi ai tatou i te mau ravea e na reira ’i, mai ia Iehova, e haafatata ’tu â tatou ia ’na. Ua papai te aposetolo ruhiruhia ra o Ioane e: “E tau here e, eiaha e pee i te parau ino, i te parau maitai râ. O tei rave i te maitai ra, no te Atua ïa.”—Ioane 3, 11.

22 Ua taai-atoa-hia te maitai o Iehova i te tahi atu mau huru maitatai. Ei hi‘oraa, ua “î” te Atua “i te aau aroha,” aore ra aroha taiva ore. (Exodo 34:6, MN) Mea faataa a‘e teie huru maitai i te taata i te maitai, no te mea e faaite noa Iehova i te reira i nia i ta ’na mau tavini haapao maitai. I roto i te pene i muri nei, e haapii mai tatou e nafea oia ia na reira.

^ par. 14 Aita ’tu hi‘oraa rahi roa ’‘e o te maitai o Iehova i te taraehara. I roto i te mau mirioni varua ora ta ’na i nehenehe e maiti, ua faataa Iehova i ta ’na Tamaiti here fanau tahi e ia pohe oia no tatou.

^ par. 18 Ma te tano, e taai te Bibilia i te parau mau i te maramarama. “E faaite hua mai i to maramarama e te parau mau,” o ta te papai salamo ïa i himene. (Salamo 43:3) E faatae Iehova i te maramarama pae varua rahi i nia i te feia e hinaaro mau ia haapiihia, aore ra ia haamaramaramahia, ratou e oia.—Korinetia 2, 4:6; Ioane 1, 1:5.

No te ite atu â

TE PARE TIAIRAA

Tei faaî ra i to tatou aau

I te mau mahana atoa, te hamani maitai ra o ’na i te taata noa ’tu e te vai ra tei mauruuru ore.