Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

 PENE ONO

Eaha te tupu ia pohe tatou?

Eaha te tupu ia pohe tatou?

1-3. Eaha te mau uiraa ta te taata e uiui nei e eaha te pahonoraa a te tahi mau haapaoraa?

TE FAFAU ra te Bibilia ia tae i te hoê mahana, “e ore roa te pohe.” (Apokalupo 21:4) I roto i te pene 5, ua haapii tatou e nehenehe e tiaturi e fana‘o i te ora mure ore maoti te hoo. Te pohe noa nei râ te taata. (Koheleta 9:5) Te vai ra ïa te tahi uiraa faufaa o te hiti mai, eaha te tupu ia pohe tatou?

2 Mea faufaa roa ia ite i te pahonoraa ia pohe iho â râ tei herehia e tatou. E uiui paha tatou, ‘Eaha te tupu no ’na? Te mauiui ra anei o ’na? E nehenehe anei ta ’na e tauturu mai? E farerei faahou anei tatou ia ’na?’

3 Ua rau te pahonoraa a te mau haapaoraa. E haapii vetahi, e taata maitai ana‘e oe, e haere oe i te ra‘i, e taata ino ana‘e, e haere i roto i te po auahi. E parau te tahi atu, ia pohe te hoê taata, e ora oia i roto i te ao varua e te mau fetii o tei pohe a‘ena. Te vai atoa ra o te parau ra, e nehenehe tatou e ora faahou i roto i te hoê tino ê, tino taata anei aore ra tino animara.

4. Eaha te mana‘o e matara mai i roto i te mau haapiiraa a te mau haapaoraa no nia i te pohe?

4 E au ra mea taa ê ta tera e tera haapaoraa e parau ra. Te vai ra râ hoê mana‘o e matara mai i roto i ta ratou mau haapiiraa. E ora ’tu te tahi mea ia pohe te taata. E parau mau anei râ?

 EAHA TE TUPU IA POHE TATOU?

5, 6. Eaha te tupu ia pohe tatou?

5 Ua ite o Iehova eaha te tupu ia pohe tatou e ua faaite mai oia ia pohe te taata, e faaea o ’na i te ora. E pohe atoa ïa to ’na mau huru e mana‘o. * Ia pohe tatou, eita tatou e ite, e faaroo e e feruri faahou.

6 Ua papai te arii Solomona, “aita . . . a te feia i pohe ra e parau itea.” Eita ratou e nehenehe e here aore ra e riri, “aore hoi e ohipa, aore e imiraa, aore hoi e ite, aore hoi e paari, i te apoo.”—A taio i te Koheleta 9:5, 6, 10.

TA IESU I PARAU NO NIA I TE POHE

Ua poiete o Iehova i te taata ia ora ratou i nia i te fenua e a muri noa ’tu

7. Eaha ta Iesu i parau no nia i te pohe?

7 I te poheraa o to ’na hoa Lazaro, ua na ô Iesu i ta ’na mau pǐpǐ: “Te taoto nei to tatou hoa o Lazaro.” Aita Iesu i mana‘o te tamǎrû ra Lazaro ia ’na. No reira oia i parau ai i muri a‘e: “Ua pohe Lazaro.” (Ioane 11:11-14) Ua faahoho‘a ïa Iesu i te pohe i te taoto. Aita oia i na ô ua haere Lazaro i te ra‘i aore ra i roto i te ao varua e to ’na fetii. Aita atoa i parau te haamauiuihia ra Lazaro i roto i te po auahi aore ra ua ora faahou i roto i te tahi atu tino taata aore ra animara. Ua parau râ, te taoto ra Lazaro i roto i te pohe. Te vai ra te tahi atu mau irava o te faahiti ra i te pohe mai te taotoraa. Te na ô ra te Bibilia a haapohehia ’i Setephano, “taoto ihora oia i roto i te pohe.” (Ohipa 7:60) Ua papai atoa te aposetolo Paulo no te tahi mau Kerisetiano o tei pohe, “ua taoto ïa i roto i te pohe.”—Korinetia 1, 15:6.

8. Na te aha e faaite ra aita te Atua i poiete i te taata ia pohe ratou i muri a‘e?

 8 Ua poiete anei te Atua ia Adamu e Eva ia pohe raua i muri a‘e? Aita! Ua hinaaro râ o Iehova ia oaoa raua e a muri noa ’tu e te hoê tino oraora maitai. Ua poiete oia i te taata e te hinaaro ia ora e a muri noa ’tu. A feruri na, e hinaaro anei te metua ia paari, ia ruau e ia pohe ta ’na tamarii? Eita! Hoê â huru atoa no Iehova, eita roa ’tu o ’na e hinaaro ia pohe te taata. Teie nei râ, no te aha ïa tatou e pohe ai?

 EAHA TE TUMU E POHE AI TATOU?

9. No te aha e ere te faaueraa ta Iehova i horoa ia Adamu e Eva i te mea fifi ia haapao?

9 I roto i te ô Edene, ua parau o Iehova ia Adamu: “E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” (Genese 2:9, 16, 17) E ere tera faaueraa papu i te mea fifi ia haapao. E tiaraa atoa to Iehova no te parau ia Adamu e Eva eaha te mea maitai e eaha te mea ino. Ma te faaroo ia Iehova, e faaite raua i te auraro i to ’na tiaraa, oia atoa i to raua mauruuru no te mau mea atoa ta ’na i horoa ’tu.

10, 11. (a) Mea nafea Satani i te turairaa ia Adamu e Eva ia faaroo ore i te Atua? (b) No te aha eita Adamu e Eva e nehenehe e imi i te otoheraa?

10 Ma te peapea, ua maiti Adamu e Eva i te faaroo ore ia Iehova. Ua parau Satani ia Eva: “Oia ïa, ua parau mai te Atua e, Eiaha orua e amu i to te mau raau atoa o te ô nei?” Pahono atura Eva: “E amu mâua i to te mau raau atoa o te ô nei; maori râ o to taua raau i ropu i te ô nei, ua parau mai ïa te Atua e, Eiaha orua e amu i to reira; eiaha hoi orua e rave noa ’tu; a pohe orua.”—Genese 3:1-3.

11 I muri iho, na ô atura Satani: “E ore roa orua e pohe: ua ite hoi te Atua e, ua amu ana‘e orua i to reira, e araara ïa to orua mata, e e riro orua mai te atua ra te huru, i te ite i te maitai e te ino.” (Genese 3:4-6) Ua hinaaro Satani ia mana‘o Eva e nehenehe ta ’na e faaoti no ’na iho eaha te mea maitai e eaha te mea ino. Aita atoa Satani i faaite i te parau mau no nia i te tupu ia faaroo ore Eva. Ua parau hoi, eita Eva e pohe, amu ihora te vahine i to te raau e hopoi atura te tahi na ta ’na tane.  Ua ite Adamu e Eva ua parau o Iehova eiaha e amu i te reira. Aita raua i faaroo, ua maiti râ i te ofati i te hoê faaueraa papu e te au noa. Ua faaite raua i te faatura ore i to raua Metua î i te here i te ra‘i. Eita roa raua e nehenehe e imi i te otoheraa ia faaorehia ta raua hara!

12. Ua faaroo ore Adamu e Eva ia Iehova, no te aha mea peapea mau?

12 Auê te peapea ua faaite to tatou na metua matamua i te faatura ore i to raua Atua poiete! Eaha to oe huru ia orure hau te tahi tamarii ta oe i aupuru e ia rave o ’na i ta oe i parau atu eiaha e rave? Eita anei oe e mauiui?

Ua ho‘i faahou Adamu i te repo no reira o ’na i te raveraahia mai

13. Eaha te auraa o ta Iehova parau “e ho‘i faahou atu â oe i te repo”?

13 I to raua faaroo-ore-raa, ua ere Adamu e Eva i te tiaturiraa e ora e a muri noa ’tu. Ua na ô o Iehova ia Adamu: “E repo hoi oe, e e ho‘i faahou atu â oe i te repo.” (A taio i te Genese 3:19.) Te auraa, e riro faahou Adamu ei repo mai na mua ’‘e hou o ’na a poietehia ’i. (Genese 2:7) Ua hara Adamu e i muri a‘e, ua pohe, riro atura ei repo, eiaha râ ei varua.

14. Eaha te tumu e pohe ai tatou?

14 Ahiri Adamu e Eva i faaroo i te Atua, te ora noa ra raua i teie mahana. I to raua râ faaroo-ore-raa, ua hara raua e pohe atura i muri a‘e. E au te hara i te hoê ma‘i tupuna ino mau no ǒ mai i to tatou na metua matamua. Ua fanauhia tatou paatoa ei  feia hara e tera te tumu e pohe ai tatou. (Roma 5:12) E ere râ tera ta te Atua i opua no te huitaata. Aita roa te Atua i hinaaro ia pohe te taata e te parau ra te Bibilia, e “enemi” te pohe no tatou.—Korinetia 1, 15:26.

EITA TATOU E HAAVAREHIA MAOTI TE ITE PAPU I TE PARAU MAU

15. Maoti te parau mau, eita tatou e haavarehia e teihea mau haapiiraa hape?

15 Ua ite tatou i te parau mau no nia i te tupu ia pohe te taata. Te haapii mai ra te Bibilia, eita te feia pohe e mauiui. Eita tatou e nehenehe e paraparau atu e eita atoa ta ratou e nehenehe e na reira mai. Eita tatou e nehenehe e tauturu atu e eita atoa e tia ia ratou ia na reira no tatou. Eita tei pohe e nehenehe e haamauiui mai, eiaha ïa e mǎta‘u ia ratou. E rave rahi râ haapaoraa o te haapii ra te ora ra tei pohe i te tahi vahi. E e nehenehe ta tatou e tauturu atu ma te aufau i te mau perepitero, aore ra te tahi atu mau tia haapaoraa, no te faaoti i te pure no ratou. I te mea râ ua ite tatou i teie nei i te parau mau no nia i te tupu ia pohe te taata, eita tatou e haavarehia!

16. Eaha te haapiiraa hape a te mau haapaoraa no nia i te tupu ia pohe te taata?

16 Te faaohipa ra Satani i te haapaoraa hape no te haavare i te taata e ia mana‘o ratou e ora ’tu te tahi mea ia pohe tatou. Te haapii ra anei ta oe haapaoraa i te reira aore ra i ta te Bibilia e parau ra? Te haavare ra Satani i te taata ia ore ratou ia haafatata ’tu ia Iehova.

17. No te aha te haapiiraa o te po auahi i riro ai ei faainoraa ia Iehova?

17 Mea ino roa ta te mau haapaoraa e haapii ra. Te vai ra o te parau ra e haamauiuihia te feia iino i roto i  te po auahi e a muri noa ’tu. Ua riro tera haapiiraa ei faainoraa ia Iehova. Eita roa hoi oia e haamauiui i te taata mai tera! (A taio i te Ioane 1, 4:8.) Eaha to oe mana‘o i te taata o te faautua i te tamarii ma te tuu i to ’na rima i roto i te auahi? Eita anei oe e mana‘o e taata ino mau oia? E hinaaro anei oe e riro ei hoa no tera taata? Tera mau ta Satani e hinaaro ia mana‘o tatou no Iehova na roto i tera haapiiraa!

18. No te aha eiaha tatou ia riaria i tei pohe?

18 Te parau atoa ra te tahi mau haapaoraa, e riro te feia pohe ei varua. Te haapii ra ratou e tia ia faatura e ia riaria atoa i te varua o tei pohe no te mea e nehenehe ratou e tauturu mai e aore ra e haamauiui mai. E rave rahi o tei vare i tera haapiiraa. No to ratou riaria, o te feia pohe ta ratou e haamori, eiaha râ o Iehova. A haamana‘o na, ua pohe ana‘e te taata, ua pohe atoa to ’na mau huru e mana‘o. Eiaha ïa e riaria, eita ratou e nehenehe e haamauiui mai. O Iehova te Atua mau e na ’na i poiete ia tatou, o ’na ana‘e ïa te tia ia haamori.—Apokalupo 4:11.

19. E faahiahia tatou i te aha maoti te ite papu no nia i te tupu ia pohe te taata?

19 Ua ite ana‘e tatou i te parau mau no nia i te tupu ia pohe te taata, eita tatou e haavarehia e te mau haapiiraa hape a te mau haapaoraa. E tauturu atoa mai tera ite papu ia faahiahia i te mau parau fafau a Iehova no to tatou oraraa a muri a‘e.

20. Eaha ta tatou e hi‘opoa i roto i te pene i mua ’tu?

20 Ua ani Ioba, te tahi tavini o te Atua i tahito ra: “Ia pohe te taata nei, e ora faahou anei?” (Ioba 14:14) E nehenehe mau anei tei pohe e ora faahou? Mea faahiahia mau te pahonoraa ta te Atua i horoa mai na roto i te Bibilia. E hi‘opoa tatou i te reira i te pene i mua ’tu.

^ par. 5 E tiaturi vetahi e ora ’tu te hoê varua i muri a‘e i te pohe. No te ite atu â, a hi‘o i te faataaraa hau 17 e 18 i te pae hopea o te buka.

No te ite atu â

TE PARE TIAIRAA—HAAPIIRAA

Ua pohe anei to apiti?

Mea mauiui mau ia pohe te hoê hoa faaipoipo e eita te reira e ore oioi. Hi‘o nafea te tiaturiraa Bibilia i te tia-faahou-raa e tamahanahana ’i.

A ARA MAI NA!

E uiraa ta to tamarii no nia i te pohe

Maha mana‘o e tauturu atu ia pahono i ta ’na mau uiraa e ia faaoromai ia pohe tei herehia.