Eaha to roto?

Mau faaho'iraa ê

Tapura tumu parau

Ite no Iehova

Tahiti

E haafatata ’tu ia Iehova

 PENE 25

“Te aumihi î i te here o to tatou Atua”

“Te aumihi î i te here o to tatou Atua”

1, 2. (a) E nafea iho â te hoê metua vahine ia ta‘i to ’na pêpe? (b) Eaha te huru aau e puai a‘e i to te hoê metua vahine aumihi?

I TE tuiraa po, te ta‘i ra te hoê aiû. E ara vave mai te mama. Eita oia e taoto maitai mai ta ’na i matau na—mai te fanauraa mai iho â râ o te pêpe. Ua haapii oia i te faataa ê i te mau ta‘i huru rau o to ’na aiû. No reira, e pinepine e nehenehe ta ’na e parau e te hinaaro ra anei to ’na aiû fanau apî ia faatamaahia oia, ia tauahiahihia oia, e aita ra ia haapaohia ’tu oia. Noa ’tu râ te tumu e ta‘i ai te pêpe, e tia mai te mama. No to ’na here, eita ta ’na e nehenehe eiaha e tâu‘a ’tu i te mau hinaaro o to ’na aiû.

2 To roto te aumihi o te hoê metua vahine no to ’na aiû i te mau huru aau î roa ’‘e i te here matauhia e te taata. Te vai ra râ te hoê huru aau puai hau ê atu â—te aumihi î i te here o to tatou Atua, o Iehova. Ia hi‘opoa tatou i teie huru maitai au mau, e tauturuhia tatou ia haafatata ’tu â ia Iehova. E tauaparau ana‘e ïa eaha te aumihi e e nafea to tatou Atua ia faaite i te reira.

Eaha te aumihi?

3. Eaha te auraa o te ihoparau Hebera i hurihia ei “faaite i te aroha hamani maitai” aore ra ei “aroha”?

3 I roto i te Bibilia, te vai ra te hoê taairaa piri i rotopu i te aumihi e te aroha hamani maitai. Te vai ra te mana‘o o te aumihi î i te here i roto i te tahi mau ta‘o Hebera e Heleni. E rave ana‘e, ei hi‘oraa, i te ta‘o Hebera ra ra·chamʹ, o te huri-pinepine-hia ei “faaite i te aroha hamani maitai” aore ra ei “aroha.” Te faataa ra te hoê buka e “te faaite ra” te ihoparau ra·chamʹ “i te huru aau hohonu e te î i te here o te aumihi,  mai tei tupu mai ia ite atu tatou i te paruparu aore ra te mauiui o te feia ta tatou e here aore ra o te hinaaro i ta tatou tauturu.” Ua taaihia teie ta‘o Hebera, ta Iehova hoi e faaau ia ’na iho, i te ta‘o i hurihia ei “aau” e e nehenehe e faataahia mai “te aumihi o te metua vahine.” *Exodo 33:19; Ieremia 33:26.

“E moe anei i te hoê vahine . . . te tamaiti no to ’na opu?”

4, 5. E nafea te Bibilia ia faaohipa i te mau huru aau o te hoê metua vahine no to ’na pêpe, no te haapii mai no nia i to Iehova aumihi?

4 Te faaohipa ra te Bibilia i te mau huru aau o te hoê metua vahine no to ’na pêpe no te haapii mai i te auraa o to Iehova aumihi. I roto i te Isaia 49:15, te taio nei tatou e: “E moe anei i te hoê vahine to ’na aiû, e aita ’tura e ite i te aumihi [ra·chamʹ] i te tamaiti no to ’na opu? Oia, e moe â ia ratou, eita râ oe e moe ia ’u.” (The Amplified Bible) Te haapapu ra taua faataaraa putapû ra i te hohonuraa o to Iehova aumihi no to ’na nunaa. E nafea?

5 Mea fifi ia feruri e e haamoe te hoê metua vahine i te faatamaa e te aupuru i to ’na aiû. Inaha hoi, mea ravea ore te hoê tamarii rii; i te po e te ao, e hinaaro te hoê pêpe ia haapao mai e ia here mai to ’na mama ia ’na. Ma te peapea râ hoi, te faaroohia ra te parau o te tahi mau metua vahine haapao ore, i teie nei iho â râ ‘anotau ati rahi’ tapaohia e te ereraa i te “aroha.” (Timoteo 2, 3:1, 3) “Eita râ oe e moe ia ’u,” o ta Iehova ïa e parau ra. Eita te aumihi î i te here o Iehova i ta ’na mau tavini e mou. E puai a‘e ma te faito ore i te huru aau natura î roa ’‘e i te here ta tatou e nehenehe e feruri—te aumihi ta te hoê mama iho â e faatupu i nia i to ’na tamarii rii. E ere ïa i te mea maere ia parau te hoê taata tatara parau no nia i te Isaia 49:15 e: “Hoê tera o te mau faaiteraa puai roa ’‘e, e ere ana‘e i te mea puai roa ’‘e, i te here o te Atua i roto i te Faufaa Tahito.”

6. Eaha te mana‘o o te taata tia ore e rave rahi i te aumihi î i te here, te haamahanahana maira râ Iehova no nia i te aha?

 6 E tapao anei te aumihi î i te here no te paruparu? Tera ta te taata tia ore e rave rahi i mana‘o. Ei hi‘oraa, ua haapii te philosopho Roma ra o Sénèque, tei ora na i te tau o Iesu e tei riro na ei aivanaa tuiroo i Roma, e “e tapao te aroha no te paruparu o te feruriraa.” E taata paturu o Sénèque i te Stoïcisme, te hoê philosophia o te onoono i nia i te hitahita ore aita roa ’tu e huru aau. E tauturu paha te hoê taata haerea paari i te feia i roto i te hepohepo, o ta Sénèque ïa i parau, eiaha râ oia ia aroha haere noa, no te mea e faaore taua huru aau ra i to ’na huru hau. Aita e parahiraa to te aumihi aau tae i roto i taua huru hi‘oraa miimii ra i te oraraa. E ere roa ’tu râ Iehova mai tera! I roto i ta ’na Parau, te haamahanahana maira Iehova e “ua î” oia “i te aroha, e te hamani maitai rahi [oia mau hoi, “te aumihi”].” (Iakobo 5:11) Mai ta tatou e ite mai, e ere te aumihi i te paruparu, e huru maitai puai râ e te faufaa roa. E hi‘o ana‘e e nafea Iehova, mai te hoê metua î i te here, ia faaite i te reira.

To Iehova faaiteraa i te aumihi i nia i te hoê nunaa

7, 8. Mea nafea to te mau Iseraela mauiuiraa i Aiphiti i tahito ra, e ua nafea Iehova i mua i to ratou mauiui?

7 E ite-maitai-hia te aumihi o Iehova i to ’na haaraa i nia i te nunaa Iseraela. I te pae hopea o te senekele 16 H.T.T., te faatîtîhia ra te mau mirioni Iseraela i Aiphiti i tahito ra, e te hamani-ino-roa-hia ra ratou. “Ati roa ’tura to ratou” oraraa i to Aiphiti “i te ohipa rahi rohirohi i te vari u‘au‘a e te ofai-araea.” (Exodo 1:11, 14) I roto i to ratou ahoaho, ua tiaoro  te mau Iseraela ia Iehova e tauturu mai. Ua nafea te Atua î i te aumihi e te here?

8 Ua putapû te aau o Iehova. Ua na ô oia e: “Ua hi‘o papu vau i te pohe e to ’u ra mau taata i Aiphiti, e ua faaroo vau i to ratou auê i ta ratou mau faaau ohipa; e ua ite hoi au i to ratou oto.” (Exodo 3:7) Aita i tia ia Iehova ia hi‘o i te mau mauiui o to ’na nunaa aore ra ia faaroo i to ratou mau auê ma te ore e aroha ’tu. Mai ta tatou i ite mai i roto i te pene 24 o teie buka, e Atua aumauiui o Iehova. E te aumauiui—te mauiuiraa e o vetahi ê atoa—ua taai-piri-hia ïa i te aumihi. Aita râ Iehova i aroha noa i to ’na nunaa; ua turaihia oia ia haa no ratou. Te na ô ra te Isaia 63:9 e: “No to ’na aroha e to ’na hamani maitai i faaora ’i oia ia ratou.” Ma “te rima puai,” ua faaora Iehova i te mau Iseraela mai Aiphiti mai. (Deuteronomi 4:34) I muri iho, ua horoa semeio atu oia i te maa e ua aratai atu i te hoê fenua hotu maitai no ratou iho.

9, 10. (a) No te aha Iehova i faaora tamau ai i te mau Iseraela i muri a‘e i to ratou parahi-maitai-raa i te Fenua Tǎpǔhia? (b) I te tau o Iepheta, ua faaora Iehova i te mau Iseraela i teihea hamani-ino-raa, e na te aha i turai ia ’na ia na reira?

9 Aita te aumihi o Iehova i hope i reira. I to ratou parahi-maitai-raa i te Fenua Tǎpǔhia, ua topa pinepine Iseraela i roto i te taivaraa e ua mauiui ei faahopearaa. I reira râ te nunaa e ho‘i faahou mai ai i to ratou huru mau e e tiaoro ai ia Iehova. Ua faaora tamau noa oia ia ratou. No te aha? “No te mea te aroha ra oia i to ’na mau taata.”—Paraleipomeno 2, 36:15; Mau tavana 2:11-16.

10 E hi‘o ana‘e i tei tupu i te tau o Iepheta. I te mea e ua fariu ê te mau Iseraela e haamori i te mau atua haavare, ua vaiiho Iehova e ia hamani-ino-hia ratou e te mau ati Amona 18 matahiti i te maoro. I te pae hopea, ua tatarahapa te mau Iseraela. Te faaite maira te Bibilia e: “Ua faarue ihora ratou i te mau atua ěê i roto ia ratou ra, e ua haamori ia Iehova ana‘e ra; aroha ’tura to ’na aau i te pohe rahi o Iseraela.” *  (Mau tavana 10:6-16) I to to ’na nunaa iho â faaiteraa i te tatarahapa mau, aita i tia faahou ia Iehova ia faaoromai i te hi‘o atu ia mauiui ratou. No reira te Atua î i te aumihi e te here i haamana ’i ia Iepheta no te faaora i te mau Iseraela i te rima o to ratou mau enemi.—Mau tavana 11:30-33.

11. Na roto i to Iehova haaraa i nia i te mau Iseraela, eaha ta tatou e haapii mai no nia i te aumihi?

11 Eaha ta te mau haaraa a Iehova i nia i te nunaa Iseraela e haapii mai no nia i te aumihi î i te here? Na mua, te ite ra tatou e e ere noa te reira i te ite-maite-raa ma te aumauiui i te mau ati ta te taata e faaû ra. A haamana‘o na i te hi‘oraa o te metua vahine e turaihia e te aumihi ia haapao atu ia ta‘i to ’na pêpe. Oia atoa, eita Iehova e tâu‘a ore i te mau auê o to ’na nunaa. E turai to ’na aumihi î i te here ia ’na ia tamǎrû i to ratou mauiui. Hau atu â, te haapii maira te huru i haa ’i Iehova i nia i te mau Iseraela e e ere roa ’tu te aumihi i te paruparu, ua turai hoi teie huru maitai î i te here ia ’na ia rave i te hoê ohipa etaeta e te papu no to ’na nunaa. Teie râ, e faaite anei Iehova i te aumihi i nia noa i ta ’na mau tavini ei pǔpǔ?

Te aumihi o Iehova no te taata taitahi

12. Mea nafea to te Ture faaiteraa i to Iehova aumihi no te taata taitahi?

12 Ua faaite te Ture ta te Atua i horoa i te nunaa Iseraela i to ’na aumihi no te taata taitahi. E rave ana‘e, ei hi‘oraa, i to ’na tapitapi i te feia veve. Ua ite Iehova e e nehenehe te mau huru tupuraa mana‘o-ore-hia e tupu mai e e haaveve i te hoê Iseraela. Ia nafeahia te feia veve e tia ’i? Ua faaue maitai Iehova i te mau Iseraela e: “Eiaha oe e faaiita i to aau, e e tapiri i to rima i to taeae tao‘a ore ra: e horoa mau atura  oe i te tao‘a na ’na, e eiaha to aau e nounou ia horoa oe i te tao‘a na ’na: no reira hoi e haamaitai mai ai to Atua ra o Iehova ia oe i ta oe mau ohipa atoa ra.” (Deuteronomi 15:7, 10) Ua faaue atoa Iehova eiaha te mau Iseraela ia ooti haapau roa i te mau hiti o to ratou mau aua e ia ohi i te tahi noa ’‘e toea rii maa. Na te feia rii taua mau toea ra. (Levitiko 23:22; Ruta 2:2-7) Ia haapao te nunaa i teie ture maitai no te feia rii i roto ia ratou, aita ïa te mau taata e veve ra i Iseraela i titauhia ia taparuparu i te maa. E ere anei tera i te faaiteraa i to Iehova aumihi î i te here?

13, 14. (a) E nafea te mau parau a Davida e haapapu mai ai e te tapitapi rahi ra Iehova ia tatou ei taata taitahi? (b) E nafea e nehenehe ai e faahoho‘a i te mea e te fatata ra Iehova i te feia “aau paruparu” aore ra “aau taiâ”?

13 I teie tau atoa, te tapitapi roa ra to tatou Atua î i te here ia tatou ei taata taitahi. E nehenehe e papu ia tatou e te ite maite ra oia i te mauiui atoa ta tatou e faaoromai ra. Ua papai te fatu salamo ra o Davida e: “Tei te feia parau-tia ra to Iehova mata; e tei ta ratou pure to ’na tari‘a. Te fatata nei Iehova i te feia aau paruparu ra; e te faaora nei oia i te taata aau taiâ.” (Salamo 34:15, 18) No nia i te feia ta teie mau parau e faataa ra, te na ô ra te hoê taata tatara Bibilia e: “E feia aau mauiui e te oto tera, oia hoi, te haama ra ratou no te tahi hara, e te ere ra i te tura; mea tura ore ratou i ta ratou iho hi‘oraa, e aita ratou e tiaturi ra i to ratou iho faufaa.” E mana‘o paha taua mau taata ra e mea atea roa Iehova e mea faufaa ore roa ratou e haapao mai ai oia ia ratou. E ere râ mai tera. Te haapapu maira te mau parau a Davida e eita Iehova e faarue i tei ‘tura ore i ta ratou iho hi‘oraa.’ Ua ite to tatou Atua î i te aumihi e i taua mau taime ra, e hinaaro hau atu â tatou ia ’na, e to pihai iho oia ia tatou.

14 E rave ana‘e i te hoê tupuraa. I te mau Hau Amui, ua faahoro te hoê metua vahine i to ’na tamaiti e 2 matahiti i te fare ma‘i, te roohia ra hoi oia i te ma‘i arapoa ino roa. I muri a‘e i to ratou hi‘opoaraa i te tamaiti, ua faaite te mau  taote i te mama e e tia ia ratou ia tapea ia ’na i te fare ma‘i i te po taatoa. Ihea to te metua vahine faaearaa i taua po ra? I nia i te hoê parahiraa i roto i te piha fare ma‘i, i pihai noa i te roi o to ’na tamaiti! Te ma‘ihia ra to ’na tamaiti iti, e i tia noa na ia ’na ia parahi atu i pihai iho. Papu maitai e e nehenehe ta tatou e tiaturi hau atu i to tatou Metua î i te here i te ra‘i ra! Inaha hoi, ua hamanihia tatou ia au i to ’na huru. (Genese 1:26) Te faaite maira te mau parau putapû o te Salamo 34:18 e ia ‘paruparu to tatou aau’ aore ra ia ‘taiâ to tatou aau,’ te “fatata” noa ra Iehova, mai te hoê metua î i te here, ma te aumihi noa e te ineine i te tauturu mai.

15. E nafea Iehova e tauturu mai ai ia tatou ei taata taitahi?

15 E nafea ïa Iehova e tauturu mai ai ia tatou ei taata taitahi? Eita paha oia e faaore i te tumu o to tatou mauiui. Mea rahi râ te mau faanahoraa ta Iehova i rave no te feia e tiaoro ra ia ’na e tauturu mai. Te pûpû maira ta ’na Parau, te Bibilia, i te a‘oraa nanonano o te nehenehe e faatupu i te hoê tauiraa. I roto i te amuiraa, ua horoa Iehova i te mau tiaau aravihi i te pae varua o te tutava i te pee i to ’na aumihi ia tauturu ratou i te mau hoa haamoriraa. (Iakobo 5:14, 15) O oia hoi “tei faaroo i te pure,” e horoa ïa oia i ‘te varua mo‘a i te feia e ani atura ia ’na.’ (Salamo 65:2; Luka 11:13) E nehenehe ta taua varua ra e faaî ia tatou i “te mana rahi maitai ra” e ia faaoromai tatou e ia faaore roa ’tu te Basileia o te Atua i te mau fifi faatupu ahoaho atoa. (Korinetia 2, 4:7) Aita anei tatou e mauruuru ra no taua mau faanahoraa atoa ra? Eiaha tatou ia haamoe e e mau faaiteraa tera o te aumihi î i te here o Iehova.

16. Eaha te hi‘oraa rahi roa ’‘e o to Iehova aumihi, e e nafea te reira e au ai ia tatou ei taata taitahi?

16 Te hi‘oraa rahi roa ’‘e o to Iehova aumihi, o to ’na iho â ïa horoaraa i te Taata here roa ’‘e na ’na ei hoo no tatou. E tusia î i te here tera a Iehova, tei iriti i te e‘a no to tatou faaoraraa. A haamana‘o na, ua horoahia taua hoo ra no tatou ei taata taitahi. Ma te tano, ua tohu o Zekaria, te metua  tane o Ioane Bapetizo, e ua faahanahana teie ô i “te aumihi î i te here o to tatou Atua.”—Luka 1:78MN.

Ia faaore Iehova i te aumihi

17-19. (a) E nafea te Bibilia ia faaite e e ere te aumihi o Iehova i te mea otia ore? (b) Na te aha i faaore i te aumihi o Iehova no to ’na nunaa?

17 E tia anei ia tatou ia mana‘o e aita e otia to te aumihi î i te here o Iehova? Eita roa ’tu, te faaite papu ra te Bibilia e no te feia e patoi i to ’na mau e‘a parau-tia, e faaore Iehova i te aumihi ma te tano. (Hebera 10:28) Ia ite tatou no te aha oia e na reira ’i, e haamana‘o ana‘e i te hi‘oraa o te nunaa Iseraela.

18 Noa ’tu e ua faaora tamau Iehova i te mau Iseraela i to ratou mau enemi, i te pae hopea, ua raea te otia i to ’na aumihi. Ua rave teie nunaa etaeta i te haamoriraa idolo, e ua hopoi tia roa mai i ta ratou mau idolo faufau i roto i te hiero o Iehova! (Ezekiela 5:11; 8:17, 18) Hau atu â, te faaitehia maira e: “Ua tâhito . . . ratou i te mau vea a te Atua, e ua vahavaha i ta ’na parau, e ua hamani ino i te mau peropheta na ’na, e tupu roa a‘era te riri o Iehova i to ’na taata, e aita roa a‘era e haapuraa.” (Paraleipomeno 2, 36:16) Ua raea i te mau Iseraela te hoê faito aita i tano faahou te aumihi, e ua faatupu ratou i te riri tia o Iehova. Eaha te faahopearaa?

19 Aita i tia faahou ia Iehova ia faatupu i te aumihi no to ’na nunaa. Ua parau oia e: “E ore au e aroha, e ore au e faaherehere, e ore hoi au e hamani maitai atu mai te mea e faaora ia ratou.” (Ieremia 13:14) No reira Ierusalema e to ’na hiero i haamouhia ’i, e i hopoi-tîtî-hia ’i te mau Iseraela i Babulonia. Auê te peapea e ia riro te taata hara ei feia orure hau e ia ore roa te aumihi o te Atua!—Oto o Ieremia 2:21.

20, 21. (a) Eaha te tupu ia raea te otia i te aumihi o te Atua i to tatou nei tau? (b) Eaha te ô î i te aumihi a Iehova ta tatou e tauaparau i roto i te pene i muri nei?

20 E i teie tau? Aita Iehova i taui. No to ’na aumihi, ua  faaue oia i to ’na mau Ite ia poro i “te evanelia o te basileia” na te fenua atoa i faaeahia e te taata. (Mataio 24:14) Ia farii te taata aau tia, e tauturu atu Iehova ia taa ia ratou te poroi o te Basileia. (Ohipa 16:14) Eita râ teie ohipa e tupu e a muri noa ’tu. E ere ïa i te aumihi ia vaiiho Iehova i teie ao ino, e to ’na mau ati e mau mauiui atoa, ia tamau noa ma te hopea ore. Ia raea te otia i to ’Na aumihi, e tae mai Iehova no te faatupu i te haavaraa i nia i teie faanahoraa o te mau mea. I reira atoa, e haa oia no to ’na aumihi—te aumihi no to ’na “i‘oa mo‘a” e no ta ’na mau tavini paieti. (Ezekiela 36:20-23) E faaore roa Iehova i te ino e e avari oia i te hoê ao apî parau-tia. No nia i te feia iino, te na ô ra Iehova e: “E ore tau mata e faaherehere, e ore hoi au e aroha, e tahoo râ vau i ta ratou parau i nia i to ratou iho upoo.”—Ezekiela 9:10.

21 Hou te reira, e aumihi to Iehova no te taata, tae noa ’tu no te feia e faaû atu i te haamouraa. E nehenehe te taata hara o te tatarahapa mau e fana‘o i te hoê o te mau faanahoraa î roa ’‘e i te aumihi—te faaoreraa hara. I roto i te pene i muri nei, e tauaparau tatou no nia i te tahi o te mau faahoho‘araa nehenehe i roto i te Bibilia o te haapapu ra i te faaoreraa hara tia roa a Iehova.

^ par. 3 Ma te faahiahia râ, i roto i te Salamo 103:13, te vai ra te mana‘o o te aroha hamani maitai, aore ra aumihi, ta te hoê metua tane e faaite i nia i ta ’na mau tamarii, i roto i te ihoparau Hebera ra ra·chamʹ.

^ par. 10 Teie te auraa mau o te parau i hurihia ei “aroha ’tura to ’na aau,” “ua potohia to ’na nephe; ua pau to ’na faaoromai.” Te na ô ra te hoê huriraa (The New English Bible) e: “Aita i tia faahou ia ’na i te faaoromai ia hi‘o atu i te ati o Iseraela.” Te huri ra te tahi atu (Tanakh—A New Translation of the Holy Scriptures) e: “Aita i tia ia ’na ia faaoromai i te mau mauiui o Iseraela.”