Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

E haafatata ’tu ia Iehova

 PENE 23

“Oia na mua tei aroha mai ia tatou nei”

“Oia na mua tei aroha mai ia tatou nei”

1-3. Eaha te tahi mau mea e ore ai to Iesu poheraa e au i te tahi atu i roto i te tuatapaparaa?

I TE hoê mahana o te tau uaaraa tiare fatata a 2 000 matahiti a‘enei, ua haavahia te hoê taata hara ore, ua parihia i te mau hara aita oia i rave a‘enei, e hamani-ino-hia ’tura a pohe roa ’tu ai. E ere tera te matamua o te haapoheraa ino e te tia ore i roto i te tuatapaparaa; e ere atoa râ hoi i te hopea. E ere râ taua poheraa ra mai te tahi atu.

2 A mauiui ai taua taata ra i te mauiui pohe o to ’na mau hora hopea, ua tapao te ra‘i iho i te faufaaraa o te tupuraa ra. Noa ’tu e tei te afaraa noâ o te mahana, ua mairi taue mai te pouri i nia i te fenua. Mai ta te hoê taata tuatapapa i papai, “haapourihia ihora te mahana.” (Luka 23:44, 45) I reira, hou noa a pohe atu ai te taata ra, ua parau oia i teie mau parau eita e moehia: “Ua oti.” Oia mau, na roto i te pûpûraa i to ’na ora, ua oti ia ’na te hoê mea faahiahia roa. Ua riro ta ’na tusia ei ohipa aroha rahi roa ’‘e i ravehia a‘enei e te hoê taata.—Ioane 15:13; 19:30.

3 Taua taata ra, o Iesu Mesia iho â ïa. Mea matau-maitai-hia to ’na mauiui e to ’na poheraa i taua mahana rumaruma ra o te 14 no Nisana 33 T.T. Mea pinepine râ i te tâu‘a-ore-hia te hoê mea faufaa. Noa ’tu e ua mauiui roa ino Iesu, ua mauiui roa ’tu â te hoê taata ê atu. Oia mau, e taata ê atu tei rave i te hoê faatusiaraa rahi atu â i taua mahana ra—te ohipa aroha rahi roa ’‘e i ravehia a‘enei i roto i te ao taatoa. Eaha taua ohipa ra? E horoa mai te pahonoraa i te hoê faaomuaraa tano i te tumu parau faufaa roa ’‘e: te aroha o Iehova.

 Te ohipa aroha rahi roa ’‘e

4. Mea nafea to te hoê faehau Roma iteraa e e ere Iesu i te taata au noa, e eaha ta taua faehau ra i faaoti?

4 Ua maere roa te faehau toroa Roma e tiaau ra i te haapoheraa o Iesu i te pouri i tupu hou noa to Iesu poheraa e i te aueueraa fenua rahi i tupu i muri noa mai. “O te Tamaiti mau â teie na te Atua,” o ta ’na ïa i parau. (Mataio 27:54) Papu maitai, e ere Iesu i te taata au noa. Ua tauturu taua faehau ra i te haapohe i te Tamaiti fanau tahi o te Atua Teitei Roa ’‘e! Mai te aha mau na te faahiahia taua Tamaiti ra no to ’na Metua?

5. E nafea te tau roa mau i ati noa ’i Iehova e ta ’na Tamaiti i nia i te ra‘i e nehenehe ai e faahoho‘ahia?

5 Te parau ra te Bibilia ia Iesu “[te matahiapo o] te mau mea atoa i hamanihia.” (Kolosa 1:15; MN) A feruri noa na—te vai a‘ena ra te Tamaiti a Iehova hou te ao materia. Mai te aha ïa te maoro to te Metua e te Tamaiti atiraa? Te mana‘o ra te tahi mau aivanaa e 13 miria matahiti to te ao nui. E nehenehe anei ta outou e feruri noa ’‘e i taua roaraa tau ra? No te tauturu ia taa i te taata te faito matahiti o te ao nui mai tei mana‘ohia e te mau aivanaa, te faataa ra te hoê hoho‘a o te reva teitei i te taime na roto i te hoê reni 110 metera i te roa. A haere ai te mau ratere i te roaraa o taua reni o te taime ra, e au to ratou taahiraa avae taitahi fatata i te 75 mirioni matahiti o te vairaa o te ao nui. I te hopea o te reni o te taime, ua faahoho‘ahia te tuatapaparaa taatoa o te taata e te hoê noa tapao mai te hoê rouru taata i te meumeu! Teie râ, noa ’tu e mea tano teie huru faitoraa, eita taua reni taatoa o te taime ra e navai i te roa no te faahoho‘a i te oraraa o te Tamaiti a Iehova! Eaha ta ’na ohipa i te roaraa o taua tau roa mau ra?

6. (a) Eaha na te ohipa a te Tamaiti a Iehova i te roaraa o to ’na oraraa hou a riro ai ei taata? (b) Eaha te huru taairaa e vai ra i rotopu ia Iehova e ta ’na Tamaiti?

6 Ua tavini te Tamaiti ma te oaoa ei “rave ohipa aravihi” na to ’na Metua. (Maseli 8:30, MN) Te na ô ra te Bibilia e: “Aore [te Tamaiti] ra, aore ïa e mea i hamanihia.” (Ioane 1:3, MN) Ua rave amui ïa Iehova e ta ’na Tamaiti i te ohipa no te hamani i te tahi atu mau mea atoa. Auê ïa taime re‘are‘a e te oaoa ta raua i fana‘o!  Ei teie nei, e rave rahi o te farii e mea maere te puai o te here i rotopu i te metua e te tamarii. E ua riro te aroha ei “tatua nehenehe roa.” (Kolosa 3:14) O vai ïa i roto ia tatou o te nehenehe e haroaroa i te mana o te hoê taairaa i vai na i te roaraa o te hoê tau roa mau? Papu maitai, ua tahoêhia te Atua ra o Iehova e ta ’na Tamaiti e te taairaa here puai roa ’‘e i haamauhia a‘enei.

7. I to Iesu bapetizoraahia, mea nafea to Iehova faaiteraa i to ’na mana‘o no nia i ta ’na Tamaiti?

7 Noa ’tu râ, ua tono te Metua i ta ’na Tamaiti i te fenua nei ia fanauhia ei tamarii a te taata. I te na reiraraa, ua ere ïa Iehova i te taairaa piri e ta ’na Tamaiti here i nia i te ra‘i tau ahuru matahiti i te maoro. Ma te anaanatae rahi, ua hi‘o Oia mai te ra‘i mai a paari mai ai Iesu e a riro mai ai ei taata tia roa. I te 30raa o to ’na matahiti, ua bapetizohia Iesu. Eiaha tatou ia feruri noa eaha to Iehova mana‘o ia ’na. Ua parau roa mai hoi te Metua iho mai te ra‘i mai e: “Tau Tamaiti here teie, ua mauruuru roa vau ia ’na.” (Mataio 3:17) Ua oaoa roa iho â ïa to ’na Metua i te iteraa e ua rave Iesu ma te haapao maitai i te mau mea atoa i tohuhia, i te mau mea atoa i anihia ’tu ia ’na!—Ioane 5:36; 17:4.

8, 9. (a) Eaha te mau mea i ravehia i nia ia Iesu i te 14 no Nisana 33 T.T., e mea nafea te reira i te ohiparaa i nia i to ’na Metua i te ra‘i? (b) No te aha Iehova i vaiiho ai ia haamauiuihia e ia pohe ta ’na Tamaiti?

8 Eaha râ to Iehova huru i te 14 no Nisana 33 T.T.? Eaha to ’na huru i to Iesu haavareraahia e tapearaahia e te hoê nahoa taata i te hoê po? I to Iesu faarueraahia e to ’na mau hoa e faarururaa i te hoê haavaraa tia ore? I to ’na faaoooraahia, tufaraahia i te huare, e motoraahia? I to ’na pǎpǎiraahia, i te hitoretoreraa to ’na tua? I to ’na patǐtǐraahia i te naero, i nia i te rima e te avae, i nia i te hoê pou raau e rîraahia i reira a tuhi ai te taata ia ’na? Eaha te huru o te Metua i to ta ’na Tamaiti here tuôraa ’tu ia ’na i roto i te mau mauiui o te pohe? Eaha to Iehova huru i to Iesu hutiraa i to ’na hutiraa aho hopea, e a tahi ra hoi mai te haamataraa o te poieteraa atoa, ta ’Na Tamaiti here a ore ai e vai faahou?—Mataio 26:14-16, 46, 47, 56, 59, 67; 27:38-44, 46; Ioane 19:1.

‘Ua horoa mai te Atua i ta ’na Tamaiti fanau tahi’

9 Aita e parau no te faataa i te reira. I te mea e e huru aau to Iehova, eita e navai te puai o te mau parau no te faataa i te mauiui  ta ’na i faaoromai i te poheraa ta ’na Tamaiti. Te mea e nehenehe e faataahia, o te tumu ïa i faatia ’i Iehova i te reira. No te aha te Metua i vaiiho ai ia roohia oia i taua mau huru aau ra? E itehia te tumu i roto i te hoê irava Bibilia i parauhia te Evanelia i haapotohia. Te na ô ra te Ioane 3:16 e: “I aroha mai te Atua i to te ao, e ua tae roa i te horoa mai i ta ’na Tamaiti fanau tahi, ia ore ia pohe te faaroo ia ’na ra, ia roaa râ te ora mure ore.” Tera ïa te tumu i na reira ’i Iehova: te aroha. Ua riro te ô a Iehova—oia hoi to ’na tonoraa i ta ’na Tamaiti ia haamauiuihia e ia pohe oia no tatou—ei ohipa aroha rahi roa ’‘e i ravehia a‘enei.

Faataahia te aroha o te Atua

10. Eaha te hinaaro o te taata, e eaha te mea i tupu no nia i te auraa o te ta‘o ra “aroha”?

10 Eaha te auraa o teie ta‘o “aroha”? Ua faataahia te aroha mai te mea i hinaaro-rahi-roa ’‘e-hia e te taata. Mai te fanauraa mai e tae atu i te poheraa, e imi hua te taata i te aroha, e tupu maitai maoti to te reira mahanahana, e e maheahea e e pohe atu ia ere ratou i te reira. Te mea maere râ, mea fifi ia faataa ’tu. Mea paraparau roa iho â te taata no nia i te aroha. Eita e pau te mau buka, te mau himene e te mau pehepehe no nia i te reira. Eita râ te reira e haamaramarama noa i te auraa o te aroha. Oia mau, no te mea hoi e ua faaohipa-rahi-roa-hia te ta‘o ra, e au atura e mea taa ore roa ’tu â to ’na auraa mau.

11, 12. (a) Ihea tatou e haapii rahi ai no nia i te aroha, e no te aha? (b) Eaha te mau huru aroha i faataa-ê-hia i roto i te reo Heleni tahito, e teihea ta‘o no “aroha” i faaohipa-pinepine-roa ’‘e-hia i roto i te mau Papai Heleni Kerisetiano? (A hi‘o atoa i te  nota i raro i te api.) (c) Eaha te a·gaʹpe?

11 Te haapii maira râ te Bibilia eaha mau na te aroha ma te maramarama. Te na ô ra te titionare a Vine (Expository Dictionary of New Testament Words) e: “E itehia te aroha na roto noa i te mau ohipa ta te reira e turai ia rave.” Te haapii rahi maira te faatiaraa bibilia i te mau ohipa a Iehova no nia i to ’na aroha—to ’na here hamani maitai i te mau mea ora ta ’na i poiete. Ei hi‘oraa, eaha ’tu â te nehenehe e faaite maitai i teie huru to ’na maori râ te ohipa aroha rahi roa ’‘e a Iehova i faataahia na mua ’tu? I roto i te  mau pene i muri nei, e ite mai tatou e rave rahi atu â hi‘oraa ia ohipa to Iehova aroha. Hau atu â, e noaa ia tatou te tahi maa haroaroaraa maoti te mau ta‘o tumu i faaohipahia no “aroha” i roto i te Bibilia. I roto i te reo Heleni tahito, te vai ra e maha ta‘o no “aroha.” * I roto i te reira, tei faaohipa-pinepine-roa ’‘e-hia i roto i te mau Papai Heleni Kerisetiano, o a·gaʹpe ïa. Te parau ra te hoê faatoro Bibilia i te reira “te ta‘o puai roa ’‘e no aroha.” No te aha?

12 E au te a·gaʹpe i te aroha e arataihia e te mau faaueraa tumu. E hau atu ïa i te hoê noa huru aau i mua i te tahi atu taata. Mea aano a‘e to ’na niu, mea mana‘o a‘e ia vetahi ê e mea hinaaro tae a‘e. Hau atu i te mau mea atoa, mea miimii ore roa ino te a·gaʹpe. Ei hi‘oraa, a rave faahou na i te Ioane 3:16. Eaha “te ao” ta te Atua i aroha roa i horoa mai ai oia i ta ’na Tamaiti fanau tahi? O te ao ïa o te mau taata e tia ia hoo-faahou-hia mai. To roto hoi te taata e rave rahi e pee ra i te hoê huru oraraa hara. Te here ra anei Iehova i te taata taitahi mai te hoê hoa no ’na, mai ia ’na i here i te taata haapao maitai ra o Aberahama? (Iakobo 2:23) Aita, te faatae ra râ Iehova ma te aroha i te maitai i nia i te taatoaraa, noa ’tu te rahi o te haapaeraa ia ’na iho. Te hinaaro ra oia ia tatarahapa te taatoaraa e ia taui i to ratou haerea. (Petero 2, 3:9) E rave rahi te na reira. E farii oia ia ratou ma te oaoa ei hoa no ’na.

13, 14. Na te aha e faaite e e pinepine te a·gaʹpe i te au i te here mahanahana?

13 Mea hape râ te mana‘o o te tahi pae no nia i te a·gaʹpe. Te mana‘o ra ratou e o te hoê huru aroha toetoe, to te upoo noa tera. E pinepine mau râ te a·gaʹpe i te au atoa i te here mahanahana. Ei hi‘oraa, i to Iesu parauraa e, “Te here nei te Metua i te Tamaiti,”  ua faaohipahia te hoê huru o te ta‘o ra a·gaʹpe. Aita anei e mahanahana i roto i taua aroha ra? A tapao na e ua parau atoa Iesu e, ‘E here hoi te Metua i te Tamaiti,’ ma te faaohipa i te hoê huru o te ta‘o ra phi·leʹo. (Ioane 3:35; 5:20) E pinepine te aroha o Iehova i te au i te here. Eita roa ’tu râ to ’na aroha e faahuru-ê-hia e te huru aau noa. Mea aratai-noa-hia e ta ’na mau faaueraa tumu paari e te parau-tia.

14 Mai ta tatou i ite mai, mea maitai roa, mea tia roa e te anaanatae te mau huru maitatai atoa o Iehova. O te aroha râ te mea anaanatae roa ’‘e. Aita ’tu mea o te faatae ia tatou ia Iehova ma te puai mai tera. Auaa, o te aroha atoa to ’na huru maitai rahi roa ’‘e. Mea nafea tatou i ite ai?

“E aroha hoi te Atua”

15. Eaha ta te Bibilia e parau ra no nia i te ateriputi o Iehova oia te aroha, e e nafea te reira e riro ai ei parau taa ê? (A hi‘o atoa i te  nota i raro i te api.)

15 Te parau ra te Bibilia i te hoê mea no nia i te aroha aita e parauhia nei no nia i te tahi atu mau ateriputi rarahi o Iehova. Eita te mau Papai e parau e e puai te Atua aore ra e parau-tia te Atua aore ra e paari te Atua. Te vai ra to ’na tera mau huru maitatai, o oia te tumu rahi o te reira, e aita to ’na e faaau no nia i na mea e toru atoa ra. No nia râ i te maha o te ateriputi, e parau hohonu a‘e tei parauhia: “E aroha hoi te Atua.” * (Ioane 1, 4:8) Eaha to te reira auraa?

16-18. (a) No te aha te Bibilia e parau ai e “e aroha hoi te Atua”? (b) I roto i te mau mea ora atoa i te fenua nei, no te aha te taata e tano ai ei taipe no te ateriputi o Iehova oia te aroha?

16 E ere te parau ra “e aroha hoi te Atua” i te hoê noa faaaifaitoraa, mai te huru ra e te parauhia ra e, “e aifaito te Atua i te aroha.”  Eita e tano ia huri tatou i te parau ra ei “e Atua te aroha.” E hau roa ’tu Iehova i te hoê huru maitai fafa-ore-hia. E ihotaata oia ma te mau huru aau e te mau huru e rave rahi taa ê atu i te aroha. Mea hohonu roa râ te aroha o Iehova. No reira te hoê buka e parau ai no nia i teie irava e: “To te Atua huru mau aore ra natura, o te aroha ïa.” Ia na ô tatou i te feruri: maoti te puai o Iehova e ohipa ’i oia. E aratai to ’na parau-tia e to ’na paari i te huru e ohipa ’i oia. Na te aroha râ e turai ia ’na ia ohipa. E te vai noa ra to ’na aroha ia faaohipa oia i te tahi atu mau ateriputi to ’na.

17 E parau-pinepine-hia e o Iehova iho te aroha. No reira, ia hinaaro tatou e haapii no nia i te aroha agape, e tia ia tatou ia haapii no nia ia Iehova. Parau mau, e ite atoa paha tatou i teie huru maitai nehenehe i roto i te taata. No te aha râ e na reira ’i? I te tau o te poieteraa, ua faahiti Iehova i teie mau parau, papu maitai i nia i ta ’na Tamaiti: “E hamani [tâua] i te taata ma to [tâua] iho huru, ia au i to [tâua] iho hoho‘a.” (Genese 1:26; MN) I roto i te mau mea ora atoa i te fenua nei, o te mau tane e te mau vahine ana‘e te nehenehe e maiti e aroha e e pee ïa i to ratou Metua i te ra‘i. A haamana‘o na e ua faaohipa Iehova i te mau mea ora taa ê no te faataipe i to ’na mau ateriputi rarahi. Ua maiti râ Iehova i te mea teitei roa ’‘e ta ’na i poiete i te fenua nei, te taata, ei taipe no to ’Na huru maitai rahi roa ’‘e, te aroha.—Ezekiela 1:10.

18 Ia miimii ore, ia niuhia to tatou aroha i nia i te mau faaueraa tumu, te pee ra ïa tatou i te huru maitai rahi roa ’‘e o Iehova. Ua riro ïa mai ta te aposetolo Ioane i papai: “Area o tatou nei, te aroha nei tatou, no te mea oia na mua tei aroha mai ia tatou nei.” (Ioane 1, 4:19, MN) Mea nafea râ to Iehova aroha-na-mua-raa mai ia tatou?

Na Iehova i mata

19. No te aha e nehenehe ai e parau e e tuhaa rahi ta te aroha i roto i te ohipa poieteraa a Iehova?

19 E ere te aroha i te mea apî. Inaha hoi, na te aha i turai ia Iehova ia haamata i te poiete? E ere no te mea te moemoe ra oia e te hinaaro ra i te auhoaraa. E navai roa Iehova o oia ana‘e, eita oia e  ere i te hoê a‘e mea e tia ia vetahi ê ia horoa ’tu. Ua turai noa râ to ’na aroha, te hoê huru maitai o te ohipa, ia hinaaro oia e faafana‘o i te mau oaoaraa o te oraraa i te mau mea ora maramarama o te nehenehe e mauruuru i taua ô ra. O ta ’na Tamaiti fanau tahi “te [matamua] o te mau mea atoa a te Atua i hamanihia ra.” (Apokalupo 3:14; MN) I muri iho, ua faaohipa Iehova i teie Rave ohipa aravihi no te hamani i te tahi atu mau mea atoa, te mau melahi na mua. (Ioba 38:4, 7; Kolosa 1:16) Ua haamaitaihia teie mau varua puai i te tiamâraa, te maramarama, e te mau huru aau, e e nehenehe ta ratou iho e faatupu i te taairaa î i te here—te tahi e te tahi e, hau atu â, e te Atua ra o Iehova. (Korinetia 2, 3:17) No reira, ua here ratou no te mea ua here-na-mua-hia ratou.

20, 21. Ua ite roa ’tu Adamu e o Eva i teihea haapapuraa e te here ra Iehova ia raua, ua nafea râ raua?

20 Mai te reira atoa e te taata. Mai te haamataraa mai iho â, ua puohu-mau-hia Adamu e o Eva i roto i te here. I te mau vahi atoa i hi‘o ai raua i roto i to raua nohoraa paradaiso i Edene, i ite na raua i te haapapuraa e te here ra te Metua ia raua. A tapao na eaha ta te Bibilia e parau ra: “Ua ô hoi te Atua ra o Iehova i te ô i te pae i te hitia o te râ i Edene ra, e ua tuu ihora oia i te taata ta ’na i hamani ra i reira.” (Genese 2:8) Ua haere a‘ena anei outou i roto i te hoê ô aore ra aua nehenehe mau? Eaha ta outou i au roa ’‘e? Te maramarama e puta maira na roto mai i te mau rauere i roto i te hoê vahi marumaru? Te panairaa û faahiahia o te hoê pu tiare? Te ta‘i navenave o te hoê anavai iti e pihaa ra, o te mau manu e himene ra, o te mau manumanu e maniania ra? E te hau‘a no‘ano‘a o te mau tumu raau, te mau hotu e o te mau uaa tiare? Noa ’tu â te huru, aita e aua i teie tau e au i to Edene. No te aha?

21 Na Iehova iho i tanu i taua ô ra! Ua riro mau paha ei mea haviti taa ê roa. Te vai ra te mau huru raau atoa mea au mau no te nehenehe e no te mau hotu monamona. Mea faarari-maitai-hia te ô, mea ateatea, e mea oraora no te mau animara mea maere hoi to ratou huru rau. Te vai ra ta Adamu e o Eva te mau mea atoa e oaoa ’i e e î maitai ai to raua oraraa, tae noa ’tu te hoê ohipa mauruuru e te auhoaraa tia roa. O Iehova na mua tei here ia  raua, e e rave rahi tumu e na reira atoa ’tu ai raua ia ’na. Aita râ raua i na reira. Maoti i te auraro ma te here i to raua Metua i te ra‘i, ua orure raua i te hau ia ’na ma te miimii.—Genese, pene 2.

22. Mea nafea to te huru o Iehova i mua i te orureraa hau i Edene haapapuraa e “e ore roa te aroha e mou”?

22 Auê râ Iehova i te mauiui mau e! Ua inoino anei râ to ’na aau î i te here i teie orureraa hau? Aita! “E tia hoi to ’na [“aau,” MN] aroha [aore ra, “aroha taiva ore,” nota i raro i te api] i te vai-maite-raa.” (Salamo 136:1) No reira, opua oioi atura oia e rave i te mau faanahoraa î i te here no te hoo faahou mai i te mau huaai aau farii atoa o Adamu e o Eva. Mai ta tatou i ite mai, i roto i taua mau faanahoraa ra, te vai ra te tusia taraehara o ta ’na Tamaiti here tei riro hoi ei haapaeraa rahi roa no te Metua.—Ioane 1, 4:10.

23. Eaha te hoê o te mau tumu e riro ai Iehova ei “Atua no ’na te ao,” e eaha te uiraa faufaa roa e tauaparauhia i roto i te pene i muri nei?

23 Oia, mai te omuaraa mai, ua mata Iehova i te faaite i te aroha i te taata. Na roto i te mau ravea pau ore ia taio, “oia na mua tei aroha mai ia tatou nei.” E faatupu te aroha i te au maite e te oaoa, e ere ïa i te mea maere ia faataahia Iehova mai “te Atua no ’na te ao.” (Timoteo 1, 1:11) Teie râ, e hiti mai te hoê uiraa faufaa. E here mau anei Iehova ia tatou ei taata taitahi? No nia ïa te tumu parau i muri nei i te reira.

^ par. 11  I roto i te mau Papai Heleni Kerisetiano, ua faaohipa-pinepine-hia te ihoparau ra phi·leʹo, oia hoi “e here, e au, aore ra e hinaaro (mai ta te hoê e nehenehe e faatupu i nia i te hoê hoa rahi aore ra te hoê taeae).” Ua faaohipahia te hoê huru o te ihoparau ra stor·geʹ, aore ra here fetii hohonu, i roto i te Timoteo 2, 3:3 no te faaite e e ere rahi roa taua here ra ia tae i te mau mahana hopea. Aita te parau ra eʹros, aore ra here i rotopu i te hoê tane e te hoê vahine i faaohipahia i roto i te mau Papai Heleni Kerisetiano, noa ’tu e ua tauaparauhia taua huru here ra i roto i te Bibilia.—Maseli 5:15-20.

^ par. 15  E piti irava Bibilia te tuea ra i te reira: “E maramarama te Atua” e “E auahi aamu hoi to tatou Atua.” (Ioane 1, 1:5; Hebera 12:29) E tia râ ia taahia te reira mai te mau faahoho‘araa, no te mea te faaau ra te reira ia Iehova i te mau mea materia. E au Iehova i te maramarama, no te mea mea mo‘a oia e te tia. Aita e “pouri,” aore ra e viivii, o roto ia ’na. E e nehenehe oia e faaauhia i te auahi ia faaohipa oia i te mana haamou.