Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

 PENE TORU

Eaha te opuaraa a te Atua no te huitaata?

Eaha te opuaraa a te Atua no te huitaata?

1. Eaha ta te Atua opuaraa no te huitaata?

E OPUARAA maitai roa ta te Atua no te huitaata. Ua poiete oia i te tane e te vahine matamua, Adamu e Eva, ia ora raua i roto i te hoê vahi nehenehe mau. Ua opua oia ia fanau raua i te tamarii, ia faariro i te taatoaraa o te fenua ei paradaiso e ia haapao i te animara.—Genese 1:28; 2:8, 9, 15; a hi‘o i te faataaraa hau 6 i te pae hopea o te buka.

2. (a) Eaha te haapapu ra e tupu ta te Atua i opua? (b) Eaha ta te Bibilia e parau ra no nia i te ora mure?

2 I to oe mana‘o, e riro anei te fenua ei paradaiso i te hoê mahana? Te na ô mai ra o Iehova: “Tei opuahia e au ra, o ta ’u ïa e rave.” (Isaia 46:9-11; 55:11) E tupu ta ’na i opua, eita te hoê mea e nehenehe e tapea ia ’na! Ua parau o Iehova e tumu o ’na i poiete ai i te fenua. “Aitâ râ oia i hamani ia vaiiho-taata-ore-noa-hia.” (Isaia 45:18) Te hinaaro ra te Atua ia parahi te taata i nia i te fenua. Eaha te huru taata ta ’na e hinaaro? No te hoê taime poto anei? Te na ô ra te Bibilia: “E parahi te feia parau-tia [aore ra auraro] i nia i te fenua, e parahi tamau â [aore ra e a muri noa ’tu] ratou i reira.”—Salamo 37:29; Apokalupo 21:3, 4.

3. Te ma‘ihia ra e te pohe ra te taata, eaha te uiraa e hiti mai?

3 I teie râ mahana, te ma‘ihia ra e te pohe ra te taata. I te tahi mau vahi, te tupu ra te tama‘i e te haapohehia ra te taata. Papu maitai, e ere tera ta te Atua i opua. Eaha  ïa tei tupu e no te aha mai tera ’i? O te Bibilia ana‘e te faataa mai i te reira.

TE ENEMI O TE ATUA

4, 5. (a) O vai tei paraparau ia Eva ma te faaohipa i te hoê ophi? (b) E nafea te hoê taata maitai e riro mai ai ei eiâ?

4 Te parau ra te Bibilia, e enemi to te Atua o “tei piihia te Diabolo e Satani.” Ua faaohipa Satani i te hoê ophi no te paraparau ia Eva i roto i te ô i Edene. (Apokalupo 12:9; Genese 3:1) Ua haa oia mai te huru o te ophi te paraparau ra.—A hi‘o i te faataaraa hau 7 i te pae hopea o te buka.

5 Na te Atua anei ïa i hamani i te Diabolo ra o Satani? E ere! I to ’na faaineineraa i te fenua no Adamu raua Eva, tei te ra‘i tera melahi, ua taui râ o ’na e ua riro mai ei Diabolo. (Ioba 38:4, 7) E nehenehe anei? A feruri na i te hoê taata maitai ia taui e ia riro mai ei eiâ. Ua fanauhia anei o ’na ei taata eiâ? Aita, ua faahinaaro râ o ’na i te hoê mea e ere na ’na. Ua mana‘ona‘o noa oia i te reira e puai roa a‘era tera hinaaro tia ore. Ua tiai oia i te taime tano e ua eiâ mai i te reira. Na ’na iho i maiti e riro ei taata eiâ.—A taio i te Iakobo 1:13-15; a hi‘o i te faataaraa hau 8 i te pae hopea o te buka.

6. Mea nafea te tahi melahi i riro mai ai ei enemi no te Atua?

6 Tera tei tupu i nia i tera melahi. Ua poiete o Iehova ia Adamu raua Eva e i muri iho, ua parau atu ia fanau e ia “faaî i te fenua.” (Genese 1:27, 28) Feruri ihora tera melahi, ‘Ia haamori tera mau taata ia ’u, eiaha râ ia Iehova!’ Rahi atu â o ’na i te mana‘ona‘o i te reira, rahi atu â o ’na i te faahinaaro i te mea e au ana‘e ia Iehova. Ua hinaaro tera melahi ia haamori te taata ia ’na. Opua ’tura e paraparau ia Eva e haavare ihora ia ’na. (A taio i  te Genese 3:1-5.) Riro maira te Diabolo ra o Satani ei enemi no te Atua.

7. (a) No te aha Adamu raua Eva i pohe ai? (b) Eaha te tumu tatou e ruau ai e e pohe atoa ’i?

7 Ua faaroo ore Adamu raua Eva i te Atua e ua amu i tei opanihia. (Genese 2:17; 3:6) Ua hara raua e i muri a‘e, ua pohe mai ta Iehova i parau. (Genese 3:17-19) Ua riro ta raua mau tamarii ei feia tia ore, aore ra hara, e no reira ratou i pohe atoa ’i. (A taio i te Roma 5:12.) No te taa i tei tupu, e rave ana‘e i te hoê hi‘oraa. Te hoê farii eu faraoa o tei popo‘a. Mai te aha te huru o te mau faraoa o te euhia i roto? Mea popo‘a atoa ïa. I to Adamu faaroo-ore-raa i te Atua, ua riro mai oia ei taata hara. I te mea e tamarii atoa tatou na ’na, ua naea-atoa-hia tatou i te huru tia ore, aore ra te popo‘a, o Adamu. Riro atura tatou paatoa ei taata tia ore, aore ra hara, e te tumu ïa tatou e ruau ai e e pohe atoa ’i.—Roma 3:23; a hi‘o i te faataaraa hau 9 i te pae hopea o te buka.

8, 9. (a) Eaha ta Satani i hinaaro ia mana‘o Adamu e Eva? (b) No te aha o Iehova i ore ai i haapohe ia ratou i tera iho â taime?

8 Ua haamata Satani i te orure hau ia Iehova i to ’na turairaa ia Adamu raua Eva ia faaroo ore i te Atua. Ua hinaaro ia mana‘o raua e Atua haavare o Iehova e ei faatere, eita o ’na e hinaaro i to raua maitai. Ua parau Satani aita e faufaa na te Atua e faaue atu eaha te rave, mea au a‘e na raua iho e faaoti eaha te mea maitai e te mea ino. Eaha ïa ta Iehova e rave? E nehenehe o ’na e haapohe ia Adamu e Eva ia faaea te orureraa hau. E faaite anei râ te reira o Satani tei haavare? Eita.

9 Ua faaoti o Iehova eiaha e haapohe ia ratou i tera iho â taime. Ua vaiiho râ i te taata ia faatere ia ratou iho. Na te tau e faaite papu o Satani tei haavare e o Iehova  tei ite i te mea e maitai ai te taata. E haapii atu â tatou no nia i te reira i roto i te pene 11. Eaha râ to oe mana‘o i te faaotiraa a Adamu raua Eva? Ua tano anei raua i te tiaturiraa ia Satani e te faaroo ore i te Atua? Na Iehova i horoa ia Adamu e Eva i te mau mea atoa ta raua e fana‘o ra. Te ora tia roa, te tahi nohoraa nehenehe mau e  te hoê ohipa e mauruuru ai raua. E ohipa maitai anei ta Satani i horoa ’tu? Ahiri o oe a‘e tera, eaha ta oe e rave?

10. Tei mua tatou paatoa i teihea faaotiraa faufaa?

10 I teie mahana, tei mua atoa tatou i te hoê â faaotiraa. O te ora te tiai mai ra ia maiti tatou i te auraro ia Iehova e te haapapu o Satani tei haavare. Ia maiti râ tatou i te Diabolo ei faatere, o te pohe ïa te hopearaa. (Salamo 73:28; a taio i te Maseli 27:11.) Mea iti roa te feia o te auraro ra i te Atua i teie mahana. E ere ïa te Atua te faatere o teie nei ao. O vai râ ïa?

O VAI TE FAATERE RA I TE AO?

E tia anei ia Satani ia horoa ia Iesu i tera mau basileia mai te peu e ere o ’na te fatu?

11, 12. (a) Te faaite ra te pûpûraa a Satani ia Iesu i te aha? (b) Eaha te mau irava o te faaite ra o Satani te faatere ra i te ao?

11 Ua ite Iesu o vai mau te faatere ra i te ao. I te tahi mahana, “faaite maira [Satani] ia ’na i te mau faatereraa arii atoa o te ao nei e to ratou hanahana.” I muri iho, teie ta Satani i parau ia Iesu: “Teie mau mea atoa e horoa vau na oe ia tipapa mai oe i raro a haamori mai ai ia ’u.” (Mataio 4:8, 9; Luka 4:5, 6) A feruri na, e tia anei ia Satani ia horoa ia Iesu i tera mau faatereraa arii mai te peu e ere o ’na te fatu? Eita. I ǒ nei râ, e tapao faaite ïa na Satani tera mau faatereraa atoa.

12 E na ô paha oe, ‘E ere anei o Iehova te Atua Mana hope o tei poiete i te ao? No te aha ïa e parau ai o Satani te faatere o te ao?’ (Apokalupo 4:11) Ua tano oe, o Iehova iho â tei poiete i te reira, ua pii râ Iesu ia Satani mai “te arii o teie nei ao.” (Ioane 12:31; 14:30; 16:11) Ua parau atoa te aposetolo Paulo o Satani “te atua hoi o teie faanahoraa o te ao nei.” (Korinetia 2, 4:3, 4) Ua papai atoa te aposetolo Ioane, “te vai nei râ to te ao atoa i raro a‘e i te mana o te varua ino.”—Ioane 1, 5:19.

 E NAFEA TE AO A SATANI E HAAMOUHIA ’I?

13. No te aha tatou e hinaaro ai i te hoê ao apî?

13 Te riro noa ’tura teie nei ao ei mea atâta roa. Ati a‘e ia tatou, te vai ra te tama‘i, te ohipa petaraa, te huru haavarevare e te ino. Noa ’tu ta ratou tutavaraa, eita te taata e nehenehe e faaore i tera mau fifi. O te Atua râ, ua fatata roa ïa i te haamou i teie nei ao ino i ta ’na tama‘i ra o Aramagedo. I muri iho, e haamau oia i te hoê ao apî parau-tia.—Apokalupo 16:14-16; a hi‘o i te faataaraa hau 10 i te pae hopea o te buka.

14. O vai ta Iehova i maiti ei Arii no ta ’na Faatereraa arii? Eaha ta te Bibilia i tohu no nia ia Iesu?

14 Ua maiti o Iehova ia Iesu Mesia ei Arii no ta ’na Faatereraa arii, aore ra Basileia, i te ra‘i. A tau tausani matahiti i teie nei, ua tohu te Bibilia e faatere Iesu ei “Arii no te hau” e e vai ta ’na faatereraa e a muri noa ’tu. (Isaia 9:6, 7) Ua haapii Iesu i ta ’na mau pǐpǐ ia pure no tera faatereraa. Ua na ô atu hoi oia: “Ia tae mai ta oe Faatereraa arii. Ia tupu to oe hinaaro i te fenua nei, mai i te ra‘i atoa na.” (Mataio 6:10) I te pene 8, e haapii atu â tatou e nafea te Faatereraa arii a te Atua e mono ai i te mau faatereraa o te ao. (A taio i te Daniela 2:44.) I muri iho, e faariro te Faatereraa arii a te Atua i te fenua ei paradaiso nehenehe mau.—A hi‘o i te faataaraa hau 11 i te pae hopea o te buka.

FATATA ROA TE HOÊ AO APÎ!

15. O vai te “fenua apî”?

15 Te fafau ra te Bibilia: “Te tiai nei râ tatou i te mau ra‘i apî e te hoê fenua apî . . . e i reira e vai noa ’i te parau-tia.” (Petero 2, 3:13; Isaia 65:17) I roto i te Bibilia, ua faaohipa-atoa-hia te parau “fenua” i te tahi taime no te mau taata e ora ra i nia i te fenua. (Paraleipomeno 1, 16:31) Te  “fenua apî,” o te feia atoa ïa o te auraro i te Atua e ta ’na e haamaitai.

16. Eaha te ô faahiahia mau ta te Atua e horoa i te feia o te ora i roto i te ao apî? Eaha te tia ia rave no te fana‘o i te reira?

16 Ua fafau Iesu e horoahia i te feia o te ora i roto i te ao apî “te ora mure ore.” (Mareko 10:30) Eaha te tia ia rave no te fana‘o i tera ô? A taio na i te Ioane 3:16 e te 17:3 no te ite i te pahonoraa. I teie nei, e hi‘o ana‘e eaha ta te Bibilia e parau ra no nia i te oraraa i roto i te paradaiso i nia i te fenua nei.

17, 18. E nafea ia papu e itehia te hau i te mau vahi atoa i nia i te fenua, e aore e taata faahou no te haapeapea mai?

17 E ore te ino, te tama‘i, te mau ohipa iino e te taparahiraa taata. Aore faahou taata ino i nia i te fenua. (Salamo 37:10, 11) E faaore te Atua “te tama‘i e tae roa a‘enei i te hopea fenua!” (Salamo 46:9; Isaia 2:4) O te feia ana‘e o te here i te Atua e te auraro ia ’na te parahi i nia i te fenua. E vai te hau e a muri noa ’tu.—Salamo 72:7.

18 E vai hau noa te nunaa o Iehova. Na mua ’‘e, ia faaroo te mau Iseraela i te Atua, e ora ratou ma te peapea ore no ta ’na parururaa. (Levitiko 25:18, 19) I roto i te paradaiso, eita te tahi ohipa aore ra taata e haapeapea mai ia tatou. E vai hau noa tatou paatoa!—A taio i te Isaia 32:18; Mika 4:4.

19. Na te aha e haapapu mai eita tatou e ere i te maa i roto i te ao apî a te Atua?

19 E auhune te maa. “E riro hoi e maa sitona tei te fenua i nia i te tupuai o te mau mou‘a ra.” (Salamo 72:16) “Na to tatou iho Atua [o Iehova], e haamaitai mai ia tatou” e “e hotu rahi mai ai te fenua.”—Salamo 67:6.

20. Eaha te faaite mai ra e riro te fenua ei paradaiso?

20 E riro te fenua taatoa ei paradaiso. E fana‘o te taata atoa i te hoê fare e te aua nehenehe mau. (A taio i te  Isaia 65:21-24; Apokalupo 11:18.) E nehenehe roa te fenua taatoa mai te ô i Edene ra. E haamâha o Iehova i to tatou mau hinaaro atoa. Te na ô ra te Bibilia no ’na: “Te heheu nei oe i to rima, e te haamâha nei i te hiaai o te mau mea ora atoa nei.”—Salamo 145:16.

21. E nafea tatou e ite ai e tupu te hau i rotopu i te taata e te animara?

21 E tupu te hau i rotopu i te taata e te animara. Eita te animara e amu faahou i te taata. Eita tatou e riaria no ta tatou tamarii noa ’tu tei pihai iho ratou i te animara atâta i teie mahana.—A taio i te Isaia 11:6-9; 65:25.

22. Eaha ta Iesu e rave no tei ma‘ihia?

22 E ore roa te ma‘i. I to Iesu haereraa mai i te fenua nei, e rave rahi taata ta ’na i faaora. (Mataio 9:35; Mareko 1:40-42; Ioane 5:5-9) Ei Arii râ o te Faatereraa arii a te Atua, e faaore o ’na i te ma‘i o te taata atoa. E ore roa te hoê e parau faahou: “Ua paruparu vau i te ma‘i.”—Isaia 33:24; 35:5, 6.

23. Eaha ta te Atua e rave no tei pohe?

23 E tia faahou mai tei pohe. Te fafau ra te Atua e faatia mai oia i te ora e mirioni taata tei pohe. “E tia-faahou-raa to te feia parau-tia e to te feia parau-tia ore.”—A taio i te Ioane 5:28, 29; Ohipa 24:15.

24. Eaha to oe huru i mua i te oraraa i roto i te paradaiso?

24 Tei ia tatou atura te faaotiraa. E maiti i te haapii o vai o Iehova e e tavini ia ’na e aore ra e rave mai ta tatou e hinaaro. Ia faaoti râ tatou i te tavini ia Iehova, e fana‘o tatou i te hoê oraraa oaoa a muri a‘e. Ua ani te tahi taata ia Iesu ia haamana‘o ia ’na i muri a‘e i to ’na pohe, ua haapapu atura Iesu ia ’na: “Ei te paradaiso oe e o vau atoa.” (Luka 23:43) E haapii atu â tatou no nia ia Iesu Mesia e e nafea oia e faatupu ai i ta te Atua mau parau fafau.