Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 31

“E haafatata ’tu i te Atua, e na ’na e haafatata mai ia outou na”

“E haafatata ’tu i te Atua, e na ’na e haafatata mai ia outou na”

1-3. (a) Eaha ta tatou e nehenehe e haapii mai no nia i te huru o te taata na roto i te hi‘opoaraa i te haerea i rotopu i te mau metua e to ratou aiû? (b) Eaha te ohipa e tupu mai iho â ia faaite mai te hoê taata i te here ia tatou, e eaha te uiraa faufaa e tia ia tatou ia ui ia tatou iho?

MEA au roa na te mau metua ia hi‘o atu i to ratou aiû fanau apî ia ataata mai. E pinepine ratou i te tapiri atu i to ratou mata i to te tamarii, a uuru e a ataata rahi atu ai. Te hinaaro ra ratou e ite atu i te hoê faaho‘iraa mai. Eita e maoro, tera mai—e poopoo te paparia o te pêpe, e haamenemene te utu, e era mai te hoê ataata au mau. E au ra e na tera noa ataata e faaite i te here, te haamataraa o te here o te aiû ei faaho‘iraa i te here o te mau metua.

2 E haamana‘o mai te ataata o te pêpe i te hoê mea faufaa no nia i te huru o te taata. E faaho‘i iho â tatou i te here na roto i te here. Mai tera iho â pa‘i to tatou hamaniraahia. (Salamo 22:9) A paari mai ai tatou, e paari atoa mai te huru e faaho‘i ai tatou i te here. Peneia‘e te haamana‘o ra outou mea nafea to to outou na metua, mau fetii, aore ra mau hoa faaiteraa mai i te here ia outou i to outou tamariiraa ra. I roto i to outou mafatu, ua a‘ahia te hoê huru aau mahanahana, ua tupu mai e ua mahie mai, riro atu ai ei ohipa. Ua faaite outou i to outou here ei faaho‘iraa. Te mahie ra anei te hoê tupuraa mai tera i roto i to outou taairaa e te Atua ra o Iehova?

3 Te na ô ra te Bibilia e: “Te hinaaro nei tatou ia ’na, no te mea oia na tei hinaaro mai na ia tatou nei.” (Ioane 1, 4:19) I roto i te mau tuhaa 1 e tae atu i te 3 o teie buka, ua haamana‘ohia outou e ua faaohipa te Atua ra o Iehova i to ’na mana, ta ’na parau-tia, e to ’na paari ma te aroha no to outou maitai. E i roto i te tuhaa 4, ua ite mai outou e ua faaite tia oia i to ’na aroha i te huitaata—e ia outou iho—ma te mau ravea faahiahia. I teie nei, te hiti maira te hoê uiraa. I te hoê pae, o te uiraa faufaa roa ’‘e  tera te tia ia outou ia ui ia outou iho: ‘E nafea vau ia faaho‘i i to Iehova here?’

Eaha te auraa e here i te Atua

4. Mai te aha te taata i te taa ore eaha te auraa e here i te Atua?

4 Ua ite maitai Iehova, te Tumu o te here, e e mana rahi roa to te here no te faaite mai i te mea maitai roa ’‘e i roto ia vetahi ê. No reira, noa ’tu te huru orure hau tuutuu ore o te huitaata faaroo ore, ua tiaturi noa oia e e faaho‘i te tahi mau taata i to ’na here. E, oia mau, e mau mirioni tei na reira. Te mea peapea râ, oia hoi, ua vaiiho te mau haapaoraa a teie nei ao pi‘o i te taata i roto i te taa ore eaha te auraa e here i te Atua. Mea rahi roa te taata e parau e te here nei ratou i te Atua, e au ra râ e te mana‘o ra ratou e, taua here ra, o te hoê noa ïa huru aau e tia ia faaitehia na roto i te parau vaha noa. E haamata paha te here i te Atua mai te reira, mai te hoê pêpe o te faaite i to ’na here i to ’na na metua na roto na mua i te hoê ataata. No te mau taata paari râ, e titau hau atu â te here.

5. E nafea te Bibilia ia faataa i te here i te Atua, e no te aha e tia ’i ia tatou ia anaanatae atu i taua faataaraa ra?

5 Te faataa ra Iehova eaha te auraa e here ia ’na. Te na ô ra ta ’na Parau e: “Teie hoi te hinaaro i te Atua, o te haapao i ta ’na ra parau.” E faaitehia ïa te here i te Atua na roto i te ohipa. Parau mau, aita te rahiraa e mana‘o ra e mea anaanatae te auraroraa. Te parau faahou ra râ taua irava ra ma te maitai e: “E ere hoi ta [te Atua] parau i te mea teimaha.” (Ioane 1, 5:3) Ua opuahia te mau ture e te mau faaueraa tumu a Iehova e ia maitai tatou, eiaha no te faateimaha mai. (Isaia 48:17, 18) Ua î te Parau a te Atua i te mau faaueraa tumu o te tauturu mai ia haafatata ’tu ia ’na. E nafea? E hi‘opoa ana‘e e toru tuhaa o to tatou taairaa e te Atua. O te tauaparauraa ïa, te haamoriraa, e te peeraa ia ’na.

Tauaparauraa e Iehova

6-8. (a) Eaha te ravea e faaroo ai tatou ia Iehova? (b) E nafea tatou ia faaoraora i te mau Papai ia taio atu tatou?

6 Te haamata ra te pene 1 na roto i teie uiraa, “E nehenehe  anei ta outou e feruri e te paraparau ra outou e te Atua?” Ua ite mai tatou e e ere noa te reira i te mea feruri-noa-hia. Ua tauaparau mau â Mose e te Atua. E o tatou? E ere teie i te tau e tono ai Iehova i ta ’na mau melahi e paraparau i te taata. Te vai ra râ ta Iehova mau ravea maitatai roa e paraparau mai ai i teie tau. E nafea tatou ia faaroo atu ia Iehova?

7 No te mea hoi e “te mau Papai atoa, e mea faaurua ïa e te Atua,” e faaroo tatou ia Iehova na roto i te taioraa i ta ’na Parau, te Bibilia. (Timoteo 2, 3:16, MN) No reira te papai salamo i faaitoito ai i te mau tavini a Iehova ia rave i taua taioraa ra “i te rui e te ao.” (Salamo 1:1, 2) E titauhia ïa ia tutava rahi roa tatou. Eita râ taua mau tutavaraa atoa ra e mâu‘a. Mai ta tatou i ite mai i roto i te pene 18, ua riro te Bibilia mai te hoê rata faufaa ta to tatou Metua i te ra‘i i papai na tatou. Eiaha ïa te taioraa ’tu ia riro ei ohipa teimaha. E tia ia tatou ia faaoraora i te mau Papai ia taio atu tatou. E nafea tatou e na reira ’i?

8 A hamani i te hoho‘a o te mau aamu bibilia a taio ai outou. A tamata i te hi‘o i te mau taata mai te mau taata mau. A tutava e ia taa ia outou te ta‘ere, te mau huru tupuraa, e te mau mana‘o turai. A mana‘o hohonu atu ai i ta outou e taio ra, a ui ai ia outou i te mau uiraa mai teie: ‘Eaha ta teie aamu e haapii maira no nia ia Iehova? Te ite ra vau i teihea huru maitai to ’na? Eaha te faaueraa tumu ta Iehova e hinaaro ra ia haapii au, e e nafea vau ia faaohipa ’tu i roto i to ’u oraraa?’ A taio, a feruriruri, e a faaohipa—a na reira ’i outou, e oraora mai te Parau a te Atua no outou.—Salamo 77:12; Iakobo 1:23-25.

9. O vai “te tavini haapao maitai e te paari,” e no te aha e mea faufaa ’i ia faaroo maitai tatou i taua “tavini” ra?

9 E paraparau atoa mai Iehova na roto i “te tavini haapao maitai e te paari.” Mai ta Iesu i tohu, ua faatoroahia te hoê pǔpǔ iti tane Kerisetiano faatavaihia no te horoa i te ‘maa varua i te hora mau’ i teie anotau hopea arepurepu. (Mataio 24:45-47) Ia taio tatou i te mau papai i faaineinehia no te tauturu mai ia noaa te ite mau i te Bibilia e ia haere tatou i te mau putuputuraa e te mau tairururaa Kerisetiano, te faatamaahia  ra tatou i te pae varua e taua tavini ra. No te mea o te tavini tera a te Mesia, e haapao tatou ma te paari i teie mau parau a Iesu: “A ara e nafea outou ia faaroo.” (Luka 8:18, MN) E faaroo maitai tatou no te mea te farii ra tatou i te tavini haapao maitai mai te hoê o te mau ravea e paraparau mai ai Iehova ia tatou.

10-12. (a) No te aha te pure e riro ai ei ô faahiahia a Iehova? (b) E nafea tatou ia pure e ia oaoa Iehova, e no te aha tatou e nehenehe ai e tiaturi e e haafaufaa oia i ta tatou mau pure?

10 E te paraparauraa ’tu i te Atua? E nehenehe anei ta tatou e paraparau atu ia Iehova? E faatupu taua mana‘o ra i te mǎta‘u faatura. Mai te peu e te titauhia ra ia tapiri atu outou i te taata faatere mana roa ’‘e o to outou fenua no te paraparau atu no nia i te hoê ohipa na outou iho, e noaa anei te hoê farereiraa? I te tahi taime, e nehenehe te tamata-noa-raa e riro ei mea atâta! I te tau o Esetera e o Moredekai, e nehenehe te hoê taata e haapohehia no to ’na tapiriraa ’tu i te arii no Peresia ma te ore i titauhia e ana. (Esetera 4:10, 11) A feruri na i teie nei e te haere atura outou i mua i te Fatu e Arii o te ao taatoa, ua “riro” hoi te mea mana roa ’‘e i roto i te taata “mai te vivi” ia faaauhia ’tu ia ’na. (Isaia 40:22) E tia anei ia tatou ia faahaama i te tapiri atu ia ’na? Eiaha roa ’tu!

11 Ua horoa mai Iehova i te hoê ravea ineine noa, e te ohie atoa râ, e tapiri atu ai ia ’na—te pure. E nehenehe atoa te hoê tamarii apî roa e pure ia Iehova ma te faaroo, na roto i te i‘oa o Iesu. (Ioane 14:6; Hebera 11:6) Maoti atoa râ te pure e nehenehe ai tatou e faaite i to tatou mau mana‘o e mau huru aau fifi roa ’‘e e te hohonu roa ’‘e—tae noa ’tu te mea mauiui e te mea fifi ia tatou i te faahiti. (Roma 8:26) Aita e faufaa ia tamata i te haamaere ia Iehova na roto i te parau aravihi e te faanavenave aore ra i te mau pure roa roa. (Mataio 6:7, 8) I te tahi a‘e pae, eita Iehova e taotia mai te aha te roa aore ra mai te aha te pinepine ia paraparau tatou ia ’na. E titau atoa mai ta ’na Parau “eiaha e tuutuu i te pure.”—Tesalonia 1, 5:17.

12 A haamana‘o na e o Iehova ana‘e te parauhia “tei faaroo i te pure,” e e faaroo oia ma te aumauiui mau. (Salamo 65:2) E  faaoromai noa anei oia ia pure atu ta ’na mau tavini haapao maitai? Eita, e oaoa mau oia i te reira. Te faaau ra ta ’na Parau i taua mau pure ra i te tao‘a hau‘a no‘ano‘a, o te faatae i te auauahi hau‘a no‘ano‘a e te haumârû i nia ia tutuihia. (Salamo 141:2; Apokalupo 5:8; 8:4) E ere anei i te mea mahanahana ia feruri e e na reira atoa ta tatou mau pure haavare ore i te tae atu i nia e te faaoaoa i te Fatu e Arii? No reira, mai te peu e te hinaaro ra outou e haafatata ’tu ia Iehova, a pure pinepine atu ia ’na ma te haehaa, i te mau mahana atoa. A ninii maite i to outou aau i mua ia ’na; eiaha e huna i te hoê noa ’‘e mea. (Salamo 62:8) A faaite i ta outou haapeapearaa, to outou oaoa, to outou mana‘o, e ta outou arueraa i to outou Metua i te ra‘i. Ei faahopearaa, e puai noa ’tu â to outou taairaa e oia.

Haamoriraa ia Iehova

13, 14. Eaha te auraa e haamori ia Iehova, e no te aha e tano ai ia na reira tatou?

13 Ia tauaparau tatou e te Atua ra o Iehova, aita noa tatou e faaroo ra e e paraparau ra mai te na reiraraa e te hoê hoa aore ra te hoê fetii. Te haamori mau ra tatou ia Iehova, a faahanahana ’tu ai e a faatura ’tu ai ma te au maite ia ’na. Te haamoriraa mau, o to tatou ïa oraraa taatoa. O te huru ïa e faaite ai tatou i to tatou here e to tatou atiraa ia ’na ma te nephe atoa, e e tahoê te reira i te mau mea ora haapao maitai atoa ta Iehova i poiete, to nia anei i te ra‘i aore ra to te fenua. I roto i te hoê orama, ua faaroo te aposetolo Ioane i te hoê melahi i te pororaa i teie faaueraa: “E haamori outou ia ’na, i tei hamani i te ra‘i, e te fenua, e te tai, e te mau pape pihaa ra.”—Apokalupo 14:7.

14 No te aha e tia ’i ia tatou ia haamori ia Iehova? A feruri na i te mau huru maitatai ta tatou i tauaparau i roto i teie buka, mai te mo‘araa, te mana, te haavîraa ia ’na iho, te parau-tia, te itoito, te aroha hamani maitai, te paari, te haehaa, te aroha, te aumihi, te taiva ore, e te maitai. Ua ite mai tatou e o Iehova iho te faito faahiahia e te teitei roa ’‘e o te mau ateriputi faufaa atoa. Ia tutava tatou e ia taa ia tatou te taatoaraa o to ’na  mau huru maitatai, e haroaroa tatou e e hau ê atu oia i te hoê Ihotaata rahi e te popou. Mea hanahana roa ino oia, mea teitei hau ê ia tatou nei. (Isaia 55:9) Aita e feaaraa, e tiaraa to Iehova e riro ei Arii no tatou, e e au mau ia ’na ta tatou haamoriraa. E nafea râ tatou ia haamori ia Iehova?

15. E nafea tatou ia haamori ia Iehova “ma te varua e te parau mau,” e e taime maitai te mau putuputuraa Kerisetiano no te aha?

15 Ua parau Iesu e: “E Varua te Atua, e te feia e haamori ia ’na ra, e haamori ïa ma te varua e te parau mau e tia ’i.” (Ioane 4:24) No te haamori i te Atua “ma te varua,” ia fana‘o ïa tatou i to ’na varua e ia arataihia tatou e te reira. Ia au atoa ta tatou haamoriraa i te parau mau, te ite mau e vai ra i roto i te Parau a te Atua. E taime maitai to tatou e haamori ai ia Iehova “ma te varua e te parau mau” ia putuputu tatou e te mau hoa haamoriraa. (Hebera 10:24, 25) Ia himene tatou i te mau arueraa ia Iehova, ia tahoê tatou i roto i te pure, e ia faaroo e ia apiti  tatou i roto i te mau tauaparauraa i nia i ta ’na Parau, te faaite ra tatou i to tatou here ia ’na na roto i te haamoriraa viivii ore.

Ua riro te mau putuputuraa Kerisetiano ei mau taime au mau e haamori ai ia Iehova

16. Eaha te hoê o te mau faaueraa rahi roa ’‘e i tuuhia i nia i te mau Kerisetiano mau, e no te aha tatou e turaihia ’i ia auraro atu?

16 Te haamori atoa ra tatou ia Iehova ia paraparau tatou ia vetahi ê no nia ia ’na, ia arue tatou ia ’na i mua i te taata. (Hebera 13:15) Oia mau, o te pororaa i te parau apî maitai o te Basileia o Iehova te hoê o te mau faaueraa rahi roa ’‘e i tuuhia i nia i te mau Kerisetiano mau. (Mataio 24:14) E auraro tatou ma te aau tae no to tatou here ia Iehova. Ia feruri tatou i te huru ‘i haapourihia ’i te aau o te feia faaroo ore e te atua o teie nei ao,’ o Satani te Diabolo, na roto i te faahitiraa i te mau haavare hairiiri no nia ia Iehova, aita anei tatou e hinaaro ra e tavini ei Ite no to tatou Atua, e e faatitiaifaro i taua mau parau haavare ra? (Korinetia 2, 4:4; Isaia 43:10-12) E ia feruri tatou i te mau huru maitatai o Iehova, aita anei tatou e ite ra ia tupu mai te hinaaro i roto ia tatou e faaite ia vetahi ê no nia ia ’na? Oia mau, aita ’tu e fana‘oraa taa ê rahi a‘e i te tautururaa ia vetahi ê ia ite e ia here i to tatou Metua i te ra‘i mai ia tatou.

17. Eaha tei taaihia i ta tatou haamoriraa ia Iehova, e no te aha e tia ’i ia tatou ia haamori ma te hapa ore?

17 E ere râ te reira noa ta tatou haamoriraa ia Iehova. E au te reira i te mau tuhaa atoa o to tatou oraraa. (Kolosa 3:23) Ia farii mau tatou ia Iehova mai to tatou Fatu e Arii, e tutava ïa tatou i te rave i to ’na hinaaro i roto i te mau tuhaa atoa—to tatou oraraa utuafare, ta tatou ohipa, ta tatou haaraa i nia ia vetahi ê, to tatou taime faafaaearaa. E tutava tatou i te tavini ia Iehova ‘ma te aau tia roa,’ ma te hapa ore. (Paraleipomeno 1, 28:9) I roto i taua haamoriraa ra, aita e parahiraa to te aau vaerua aore ra te oraraa feaapiti—te haerea haavarevare e au ra e te tavini ra ia Iehova a rave huna ’i i te hara ino. Te vai ra ana‘e te hapa ore, aita roa ’tu ïa e huru haavarevare; e haafaufau hoi te here i te reira. E tauturu atoa mai te mǎta‘u i te Atua. E taai te Bibilia i taua faatura ra i to tatou auhoaraa piri vai tamau e Iehova.—Salamo 25:14.

 Peeraa ia Iehova

18, 19. No te aha e tano ai ia mana‘o e e nehenehe ta te taata tia ore e pee i te Atua ra o Iehova?

18 Ua hope te tuhaa taitahi o teie buka e te hoê pene no nia i te ravea e ‘pee ai i te Atua mai te tamarii herehia ra.’ (Ephesia 5:1) Mea faufaa roa ia haamana‘o e noa ’tu to tatou huru tia ore, e nehenehe mau ta tatou e pee i te huru tia roa e faaohipa ’i Iehova i to ’na mana, ta ’na parau-tia, e haa ’i ma te paari, e e faaite ai i te aroha. E nafea tatou i ite ai e e nehenehe mau â e pee i te Mana hope? A haamana‘o na e te haapii maira te auraa o te i‘oa o Iehova e e faariro oia ia ’na iho ei mea atoa ta ’na i hinaaro no te faatupu i ta ’na mau opuaraa. E tano iho â ia umere tatou i taua aravihi ra, teie râ, eita roa ’tu anei e tia ia tatou ia pee ia Iehova? Oia.

19 Ua hamanihia tatou ia au i to te Atua hoho‘a. (Genese 1:26) E ere ïa te taata mai te tahi atu mau mea ora atoa i nia i te fenua. Aita tatou e arataihia ra e te huru natura noa, te mau tapao tupuna, aore ra te mau tupuraa i roto i to tatou heipuni. Ua horoa mai Iehova i te hoê ô faufaa mau—te tiamâraa e maiti. Noa ’tu to tatou mau taotiaraa e mau huru tia ore, e tiamâraa to tatou e maiti eaha te huru taata ta tatou e hinaaro e riro mai. Te hinaaro ra anei outou e riro ei taata î i te here, te paari, te parau-tia, o te faaohipa i te mana ma te tia? Maoti te tauturu a te varua o Iehova, e nehenehe ta outou e riro mai mai tera! A feruri na i te maitai ta outou e rave i reira.

20. Eaha te maitai ta tatou e rave ia pee tatou ia Iehova?

20 E faaoaoa outou i te aau o to outou Metua i te ra‘i. (Maseli 27:11) E nehenehe atoa Iehova e “mauruuru” roa ino ia outou, no te mea te taa ra ia ’na to outou mau taotiaraa. (Kolosa 1:9, 10) E a tamau ai outou i te faahotu i te mau huru maitatai ei peeraa i to outou Metua here, e haamaitaihia outou i te hoê fana‘oraa taa ê rahi. I roto i te hoê ao pouri i atea ê i te Atua, e riro outou ei tiarama. (Mataio 5:1, 2, 14) E tauturu outou i te haaparare na te ao atoa nei i te tahi maa tuhaa o to Iehova huru hanahana. Auê ïa hinuhinu e!

 “E haafatata ’tu i te Atua, e na ’na e haafatata mai ia outou na”

Ia haafatata noa ’tu â outou ia Iehova

21, 22. Eaha te tere hope ore e vai ra i mua i te feia atoa e here ra ia Iehova?

21 E ere noa te a‘oraa ohie i papaihia i roto i te Iakobo 4:8 i te hoê fa. E tere râ. A vai haapao maitai noa ’i tatou, eita roa ’tu taua tere ra e hope. Eita roa ’tu tatou e faaea i te haafatata ’tu e te haafatata ’tu â ia Iehova. Oia mau, e vai noa iho â te mau mea e tia ia haapii no nia ia ’na. Eiaha tatou ia mana‘o e ua haapii mai teie buka i te mau mea atoa e tia ia itehia no nia ia Iehova. Oia mau, ua haamata rii noa tatou i te tauaparau no nia i ta te Bibilia e parau ra no nia i to tatou Atua! E aita atoa te Bibilia iho e faaite maira i te mau mea atoa e tia ia itehia no nia ia Iehova. Ua na ô te aposetolo Ioane e ahiri i papaihia te mau mea atoa ta Iesu i rave i to ’na taviniraa i te fenua nei, “e ore e tia i . . . te ao atoa nei ia farii mai i taua mau buka ra.” (Ioane 21:25) Mai te peu e e parau mau tera no nia i te Tamaiti, e hau atu â ïa no nia i te Metua!

22 Noa ’tu te ora mure ore, eita e pau te haapiiraa no nia ia Iehova. (Koheleta 3:11) A feruri na râ i te ravea e vai ra i mua ia  tatou. Ua ora ana‘e tatou tau hanere, tau tausani, tau mirioni, e tae noa ’tu tau miria matahiti, e ite hau roa ’tu â tatou no nia i te Atua ra o Iehova i teie nei. E ite â râ tatou e eita te mau mea faahiahia e tia ia haapiihia e pau ia taio. E hinaaro tatou e haapii hau atu â, no te mea e vai noa iho â te tumu e mana‘o ai tatou mai te papai salamo tei himene e: “E mea maitai râ ia ’u ia haafatata ’tu i te Atua.” (Salamo 73:28) E riro noa iho â te ora mure ore ei mea faufaa taa ê e te huru rau—e e riro noa iho â te haafatataraa ’tu ia Iehova ei tuhaa hoona roa ’‘e o te reira.

23. Te faaitoitohia ra tatou ia aha?

23 Ia faaho‘i outou i to Iehova here i teie nei na roto i te hereraa ia ’na ma to outou aau, nephe, feruriraa, e puai atoa. (Mareko 12:29, 30) Ia taiva ore e ia aueue ore to outou here. Ia aratai-noa-hia te mau faaotiraa ta outou e rave i te mau mahana atoa, mai te mea iti roa ’‘e e tae noa ’tu i te mea rahi roa ’‘e, e te hoê noa faaueraa tumu—oia hoi, e maiti noa outou i te e‘a o te haapaari noa ’tu â i to outou taairaa e to outou Metua i te ra‘i. Hau atu â, ia haafatata noa ’tu â outou ia Iehova, e ia haafatata noa mai â oia ia outou—i te roaraa o te ora mure ore!

No te ite atu â

A ite papu “i te mau mea i hau i te maitai”

E melo tatou o te faanahonahoraa a te Atua o te ao taatoa. E fana‘oraa taa ê teie. E nafea ia faaite e te turu nei tatou i ta te reira e rave nei?

E rave anei oe i te hinaaro o Iehova?

Te here mau ra Iehova ia oe. E nafea ia faaite i to hinaaro e faaoaoa ia ’na i te mau mahana atoa?

No te aha mea faufaa ’i ia amuimui e te mau taeae e tuahine?

Te faaitoito ra te Parau a te Atua i te mau Kerisetiano ia amuimui te tahi e te tahi. A hi‘o na e nafea oe e faufaahia ’i ia na reira.