Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mau ra?

 TUHAA HAU

Te i‘oa o te Atua—Faaohiparaa e auraa

Te i‘oa o te Atua—Faaohiparaa e auraa

I ROTO i ta outou iho Bibilia, mea nafea te huriraahia te Salamo 83:18? Teie te huriraa a te Bibilia Huriraa o te ao apî o te mau Papai mo‘a: “Ia ite te taata e o oe, o Iehova te i‘oa, o oe ana‘e te Teitei i te fenua atoa nei.” Mai tera atoa te huriraa a te tahi atu mau Bibilia. Mea rahi râ te huriraa aita e faaohipa ra i te i‘oa ra Iehova, ua mono râ na roto i na tiaraa i‘oa “Fatu” aore ra “Mure ore.” Eaha râ to roto i teie irava? Te hoê tiaraa i‘oa anei aore ra te i‘oa ra Iehova?

Te i‘oa o te Atua na roto i te mau reta Hebera

Te faahiti ra teie irava i te hoê i‘oa. I roto i te reo Hebera tumu i papaihia ’i te tuhaa rahi o te Bibilia, te vai ra te hoê i‘oa otahi i ǒ nei. Ua papaihia יהוה (YHWH) na roto i te mau reta Hebera. O “Iehova” te huriraa matauhia na roto i te reo Tahiti. Hoê noa anei irava Bibilia te faahiti ra i tera i‘oa? Eita. I roto i te papai tumu o te mau Papai Hebera, fatata e 7 000 taime!

Eaha te faufaa o te i‘oa o te Atua? A hi‘o na i te hoho‘a pure ta Iesu Mesia i horoa, o te haamata mai teie: “E to matou Metua i te ao ra, ia raa to oe i‘oa.” (Mataio 6:9) I muri a‘e, ua pure Iesu i te Atua e: “E tau Metua, e haamaitai i to i‘oa.” Ei pahonoraa, ua parau te Atua mai te ra‘i mai e: “Ua haamaitai au, e e haamaitai faahou atu â vau.” (Ioane 12:28) Te taa ra ia tatou e mea faufaa roa te i‘oa o te Atua. No te aha ïa te tahi feia huri i tatara ’i i tera i‘oa i roto i ta ratou mau huriraa Bibilia e i mono atu ai na roto i te mau tiaraa i‘oa?

E au ra e te vai ra e piti tumu rahi. A tahi, mea rahi o te parau ra e eiaha e faaohipa i tera i‘oa no te mea e ere i te mea papu te faahitiraa matamua i teie mahana. Aita e vauera ia papaihia te reo Hebera no tahito ra. No reira, aita hoê a‘e taata i teie mahana e nehenehe e haapapu e nafea te taata o te mau tau Bibilia i faahiti ai YHWH. Teie râ, eiaha anei ïa tatou e faaohipa i te i‘oa o te Atua? I te mau tau Bibilia, i faahitihia na paha te i‘oa ra Iesu o Yeshua aore ra Yehoshua—aita hoê a‘e e nehenehe e parau e tera iho â anei. I teie râ mahana, te faaohipa nei te taata i te ao  nei e rave rau huru o te i‘oa ra Iesu, ma te faahiti atu mai tei matauhia i roto i to ratou reo. Aita ratou e taiâ ra i te faaohipa i tera i‘oa no te mea noa aita ratou i ite i to ’na faahitiraa i te senekele matamua ra. Oia atoa, ia reva outou i te hoê fenua ê, e ite paha outou e mea ê rii te ta‘iraa o to outou iho i‘oa na roto i te tahi atu reo. No reira, e ere te papu ore o te faahitiraa i te i‘oa o te Atua i tahito ra i te hoê tumu e ore ai e faaohipa i te reira.

Te piti o te tumu i tatarahia ’i te i‘oa o te Atua i roto i te Bibilia, e pinepine ïa no te hoê tutuu mea maoro i teie nei a te mau ati Iuda. Mea rahi o ratou tei tiaturi na e eiaha roa ’tu e faahiti i te i‘oa o te Atua. E au ra e ua niuhia teie tiaturiraa i nia i te hoê faaohiparaa tano ore o te hoê ture Bibilia o te na ô ra e: “Eiaha oe e faahiti faufaa ore noa i te i‘oa o to Atua ra o Iehova; e ore hoi Iehova e faatia ia ’na i tei faahiti faufaa ore noa i to ’na ra i‘oa.”—Exodo 20:7.

Te opani ra teie ture ia faaohipa i te i‘oa o te Atua ma te tano ore. Teie râ, te opanihia ra anei te faaohiparaa i to ’na i‘oa ma te faatura? Aita roa ’tu. Te feia i papai i te Bibilia Hebera (te “Faufaa tahito”), e tane haapao maitai ana‘e ïa o tei pee maite i te Ture ta te Atua i horoa na Iseraela i tahito ra. Ua faaohipa pinepine râ ratou i te i‘oa o te Atua. Ei hi‘oraa, ua faahiti ratou i te reira i roto e rave rahi salamo o tei himene-puai-hia e te mau nahoa taata haamori. Ua faaue atoa te Atua ra o Iehova i to ’na feia haamori ia tau i to ’na i‘oa, e ua faaroo te feia haapao maitai. (Ioela 2:32; Ohipa 2:21) No reira, aita te mau Kerisetiano no teie tau e taiâ ra i te faaohipa i te i‘oa o te Atua ma te faatura, mai ia Iesu.—Ioane 17:26.

Ma te mono i te i‘oa o te Atua na roto i te mau tiaraa i‘oa, ua hape roa ïa te feia huri Bibilia. Te faariro ra ïa ratou i te Atua ei Atua atea e te ihotaata ore, area te Bibilia ra, te faaitoito ra ïa i te taata ia faahotu i te auhoaraa piri roa e o Iehova. (Salamo 25:14) A mana‘o na i te hoê hoa piri. E nafea outou e fatata ’i ia ’na mai te peu e aita roa ’tu outou i ite i to ’na i‘oa? Oia atoa, ia vai noa te taata i roto i te taa ore i te i‘oa o te Atua, o Iehova, e nafea ïa ratou e fatata mau ai i te Atua? Hau atu â, ia ore te taata e faaohipa i te i‘oa o te Atua, eita atoa ïa ratou e ite i to ’na auraa faahiahia. Eaha hoi te auraa o te i‘oa o te Atua?

Ua faataa te Atua iho i te auraa o to ’na i‘oa i ta ’na tavini haapao  maitai ra o Mose. I to Mose aniraa i te i‘oa o te Atua, teie ta Iehova i pahono: “E riro vau mai ia ’u e riro mai.” (Exodo 3:14, Traduction du monde nouveau) Teie te huriraa a Rotherham: “E riro mai au ei mea atoa ta ’u e au.” No reira, e nehenehe Iehova e riro ei mea atoa e hinaarohia no te faatupu i ta ’na mau opuaraa e e nehenehe oia e faatupu i ta ’na e titau ia au i ta ’na i poiete e i te tupuraa o ta ’na mau opuaraa.

Eaha ta oe e rave mai te peu e e nehenehe oe e riro ei mea atoa ta oe e hinaaro? Eaha ta oe e rave no to oe mau hoa? Ia ma‘i-rahi-hia te hoê o ratou, e nehenehe oe e riro ei taote aravihi, e rapaau atu ai ia ’na. Ia fifihia te tahi atu i te pae moni, e nehenehe oe e riro ei ona hamani maitai, e faaafaro atu ai i to ’na fifi. Te parau mau râ, ua taotiahia oe i roto i ta oe e nehenehe e riro mai. O tatou paatoa. A haapii ai oe i te Bibilia, e maere oe i te iteraa e nafea Iehova e riro mai ai ei mea atoa e hinaarohia no te faatupu i ta ’na mau parau fafau. E mea au na ’na e faaohipa i to ’na mana no te maitai o te feia e here ra ia ’na. (Paraleipomeno 2, 16:9) Aita te feia tei ore i ite i to ’na i‘oa e taa ra i teie mau tuhaa nehenehe o te huru o Iehova.

Papu maitai, e mea tia ia faaohipahia te i‘oa ra Iehova i roto i te Bibilia. E ravea puai te iteraa i te auraa o tera i‘oa e te faaohipa-noa-raa i te reira i roto i ta tatou haamoriraa, no te haafatata ’tu â i to tatou Metua i te ra‘i ra o Iehova. *

^ par. 2 Ei haamaramaramaraa hau no nia i te i‘oa o te Atua, to ’na auraa e te mau tumu e mea tia ’i ia faaohipa i te reira i roto i te haamoriraa, a hi‘o i te buka rairai Te i‘oa o te Atua e vai noa e a muri noa ’tu e te buka iti Guide d’étude de la Parole de Dieu, tuhaa 1, piahia e te mau Ite no Iehova.