Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Eaha ta te Bibilia e haapii mau ra?

 TUHAA HAU

Ua fanauhia anei Iesu i Titema?

Ua fanauhia anei Iesu i Titema?

AITA te Bibilia e faaite maira inafea to Iesu fanauraahia. Te horoa maira râ te reira i te tumu papu e faaoti ai tatou e aita oia i fanauhia i Titema.

E hi‘o mai tatou eaha te huru o te mahana i tera taime o te matahiti i Betelehema, i reira Iesu i te fanauraahia. E tau toetoe e te ûa te ava‘e ati Iuda Kisilu (e tano i Novema/Titema). O Tebeta (Titema/Tenuare) te ava‘e i muri iho. To taua ava‘e ra te anuvera raro roa ’‘e o te matahiti, e te hiona i te tahi taime i nia i te mau vahi mou‘a. E hi‘o mai tatou eaha ta te Bibilia e faaite maira no nia i te ahuara‘i o taua tuhaa fenua ra.

Te faaite ra te taata papai Bibilia o Ezera e e ava‘e matauhia iho â o Kisilu no te toetoe e te ûa. I muri a‘e i to ’na parauraa e e nahoa taata tei putuputu na i Ierusalema i “te iva . . . o te marama,” Kisilu, i “te taau hoê o te mahana,” te parau ra Ezera e “te rurutaina ra” te taata no “te ûa rahi.” No nia i te huru o te mahana i taua taime o te matahiti ra, ua parau te feia iho i putuputu e: “E anotau ûa hoi teie, e ore matou e tia ia parahi noa i rapae.” (Ezera 10:9, 13; Ieremia 36:22) No reira iho â ïa te mau tiai mamoe o te faaea ra i taua mau tuhaa fenua ra e  ore faahou ai e haere i rapaeau, ratou e ta ratou mau nǎnǎ, i te po i Titema!

Te parau ra râ te Bibilia e to rapaeau te mau tiai mamoe e tiai ra i ta ratou mau nǎnǎ i te po o to Iesu fanauraa. Oia mau, te faaite ra te taata papai Bibilia ra o Luka e i taua taime ra, te “tia” ra te mau tiai mamoe “i roto i te mau aua, i te tiairaa i ta ratou mau nǎnǎ” i pihai iho ia Betelehema. (Luka 2:8-12) A tapao na e te tia mau ra te mau tiai mamoe i roto i te mau aua, aita ratou e ori haere noa ra na rapaeau i te ao. To roto ta ratou mau nǎnǎ i te mau aua i te po. Te tuati ra anei te parau e te tia ra ratou i roto i te mau aua e te mahana toetoe e te ûa i Betelehema i Titema? Aita ïa. No reira, te faaite ra te mau tupuraa e haaati ra i te fanauraa o Iesu e aita oia i fanauhia i Titema. *

Te faaite maira te Parau a te Atua inafea mau â to Iesu poheraa, e maa parau rii noa râ ta te reira e horoa ra no nia i te taime o to ’na fanauraa. Te haamana‘o maira te reira i ta te arii Solomona i parau: “E maitai rahi to te i‘oa maitai i to te mono‘i hau‘a maitai ra; e te mahana e pohe ai ra i te mahana fanauraa.” (Koheleta 7:1) No reira, e ere i te mea maere ia horoa te Bibilia e rave rahi parau rii no nia i ta Iesu taviniraa e to ’na poheraa, e maa parau rii noa râ no nia i te taime o to ’na fanauraa.

A fanauhia ’i Iesu, to roto te mau tiai mamoe e ta ratou mau nǎnǎ i te mau aua i te po

^ par. 1 Ei haamaramaramaraa hau, a hi‘o i na api 270-273 o te Haaferuriraa i nia i te mau Papai, piahia e te mau Ite no Iehova.

No te ite atu â

No te aha te mau Ite no Iehova e ore ai e faatupu i te Noela?

Noa ’tu e ua ite ratou nohea mai te Noela, e faatupu noa iho â te rahiraa i te reira. A hi‘o no te aha te mau Ite no Iehova e ore atoa ’i e na reira?