Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Eaha ta te Bibilia e haapii mau ra?

 PENE AHURU MA IVA

A vai maite i roto i te here o te Atua

A vai maite i roto i te here o te Atua
  • Eaha te auraa e here i te Atua?

  • E nafea tatou e nehenehe ai e vai maite i roto i te here o te Atua?

  • E nafea Iehova e haamaitai ai i te feia e vai maite ra i roto i to ’na here?

E faariro anei outou ia Iehova ei haapuraa no outou i te roaraa o teie anotau e au i te vero?

1, 2. Ihea tatou e nehenehe ai e ite i te hoê haapuraa papu i teie mahana?

A FERURI na e te haere ra outou na nia i te purumu i te hoê mahana vero. Te haapoiri noa ’tu ra te ra‘i. Te haamata ra te uira i te anapa, te patiri i te haruru, e te ûa i te topa puai. E haaviti outou i te haere, a imi ru ai i te tahi haapuraa. I reira, i te pae purumu, e ite outou i te hoê tamǎrû. E tamǎrû paari maitai, te mǎrô e te au. Auê outou i te au i taua vahi papu ra!

2 Te ora nei tatou i te hoê anotau e au i te vero. Te ino noa ’tura te mau huru tupuraa o te ao nei. Te vai ra râ te hoê tamǎrû, te hoê haapuraa papu o te nehenehe e paruru ia tatou i te ino tamau. Eaha te reira? A hi‘o na i ta te Bibilia e haapii ra: “Te parau nei au ia Iehova, To ’u ïa haapuraa e to ’u pare, tau Atua, e ta ’u e tiaturi nei.”—Salamo 91:2.

3. E nafea tatou e nehenehe ai e faariro ia Iehova ei haapuraa no tatou?

3 A feruri na! E nehenehe Iehova, te Atua poiete e te Arii o te ao taatoa, e riro ei haapuraa paruru no tatou. E nehenehe oia e paruru ia tatou, no te mea e mea puai a‘e oia i te taata  aore ra i te mea atoa o te nehenehe e totoa ia tatou. Ia totoa-noa-hia ’tu tatou, e nehenehe Iehova e faaore i te mau faahopearaa ino atoa. E nafea tatou e nehenehe ai e faariro ia Iehova ei haapuraa no tatou? E titauhia ia tiaturi tatou ia ’na. Hau atu â, te faaitoito maira te Parau a te Atua e: “Ia vai maite outou i roto i te here o te Atua.” (Iuda 21, Traduction du monde nouveau) Oia, e titauhia ia vai maite tatou i roto i te here o te Atua, ma te atuatu i te hoê taairaa î i te here e to tatou Metua i te ra‘i. E nehenehe ïa tatou e tiaturi e o ’na to tatou haapuraa. E nafea râ tatou e nehenehe ai e faatupu i taua taairaa ra?

A ITE E A PAHONO I TE HERE O TE ATUA

4, 5. Eaha te tahi mau ravea e faaite ai Iehova i to ’na here ia tatou?

4 No te vai maite i roto i te here o te Atua, e mea tia ia taa ia tatou e nafea Iehova e faaite ai i to ’na here ia tatou. A mana‘o na i te tahi mau haapiiraa Bibilia ta outou i ite maoti teie buka. Ei Atua poiete, ua horoa mai Iehova i te fenua ei nohoraa faahiahia no tatou. Ua faaî oia i te fenua i te maa, te pape, te mau mea natura, te ora animara faahiahia e te mau mea nehenehe ia mataitai. Ei Fatu o te Bibilia, ua faaite mai te Atua i to ’na i‘oa e to ’na mau huru maitatai. Hau atu â, te faaite ra ta ’na Parau e ua tono mai oia i ta ’na iho Tamaiti here o Iesu i te fenua nei, ia mauiui e ia pohe oia no tatou. (Ioane 3:16) E eaha te auraa o taua ô ra no tatou? Te horoa maira te reira i te tiaturiraa o te hoê oraraa faahiahia no a muri a‘e.

5 Ua taai-atoa-hia râ to tatou tiaturiraa i te oraraa no a muri a‘e i te tahi atu mea ta te Atua i rave. Ua haamau Iehova i te hoê faatereraa, te Basileia Mesia, i nia i te ra‘i. E fatata taua faatereraa ra i te faaore i te mauiui atoa e i te faariro i te fenua ei paradaiso. A feruri noa na! E nehenehe tatou e ora i reira i roto i te hau e te oaoa e a muri noa ’tu. (Salamo 37:29) A tiai noa ’tu ai râ, ua horoa mai te Atua i te aratairaa e nafea ia ora maitai roa ’‘e i teie nei. Ua horoa atoa mai oia i te ô o te pure, ia nehenehe tatou e paraparau noa ’tu ia ’na. Te tahi noa mau ravea teie e faaite ai Iehova i te here i te huitaata atoa e ia outou taitahi.

6. E nafea outou e nehenehe ai e pahono i te here ta Iehova i faaite ia outou?

 6 Teie te uiraa faufaa roa ta outou e feruri: E nafea vau e pahono ai i te here o Iehova? Mea rahi te parau e, “E mea tia ia here atoa vau ia Iehova.” Tera atoa anei to outou mana‘o? Ia au ia Iesu, teie te faaueraa rahi roa ’‘e: “Hinaaro oe i to Atua ia Iehova ma to aau atoa, e ma to [“ora,” MN] atoa, e ma to mana‘o atoa.” (Mataio 22:37) Papu maitai, mea rahi te tumu e hinaaro, aore ra e here, ai outou i te Atua ra o Iehova. No te here râ ia Iehova ma to outou aau, ora e mana‘o atoa, e navai noa anei ia mana‘o e te na reira ra outou?

7. E navai noa anei ia mana‘o e here i te Atua? A faataa.

7 Mai tei faataahia i roto i te Bibilia, e ere noa te here i te Atua i te hoê mana‘o. Parau mau, mea faufaa roa te mana‘o e here ia Iehova, e haamata-noa-raa râ te reira o te here mau ia ’na. Mea faufaa roa te huero apara ia tupu mai te hoê tumu apara. Ia hinaaro râ outou i te hoê apara, e mauruuru anei outou mai te peu e e horoa noa mai te hoê taata i te hoê huero apara? Eita ïa. Oia atoa, e haamataraa noa te mana‘oraa e here i te Atua ra o Iehova. Te haapii ra te Bibilia e: “Teie . . . te hinaaro i te Atua, o te haapao i ta ’na ra parau: e ere hoi ta ’na parau i te mea teimaha.” (Ioane 1, 5:3) Ia riro te here i te Atua ei mea mau, e mea tia ia faatupu te reira i te hotu maitai. Ia itehia te reira i roto i te ohipa e tia ’i.—A taio i te Mataio 7:16-20.

8, 9. E nafea tatou e nehenehe ai e faaite i to tatou here e mauruuru i te Atua?

8 E faaite tatou i to tatou here i te Atua ia haapao tatou i ta ’na mau parau e ia faaohipa tatou i ta ’na mau faaueraa tumu. E ere te reira i te mea fifi roa ia rave. E ere roa ’tu ta Iehova mau ture i te mea teimaha, ua horoahia mai râ no te tauturu ia tatou ia ora i te hoê oraraa maitai, te oaoa, e te au. (Isaia 48: 17, 18) Ma te ora ia au i ta Iehova aratairaa, e faaite tatou i to tatou Metua i te ra‘i i to tatou mauruuru mau no te mau mea atoa ta ’na i rave no tatou. Tera noa râ, mea iti roa i roto i te ao i teie mahana o te faaite ra i taua mauruuru ra. Eita tatou e hinaaro e faaite i te mauruuru ore, mai te tahi mau taata i ora na a vai mai ai Iesu i te fenua nei. Ua faaora Iesu hoê ahuru lepera, hoê ana‘e râ tei ho‘i atu e haamauruuru ia ’na. (Luka 17:12-17) Papu maitai, e hinaaro tatou e riro mai te lepera aau mauruuru, eiaha mai na lepera mauruuru ore e iva!

9 Eaha ïa ta Iehova mau parau e mea tia ia haapao tatou? Ua hi‘opoa tatou vetahi o te reira i roto i teie buka, e hi‘o faahou mai râ tatou i te tahi. E tauturu te haapaoraa i ta te Atua mau parau ia tatou ia vai maite i roto i to ’na here.

A HAAFATATA NOA ’TU Â IA IEHOVA

10. A faataa no te aha mea faufaa ’i ia haapii noa i te ite i te Atua ra o Iehova.

10 No te haafatata ’tu â ia Iehova, e taahiraa faufaa roa te haapiiraa no nia ia ’na. Eiaha roa ’tu te reira ia mau. Mai te peu e to rapaeau outou i te hoê po toetoe roa i  pihai iho i te hoê auahi e tamahanahana ra ia outou, e vaiiho anei outou i te auahi ia iti mai, a pohe atu ai? Eita ïa. E tuu noa ’tu outou i te vahie ia ama puai noa te auahi. Ua taaihia hoi te reira i to outou iho ora! Mai te auahi e ama noa maoti te vahie, e vai puai noa atoa to tatou here ia Iehova maoti “te ite i te Atua.”—Maseli 2:1-5.

Mai te auahi, e hinaaro to outou here ia Iehova i te vahie no te ama noa

11. Eaha te faahopearaa o ta Iesu haapiiraa i nia i ta ’na mau pǐpǐ?

11 Ua hinaaro Iesu ia vai oraora e ia vai puai noa te here o ta ’na mau pǐpǐ ia Iehova e to ratou hinaaro i ta ’Na Parau faufaa roa o te parau mau. I muri a‘e i to ’na tia-faahou-raa, ua haapii Iesu i e piti o ta ’na mau pǐpǐ i te tahi o te mau parau tohu i roto i te mau Papai Hebera i tupu i nia ia ’na. Eaha te faahopearaa? Ua parau raua i muri a‘e e: “E ere, e hoa, i anaanatae to tâua aau ia ’na i paraparau mai ia tâua i te aratia ra, a faaite mai ai ia tâua i te auraa i te mau parau i papaihia ra?”—Luka 24:32.

12, 13. (a) I rotopu i te rahiraa o te taata i teie tau, ua aha ’tura te here i te Atua e te hinaaro i te Bibilia? (b) Eaha ta tatou e nehenehe e rave ia ore ia iti to tatou here?

12 I to outou iteraa i ta te Bibilia e haapii mau ra i te taime matamua, ua ite anei outou i to outou aau i te haamataraa i te î i te oaoa, te itoito rahi e te here i te Atua? Eita e ore. Mea rahi tei ite i te reira. Te tautooraa i teie nei, ia vai oraora noa ïa e ia rahi taua here puai roa. Eita tatou e hinaaro e pee i te peu a te ao i teie tau. Ua tohu Iesu e: “E riro te rahi o te taata i te iti te hinaaro.” (Mataio 24:12) Eaha ta outou e nehenehe e rave ia ore ia iti to outou here ia Iehova e to outou hinaaro i te pue parau mau Bibilia?

13 A tamau ïa i te haapii no nia i te Atua ra o Iehova e ia Iesu Mesia. (Ioane 17:3) A feruriruri, aore ra feruri hohonu, i ta outou i haapii i roto i te Parau a te Atua, ma te ui ia outou iho: ‘Eaha ta te reira e haapii maira no nia i te Atua ra o Iehova? Eaha ’tu â te tumu ta te reira e horoa maira no te here ia ’na ma to ’u aau, mana‘o e ora atoa?’ (A taio i te Timoteo 1, 4:15.) Maoti taua feruriruriraa ra e puai noa ’i to outou here ia Iehova.

14. E nafea te pure e nehenehe ai e tauturu i te faaoraora noa i to tatou here ia Iehova?

 14 Te tahi atu ravea e vai puai noa ’i to outou here ia Iehova, o te pure-tamau-raa ïa. (Tesalonia 1, 5:17) I roto i te pene 17 o teie buka, ua haapii tatou e e ô faufaa roa te pure no ǒ mai i te Atua ra. Mai te mau taairaa i rotopu i te taata o te maitai atu â maoti te aparauraa tamau e te huna ore, e vai mahanahana e e vai oraora noa atoa to tatou taairaa e o Iehova ia pure tamau tatou ia ’na. Mea faufaa roa eiaha tatou e pure faatia ture noa—ma te tahana i te parau aita e huru aau aore ra e auraa mau. E titauhia ia paraparau tatou ia Iehova mai te hoê tamarii e paraparau i to ’na papa here. Parau mau, e hinaaro tatou e paraparau ma te faatura, oia atoa râ ma te huna ore, te haavare ore e te aau atoa. (Salamo 62:8) Oia, ta tatou iho haapiiraa Bibilia e te pure haavare ore, e tuhaa faufaa roa ïa o ta tatou haamoriraa, e e tauturu te reira ia tatou ia vai maite i roto i te here o te Atua.

A OAOA I ROTO I TA OUTOU HAAMORIRAA

15, 16. No te aha e tano ai ia hi‘o i te pororaa i te Basileia ei fana‘oraa taa ê e ei tao‘a?

15 E ohipa haamoriraa ta tatou iho haapiiraa Bibilia e te pure ta tatou e nehenehe e rave o tatou ana‘e. I teie nei râ, e hi‘o mai tatou i te hoê tuhaa o te haamoriraa ta tatou e rave i mua i te taatoaraa: te faaiteraa ïa i ta tatou mau tiaturiraa ia vetahi ê. Ua faaite ê na anei outou i te tahi pue parau mau ia vetahi ê? Mai te peu e e, e fana‘oraa taa ê faahiahia ïa ta outou. (Luka 1:74) Ia faaite tatou i te pue parau mau ta tatou i haapii no nia i te Atua ra o Iehova, te rave ra ïa tatou i te hoê ohipa faufaa roa tei horoahia i te mau Kerisetiano mau atoa—oia hoi te pororaa i te parau apî maitai o te Basileia o te Atua.—A taio i te Mataio 24:14; 28:19, 20.

16 Ua hi‘o te aposetolo Paulo i ta ’na taviniraa ei ohipa faufaa roa, ma te parau i te reira ei tao‘a. (Korinetia 2, 4:7) Te paraparauraa i te taata no nia i te Atua ra o Iehova e ta ’na mau opuaraa, o te ohipa maitai roa ’‘e ïa ta outou e nehenehe e  rave. E taviniraa tera i te Fatu maitai roa ’‘e, e e horoa mai te reira i te mau haamaitairaa maitai roa ’‘e. Na roto i te raveraa i taua ohipa ra e tauturu ai outou i te feia aau haavare ore ia haafatata ’tu i to tatou Metua i te ra‘i e ia haamata i te haere na te e‘a o te ora mure ore! Eaha ’tu â te ohipa maitai a‘e? Hau  atu â, e rahi mai to outou iho faaroo e e puai atu â to outou here ia Iehova maoti te pororaa ia ’na e ta ’na Parau. E e haafaufaa roa Iehova i ta outou mau tutavaraa. (Hebera 6:10) E tauturu te rave-noa-raa i taua ohipa ra ia outou ia vai maite i roto i te here o te Atua.—A taio i te Korinetia 1, 15:58.

17. No te aha e mea ru ai te taviniraa Kerisetiano i teie mahana?

17 Mea faufaa ia haamana‘o e e mea ru te pororaa i te Basileia. Te na ô ra te Bibilia e: “E faaite hua oe i te parau, ia onoono maite â.” (Timoteo 2, 4:2) No te aha e mea ru roa ’i ia rave i te reira i teie mahana? Te na ô maira te Parau a te Atua e: “Ua fatata te mahana rahi o Iehova, te fatata maira, te peepee maira i te haere.” (Zephania 1:14) Oia, te fatata oioi maira te taime e faaore ai Iehova i teie faanahoraa taatoa o te mau mea. E mea tia ia faaarahia te taata! Ia ite atoa ratou e tia ’i e teie te taime no te maiti ia Iehova ei Arii no ratou. “E ore” te hopea “e haamaoro hua.”—Habakuka 2:3.

18. No te aha e mea maitai ai ia haamori tatou ia Iehova i mua i te taatoaraa ma te amui i te mau Kerisetiano mau?

18 Te hinaaro nei Iehova ia haamori tatou ia ’na i mua i te taatoaraa ma te amui i te mau Kerisetiano mau. No reira ta ’na Parau e na ô ai e: “E haapao maite â tatou te tahi i te tahi, a faaaraara ’tu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa, mai ta te tahi pae ra peu, e faaitoito râ; e ia rahi atu â te faaitoito, no te mea te hi‘o na outou i taua mahana ra i te fatataraa mai.” (Hebera 10:24, 25) Ia amui tatou i te mau hoa faaroo i te mau putuputuraa Kerisetiano, e taime maitai roa ïa no te arue e no te haamori i to tatou Atua here. E patu e e faaitoito atoa tatou te tahi i te tahi.

19. Eaha ta tatou e nehenehe e rave no te haapaari i te taairaa o te here i roto i te amuiraa Kerisetiano?

19 A amui ai tatou i te tahi atu feia haamori o Iehova, e haapaari tatou i te taairaa o te here e o te auhoaraa i roto i te amuiraa. Mea faufaa ia imi tatou i te mea maitai i roto i te tahi i te tahi, mai ia Iehova e imi nei i te mea maitai i roto ia tatou. Eiaha e tiai i te huru tia roa i ǒ to outou mau hoa faaroo. A  haamana‘o e mea taa ê paatoa ta tatou haereraa i mua i te pae varua e e hape ana‘e tatou. (A taio i te Kolosa 3:13.) A imi i te patu i te mau auhoaraa piri e te feia e here roa ra ia Iehova, e e ite outou ia outou iho ia haere i mua i te pae varua. Oia, e tauturu te haamoriraa ia Iehova e to outou mau taeae e tuahine pae varua ia outou ia vai maite i roto i te here o te Atua. E nafea Iehova e haamaitai ai i te feia e haamori ra ia ’na ma te haapao maitai e e vai maite ra i roto i to ’na here?

A HINAARO U‘ANA I “TE ORA MAU”

20, 21. Eaha “te ora mau,” e no te aha e tiaturiraa faahiahia ’i tera?

20 E haamaitai Iehova i ta ’na mau tavini haapao maitai i te ora, teihea râ huru ora? Te ora mau ra anei tatou i teie mahana? E parau iho â ïa te rahiraa o tatou e e. Inaha, te huti nei tatou i te aho, te tamaa nei e te inu nei. Te ora nei iho â ïa tatou. E i te mau taime oaoa a‘e no tatou, e parau atoa paha tatou e, “Tera te ora mau!” Te faaite nei râ te Bibilia e i roto i te hoê auraa faufaa, aita e taata e ora mau nei i teie mahana.

Te hinaaro nei Iehova ia fana‘o outou i “te ora mau.” E tae anei outou i reira no te fana‘o atu?

21 Te faaitoito maira te Parau a te Atua ia mau maite ia tatou “te ora mure ore [“ora mau,” MN].” (Timoteo 1, 6:19) “Te ora mau” ia au i teie mau parau, o te hoê ïa mea ta tatou e tiaturi nei e fana‘o a muri a‘e. Oia, ia riro tatou ei taata tia roa e ora roa ’i tatou i roto i te auraa taatoa o taua ta‘o ra, inaha e ora tatou mai ta te Atua i opua na no tatou. Ia parahi tatou i nia i te hoê fenua paradaiso ma te ea, te hau e te oaoa hope roa, i reira ïa tatou e fana‘o ai i “te ora mau”—te ora mure ore. (Timoteo 1, 6:12) E ere anei i te tiaturiraa faahiahia tera?

22. E nafea e mau maite ai ia outou “te ora mau”?

22 E nafea e mau maite ai ia tatou “te ora mau”? I roto i te hoê â tupuraa, ua faaitoito Paulo i te mau Kerisetiano ia “hamani maitai” e ia “tao‘a[hia] . . . i te ohipa maitatai.” (Timoteo 1, 6:18) Mea maramarama maitai e tei ta tatou ïa faaohiparaa i te pue parau mau ta tatou i haapii i roto i te Bibilia. Ua parau anei râ Paulo e e roaa ia tatou “te ora mau” na roto i te raveraa i te mau ohipa maitatai? Aita, no te mea ua taai-mau-hia taua mau tiaturiraa faahiahia ra i te fana‘oraa tatou i to  te Atua “aroha,” aore ra maitai rahi. (Roma 5:15) Mea au râ na Iehova e haamaitai i te feia e tavini ra ia ’na ma te haapao maitai. Te hinaaro nei oia e ite ia outou ia ora i “te ora mau.” O taua ora oaoa, e te hau, e te mure ore ra te tiai maira i te feia o te vai maite ra i roto i te here o te Atua.

23. No te aha e mea faufaa roa ’i ia vai maite i roto i te here o te Atua?

23 E mea maitai ia ui tatou taitahi ia tatou iho, ‘Te haamori ra anei au i te Atua mai ta ’na i faataa i roto i te Bibilia?’ Mai te peu e e hi‘opoa noa tatou i te mau mahana atoa e te na reira nei tatou, to nia ïa tatou i te e‘a maitai. E nehenehe tatou e tiaturi e o Iehova to tatou haapuraa. E paruru oia i to ’na nunaa haapao maitai i te roaraa o teie anotau hopea arepurepu o teie nei faanahoraa tahito o te mau mea. E aratai atoa Iehova ia tatou i roto i te faanahoraa apî hanahana o te mau mea e fatata maira. Auê ïa tatou i te oaoa roa ia ite tatou i taua anotau ra! E auê tatou i te oaoa roa i te raveraa i te mau maitiraa maitatai i teie anotau hopea! Mai te peu e e rave outou i taua mau maitiraa ra i teie nei, e fana‘o ïa outou i “te ora mau,” te ora mai ta te Atua ra o Iehova i opua na, e a muri noa ’tu!

No te ite atu â

No te aha e haapii ai i te Bibilia?

E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?