Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 24

Aita e mea e tia “ia faataa ê ia tatou i te aroha o te Atua”

Aita e mea e tia “ia faataa ê ia tatou i te aroha o te Atua”

1. Eaha te mana‘o faatoaruaru e roohia ’i te taata e rave rahi, tae noa ’tu te tahi mau Kerisetiano mau?

TE AROHA ra anei te Atua ra o Iehova ia outou ei taata taitahi? Te farii ra te tahi pae e te aroha ra te Atua i te huitaata ei taatoaraa, mai ta te Ioane 3:16 e parau ra. Te mana‘o mau ra râ ratou e: ‘Eita roa ’tu te Atua e aroha mai ia ’u ei taata taitahi.’ Tae noa ’tu te mau Kerisetiano mau, e nehenehe ratou e feaa i te tahi taime i te reira paeau. Ma te toaruaru, ua parau te hoê taata e: “Mea fifi roa na ’u ia tiaturi e te tapitapi rii noa a‘era te Atua ia ’u.” Te roohia ra anei outou i te feaaraa mai tera i te tahi taime?

2, 3. O vai te hinaaro ra e ia tiaturi tatou e aita to tatou e faufaa i te hi‘oraa a Iehova aore ra eita oia e here ia tatou, e e nafea tatou e nehenehe ai e aro i taua mana‘o ra?

2 Te hinaaro roa ra Satani ia tiaturi tatou e eita te Atua ra o Iehova e aroha ia tatou eita atoa e haafaufaa ia tatou. Parau mau, e pinepine Satani i te faahema i te taata na roto i te hautiraa ’tu i to ratou teoteo e to ratou aau faateitei. (Korinetia 2, 11:3) Mea au atoa râ na ’na e faaore i te tura o te feia e noaa haere noa. (Ioane 7:47-49; 8:13, 44) Mai te reira iho â râ i teie nei “anotau hopea” ati rahi. E rave rahi o te paari mai i roto i te mau utuafare “aroha ore.” Te faaû tamau ra te tahi atu i te feia taehae, te miimii, e te mârô. (Timoteo 2, 3:1-5) No te maoro o to ratou rooraahia i te hamani ino, te riri i te nunaa ê, aore ra i te riri i papu ai ia ratou e aita to ratou e faufaa aore ra eita ratou e herehia.

3 Mai te peu e tera to outou mau mana‘o faatoaruaru, eiaha e hepohepo. E rave rahi o tatou o te faahapa rahi roa ia tatou iho i te tahi taime. A haamana‘o na râ e ua opuahia te Parau a te Atua no te ‘faatitiaifaro i te mau mea’ e te ‘huri i te mau pare i raro.’ (Timoteo 2, 3:16, MN; Korinetia 2, 10:4) Te na ô ra te Bibilia e: ‘E mahoru to tatou aau i mua ia ’na ra, ia faahapa mai  hoi to tatou aau ia tatou, e rahi te Atua i to tatou aau, e ua ite oia i te mau mea atoa nei.’ (Ioane 1, 3:19, 20) E hi‘opoa ana‘e e maha ravea e tauturu mai ai te mau Papai e ia ‘mahoru to tatou aau’ i te aroha o Iehova.

E haafaufaa Iehova ia outou

4, 5. E nafea te faahoho‘araa a Iesu o na manu rii e faaite ai e e faufaaraa to tatou i te hi‘oraa a Iehova?

4 A tahi, te haapii tanai maira te Bibilia e, i te Atua, e faufaaraa to ta ’na tavini taitahi. Ei hi‘oraa, ua parau Iesu e: “E ere anei taipiti manu rii ia hoo i te moni veo hoê nei? e ore râ te hoê o taua na manu rii ra e moe i to outou Metua ia mairi i raro i te repo. Eiaha ’tu â ïa, ua hope atoa ra te rouru o to outou upoo na i te taiohia. Eiaha maori outou e mǎta‘u, e maitai rahi hoi to outou i to te manu e ia rahi noa ’tu.” (Mataio 10:29-31) E hi‘o ana‘e eaha te auraa o taua mau parau ra no te feia e faaroo ra ia Iesu i te senekele matamua.

“E maitai rahi hoi to outou i to te manu e ia rahi noa ’tu”

5 E maere paha tatou no te aha te taata e hoo mai ai i te hoê manu iti. Inaha, i te tau o Iesu, o te manu iti ra te mea mâmâ roa ’‘e e hoohia ei maa. A tapao na e e noaa mai e piti manu rii i te moni veo hoê aita rea e faufaa. I muri a‘e râ, ua parau Iesu e ia ineine te hoê taata i te haamâu‘a e piti moni veo, e noaa ta ’na, eiaha e maha manu rii, e pae râ. E tahinuhia te manu iti hau mai te huru ra e aita roa ’tu to ’na e faufaa. Peneia‘e aita to taua mau mea ora ra e faufaa i te hi‘oraa a te taata, eaha râ te mana‘o o te Atua Poiete i te reira? Ua parau Iesu e: “E aita te hoê i taua na manu ra [tae noa ’tu tei tahinuhia] i moe i te Atua.” (Luka 12:6, 7) I teie nei, te taa ra paha ia tatou te mana‘o o Iesu. Mai te peu e e haafaufaa Iehova i te hoê noa manu iti mai tera, mai te aha ’tu â ïa te taata i te faufaa! Mai ta Iesu i faataa, ua ite Iehova i te mau mea atoa no nia ia tatou. Inaha hoi, ua taio-roa-hia e ana te mau rouru iho o to tatou upoo!

6. No te aha e papu ai ia tatou e aita Iesu i atea roa i te mea mau i to ’na parauraa e te taiohia ra te rouru o to tatou upoo?

6 Ua taiohia to tatou rouru? Te mana‘o ra paha te tahi pae e ua atea roa Iesu i te mea mau. A feruri noa na râ i te tiaturiraa  o te tia-faahou-raa. Mai te aha râ ïa Iehova i te matau maitai ia tatou no te poiete faahou ia tatou! No te mea e haafaufaa rahi oia ia tatou, e haamana‘o roa oia i te mau tuhaa atoa, tae noa ’tu to tatou tapura tapao tupuna e te mau matahiti atoa mehararaa e pueraa ite. * E ohipa ohie roa ïa te taioraa i to tatou rouru—fatata hoi 100 000 te tupu i nia i te hoê upoo au noa—ia faaauhia ’tu.

Eaha ta Iehova e haafaufaa i roto ia tatou?

7, 8. (a) Eaha te tahi mau huru maitatai ta Iehova e oaoa i te ite mai ia imi oia i te aau taata? (b) Eaha te tahi o te mau ohipa maitatai ta tatou e rave ta Iehova e haafaufaa?

7 A piti, te haapii maira te Bibilia eaha ta Iehova e haafaufaa i roto i ta ’na mau tavini. Ei faaohieraa, mea au na ’na to tatou mau huru maitatai e ta tatou mau tutavaraa. Ua parau te arii Davida i ta ’na tamaiti o Solomona e: “E imi hoi Iehova i te mau aau atoa ra, e te ite ra oia i te mau mana‘o atoa.” (Paraleipomeno 1, 28:9) Ia imi te Atua i te aau o te mau miria taata i roto i teie ao u‘ana e te î i te riri, eaha râ paha oia i te oaoa ia ite oia i te hoê aau o te hinaaro i te hau, te parau mau, e te parau-tia! Eaha te tupu ia itea mai i te Atua te hoê aau î i te here ia ’na, o te tutava i te haapii no nia ia ’na e te faaite i taua ite ra ia vetahi ê? Te faaite maira Iehova e te tapao ra oia i te feia e paraparau ra ia vetahi ê no nia ia ’na. Te vai ra ta ’na “te tahi buka mana‘oraa” no te ‘feia atoa e mǎta‘u ra ia Iehova e tei mana‘o i to ’na ra i‘oa.’ (Malaki 3:16) Mea faufaa roa na ’na taua mau huru maitatai ra.

8 Eaha te tahi mau ohipa maitatai ta Iehova e haafaufaa? Papu maitai, ta tatou mau tutavaraa e pee i ta ’na Tamaiti, o Iesu Mesia. (Petero 1, 2:21) Te hoê ohipa maitai roa ta te Atua  e haafaufaa, o te haaparareraa ïa i te parau apî maitai o to ’na Basileia. I roto i te Roma 10:15, te taio nei tatou e: “O te nehenehe o te avae o te feia i hopoi mai i te parau oaoa o te hau e, o tei hopoi mai i te evanelia o te maitai ra e!” Aita paha tatou e mana‘o ra e mea “nehenehe,” aore ra mea haviti, to tatou na avae rii. Te faahoho‘a ra râ te reira i ǒ nei i te mau tutavaraa ta te mau tavini a Iehova e rave ra i roto i te pororaa i te parau apî maitai. Mea nehenehe taua mau tutavaraa atoa ra e te faufaa i ta ’na hi‘oraa.—Mataio 24:14; 28:19, 20.

9, 10. (a) No te aha e papu ai ia tatou e e haafaufaa Iehova i to tatou faaoromai i roto i te mau ati huru rau? (b) Eaha te mau mana‘o iino i ta ’na mau tavini haapao maitai aita roa ’tu to Iehova?

9 E haafaufaa atoa Iehova i to tatou faaoromai. (Mataio 24:13) A haamana‘o na, te hinaaro ra Satani ia fariu ê outou ia Iehova. Te mahana atoa e taiva ore ai outou ia Iehova, e mahana â ïa i reira to outou horoaraa i te hoê pahonoraa i te mau tâhitohitoraa a Satani. (Maseli 27:11) I te tahi taime, e ere i te mea ohie ia faaoromai. E nehenehe te mau fifi o te ea, te mau ati i te pae moni, te hepohepo o te aau, e te tahi atu â mau taupupu e faariro i te mau mahana atoa ei tâpû ati. E faatoaruaru atoa te mau tiairaa i faaroaroahia. (Maseli 13:12) Mea faufaa  ’tu â na Iehova ia faaoromai tatou a faaû ai tatou i taua mau tautooraa ra. No reira te arii Davida i ani ai ia Iehova e haaputu i to ’na roimata i roto i te hoê “farii,” a na ô faahou ai ma te tiaturi e: “Aita anei i roto atoa i ta oe ra [buka]?” (Salamo 56:8; MN) Oia, e haafaufaa Iehova e e haamana‘o oia i te mau roimata atoa e te mauiui ta tatou e faaoromai a tapea ’i tatou i to tatou taiva ore ia ’na. Mea faufaa atoa te reira i ta ’na hi‘oraa.

E haafaufaa Iehova i to tatou faaoromai i roto i te mau ati

10 Ei teie nei, e patoi â paha te aau faahapa ia ’na iho i taua haapapuraa ra o to tatou faufaaraa i te hi‘oraa a te Atua. E onoono paha te reira i te muhumuhu e: ‘Te vai ra hoi e rave rahi atu â taata faahiahia a‘e ia ’u. Auê paha ïa Iehova i te tatarahapa ia faaau oia ia ’u ia ratou!’ Eita Iehova e faaau; e ere atoa oia i te mea etaeta aore ra te mea ino i roto i to ’na feruriraa. (Galatia 6:4) E haroaroaraa rahi roa to ’na ia hi‘o oia i to tatou aau, e e haafaufaa oia i te maitai—tae noa ’tu te faito nainai o te reira.

E faataa ê Iehova i te maitai i te ino

11. Eaha ta tatou e haapii mai no nia ia Iehova na roto i to ’na haapaoraa i te parau o Abiia?

11 A toru, ia imi Iehova i roto ia ratou, e titia maitai oia e imi ai i te maitai. Ei hi‘oraa, i to Iehova faaotiraa e ia haamouhia te taatoaraa o te opu arii taiva o te arii Ieroboama, ua faaue Oia e ia hunahia hoê o te mau tamaiti a te arii, o Abiia, ma te tura. No te aha? “Te vai ra te maa parau maitai i roto ia ’na i te Atua o Iseraela ia Iehova.” (Mau arii 1, 14:1, 10-13) Oia mau, ua titia Iehova i te aau o taua taurearea ra e ua itea mai ia ’na “te tahi maa parau maitai” i roto. Noa ’tu te iti aore ra te faufaa ore o taua maa maitai ra, ua mana‘o Iehova e e tia ia tapaohia i roto i ta ’na Parau. Ua haamaitai atoa oia i te reira, a faaite ai i te maa aroha hamani maitai tano i taua melo hoê ra o te hoê utuafare taiva.

12, 13. (a) E nafea te hi‘oraa o te arii Iehosaphata e faaite ai e e imi Iehova i te maitai i roto ia tatou noa ’tu e ua hara tatou? (b) No nia i ta tatou mau ohipa e mau huru maitatai, e nafea Iehova ia ohipa mai te hoê Metua î i te here?

12 Te itehia ra te hoê hi‘oraa taa ê atu â i nia i te arii maitai  ra o Iehosaphata. I to te arii raveraa i te hoê ohipa maamaa, ua parau te peropheta a Iehova ia ’na e: “I au ai te riri o Iehova ia oe i te reira.” Auê ïa mana‘o haaferuri e! Aita râ te poroi a Iehova i faaea i reira. Ua na ô â e: “Te vai ra râ te parau maitai i roto ia oe ra.” (Paraleipomeno 2, 19:1-3) Aita ïa te riri tia o Iehova i haapo i to ’na mata i te maitai i roto ia Iehosaphata. Eiaha ïa mai te taata tia ore! Ia inoino tatou ia vetahi ê, e haamoe paha tatou i te maitai e vai ra i roto ia ratou. E ia hara tatou, e haapo paha te inoino, te haama, e te aau hapa i to tatou mata i te maitai e vai ra i roto ia tatou iho. A haamana‘o râ e ia tatarahapa tatou i ta tatou mau hara e ia tutava eiaha ia tapiti faahou, e faaore mai Iehova i te reira.

13 A hi‘opoa ’i Iehova i roto ia tatou, e tuu oia i taua mau hara ra i te hiti, mai te hoê taata heru e imi ra i te auro ia faarue i te ofai faufaa ore. E to outou mau huru e mau ohipa maitatai? Tera inaha te mau “hu‘a auro” ta ’na e tapea mai! Ua ite a‘ena anei outou e nafea te tahi mau metua e poihere ai i te mau hoho‘a peni aore ra te mau ohipa haapiiraa a ta ratou mau tamarii, i te tahi taime e rave rahi matahiti i te maoro ua moe atura ïa i te mau tamarii? O Iehova te Metua o te here roa ’‘e i ta ’na mau tamarii. A vai taiva ore noa  ’i tatou ia ’na, eita roa ’tu e moe ia ’na ta tatou mau ohipa e mau huru maitatai. Oia mau, e parau-tia ore na ’na ia haamoe oia i te reira, aita roa ’tu hoi ta ’na e parau-tia ore. (Hebera 6:10) E hi‘opoa atoa oia ia tatou na roto i te tahi atu ravea.

14, 15. (a) No te aha to tatou mau hapa e ore roa ’i e haapo i te mata o Iehova i te maitai e vai ra i roto ia tatou? A horoa na i te hi‘oraa. (b) E nafea Iehova i te mau huru maitatai ta ’na e ite ra i roto ia tatou, e eaha to ’na mana‘o i to ’na feia haapao maitai?

14 E hi‘o Iehova na nia ’‘e i to tatou mau hapa e e haapao oia i te tia ia tatou ia rave. Ei hi‘oraa: E tutava rahi te taata mea au na ratou te mau tauihaa a te rimaî i te tataî i te mau hoho‘a peni aore ra te tahi atu mau tauihaa i ino maitai. Ei hi‘oraa, i roto i te fare manaha a te hau Beretane i Lonedona, i to te hoê taata tuinoraa i te hoê hoho‘a peni a Léonard de Vinci i te ofai pupuhi, fatata hoi e 30 mirioni dala Marite to ’na faufaaraa, aita hoê taata i parau e, inaha hoi ua ino, ia faaruehia ïa. Ua haamata oioi te ohipa tataîraa i te tauihaa faahiahia ua fatata hoi e 500 matahiti i te vai-noa-raa. No te aha? No te mea mea faufaa te reira i te hi‘oraa a te feia mea au na ratou te ohipa a te rimaî. E ere anei outou i te mea faufaa a‘e i te hoê hoho‘a penihia i te reni papairaa e te fusain. I te Atua, oia roa—noa ’tu to outou inoraa i te huru tia ore i noaa mai ei tufaa. (Salamo 72:12-14) E rave Iehova, te Atua Poiete aravihi o te huitaata, i tei titauhia no te faariro faahou i te feia atoa e farii i to ’na here ei feia tia roa.—Ohipa 3:21; Roma 8:20-22.

15 Oia, e hi‘o Iehova i te maitai i roto ia tatou ta tatou paha e ore e ite ra. E a tavini ai tatou ia ’na, e faatupu oia i te maitai e ia tia roa ’tu tatou. Noa ’tu te huru i haa ’i te ao a Satani i nia ia tatou, e haafaufaa Iehova i ta ’na mau tavini haapao maitai ei feia hinaarohia.—Hagai 2:7.

E faaite Iehova i to ’na aroha na roto i te ohipa

16. Eaha te haapapuraa rahi roa ’‘e i to Iehova aroha ia tatou, e mea nafea tatou i ite ai e ua opuahia taua ô ra no tatou ei taata taitahi?

16 A maha, e haapapu Iehova i to ’na aroha ia tatou. Papu maitai, o te tusia taraehara o te Mesia te pahonoraa puai roa ’‘e  i te haavare a Satani ra e aita to tatou e faufaa aore ra eita tatou e herehia. Eiaha roa ’tu ia moe ia tatou e ua riro te mau mauiui pohe i roohia ’i Iesu i nia i te pou haamauiuiraa e te mauiui rahi atu â ta Iehova i faaoromai i to ’na hi‘oraa i ta ’na Tamaiti here i te poheraa, ei haapapuraa o to raua aroha ia tatou. Ma te peapea, te mana‘o ra te taata e rave rahi e mea fifi ia tiaturi e ua opuahia taua ô ra no ratou ei taata taitahi. Te mana‘o ra ratou e aita to ratou e faufaa. A haamana‘o na râ e ua hamani ino na te aposetolo Paulo i te mau pǐpǐ a te Mesia. Ua papai râ oia e: “Te Tamaiti a te Atua . . . tei aroha mai ia ’u, e ua horoa ia ’na iho no ’u.”Galatia 1:13; 2:20.

17. E nafea Iehova ia faatae ia tatou ia ’na e i ta ’na Tamaiti?

17 Te haapapu ra Iehova i to ’na aroha ia tatou na roto i te tautururaa ia tatou taitahi ia fana‘o i te mau maitai o te tusia o te Mesia. Ua parau Iesu e: “E ore roa te taata e tae mai ia ’u nei, maori râ ia faatae mai te Metua o tei tono mai ia ’u nei ia ’na.” (Ioane 6:44) Oia, te faatae ra Iehova ia tatou ei taata taitahi i ta ’na Tamaiti e te tiaturiraa o te ora mure ore. E nafea? Na roto i te ohipa pororaa e raea ’i tatou taitahi, e na roto i to ’na varua mo‘a ta Iehova e faaohipa no te tauturu ia taa ia tatou te mau parau mau pae varua e ia faaohipa ’tu tatou noa ’tu to tatou mau taotiaraa e mau hapa. E nehenehe ta Iehova e parau no nia ia tatou mai ta ’na i parau no nia ia Iseraela e: “Ua herehia oe e au i te hereraa mure ore ra; i faatae mai ai au ia oe i te [aau] aroha.”—Ieremia 31:3MN.

18, 19. (a) Eaha te ravea hohonu roa ’‘e e faaite ai Iehova i to ’na aroha ia tatou, e na te aha e faaite e te here ra oia ia tatou ei taata taitahi? (b) E nafea te Parau a te Atua ia haapapu mai e e faaroo mai Iehova ma te aumauiui?

18 Peneia‘e mea na roto i te fana‘oraa taa ê o te pure tatou e ite ai i te aroha o Iehova ma te hohonu roa ’‘e. Te titau maira te Bibilia ia tatou taitahi “eiaha e tuutuu i te pure” i te Atua. (Tesalonia 1, 5:17) E faaroo oia. Te parauhia ra hoi oia “tei faaroo i te pure ra.” (Salamo 65:2) Aita oia i horoa i teie tiaraa na vetahi ê, tae noa ’tu na ta ’na iho Tamaiti. A feruri noa na: Te faaitoito maira Tei poiete i te ao nui ia haafatata ’tu ia ’na na roto  i te pure, ma te faataiâ ore. E mai te aha te huru ia faaroo oia? Mea toetoe anei, te tâu‘a ore, te here ore anei? E ere roa ’tu.

19 E aumauiui to Iehova. Eaha te aumauiui? Ua parau te hoê Kerisetiano paari haapao maitai e: “Te aumauiui, o to oe ïa mauiui i roto i to ’u mafatu.” E mauiui mau anei Iehova ia mauiui tatou? Te taio nei tatou no nia i te mau mauiui o to ’na nunaa Iseraela e: “I roto i to ratou atoa ra mau ati, te ati atoa ra oia.” (Isaia 63:9, MN) Aita noa Iehova i ite atu i to ratou mau fifi; ua mauiui atoa oia no ratou. Mai te aha te puai o te reira, o te faaitehia ra ïa e te mau parau a Iehova iho i ta ’na mau tavini: “O te faatiaia ’tu ia outou ra, ua faatiaia ïa i [to ’u] orio mata nei.” * (Zekaria 2:8; MN) Eaha râ paha te mauiui! Oia, e aumauiui to Iehova ia tatou. Ia mauiui tatou, e mauiui atoa oia.

20. Eaha te huru feruriraa faito ore e tia ia tatou ia ape ia hinaaro tatou e auraro i te a‘oraa i roto i te Roma 12:3?

20 Aita e Kerisetiano maitai o te faaohipa i taua haapapuraa ra o te aroha e o te mana‘o faatura o te Atua ei tumu e teoteo ai aore ra e riro ai ei taata miimii. Ua papai te aposetolo Paulo e: “Teie ta ’u parau ia outou atoa e ati noa a‘e, i te maitai i horoahia mai ia ’u nei, eiaha ia hau te mana‘o ia ’na iho, i tei au ia ’na ia mana‘o ra: e haapao maite râ i te mana‘o, ia au i te huru o te faaroo i tufahia e te Atua i te taata atoa ra.” (Roma 12:3) Te na ô ra te tahi atu huriraa e: “Te parau atu nei au ia outou paatoa eiaha ia hau te mana‘o ia ’na iho i to ’na faufaaraa mau, ia tanotano noa râ te mana‘oraa ia ’na iho.” (A Translation in the Language of the People, a Charles B. Williams) No reira, noa ’tu e te fana‘o maite ra tatou i te mahanahana o te aroha o to tatou Metua i te ra‘i, ia maitai noa to tatou feruriraa e ia haamana‘o e e ere te aroha o te Atua i te mea noaa mai, e ere atoa i te mea au iho â ia tatou.—Luka 17:10.

21. Eaha te haavare a Satani e tia ia tamau noa i te patoi, e maoti teihea parau mau a te Atua e tia ’i ia tatou ia tamau i te tamǎrû i to tatou aau?

 21 E rave paatoa ana‘e i te mau mea atoa e maraa ia tatou no te patoi i te mau haavare atoa a Satani, tae noa ’tu te haavare e aita to tatou e faufaa aore ra eita tatou e herehia. Mai te peu e ua haapii mai to outou pueraa ite i roto i te oraraa i te hi‘o ia outou iho mai te hoê fifi rahi roa e ore ai e noaa i te aroha iti rahi o te Atua ia faaruru, aore ra mea faufaa ore roa ta outou mau ohipa maitatai e ore ai to ’na mata o te ite i te mau mea atoa e tapao mai, aore ra mea rahi roa ta outou mau hara e ore ai e po‘i i te pohe o ta ’na Tamaiti here, ua haapiihia ’tu te haavare ia outou. A patoi i taua mau haavare ra ma to outou aau atoa! E tamau ana‘e i te tamǎrû i to tatou aau i te parau mau i faahitihia i roto i te mau parau faauruahia a Paulo: “Ua ite mau hoi au e, e ore te pohe, e ore hoi te ora, e ore te mau melahi, e ore hoi te hui arii, e ore te mau mea mana, e ore te mau mea e vai nei, e ore hoi te mau mea e tupu a muri atu, e ore te teitei, e ore hoi te haehaa, e e ore atoa te mau mea i hamanihia nei, e tia ia faataa ê ia tatou i te aroha o te Atua, i roto i to tatou Fatu ia Iesu Mesia ra.”—Roma 8:38, 39.

^ par. 6 E taai pinepine te Bibilia i te tiaturiraa o te tia-faahou-raa i te mehara o Iehova. Ua parau te taata haapao maitai ra o Ioba ia Iehova e: “Ahiri oe e faataa i te taime, a mana‘o mai ai ia ’u nei!” (Ioba 14:13) Ua faahiti Iesu i te tia-faahou-raa o “te feia atoa i roto i te [menema haamehararaa] ra.” Ua tano te reira no te mea e haamana‘o maitai roa ino Iehova i te feia pohe ta ’na e opua ra e faatia mai.—Ioane 5:28, 29MN.

^ par. 19 Te na ô ra te tahi mau huriraa e te taata e faatiaia ra i te nunaa o te Atua, te faatiaia ra ïa i to ’na iho mata aore ra i to Iseraela, eiaha i to te Atua. Na te tahi mau papai parau i tuu mai i taua hape ra no to ratou mana‘o e mea faatura ore taua parau ra e ua taui atura ratou i te reira. Ua haapouri ta ratou tutavaraa hape i te hohonuraa mau o to Iehova iho aumauiui.