Eaha to roto?

Mau faaho'iraa ê

Tapura tumu parau

Ite no Iehova

Tahiti

E haafatata ’tu ia Iehova

 PENE 30

“Ei haerea aroha to outou”

“Ei haerea aroha to outou”

1-3. Eaha te faahopearaa ia pee tatou i te hi‘oraa o Iehova i te faaiteraa i te aroha?

“E MEA maitai i te horoa ’tu i te rave mai.” (Ohipa 20:35) Te haapapu ra taua mau parau a Iesu ra i teie parau mau faufaa: Mea hoona iho â te aroha miimii ore. Noa ’tu e mea oaoa roa ia fana‘o i te aroha, mea oaoa roa ’tu â ia horoa, aore ra ia faaite, i te aroha i nia ia vetahi ê.

2 Aita e taata i ite i te reira mai to tatou Metua i te ra‘i. Mai ta tatou i ite mai i roto i to mua ’tu mau pene o teie tuhaa, o Iehova te hi‘oraa rahi roa ’‘e o te aroha. Aita e taata i faaite i te aroha mai ia ’na i te rahi aore ra i te maoro. Mea maere anei ïa ia parauhia Iehova “te Atua no ’na te ao”?—Timoteo 1, 1:11.

3 Te hinaaro ra to tatou Atua aroha ia tamata tatou i te riro mai ia ’na, i te pae iho â râ o te faaiteraa i te aroha. Te parau maira te Ephesia 5:1, 2 e: “Ei pee outou i te Atua mai te tamarii herehia ra; ei haerea aroha to outou.” Ia pee tatou i te hi‘oraa o Iehova i te faaiteraa i te aroha, e itea mai ia tatou te oaoa rahi a‘e e horoa. E mauruuru atoa tatou i te iteraa e te faaoaoa ra tatou ia Iehova, te faaitoito maira hoi ta ’na Parau e “aroha ’tu te tahi i te tahi.” (Roma 13:8) Te vai ra ’tu â râ te tumu e tia ’i e “ei haerea aroha to tatou.”

No te aha e mea faufaa roa ’i te aroha

4, 5. No te aha e mea faufaa ’i ia faaite tatou i te aroha haapae ia ’na iho i te mau hoa faaroo?

4 No te aha e mea faufaa ’i ia faaite tatou i te aroha i te mau hoa faaroo? Ei faaohieraa, o te niu iho te aroha no te Kerisetianoraa mau. Aita ana‘e te aroha, eita ta tatou e nehenehe e faatupu i te taairaa piri e te mau hoa Kerisetiano, e te mea ino atu â, aita to tatou e faufaa i te aro o Iehova. E hi‘o ana‘e e nafea te Parau a te Atua ia haamahitihiti i teie mau parau mau.

5 I te po hopea o to ’na oraraa i te fenua nei, ua parau Iesu i  ta ’na mau pǐpǐ e: “E tuu atu vau i te parau apî na outou, E aroha outou ia outou iho, mai ia ’u e aroha ’tu ia outou na, e aroha atoa hoi outou ia outou iho. O te mea teie e ite ai te taata atoa e, e pǐpǐ outou na ’u, ia aroha outou ia outou iho.” (Ioane 13:34, 35) “Mai ia ’u e aroha ’tu ia outou na”—oia, te faauehia ra tatou e faaite i te huru aroha ta Iesu i faaite. I roto i te pene 29, ua itea mai ia tatou e ua horoa Iesu i te hi‘oraa faahiahia roa i te faaiteraa i te aroha haapae ia ’na iho, a tuu ai i te mau hinaaro e te mau maitai o vetahi ê na mua ’‘e i to ’na iho. E tia atoa ia tatou ia faaite i te aroha miimii ore, e e tia ia tatou ia na reira ma te papu e ia ite-roa-hia e to rapaeau i te amuiraa Kerisetiano. Oia mau, ua riro te aroha taeae haapae ia ’na iho ei tapao e itehia ’i e e pǐpǐ mau tatou na te Mesia.

6, 7. (a) E nafea tatou e ite ai e e haafaufaa rahi te Parau a Iehova i te faaiteraa i te aroha? (b) Te onoono ra te mau parau a Paulo i roto i te Korinetia 1, 13:4-8 i nia i teihea tuhaa o te aroha?

6 Eaha ïa mai te peu e aita to tatou e aroha? “Aita o ’u aroha,” o ta te aposetolo Paulo ïa i parau, “ua riro ïa vau mai te veo ooto ra, e mai te sumebalo maniania ra.” (Korinetia 1, 13:1) Mea puai te maniania o te hoê sumebalo. E te veo ooto ra? Te parau ra te tahi atu mau huriraa “te hoê ôe maniania” aore ra “te hoê ôe ooto.” Auê ïa faahoho‘araa tano mau e! E au te hoê taata aita to ’na e aroha i te hoê upaupa e faatupu ra i te maniania puai e te au ore o te faaahoahoa, eita râ e anaanataehia. E nafea te hoê taata mai tera e fana‘o ai i te taairaa piri e vetahi ê? Ua parau atoa Paulo e: “Tei ia ’u te mau faaroo . . . atoa e tia ’i ia hopoi ê atu i te mou‘a, e aore o ’u aroha, aita roa a ’u e faufaa.” (Korinetia 1, 13:2) A feruri noa na, ‘aita roa e faufaa’ to te hoê taata aita to ’na e aroha, noa ’tu te mau ohipa atoa ta ’na e nehenehe e rave! E ere anei i te mea maramarama e te haafaufaa rahi ra te Parau a Iehova i te faaiteraa i te aroha?

7 E nafea râ tatou e faaite ai i teie huru maitai ia haa tatou i nia ia vetahi ê? No te pahono atu, e faahohonu ana‘e i te mau parau a Paulo i roto i te Korinetia 1, 13:4-8. I roto i teie mau irava, aita e haamahitihitihia ra to te Atua aroha ia tatou aore  ra to tatou here ia ’na. Te haapapu ra râ Paulo i te huru e tia ’i ia tatou ia faaite i te aroha te tahi i te tahi. Ua faataa oia i te tahi mau mea e au i te aroha e te tahi mau mea eita e au atu.

Te mau mea e au i te aroha

8. E nafea te faaoromairaa ia tauturu mai i roto i ta tatou mau haaraa i nia ia vetahi ê?

8 “E faaoromairaa roa to te aroha.” Te faaoromairaa, te haamahuraa ïa ia vetahi ê. (Kolosa 3:13) Aita anei tatou e hinaaro ra i taua huru faaoromai ra? No te mea e mau mea ora tia ore tatou e tavini piri ra te tahi i te tahi, i te tahi taime, e nehenehe iho â tatou e taahoa i to tatou mau taeae Kerisetiano e na reira atoa ratou ia tatou. E nehenehe râ te faaoromai e te haamahuraa e tauturu mai ia faaruru i te mau ahoahoa rii ta tatou e farerei ra i roto i ta tatou mau haaraa i nia ia vetahi ê—ma te ore e haapeapea i te hau o te amuiraa.

9. E nafea tatou e nehenehe ai e faaite i te maitai i nia ia vetahi ê?

 9 ‘E hamani maitai to te aroha.’ E faaitehia te maitai na roto i te mau ohipa faufaa e te mau parau î i te haapao maitai. E turai te aroha ia tatou ia imi i te ravea e faaite ai i te maitai, i nia iho â râ i tei hinaaro roa ’‘e i te tauturu. Ei hi‘oraa, te moemoe ra paha te hoê hoa faaroo paari e te hinaaro ra paha i te tahi tere faaitoitoraa. Te hinaaro ra paha te hoê metua vahine taa noa aore ra te hoê tuahine e ora ra i roto i te hoê utuafare amahamaha i te pae faaroo, i te tauturu. Te hinaaro ra paha te hoê taata ma‘i aore ra te hoê taata e farerei ra i te ati e faaroo i te tahi mau parau maitatai a te hoê hoa taiva ore. (Maseli 12:25; 17:17) Ia mata tatou i te na reira i te faaite i te maitai, te faaite ra tatou e mea mau iho â to tatou aroha.—Korinetia 2, 8:8.

10. E nafea te aroha ia tauturu mai ia paturu e ia parau tatou i te parau mau, noa ’tu e e ere i te mea ohie ia na reira?

10 ‘E oaoa te aroha i te parau mau.’ Te na ô ra te tahi atu huriraa e: ‘E tia te aroha ma te oaoa i te paeau o te parau mau.’ E turai te aroha ia tatou ia paturu i te parau mau e ia ‘parau i te parau mau i to tatou taata-tupu.’ (Zekaria 8:16) Mai te peu e, ei hi‘oraa, ua rave te hoê taata here i te hara ino, e tauturu mai te here ia Iehova—e i te taata i hara—ia haapao maite i te mau ture aveia a te Atua, eiaha râ ia tamata i te huna, i te faatia, aore ra i te haavare atoa no nia i te hara. Parau mau, mea fifi paha ia farii e ua tupu mau â te reira. Ia haamana‘o râ tatou i te mea maitai roa ’‘e no to tatou hoa here, e hinaaro tatou ia farii oia i te hoê faaiteraa o te a‘oraa î i te here a te Atua. (Maseli 3:11, 12) Ei Kerisetiano î i te here, e hinaaro atoa tatou ‘ei haapao maitai ta tatou i te mau mea atoa nei.’—Hebera 13:18.

11. I te mea e “e tapo‘i” te aroha “i te mau mea atoa,” eaha te tia ia tatou ia tutava i te rave no nia i te mau hape o to tatou mau hoa faaroo?

11 ‘E tapo‘i te aroha i te mau mea atoa.’ Teie te auraa mau o taua parau ra, “te mau mea atoa, ta te reira ïa e tapo‘i ra.” (Kingdom Interlinear) Te na ô ra te Petero 1, 4:8 e: “E moe hoi te hapa e rave rahi i te aroha.” Oia, eita te hoê Kerisetiano o te arataihia e te aroha e ru i te faaite haere i te mau hapa atoa e  te mau hape atoa o to ’na mau taeae Kerisetiano. Te rahiraa o te taime, e mau hape rii to to tatou mau hoa faaroo e e nehenehe e tapo‘ihia e te aroha.—Maseli 10:12; 17:9.

E turai te aroha ia faaite tatou i te tiaturi i to tatou mau taeae

12. Mea nafea to te aposetolo Paulo faaiteraa e te tiaturi ra oia i te mea maitai roa ’‘e no nia ia Philemona, e eaha te tia ia tatou ia haapii mai na roto i te hi‘oraa o Paulo?

12 ‘E [“tiaturi,” MN] te aroha i te mau mea atoa.’ Te na ô ra te huriraa a Moffatt e “e hinaaro noa” te aroha “e tiaturi i te mea maitai roa ’‘e.” Eiaha tatou ia mana‘o ino rahi roa i te mau hoa faaroo, a feaa ’i i to ratou mau mana‘o turai atoa. E tauturu mai te aroha ia “tiaturi i te mea maitai roa ’‘e” no nia i to tatou mau taeae. * A tapao na i te hoê hi‘oraa i roto i te rata a Paulo ia Philemona. Te papai ra Paulo no te faaitoito ia Philemona e farii ma te maitai ia ho‘i atu te tavini tei horo ê ra o Onesimo, tei riro mai ei Kerisetiano. Aita Paulo i tamata i te faahepo ia Philemona, ua titau maoti oia na nia i te aroha. Ua faaite oia i te tiaturi e e rave iho â Philemona i te mea tia, a na ô ai e: “Te tiaturi nei au i to oe faatiaraa mai i papai atu ai au i teie nei parau ia oe, ua ite hoi au e, e rahi atu â ta oe i ta ’u e ani nei.” (Irava 21) Ia turai te aroha ia tatou ia faaite i taua tiaturi ra i to tatou mau taeae, e faatupu tatou i te mea maitai roa ’‘e i roto ia ratou.

13. E nafea tatou ia faaite e te tiai ra tatou i te mea maitai roa ’‘e no to tatou mau taeae?

13 ‘E tiai te aroha i te mau mea atoa.’ Mai no te tiaturi, e huru tiai atoa to te aroha. Ma te turaihia e te aroha, e tiai tatou i te mea maitai roa ’‘e no to tatou mau taeae. Ei hi‘oraa, ia “hape” te hoê taeae “hou oia e ite ai,” e tiai tatou e e farii oia i te mau tutavaraa î i te here e faatitiaifaro ia ’na. (Galatia 6:1) E tiai atoa tatou e e maitai mai tei paruparu i te pae faaroo. E faaoromai tatou ia ratou, a rave ai i tei maraa ia tatou no te tauturu atu ia puai mai i te pae faaroo. (Roma 15:1; Tesalonia 1, 5:14) Noa ’tu e e atea ê atu te hoê taata here, eiaha tatou ia  faaea i te tiai e, i te hoê mahana, e ho‘i mai to ’na huru mau e e ho‘i mai oia ia Iehova ra, mai te tamaiti haamâu‘a faufaa i roto i te parabole a Iesu.—Luka 15:17, 18.

14. E nafea paha to tatou haamahuraa e tamatahia ’i i roto i te amuiraa, e e tauturu mai te aroha ia nafea tatou?

14 ‘E haamahu te aroha i te mau mea atoa.’ Maoti te haamahuraa e mau papu ai tatou ia farerei tatou i te inoino aore ra i te fifi. Eita te mau tamataraa i te haamahuraa e tae mai na rapaeau noa mai i te amuiraa. I te tahi taime, e tamatahia tatou na roto mai. No te huru tia ore, e nehenehe tatou i te tahi taime e inoino i to tatou mau taeae. E mauiui paha to tatou aau i te hoê parau feruri-ore-hia. (Maseli 12:18) Aita paha te hoê ohipa a te amuiraa i haapaohia mai ta tatou i mana‘o. E peapea paha tatou no te haerea o te hoê taeae faaturahia, a uiui ai e, ‘E nafea te hoê Kerisetiano e nehenehe ai e na reira?’ Ia faaû tatou i taua mau huru tupuraa ra, e faarue anei tatou i te amuiraa a faaea ’tu ai i te tavini ia Iehova? Eita ïa mai te peu e e aroha to tatou! Oia, e tapea te aroha eiaha ia po roa to tatou mata no te mau hape o te hoê taeae e ia ore roa ’tu tatou ia haroaroa i te maitai e vai ra i roto ia ’na aore ra i roto i te amuiraa ei taatoaraa. Maoti te aroha e taiva ore ai tatou i te Atua e e turu ai i te amuiraa noa ’tu eaha ta te tahi atu taata tia ore e parau aore ra e rave.—Salamo 119:165.

Te mau mea eita e au i te aroha

15. Eaha te feii, e e nafea te aroha ia tauturu mai i te ape i teie huru aau tuino?

15 “E ore te aroha e feii.” E nehenehe te feii e turai ia tatou ia nounou i ta vetahi ê mau mea—ta ratou mau faufaa, mau fana‘oraa taa ê, aore ra mau aravihi. Taua feii ra, e huru aau miimii ïa o te tuino, o te nehenehe e haapeapea i te hau o te amuiraa ia ore ia haavîhia. Na te aha e tauturu mai ia patoi i “te feii”? (Iakobo 4:5) Hoê noa parau, te aroha. Maoti teie huru maitai e oaoa ’i tatou e te feia e au ra e te fana‘o ra i te mau mea i roto i te oraraa aita ta tatou iho. (Roma 12:15) E tauturu te aroha eiaha ia faariro mai te hoê hara i nia ia tatou  ia haapopouhia te hoê taata no te tahi aravihi taa ê aore ra te tahi ohipa faahiahia roa.

16. Ia aroha mau tatou i to tatou mau taeae, no te aha tatou e ape ai i te faatietie i ta tatou e rave ra i roto i ta Iehova taviniraa?

16 “E ore te aroha e faarahi, e ore hoi e faaahaaha.” E tapea te aroha eiaha tatou ia faaiteite i to tatou mau aravihi aore ra mau ohipa. Ia aroha mau tatou i to tatou mau taeae, e nafea tatou e nehenehe ai e faarahi tamau noa i to tatou manuïaraa i roto i te taviniraa aore ra ta tatou mau fana‘oraa taa ê i roto i te amuiraa? E nehenehe taua faatietieraa ra e faatoaruaru ia vetahi ê, mana‘o atu ai ratou e mea faufaa ore a‘e ratou. Eita te aroha e faatia ia faateitei tatou no nia i ta te Atua e farii ia rave tatou i roto i ta ’na taviniraa. (Korinetia 1, 3:5-9) Hau atu â, “e ore” te aroha “e faaahaaha,” aore ra mai ta te hoê huriraa e parau ra, eita e “poihere i te mau mana‘o faaoru i to ’na iho faufaaraa.” E tapea te aroha eiaha ia teitei roa to tatou mana‘o ia tatou iho.—Roma 12:3.

17. E turai te aroha ia tatou ia nafea i te haapao maitai ia vetahi ê, e eaha ïa te huru haerea ta tatou e ape?

17 ‘Eita te aroha e rave i te mea au ore.’ Ia rave te hoê taata i te mea au ore, te haa ra oia ma te tano ore roa aore ra ma te hairiiri. E ere taua haerea ra i ta te aroha, no te mea e vahavaharaa rahi roa te reira i te mau huru aau e te vai-maitai-raa o vetahi ê. Area râ, mea maitai te aroha o te turai ia tatou ia faaite i te haapao maitai ia vetahi ê. E faaitoito te aroha i te mau peu maitatai, te haerea fariihia e te Atua, e te faatura i to tatou mau hoa faaroo. Eita ïa te aroha e faatia ia rave tatou i “te parau tiaâ”—oia mau, te mau haerea atoa o te faaturori i to tatou mau taeae Kerisetiano.—Ephesia 5:3, 4.

18. No te aha te hoê taata e aroha to ’na e ore ai e titau ia ravehia te mau mea atoa ia au i to ’na hinaaro?

18 ‘Eita te aroha e imi i te maitai no ’na iho.’ Te na ô ra te tahi atu huriraa e: “Eita te aroha e onoono i nia i to ’na iho hinaaro.” Eita te hoê taata e aroha to ’na e titau e ia ravehia te mau mea atoa ia au i to ’na hinaaro, mai te huru ra e e tano noa to ’na mau mana‘o. Eita oia e faateretere ia vetahi ê, a faaohipa  ’i i to ’na mana haapapuraa mana‘o e ia fati roa ’tu te feia e mana‘o ê to ratou. E faaite taua huru mârô ra i te tahi faito teoteo, te na ô ra hoi te Bibilia e: “O te teoteo to te pohe ra na mua.” (Maseli 16:18) Ia aroha mau tatou i to tatou mau taeae, e faatura tatou i to ratou mana‘o, e ia nehenehe ra, e faaite tatou i te aau tae e tuu noa ’tu. E au maite te hoê varua tuu haere noa i te mau parau a Paulo: “Eiaha roa ei taata e imi i to ’na ana‘e iho maitai, e imi râ te taata atoa i te maitai o vetahi ê atoa.”—Korinetia 1, 10:24.

19. Ia haamauiui mai vetahi ê ia tatou, e tauturu mai te aroha ia nafea?

19 ‘Eita te aroha e riri vave; eita e mana‘o ino ia vetahi ê.’ Eita te aroha e riri haere noa i ta vetahi ê e parau aore ra e rave. Parau mau, e huru ê iho â tatou ia haamauiui mai vetahi ê ia tatou. Noa ’tu râ e ua tia to tatou ririraa, eita te aroha e faatia ia riri noa tatou. (Ephesia 4:26, 27) Eiaha tatou ia haamana‘o noa i te mau parau aore ra te mau ohipa haamauiui, mai te huru ra e te papai ra tatou i te reira i roto i te hoê buka tuatapaparaa eiaha ia moehia. E turai maoti te aroha ia tatou ia pee i to tatou Atua aroha. Mai ta tatou i ite mai i roto i te pene 26, e faaore Iehova i te hara mai te peu e te vai ra te tumu maitai e na reira ’i. Ia faaore oia i ta tatou hara, e haamoe oia, oia hoi, eita oia e inoino ia tatou no taua mau hara ra ia tae i te hoê mahana. Aita anei tatou e mauruuru ra e eita Iehova e haapao faahou i te ino i ravehia?

20. Ia nafea tatou ia topa te hoê hoa faaroo i roto i te hara e ia mauiui rahi oia ei faahopearaa?

20 ‘Eita te aroha e oaoa i te parau-tia ore.’ Te na ô ra te tahi atu huriraa i ǒ nei e: ‘Eita te aroha e mauruuru i te hara a te tahi atu mau taata.’ Te na ô ra te huriraa a Moffatt e: “Eita roa ’tu te aroha e oaoa ia hape vetahi ê.” Eita roa ’tu te aroha e au i te parau-tia ore, eita ïa tatou e haafaufaa ore i te mau huru morare ore atoa. Eaha to tatou huru ia topa te hoê hoa faaroo i roto i te hara e ia mauiui rahi oia ei faahopearaa? Eita te aroha e faatia ia oaoa tatou, mai te huru ra e te parau ra tatou e ‘Ua tano roa! Te reira râ ta ’na!’ (Maseli 17:5) E oaoa mau râ tatou  ia rave te hoê taeae tei hape i te mau taahiraa maitatai ia ora mai oia i to ’na toparaa pae varua.

“Te e‘a maitai rahi roa ra”

21-23. (a) Eaha ta Paulo e hinaaro ra e parau i te na ôraa e “e ore roa te aroha e mou”? (b) Eaha te faahohonuhia i roto i te pene hopea?

21 “E ore roa te aroha e mou.” Eaha ta Paulo e hinaaro ra e parau na roto i taua mau parau ra? Mai tei itehia i roto i te mau irava tapiri, te tauaparau ra oia no nia i te mau ô a te varua e vai ra i roto i te mau Kerisetiano matamua. Ua riro taua mau ô ra ei tapao e te farii maitai ra te Atua i te amuiraa no haamau-noa-hia ’tura. E ere râ o te mau Kerisetiano atoa tei tia ia faaora, ia tohu, aore ra ia parau i te reo ěê. E ere râ te reira i te mea faufaa; e ore atu iho â te mau ô semeio. E vai noa râ te tahi atu mea, te hoê mea e tia i te mau Kerisetiano atoa ia faahotu.  Mea faahiahia a‘e, mea taraire a‘e i te mau ô semeio atoa. Oia mau, ua parau Paulo i te reira “te e‘a maitai rahi roa ra.” (Korinetia 1, 12:31) Eaha na taua “e‘a maitai rahi roa ra”? O te e‘a ïa o te aroha.

E itehia te nunaa o Iehova i to ratou aroha te tahi i te tahi

22 Oia mau, “e ore roa” te aroha Kerisetiano ta Paulo e faataa ra “e mou,” oia hoi, eita roa ’tu e ore. Tae roa mai i teie tau, te faaite ra te aroha taeae haapae ia ’na iho o vai te mau pǐpǐ mau a Iesu. Aita anei tatou e ite ra i taua aroha ra i roto i te mau amuiraa a te feia haamori ia Iehova na te ao atoa nei? E vai noa taua aroha ra e a muri noa ’tu, no te mea te fafau ra Iehova i te ora mure ore no ta ’na mau tavini haapao maitai. (Salamo 37:9-11, 29) Ia tamau tatou i te tutava e “ei haerea aroha to tatou.” Ia na reira tatou, e ite mai tatou i te oaoa rahi a‘e e horoa. Hau atu â, e nehenehe tatou e tamau noa i te ora—oia, e tamau noa i te aroha—e a muri noa ’tu, ei peeraa i to tatou Atua aroha ra o Iehova.

23 I roto i teie pene hopea o te tuhaa no nia i te aroha, ua tauaparau tatou e nafea ia faaite i te aroha te tahi i nia i te tahi. No te mau huru e rave rahi râ e faufaahia ’i tatou i te aroha o Iehova—e i to ’na atoa mana, ta ’na parau-tia, e to ’na paari—mea maitai ia ui tatou e, ‘E nafea vau e faaite ai ia Iehova e te here mau ra vau ia ’na?’ E faahohonuhia teie uiraa i roto i ta tatou pene hopea.

^ par. 12 Papu maitai, eita roa ’tu te aroha Kerisetiano e vare haere noa. Te a‘o maira te Bibilia e: “E hi‘o maitai iho na outou i te feia i faataa ê, e te faatupu i te mea e turori ai ra, . . . e fariu ê atu outou ia ratou.”—Roma 16:17.

No te ite atu â

TE PARE TIAIRAA

E paturu te haapaoraa maitai i te here taeae

Teihea haapaoraa e haapii ra i to ’na mau melo ia hoê noa ’tu te mau fifi i te pae poritita, nunaa, e totiare e faaamahamaha ra i te taata?