Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

 PENE MAHA

O vai Iesu Mesia?

O vai Iesu Mesia?

1, 2. (a) E navai anei ia ite i te i‘oa o te tahi taata tuiroo no te parau, ua matau oe ia ’na? A faataa. (b) No te taata, o vai o Iesu?

MEA rahi te taata tuiroo na te ao e ua ite paha oe te i‘oa o vetahi. E navai anei râ no te parau, ua matau oe ia ratou? Eita, e titau-atoa-hia ia ite oe mai te aha mau na to ratou oraraa e to ratou huru.

2 Ua faaroo paha oe i te parau no Iesu Mesia noa ’tu ua ora oia i nia i te fenua a hau atu 2 000 matahiti i teie nei. E rave rahi râ o tei ore i ite o vai mau na Iesu. No vetahi, e taata maitai noa, no te tahi atu, e peropheta. Te vai atoa ra o te tiaturi o Iesu te Atua. Eaha to oe mana‘o?—A hi‘o i te faataaraa hau 12 i te pae hopea o te buka.

3. No te aha mea faufaa no oe ia ite o vai o Iehova e o Iesu?

3 No te aha mea faufaa no oe ia ite i te parau mau no nia ia Iesu? Te na ô mai ra te Bibilia: “No te fana‘o i te ora mure ore, ia ite ïa ratou ia oe te Atua mau hoê roa e i ta oe i tono mai o Iesu Mesia e tia ’i.” (Ioane 17:3) Ia ite oe te parau mau no nia ia Iehova e ia Iesu, e nehenehe oe e ora e a muri noa ’tu i roto i te paradaiso i nia i te fenua nei. (Ioane 14:6) Hau atu â, e tauturu te hi‘oraa maitai roa o Iesu ia ite eaha te huru e faaite i nia ia vetahi ê. (Ioane 13:34, 35) I roto i te pene matamua, ua haapii tatou i te parau mau no nia i te Atua. I teie nei, e hi‘opoa ana‘e eaha ta te Bibilia e haapii mai no nia ia Iesu.

 O TE MESIA OE!

4. Eaha te auraa o na parau e piti Mesia e Kirito?

4 E rave rahi matahiti hou a fanauhia ’i Iesu, ua fafau Iehova i roto i te Bibilia e tono mai oia i te Mesia, aore ra Kirito. E hurihia te ta‘o Hebera ei Mesia e te ta‘o Heleni ei Kirito. Hoê â râ auraa o na parau e piti, e maiti te Atua i te Mesia fafauhia e e horoa ’tu oia i te tiaraa taa ê. E faatupu te Mesia i te mau parau fafau atoa a te Atua. Na mua ’‘e râ i to ’na fanauraa, mea rahi tei uiui o vai te Mesia.

5. Ua papu anei i te mau pǐpǐ a Iesu o ’na te Mesia?

5 Ua papu roa i te mau pǐpǐ a Iesu o ’na te Mesia fafauhia. (Ioane 1:41) Ua parau Simona Petero ia Iesu: “O te Mesia oe.” (Mataio 16:16) Eaha te mau haapapuraa o Iesu te Mesia?

6. Eaha ta Iehova i rave no te tauturu i te feia aau tae ia ite o vai te Mesia?

6 Na mua ’‘e roa i to Iesu fanauraa, ua papai te mau peropheta a te Atua e rave rahi parau o te tauturu i te taata ia ite o vai te Mesia. Ia anihia ia oe e haere e tii i te tahi taata ta oe i ore i farerei a‘enei. E ere anei i te mea ohie a‘e ia faaitehia ’tu mai te aha te huru o tera taata? Ua faaohipa atoa o Iehova i ta ’na mau peropheta no te faaite i ta te Mesia e rave e eaha te tupu i nia ia ’na. E tauturu tera mau parau tohu atoa i te feia aau tae ia ite o Iesu te Mesia.

7. Eaha e piti o te mau parau tohu o te haapapu o Iesu te Mesia?

7 E hi‘o ana‘e e piti o tera mau parau tohu. A tahi, 700 matahiti hou Iesu a fanauhia ’i, ua tohu te peropheta Mika e fanauhia te Mesia i te oire iti o Betelehema. (Mika 5:2) I reira mau Iesu i te fanauraahia!  (Mataio 2:1, 3-9) Te piti, ua tohu te peropheta Daniela e tae mai te Mesia i te matahiti 29. (Daniela 9:25) E rave rahi atu â parau tohu o te haapapu ra o Iesu te Mesia fafauhia.—A hi‘o i te faataaraa hau 13 i te pae hopea o te buka.

Ua riro Iesu ei Mesia, aore ra Kirito, i to ’na bapetizoraa

8, 9. Eaha tei tupu i te bapetizoraa o Iesu o tei haapapu o ’na te Mesia?

8 Ua haapapu maitai o Iehova, o Iesu te Mesia. Ua fafau te Atua e horoa oia i te tahi tapao ia Ioane Bapetizo no te ite o vai te Mesia. I to Iesu haereraa ia Ioane no te bapetizo ia ’na i te anavai Ioridana i te matahiti 29, ua ite Ioane i tera tapao. Te faaite ra te Bibilia eaha tei tupu: “E oti a‘era Iesu i te bapetizohia, i reira iho, haere maira oia i nia mai raro mai i te pape. E inaha, matara a‘era te ra‘i e ite a‘era Ioane i te varua o te Atua i te pouraa mai mai te uupa ra i nia ia Iesu. Inaha, e reo atoa tei faaroohia mai te ra‘i mai i te na ôraa: ‘O ta ’u Tamaiti teie, tei herehia, ta ’u i mauruuru roa.’” (Mataio 3:16, 17) Ua ite e ua faaroo Ioane i te reira, papu a‘era ia ’na o Iesu te Mesia. (Ioane 1:32-34) I tera taime, ua ninii o Iehova i to ’na varua i nia ia Iesu, riro atura oia ei Mesia. O ’na ta te Atua i maiti no te riro ei Aratai e ei Arii.—Isaia 55:4.

9 Te haapapu mai ra te mau parau tohu Bibilia, ta Iehova iho mau parau e te tapao ta ’Na i horoa, o  Iesu te Mesia. Nohea mai râ o Iesu e mai te aha to ’na huru? E hi‘o ana‘e eaha ta te Bibilia e parau ra.

NOHEA MAI IESU?

10. Eaha ta te Bibilia e haapii ra no nia i te oraraa o Iesu hou a haere mai ai i te fenua nei?

10 Te haapii ra te Bibilia i ora na Iesu i te ra‘i e rave  rahi matahiti hou a haere mai ai i te fenua nei. Ua parau Mika “mai tahito mai â” te Mesia. (Mika 5:2) Ua faaite Iesu e rave rahi taime i ora na o ’na i te ra‘i hou a fanauhia ’i ei taata. (A taio i te Ioane 3:13; 6:38, 62; 17:4, 5.) Hou Iesu a haere mai ai i te fenua, mea piri roa raua o Iehova.

11. No te aha mea here roa na Iehova ia Iesu?

11 Mea here roa na Iehova ia Iesu. Na ’na hoi i poiete ia ’na na mua ’‘e te mau mea atoa. No reira o ’na e piihia ’i, “te matahiapo o te mau mea atoa i poietehia.” * (Kolosa 1:15) Mea faufaa roa atoa o ’na no te Atua no te mea o Iesu ana‘e ta Iehova iho i hamani. Te tumu ïa e piihia ’i o ’na, te “Tamaiti otahi.” (Ioane 3:16) O Iesu ana‘e atoa ta Iehova i faaohipa no te hamani i te tahi atu mau mea. (Kolosa 1:16) O ’na ana‘e atoa “te Parau” no te mea ua faaohipa o Iehova ia ’na no te faaite i te mau poroi e faaueraa i te mau melahi e i te taata.—Ioane 1:14.

12. Eaha te haapapu mai ra mea taa ê Iesu e mea taa ê te Atua?

12 Te tiaturi nei vetahi o Iesu te Atua. E ere râ tera ta te Bibilia e haapii ra. Te na ô ra hoi te Parau a te Atua, mea hamanihia Iesu, e haamataraa ïa to ’na. Area o Iehova tei hamani i te mau mea atoa, aore roa ïa! (Salamo 90:2) Ei Tamaiti na te Atua, aita roa Iesu i mana‘o noa ’‘e e haru i te tiaraa o te Atua. Mea papu maitai ta te Bibilia e haapii ra, mea puai a‘e te Metua  i te Tamaiti. (A taio i te Ioane 14:28; Korinetia 1, 11:3.) O Iehova ana‘e te “Atua mana hope.” (Genese 17:1) O ’na te mea teitei roa ’‘e e te mea puai roa ’‘e i te ao.—A hi‘o i te faataaraa hau 14 i te pae hopea o te buka.

13. No te aha te Bibilia e parau ai no Iesu, “o ’na te hoho‘a o te Atua ite-ore-hia”?

13 Ua ohipa amui o Iehova e ta ’na Tamaiti Iesu e miria matahiti hou a poietehia ’i te ra‘i e te fenua. Mea here roa raua i te tahi e te tahi! (Ioane 3:35; 14:31) Ua faaite Iesu i te mau huru maitatai o to ’na Metua ma te tia roa i parau ai te Bibilia, “o ’na te hoho‘a o te Atua ite-ore-hia.”—Kolosa 1:15.

14. Mea nafea te Tamaiti here a Iehova i fanauhia ’i ei taata?

14 Ua farii te Tamaiti here roa a Iehova ia faarue i te ra‘i e ia fanauhia ei taata i te fenua nei. Mea nafea ïa te reira i te tupuraa? Ua faatupu o Iehova i te hoê semeio, ua tuu i te ora o ta ’na Tamaiti i roto i te opu o te hoê paretenia o Maria te i‘oa. Aita ïa i titauhia i te hoê tane. Ua fanau Maria i te hoê tamaiti tia roa e ua horoa ’tu i te i‘oa Iesu.—Luka 1:30-35.

MAI TE AHA TE HURU O IESU?

15. E nafea oe ia ite atu â o vai o Iehova?

15 Ma te taio i te mau Evanelia a Mataio, Mareko, Luka e Ioane, e haapii atu â oe no nia ia Iesu, to ’na oraraa e to ’na mau huru maitatai. E tauturu te reira ia oe ia ite atu â o vai o Iehova i te mea ua faaite Iesu i te hoê â huru e to to ’na Metua. No reira i tia ’i ia ’na ia parau: “O tei ite mai ia ’u, ua ite atoa ïa i te Metua.”—Ioane 14:9.

16. Eaha ta Iesu i haapii? No ǒ mai ia vai te mau haapiiraa a Iesu?

 16 E rave rahi tei pii ia Iesu, Orometua. (Ioane 1:38; 13:13) Hoê o ta ’na mau haapiiraa faufaa roa ’‘e, o “te parau apî oaoa o te Faatereraa arii.” Eaha tera Faatereraa arii? O te faatereraa a te Atua i te ra‘i o te mana mai i nia i te fenua taatoa e te haamaitai i te feia o te auraro i te Atua. (Mataio 4:23) No ǒ mai ia Iehova te mau haapiiraa atoa a Iesu. Ua na ô hoi oia: “E ere na ’u iho ta ’u e haapii nei, na tei tono mai râ ia ’u.” (Ioane 7:16) Ua ite Iesu te hinaaro ra o Iehova ia faaroo te taata atoa i te parau apî oaoa no nia i te Faatereraa arii a te Atua.

17. Ihea Iesu e haapii ai i te taata? Eaha te tumu oia i haa ’i ma te itoito no te haapii ia vetahi ê?

17 Ua haapii Iesu i te taata i te mau vahi atoa. I te mau oire, te matete, te hiero, te mau sunago e i tera e tera fare. Aita Iesu i tiai na te taata e farerei atu ia ’na, e pinepine, na ’na i haere ia ratou. (Mareko 6:56; Luka 19:5, 6) Ua haa Iesu ma te itoito e ua horoa i to ’na taime e puai no te haapii i te taata. Eaha te tumu? Ua ite Iesu tera te hinaaro o te Atua e mea faaroo roa na ’na i to ’na Metua. (Ioane 8:28, 29) Ua poro atoa Iesu no to ’na aroha i te taata. (A taio i te Mataio 9:35, 36.) Ua ite Iesu aita te mau aratai haapaoraa i haapii i te parau mau no nia i te Atua e ta ’na Faatereraa arii. Ua hinaaro oia ia faaroo e rave rahi i te parau apî oaoa.

18. Eaha te mau huru maitatai o Iesu ta oe e au roa ’‘e?

18 Mea here na Iesu i te taata e mea tâu‘a atoa ia ratou. E taata maitai e te ohie ia tapiri atu. Mea au atoa na te mau tamarii e haere ia ’na. (Mareko 10:13-16)  Ua rave noa Iesu i te mea tia. Mea au ore na ’na te ohipa taviri taata e te tano ore. (Mataio 21:12, 13) I tera tau, e haafaufaa-ore-hia te mau vahine e eita atoa e faaturahia. Area Iesu, ua faaite ïa i te maitai i nia i te mau vahine e ua faatura ’tu. (Ioane 4:9, 27) E taata haehaa mau atoa Iesu. I te hoê po, ua rave oia i te ohipa a te hoê tavini, ua horoi i te avae o ta ’na mau aposetolo.—Ioane 13:2-5, 12-17.

Ua poro Iesu i te taata i te mau vahi atoa

19. A horoa na i te tahi hi‘oraa o te haapapu ua ite Iesu i te hinaaro mau o te taata e ua tauturu atoa ia ratou.

19 Ua ite Iesu i te hinaaro mau o te taata e ua tauturu atoa ia ratou. Ua faaohipa hoi o ’na i te mana o te Atua no te faaora i te taata na roto i te mau semeio. (Mataio 14:14) I te hoê mahana, ua na ô atu te tahi lepera ia ’na: “Ia tia ia oe, e nehenehe oe e tamâ ia ’u.” Ua taa roa ia Iesu i te mauiui ta tera taata e faaoromai ra. Aroha a‘era Iesu ia ’na e ua tauturu atu. Ua toro i to ’na rima, ua tapea i tera lepera e ua na ô: “E tia ia ’u! Ia mâ oe.” Ora ihora to ’na ma‘i! (Mareko 1:40-42) A feruri na i te huru o tera taata!

AITA I TAIVA NOA ’‘E I TO ’NA METUA

20, 21. No te aha o Iesu te hi‘oraa maitai roa ’‘e no te auraro i te Atua?

20 O Iesu te hi‘oraa maitai roa ’‘e no te auraro i te Atua. Aita roa oia i taiva i to ’na Metua i roto i te mau tupuraa atoa e noa ’tu eaha ta to ’na mau enemi i rave. Aita Iesu i hara i to Satani faahemaraa ia ’na. (Mataio 4:1-11) Aita atoa vetahi mero o to Iesu utuafare i tiaturi o ’na te Mesia e ua parau “ua maamaahia  oia.” Ua faaea anei râ Iesu i te rave i te ohipa a te Atua? Aita roa ’tu! (Mareko 3:21) Noa ’tu te ino rahi o to ’na mau enemi i nia ia ’na, ua tapea Iesu i to ’na taiva ore i te Atua e aita roa i tamata i te tahoo atu.—Petero 1, 2:21-23.

21 Aita atoa oia i taiva ia Iehova noa ’tu ua haamauiuihia o ’na e ua pohe ma te ino mau. (A taio i te Philipi 2:8.) A feruri na i ta ’na i faaruru i te mahana o to ’na poheraa. Ua tapeahia, ua pari-haavare-hia ua faaino oia i te Atua, ua faautuahia e te mau haava o tei petahia, ua faaooo te taata ia ’na, ua hamani-ino-hia e te mau faehau e ua patiti ia ’na i nia i te raau. Ma te autâ, ua auê oia hou a pohe ai: “Ua hope ia ’u  i te rave i ta oe i ani mai!” (Ioane 19:30) Toru mahana i muri iho, ua faatia mai o Iehova ia Iesu i te ora e ua horoa ’tu i te hoê tino varua. (Petero 1, 3:18) E 40 mahana i muri a‘e, ua ho‘i Iesu i te ra‘i, “e ua parahi i te rima atau o te Atua” e ua tiai i te taime e faariro ai te Atua ia ’na ei Arii.—Hebera 10:12, 13.

22. E nehenehe tatou e fana‘o i te aha maoti te taiva ore o Iesu i to ’na Metua?

22 Maoti te taiva ore o Iesu i to ’na Metua, e nehenehe tatou e fana‘o faahou i te ora mure ore i roto i te paradaiso i nia i te fenua mai ta Iehova i opua. I roto i te pene i mua ’tu, e hi‘opoa ana‘e e nafea tatou e fana‘o ai i te reira maoti te pohe o Iesu.

^ par. 11 O Iehova te Metua no te mea na ’na i hamani i te mau mea atoa. (Isaia 64:8) E Tamaiti Iesu na te Atua no te mea na Iehova i poiete ia ’na. E tamarii atoa te mau melahi e o Adamu na te Atua.—Ioba 1:6; Luka 3:38.