Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Eaha ta te Bibilia e haapii mau ra?

 PENE AHURU MA ONO

A paturu i te haamoriraa mau

A paturu i te haamoriraa mau
  • Eaha ta te Bibilia e haapii ra no nia i te faaohiparaa i te mau hoho‘a e te haamoriraa i te mau tupuna?

  • Eaha te mana‘o o te mau Kerisetiano i te mau oroa faaroo?

  • E nafea outou e nehenehe ai e faataa i ta outou mau tiaturiraa ia vetahi ê ma te ore e faahuru ê ia ratou?

1, 2. Eaha te uiraa e mea tia ia ui outou ia outou iho i muri a‘e i te faarueraa i te haapaoraa hape, e no te aha e mea faufaa ’i te reira i to outou mana‘o?

A FERURI na e ua viivii to outou vahi faaearaa atoa. E taata te faarue omoe noa ra i te mau pehu viivii na pihai iho mai, e i teie nei mea atâta roa te tupuraa no to outou ora. Eaha ta outou e rave? Eita e ore e e taui outou i te vahi faaearaa mai te peu e e nehenehe ta outou. I muri a‘e râ i to outou na reiraraa, teie noa te uiraa faufaa roa ta outou e ui, ‘Ua viivii anei au?’

2 Hoê â huru no te haapaoraa hape. Te haapii ra te Bibilia e ua ô te mau haapiiraa e te mau peu viivii i roto i tera haapaoraa. (Korinetia 2, 6:17) No reira e mea faufaa roa no outou ia haere mai i rapae au ia “Babulonia rahi,” te hau emepera o te ao atoa o te haapaoraa hape. (Apokalupo 18:2, 4) Ua na reira anei outou? Mai te peu e e, te haapopouhia nei outou. Eita râ e navai noa ia faataa ê mai aore ra ia faarue i te hoê haapaoraa hape. I muri a‘e, e mea tia ia ui outou ia outou iho, ‘Te vai noa ra anei te tahi mau mea o te haamoriraa hape i roto ia ’u?’ E rave ana‘e i te tahi mau hi‘oraa.

 HOHO‘A E HAAMORIRAA I TE MAU TUPUNA

3. (a) Eaha ta te Bibilia e parau ra no nia i te faaohiparaa i te mau hoho‘a, e no te aha e mea fifi ai no vetahi ia farii i te mana‘o o te Atua? (b) Ia aha outou i ta outou mau mea atoa i taaihia i te haamoriraa hape e tia ’i?

3 E hoho‘a aore ra e vahi haamoriraa ta vetahi i roto i to ratou fare tau matahiti i te maoro. I ǒ outou atoa anei? Mai te peu e e, e mana‘o paha outou e mea huru ê aore ra mea ino ia pure i te Atua aita ana‘e taua tauturu itea ra. Mea au roa atoa paha na outou vetahi o taua mau mea ra. O te Atua râ te parau ra e nafea ia haamori ia ’na e tia ’i, e te haapii ra te Bibilia e aita oia e hinaaro ra ia faaohipa tatou i te mau hoho‘a. (A taio i te Exodo 20:4, 5; Salamo 115:4-8; Isaia 42:8; Ioane 1, 5:21) No reira, e nehenehe outou e paturu i te haamoriraa mau ma te faaore roa i ta outou mau mea atoa i taaihia i te haamoriraa hape. Papu maitai, a hi‘o i te reira mai ta Iehova hi‘oraa—ei mea “faufau.”—Deuteronomi 27:15.

4. (a) Mea nafea tatou i te iteraa e mea faufaa ore te haamoriraa i te mau tupuna? (b) No te aha Iehova i opani ai i to ’na nunaa ia rave i te mau peu tahutahu atoa?

4 Mea matau-atoa-hia te haamoriraa i te mau tupuna i roto  e rave rahi haapaoraa hape. Hou vetahi a ite ai i te parau mau Bibilia, i tiaturi na ratou e te ora noa ra te feia pohe i roto i te hoê ao itea ore e e nehenehe ta ratou e tauturu aore ra e rave ino i te feia ora. Peneia‘e i matau na outou i te tutava rahi i te tamǎrû i to outou mau tupuna i pohe. Mai ta outou râ i ite i roto i te pene 6 o teie buka, aita te feia pohe e ora ra ma te itea i te tahi noa ’‘e vahi. No reira, aita e faufaa ia tamata i te paraparau ia ratou. Te mau poroi atoa e au ra e na te hoê taata here i pohe, no ǒ mai ïa i te mau demoni ra. No reira Iehova i opani ai i te mau Iseraela ia tamata i te paraparau i te feia pohe aore ra i te apiti i te tahi atu â peu tahutahu.—A taio i te Deuteronomi 18:10-12.

5. Eaha ta outou e nehenehe e rave mai te peu e i faaohipa na outou i te mau hoho‘a aore ra i te haamoriraa i te mau tupuna i mutaa iho?

5 Mai te peu e i faaohipa na outou i te mau hoho‘a aore ra i te haamoriraa i te mau tupuna i mutaa iho, eaha ta outou e nehenehe e rave? A taio e a feruriruri i te mau irava Bibilia o te faaite ra eaha to te Atua mana‘o i tera mau mea. A pure ia Iehova i te mau mahana atoa no nia i to outou hinaaro e paturu i te haamoriraa mau, e a ani ia ’na ia tauturu ia outou ia faaau i to outou mana‘o i nia i to ’na.—Isaia 55:9.

NOELA—AITA I FAATUPUHIA E TE MAU KERISETIANO MATAMUA

6, 7. (a) Te parauhia ra e e haamana‘o te Noela i te aha, e ua faatupu anei te mau pǐpǐ a Iesu no te senekele matamua i te reira? (b) Eaha te mau oroa fanauraa i faatupuhia i te tau o te mau pǐpǐ matamua a Iesu?

6 E nehenehe te haamoriraa a te hoê taata e viivii i te haapaoraa hape na roto i te mau oroa matauhia. A hi‘o na i te oroa Noela. Te parauhia ra e e haamana‘o te Noela i te fanauraa o Iesu Mesia, e fatata o te mau haapaoraa atoa parauhia Kerisetiano te faatupu ra i te reira. Aita râ e haapapuraa e i faatupu na te mau pǐpǐ a Iesu no te senekele matamua i taua oroa ra. Te na ô ra te hoê buka (Sacred Origins of Profound Things) e: “E piti senekele i te maoro i muri a‘e i te fanauraa o te Mesia, aita hoê a‘e i ite afea mau â to ’na fanauraahia, e mea iti tei hinaaro e ite.”

 7 Noa ’tu e ua ite te mau pǐpǐ a Iesu i te taio mahana tia o to ’na fanauraa, eita ratou e faatupu i te reira. No te aha? No te mea, ia au i te hoê buka ite rahi (The World Book Encyclopedia), “i faariro na” te mau Kerisetiano matamua “i te faatupuraa i te mahana fanauraa o te tahi taata ei peu tumu etene.” Na oroa fanauraa noa i faahitihia i roto i te Bibilia, o na oroa ïa o nau arii e piti aita i haamori ia Iehova. (Genese 40:20; Mareko 6:21) I faatupu-atoa-hia na te mau oroa fanauraa no te faahanahana i te mau atua etene. Ei hi‘oraa, i te 24 no Me, i faatupu na to Roma i te oroa fanauraa o te ruahine Diana. I te mahana i muri mai, i faatupu na ratou i te oroa fanauraa o to ratou atua mahana Apollon. No reira, ua taaihia te mau oroa fanauraa i te peu etene, eiaha i te Kerisetianoraa.

8. A faataa na i te taairaa i rotopu i te mau oroa fanauraa e te mau tiaturiraa niu ore.

8 Te vai ra te tahi atu tumu i ore ai te mau Kerisetiano no te senekele matamua i faatupu i te oroa fanauraa o Iesu. Ua ite ta ’na mau pǐpǐ e ua taaihia te mau oroa fanauraa i te mau tiaturiraa niu ore. Ei hi‘oraa, mea rahi to Heleni e to Roma i tahito ra tei tiaturi na e e apiti te hoê varua i te fanauraa o te taata taitahi e e paruru oia ia ’na i te roaraa o to ’na oraraa. “E taairaa manamana to taua varua ra e te atua no ’na te mahana fanauraa i fanauhia ’i te taata,” ta te hoê ïa buka (The Lore of Birthdays) e parau ra. Papu roa e eita Iehova e au i te mau oroa atoa o te taai ia Iesu i te mau tiaturiraa niu ore. (Isaia 65:11, 12) No te aha ïa e rave rahi roa ’i taata e faatupu ai i te Noela?

TE TUMU O TE NOELA

9. Mea nafea te 25 no Titema i te riroraa ei mahana e faatupu ai i te fanauraa o Iesu?

9 E mau hanere matahiti noa i muri a‘e i to Iesu oraraa i te fenua nei, to te taata haamataraa i te faatupu i to ’na mahana fanauraa i te 25 no Titema. E ere râ tera te taio mahana o te fanauraa o Iesu, ua fanauhia hoi oia i Atopa. * No te aha ïa te  25 no Titema i maitihia ’i? Eita e ore e “ua hinaaro” te feia i parau i muri a‘e e e Kerisetiano ratou, “ia tuati tera taio mahana e te oroa Roma etene o te ‘mahana fanauraa o te râ aito.’” (The New Encyclopædia Britannica) I te tau toetoe, e ere hoi te mahana i te mea puai roa, i faatupu na te mau etene i te mau oroa ia ho‘i mai te mahana o te horoa i te mahanahana e te maramarama, mai to ’na tereraa atea. Ua mana‘ohia ’tura e i te 25 no Titema e haamata ’i te mahana i te ho‘i mai. No te faataui i te mau etene, ua farii te mau aratai haapaoraa i teie oroa e ua tamata i te faariro atu ei oroa “Kerisetiano.” *

10. I tahito ra, no te aha te tahi mau taata i ore ai i faatupu i te Noela?

10 Mea maoro te fariiraahia e no ǒ mai te Noela i te etene ra. No to ’na tumu Bibilia ore, ua opanihia te Noela i Beretane e i te tahi mau aihuaraau Marite i te roaraa o te senekele 17. Te taata atoa e ore e haere i te ohipa, e faaea noa râ i te fare i te mahana Noela, e faautuahia ïa. Aita râ i maoro, ua ho‘i faahou mai te mau peu tumu tahito e ua haamauhia te tahi mau peu apî. Ua riro faahou mai te Noela ei oroa rahi, e aita te reira i taui i roto e rave rahi fenua. No te mea râ ua taaihia te Noela i te haapaoraa hape, eita te feia o te hinaaro ra e faaoaoa i te Atua e faatupu i te reira aore ra i te tahi atu oroa no roto mai i te haamoriraa etene. *

 MEA FAUFAA MAU ANEI IA ITE NOHEA MAI?

11. No te aha te tahi mau taata e faatupu ai i te mau oroa, eaha râ ta tatou tapitapi matamua roa?

11 Te farii nei vetahi e no ǒ mai te mau oroa mai te Noela i te etene ra, te mana‘o nei râ ratou e aita e ino ia faatupu i te reira. Inaha, aita te rahiraa o te taata e mana‘o nei i te haamoriraa hape ia faatupu ratou i te mau oroa. E mau taime maitatai hoi tera e amuimui ai te mau utuafare. Tera atoa anei to outou mana‘o? Mai te peu e e, na te here paha ïa i te utuafare, eiaha na te hinaaro i te haapaoraa hape, e haafifi ra ia outou ia paturu i te haamoriraa mau. Ia papu ia outou e te hinaaro ra Iehova, te tumu o te utuafare, ia vai te taairaa maitai i rotopu ia outou e to outou mau fetii. (Ephesia 3:14, 15) E nehenehe râ outou e haapaari i taua taairaa ra ma te fariihia e te Atua. Teie ta te aposetolo Paulo i papai no nia i ta tatou tapitapi matamua roa: “Ia itea ia outou te mea au i te Fatu ra.”—Ephesia 5:10.

E amu anei outou i te hoê monamona i ravehia mai roto mai i te taheraa pape ino?

12. A faataa no te aha e mea tia ’i ia ape tatou i te mau peu tumu e te mau oroa no ǒ mai i te mau tumu viivii ra.

12 Peneia‘e te mana‘o ra outou e e ere no te mau tumu o te mau oroa e faatupuhia ’i te reira i teie mahana. Mea faufaa mau anei ia ite nohea mai te reira? E! A rave na i te hoê hi‘oraa: E ite paha outou i te hoê monamona i roto i te taheraa pape ino. E rave mai anei outou i taua monamona ra, e amu atu ai? Eita ïa! Mea repo hoi. Mai taua monamona ra, mea au paha te mau oroa ia hi‘ohia, ua ravehia mai râ te reira mai roto mai i te mau vahi viivii. No te paturu i te haamoriraa mau, e mea tia ia tapea mai i te mana‘o o te peropheta Isaia, tei parau atu i te feia haamori mau e: “Eiaha e rave noa ’tu i te mea viivii.”—Isaia 52:11.

A HAROAROA I ROTO I TA OUTOU HAARAA I NIA IA VETAHI Ê

13. Eaha te fifi e nehenehe e tupu ia ore outou e apiti i te mau oroa?

13 E nehenehe te fifi e tupu ia faaoti outou eiaha e apiti i te mau oroa. Ei hi‘oraa, e uiui paha te mau hoa ohipa no te aha  outou e ore ai e apiti i te tahi mau oroa i ta outou vahi raveraa ohipa. E nafea outou ia pûpûhia ’tu te hoê ô Noela? Mea ino anei ia farii atu? E mai te peu e e ere hoê â tiaturiraa ta outou e ta to outou hoa faaipoipo? E nafea outou e papu ai e aita ta outou mau tamarii e mana‘o ra e te faaerehia ra ratou no te oreraa e faatupu i te mau oroa?

14, 15. Eaha ta outou e nehenehe e rave ia parauhia ’tu te tahi poroi aroha no te tahi oroa aore ra ia hinaaro te hoê taata e horoa ’tu i te tahi ô?

14 E hinaarohia te haroaroaraa no te ite eaha te rave i mua i te tupuraa taitahi. Ia parau noa mai te tahi taata i te hoê poroi aroha no te tahi oroa, e nehenehe outou e haamauruuru noa ’tu ia ’na. Mai te peu râ e mea matau outou ia ’na aore ra e pinepine outou i te rave i te ohipa na muri ia ’na, e nehenehe outou e faarahi rii atu i te parau. I roto i te mau tupuraa atoa, a faatano i te parau. Te a‘o ra te Bibilia e: “Ei parau mǎrû maitai ana‘e â ta outou, ia rapaauhia i te miti ra i te ite, ia ite outou i te mea tia ia parau atu i te taata atoa ra.” (Kolosa 4:6) A haapao maitai eiaha e faatura ore ia vetahi ê. A faataa ’tu râ i to outou tiaraa ma te faatano i te parau. A haamaramarama ’tu e aita outou e patoi ra i te mau horoaraa ô e te mau haaputuputuraa, mea au a‘e râ na outou e apiti i teie mau ohipa i te tahi atu taime.

15 E ia hinaaro te hoê taata e horoa i te tahi ô na outou? Tei te huru ïa o te tupuraa. E parau paha te taata horoa e: “Ua ite au e eita oe e faatupu i te oroa. E hinaaro râ vau e horoa i teie mea na oe.” E faaoti paha outou e e ere hoê â huru te fariiraa i te ô i roto i taua tupuraa ra, e te apitiraa i te oroa. Parau mau, mai te peu e aita te taata horoa i ite i ta outou mau tiaturiraa, e nehenehe outou e parau e eita outou e faatupu i te oroa. E tauturu te reira i te faataa no te aha outou e farii ai i te hoê ô, e ore ai râ e horoa i te tahi ô i taua taime ra. I te tahi a‘e pae, e haerea paari eiaha e farii i te ô mai te peu e ua horoahia ’tu ma te hinaaro mau e faaite e aita outou e pee ra i ta outou mau tiaturiraa aore ra e rave outou i te tahi faaauraa no te fana‘o i te tahi ô.

 E TO OUTOU MAU MELO UTUAFARE ÏA?

16. E nafea outou e nehenehe ai e faatano i te parau i mua i te mau tupuraa i taaihia i te mau oroa?

16 E mai te peu e aita te mau melo utuafare e farii ra i ta outou mau tiaturiraa? A faatano â i te parau. Aita e faufaa ia tata‘u atu i te mau peu tumu aore ra oroa atoa ta to outou mau fetii i maiti i te faatupu. A faatura râ i to ratou tiaraa e tapea i to ratou iho mana‘o, mai ta outou atoa e hinaaro ia faatura ratou i to outou tiaraa e tapea i to outou iho. (A taio i te Mataio 7:12.) Eiaha e rave i te mau mea atoa o te faaite atu e te apiti ra outou i te oroa. Ia tano noa râ to outou haerea i mua i te mau tupuraa aita i taaihia i te oroa iho. Parau mau, mea maitai ia haa noa outou ma te ore e haapeapea i te hoê mana‘o haava maitai.—A taio i te Timoteo 1, 1:18, 19.

17. E nafea outou e nehenehe ai e tauturu i ta outou mau tamarii ia ore ratou ia mana‘o e te faaerehia ra ratou no te mea te ite ra ratou ia vetahi ê ia faatupu i te mau oroa?

17 Eaha ta outou e nehenehe e rave ia ore ta outou mau tamarii ia mana‘o e te faaerehia ra ratou no te oreraa e faatupu i te mau oroa Bibilia ore? Tei ta outou ïa e rave i te tahi atu mau taime o te matahiti. E faataa te tahi mau metua i te tahi mau taime no te horoa i te ô na ta ratou mau tamarii. Hoê o te mau ô maitai roa ’‘e ta outou e nehenehe e horoa na ta outou mau tamarii, to outou ïa taime e ara-maite-raa î i te here.

A FAAOHIPA I TE HAAMORIRAA MAU

E hopoi mai te faaohiparaa i te haamoriraa mau i te oaoa mau

18. E nafea te haereraa i te mau putuputuraa Kerisetiano e nehenehe ai e tauturu ia outou ia paturu i te haamoriraa mau?

18 Ia mauruuru te Atua, e titauhia ia faarue outou i te haamoriraa hape e ia paturu i te haamoriraa mau. Eaha ïa te auraa? Te na ô ra te Bibilia e: “E haapao maite â tatou te tahi i te tahi, a faaaraara ’tu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa, mai ta te tahi pae ra peu, e faaitoito râ; e ia rahi atu â te faaitoito, no te mea te hi‘o na outou i taua mahana ra i te fatataraa  mai.” (Hebera 10:24, 25) E mau taime oaoa te mau putuputuraa Kerisetiano no outou no te haamori i te Atua ma te fariihia e ana. (Salamo 22:22; 122:1) I taua mau putuputuraa ra, e “[haa]mahanahana” te mau Kerisetiano haapao maitai te tahi i te tahi.—Roma 1:12.

19. No te aha e mea faufaa ’i ia paraparau outou ia vetahi ê no nia i ta outou i haapii i roto i te Bibilia?

19 Te tahi atu ravea e nehenehe ai outou e paturu i te haamoriraa mau, o te paraparauraa ïa ia vetahi ê no nia i ta outou i ite i roto i ta outou haapiiraa i te Bibilia e te mau Ite no Iehova. Mea rahi te taata e “autâ” e e “pii hua” mau nei no te ino e tupu nei i roto i te ao i teie mahana. (Ezekiela 9:4) Ua matau paha outou i te tahi mau taata e na reira nei. No te aha e ore ai e paraparau ia ratou no nia i to outou tiaturiraa Bibilia no a muri a‘e? A apiti ai outou i te mau Kerisetiano mau e a paraparau ai outou ia vetahi ê no nia i te pue parau mau Bibilia faahiahia ta outou i haapii, e ite outou e e moe riirii noa te mau hinaaro atoa i te mau peu tumu a te haamoriraa hape i vai noa na paha i roto i to outou aau. Ia papu ia outou e e oaoa roa outou e e fana‘o outou e rave rahi haamaitairaa mai te peu e e paturu outou i te haamoriraa mau.—Malaki 3:10.

^ par. 9 A hi‘o i te tuhaa hau “Ua fanauhia anei Iesu i Titema?

^ par. 9 E tuhaa atoa ta te mau oroa Roma Saturnales i roto i te maitiraa i te 25 no Titema. E tupu te reira no te faahanahana i te atua Roma o te faaapu i te 17-24 no Titema. Te vai ra te tamaaraa, te arearearaa, e te horoaraa ô i te roaraa o te reira.

^ par. 10 Ei faahohonuraa i te mana‘o o te mau Kerisetiano mau i te mau oroa matauhia, a hi‘o i te tuhaa hau “E mea tia anei ia faatupu tatou i te mau oroa?